၂၀၂၃ ဧပြီလ ၆ ရက်နေ့ ညနေခင်း နောက်ဆုံးရပြည်တွင်းသတင်းများ
သတင်းခေါင်းစဉ်များ -
📌 ၁။ အသွင်ကူးပြောင်းရေးကာလ ဖွဲ့စည်းပုံအခြေခံဥပဒေ ရေးဆွဲခြင်းကို ရောက်ရှိနေပြီလို့ ဝန်ကြီးချုပ်အသိပေး
📌 ၂။ ဖက်ဒရယ်ကျောင်းတွေနဲ့ တော်လှန်ရေးဘက်တော်သားတွေ ဖွင့်လှစ်ထားတဲ့ online school တွေ လုံခြုံရေးကျိုးပေါက်ခြင်းမရှိဖို့ ပညာရေးဝန်ကြီးဌာနနဲ့ MOCIT တို့ပူးပေါင်းဆောင်ရွက်လျက်ရှိ
📌 ၃။ မြန်မာစစ်တပ်က အသေးစားနျူကလီးယားဓါတ်ပေါင်းရုံ တည်ဆောက်ရေး ကြိုးပမ်းနေမှုအပေါ် နိုင်ငံတကာမှ အလေးထားအာရုံစိုက် စောင့်ကြည့်ပေးကြရန် သံအမတ်ကြီးဦးကျော်မိုးထွန်းတောင်းဆို
📌 ၄။ BGF ထိန်းချုပ်ထားသော ရွှေက္ကိုလ်ဒေသမှာ တိုက်ပွဲဖြစ်ပွား၍ ဒေသခံထောင်နဲ့ချီ ထိုင်းနိူင်ငံဘက်ကို စစ်ဘေးတိမ်းရှောင်နေရပြီး ယနေ့မနက်လည်းပစ်ခတ်မှုများဆက်လက်ဖြစ်ပွား
📌 ၅။ အကြမ်းဖက်စကစ၏ လေကြောင်းတိုက်ခိုက်မှုကြောင့် ရွှေကူမြို့နယ် စီသာတိုက်နယ်ဆေးရုံဗုံးထိမှန်ပျက်စီး
📌 ၆။ အင်းတော်မှာ အရပ်သားများကို စွပ်စွဲဖမ်းဆီး၍ စစ်ခုံရုံးက တစ်သက်တစ်ကျွန်းပြစ်ဒဏ်ဆက်တိုက်ချမှတ်
📌 ၇။ PROJECT စည်းရိုး(၁၈) ရက်မြောက်နေ့မှာ ၅၈ ရာခိုင်နှုန်းအထိရရှိထား
ဤသတင်းများကို ရေဒီယိုအန်ယူဂျီသတင်းတာဝန်ခံများနှင့် ခိုင်လုံသော မိတ်ဖက်သတင်းရင်းမြစ်များဆီမှ အခြေခံတင်ပြထားခြင်း ဖြစ်ပါတယ်
========================
📌📌 ၁။ အသွင်ကူးပြောင်းရေးကာလ ဖွဲ့စည်းပုံအခြေခံဥပဒေ ရေးဆွဲခြင်းကို ရောက်ရှိနေပြီလို့ ဝန်ကြီးချုပ်အသိပေး
ဧပြီ၆ရက်
ဧပြီလအတွင်းကျင်းပတဲ့ အမျိုးသားညီညွတ်ရေးအစိုးရအစိုးရအဖွဲ့ အစည်းအဝေး အမှတ်စဉ် ၁၃/၂၀၂၃ တွင် ပြည်ထောင်စုဝန်ကြီးချုပ် မန်းဝင်းခိုင်သန်းက အခုလို ထုတ်ဖေါ်ပြောကြားခဲ့ပါတယ်။
