5th AUG 2023 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ သြဂုတ်လ ( ၅ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ မတူပီမှာ ဒုရဲအုပ်အဆင့်ရှိသူကို လက်နက်နဲ့ ဖမ်းမိ

 

မတူပီမှာ စစ်ကောင်စီလက်အောက်ခံ ဒုရဲအုပ် အဆင့်ရှိသူတဦးကို လက်နက်၊ ကျည်တောင့်တွေနဲ့အတူ ဖမ်းဆီးရ မိတယ်လို့ ချင်းကာကွယ်ရေးတပ်ဖွဲ့ (မတူပီ) က သတင်းထုတ်ပြန်လာပါတယ်။

 

ဇူလိုင် ၂၆ ရက်နေ့ မတူပီ - ဟားခါး မော်တော်ကား လမ်းမပေါ် ဖနိုင်ကျေးရွာနဲ့ မတူပီခရိုင်ရုံးအကြား တစ်နေရာမှာ ချင်းကာကွယ်ရေးတပ်ဖွဲ့ (မတူပီ) က စစ်ဆင်ရေးပြုလုပ်ပြီး ဖမ်းဆီးရမိတာပါ။

 

အဲဒီ ဒုရဲအုပ် ချမ်းမြေ့အောင်ကို ခြောက်လုံးပြူးပစ္စတို ၁ လက်၊ လက်ပစ်ဗုံး ၂ လုံး၊ ကျည်ဆံ ၅၈ တောင့်နဲ့အတူ ဖမ်းမိတာ လို့ ပြောပါတယ်။

 

၂၀၂၃ မေလဆန်းပိုင်းလောက်ကလည်း မတူပီ - ဟားခါးလမ်းမပေါ်ရှိတဲ့ စစ်ကောင်စီဗျူဟာ ဌာနချုပ်စခန်းကို ချင်းကာ ကွယ်ရေးတပ်ဖွဲ့ (မတူပီ) တပ်ရင်း - ၁ က စီးနင်းခဲ့လို့ ယာယီစစ်ဗျူဟာမှူး ဗိုလ်မှူးကြီးအပါအဝင် ဗိုလ်မှူးတဦးနဲ့ တပ်သား အဆင့်ရှိသူ တဦးတို့ သေဆုံးရတဲ့ ဖြစ်စဉ် ဖြစ်ပွားခဲ့ပါသေးတယ်။

 

========================

 

၂။ ခလရ ၂၇၄ တပ်ရင်းအနီး ပစ်ခတ်မှု ထပ်ဖြစ်၊ စစ်ကောင်စီတပ်ဖွဲ့ဝင် တဦးသေဆုံး

 

မင်းတပ်မြို့အခြေစိုက် အမှတ် ၂၇၄ ခြေလျင်တပ်ရင်းအနီးက စစ်ကောင်စီတပ်ဖွဲ့ဝင်တွေကို တိုက်ခိုက်နိုင်ခဲ့တယ်လို့ ချင်းကာကွယ်ရေးတပ်ဖွဲ့ (မင်းတပ်) က သတင်းထုတ်ပြန်ပါတယ်။

 

မြို့အနောက်ဘက် ၄ မိုင်ဝန်းကျင်မှာရှိတဲ့ စစ်ကောင်စီတပ်ဖွဲ့ဝင်တွေကို ဇူလိုင်လ ၃၀ မနက်အစောပိုင်းမှာ ကာကွယ်ရေး တပ်ဖွဲ့ဝင်တွေက ပစ်ခတ်ခဲ့တာလို့ ဆိုပါတယ်။ ဒီပစ်ခတ်မှုအတွင်း စစ်ကောင်စီတပ်ဖွဲ့ဝင် တဦးသေဆုံးတယ်လို့ အတည်ပြုထားပါတယ်။

 

မင်းတပ်မြို့ အနောက်ရပ်ကွက်မှာ နေထိုင်သူတယောက်က “မနက်နိုးလာတော့ သေနတ်သံတွေကြားတယ်၊ ပုံမှန်လို ရမ်းပစ်နေကြတာပဲ ထင်တာပေါ့။” လို့ ပြောပြပါတယ်။

 

ပစ်ခတ်မှုမှာ ကာကွယ်ရေးတပ်ဖွဲ့ဝင် ၂ ဦး ထိခိုက်ဒဏ်ရာရတယ်လို့လည်း ချင်းကာကွယ်‌ရေးတပ်ဖွဲ့ (မင်းတပ်) ထုတ်ပြန် ချက်မှာ ဖော်ပြပါတယ်။

