၂၀၂၅ ဧပြီလ ၄ ရက်နေ့ မနက်ခင်း နောက်ဆုံးရပြည်တွင်းသတင်းများ
📌 ၁။ အမျိုးသားညီညွတ်ရေးအစိုးရ၏ စစ်ကိုင်းငလျင်ဘေး အရေးပေါ်တုံ့ပြန်ရေးဆိုင်ရာ တစ်ပတ်အတွင်း ဆောင်ရွက်ချက်များ အစီရင်ခံတင်ပြ
📌 ၂။ မြို့နယ် ၂၁မြို့နယ်က ငလျင်ဘေးသင့်ပြည်သူများကို ကျပ်သိန်းပေါင်း ၈၂၅,၇၂၆,၀၀၀ ထောက်ပံ့ပေးခဲ့တယ်လို့ ပြည်ထောင်စုဝန်ကြီး ဒေါက်တာဝင်းမြတ်အေး အသိပေး
📌 ၃။ NUG ဂျပန်နိုင်ငံဆိုင်ရာ ကိုယ်စားလှယ်ရုံးမှ မြန်မာနိုင်ငံ ငလျင်ဘေးသင့် ပြည်သူများအား ထောက်ပံ့ကူညီနိုင်ရေးအတွက် ဆက်လက်ဆောင်ရွက်သွားနေ
📌 ၄။ ငလျင်ဒဏ်ကြောင့် CDM ကျန်းမာရေးဝန်ထမ်းအချို့နှင့် မိသားစုဝင်များ သေဆုံးခဲ့မှုအပေါ် ဝမ်းနည်းကြောင်း သဝဏ်လွှာပေးပို့
📌 ၅။ ထိုင်းဝန်ကြီးချုပ် ခေါင်းဆောင်မှုအောက်တွင် ထိုင်းနိုင်ငံသည် စစ်အုပ်စု၏ စစ်ရာဇ၀တ်မှုများနှင့် လူသားမျိုးနွယ်အပေါ် ကျူးလွန်သည့် ရာဇ၀တ်မှုများထဲတွင် ပါ၀င်နေဟု ဆို
📌 ၆။ တအာင်းပြည်၊ လူဝင်မှုကြီးကြပ်ရေးဌာနမှ ဝန်ထမ်း (၁၀၀)ဦး ခေါ်ယူမည်
========================
၂၀၂၅ ခုနှစ် ဧပြီလ ၄ ရက်နေ့ မနက်ပိုင်းမှာတင်ပြပေးမယ့် Radio NUG စစ်ရေးနှင့် ငလျင်ဘေးဒဏ်သတင်းကောက်နုတ်ချက်များ
🚩 ၁။ အပစ်ရပ်တယ်လို့ လီဆယ်ထုတ်ပြန်ပြီး ညောင်ဦးမြို့နယ်မှာ စစ်ကောင်စီ စစ်ကြောင်းထိုးနေ
🚩 ၂။ အပစ်ရပ်သည်လို့ လီဆယ်လှည့်ဖြားတဲ့ စစ်ကောင်စီမှ သပိတ်ကျင်း၊ ကနီ၊ ဟုမ္မလင်းနှင့် တောင်သာမြို့နယ်များတွင် လေကြောင်းတိုက်ခိုက်မှုများ ပြုလုပ်
🚩 ၃။ စစ်ကောင်စီက စစ်ကိုင်းနဲ့ မကွေးမှာ စစ်ကြောင်းထိုး ပစ်ခတ်တာတွေကို ဆက်လက်လုပ်ဆောင်
🚩 ၄။ စစ်ကောင်စီလက်အောက်ခံ PNO/PNAက တောမီးရှို့မှုကြောင့် ကျေးရွာ ၂ရွာကို မီးကူးစက်ပြီး နေအိမ် ၂၄လုံးခန့် မီးလောင်ပျက်စီး
🚩 ၅။ ဖရူဆို မြို့အတွင်းက နေအိမ်များကို စစ်ကောင်စီက အကြောင်းမဲ့ မီးရှို့ဖျက်ဆီး
🚩 ၆။ ပြည်သူ့ဒီမိုကရက်တစ်အဖွဲ့/ ပြည်သူ့ဒီမိုကရက်တစ် တပ်တော် (၄) နှစ်ပြည့် အခမ်းအနား ကျင်းပ