"အခုဆိုရင် ဖက်ဒရယ်ဒီမိုကရေစီ ပဋိညာဥ်ပါ အကောင်အထည်ဖော်ရမယ့် လုပ်ငန်းစဉ် လမ်းပြမြေပုံအတိုင်း ကြိုးစားအကောင်အထည်ဖော်ခဲ့ကြကာ လုပ်ငန်းစဉ် (၈) ဖြစ်တဲ့ အသွင်ကူးပြောင်းရေးကာလ ဖွဲ့စည်းပုံအခြေခံဥပဒေ ရေးဆွဲခြင်းကို ရောက်ရှိနေပြီဖြစ်ပါတယ်။ အသွင်ကူးပြောင်းရေးကာလ ဖွဲ့စည်းပုံ အခြေခံဥပဒေဆိုတာ ကျွန်တော်တို့ တော်လှန်ရေးအတွက် အင်မတန် အရေးပါတဲ့ အခန်းကဏ္ဍက ပါဝင်တာမို့ အမျိုးသားညီညွတ်ရေးအစိုးရအနေနဲ့ ကြိုတင်ပြင်ဆင် စဉ်းစားထားနိုင်စေဖို့ ၂၀၂၂ ခုနစ် ဇွန်လကတည်းက ဖွဲ့စည်းပေးပြီး ဆောင်ရွက်နေခဲ့ကြတာ ဖြစ်ပါတယ်"လို့ဆိုပါတယ်။
ဒါ့အပြင် အမျိုးသားညီညွတ်ရေးအစိုးရဟာ
စစ်အာဏာရှင်စနစ် အပါအဝင် အာဏာရှင်စနစ်မှန်သမျှ ပပျောက်ရေးနဲ့ တိုင်းရင်းသားပြည်သူတစ်ရပ်လုံး လိုလားတောင့်တလျက် ရှိတဲ့ လွတ်လပ်မှု၊ တန်းတူညီမျှမှု၊ တရားမျှတမှုတို့ကို အခြေခံတဲ့ ဒီမိုကရေစီရရှိရေး၊ တန်းတူညီမျှရေးနဲ့ ကိုယ်ပိုင်ပြဌာန်းခွင့် အခွင့်အရေးများကို အပြည့်အဝ အာမခံချက်ပေးနိုင်တဲ့ ဖက်ဒရယ်ဒီမိုကရေစီ ပြည်ထောင်စု ပေါ်ပေါက်လာရေးအတွက် ဦးတည်ရည်မှန်း ကြိုးစားဆောင်ရွက်နေကြတယ်လို့ဆိုပါတယ်။
========================
📌📌 ၂။ ဖက်ဒရယ်ကျောင်းတွေနဲ့ တော်လှန်ရေးဘက်တော်သားတွေ ဖွင့်လှစ်ထားတဲ့ online school တွေ လုံခြုံရေးကျိုးပေါက်ခြင်းမရှိဖို့ ပညာရေးဝန်ကြီးဌာနနဲ့ MOCIT တို့ပူးပေါင်းဆောင်ရွက်လျက်ရှိ
ဧပြီ၆ရက်
ဧပြီလအတွင်း တွေ့ဆုံမေးမြန်းခန်းတစ်ခုမှာ ပညာရေးဝန်ကြီးဌာန ပြည်ထောင်စုဝန်ကြီး ဒေါက်တာဇော်ဝေစိုးက Online School ပညာသင်ကြားရေးနှင့်ပတ်သက်ပြီး အခုလိုပြောဆိုထားပါတယ်။
“ကျနော်တို့ ဖက်ဒရယ်ကျောင်းတွေနဲ့ တော်လှန်ရေးဘက်တော်သားတွေ ဖွင့်လှစ်ထားတဲ့ online school တွေအပြင် မြေပြင်ကျောင်းတွေလည်း ရှိပါတယ်။ အဲ့ဒီ့ကျောင်းတွေမှာ တက်လို့ရပါတယ်။ လုံခြုံရေးကျိုးပေါက်မှု ပြဿနာတွေ ထပ်မဖြစ်ရအောင် ဒစ်ဂျစ်တယ် လုံခြုံရေး လမ်းညွှန်ချက်တွေထုတ်ပြီး အလားတူ ပြသနာတွေ ထပ်မဖြစ်ရအောင် ပိုပြီး စနစ်ကျလာအောင် ကြပ်မတ်ဆောင်ရွက်နေတာတွေ ရှိပါတယ်။အချက်အလက် လုံခြုံရေးကိစ္စတွေနဲ့ ပတ်သက်ပြီး ဆက်သွယ်ရေးနဲ့ သတင်းအချက်အလက် နည်းပညာဝန်ကြီးဌာနဘက်နဲ့ ပူးပေါင်းဆောင်ရွက်နေတာတွေ ရှိပါတယ်"လို့ဝန်ကြီးကဆိုပါတယ်။
