21 Apr 2025 - (Ethnic language program-Matupi) by The Matupi Times

 

📌 (ချင်း တိုင်းရင်းသား - Matupi ) ထုတ်လွှင့်မှု အစီအစဥ် ၂၀၂၅ ဧပြီလ ( ၂၁ ) ရက်နေ့ ရပြည်တွင်းသတင်းများ

📌📌 1/ မတူလူမှုကူညီရေးအဖွဲ့စည်းတခုဖြစ်သည့် Matupi Community Development Organization (MCDO) ၏ ၁၅ နှစ်ပြည့် နှစ်ပတ်လည်နေ့ အခမ်းအနားကျင်းပမည်

မတူလူမှုကူညီရေးအဖွဲ့စည်းတခုဖြစ်သည့် Matupi Community Development Organization (MCDO) ၏ ၁၅ နှစ်ပြည့် နှစ်ပတ်လည်နေ့ အခမ်းအနားကို ၂၀၂၅ ခုနှစ်လာမည့် ဧပြီလ ၂၅ ရက်နေ့၌ အင်ဒီယာနာပိုလစ်မြို့မှာ ကျင်းပပြုလုပ်သွားမယ်လို့သိရပါတယ်။

ယခုပြုလုပ်မည့်နှစ်ပတ်လည်နေ့အခမ်းအနားကို ယခင်နှစ်များက ကျင်းပပြုလုပ်သည့်ညီလာခံများနှင့်မတူအောင် ကျင်းပပြုလုပ်သွားမည်ဖြစ်ပြီး အမေရိကန်နိုင်ငံမှာနေထိုင်ကြတဲ့ မတူလူမျိုးအားလုံးရဲ့အဖွဲ့စည်းအသီးသီးကို ဖိတ်ကြားထားတယ်လို့သိရပါတယ်။

MCDO အဖွဲ့အစည်းကို ၂၀၁၀ ခုနှစ်မှာ စတင်တည်ထောင်ခဲ့တာဖြစ်ပြီး အမေရိကန်နိုင်ငံအစိုးရထံ တရားဝင်မှတ်ပုံတင်ထားတဲ့အဖွဲ့အစည်းတခုဖြစ်ပါတယ်။ စစ်ကောင်စီအာဏာမသိမ်းယူခင်အချိန်ထိ The Matupi Times (Media) ကို အဓိက ကူညီထောက်ပံ့ပေးတဲ့အဖွဲ့အစည်းတခုဖြစ်ပြီး စစ်ကောင်စီအာဏာသိမ်းယူပြီးနောက် စစ်ဘေးရှောင်များအတွက် အကူညီများစွာပေးအပ်တဲ့အဖွဲ့အစည်းတခုဖြစ်ပါတယ်။

========================

 

📌📌 2/ ထန်တလန်မြို့နယ်မှာ ဘာသာရေးသင်တန်းတက်ပြီးပြန်လာတဲ့ ကားတစ်စီးတိမ်းမှောက်လို့ အမျိုးသမီး (၂) ဦးသေဆုံးပြီး ၊ (၃) ဦးဒဏ်ရာရ

