၁၀ - ၁၀ - ၂၀၂၆ ( m.CDM ပြည်တွင်းသတင်းများ )

၁၀ - ၁၀ - ၂၀၂၆ ( m.CDM ပြည်တွင်းသတင်းများ )

မင်္ဂလာပါရှင်/ခင်ဗျာ အခုချိန်ကစပြီး m.CDM ရဲ့ ပြည်တွင်းသတင်းများကို ဖတ်ကြားတင်ပြပေးသွားမှာဖြစ်ပါတယ်။
ဒီကနေ့မှာတင်ပြပေးမယ့်သတင်းတွေကတော့

၁။နွေဦးတော်လှန်ရေး မဟာမိတ်တပ်ပေါင်းစု (SRA) ရဲ့ ဒုတိယအကြိမ် ညီလာခံကို NUG ယာယီသမ္မတ နဲ့ AA ဒု- စစ်ဦးစီးချုပ် အပါအဝင် တော်လှန်ရေး ခေါင်းဆောင်တွေ တက်ရောက်

၂။စစ်တွေ၊ ငပြီကျွန်းကို ကမ်းတက်ဖို့ ကြိုးစားတဲ့ စစ်ကော်မရှင်တပ် AA ရဲ့ တိုက်ခိုက်မှုကြောင့် ၂၀ ကျော် သေဆုံး၊မိုးဗြဲမြို့အနီးမှာ စစ်ကော်မရှင် စစ်ကြောင်း တိုက်ခိုက်ခံရပြီး အကျအဆုံးများစွာနဲ့ ဆုတ်ခွာထွက်ပြေး၊
မိုးမိတ်မှာ KIA ပူးပေါင်းတပ်တွေနဲ့ တိုက်ပွဲပြင်းထန်နေပြီး ဆင်တဲကုန်းရွာကို စစ်ကော်မရှင် ဗုံးကြဲ၊

၃။မင်းတုန်းမှာ အကြမ်းဖက် စစ်အုပ်စုက ပါရာမော်တာနဲ့ ဗုံးကြဲတိုက်ခိုက် ကလေးတစ်ဦး အပါအဝင် ၂ ဦး သေဆုံး၊ဒီပဲယင်းမှာလည်း ပါရာမော်တာနဲ့ ဗုံးကြဲတိုက်ခိုက်မှုကြောင့် မသန်စွမ်းသူ အပါအဝင် ၂ ဦး ဒဏ်ရာရ

၄။ရွှေ့ပြောင်းအလုပ်သမားတွေဆီက အမြတ်ထုတ်နေတဲ့ ပွဲစားတွေကိုအရေးယူဖို့နဲ့ CI စင်တာတွေ ဖျက်သိမ်းပေးဖို့ ထိုင်းအောက်လွှတ်တော် အလုပ်သမားရေးရာကော်မတီထံ တောင်းဆို စတဲ့ သတင်းအပါအဝင် တခြား သတင်းအကြောင်းအရာတွေကိုပါ တင်ပြပေးသွားမှာပဲ ဖြစ်ပါတယ်။

အခုပထမဆုံးအနေနဲ့
⁨၁။နွေဦးတော်လှန်ရေး မဟာမိတ်တပ်ပေါင်းစု (SRA) ရဲ့ ဒုတိယအကြိမ် ညီလာခံကို NUG ယာယီသမ္မတ နဲ့ AA ဒု- စစ်ဦးစီးချုပ် အပါအဝင် တော်လှန်ရေး ခေါင်းဆောင်တွေ တက်ရောက်
=====================
m.CDM အောက်တိုဘာ ၉ ရက်။

နွေဦးတော်လှန်ရေး မဟာမိတ်တပ်ပေါင်းစု (SRA) ဒုတိယအကြိမ် ညီလာခံမှာ NUG ယာယီသမ္မတ ဒူဝါလရှီးလ နဲ့ အာရက္ခတပ်တော် (AA) ဒုစစ်ဦးစီးချုပ် ဒေါက်တာညိုထွန်းအောင် အပါအဝင် တော်လှန်ရေး ခေါင်းဆောင်တွေ တက်ရောက်ခဲ့ကြတယ်လို့ သိရပါတယ်။

စက်တင်ဘာ ၂၈ ရက်နေ့ကနေ ၃၀ ရက်နေ့အထိ ၃ ရက်ကြာ ပြုလုပ်ခဲ့တဲ့ အဆိုပါ ညီလာခံဖွင့်ပွဲမှာ NUG ယာယီ သမ္မတ ဒူဝါလရှီးလ၊ AA ဒုစစ်ဦးစီးချုပ် ဒေါက်တာညိုထွန်းအောင်၊ အမျိုးသမီးများအဖွဲ့ချုပ် (WLB) အထွေထွေ အတွင်းရေးမှူး မော်ဘားမာဦး၊ ABSDF ဥက္ကဋ္ဌ ရဲဘော်သံခဲ နဲ့ SRA ဦးဆောင်ကော်မတီဝင် ဖြစ်သူ KNDF ဥက္ကဋ္ဌ ခွန်းဘီထူး တို့က အသီးသီး အဖွင့်မိန့်ခွန်း ပြောကြားခဲ့တယ်လို့ ဆိုပါတယ်။

ညီလာခံမှာ SRA ဦးဆောင်ကော်မတီဝင်တွေ၊ အဖွဲ့ဝင်ကိုယ်စားလှယ် တပ်မှူးတွေနဲ့ လေ့လာသူ စုစုပေါင်း ၉၅ ဦး တက်ရောက်ခဲ့ကြပြီး၊ စစ်ဒေသ ၃ ခုရဲ့ အစီရင်ခံစာတွေကို အပြန်အလှန်ဆွေးနွေးကာ ရှေ့လုပ်ငန်းစဉ်တွေ ချမှတ် ခဲ့ကြတယ်လို့ သိရပါတယ်။

ထို့အပြင် လုပ်ငန်းတွေကိုဖော်ဆောင်ရာမှာ ပိုမိုထိရောက်မြန်ဆန်စေဖို့နဲ့ စီမံခန့်ခွဲမှု အားကောင်းလာစေဖို့အတွက် အထွေထွေ အတွင်းရေးမှူး၊ တွဲဖက် အတွင်းရေးမှူး ၁ နဲ့ တွဲဖက် အတွင်းရေးမှူး ၂ တို့ ပါဝင်တဲ့ အတွင်းရေးမှူး အဖွဲ့ ကိုလည်း စတင် ဖွဲ့စည်းနိုင်ခဲ့တယ်လို့ ဆိုပါတယ်။

