၂၀၂၅ ဧပြီလ ၂ ရက်နေ့ ညနေခင်း နောက်ဆုံးရပြည်တွင်းသတင်းများ
📌 ၁။ ငလျင်ဘေးသင့်ပြည်သူတွေကို NUGအစိုးရက ဘာကူနိုင်သလဲ၊ ဘာစွမ်းနိုင်သလဲဆိုတာ လက်တွေ့ပြသဖို့ လိုတယ်လို့ ယာယီသမ္မတပြောကြား
📌 ၂။ ပြိုကျတဲ့ Hotel Aung Ban အဆောက်အဦအောက်မှ အမျိုးသမီးရုပ်အလောင်း ယနေ့ရှာဖွေတွေ့ရှိ
📌 ၃။ ဥတ္တရသီရိမြို့နယ်ဟိုတယ်မှ အမျိုးသားတဦးကို အသက်ရှင်လျက် တူရကီနိုင်ငံကယ်ဆယ်ရေးအဖွဲ့နဲ့ပြည်တွင်းကယ်ဆယ်ရေးအဖွဲ့များ ပူးပေါင်းကယ်ထုတ်နိုင်
📌 ၄။ အာရှဖွံ့ဖြိုးရေးဘဏ် ADB က ငလျင်ဒဏ်သင့် မြန်မာပြည်သူတွေကို ကန်ဒေဏ်လာ ၃ သန်း ထောက်ပံ့မည်
📌 ၅။ ငလျင်ဒဏ်ကြောင့်ထိခိုက်နစ်နာခံစားရသည့် ကျန်းမာရေးCDMများအတွက်ကျပ်တစ်သိန်းထောက်ပံ့မည်
📌 ၆။ ငလျင်ဒဏ်ကြောင့် ထိခိုက်ဒဏ်ရာရသူများကို အမျိုးသားညီညွတ်ရေးအစိုးရ ကျန်းမာရေးဝန်ကြီးဌာန တာဝန်ရှိသူများက ခွဲစိတ်ကုသ၊ ကျန်းမာရေးစောင့်ရှောက်မှုများပြုလုပ်ပေးလျက်ရှိ
📌 ၇။ ၅ရက်အတွင်း သိန်းပေါင်း ၁၀၀၀၀ ကျော်အချိန်နှင့်တပြေးညီ ကူညီနိုင်စေရန် SCF မှ အမြန်ဆုံးလွှဲပြောင်းပေးလျက်ရှိ
📌 ၈။ ငလျင်ဘေးသင့် မြန်မာပြည်သူတွေအတွက်ဂျပန်နိုင်ငံက အမေရိကန်ဒေါ်လာ ၆ သန်းခန့် ပေးအပ်ကူညီမည်
========================
၂၀၂၅ ခုနှစ် ဧပြီလ ၂ ရက် ညပိုင်းမှာတင်ပြပေးမယ့် Radio NUG စစ်ရေးနှင့် ငလျင်ဘေးဒဏ်သတင်းကောက်နုတ်ချက်များ
🚩 ၁။ မတ်လ ၂၈ ရက်ကနေ ဧပြီ ၁ ရက်နေ့အထိ ၄ ရက်တာ ကာလအတွင်း စစ်ကောင်စီရဲ့ လေကြောင်းတိုက်ခိုက်မှုကြောင့် အရပ် သားပြည်သူ ၅၀ ဦးထက်မနည်းသေဆုံးကာ ၅ဝ နီးပါးဒဏ်ရာရ
🚩 ၂။ ငလျင်ဘေးကူညီဖို့လာတဲ့ တရုတ်ကြက်ခြေနီယာဉ်တန်းကို စစ်ကောင်စီတပ်က ပစ်ခတ်တိုက်ခိုက်
🚩 ၃။ ငလျင်ဘေးကြောင့် တော်လှန်ရေးတပ်တွေအပစ်ရပ်ထားချိန်မှာ ကချင်ပြည်နယ်အပါအဝင် နိုင်ငံအနှံ့ စစ်ကောင်စီဘက်က နေ့စဉ်ရက်ဆက် ဗုံးကြဲနေတယ်လို့ KIA ပြော
🚩 ၄။ စစ်ကိုင်းမြို့နယ်ငလျင်ဘေးအရေးပေါ်ကယ်ဆယ်ရေးကော်မတီက ကူညီကယ်ဆယ်ရေးနဲ့ရှင်းလင်းရေးများလုပ်ဆောင်
🚩 ၅။ ပုလောမှာ လူငယ်တွေကို ပေါ်တာဆွဲ ဖမ်းဆီးပြီး ငွေညှစ်နေတဲ့ အုပ်ချုပ်ရေးမှူးကို ပစ်ခတ်ရှင်းလင်း
🚩 ၆။ လေကြောင်းအန္တရာယ်ရှိတဲ့အတွက် ပျော်ပွဲရွှင်ပွဲတွေမလုပ်ဖို့ ယင်းမာပင်မြို့နယ်ပြည်သူ့အုပ်ချုပ်ရေးအဖွဲ့ တားမြစ်
🚩 ၇။ ပေါင်းတည်မြို့နယ် ဗောဓိကုန်အထိုင်စခန်းကထွက်လာတဲ့ စစ်ကောင်စီတပ်ဖွဲ့ကို မိုင်းဆွဲတိုက်ခိုက်မှုမှာ စစ်သား ၂ဦးသေဆုံး
🚩 ၈။ အမြန်လမ်းမှာ ဆိုင်ကယ်မောင်းလာတဲ့ ရဲကိုရှင်းလင်းခဲ့ရာမှာ စိတ်ကြွးဆေးတွေ သိမ်းဆည်းရရှိ
🚩 ၉။ လူ့အသက်မကယ်ဘဲ မန္တလေးမြို့ရိုးပြိုကျတဲ့ အုတ်ပုံများကိုရှင်းလင်းတဲ့စကစတပ်ဖွဲ့ဝင်များရဲ့ရုပ်သံကို အများပြည်သူမှ ဝေဖန်ရှုတ်ချ
ဤသတင်းများကို ရေဒီယိုအန်ယူဂျီသတင်းတာဝန်ခံများနှင့် ခိုင်လုံသော မိတ်ဖက်သတင်းရင်းမြစ်များဆီမှ အခြေခံတင်ပြထားခြင်း ဖြစ်ပါတယ်။
========================
📌📌 ၁။ ငလျင်ဘေးသင့်ပြည်သူတွေကို NUGအစိုးရက ဘာကူနိုင်သလဲ၊ ဘာစွမ်းနိုင်သလဲဆိုတာ လက်တွေ့ပြသဖို့ လိုတယ်လို့ ယာယီသမ္မတပြောကြား
ဧပြီ၂ရက်
ငလျင်ဘေးသင့်ပြည်သူတွေကိုNUGအစိုးရက ဘာကူနိုင်သလဲ၊ ဘာစွမ်းနိုင်သလဲ ဆိုတာ လက်တွေ့ပြသဖို့ လိုတယ်လို့ယာယီသမ္မတ ဒူဝါလရှီးလက အမျိုးသားညီညွတ်ရေးအစိုးရ၏ ၁၀ / ၂၀၂၅ အစိုးရအဖွဲ့အစည်းအဝေးတွင် ပြောကြားလိုက်ပါတယ်။