 

မင်းတပ်မှာ မြို့တွင်းပစ်ခတ်မှုတွေ ခပ်စိပ်စိပ် ဖြစ်လာနေတာကြောင့် စစ်ကောင်စီဘက်က ပြည်သူပိုင် အဆောက်အအုံ တိုင်းမှာ နေရာယူတပ်စွဲထားတယ်လို့ လက်ရှိမြို့တွင်းမှာ နေထိုင်သူတွေက ပြောပါတယ်။

 

ခလရ ၂၇၄ တပ်ရင်းအနီး ၂ ဘက်အပြန်အလှန်ပစ်ခတ်မှု နောက်ဆုံး ဖြစ်ထားတဲ့ ဇူလိုင်လလယ်လောက်က စစ်ကောင်စီ တပ်ဖွဲ့ဝင် ၂ ဦးသေဆုံးခဲ့ပြီး ဒါမျိုးဖြစ်စဉ် ဖြစ်ပွားတဲ့နောက်ဆက်တွဲအနေနဲ့ မင်းတပ်ဒေသခံပြည်သူတွေ စွပ်စွဲဖမ်းဆီး သတ်ဖြတ်ခံရတာတွေလည်း ရှိနေပါတယ်။

 

========================

 

၃။ မင်းတပ်မြို့ စစ်ကောင်စီမော်တော်ယာဉ် အနီးကပ်ပစ်ခံရမှုအတွင်း အရာရှိတချို့သေဆုံး၊ မော်တော်ယာဉ်ကို မီးရှို့နိုင်ခဲ့။ 

 

မင်းတပ်မြို့၊ အရှေ့ပြင်ရပ်ကွက် သစ်တောရုံးအနီး စစ်ကောင်စီမော်တော်ယာဉ်ကို ချင်းကာကွယ်ရေးတပ်ဖွဲ့ (မင်းတပ်) တပ်ဖွဲ့ဝင်တွေက ဇူလိုင် ၃၀ ညနေပိုင်းမှာ အနီးကပ်ပစ်ခတ်နိုင်ခဲ့ပါတယ်။

 

ဒီပစ်ခတ်မှုအတွင်း စစ်ကောင်စီလက်အောက်ခံ ရဲတပ်ဖွဲ့ဝင်တွေအများစု သေတယ်လို့ စစ်ဆင်ရေးမှာ ကိုယ်တိုင်ပါဝင်တဲ့ ချင်းကာကွယ်ရေးတပ်ဖွဲ့ (မင်းတပ်) တပ်ရင်းတခုရဲ့ တပ်ရင်းမှူးက ပြောပါတယ်။

 

“သူတို့ ဆင်းလာတဲ့ သတင်းရတော့ စောင့်ပစ်တာပါ၊ ရှေ့ခန်းထိုင်တဲ့ အကြီးပိုင်းနဲ့ မောင်းတဲ့သူကတော့ ပွဲချင်းပြီးပါပဲ၊ နောက်ခန်းမှာ ထိုင်နေတဲ့သူတွေလည်း ထိပါတယ်၊ ၁၀ ယောက်ကျော်က ဝိုင်းပစ်တာလေ။” လို့ သူကပြောပါတယ်။

 

မီးသတ်ကုန်းအထိုင်ချ စစ်ကောင်စီက အလုံးအရင်းပြန်လည်ပစ်ခတ်လာတာကြောင့် တပ်ဆုတ်လိုက်ရပေမယ့် မော်တော်ယာဉ်ကိုတော့ မီးရှို့နိုင်ခဲ့တယ်လို့ သူက ဆက်ပြောပါတယ်။

 

“မီးသတ်ကုန်းနဲ့နီးတော့ ပြန်ပစ်ခံရလို့ ခဏတပ်ဆုတ်ပြီး အလောင်းတွေ၊ ထိတဲ့ကောင်တွေ ပြန်လာကောက်ပြီးလောက်တဲ့ အချိန်မှာ တခေါက်ပြန်ပြီး ကားမီးရှို့ခဲ့တယ်။ ဓာတ်ဆီ ၂ ဗူးနဲ့ လောင်း ရှို့ခဲ့တာ။” လို့ ဆိုပါတယ်။