SRA တပ်ပေါင်းစုကို စစ်ရေးသီးသန့်မဟုတ်ဘဲ နိုင်ငံရေးအရပါ စုဖွဲ့ထားတာဖြစ်ပြီး၊ အဖွဲ့ဝင်တွေအနေနဲ့ စစ်ရာဇ ဝတ်မှု ကျူးလွန်တာမျိုးတွေ ရှိလာခဲ့ရင် အရေးယူနိုင်ဖို့ ဖွဲ့စည်းပုံနဲ့ မူဝါဒတချို့ကိုပါ ပြင်ဆင် အတည်ပြုခဲ့တယ်လို့ သိရပါတယ်။

SRA တပ်ပေါင်းစု အနေနဲ့ အာဏာရှင်စနစ် ချုပ်ငြိမ်းပြီး၊ ဖက်ဒရယ် ဒီမိုကရေစီစနစ် ပေါ်ပေါက်လာရေးအတွက် မဟာမိတ် အဖွဲ့အစည်းတွေနဲ့ ဟန်ချက်ညီညီ ဆက်လက် တိုက်ပွဲဝင်သွားမယ်လို့လည်း အသိပေးထားပါတယ်။
————————————
၂။စစ်တွေ၊ ငပြီကျွန်းကို ကမ်းတက်ဖို့ ကြိုးစားတဲ့ စစ်ကော်မရှင်တပ် AA ရဲ့ တိုက်ခိုက်မှုကြောင့် ၂၀ ကျော် သေဆုံး၊မိုးဗြဲမြို့အနီးမှာ စစ်ကော်မရှင် စစ်ကြောင်း တိုက်ခိုက်ခံရပြီး အကျအဆုံးများစွာနဲ့ ဆုတ်ခွာထွက်ပြေး၊
မိုးမိတ်မှာ KIA ပူးပေါင်းတပ်တွေနဲ့ တိုက်ပွဲပြင်းထန်နေပြီး ဆင်တဲကုန်းရွာကို စစ်ကော်မရှင် ဗုံးကြဲ၊
====================
m.CDM အောက်တိုဘာ ၉ ရက်။

ရခိုင်ပြည်နယ်၊ စစ်တွေမြို့အရှေ့ဘက် ပေါက်တော မြို့နယ်ထဲက ငပြီကျွန်းကို အကြမ်းဖက် စစ်တပ်က ကမ်းက တက်ဖို့ ကြိုးစားခဲ့ရာမှာ အာရက္ခတပ်တော် (AA) ရဲ့ တိုက်ခိုက်မှုကြောင့် အယောက် ၂၀ ဝန်းကျင် သေဆုံးခဲ့တယ် လို့ စစ်ရေးသတင်းရင်းမြစ်တွေက ပြောပါတယ်။

အောက်တိုဘာလ ၈ ရက်၊ ညနေပိုင်းမှာ ကမ်းတက်ဖို့ ကြိုးစားလာတဲ့ စစ်သင်္ဘောတွေကို AA က လက်နက်ကြီးနဲ့ ဒရုန်းတွေ အသုံးပြုပြီး တိုက်ခိုက်ခဲ့ရာ ဇက်သင်္ဘော တစ်စီးကို တိုက်ရိုက်ထိမှန် ပေါက်ကွဲခဲ့တယ်လို့ ဆိုပါတယ်။

အောက်တိုဘာလ ၉ ရက်နေ့မှာလည်း စစ်ကော်မရှင် နေဗီသင်္ဘော ၂ စီး ထပ်မံထိမှန်ခဲ့ပေမယ့် စစ်ကော်မရှင်တပ် ဟာ စစ်မှုထမ်းတပ်သားသစ်တွေကို Speed Boat တွေနဲ့ အသေခံ ကမ်းတက်ခိုင်းနေတယ်လို့ သိရပါတယ်။

စစ်တွေမြို့မှာ ဝန်းရံပိတ်ဆို့ခံထားရတဲ့ စစ်ကော်မရှင်တပ်ဟာ ထွက်ပေါက်ရဖို့အတွက် အောက်တိုဘာလ ၇ ရက် နေ့မှစတင်ကာ စစ်သင်္ဘော ၆ စီး၊ အမြန်ရေယာဉ် ၁၀ စီးခန့် အသုံးပြုပြီး ငပြီကျွန်းမှာ ခြေကုတ်ယူနိုင်ဖို့ ကြိုးပမ်း နေတာပါ။

ကမ်းပေါ် ရောက်လာတဲ့ စစ်ကော်မရှင် တပ်သားအချို့ဟာလည်း AA နဲ့ တိုက်ပွဲတွေ အပြင်းအထန် ဖြစ်ပွားခဲ့ပြီး၊ ဆယ်နဲ့ချီ သေဆုံးထားကာ အရှင် ဖမ်းဆီးခံထားရသူတွေလည်း ရှိတယ်လို့ သိရပါတယ်။

ငပြီကျွန်း တိုက်ပွဲအတွင်း စစ်ကော်မရှင်တပ်က တိုက်လေယာဉ်တွေနဲ့ အပြင်းအထန် ပစ်ကူပေးနေသလို ဒ.က.စ စစ်တွေနဲ့ အနီးဆုံးဖြစ်တဲ့ တောကန် နဲ့ နာရီကန် အနီးမှာလည်း ဒီကနေ့ (အောက်တိုဘာလ ၉ ရက်) မနက်ပိုင်းက စတင်ကာ တိုက်ပွဲတွေ ပြင်းထန်နေတယ်လို့ ဒေသခံတွေထံက သိရပါတယ်။

တစ်ဖက်မှာလည်း ရှမ်း-ကရင်နီ အစပ် မိုးဗြဲမြို့ အနောက်ဘက်ခြမ်းကို ထိုးစစ်ဆင်လာတဲ့ အကြမ်းဖက် စစ်တပ်နဲ့ ကရင်နီတော်လှန်ရေး ပူးပေါင်းတပ်တွေကြား တိုက်ပွဲပြင်းထန်ခဲ့ပြီး၊ စစ်ကော်မရှင် တပ်ဘက်က ၇၀ ဝန်းကျင်ခန့် သေဆုံးခဲ့တယ်လို့ စစ်ရေးသတင်းရင်းမြစ်တွေက ပြောပါတယ်။

မိုးဗြဲ-နန်းမယ်ခုံ လမ်းမကြီးကို ထိန်းချုပ်ဖို့ ဖယ်ခုံမြို့ကနေ ထွက်လာတဲ့ ၎င်းစစ်ကြောင်းဟာ အောက်တိုဘာလ ၇ ရက်နေ့က လွယ်ယင်းတောင်ခြေ အနီးမှာ တိုက်ခိုက်ခံလိုက်ရတာဖြစ်ပြီး၊ ထိခိုက်သေဆုံးမှု များစွာနဲ့ ပြန်ဆုတ်ခွာ သွားတယ်လို့ ဆိုပါတယ်။