"ငလျင်ဘေးဒဏ်ကို ခံစားရတဲ့ ပြည်သူတွေရဲ့ မျက်ရည်တွေနဲ့ ဝမ်းနည်းပူဆွေးမှုတွေကို ကျွန်တော့်အနေနဲ့ ထပ်တူ ခံစားဝမ်းနည်းမိပါတယ်။ တစ်ဖက်မှာလည်း စစ်ကောင်စီရဲ့ အာဏာသိမ်းမှု နောက်ဆက်တွဲ အကျိုးဆက်တွေကို ပြည်သူတွေဟာ လိုသည်ထက်ပိုပြီး အမြောက်အမြား ခံစားနေကြရတယ်ဆိုတာ တွေးမိပြီး၊ ခံပြင်းမိတာတွေလည်း ရှိပါတယ်။ ဒီစစ်အာဏာရှင်စနစ်ဆိုးကို အမြန်ဆုံး မချေမှုန်းနိုင်သရွေ့၊ ပြည်သူလူထုခံစားရတဲ့ ဒုက္ခတွေဟာ တတိတိနဲ့ တစိမ့်စိမ့် ခံစားနေရသလို ဖြစ်နေမယ်လို့ ယူဆပါတယ်။ ပြည်သူလူထုဟာ သဘာဝကပ်ဘေး အပါအဝင် လူလုပ်ကပ်ဘေးတွေကြောင့် ရှင်သန်နေရတဲ့ဘဝဟာ အင်မတန် အဖြစ်ဆိုးလွန်းလှပါတယ်။ ကျွန်တော်တို့အနေနဲ့ လူထုအကျိုးကို လက်တွေ့ ကာယကံမြောက် ဆောင်ကြဉ်းနိုင်ဖို့ဟာ အရေးအကြီးဆုံးဖြစ်တယ် ဆိုတာ မမေ့ဖို့ လိုပါတယ်။ ကျွန်တော်တို့အနေနဲ့ ဘာကူနိုင်သလဲ၊ ဘာစွမ်းနိုင်သလဲ ဆိုတာ လက်တွေ့ပြသဖို့ လိုပါတယ်"လို့ယာယီသမ္မတကပြောပါတယ်။
ဒါ့အပြင် အင်အားပြင်းငလျင်ဒဏ်ကြောင့် နိုင်ငံတဝှမ်းလုံး ဝမ်းနည်းပူဆွေး စိတ်ထိခိုက်နေကြချိန် မင်းအောင်လှိုင် နှင့် စစ်အုပ်စုဟာ ကချင်လွတ်မြောက်ရေးတပ်မတော်ရဲ့ တပ်မဟာ (၈) နယ်မြေရှိ သင်တန်းကျောင်းကို မတ်လ ၃၁ ရက် ညက ဗုံးကြဲတိုက်ခိုက်မှု ပြုလုပ်ခဲ့တာ သိရတယ်လို့ ယာယီသမ္မတကပြောပါတယ်။
"ဗုံးကြဲတိုက်ခိုက်မှုကြောင့် ကနဦး သိရှိချက်အရ လူငယ် ၃၆ ဦး သေဆုံးပြီး၊ ၂၀ ကျော် ဒဏ်ရာ ပြင်းထန်စွာ ရရှိကြောင်း ကြားသိရပါတယ်။ ဒီဆိုးရွားတဲ့ အဖြစ်အပျက်အတွက် KIO/KIA နှင့် ကျဆုံးသွားတဲ့ ရဲဘော် မိသားစုများနှင့် ထပ်တူ ဝမ်းနည်းမိကြောင်း ပြောကြားလိုပါတယ်"လို့ ယာယီသမ္မတကပြောပါတယ်။
========================
📌📌 ၂။ ပြိုကျတဲ့ Hotel Aung Ban အဆောက်အဦအောက်မှ အမျိုးသမီးရုပ်အလောင်း ယနေ့ရှာဖွေတွေ့ရှိ
ဧပြီ၂ရက်
ရှမ်းပြည်နယ်အတွင်း ငလျင်လှုပ်ခတ်မှုကြောင့် Hotel Aung Ban အဆောက်အဦ ပြိုကျပျက်စီး၍ ပိတ်မိနေသူများအား ဧပြီ၂ရက်နေ့ရှာဖွေကယ်ဆယ်ရေး ထပ်မံလုပ်ဆောင်ခဲ့ကြတယ်လို့ သိရပါတယ်။
ရှာဖွေကယ်ဆယ်ရေးလုပ်ငန်းများ ဆောင်ရွက်လျက်ရှိရာ ၀၉ ၃၉ အချိန်တွင် သေဆုံးသူ အမျိုးသမီး(၁)ဦး၏ ရုပ်အလောင်းအား ရှာဖွေတွေ့ရှိခဲ့တယ်လို့သိရပါတယ်။လက်ရှိသက်ဆိုင်ရာအဖွဲ့အစည်းများနှင့် ပူးပေါင်း၍ ရှာဖွေကယ်ဆယ်ရေးလုပ်ငန်းများ ဆက်လက်ဆောင်ရွက်လျက်ရှိတယ်လို့သိရပါတယ်။
မတ်လ ၃၁ ရက်အထိ ဟိုတယ်အောင်ပန်းမှာ သေဆုံးသူ ၉ ဦးရဲ့ အလောင်းကို တွေ့ရှိထားပြီး ၂၄ ဦးကို အသက်ရှင်လျက် ကယ်ထုတ်နိုင်ခဲ့ပါတယ်။
========================
📌📌 ၃။ ဥတ္တရသီရိမြို့နယ်ဟိုတယ်မှ အမျိုးသားတဦးကို အသက်ရှင်လျက် တူရကီနိုင်ငံကယ်ဆယ်ရေးအဖွဲ့နဲ့ပြည်တွင်းကယ်ဆယ်ရေးအဖွဲ့များ ပူးပေါင်းကယ်ထုတ်နိုင်
ဧပြီ၂ရက်
ဧပြီ၂ရက်နေ့၊ ငလျင်လှုပ်ခတ်ခဲ့ပြီး ၅ရက်မြောက်နေ့တွင် နေပြည်တော်၊ ဥတ္တရသီရိမြို့နယ်ရှိ ဟိုတယ်အေးချမ်းသာ(၆)ထပ်အဆောက်အဦ၏ အောက်ဆုံး(၂)ထပ် ပြိုကျ၍ ပိတ်မိနေသူ(၂)ဦးအနက် အမျိုးသားတဦးအား ရှာဖွေကယ်ဆယ်ရေးတပ်ဖွဲ့ဝင်များသည် တူရကီနိုင်ငံမှ GEA Search and rescue အဖွဲ့ဝင်များနှင့် ပူးပေါင်း၍ အသက်ရှင်လျက် ကယ်ထုတ်နိုင်ခဲ့တယ်လို့သိရပါတယ်။
ကျန်(၁)ဦးအား ဆက်လက် ရှာဖွေလျက်ရှိကာယနေ့အချိန်အထိအဆောက်အဦများအောက်ပိတ်မိသူများရှိနေဆဲ ဖြစ်ကြောင်းသိရပါတယ်။
========================
📌📌 ၄။ အာရှဖွံ့ဖြိုးရေးဘဏ် ADB က ငလျင်ဒဏ်သင့် မြန်မာပြည်သူတွေကို ကန်ဒေဏ်လာ ၃ သန်း ထောက်ပံ့မည်
ဧပြီ၂ရက်
အင်အားပြင်း မြေငလျင်ကြောင့် ထိခိုက်ခဲ့တဲ့ မြန်မာပြည်သူတွေအတွက် အမေရိကန်ဒေါ်လာ ၃ သန်းထောက်ပံ့မယ်လို့ အာရှဖွံ့ဖြိုးရေးဘဏ် ADB က မနေ့ ဧပြီ၁ရက်နေ့က ထုတ်ပြန်ပါတယ်။
ထောက်ပံ့ငွေကို ADB ရဲ့ ဒါရိုက်တာဘုတ်အဖွဲက အမြန်ဆုံး အတည်ပြုနိုင်ဖို့ ပြင်ဆင်နေပြီး ကုလသမဂ္ဂကမ္ဘာ့စားနပ်ရိက္ခာ အစီအစဉ် - WFP ကနေတဆင့် ပံ့ပိုးပေးမှာလို့ ဆိုပါတယ်။
အဲဒီကနေတဆင့် သောက်သုံးရေ၊ ဆေးဝါးနဲ့ ယာယီတဲတွေလို မရှိမဖြစ်လိုအပ်တဲ့ပစ္စည်းတွေဝယ်ယူရာမှာ အသုံးချမယ်လို့ အသိပေးထားပါတယ်။