 

ဇူလိုင် ၃၀ ရက်နေ့က စစ်ကောင်စီတပ်ဖွဲ့ဝင်တွေ အနီးကပ်ပစ်ခတ်ခံရတာနဲ့ ပတ်သက်ပြီး အ‌ရှေ့ပြင်ရပ်ကွက်မှာ နေထိုင်သူတွေကလည်း အတည်ပြုထားပါတယ်။

 

ဒီပစ်ခတ်မှုမှာ စစ်ကောင်စီလက်အောက်ခံ ရဲတပ်ဖွဲ့ဝင် သေဆုံးတာများသလို စခန်းမှူး ဦးအောင်မြတ်သူနဲ့ တပ်သားတချို့ ပြင်းထန်ဒဏ်ရာကြောင့် မင်းတပ်ပြည်သူ့ဆေးရုံမှာ ဆေးကုသမှုခံယူနေတဲ့အကြောင်း တပ်တွင်း သတင်းအရင်းမြစ် ကိုးကားပြီး HKL Mindat က လူမှုကွန်ရက်ကနေတဆင့် အသိပေးပါတယ်။

 

စစ်ကောင်စီ မော်တော်ယာဉ် ပစ်ခတ်မီးရှို့တာနဲ့ ပတ်သက်တဲ့ သက်သေအထောက်အထားတွေကို မှတ်တမ်းတင် ထားနိုင်ပြီး သက်ဆိုင်ရာကနေတဆင့် ထုတ်ပြန်ပေးသွားဖို့ လုပ်ဆောင်နေတယ်လို့လည်း စစ်ဆင်ရေးမှာ ပါဝင်တဲ့ ချင်းကာ ကွယ်ရေးတပ်ဖွဲ့ (မင်းတပ်) တပ်ဖွဲ့ဝင်တွေက ပြောကြပါတယ်။

 

========================

 

၄။ ခုနစ်လတာကာလအတွင်း အကြမ်းဖက်စစ်အုပ်စုကြောင့် နိုင်ငံတဝန်း အမျိုးသား (၇၀၁) ဦး သေဆုံးခဲ့ပြီး စစ်ကိုင်းတိုင်းမှာ (၄၀၇) ဦးဖြင့် သေဆုံးမှုအများဆုံးတွင် ရှိနေ

 

နိုင်ငံရေးအကျဉ်းသားများ ကူညီစောင့်ရှောက်ရေးအသင်းမှ ကောက်ယူထားသော သတင်းအချက်အလက်များအရ ခုနစ်လတာကာလအတွင်း အကြမ်းဖက်စစ်အုပ်စုကြောင့် နိုင်ငံတဝန်း အမျိုးသား (၇၀၁) ဦး သေဆုံးခဲ့ပြီး စစ်ကိုင်းတိုင်းမှာ (၄၀၇) ဦးဖြင့် သေဆုံးမှုအများဆုံးတွင် ရှိနေတယ်လို့ သြဂုတ်လ၂ရက်မှာ အသိပေးဖော်ပြပါတယ်။

 

၂၀၂၃ ခုနှစ်၊ ဇန်နဝါရီလမှ ဇူလိုင်လအထိ ခုနစ်လတာကာလအတွင်း အကြမ်းဖက်စစ်အုပ်စုကြောင့် နိုင်ငံတဝန်း အမျိုးသား (၇၀၁) ဦး သေဆုံးခဲ့ပြီး စစ်ကိုင်းတိုင်းမှာ (၄၀၇) ဦးဖြင့် သေဆုံးမှုအများဆုံးတွင် ရှိနေတယ်လို့ဆိုပါတယ်။

 

ထို့ပြင် နိုင်ငံတဝန်း ဖမ်းဆီးခံရမှုအနေဖြင့် အမျိုးသား (၁၁၁၉) ဦးရှိပြီး စစ်ကိုင်းတိုင်း၌ (၂၆၃) ဦးဖြင့် အများဆုံး ဖမ်းဆီးခံရပြီး ထို (၁၁၁၉) ဦးအနက် (၁၀၉၇) ဦးမှာ လက်ရှိတွင် အကျဉ်းထောင်များ၌ ဖမ်းဆီးထိန်းသိမ်း ခံနေရဆဲ ဖြစ်တယ်လို့သိရပါတယ်။

#RadioNUGLocalNews

#SpringRevolution