🚩 ၇။ တောင်ညိုတပ်ရင်း (၃) နှစ်ပြည့် နှင့် ဆုပေးပွဲ အခမ်းအနား ကျင်းပ
ဤသတင်းများကို ရေဒီယိုအန်ယူဂျီသတင်းတာဝန်ခံများနှင့် ခိုင်လုံသော မိတ်ဖက်သတင်းရင်းမြစ်များဆီမှ အခြေခံတင်ပြထားခြင်း ဖြစ်ပါတယ်။
========================
📌📌 ၁။ အမျိုးသားညီညွတ်ရေးအစိုးရ၏ စစ်ကိုင်းငလျင်ဘေး အရေးပေါ်တုံ့ပြန်ရေးဆိုင်ရာ တစ်ပတ်အတွင်း ဆောင်ရွက်ချက်များ အစီရင်ခံတင်ပြ
ဧပြီ ၃
Radio NUG
အမျိုးသားညီညွတ်ရေးအစိုးရ၏ စစ်ကိုင်းငလျင်ဘေး အရေးပေါ်တုံ့ပြန်ရေးဆိုင်ရာ တစ်ပတ်အတွင်း ဆောင်ရွက်ချက်များကို အများပြည်သူ သိရှိနိုင်စေရန် ဧပြီလ ၃ရက်နေ့တွင် အစီရင်ခံတင်ပြထားပါတယ်။
မတ်လ ၂၈ ရက်နေ့တွင် NUG အရေးပေါ် အစည်းအဝေးခေါ်ယူခြင်း၊ NUG ဝန်ကြီးချုပ်မှ ပြည်သူသို့ အမှာစကားပြောကြားခြင်း၊ MoHAI, ပအဖ, ပလဖများ ပါဝင်တဲ့ မြေပြင်ရှာဖွေ/ကယ်ဆယ်ရေးအဖွဲ့များ ဖွဲ့စည်း ဆောင်ရွက်ခြင်း၊ ရှာဖွေကယ်ဆယ်ရေးနှင့် အချက်အလက် ကောက်ယူရေး စတင်ခြင်းနှင့် ပြည်ထောင်စုဝန်ကြီး ဒေါက်တာဝင်းမြတ်အေးမှ ငလျင်ဖြစ်ပွားမှုသတိပေးခြင်းများ ပြုလုပ်ခဲ့တယ်လို့ ဖော်ပြထားပါတယ်။
မတ်လ ၂၉ရက်နေ့တွင် နိုင်ငံတော်ယာယီသမ္မတက ပြည်သူသို့ နှစ်သိမ့်စကားပြောကြားခြင်း၊ EOCC အစည်းအဝေးခေါ်ယူခြင်း၊ MOH, MOL, MOHADM, အမွေအနှစ်ဆိုင်ရာ ကြားကာလစီမံအုပ်ချုပ်မှု ဗဟိုအဖွဲ့တို့က ညွှန်ကြားချက်များ ထုတ်ပြန်ခြင်း၊ ထိခိုက်ဆုံးရှုံးမှု ကနဦးအစီရင်ခံစာ (၁) ထုတ်ပြန်ခြင်း၊ အရေးပေါ်ရန်ပုံငွေ USD ၁သန်း သတ်မှတ်ခြင်း၊ ငလျင်ဘေးသင့်ဒေသများတွင် NUGမှ ထိုးစစ် (၂) ပတ်ရပ်နားပြီး ကူညီကယ်ဆယ်ရေး ကြေညာခြင်းများ ဆောင်ရွက်ခဲ့တယ်လို့ သိရပါတယ်။
မတ်လ ၃၀ ရက်နေ့တွင် NUG မှ ငလျင်ဘေးသင့်ဒေသ အုပ်ချုပ်ရေး အဖွဲ့အစည်းများနှင့် တွေ့ဆုံညှိနှိုင်းခြင်း၊ ငလျင်ကြောင့် ထိခိုက်ဆုံးရှုံးမှု အခြေအနေ အစီရင်ခံစာ (၂) ထုတ်ပြန်ခြင်း၊ နောက်ဆက်တွဲ ငလျင်ငယ်များ သတိပေးချက် ထုတ်ပြန်ခြင်း၊ မြေပြင်ထောက်ပံ့ခြင်း၊ ငလျင်ဖြစ်ပွားမှုဆိုင်ရာ အသိပညာ ဖြန့်ဝေပေးခြင်းနှင့် တာဝန်ရှိသူ အသီးသီးက ပြည်သူသို့ ဆက်သွယ်ပြန်ကြားခြင်းများ ပြုလုပ်ခဲ့ပါတယ်။