အင်အား ၇ ဒသမ ၇ ပြင်းအားရှိတဲ့ငလျင်ဟာ မြန်မာပြည်သူတွေ ရင်ဆိုင်နေရတဲ့ လူသားချင်းစာနာထောက်ထားမှုဆိုင်ရာ အကျပ်အတည်းကို ပိုမိုပြင်းထန်စေပြီး ပြည်သူတွေ ရင်ဆိုင်နေရတဲ့စိန်ခေါ်မှုတွေ ပိုများလာစေတယ်လို့လည်း ထုတ်ပြန် ချက်မှာ ဖော်ပြထားပါတယ်။
မြန်မာနိုင်ငံမှာ ငလျင်လှုပ်ခတ်မှုကြောင့်ဖြစ်ပေါ်လာတဲ့ အကျိုးသက်ရောက်မှုတွေ အလွန်စိုးရိမ်မိပြီး အရေးပေါ် ကယ်ဆယ်ရေးလုပ်ငန်းတွေ ဆောင်ရွက်နိုင်ဖို့ ဒေါ်လာ ၃ သန်း ထောက်ပံ့မယ်လို့ အရှေ့တောင်အာရှ ဖွံ့ဖြိုးတိုးတက်ရေး ရန်ပုံငွေ ADB က ညွှန်ကြားရေးမှူးချုပ် Winfried Wicklein က ပြောပါတယ်။
အာရှဖွံ့ဖြိုးရေးဘဏ် ADB ဆိုတာ အာရှနဲ့ပစိဖိတ်ဒေသတလျှောက် ရေရှည်တည်တံ့သော၊ အားလုံးပါဝင်ပြီး ခံနိုင်ရည်ရှိသော တိုးတက်မှုကို ပံ့ပိုးပေးတဲ့ ဘက်စုံဖွံ့ဖြိုးတိုးတက်ရေးဘဏ်တခုလို့ သိရပါတယ်။
========================
📌📌 ၅။ ငလျင်ဒဏ်ကြောင့်ထိခိုက်နစ်နာခံစားရသည့် ကျန်းမာရေးCDMများအတွက်ကျပ်တစ်သိန်းထောက်ပံ့မည်
ဧပြီ၂ရက်
ငလျင်ဒဏ်ကြောင့်ထိခိုက်နစ်နာခံစားရသည့် ကျန်းမာရေးCDMများအတွက် ကျပ်တစ်သိန်းထောက်ပံ့မည်ဖြစ်ကြောင်း CDM Medical networkကအသိပေးကြေညာပါတယ်။
"The Promise Campaign ကနေ ကျန်းမာရေး CDM တွေအတွက် အာမခံရန်ပုံငွေတစ်ရပ် ဖန်တီးစုဆောင်းပြီး ပြန်လည်ထောက်ပံ့ပေးနေရာမှာ...ယခု မတ်လ၂၈ရက်နေ့ကနေစပြီး လှုပ်ခတ်နေတဲ့ ငလျင်များကြောင့် ထိခိုက်နစ်နာခဲ့ရတဲ့ ကျန်းမာရေးCDMတွေအတွက် အရေးပေါ် ထောက်ပံ့မှုပေးနိုင်ဖို့ အစီအစဉ်တစ်ရပ်ထပ်တိုးထားပါတယ်။မတ်လ၂၈ရက်နေ့ကနေ စပြီးလှုပ်ခတ်နေခဲ့တဲ့ ငလျင်ကြီးနဲ့ နောက်ဆက်တွဲ ငလျင်ငယ်များကြောင့် ကိုယ်ခန္ဓာထိခိုက်၊ ဆေးရုံတက်၊ ကိုယ်အင်္ဂါဆုံးရှုံးမှု၊ နေအိမ်တစိတ်ဒေသပျက်စီး စသည့်နစ်နာမှုခံစားရသည့် ကျန်းမာရေးCDMများအတွက် တစ်သိန်းကျပ် ၊ တစ်ကြိမ်၊ အသက်သေဆုံး၊ နေအိမ်တစ်ခုလုံးပြိုကျပျက်စီး စသည့် နစ်နာမှုခံစားရသည့် ကျန်းမာရေးCDM များအတွက် တစ်သိန်းငါးသောင်းကျပ်၊ တစ်ကြိမ်စသဖြင့် ထပ်တိုး သတ်မှတ်ချက် နှစ်ခု စီစဉ်ထားရှိပါတယ်"လို့ အသိပေးဆိုထားပါတယ်။
ယခုလို သဘာ၀ဘေးအန္တရာယ်ကြောင့် ထိခိုက်နစ်နာရသော CDMများရဲ့ စာရင်းဟာလည်း အရေးကြီးတဲ့ အချက်အလက်ဖြစ်တဲ့အတွက် ငလျင်ဒဏ်ခံ "ကျန်းမာရေး CDM" များအနေနဲ့ အကျိုးခံစားခွင့် လိုအပ်သည်ဖြစ်စေ မလိုအပ်သည်ဖြစ်စေ ငလျင်ဒဏ်ခံစားရကြောင်း စာရင်းပေးသွင်းဖို့ တိုက်တွန်းထားပါတယ်။
========================
📌📌 ၆။ ငလျင်ဒဏ်ကြောင့် ထိခိုက်ဒဏ်ရာရသူများကို အမျိုးသားညီညွတ်ရေးအစိုးရ ကျန်းမာရေးဝန်ကြီးဌာန တာဝန်ရှိသူများက ခွဲစိတ်ကုသ၊ ကျန်းမာရေးစောင့်ရှောက်မှုများပြုလုပ်ပေးလျက်ရှိ
ဧပြီ၂ရက်
ငလျင်ဒဏ်ကြောင့် ထိခိုက်ဒဏ်ရာရသူများကို အမျိုးသားညီညွတ်ရေးအစိုးရ ကျန်းမာရေးဝန်ကြီးဌာန တာဝန်ရှိသူများက ခွဲစိတ်ကုသ၊ ကျန်းမာရေးစောင့်ရှောက်မှုများပြုလုပ်ပေးလျက်ရှိတယ်လို့သိရပါတယ်။
ငလျင်ဒဏ်ကြောင့် ထိခိုက်ဒဏ်ရာရသူများကို အမျိုးသားညီညွတ်ရေးအစိုးရ ကျန်းမာရေးဝန်ကြီးဌာန တာဝန်ရှိသူများက ခွဲစိတ်ကုသ၊ ကျန်းမာရေးစောင့်ရှောက်မှုများပြုလုပ်ခဲ့ကြောင်းမှတ်တမ်းဓာတ်ပုံနဲ့တကွထုတ်ပြန်ပါတယ်။
ပဲခူးတိုင်း၊ တောင်ငူခရိုင်အတွင်း ငလျင်ဒဏ်ကြောင့် ထိခိုက်ဒဏ်ရာရ ပြည်သူများကို အမျိုးသားညီညွတ်ရေးအစိုးရ ပြည်သူ့ကာကွယ်ရေးတပ်မတော်၊ တောင်ငူခရိုင်တပ်ရင်း ၃၅၀၁ (တပ်ခွဲ-၂) ဆေးအဖွဲ့က ကျန်းမာရေး စောက်ရှောက်ပေးလျက်ရှိတယ်လို့ဖော်ပြပါတယ်။