ဆုတ်ခွာသွားတဲ့စစ်ကြောင်းကို တော်လှန်ရေးပူးပေါင်းတပ်တွေက လိုက်လံတိုက်ခိုက်ခဲ့ရာ ကာကင်းစခန်း ၁ ခုကို သိမ်းပိုက်နိုင်ခဲ့ပြီး၊ လက်နက်ခဲယမ်းတွေနဲ့ စစ်သုံ့ပန်း တချို့ကိုပါ ဖမ်းဆီးရမိခဲ့တယ်လို့ သိရပါတယ်။

တိုက်ပွဲတွေအတွင်း အထိနာနေတဲ့ အကြမ်းဖက် စစ်တပ်ဟာ ဂျက်ဖိုက်တာ၊ Y-12 နဲ့ အသေခံဒရုန်းတွေ အသုံးပြု ပြီး တောက်လျောက် ဗုံးကြဲတိုက်ခိုက် နေတာကြောင့် ပြည်သူတွေအနေနဲ့ လေကြောင်းအန္တရာယ်ကို အထူးသတိ ပြုကြဖို့ တိုက်တွန်းထားပါတယ်။

အလားတူ ရှမ်းပြည်နယ် မြောက်ပိုင်း၊၊ မိုးမိတ်မြို့နယ်၊ မိုးမိတ်-တွင်းငယ် လမ်းပိုင်းမှာလည်း ကချင်လွတ်လပ်ရေး တပ်မတော် (KIA) ပူးပေါင်းတပ်နဲ့ စစ်ကော်မရှင်တပ်တို့ကြား တိုက်ပွဲတွေ ပြင်းထန်နေတယ်လို့ သိရပါတယ်။

အောက်တိုဘာလ ၉ ရက်၊ မနက် ၄ နာရီခန့်မှစတင်ကာ တိုက်ပွဲတွေ ပြင်းပြင်းထန်ထန် ဖြစ်ပွားခဲ့ပြီး၊ ဆင်တဲကုန်း ကျေးရွာနဲ့ အနီးတဝိုက်ကို စစ်ကော်မရှင်တပ်က ဂျက်ဖိုက်တာနဲ့ တရစပ် ဗုံးကြဲတိုက်ခိုက်နေတယ်လို့ ဆိုပါတယ်။

အောက်တိုဘာလ ၈ ရက်၊ မနေ့ကလည်း မိုးမိတ်-တွင်းငယ် လမ်းပိုင်းက ဝဲဘောင်းကျေးရွာ အနီးမှာ တိုက်ပွဲတွေ ဖြစ်ပွားခဲ့ပြီး၊ လက်ရှိမှာတော့ ဝဲဘောင်း၊ လီဆူနဲ့ ဆင်တဲကုန်းကျေးရွာတွေကို တော်လှန်ရေး ပူးပေါင်းတပ်တွေက ထိန်းချုပ်ထားတယ်လို့ သိရှိရပါတယ်။
--------------------------
၃။မင်းတုန်းမှာ အကြမ်းဖက် စစ်အုပ်စုက ပါရာမော်တာနဲ့ ဗုံးကြဲတိုက်ခိုက် ကလေးတစ်ဦး အပါအဝင် ၂ ဦး သေဆုံး၊ဒီပဲယင်းမှာလည်း ပါရာမော်တာနဲ့ ဗုံးကြဲတိုက်ခိုက်မှုကြောင့် မသန်စွမ်းသူ အပါအဝင် ၂ ဦး ဒဏ်ရာရ
==================
m.CDM အောက်တိုဘာ ၉ ရက်။

မကွေးတိုင်း သရက်ခရိုင်၊ မင်းတုန်းမြို့နယ် ချင်းနစ်ကျေးရွာကို အကြမ်းဖက် စစ်ကော်မရှင်တပ်က ပါရာမော်တာ ဖြင့် ဗုံးကြဲချ တိုက်ခိုက်ခဲ့တာကြောင့် ကလေးငယ် တစ်ဦးနဲ့ အဖိုးအိုတစ်ဦး သေဆုံးကာ ၃ ဦး ဒဏ်ရာရခဲ့တယ်လို့ သရက်ခရိုင်၊ အမှတ် (၄) တပ်ရင်းက ထုတ်ပြန်ထားပါတယ်။

အောက်တိုဘာလ ၈ ရက် ညနေ ၅ နာရီခန့်က သရက်အခြေစိုက် ကပစ (၁၂) ကနေ တက်လာတဲ့ ပါရာမော်တာ ၃ စီးဟာ ချင်းနစ်ရွာထဲကို ဗုံးသီး ၉ လုံး ကြဲချခဲ့တဲ့အပြင် လက်နက်ငယ်တွေနဲ့ပါ ပစ်ခတ်သွားတယ်လို့ ဆိုပါတယ်။

၎င်းတိုက်ခိုက်မှုအတွင်း အသက် ၁၂ နှစ်အရွယ်ရှိ မောင်ဝေယံဦး နဲ့ ၈၃ နှစ်အရွယ် ဦးထွန်းတင် တို့နှစ်ဦး ပွဲချင်းပြီး သေဆုံးသွားခဲ့ပြီး၊ တခြားလူငယ် ၃ ဦးလည်း ဒဏ်ရာရခဲ့တယ်လို့ သိရပါတယ်။

ထို့အပြင် ဒေသခံတွေရဲ့ နွား ၇ ကောင် သေဆုံးခဲ့သလို ဆေးခန်းနဲ့ နေအိမ် အများအပြားလည်း ပျက်စီးသွားတယ် လို့ ထုတ်ပြန်ချက်မှာ ဖော်ပြထားပါတယ်။

လက်ရှိမှာ စစ်ကော်မရှင်တပ်က မင်းတုန်းနယ် အနောက်ခြမ်းကနေ ရခိုင်ဘက်ကို စစ်ကြောင်းထိုးနေတာကြောင့် တိုက်ပွဲတွေ မကြာခဏ ဖြစ်ပွားနေပေမယ့် ယခု ဗုံးကြဲခံရတဲ့ ချင်းနစ်ရွာဟာ တိုက်ပွဲတွေနဲ့ဝေးတဲ့ အရှေ့ဘက်မှာ တည်ရှိတာ ဖြစ်ပါတယ်။

ပြီးခဲ့တဲ့ စက်တင်ဘာလ ၁၃ ရက်နေ့လည်း မင်းတုန်းမြို့နယ်၊ ဇွန်းကျရွာကို အကြမ်းဖက်စစ်တပ်က ပါရာမော်တာ နဲ့ ဗုံးကြဲခဲ့တာကြောင့် ကလေးငယ် ၄ ဦး အပါအဝင် ပြည်သူ ၆ ဦး သေဆုံးခဲ့ရပါသေးတယ်။