The Matupi Times ၊ ဧပြီလ ၁၄ ၊ ၂၀၂၅
ချင်းပြည်နယ် ၊ ထန်တလန်မြို့နယ် ၊ Ruabuk ကျေးရွာမှာ ဘာသာရေးဆိုင်ရာသင်တန်းတက်ပြီး ပြန်လာတဲ့ Dawn ကျေးရွာအမျိုးသမီးအဖွဲ့ဟာ အပြန်လမ်းမှာ ကားတိမ်းမှောက်ပြီး အမျိုးသမီး (၂) ဦးသေဆုံးကာ (၃) ဦး ထိခိုက်ဒဏ်ရာရရှိခဲ့တယ်လို့ သိရပါတယ်။
Zahnak Area Baptist Women Department (ZABWD) က ကျင်းပပြုလုပ်တဲ့ ဘာသာရေးဆိုင်ရာသင်တန်းတက်ရောက်ပြီး ပြန်လာကြရာ ဒီကနေ့ ဧပြီလ ၁၄ ရက် နေ့ခင်းပိုင်း၌ Lungler နဲ့ Ralpel ကျေးရွာကြားမှာ ကားဘရိတ်ပေါက်ပြီး လမ်းအောက်ဘက်ကို လိမ့်ကျသွားတာဖြစ်တယ်လို့သိရပါတယ်။
အဆိုပါကားပေါ်တွင် ကားဆရာ (၁) ဦးအပါအဝင် အမျိုးသမီး (၄) ဦး စုစုပေါင်း (၅) ဦး ပါဝင်ကြောင်း သိရပါတယ်။
"သူတို့အပြန်လမ်းမှာ ခုလိုကြုံတွေ့ခဲ့ရတာပါ။ ကားပေါ်မှာ ကားဆရာရယ်၊ အမျိုးသမီး (၄) ယောက်ပါ။ ကားက ကုန်းအတက် တက်နေတဲ့အချိန် ဘရိတ်ပေါက်ပြီးတော့ လမ်းဘေလိမ့်ကျသွားတာလို့သိရတယ်။ သေဆုံးသွားတဲ့ (၂) ယောက်ကလည်း ဆေးရုံရောက်ပြီးမှဆုံးသွားတာ ကျန်တဲ့ (၃) ယောက်လည်းနည်းနည်းဒဏ်ရာပြင်းထန်တယ်။ သေဆုံးသွားတဲ့ Duh Rem Mawi နဲ့ ကတော်တော်ရင်းနှီးတယ် ကျောင်းမှာတစ်ခန်းတည်းနေကြတာ အရင်လကမှ ကျမ်းစာကျောင်းပြီးထားတာ။ သူက တစ်ဦးတည်းသော သမီး။ အခုလိုအဖြစ်မျိုးနဲ့ ကြုံရတာကြားရတော့ တော်တော်ဝမ်းနည်းတယ်။" လို့ Duh Rem Mawi နဲ့ နီးစပ်သူတစ်ဦးက Matupi Times ကို ပြောပါတယ်။
ကားတိမ်းမှောက်မှုကြောင့် သေဆုံးသူ (၂) ဦးမှာ Dawn ကျေးရွာဒေသခံတွေဖြစ်တဲ့ Pi Men Ci (အသက် ၅၅ နှစ်) နှင့် Mai - Duh Rem Mawi (အသက် ၂၂ နှစ်) တို့ဖြစ်ကြောင်း သိရပါတယ်။

 

========================

 

📌📌 3/ မတူပီမြို့ပေါ်တနေရာကို စစ်ကောင်စီဗုံးကြဲတိုက်ခိုက် ၊ ပါစတာ (၁) ဦးအပါအဝင် ပြည်သူ (၅) ဦး ဒဏ်ရာရရှိ၊ နေအိမ်တချို့ထိခိုက်ပျက်စီး