အမျိုးသားညီညွတ်ရေးအစိုးရအနေဖြင့် ငလျင်လှုပ်ခတ်ပြီးပြီးချင်း အရေးပေါ် အစည်းအဝေးခေါ်ယူကာ အရေးပေါ်အခြေအနေစီမံခန့်ခွဲမှုဆိုင်ရာ ပေါင်းစပ်ညှိနှိုင်းရေးကော်မတီ၏ လုပ်ငန်းစဉ်များကို စတင်သက်ဝင်စေပြီး သက်ဆိုင်ရာ ဝန်ကြီးဌာနများအနေဖြင့် လိုအပ်သော လုပ်ငန်းဆောင်တာများကို ဌာနအလိုက် အလျင်အမြန် လုပ်ဆောင်ကြရန် စီစဉ်ဆောင်ရွက်ခဲ့ပါတယ်။
========================
📌📌 ၇။ ၅ရက်အတွင်း သိန်းပေါင်း ၁၀၀၀၀ ကျော်အချိန်နှင့်တပြေးညီ ကူညီနိုင်စေရန် SCF မှ အမြန်ဆုံးလွှဲပြောင်းပေးလျက်ရှိ
ဧပြီ၂ရက်
“ မြေငလျင်သဘာဝဘေး ၊ ထောက်ပံ့စာနာ ကူညီပေး “ ကမ်ပိန်းမှာ မျှော်မှန်းတားဂတ်ပမာဏ သိန်း ၁၅၀၀ ကို ၅ရက်အတွင်း ၆၆၆% ဖြင့် ကျော်လွန်ပြီး သိန်းပေါင်း ၁၀,၀၀၀ ကျော်အထိ ရောက်ရှိခဲ့ပြီဖြစ်ပါတယ်။ စာနာရက်ရောစွာဖြင့် တက်တက်ကြွကြွ စုပေါင်းပါဝင်ကူညီပေးကြတဲ့ ပြည်တွင်းပြည်ပ နိုင်ငံအရပ်ရပ်မှ Spring Development Bank ၊ အောင်လံလွှင့်ချီ နွေဦးထီ ၊ Spring CrowdFund - နွေဦးလူထုရန်ပုံငွေ အသုံးပြုသူ ပြည်သူများအားလုံးကို ကျေးဇူးအထူးတင်ရှိပါတယ်လို့ ဖေါ်ပြထားပါတယ်။
ရရှိထောက်ပံ့ငွေများကို ငလျင်ဘေးသင့်ဒေသများအတွက် အမြန်ဆုံးကူညီနိုင်စေရန်
◾ ပထမအကြိမ်အဖြစ် သိန်း ၂၀၀၀ ကျပ်တိတိ
◾ ဒုတိယအကြီမ်အဖြစ် သိန်း ၂၅၀၀ ကျပ် တိတိ
◾ တတိယအကြိမ်အဖြစ် သိန်း ၂၇၀၀ ကျပ်တိတိ
◾ ယခု စတုတ္ထအကြိမ်အဖြစ် သိန်း ၂၈၀၀ ကျပ် တိတိ
စုစုပေါင်း သိန်း ၁၀၀၀၀ ကျပ် တိတိကို Ministry of Humanitarian Affairs and Disaster Management - NUG သို့ အောင်မြင်စွာလွှဲပြောင်းပေးထားနိုင်ခဲ့ပြီးဖြစ်ပါတယ်။
ဆက်လက်၍လည်း ဧပြီလ ၁၁ ရက်နေ့အထိ ကမ်ပိန်းရှိသွားမှာဖြစ်လို့ SCF မှာ စိတ်ချယုံကြည်စွာ ဝိုင်းဝန်းပေးပို့ လှူဒါန်းနိုင်ပါတယ်။
========================
📌📌 ၈။ ငလျင်ဘေးသင့် မြန်မာပြည်သူတွေအတွက်ဂျပန်နိုင်ငံက အမေရိကန်ဒေါ်လာ ၆ သန်းခန့် ပေးအပ်ကူညီမည်
ဧပြီ၂ရက်
ငလျင်ဘေးသင့် မြန်မာပြည်သူတွေအတွက်ဂျပန်နိုင်ငံက အမေရိကန်ဒေါ်လာ ၆ သန်းခန့် ပေးအပ်ကူညီမယ်လို့ သိရပါတယ်။ဂျပန်အစိုးရက ဧပြီလ ၂ ရက်မှာသတင်းထုတ်ပြန်အသိပေးပါတယ်။
ဂျပန်အစိုးရကမြန်မာနိုင်ငံမှာငလျင်ဒဏ်ကြောင့်ပြည်သူများထိခိုက်မှုကို အသေးစိတ်စောင့်ကြည်နေတယ်လို့လည်းသတင်းထုတ်ပြန်ထားပါတယ်။လက်ရှိမှာ ငလျင်ဘေးသင့်အကူအညီများမြန်မာနိုင်ငံကို နိုင်ငံတကာကအများအပြားကူညီနေပြီဖြစ်ပါတယ်။
အခု တင်ပြခဲ့တဲ့ သတင်းအတွေကို Radio NUG သတင်းထောက်ကို မင်းသီဟန်နှင့်ကိုခန့်တို့မှ ပေးပို့ထားတာ ဖြစ်ပါတယ်။
========================
========================
🚩🚩 ၁။ မတ်လ ၂၈ ရက်ကနေ ဧပြီ ၁ ရက်နေ့အထိ ၄ ရက်တာ ကာလအတွင်း စစ်ကောင်စီရဲ့ လေကြောင်းတိုက်ခိုက်မှုကြောင့် အရပ် သားပြည်သူ ၅၀ ဦးထက်မနည်းသေဆုံးကာ ၅ဝ နီးပါးဒဏ်ရာရ
ဧပြီ၂ရက်
အင်အားပြင်းငလျင်လှုပ်ခတ်ခဲ့တဲ့ မတ်လ ၂၈ ရက်ကနေ ဧပြီ ၁ ရက်နေ့အထိ ၄ ရက်တာ ကာလအတွင်း စစ်ကောင်စီရဲ့ လေကြောင်းတိုက်ခိုက်မှုကြောင့် အရပ် သားပြည်သူ ၅၀ ဦးထက်မနည်းသေဆုံးကာ ၅ဝ နီးပါးဒဏ်ရာရခဲ့တယ်လို့ အမျိုးသားညီညွတ်ရေး အတိုင်ပင်ခံကောင်စီက ထုတ်ဖော်ပြောဆိုလိုက်ပါတယ်။
ငလျင်ဘေးသင့်ကာလအတွင်း အကြမ်းဖက်စစ်ကောင်စီက လေကြောင်းတိုက်ခိုက်မှုတွေ ကျူးလွန်နေတာနဲ့ ပတ်သက် တဲ့ကြေညာချက်တစောင်ကို ဒီနေ့ ဧပြီလ ၂ ရက်နေ့မှာ ထုတ်ပြန်ရာမှာ အခုလို့ ထုတ်ဖော်ပြောဆိုလိုက်တာဖြစ်ပါတယ်။
မတ်လ ၂၈ ရက် နေ့လယ်ပိုင်းက စစ်ကိုင်းမြို့နယ်ကိုဗဟိုပြု လှုပ်ခတ်ခဲ့တဲ့ အင်အား ၇ ဒသမ ၇ အဆင့်ရှိ ပြင်းထန်ငလျင် ကြောင့် လက်ရှိအချိန်အထိ လူပေါင်း ၄၂၀၀ ကျော် သေဆုံးခဲ့ရပြီး ဒဏ်ရာရသူတွေနဲ့ ပျောက်ဆုံးနေသူတွေ အဆမတန် များနေသလို အိမ်ထောင်စုပေါင်း သောင်းချီ အိုးအိမ်မဲ့ဖြစ်ခဲ့ရတယ်လို့ ဆိုပါတယ်။