အလားတူ စစ်ကိုင်းတိုင်း၊ ဒီပဲယင်းမြို့နယ်၊ ညောင်ပုထိုး ကျေးရွာထဲကိုလည်း အောက်တိုဘာလ ၉ ရက်၊ ညနေ ၄ နာရီကျော်ခန့်မှာ အကြမ်းဖက် စစ်အုပ်စုက ပါရာမော်တာနဲ့ ဗုံး ၂ လုံး ကြဲချ တိုက်ခိုက်ခဲ့တယ်လို့ သိရပါတယ်။

၎င်းတိုက်ခိုက်မှုအတွင်း မွေးရာပါ မသန်စွမ်းသူ အသက် ၂၄ နှစ်အရွယ် ကိုသက်ပိုင်ဖြိုး နဲ့ အသက် ၄၅ နှစ်အရွယ် အမျိုးသမီး ၁ ဦး ထိခိုက်ဒဏ်ရာရခဲ့တယ်လို့ ဒီပဲယင်းမြို့နယ် ပြည်သူ့အုပ်ချုပ်ရေးအဖွဲ့က ထုတ်ပြန်ထားပါတယ်။
-------------------------
၄။⁨ရေဘေးသင့် သရက်ချောင်းမြို့နယ်ထဲ စစ်ကြောင်းထိုးနေတဲ့စစ်တပ်က အရပ်သားတဦးကို သတ်ဖြတ်
=====================
m.CDM၊ အောက်တိုဘာ ၉

တနင်္သာရီတိုင်းအတွင်း ရေဘေးဒဏ်ခံစားနေရတဲ့ သရက်ချောင်းမြု့နယ်ထဲကို စစ်ကြောင်းထိုးလာတဲ့ စစ်တပ်က အရပ်သားတဦးကို ဖမ်းဆီးနှိပ်စက် သတ်ဖြတ်ခဲ့တယ်လို့ ကရင်အမျိုးသားအစည်းအရုံး KNU မြိတ်ထားဝယ်ခရိုင်က ထုတ်ပြန်လာပါတယ်။
KNU အုပ်ချုပ်နယ်မြေသတ်မှတ်ချက်အရ မြိတ်ထားဝယ်ခရိုင်က ကစယ်ဒိုမြို့နယ်လို့ခေါ်တဲ့ သရက်ချောင်း နယ်ကို စစ်ကြောင်းထိုးလာတဲ့ စစ်ကောင်စီရဲ့ ခမရ ၄၀၃ ၊ ၄၀၄ နဲ့ ၄၀၉ ပူးပေါင်းစစ်ကြောင်းဟာ အောက်တိုဘာ ၆ ရက်နေ့မှာ သဲချောင်းကြီးရွာက ပြည်သူတဦးကို ရက်ရက်စက်စက် သတ်ဖြတ်ခဲ့တာလို့ ဆိုပါတယ်။
အာဏာသိမ်းစစ်တပ်ဟာ သူတို့အာဏာတည်မြဲရေးအတွက် ပြည်သူလူထုကို ရက်ရက်စက်စက် ညှင်းပန်း နှိပ်စက် သတ်ဖြတ်နေတာလို့ KNU မြိတ်ထားဝယ်ခရိုင်ရဲ့ ထုတ်ပြန်ချက်မှာ ဖော်ပြထားပါတယ်။

စစ်တပ်ဟာ အောက်တိုဘာ ၅ရက်ကလည်း သရက်ချောင်းမြို့နယ် ပြင်းဖြူကြီးကျေးရွာကို လက်နက်ကြီးနဲ့ ပစ်ခတ်ခဲ့လို့ အမျိုးသမီးတဦးသေဆုံးခဲ့ရပါသေးတယ်။

အာဏာသိမ်းစစ်တပ်ဟာ မကြာသေးမီက ရေကြီး၊ မြေပြိုလို့ ဘေးအန္တရာယ်ကြုံတွေ့နေရတဲ့ တနင်္သာရီတိုင်း ထဲက လောင်းလုံ၊ ရေဖြူ၊ သရက်ချောင်း စတဲ့မြို့နယ်တွေကို လေကြောင်းကနေတိုက်ခိုက်တာ၊ လက်နက်ကြီးနဲ့ပစ်ခတ်တာတွေအပြင် မြေပြင်ကနေစစ်ကြောင်းထိုးတာတွေရှိနေတယ်လို့ ဒေသတွင်း တော်လှန်ရေးတပ်တွေကလည်း အသိပေးထုတ်ပြန်ထားပါတယ်။
တနင်္သာရီတိုင်း ထားဝယ်ခရိုင်တခုလုံးမှာ ရေကြီးမှု၊ မြေပြိုမှုတေါကြောင့် လူသေဆုံးမှုနဲ့ အခက်အခဲ ပေါင်းစုံ ရင်ဆိုင်ကြုံတွေ့နေရချိန် စစ်ကြောင်းထိုး ဗုံးကြဲနေတဲ့ စစ်တပ်ကို လက်တုန့်ပြန်သွားမယ်လို့ ဓဝယ်အမျိုးသား လွတ်မြောက်ရေးတပ်တော် (DNLA) နဲ့ ပြည်သူ့ကာကွယ်ရေးတပ်မတော် (PDF) တနင်္သာရီတိုင်းစစ်ဌာန နည်းဗျူဟာ (၃၃) တို့က သတိပေးထားပါတယ်။
ပြည်သူတွေအနေနဲ့လည်း စစ်တပ်ရဲ့ သွားလာလှုပ်ရှားမှုတွေ ထိုးစစ်ဆင်မှုတွေနဲ့၊ လေယာဉ်နဲ့ဗုံးကြဲမှုတွေကို အထူးအလေးထား ဂရုစိုက်ကြဖို့ တော်လှန်ရေးတပ်ဖွဲ့တွေဘက်က အသိပေးတိုက်တွန်းထားပါတယ်။
———————————
၅။⁨အာဏာသိမ်းစစ်အုပ်စုက လိင်ပိုင်းဆိုင်ရာ အကြမ်းဖက်မှုနဲ့ ဒစ်ဂျစ်တယ်ဖိနှိပ်မှုတွေလုပ်နေတယ်လို့ သံအမတ်ကြီး ဦးကျော်မိုးထွန်းပြော
===================
m.CDM၊ အောက်တိုဘာ ၉