လက်ရှိမှာ တနိုင်ငံလုံးအတိုင်းအတာနဲ့ Online ကျောင်း ၇၀ ကျော်နဲ့ မြေပြင်ကျောင်း ၁၀,၀၀၀ ကျော် ဖွင့်လှစ်သင်ကြားပေးနေပါတယ်။
========================
📌📌 ၃။ မြန်မာစစ်တပ်က အသေးစားနျူကလီးယားဓါတ်ပေါင်းရုံ တည်ဆောက်ရေး ကြိုးပမ်းနေမှုအပေါ် နိုင်ငံတကာမှ အလေးထားအာရုံစိုက် စောင့်ကြည့်ပေးကြရန် သံအမတ်ကြီးဦးကျော်မိုးထွန်းတောင်းဆို
ဧပြီ၆ရက်
ဧပြီ၄ရက်၂၀၂၃ ခုနှစ် ကုလသမဂ္ဂလက်နက်ဖျက်သိမ်းရေးကော်မရှင်၏ အထွေထွေရေးရာဆွေးနွေးမှုအစီအစဉ်တွင် ကုလသမဂ္ဂဆိုင်ရာ မြန်မာအမြဲတမ်း ကိုယ်စားလှယ် သံအမတ်ကြီး ဦးကျော်မိုးထွန်းမှ အသေးစားနျူကလီးယားဓါတ်ပေါင်းရုံတည် ဆောက်မည့်ကိစ္စနှင့်ပတ်သက်ပြီးပြောကြားခဲ့ပါတယ်။
"မြန်မာစစ်တပ်မှ ပွင့်လင်းမြင်သာမှုမရှိမှု၊ နျူကလီးယားစက်ရုံလည်ပတ်ရေးအတွက် လိုက်နာရမည့် စည်းကမ်းများ၊ စီမံခန့်ခွဲသည့်စနစ်များ မရှိပါကြောင်း၊ ထို့အပြင် စစ်တပ်အနေဖြင့် တရားဥပဒေစိုးမိုးရေးကို လျစ်လျူရှု၍ နိုင်ငံတကာလူသားချင်းစာနာထောက်ထားမှုဆိုင်ရာ ဥပဒေအပါအဝင် နိုင်ငံတကာဥပဒေများအား လိုက်နာခြင်းအလျဉ်းမရှိခြင်းတို့ကြောင့် မြန်မာစစ်တပ်က အသေးစားနျူကလီးယားဓါတ်ပေါင်းရုံ တည်ဆောက်ရေး ကြိုးပမ်းနေမှုအပေါ် နိုင်ငံတကာမှ အလေးထားအာရုံစိုက် စောင့်ကြည့်ပေးကြရန် သတိပေးလိုကြောင်း"သံအမတ်ကြီးကဆိုပါတယ်။
ဒါ့အပြင် မြန်မာစစ်တပ်ထံသို့ လက်နက်စီးဆင်းစေခြင်းသည် အပြစ်မဲ့မြန်မာပြည်သူများအား အသက်ဆုံးရှုံးစေခြင်းဖြစ်ကြောင်း၊ အာဏာသိမ်းမှုဖြစ်ပွားပြီးနောက် စစ်တပ်၏ သတ်ဖြတ်မှုကြောင့် အမျိုးသမီးနှင့် ကလေးငယ်များအပါအဝင် လူပေါင်း (၃,၂၀၀) ကျော် အသက်ဆုံးရှုံးခဲ့ပြီးဖြစ်ကြောင်း၊ စစ်တပ်၏ ဗုံးကြဲတိုက်ခိုက်ခြင်း၊ မီးရှို့ဖျက်ဆီးခြင်းများကြောင့် နေအိမ် (၆၂,၀၀၀) ကျော် ပျက်စီးခဲ့ကြောင်းသံအမတ်ကြီးကထပ်လောင်းပြောပါတယ်။
========================
📌📌 ၄။ BGF ထိန်းချုပ်ထားသော ရွှေက္ကိုလ်ဒေသမှာ တိုက်ပွဲဖြစ်ပွား၍ ဒေသခံထောင်နဲ့ချီ ထိုင်းနိူင်ငံဘက်ကို စစ်ဘေးတိမ်းရှောင်နေရပြီး ယနေ့မနက်လည်းပစ်ခတ်မှုများဆက်လက်ဖြစ်ပွား