အခုလို ပြည်သူလူထု ဒုက္ခတွေ့ကြုံနေရတဲ့အခြေအနေမှာ တော်လှန်ရေးအင်အားစုတွေဘက်က ထိုးစစ်တွေရပ်ကာ ကူညီ ကယ်ဆယ်ရေးလုပ်ငန်းတွေကို တတ်အားသရွေ့ ဆောင်ရွက်နေပေမယ့် အကြမ်းဖက်စစ်ကောင်စီကတော့ ငလျင်ဘေးသင့် ဒေသတွေအပါအဝင် နိုင်ငံတဝှမ်းက အရပ်သားပြည်သူတွေနေထိုင်ရာ ရပ်ရွာတွေကို လေယာဉ်နဲ့ ဗုံးကြဲတာ ထိုးစစ်ဆင်ပြီး မီးရှို့သတ်ဖြတ်တာတွေကို ကျင့်ဝတ်မဲ့ဆောင်ရွက်နေတယ်လို့ ဝေဖန်ထောက်ပြထားပါတယ်။
မတ်လ ၂၈ ရက်ကနေ ဧပြီ ၁ ရက်နေ့အထိ ၄ ရက်တာကာလအတွင်း စစ်ကောင်စီဘက်က ငလျင်ဒဏ်ပြင်းထန်စွာခံထားရ တဲ့ စစ်ကိုင်းတိုင်းက ချောင်းဦးမြို့နယ်၊ မန္တလေးတိုင်းက စဉ့်ကူးမြို့နယ်အပါအဝင် နေရာ ၁၁ ခုကို လေကြောင်းတိုက်ခိုက်မှု ၃၂ ကြိမ်လုပ်ခဲ့တာကြောင့် အရပ်သားပြည်သူ ၅၀ ဦးထက်မနည်းသေဆုံးကာ ၄၉ ဦးခန့် ထိခိုက်ဒဏ်ရာရရှိခဲ့တယ်လို့ အသိပေးထားပါတယ်။
အခုလို ငလျင်ဒဏ်ကြောင့် ထိခိုက်ခံစားနေရတဲ့ပြည်သူလူထုအပါအဝင် အရပ်သားပြည်သူတွေကို ဦးတည်ပြီး အကြမ်းဖက် မှုတွေကျူးလွန်နေတာကို ဘယ်နည်းနဲ့မျှ လက်ခံနိုင်စရာ အကြောင်းမရှိတဲ့အတွက် အမျိုးသားညီညွတ်ရေးအတိုင်ပင်ခံ ကောင်စီက ပြင်းပြင်းထန်ထန် ရှုတ်ချထားပါတယ်။
သဘာဝဘေးဒဏ်သင့်ကာလပါမရှောင် အကြမ်းဖက်မှုတွေ ကျူးလွန်နေတဲ့ အကြမ်းဖက် စစ်ကောင်စီကို နှုတ်နဲ့ ကန့်ကွက် တားဆီးနေရုံတင်မဟုတ်ဘဲ လက်တွေ့ အရေးယူဆောင်ရွက်သင့်နေပြီလို့လည်း အမျိုးသားညီညွတ်ရေးအတိုင်ပင်ခံ ကောင်စီက နိုင်ငံတကာ အသိုက်အဝန်းကို တိုက်တွန်းလိုက်ပါတယ်။
အထူးသဖြင့် အကြမ်းဖက်စစ်ကောင်စီဘက်က လေကြောင်းတိုက်ခိုက်မှုတွေ ခြွင်းချက်မရှိ အမြန်ဆုံးရပ်တန့်နိုင်ရေး ပူးပေါင်းဆောင်ရွက်ပေးကြဖို့လည်း အလေးအနက်ထားပြီး တိုက်တွန်းထားပါတယ်။
========================
🚩🚩 ၂။ ငလျင်ဘေးကူညီဖို့လာတဲ့ တရုတ်ကြက်ခြေနီယာဉ်တန်းကို စစ်ကောင်စီတပ်က ပစ်ခတ်တိုက်ခိုက်
ဧပြီ၂ရက်
ငလျင်ဘေးသင့်ပြည်သူတွေအတွက် ထောက်ပံ့ရေးပစ္စည်းတွေ သယ်ဆောင်လာတဲ့ တရုတ်နိုင်ငံ ကြက်ခြေနီ အသင်းယာဉ်တန်းကို စစ်ကောင်စီတပ်က စောင့်ကြိုပစ်ခတ်ခဲ့တယ်လို့ တအာင်းအမျိုးသားလွတ်မြောက်ရေး တပ်မတော် - TNLA က ဧပြီလ ၁ ရက် ညနက်ပိုင်းမှာ အထူးသတင်းအနေနဲ့ ထုတ်ပြန်ပါတယ်။
မနေ့ ဧပြီ ၁ ရက် ည ၉ နာရီခွဲခန့်အချိန်မှာ မြန်မာနိုင်ငံက ငလျင်ဘေးသင့်ပြည်သူတွေအတွက် ထောက်ပံ့ရေးပစ္စည်းတွေ သယ်ဆောင်လာတဲ့ တရုတ်နိုင်ငံ ကြက်ခြေနီအသင်း ယာဉ်တန်း ၉ စီး မန္တလေးမြို့ဘက်ထွက်လာခဲ့ရာ နောင်ချိုမြို့နယ် အုမ္မတီးကျေးရွာမှာ စစ်ကောင်စီတပ်က ပစ်ခတ်ခဲ့တာလို့ ဆိုပါတယ်။
ယာဉ်တန်းအနေနဲ့ မန္တလေးမြို့ကိုခရီးဆက်မယ့်အကြောင်း စစ်ကောင်စီထံ သတင်းပေးပို့ခဲ့ပြီးဖြစ်ပေမယ့် လမ်းခရီးမှာ ပစ်ခတ်ခံခဲ့ရပြီး နောင်ချိုမြို့ဘက် ပြည်လှည့်ခဲ့ရတယ်လို့ TNLA က အသိပေးထားပါတယ်။
အဲဒီယာဉ်တန်းကို TNLA ဘက်က ကာကွယ်စောင့်ရှောက်ပေးထားပြီး သူတို့သွားလိုတဲ့ ခရီးဆက်နိုင်အောင် ပို့ဆောင် ပေးသွားမယ်လို့လည်း ထုတ်ပြန်ချက်မှာ ဖော်ပြထားပါတယ်။
မြောက်ပိုင်းမဟာမိတ်ညီနောင်သုံးဖွဲ့ဖြစ်တဲ့ MNDAA ၊ TNLA နဲ့ AA တို့က ငလျင်နောက်ဆက်တွဲ ကယ်ဆယ်ရေးလုပ်ငန်းတွေ အမြန်ဆုံး ထိထိရောက်ရောက် ဆောင်ရွက်နိုင်ဖို့ တိုက်ပွဲဖြစ်နေရာတွေမှာ ထိုးစစ်ဆင်မှာမဟုတ်ဘဲ တလတာ အပစ်ရပ် ထားမယ်လို့ ဧပြီလ ၁ ရက်နေ့ ညနေပိုင်းက ထုတ်ပြန်ပြီးချိန်မှာ အခုလို တိုက်ခိုက်ခဲ့တာပဲဖြစ်ပါတယ်။
ငလျင်ဒဏ်သင့် ပြည်သူတွေကို ကူညီကယ်ဆယ်ရေးအတွက် ယာယီအပစ်ရပ်ထားမယ်လို့ NUG နဲ့ တော်လှန်ရေးတပ်တွေ ဘက်က ကြေညာချက်ထုတ်ပြန်ပြီး ကမ်းလှမ်းထားပေမယ့် စစ်ကောင်စီဘက်က လက်မခံဘဲ ဆက်လက် တိုက်ခိုက်သွား မယ်လို့ စစ်ခေါင်းဆောင်က ပြောဆိုထားပါတယ်။