မြန်မာနိုင်ငံမှာ အာဏာသိမ်းစစ်အုပ်စုဟာ အမျိုးသမီးတွေအပေါ် လိင်ပိုင်းဆိုင်ရာနဲ့ ကျားမအခြေပြု အကြမ်းဖက်မှုတွေကို စစ်လက်နက်တခုအဖြစ် အသုံးချနေသလို အဆင့်မြင့်နည်းပညာတွေကို အသုံးပြုပြီး ဒစ်ဂျစ်တယ်ဖိနှိပ်မှုတွေလည်း လုပ်နေတယ်လို့ ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ် သံအမတ်ကြီး ဦးကျော်မိုးထွန်းက ပြောကြားလိုက်ပါတယ်။
အောက်တိုဘာ ၈ ရက်က နယူးယောက်မြို့မှာကျင်းပတဲ့ ကုလသမဂ္ဂ အထွေထွေညီလာခံ တတိယကော်မတီ ရဲ့ အမျိုးသမီးတွေအပေါ် ခွဲခြားဆက်ဆံမှု ပပျောက်ရေးဆိုင်ရာ အပြန်အလှန်ဆွေးနွေးပွဲမှာ သံအမတ်ကြီး ဦးကျော်မိုးထွန်းက အခုလို ပြောကြားခဲ့တာပါ။
မြန်မာနိုင်ငံမှာ ၂၀၂၁ ခုနှစ် စစ်အာဏာသိမ်းမှုနောက်ပိုင်း အမျိုးသမီးတွေနဲ့ မိန်းကလေးငယ်တွေဟာ အကျဉ်းထောင်တွေ၊ ဖမ်းဆီးထိန်းသိမ်းရေးစခန်းတွေနဲ့ စစ်ကြောရေးကာလတွေမှာ ညှဉ်းပန်းနှိပ်စက်မှုနဲ့ လိင်ပိုင်းဆိုင်ရာ အကြမ်းဖက်မှုတွေကို ရင်ဆိုင်နေရပြီး အကျဉ်းထောင်အတွင်း အမျိုးသမီးနိုင်ငံရေး အကျဉ်းသူသေဆုံးမှုတွေ မြင့်တက်လာတယ်လို့လည်း သံအမတ်ကြီးက ရှင်းပြခဲ့ပါတယ်။
အကြမ်းမဖက် အာဏာဖီဆန်ရေးလှုပ်ရှားမှုမှာပါဝင်ခဲ့တဲ့ ဓာတ်ခွဲခန်းမှူး ဒေါ်ခင်သီတာ လုံလောက်တဲ့ ကျန်းမာရေးစောင့်ရှောက်မှု မရတာကြောင့် စက်တင်ဘာ ၂၈ ရက်ကပဲ မန္တလေး အိုးဘိုထောင်မှာ သေဆုံးခဲ့ ရတာကို ထောက်ပြပြောကြားခဲ့တာပါ။
တဖက်မှာလည်း စစ်အုပ်စုဟာ ဉာဏ်ရည်တုနည်းပညာအခြေပြုတဲ့ မျက်နှာကိုမှတ်မိစနစ်တွေ၊ ဇီဝအချက် အလက်ခြေရာခံစနစ်တွေနဲ့ စောင့်ကြည့်ထောက်လှမ်းရေး နည်းပညာတွေကို အသုံးပြုပြီး အမျိုးသမီး တက်ကြွလှုပ်ရှားသူတွေ၊ လူ့အခွင့်အရေး ကာကွယ်စောင့်ရှောက်သူတွေနဲ့ အတိုက်အခံတွေကို ပစ်မှတ်ထား နေတယ်လို့လည်း သံအမတ်ကြီးက ပြောပါတယ်။
မြန်မာနိုင်ငံမှာ ပြည်တွင်းတရားစီရင်ရေးစနစ် ပျက်စီးနေတဲ့အတွက် နစ်နာသူတွေကို ထိရောက်တဲ့ ဥပဒေ ကြောင်းအရ ကုစားမှုနဲ့ တရားမျှတမှုပေးနိုင်ဖို့ နိုင်ငံတကာယန္တရားတွေနဲ့ ကုလသမဂ္ဂစနစ်က ဘယ်လိုကူညီ ပံ့ပိုးနိုင်မလဲဆိုတာကိုလည်း ဆွေးနွေးပေးကြဖို့ သံအမတ်ကြီးက တိုက်တွန်းခဲ့ပါသေးတယ်။
စစ်မှန်တဲ့တရားမျှတမှုရဖို့ တာဝန်ခံမှုရှိရေး၊ လိုက်နာရမယ့်စံနှုန်းတွေ ခိုင်ခိုင်မာမာ အကောင်အထည်ဖော်ရေး နဲ့ ပြစ်ဒဏ်ကင်းလွတ်ခွင့် အဆုံးသတ်ရေးတို့ လိုအပ်နေပြီဖြစ်တာကြောင့်လည်း ကုလဆိုင်ရာ သံအမတ်ကြီး ဦးကျော်မိုးထွန်းက တိုက်တွန်းပြောကြားခဲ့တာဖြစ်ပါတယ်။
———————————
၆။⁨⁨မြန်မာနိုင်ငံရဲ့ လူဦးရေ ၃ ပုံ ၂ ပုံ ဆင်းရဲနွမ်းပါးမှုဒဏ်ခံနေရတယ်လို့ ကုလသမဂ္ဂ သတိပေး
======================
m.CDM၊ အောက်တိုဘာ ၉