The Matupi Times ၊ ဧပြီလ ၁၇ ၊ ၂၀၂၅
ချင်းပြည်နယ်တောင်ပိုင်း ၊ မတူပီမြို့ကို အကြမ်းဖက်စစ်ကောင်စီတပ်က ဒီကနေ့ ဧပြီလ ၁၇ ရက်နေ့မှာ လေကြောင်းဖြင့် ဗုံးကြဲတိုက်ခိုက်ခဲ့ကြောင်း သိရပါတယ်။
အကြမ်းဖက်စစ်ကောင်စီတပ်ဟာ ဒီကနေ့ ညနေ ၂ နာရီဝန်းဝန်းကျင်ခန့်မှာ မတူပီမြို့ပေါ်ကို (၁) ကြိမ်နဲ့ မတူပီမြို့အနီးတနေရာကို (၂) ကြိမ်အကြောင်းမဲ့ဗုံးကြဲတိုက်ခိုက်ခဲ့ကြောင်း သိရပါတယ်။
ဗုံးကြဲတိုက်ခိုက်မှုကြောင့် ပါစတာ (၁) ဦးအပါအဝင် အရပ်သားပြည်သူ (၅) ဦး ဒဏ်ရာရရှိပြီး နေအိမ်တချို့ထိခိုက်ပျက်စီးသွားကြောင်း သိရပါတယ်။ ဒဏ်ရာရရှိသူ (၅) ဦးထဲမှ (၃) ဦးမှာ ပါစတာမိသားစုဝင်ဖြစ်ကြောင်း သိရပါတယ်။
"ပြည်သူ (၅) ယောက်လောက်ဒဏ်ရာရတယ်၊ (၄) ယောက်ကတော့ အရေးပေါ်ကုသမှု ခံယူနေဆဲပါ။ ဒဏ်ရာရတဲ့ထဲက (၃) ယောက်က ပါစတာနဲ့မိသားစုဝင်တွေပါ။ ပါစတာရယ်၊ သူ့ဇနီးရယ်၊ သူ့သမီးရယ်။ ပါစတာကတော့ တော်တော်ထိထားတယ် ခြေတဘက်ပြတ်တယ်၊ (၃) ယောက်လုံးစိုးရိမ်ရတယ်။" လို့ The Matupi Times ရဲ့ဆက်သွယ်စုံစမ်းချက်အရ သိရပါတယ်။
ဗုံးကြဲခံရမှုနှင့်ပတ်သက်ပြီး မတူပီမြို့နယ်ပြည်သူ့အုပ်ချုပ်ရေးအဖွဲ့အနေဖြင့် သတင်းတစုံတရာ ထုတ်ပြန်ထားခြင်းမရှိသေးပါဘူး။ နေအိမ်ထိခိုက်ပျက်စီးမှုနှင့် ဒဏ်ရာရရှိမှုနောက်ဆက်တွဲအခြေအနေများကို Matupi Times အနေဖြင့် ဆက်သွယ်စုံစမ်းလျက်ရှိသည်။

 

========================

 

📌📌 4/ ဖလမ်းမြို့ ခလရ(၂၆၈)သိမ်းပိုက်စဉ် ထွက်ပြေးလွတ်မြောက်သည့် စကစတပ်ဖွဲ့ဝင် ၁၇၅ ဦး ပြန်လည်ဖမ်းဆီးရမိ

The Matupi Times, ဧပြီလ ၁၉, ၂၀၂၅
ချင်းပြည်နယ်, ဖလမ်းမြို့စစ်ဆင်ရေးအတွင်း နောက်ဆုံးကျန်ရှိနေသည့် ခလရ (၂၆၈) သိမ်းပိုက်စဉ် ထွက်ပြေးလွတ်မြောက်သည့် စစ်ကောင်စီတပ်ဖွဲ့ဝင် (၁၇၅) ဦးကို ပြန်လည်ဖမ်းဆီးရမိကြောင်းသိရပါတယ်။
ဒီကနေ့မနက်ပိုင်းမှာ ပြုလုပ်ခဲ့တဲ့ ဖလမ်းမြို့သိမ်းဂုဏ်ပြုအခမ်းအနားမှာ (CNO/CNDF) ပြောရေးဆိုခွင့်ရှိသူ ဆလိုင်းတင်မီက စစ်သုံ့ပန်းဖမ်းဆီးရမိသူများ, လက်နက်ခဲယမ်းသိမ်းဆည်းရရှိမှုအခြေအနေနှင့် တိုက်ပွဲတွင်းထိခိုက်ကျဆုံးမှုအခြေအနေတွေကို ထည့်သွင်းပြောကြားခဲ့ပါတယ်။
ဖလမ်းစစ်ဆင်ရေးအတွင်းမှာ ခလရ(၂၆၈) က စကစတပ်ရင်းမှူးလည်း လက်နက်ကြီးဒဏ်ရာနဲ့တပ်ရင်းထဲမှာ သေဆုံးသွားတယ်လို့ သူကပြောပါတယ်။
"ဖလမ်းအလုံးစံုသိမ်းပိုက်တဲ့အခါမှာ သူတို့ရဲ့အကြီးဆုံး G 1 အဆင့်ရှိသူက ထွက်ပြေးတယ်။ ဒါပေမယ့်ယနေ့အချိန်မှာ သူတို့အကြီးဆုံးကနေ ငယ်သားအထိ ကျနော်တို့လက်ထဲအကုန်ရှိတယ်။ သူတို့အကြီးကနေ အကုန်လုံး(၁၇၅) ယောက် ကျနော်တို့လက်ထဲရှိတယ်။ မနှစ်ကဆိုလို့ရှိရင်တော့ အယောက် ၁၂၀ ပေါ့၊ ဆိုတော့အားလုံးပေါင်းလိုက်ရင် ၃၀၀ ကျော် ကျွန်တော်တို့လက်ထဲမှာရှိတယ်။ သူတို့ကို ကောင်းကောင်းမွန်မွန် ဆက်ဆံတယ်၊ ကောင်းကောင်းမွန်မွန်ထားထားပါတယ်။ နောက်ပြီးတော့ အမျိုးသမီးနဲ့ကလေးတွေအားလုံးပေါင်း ၆၀ ကျော်ပေါ့။ သူတို့တွေကိုလည်းကောင်းကောင်းမွန်မွန်ထိန်းသိမ်းစောင့်ရှောက်ထားပါတယ်။" လို့ ဆလိုင်းတင်မီက ပြောပါတယ်။