ဧပြီ၆ရက်
ဧပြီ၆ရက်နေ့မှာ ဒေသခံ သတင်းအရင်းအမြစ်များက အခုလို အတည်ပြုဆိုထားပါတယ်။
"ဧပြီ၅ရက်နေ့မှာစပစ်ကြတယ်။ ဒေသခံတွေက သောင်းရင်းမြစ်ကူးပြီးထိုင်းဘက်ကိုပြေးကြတာ သုံးထောင်ကျော်လောက်ရှိမယ်။အခု မနက်ဧပြီ၆ရက်နေ့လည်း ရွှေက္ကိုလ်ဒေသမှာ ပစ်နေကြတုန်းပဲ"လို့ဆိုပါတယ်။
ထွက်ပြေးတိမ်းရှောင်လာသော စစ်ဘေးရှောင်ထောင်နဲ့ချီကို ထိုင်းအာဏာပိုင်များဘက်က လက်ခံထားပြီး လတ်တလောမှာ အစားအစာနဲ့အဝတ်အထည် စတဲ့လူသုံးကုန်များလိုအပ်လျက်ရှိပါတယ်။
ဧပြီ၅ရက်နေ့ နံနက်အစောပိုင်းမှ စတင်ကာBGF ထိန်းချုပ်ထားသော ရွှေက္ကိုလ်ဒေသ ၊ ထီးဝါးပလော၊ ထီးကော် ထောကျေးရွာများအနီးတွင် ပြည်သူ့ကာကွယ်ရေး မဟာမိတ်ပူးပေါင်း တပ်များ နှင့်BGFတို့တိုက်ပွဲ ဖြစ်ပွားခဲ့ပါတယ်။
========================
📌📌 ၅။ အကြမ်းဖက်စကစ၏ လေကြောင်းတိုက်ခိုက်မှုကြောင့် ရွှေကူမြို့နယ် စီသာတိုက်နယ်ဆေးရုံဗုံးထိမှန်ပျက်စီး
ဧပြီ၆ရက်
"ဧပြီ၅ရက်နေ့အကြမ်းဖက်စကစ၏ လေကြောင်းတိုက်ခိုက်မှုကြောင့်ပျက်စီးသွားသော ရွှေကူမြို့နယ် စီသာတိုက်နယ်ဆေးရုံဖြစ်ပါတယ်"လို့ ရွှေကူKPDFကဆိုပါတယ်။
ဧပြီ၅ ရက်မွန်းတည့်၁၂၀၀အချိန်မှစ၍ အကြမ်းဖက်စစ်ကြောင်းများဖြစ်သည့် တပ်မ ၈၈ လက်အောက်ခံ ခလရ ၁၀၊ ခလရ ၇၇၊ ခလရ ၈၈ နှင့် ထပ်မံဖြည့်တင်းထားသည့် စစ်ကြောင်းများမှ စီသာကျေးရွာသို့ လက်နက်ကြီးများဖြင့် ပစ်ခတ်မှုကြောင့် လူနေအိမ်ခြေများ မီးလောင်ပျက်စီးခဲ့ပြီး တိုက်လေယာဉ်များဖြင့် ထပ်မံ၍ သုံးကြိမ် ဗုံးကြဲတိုက်ခိုက်ခဲ့မှုပြုလုပ်ခဲ့ပါတယ်။
========================
📌📌 ၆။ အင်းတော်မှာ အရပ်သားများကို စွပ်စွဲဖမ်းဆီး၍ စစ်ခုံရုံးက တစ်သက်တစ်ကျွန်းပြစ်ဒဏ်ဆက်တိုက်ချမှတ်
ဧပြီ၅ရက်
စစ်ကိုင်းတိုင်း အင်းတော်မှာ အရပ်သားများကို စွပ်စွဲဖမ်းဆီး၍ စစ်ခုံရုံးက တစ်သက်တစ်ကျွန်းပြစ်ဒဏ်ဆက်တိုက်ချမှတ်လာတယ်လို့သိရပါတယ်။