မြန်မာနိုင်ငံလူဦးရေရဲ့ ၃ ပုံ ၂ပုံကျော်ဟာ ဆင်းရဲမွဲတေမှုဒဏ် သို့မဟုတ် ဆင်းရဲမွဲတေမှုအန္တရာယ်နဲ့ ရင်ဆိုင်လာရဖို့ ရှိနေတယ်လို့ ကုလသမဂ္ဂဖွံ့ဖြိုးမှုအစီအစဉ် UNDP က အောက်တိုဘာလ အစီရင်ခံစာကနေ သတိပေးလိုက်ပါတယ်။
UNDP က ထုတ်ပြန်တဲ့ "ဆင်းရဲနွမ်းပါးမှု ဇာစ်မြစ်အလွှာများ - မြန်မာနိုင်ငံရှိ ဘက်ပေါင်းစုံ ဆင်းရဲနွမ်းပါးမှု" အစီရင်ခံစာအရ လက်ရှိ မြန်မာနိုင်ငံ လူဦးရေရဲ့ ၁၇ ဒသမ ၉ သန်းကျော်ဟာ ဘက်ပေါင်းစုံ ဆင်းရဲနွမ်းပါးမှု ကို ရင်ဆိုင်နေရပြီး လူဦးရေ ၁၉ ဒသမ ၅ သန်းကျော်ဟာလည်း ဆင်းရဲနွမ်းပါးမှုအန္တရာယ်နဲ့ ရင်ဆိုင်ရနိုင်ခြေ ရှိနေတယ်လို့ ဆိုထားပါတယ်။
ကုလသမဂ္ဂဖွံ့ဖြိုးမှုအစီအစဉ် UNDP ရဲ့ အဆိုအရ လူဦးရေရဲ့ ၃၂ ဒသမ ၆ ရာခိုင်နနှုန်းဖြစ်တဲ့ လူပေါင်း ၁၈ သန်းနီးပါးဟာ ဆင်းရဲမွဲတေနေပြီး နောက်ထပ် လူဦးရေ ၁၉ ဒသမ ၅ သန်းဟာလည်း ဆင်းရဲမွဲတေမှု အန္တရာယ်နဲ့ ကြုံတွေ့နိုင်ခြေရှိနေတယ်လို့ နားလည်ရပါတယ်။
ဒါကြောင့် ဆင်းရဲမွဲတေမှုဒဏ်ခံနေရသူ သို့မဟုတ် ဆင်းရဲမွဲတေမှုအန္တရာယ်နဲ့ရင်ဆိုင်နေရသူ စုစုပေါင်းအရေ အတွက်ဟာ လူပေါင်း ၃၇ သန်းကျော် သို့မဟုတ် လူဦးရေရဲ့ ၆၈ ရာခိုင်နှုန်းအထိ ရှိလာခဲ့ပြီလို့ သိရပါတယ်။
ကုလသမဂ္ဂ လက်ထောက်အထွေထွေအတွင်းရေးမှူးချုပ်နဲ့ UNDP အာရှနှင့်ပစိဖိတ်ဒေသဆိုင်ရာ ညွှန်ကြား ရေးမှူး ကန်နီ ဝစ်ဂ်နာရာဂျာ က "မြန်မာနိုင်ငံမှာ လူသားချင်းစာနာထောက်ထားမှုနဲ့ ဖွံ့ဖြိုးတိုးတက်မှုတွေ မလုပ်နိုင်‌တော့အောင် ပျက်စီးသွားခဲ့ရသည်အထိ ဆင်းရဲမွဲတေမှုရဲ့ အနက်ရှိုင်းဆုံးအဆင့်ကို ကျွန်မတို့ မြင်တွေ့နေရပါတယ်" လို့ ပြောပါတယ်။
၂၀၂၁ ခုနှစ် စစ်အာဏာသိမ်းမှုဖြစ်ပြီးနောက်ပိုင်း နိုင်ငံအတွင်း လက်နက်ကိုင်ပဋိပက္ခတွေ၊ အခြေခံဝန်ဆောင် မှုတွေ လက်လှမ်းမီရရှိဖို့ ခက်ခဲတာနဲ့ စီးပွားရေး မတည်ငြိမ်မှုတွေကြောင့် မြန်မာနိုင်ငံတဝန်း ဆင်းရဲနွမ်းပါးမှု ပိုပြီးဆိုးရွားလာနေတာပဲဖြစ်ပါတယ်။
ကန်နီ ဝစ်ဂ်နာ ရာဂျာက “ဒီစစ်ပွဲဟာ ဘယ်သူ့အတွက်မှ အကျိုးမရှိတဲ့ စစ်ပွဲပါ။ လူတိုင်း ရှုံးနိမ့်နေရပါတယ်။ နိုင်ငံရဲ့ အဓိကအင်အားစုကို စနစ်တကျ တိုက်စားဖျက်ဆီးနေပါတယ်” လို့လည်း ပြောပါတယ်။
အခုထုတ်ပြန်တဲ့ UNDP ရဲ့ အစီရင်ခံစာဟာ တနိုင်ငံလုံးမှာရှိတဲ့ အိမ်ထောင်စု ၇,၄၆၃ စုကို တယ်လီဖုန်းနဲ့ ဆက်သွယ် မေးမြန်းပြီး ကောက်ယူခဲ့တဲ့ စစ်တမ်းအပေါ် အခြေခံပြုစုထားတာလို့ သိရပါတယ်။
ဆင်းရဲနွမ်းပါးမှုကို တိုင်းတာရာမှာ ဝင်ငွေတခုတည်းကို အခြေခံတာမဟုတ်ဘဲ ကျန်းမာရေး၊ ပညာရေးနဲ့ လူနေမှုအဆင့်အတန်းဆိုင်ရာ ချို့တဲ့မှုတွေကိုပါ ထည့်သွင်းတွက်ချက်ထားတဲ့ ဘက်ပေါင်းစုံဆိုင်ရာ ဆင်းရဲ နွမ်းပါးမှုအညွှန်းကိန်းကို အသုံးပြုထားတာလို့လည်း သိရပါတယ်။
အစီရင်ခံစာအရ ဆင်းရဲနွမ်းပါးမှုကို တိုင်းတာရာမှာ ချို့တဲ့မှုတွေထဲက ၈၀ ရာခိုင်နှုန်းကျော်ဟာ ကျန်းမာရေး နဲ့ လူနေမှုအဆင့်အတန်းဆိုင်ရာပြဿနာတွေနဲ့ သက်ဆိုင်နေပြီး ပြည်သူများ ကျန်းမာရေးစောင့်ရှောက်မှု၊ သင့်လျော်သောအိမ်ရာ၊ သန့်ရှင်းသောသောက်သုံးရေ၊ မိလ္လာစနစ်နှင့် အခြားအခြေခံဝန်ဆောင်မှုတွေကို လက်လှမ်းမီရရှိဖို့ ခက်ခဲတာ အထူးသဖြင့် ပဋိပက္ခဖြစ်ဒေသတွေမှာ အခြေခံဝန်ဆောင်မှုတွေရရှိဖို့ ပိုပြီး ခက်ခဲနေတာတွေ့ရတယ်လို့ UNDP က ဆိုထားပါတယ်။
ဒါ့အပြင် နိုင်ငံအတွင်း ပညာရေး၊ အလုပ်အကိုင်နဲ့ရွှေ့ပြောင်းသွားလာနိုင်မှုဆိုင်ရာ အနာဂတ်မျှော်လင့်ချက် တွေ ကန့်သတ်ခံထားရတဲ့ မြန်မာလူငယ်‌တွေ ပြည်ပကို ထွက်ခွာသွားတာကြောင့် လူ့စွမ်းအားအရင်းအမြစ် ဆုံးရှုံးမှုတွေ ပိုများလာမှာကို စိုးရိမ်တယ်လို့ UNDP က ပြောထားပါတယ်။⁩
———————————
၇။ကျွန်းစုမြို့နယ်က ပျူစောထီး ကင်းစခန်းကို PDF နဲ့ ပကဖ ပူးပေါင်းတိုက်ခိုက်
==================
m.CDM၊ အောက်တိုဘာ ၉