========================
🚩🚩 ၃။ ငလျင်ဘေးကြောင့် တော်လှန်ရေးတပ်တွေအပစ်ရပ်ထားချိန်မှာ ကချင်ပြည်နယ်အပါအဝင် နိုင်ငံအနှံ့ စစ်ကောင်စီဘက်က နေ့စဉ်ရက်ဆက် ဗုံးကြဲနေတယ်လို့ KIA ပြော
ဧပြီ၂ရက်
မြန်မာနိုင်ငံမှာ ငလျင်ဒဏ် ဆိုးရွားစွာခံစားနေရတဲ့အတွက် တော်လှန်ရေးတပ်ဖွဲ့တွေဘက်က အပစ်အခတ်ရပ်စဲထား ပေမယ့် စစ်ကောင်စီက နေ့စဉ်ရက်ဆက် လေကြောင်းကနေ ဗုံးကြဲတိုက်ခိုက်နေဆဲလို့ ကချင်လွတ်လပ်ရေးတပ်မတော် - KIA သတင်းပြန်ကြားရေးဌာနက ဧပြီ ၁ ရက် ညပိုင်းမှာ ဖော်ပြပါတယ်။
ကချင်ပြည်နယ်နဲ့ စစ်ကိုင်းတိုင်းအပါအဝင် နိုင်ငံတဝန်း စစ်ကောင်စီတပ်ရဲ့ လေကြောင်းတိုက်ခိုက်မှု အခြေအနေတွေကို အသိပေး ဖော်ပြလိုက်တာဖြစ်ပါတယ်။
မတ်လ ၂၈ ရက်နေ့ကလှုပ်ခတ်ခဲ့တဲ့ ငလျင်ဒဏ်ကြောင့် အမျိုးသားညီညွတ်ရေးအစိုးရ - NUG က ထိုးစစ်ဆင်တိုက်ခိုက် တာတွေ ၂ပတ်ကြာ ရပ်နားထားမယ်လို့ ကြေညာထားသလို ညီနောင်မဟာမိတ် ၃ ဖွဲ့ကလည်း ဧပြီလတလလုံး အပစ်ရပ် ထားမယ်လို့ ကြေညာထားပါတယ်။
ညီနောင်မဟာမိတ်အဖွဲ့ဝင်တွေဖြစ်တဲ့ တအာင်းတပ် TNLA နဲ့ရခိုင့်တပ်တော် AA ထိန်းချုပ်နယ်မြေတွေကို စစ်ကောင်စီက လေကြောင်းတိုက်ခိုက်နေတဲ့ကြားက တဖတ်သတ် အပစ်ရပ်ထားမယ်လို့ ကြေညာလိုက်တာဖြစ်ပါတယ်။
မတ်လ ၃၁ ရက်က KIA တပ်မဟာ - ၈ တပ်ရင်း ၅ နယ်မြေမှာ တိုက်ပွဲမရှိဘဲ စစ်ကောင်စီက တိုက်လေယာဉ်နဲ့ ၂ ကြိမ် ဗုံးကြဲတိုက်ခိုက်ခဲ့တယ်လို့ KIA သတင်းပြန်ကြားရေးက အသိပေးပါတယ်။
စစ်ကောင်စီဟာ ဗန်းမော်မြို့တိုက်ပွဲအတွင်းမှာလည်း လေကြောင်းတိုက်ခိုက်မှုတွေ နေ့တိုင်းလုပ်နေတယ်လို့ ဆိုပါတယ်။
ထို့အပြင် စစ်ကိုင်းတိုင်း အင်းတော်မြို့ကိုလည်း စစ်ကောင်စီတပ်က ဧပြီ ၁ ရက်နေ့မှာ လေယာဉ်နဲ့ ၄ ကြိမ် ဗုံးကြဲတိုက်ခိုက် ခဲ့တယ်လို့ ဖော်ပြခဲ့ပါတယ်။
ကချင်ပြည်နယ်အတွင်း စစ်ကောင်စီရဲ့ လေကြောင်းတိုက်ခိုက်မှုတွေနဲ့ပတ်သက်လို့ ထိခိုက်သေဆုံးမှု၊ ပျက်စီးဆုံးရှုံးမှု တွေကို စုံစမ်းနေဆဲလို့ ဆိုပါတယ်။
ကချင်ပြည်နယ် ဝိုင်းမော်မြို့နယ် လမြန်ကျေးရွာဘက်ကို စစ်ကောင်စီဘက်က စစ်ကြောင်းထိုးလာတဲ့အတွက် ဧပြီ ၁ ရက် မနက် ၅ နာရီခန့်မှာ စစ်ကောင်စီနဲ့ KIA ပူးပေါင်းတပ်တွေကြား တိုက်ပွဲဖြစ်ခဲ့တာရှိပြီး စစ်ကောင်စီက ဒရုန်းနဲ့ ဗုံးကြဲ တိုက်ခိုက်ခဲ့တယ်လို့ သိရပါတယ်။
စစ်ကောင်စီဟာ ငလျင်ဘေးကြုံနေရချိန်မှာ ကူညီကယ်ဆယ်ရေးလုပ်ငန်းတွေထက် နိုင်ငံတဝန်း လေကြောင်းကနေ ဗုံးကြဲ တိုက်ခိုက်တွေတွေ အဆက်မပြတ်လုပ်နေတယ်လို့ တိုင်းရင်းသား တော်လှန်ရေးတပ်ဖွဲ့တွေက အသိပေးထုတ်ပြန်ထားပါ တယ်။
========================
🚩🚩 ၄။ စစ်ကိုင်းမြို့နယ်ငလျင်ဘေးအရေးပေါ်ကယ်ဆယ်ရေးကော်မတီက ကူညီကယ်ဆယ်ရေးနဲ့ရှင်းလင်းရေးများလုပ်ဆောင်
ဧပြီ၂ရက်
စစ်ကိုင်းမြို့နယ်ငလျင်ဘေးအရေးပေါ်ကယ်ဆယ်ရေးကော်မတီက ကူညီကယ်ဆယ်ရေးနဲ့ရှင်းလင်းရေးများလုပ်ဆောင်နေပြီလို့ စစ်ကိုင်းပအဖက ထုတ်ပြန်ပါတယ်။စစ်ကိုင်းမြို့နယ်ငလျင်ဘေးအရေးပေါ်ကယ်ဆယ်ရေးကော်မတီရဲ့လုပ်ဆောင်ချက်တစ်စိပ်တစ်ပိုင်းဖြစ်တယ်လို့ စက်ယန္တရားများနဲ့ရှင်းလင်းတဲ့ရုပ်သံကို ဖော်ပြပါတယ်။"ငလျင်ဘေးသင့်ပြည်သူတွေကို ကူညီကယ်ဆယ်ရေးဆောင်ရွက်ပေးနေတဲ့အပြင် တစ်ဘက်လည်းစိုးမိုးနယ်မြေအတွင်း ပြုပြင်ထိန်းသိမ်းရေးလုပ်ငန်းများလုပ်ဆောင်လျက်ရှိပါတယ်"လို့စစ်ကိုင်းတိုင်းအမတ်တဦးကလည်းဆိုထားပါတယ်။
လက်ရှိစစ်ကိုင်းမြို့တွင်းသို့ကူညီကယ်ဆယ်ရေးများကို ဝင်ရောက်ခွင့်စကစနဲ့ပျူများက ဟန့်တားစစ်ဆေးမှုများရှိပြီး အရပ်ဖက်အဖွဲ့များကို ဝင်ရောက်ကူညီကယ်ဆယ်ခွင့်၊ရှင်းလင်းခွင့်ကန့်သတ်ထားပါတယ်။
========================
🚩🚩 ၅။ ပုလောမှာ လူငယ်တွေကို ပေါ်တာဆွဲ ဖမ်းဆီးပြီး ငွေညှစ်နေတဲ့ အုပ်ချုပ်ရေးမှူးကို ပစ်ခတ်ရှင်းလင်း