AAPP အချက်အလက်များအရ ဧပြီလ ၃ ရက်နေ့တွင် စစ်ကိုင်းတိုင်း၊ အင်းတော်မြို့နယ်၊ နတ်မဟုတ်ကလေးကျေးရွာမှ ကိုအေးမင်းထွန်းကို အင်းတော်မြို့ စစ်ခုံရုံးမှ အကြမ်းဖက်မှုတိုက်ဖျက်ရေးဥပဒေပုဒ်မ ၅၀(ည)၊ ၅၂(က) ဖြင့် ထောင်ဒဏ်တစ်သက်တစ်ကျွန်း ချမှတ်ခဲ့ပါတယ်။
ကိုအေးမင်းထွန်းသည် ပြည်သူ့ကာကွယ်ရေးတပ်ဖွဲ့နှင့် ဆက်စပ်သည်ဟု စွပ်စွဲခြင်းခံရပြီး အင်းတော်မြို့နယ်၊ နားရခေါင်ကျေးရွာ၌ မတ်လ ၅ ရက်နေ့တွင် အကြမ်းဖက်စစ်အုပ်စု၏ ဖမ်းဆီးခြင်းခံခဲ့ရပါတယ်။ အလားတူ CDMဆရာမအပါအဝင် အမျိုးသမီး၃ဦးအား ဧပြီလ ၃ရက်နေ့က အင်းတော် စစ်ခုံရုံးမှ ပုဒ်မ၅၀(ည)၊၅၂(က)ဖြင့် အမှုဖွင့် အရေးယူကာ ဒဏ်တစ်သက်တစ်ကျွန်း ချမှတ်ခဲ့ပါတယ်။
========================
📌📌 ၇။ PROJECT စည်းရိုး(၁၈) ရက်မြောက်နေ့မှာ ၅၈ ရာခိုင်နှုန်းအထိရရှိထား
ဧပြီ၆ရက်
PROJECT စည်းရိုး(၁၈) ရက်မြောက်နေ့မှာ ၅၈ရာခိုင်နှုန်းအထိရရှိထားတယ်လို့ ဧပြီ၆ရက်နေ့မှာ PROJECT စည်းရိုးကအသိပေးဆိုထားပါတယ်။
"PROJECT စည်းရိုး(၁၈) ရက်မြောက်နေ့မှာ Target တစ်ဝက် 58% ထိရောက်လာပါပြီဗျ။ မနေ့က တစ်ရက်တည်းမှာ တော်လှန်ပြည်သူတွေက (ပိုင်ဖြိုးသု)အတွက် မွေးနေ့လက်ဆောင်ပေးကြတာနဲ့ 7% နီးပါး တက်လာခဲ့တာပါ"။Project ကြီးက အချိန်အားဖြင့် ၃ရက်ပဲကျန်တာမို့ကျန်တဲ့ရက်တွေမှာလဲ စည်းရိုးဝိုင်းကာကူကြဦးမယ်"လို့ဆိုပါတယ်။
"စည်းရိုး− The Fence” ပရောဂျက်ဟာဆိုရင် ကရင်နီအမျိုးသားများကာကွယ်ရေးတပ် (KNDF) ဗျူဟာ (၄)အတွက် “၂၁ ရက်အတွင်း လက်နက်ခဲယမ်းဖြည့်တင်းရန် မြန်မာကျပ်ငွေ သိန်း ၁ သောင်း”ကို ဖြည့်ဆည်းပေးနိုင်ဖို့အတွက် ရည်ရွယ်တဲ့ ပရောဂျက်ဖြစ်ပါတယ်။
၂၀၂၃ ခုနှစ် မတ်လ ၂၀ ရက်နေ့ကနေ ဧပြီလ ၉ ရက်နေ့အထိ ၂၁ ရက်ကြာပြုလုပ်မယ့် ပရောဂျက်ဖြစ်ပြီးကရင်နီအမျိုးသားများကာကွယ်ရေးတပ် (KNDF)ရဲ့ ဗျူဟာ (၄)ကို တာဝန်ရှိသူထံမှတစ်ဆင့် တိုက်ရိုက်ပေးအပ်မှာဖြစ်ပါတယ်။
ယခုတင်ပြခဲ့တဲ့သတင်းတွေကို Radio NUG သတင်းထောက် မင်းသီဟန်က ပေးပို့ထားတာ ဖြစ်ပါတယ်။
No comments:
Post a Comment