တနင်္သာရီတိုင်း မြိတ်ခရိုင် ကျွန်းစုမြို့နယ်က ပျူစောထီး ကင်းစခန်းကို အမျိုးသားညီညွတ်ရေးအစိုးရ ကာကွယ်ရေးဝန်ကြီးဌာန ပြည်သူ့ကာကွယ်ရေးတပ်မတော် PDF နဲ့ ပြည်သူ့ကာကွယ်ရေးအဖွဲ့ ပကဖ တို့ အောက်တိုဘာ ၈ ရက်မှာ ပူးပေါင်းတိုက်ခိုက်ခဲ့ပါတယ်။
ကျွန်းစုမြို့နယ် ကဘင်ကျေးရွာအုပ်စု မိုင်းတွေးရွာက ပျူစောထီးခေါင်းဆောင် ဂွေးမဲဦးဆောင်တဲ့ ပျူစောထီး အဖွဲ့က စားနပ်ရိက္ခာဝယ်ယူနေကြတဲ့ ဒေသနေပြည်သူတွေရဲ့ လှေတွေကို ဖမ်းဆီးပြီး ငွေညှစ်တာ၊ ကာကွယ်ရေးအဖွဲ့တွေရဲ့ပစ္စည်းတွေပါလာတယ်လို့ စွပ်စွဲပြီး ငွေညှစ်ဒဏ်ရိုက်တာတွေ လုပ်နေတဲ့အတွက် တိုက်ခိုက်ခဲ့တာပါ။
ဒါဟာ မိုင်းတွေးရွာနဲ့ အနီးအနားကရွာတွေကို စားနိပ်ရိက္ခာ ဖြတ်တောက်ဖို့ ရည်ရွယ်ချက်ရှိရှိ လုပ်နေတာလို့ ဒေသနေပြည်သူတို့တွေရဲ့ တိုင်ကြားမှုတွေ အကြိမ်ကြိမ်လက်ခံရရှိခဲ့တယ်လို့ မြို့နယ် ပကဖ က ပြောပါတယ်။
ဒါကြောင့် မိုင်းတွေးရွာ တံတားဦးမှာ အခိုင်အမာလုပ်ထားတဲ့ ပျူစောထီးကင်းစခန်းကို ပြည်သူ့ကာကွယ်ရေး တပ်တွေက လက်နက်ကြီး၊ လက်နက်ငယ်တွေနဲ့ လျှပ်တပြက် ဝင်ရောက်ပစ်ခတ်တိုက်ခိုက်ခဲ့တာြဖစ်ပါ တယ်။
ပျူစောထီးတွေဘက်က ပြန်လည်ပစ်ခတ်တာတွေရှိတဲ့အတွက် မိနစ်အနည်းငယ်ကြာတဲ့တိုက်ပွဲဖြစ်ခဲ့ပြီး ပြည်သူ့ကာကွယ်ရေးအဖွဲ့တွေဘက်က အထိအခိုက်မရှိ ပြန်လည်ဆုတ်ခွာခဲ့တယ်လို့ သိရပြီး ပျူစောထီး တွေဘက်က ထိခိုက်မှု ရှိမရှိကိုတော့ အသေးစိတ်သိရအောင် စုံစမ်းနေဆဲပါပဲ။
မိုင်းတွေးပျူစောထီးအဖွဲ့နဲ့ အပေါင်းအပါတွေအနေနဲ့ ဒေသနေပြည်သူတွေကို အခုလို အမျိုးမျိုးစွပ်စွဲပြီး ငွေညစ် ဒဏ်ရိုက်တာတွေ ထပ်လုပ်မယ်ဆိုရင် အခုထက်ပိုတဲ့ တိုက်ခိုက်မှုတွေ ဆက်လုပ်သွားမယ်လို့ ကျွန်းစုမြို့နယ်ပကဖက အသိပေးထားပါတယ်။
————————————
၈။အကြမ်းဖက်စစ်အုပ်စု လက်အောက်ခံ ဒုရဲအုပ်တဦး HOD-PDF ထံ အလင်းဝင်
=====================
m.CDM၊ အောက်တိုဘာ ၉

အကြမ်းဖက်စစ်အုပ်စု လက်အောက်ခံ ဒုရဲအုပ်တဦးဟာ စစ်အုပ်စုယန္တရားကို စွန့်လွှတ်ပြီး ပြည်သူ့ဘက်သို့ ရပ်တည်လိုတဲ့ ဆုံးဖြတ်ချက်နဲ့ အလင်းဝင်လာခဲ့တယ်လို့ Harbinger Of Death – PDF က အောက်တိုဘာ ၈ ရက်က ထုတ်ပြန်ပါတယ်။
HOD-PDF တပ်ဖွဲ့ထံ အလင်းဝင်လာတဲ့ အကြမ်းဖက်စစ်အုပ်စုလက်အောက်ခံ ရဲတပ်ဖွဲ့က ဒုရဲအုပ်ရဲ့အမည်ကို တော့ လတ်တလောမှာ လုံခြုံရေးအရ ထုတ်မပြောနိုင်သေးဘူးလို့ ဆိုပါတယ်။
အလင်းဝင်ဒုရဲအုပ်ဟာ ပြည်သူ့ဘက် ကူးပြောင်းခိုလှုံဖို့ HOD-PDF တပ်ဖွဲ့ဝင်တဦးဆီ ဆက်သွယ်လာခဲ့တာ ဖြစ်ပြီး တပ်ဖွဲ့တာဝန်ခံ ရဲဘော်မင်းစွမ်းထက်က နွေးနွေးထွေးထွေး ကြိုဆိုလက်ခံကာ သက်ဆိုင်ရာအဆင့် ဆင့်ကို အန္တရာယ်ကင်းစွာ ပို့ဆောင်ပေးခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
အကြမ်းဖက်စစ်အုပ်စုရဲ့ ယန္တရားအမျိုးမျိုးအောက်မှာ တာဝန်ထမ်းဆောင်နေကြဆဲ ရဲတပ်ဖွဲ့ဝင်တွေနဲ့ စစ်သားတွေကိုလည်း ပြည်သူ့ရင်ခွင်ကို အမြန်ဆုံးဝင်ကြဖို့လည်း Harbinger Of Death – PDF က ထပ်ပြီး ဖိတ်ခေါ်ထားပါတယ်။
Harbinger Of Death – PDF ဟာ ရန်ကုန်တိုင်းအတွင်း စစ်ဆင်ရေးတွေကို အရှိန်မြှင့်တင်နေပြီး ရန်ကုန် UG တွေကို ဖောက်ခွဲရေး၊ တိုက်ခိုက်ရေးသင်တန်းတွေပေးနေတဲ့အပြင် မောင်းသူမဲ့ ဒရုန်းတိုက်ခိုက်‌ရေး ယာဥ်ငယ်တွေကို ထုတ်လုပ်နေတဲ့အဖွဲ့တလို့ သိရပါတယ်။
————————————
၉။ရွှေ့ပြောင်းအလုပ်သမားတွေဆီက အမြတ်ထုတ်နေတဲ့ ပွဲစားတွေကိုအရေးယူဖို့နဲ့ CI စင်တာတွေ ဖျက်သိမ်းပေးဖို့ ထိုင်းအောက်လွှတ်တော် အလုပ်သမားရေးရာကော်မတီထံ တောင်းဆို
==================
m.CDM အောက်တိုဘာ ၉ ရက်။