ဧပြီ၂ရက်
တနင်္သာရီတိုင်း ပုလောမြို့နယ်မှာ လူငယ်တွေကို ပေါ်တာဆွဲဖမ်းဆီးပြီး ငွေညှစ်နေတဲ့ အုပ်ချုပ်ရေးမှူး ခင်မောင်ဝင်းကို ပစ်ခတ်ရှင်းလင်းခဲ့ရာ ပွဲချင်းပြီး သေဆုံးသွားတယ်လို့ မြိတ်ခရိုင် အမှတ် ၁ တပ်ရင်းက ထုတ်ပြန်ထားပါတယ်။
ပုလောမြို့ အမှတ် ၄ ရပ်ကွက် အုပ်ချုပ်ရေးမှူး ခင်မောင်ဝင်းကို တော်လှန်ရေး ရဲဘော်တွေက မတ်လ ၃၁ ရက်နေ့ မနက် ၁၁ နာရီခန့်မှာ ပစ်ခတ်ရျင်းလင်းခဲ့တာလို့ ဆိုပါတယ်။။
သေဆုံးသွားတဲ့ ခင်မောင်ဝင်းဟာ အကြမ်းဖက် စစ်ကောင်စီက စစ်မှုထမ်းဥပဒေပြဌာန်းပြီးနောက်ပိုင်း လူငယ်တွေကို စစ်မှုထမ်းစေဖို့ အတင်းအကြပ်ဖိအားပေး ခိုင်းစေနေသူဖြစ်ပြီး ခြိမ်းခြောက်ငွေညှစ်တာတွေလည်း လုပ်ဆောင်ခဲ့သူလို့ သိရပါတယ်။
တော်လှန်ရေးပူးပေါင်းအဖွဲ့တွေ ဒီလုပ်ရပ်တွေ ထပ်မလုပ်ဖို့ အကြိမ်ကြိမ်သတိပေးခဲ့ပေမယ့် ပူးပေါင်းလိုက်နာတာမရှိတဲ့ အတွက် ပစ်ခတ်ရှင်းလင်းရတာလို့ မြိတ်ခရိုင် အမှတ် ၁ တပ်ရင်းက အသိပေးထားပါတယ်။
ဒီတိုက်ခိုက်မှုကို ပြည်သူ့ကာကွယ်ရေးတပ်မတော် မြိတ်ခရိုင်အမှတ် ၁ တပ်ရင်းနဲ့ ကရင်အမျိုးသားကာကွယ်ရေးတပ် -KNDO တပ်ရင်း - ၇ မဟာမိတ်ပူးပေါင်းအဖွဲ့တို့က လုပ်ဆောင်ခဲ့တာဖြစ်ပါတယ်။
ပုလောမြို့နယ်အတွင်းက ရပ်ကွက် ကျေးရွာအုပ်ချုပ်ရေးမှူးများအနေနဲ့ စစ်မှုထမ်းစေဖို့ လူငယ်တွေကို အတင်းအကြပ် ဖိအားပေးတာ၊ စစ်မှုထမ်းဥပဒေကို အကြောင်းပြပြီး ပြည်သူလူထုကို ခြိမ်းခြောက်တာ နိုင်ထက်စီးနင်းပြုလုပ်တာတွေ ဆက်လုပ်နေမယ်ဆိုရင် တိုက်ခိုက်ရှင်းလင်းသွားမယ်လို့ မြိတ်ခရိုင် အမှတ် ၁ တပ်ရင်းက အသိပေး ပြောဆိုထားပါတယ်။
========================
🚩🚩 ၆။ လေကြောင်းအန္တရာယ်ရှိတဲ့အတွက် ပျော်ပွဲရွှင်ပွဲတွေမလုပ်ဖို့ ယင်းမာပင်မြို့နယ်ပြည်သူ့အုပ်ချုပ်ရေးအဖွဲ့ တားမြစ်
ဧပြီ၂ရက်
အကြမ်းဖက်စစ်ကောင်စီဘက်က လေကြောင်းတိုက်ခိုက်မှုတွေ ဆက်တိုက်လုပ်နေတဲ့အတွက် မဟာသင်္ကြန်ကာလမှာ ပျော်ပွဲရွှင်ပွဲတွေကို စည်ကားသိုက်မြိုက်စွာ မကျင်းပကြဖို့ ယင်းမာပင်မြို့နယ်ပြည်သူ့အုပ်ချုပ်ရေးအဖွဲ့က သတိပေး တားမြစ်လိုက်ပါတယ်။
စစ်ကောင်စီဘက်က စက်တပ်လေထီး၊ ဂျက်ဖိုက်တာနဲ့ တိုက်ခိုက်ရေးရဟတ်ယာဉ်တွေနဲ့ တိုက်ခိုက်လာနိုင်တဲ့အတွက် အခုလို သတိပေးတားမြစ်လိုက်တာဖြစ်ပါတယ်။
ဒါ့အပြင် စစ်အာဏာရှင်စနစ် အမြစ်ပြတ်အောင် တော်လှန်ချေမှုန်းနေတဲ့ကာလဖြစ်တာ၊ အကြမ်းဖက်စစ်တပ်ရဲ့ အကြမ်းဖက်လုပ်ရပ်တွေကြောင့် သေဆုံးခဲ့ရတဲ့ အရပ်သားပြည်သူတွေနဲ့ မြင့်မြတ်စွာအက်ပေးလှူခဲ့ရတဲ့ အနယ်နယ် အရပ်ရပ်က တော်လှန်ရေးရဲဘော်တွေနဲ့ စစ်ဘေးရှောင်တွေ၊ ငလျင်ဒဏ်သင့် ပြည်သူတွေကို ထောက်ထားစာနာတဲ့အနေနဲ့ အခုနှစ် သင်္ကြန်ကာလမှာ ပျော်ပွဲရွှင်ပွဲတွေကို စည်ကားသိုက်မြိုက်စွာ မကျင်းပဖို့ အသိပေးလိုက်တာလည်းဖြစ်ပါတယ်။
ဒါ့အပြင် မဏ္ဍပ်တွေဆောက်ပြီး တီးမှုတ်ကခုန်တာ၊ ဆောင်းဘောက်တွေဖွင့်ပြီး ကခုန်တာ၊ ရေပတ်ကစားတာတွေအတွက် ခွင့်မပြုဖို့ သက်ဆိုင်ရာ ကျေးရွာ ပကဖ၊ ပအဖ အဖွဲ့တွေကိုလည်း တိုက်တွန်းထားပါတယ်။
ထို့အတူ မူးယစ်ဆေးသုံးတာ၊ အရက်သေစာသောက်စားပြီး မူးယစ်ရမ်းကားတာနဲ့ ရောင်းဝယ်တာတွေလည်း လုံး မလုပ်ကြဖို့ ယင်းမာပင်မြို့နယ်ပြည်သူ့အုပ်ချုပ်ရေးအဖွဲ့က ပြည်သူလူထုကို အသိပေးထားပါတယ်။
========================
🚩🚩 ၇။ ပေါင်းတည်မြို့နယ် ဗောဓိကုန်အထိုင်စခန်းကထွက်လာတဲ့ စစ်ကောင်စီတပ်ဖွဲ့ကို မိုင်းဆွဲတိုက်ခိုက်မှုမှာ စစ်သား ၂ဦးသေဆုံး
ဧပြီ၂ရက်
ပဲခူးတိုင်း ပေါင်းတည်မြို့နယ် ဗောဓိကုန်ရွာ စစ်တပ်အထိုင်စခန်းကနေထွက်လာတဲ့ စစ်ကောင်စီတပ်ဖွဲ့ကို မိုင်းဆွဲ တိုက်ခိုက် ခဲ့ရာမှာ စစ်သား ၂ဦးသေဆုံးပြီး ၃ ဦး ဒဏ်ရာရသွားတယ်လို့ မြို့နယ် ပြည်သူ့ကာကွယ်ရေးတပ်ဖွဲ့ PPDF ၃၆၀၁ တပ်ရင်းက ပြောပါတယ်။