ဖလမ်းမြို့သိမ်း, တိုက်ပွဲကနေ စစ်ကောင်စီထံက လက်နက်ကြီး, လက်နက်ငယ် ၅၀၀ ဝန်းကျင်ရရှိပြီး ကျည်ဆန်, ဒရုန်းဆက်စပ်ပစ္စည်းအများအပြား ထိုက်ထိုက်တန်တန် ရရှိခဲ့တယ်လို့ CNO/CNDF ပြောခွင့်ရက ပြောပါတယ်။
၂၀၂၄ နိုဝင်ဘာ ၉ ရက်နေ့ ချင်းညီနောင်စစ်ဆင်ရေးအဖြစ်ကြေညာတဲ့ ဖလမ်းမြို့သိမ်းတိုက်ပွဲဟာ ၅ လကြာမြင့်ခဲ့ပြီး ချင်းညီနောင်နဲ့ မဟာမိတ်တပ်ဖွဲ့ဝင် ရဲဘော် ၈၉ ဦးကျဆုံးတယ်လို့ သိရပါတယ်။
“ကျနော်တို့ဘက်ကနေ ဆုံးရှုံးမှုတွေရှိတယ်၊ ထုတ်ပြန်ထားသလိုပေါ့၊ အာဇာနည်ရဲဘော်တွေ ၈၉ ဦး အသက်ပေးသွားကြတယ်။ အဲဒီထဲမှာ ချင်းညီနောင်က ၅၆ ဦးကျဆုံးပေးဆပ်ခဲ့ကြပါတယ်။” လို့ ပြောပါတယ်။

========================

 

📌📌 5/ ဟားခါးမြို့, ၂၆၆ ဗျူဟာမှ ပြည်သူ့စစ်(၃) ဦး လက်နက်များနဲ့ အတူ CDF-Hakha ထံ အလင်းဝင်

The Matupi Times, ဧပြီလ ၁၅, ၂၀၂၅
ချင်းပြည်နယ်, ဟားခါးမြို့ ၂၆၆ ဗျူဟာမှပြည်သူ့စစ် သုံးဦးသည် ၂၀၂၅ခုနှစ်, ဧပြီလ ၁၃ရက်နေ့တွင် လက်နက်များနဲ့အတူ CDF-Hakha ထံအလင်းဝင်လာကြောင်းသိရသည်။
အလင်းဝင်လာသူ(၃)ဦးမှာ စစ်ကောင်စီကို ဆန့်ကျင်ပြီး ပြည်သူ့တော်လှန်ရေးသို့ ပူးပေါင်းပါဝင်ရန် လက်နက်ခဲယမ်းများ (MA1 တစ်လက်, MA3 တစ်လက် နှင့် MA11 တစ်လက်) နှင့်အတူ အလင်းဝင်လာခြင်းဖြစ်ကြောင်းသိရသည်။
Chinland Defense Force - Hakha အနေဖြင့် အလင်းဝင်လာသူတွေကိုနွေးနွေးထွေးထွေး ကြိုဆိုပြီး ငွေသားဆုကြေးများ ချီးမြှင့်သည့်အပြင် လုံခြုံသည့်နေရာရောက်သည်အထိ တာဝန်ယူဆောင်ရွက်ပေးမယ်လို့ ထုတ်ပြန်ချက်မှာ ဖော်ပြပါတယ်။

#RadioNUGLocalNews

#SpringRevolution