ထိုင်းရောက် မြန်မာရွှေ့ပြောင်း အလုပ်သမားတွေဆီက အမြတ်ထုတ်နေတဲ့ ပွဲစားတွေကို ဖမ်းဆီး အရေးယူပေးဖို့ နဲ့ စစ်အုပ်စုရဲ့ မည်သူမည်ဝါဖြစ်ကြောင်း သက်သေခံလက်မှတ်(CI) ထုတ်ပေးတဲ့ စင်တာတွေကို ဖျက်သိမ်းပေးဖို့ မြန်မာအလုပ်သမား အရေးဆောင်ရွက်နေသူတွေက တောင်းဆိုလိုက်ပါတယ်။

အောက်တိုဘာလ ၇ ရက်နေ့က ထိုင်းအောက်လွှတ်တော်ရှိ အလုပ်သမားရေးရာကော်မတီ ထံကို Bright Future အဖွဲ့က ဦးဆောင်ပြီး သွားရောက်တောင်းဆိုခဲ့တယ်လို့ ဆိုပါတယ်။

CI စင်တာတွေ ဖျက်သိမ်းပေးဖို့ တောင်းဆိုလာတာ အကြိမ်ကြိမ် ရှိပြီဖြစ်ကြောင်းနဲ့ ထိုင်းအစိုးရက အကြိမ်ကြိမ် ရွှေ့ဆိုင်းနေခဲ့ပေမယ့် ဒီတစ်ကြိမ်တောင်းဆိုမှုမှာ အောင်မြင်မှုရမယ်လို့ မျှော်လင့်ကြောင်း Bright Future အဖွဲ့မှ ဆူရတ်ဂ်ျ ဂီရီ က ပြောပါတယ်။

ထို့အပြင် ထိုင်းနိုင်ငံမှာ အလုပ်လုပ်ကိုင်နေတဲ့ မြန်မာအလုပ်သမားတွေ အနေနဲ့ တရားဝင် အလုပ်အကိုင်စနစ်ထဲ ဆောင်ရွက်ရာမှာ ပွဲစားတွေက တစ်ဦးကို ဘတ် ၅,၀၀၀ ကနေ ၁၀,၀၀၀ ကျော် အထိ မတရား ကောက်ခံနေတာ ကိုလည်း တင်ပြခဲ့တယ်လို့ ဆိုပါတယ်။

ဒါကြောင့် ဒီလို အမြတ်ထုတ်နေတဲ့ ပွဲစားတွေကို စုံစမ်း အရေးယူပေးဖို့နဲ့ စစ်အုပ်စုက ဖွင့်လှစ်ထားတဲ့ CI စင်တာ တွေကို ဖျက်သိမ်းပြီး ပန်းရောင်ကတ်ကိုသာ အဓိက အထောက်အထားအဖြစ် သုံးခွင့်ပေးဖို့ တောင်းဆိုခဲ့တယ်လို့ သိရပါတယ်။

ဒီတောင်းဆိုချက်တွေနဲ့ ပတ်သက်ပြီး အလုပ်သမားရေးရာ ကော်မတီဝင် ဆဟတ်ဝပ် ခွမ်ခွန် ကလည်း အစိုးရအနေနဲ့ CI စင်တာတွေ လိုအပ်မှု ရှိ/မရှိကို ပြန်လည် သုံးသပ်သင့်သလို အလုပ်သမားတွေအပေါ် တရားမဝင် ငွေကြေးကောက်ခံမှုတွေကို လည်း ဖြေရှင်းပေးပြီး မှတ်ပုံတင်စနစ်ကို ပြုပြင်သင့်တယ်လို့ အကြံပြုထားပါတယ်။

လက်ရှိမှာတော့ ထိုင်းအစိုးရနဲ့ စစ်ကော်မရှင်တို့ သဘောတူညီချက်နဲ့ လာမယ့် အောက်တိုဘာလ ၁၅ ရက်နေ့မှာ CI စင်တာတွေကို ပြန်ဖွင့်မယ်လို့ သတင်းထွက်နေပါတယ်။

ယခုတစ်ကြိမ် CI လုပ်ရမယ့် ဘတ်အသစ် လုပ်ထားသူ ၄ သိန်းကျော် ရှိနေပြီး၊ CI စာအုပ်ဖိုးနဲ့ ဗီဇာကြေး အပြင် စစ်ကော်မရှင်က ကောက်ခံမယ့် အခွန်တွေကိုပါ ပေးဆောင်ရနိုင်တာကြောင့် ကုန်ကျစရိတ် အတော်များနိုင်တယ် လို့ CDM အလုပ်သမား သံအရာရှိ ဦးဝေလင်းမောင်က ပြောပါတယ်။

CI စာအုပ် ထုတ်ပေးတာဟာ ထိုင်းအစိုးရနဲ့ သက်ဆိုင်မှုမရှိဘဲ စစ်အုပ်စုက ငွေရဖို့အတွက်သာ ဖွင့်ချင်နေတာဖြစ် လို့ မြန်မာအလုပ်သမားတွေ အနေနဲ့ CI မလုပ်လည်း ဘာမှမဖြစ်ကြောင်း သူက တိုက်တွန်းထားပါတယ်။

ဒီနေ့အတွက် m.CDM ပြည်တွင်းသတင်း အစီအစဉ် ဒီမှာပဲ ရပ်နားခွင့်ပြုပါရှင်/ခင်ဗျာ၊အခုတင်ပြပေးခဲ့တဲ့သတင်းတွေကို ကိုသစ်နှင့်လူလေးတို့က ပေးပို့ခဲ့တာဖြစ်ပါတယ်။

နောက်ဆုံးရ သတင်းတွေအတွက် ကျတော်/ကျမတို့ရဲ့ Channel ကို ကျေးဇူးပြုပြီး Subscribe လုပ်ပေးဖို့ မေတ္တာရပ်ခံအပ်ပါတယ်ရှင်/ခင်ဗျာ။

Send email to - editors@moemaka.net to contact and contribute with MoEmAKa

MoeMaKa on Facebook Page from here  (For Burma / Myanmar User)

MoeMaKa News & Media covering Burmese Community
http://www.MoeMaKa.Com - Burmese Language
http://eng.MoeMaKa.net - English Edition
http://moemaka.net/omeka2/ - Audio & Video Archives

Please show your support and donate Moemaka Media

     

Moemaka Multimedia is a tax-exempt organization in Richmond, California. Donations to Moemaka Multimedia are tax deductible.  This organization has been in operation for more than 20 years.  EIN - 26-1387654