ဗောဓိကုန်ရွာ စစ်တပ်အထိုင်စခန်းကနေထွက်လာတဲ့ စစ်ကောင်စီတပ်ဖွဲ့ကို မနေ့ ဧပြီလ ၁ ရက် နေ့လည် ၂ နာရီကျော် အချိန်မှာ ပြည်ခရိုင် ပြည်သူ့ကာကွယ်ရေးတပ်မတော် ၃၆၀၁ PPDF တပ်ရင်း တပ်ခွဲ ၄ နဲ့ တပ်ခွဲ ၅ ကရဲဘော်တွေက တည်ပင်ကြောလမ်းခွဲမှာ မိုင်းဆွဲ တိုက်ခိုက်ခဲ့တာလို့ ဆိုပါတယ်။
ဒီစစ်ကောင်စီတပ်ဖွဲ့ကို ပြည်သူ့ကာကွယ်ရေးရဲဘော်တွေက ၃ ကြိမ်တိုင် မိုင်းဆွဲတိုက်ခိုက်နိုင်ခဲ့တာဖြစ်ပြီး သေဆုံးသူတွေနဲ့ ဒဏ်ရာရ စစ်သားတွေကို ဖောကားနဲ့တင်ကာ ပေါက်ခေါင်းမြို့ဘက် ပြန်ထွက်သွားတယ်လို့ သိရပါတယ်။
ထို့အတူ ပေါင်းတည်မြို့နယ် သစ်ပုတ်တာဝါတိုင်အထိုင်စခန်းကနေထွက်လာပြီး လက်ပံခုံရွာက အိမ်ခြေ ၅၆လုံးကို မီးရှို့ ဖျက်ဆီးခဲ့တဲ့ အင်အား တရာကျော်ပါ စစ်ကောင်စီတပ်ဖွဲ့ကို ပြည်သူ့ကာကွယ်ရေးတပ်မတော် ၃၆၀၁ PPDF တပ်ရင်းက ရဲဘော်တွေ မတ်လ ၂၇ ရက်နေ့က ၃ ကြိမ် မိုင်းဆွဲတိုက်ခိုက်ခဲ့ရာမှာ စစ်သား ၃ ဦး ဒဏ်ရာရသွားသလို စနိုက်ဘာနဲ့ ၃ ချက် ပစ်ခတ်ခဲ့ရာမှာတော့ စစ်သား တဦးသေဆုံးခဲ့တယ်လို့ အသိပေးထားပါတယ်။
ပြည်သူ့ကာကွယ်ရေးတပ်မတော်အနေနဲ့ အကြမ်းဖက်စစ်ကောင်စီတပ်ဖွဲ့ဝင်တွေကို ပြတ်ပြတ်သားသား ရှင်းလင်းသွားမယ် လို့ ပြည်သူ့ကာကွယ်ရေးတပ်မတော် ၃၆၀၁ PPDF တပ်ရင်းက ထုတ်ပြန်ထားပါတယ်။
========================
🚩🚩 ၈။ အမြန်လမ်းမှာ ဆိုင်ကယ်မောင်းလာတဲ့ ရဲကိုရှင်းလင်းခဲ့ရာမှာ စိတ်ကြွးဆေးတွေ သိမ်းဆည်းရရှိ
ဧပြီ၂ရက်
ရန်ကုန် - မန္တလေးအမြန်လမ်းပေါ်မှာ ဆိုင်ကယ်မောင်းလာတဲ့ ရဲတပ်ဖွဲ့ဝင်တဦးကို ပစ်ခတ်ရှင်းလင်းခဲ့ရာမှာ စိတ်ကြွ ဆေးတွေ သိမ်းဆည်းရရှိခဲ့တယ်လို့ တိုက်ဒေါင်းပြည်သူ့တော်လှန်ရေးအင်အားစုက ဆိုပါတယ်။
ရမည်းသင်းရဲစခန်းကနေ့ ဆိုင်ကယ်နဲ့ထွက်လာတဲ့ ရဲတပ်ကြပ်ကြီး သန်းထိုက်ကို အမြန်လမ်းမိုင်တိုင် ၂၅၆ အနီးမှာ မတ်လ ၂၈ ရက်က ပစ်ခတ်ရှင်းလင်းခဲ့တာဖြစ်ပြီး ပွဲချင်းပြီးသေဆုံးသွားတယ်လို့ သိရပါတယ်။
သေဆုံးသွားတဲ့ ရဲတပ်ကြပ်ကြီးဆီကနေ WY စိတ်ကြွမူးယစ်ဆေးပြား ၃၀ ၊ဖုန်း ၃ လုံး၊ ပါဝါဘန့် တခုနဲ့ကျည်တတောင့် သိမ်းဆည်းရမိခဲ့တယ်လို့ တိုက်ဒေါင်းပြည်သူ့တော်လှန်ရေးအင်အားစုက ဓာတ်ပုံမှတ်တမ်းနဲ့ ဖော်ပြထားပါတယ်။
အဲဒီရပ်တပ်ကြပ်ကြီးဟာ စိတ်ကြွဆေးတွေကို ကိုယ်တိုင်သုံးစွဲသလို အရောင်းအဝယ်လုပ်နေတာလဲ ရှိတယ်လို့ သိရပါတယ်။
ဒီတိုက်ခိုက်မှုကို တိုက်ဒေါင်းပြည်သူ့တော်လှန်ရေးအင်အားစုနဲ့ ရမည်းသင်းခရိုင် ပကဖ တို့ ပူးပေါင်းလုပ်ဆောင်ခဲ့တာ ဖြစ်ပါတယ်။
========================
🚩🚩 ၉။ လူ့အသက်မကယ်ဘဲ မန္တလေးမြို့ရိုးပြိုကျတဲ့ အုတ်ပုံများကိုရှင်းလင်းတဲ့စကစတပ်ဖွဲ့ဝင်များရဲ့ရုပ်သံကို အများပြည်သူမှ ဝေဖန်ရှုတ်ချ
ဧပြီ၂ရက်
လူ့အသက်မကယ်ဘဲ မန္တလေးမြို့ရိုးပြိုကျတဲ့ အုတ်ပုံများကိုရှင်းလင်းတဲ့စကစတပ်ဖွဲ့ဝင်များရဲ့ရုပ်သံကို အများပြည်သူမှ ဝေဖန်ရှုတ်ချလိုက်ပါတယ်။ဧပြီလအတွင်းစကစရဲတပ်ဖွဲ့ဝင်များကအုတ်ပုံများကိုရှင်းလင်းနေတဲ့ရုပ်သံအား ပြည်သူလူထုက "ဒါသူတို့လုပ်တဲ့ ကယ်ဆယ်ရေးလား"လို့မေးမြန်းထားကြပါတယ်။အကြမ်းဖက်စစ်အုပ်စုနဲ့ပျူစောထီးများဟာ ငလျင်သင့်ဒေသရှိနေရာများသို့ကယ်ဆယ်ရေးအဖွဲ့များဝင်ရောက်ရန်ဟန့်တားချိန်းခြောက်မှုတို့လုပ်ဆောင်ခဲ့ကြပါတယ်။
မတ်လ၂၈ရက်အင်အား၇.၇အဆင့်ရှိအင်အားပြင်းငလျင်လှုပ်ခတ်ရာမှာ သေဆုံးသူလူဦးရေထောင်နဲ့ချီရှိနေပြီး ရုပ်အလောင်းများကိုအဆောက်အဦအောက်မှထုတ်ယူရန် လိုအပ်နေဆဲ ဖြစ်ပါတယ်။
အခုတင်ပြခဲ့တဲ့ သတင်းကိုတော့ Radio NUGသတင်းထောက်ကိုခန့်နှင့်မင်းသီဟန်တို့မှ ပေးပို့ထားတာဖြစ်ပါတယ်
No comments:
Post a Comment