မတ်လ ၃၁ရက်နေ့တွင် ငလျင်ကြောင့် ထိခိုက်ဆုံးရှုံးမှု အခြေအနေ အစီရင်ခံစာ (၃) ထုတ်ပြန်ခြင်း၊ ငလျင်ဘေး ကယ်ဆယ်ရေးအတွက် နိုင်ငံတကာသို့ NUG နိုင်ငံခြားရေးဝန်ကြီးဌာနမှ အကူအညီတောင်းခံခြင်း၊ ပအဖ၊ ပလဖ၊ PDFများ ပါဝင်တဲ့ ရှာဖွေကယ်ဆယ်ရေးနှင့် အရေးပေါ်တုံ့ပြန်ရေးများ ဆောင်ရွက်ခြင်းနှင့် ထိခိုက်ပျက်ဆီးမှုစာရင်း ကောက်ယူ/ထုတ်ပြန်ခြင်းများ ဆောင်ရွက်ခဲ့တယ်လို့ ဖော်ပြထားပါတယ်။
ဧပြီလ ၁ ရက်နေ့တွင် လူထုသပိတ်ဖော်ဆောင်ရေး တော်လှန်ရေးအင်အားစုများနှင့် ငလျင်ဘေးကယ်ဆယ်ရေး ညှိနှိုင်းဆွေးနွေးခြင်း၊ ငလျင်ဘေး ကူညီကယ်ဆယ်ရေးဆိုင်ရာ အများပြည်သူသို့ သတင်းစကားပေးခြင်း၊ ဘေးသင့်သူများ နေရာချထားခြင်း၊ လူသားချင်းစာနာမှု အထောက်အပံ့များ ဖြန့်ဝေခြင်း၊ အရေးပေါ် ကျန်းမာရေး ကုသမှုပေးခြင်းနှင့် ကုန်ထုတ်လမ်း/ တံတား/ မီးတိုင်များ ပြုပြင်ခြင်းများ ပြုလုပ်ခဲ့တယ်လို့ သိရပါတယ်။
ဧပြီလ ၂ရက်နေ့တွင် NUG ကျန်းမာရေးဝန်ကြီးဌာနမှ ရေမှတစ်ဆင့် ကူးစက်တတ်သော ရောဂါများနှင့် မြွေအန္တရာယ် အသိပညာပေးခြင်း၊ MOWYCAမှ စိတ်ပိုင်းဆိုင်ရာ ကြံ့ခိုင်မှုကို လေ့ကျင့် ပျိုးထောင်ခြင်း၊ ငလျင်ကြောင့် ထိခိုက်ဆုံးရှုံးမှုအခြေအနေ အစီရင်ခံစာ (၄) ထုတ်ပြန်ခြင်း၊ MOFAမှ လူသားစာနာအကူအညီများ စစ်ရေး အသုံးချခံနေရမှု အစီရင်ခံခြင်းနှင့် နိုင်ငံလုံးဆိုင်ရာ ပြည်သူ့ဝမ်းနည်း ကြေကွဲမှု ရက်သတ္တပတ် သတ်မှတ်ခြင်းများ ဆောင်ရွက်ခဲ့ပါတယ်။
ဧပြီလ ၃ရက်နေ့တွင် စစ်တပ်က အပစ်အခတ် ရပ်စဲပြီးနောက် တိုက်ခိုက်မှု ဖြစ်စဉ်များကို လူ့အခွင့်အရေးဆိုင်ရာဝန်ကြီးဌာနမှ မှတ်တမ်းယူခြင်း၊ EOCC လုပ်ငန်းအဖွဲ့များ ညှိနှိုင်းဆွေးနွေးခြင်း၊ ငလျင်လှုပ်ခတ်ပြီး နောက်ဆက်တွဲ ကူးစက်ရောဂါများ NUG ကျန်းမာရေးဝန်ကြီးဌာနမှ သတိပေးခြင်းနှင့် NUG Website တွင် ငလျင်ဘေး ဆိုင်ရာ Webpage တစ်ခု ထုတ်လွှင့်ခြင်းများ ဆောင်ရွက်ခဲ့တယ်လို့ ဖော်ပြထားပါတယ်။
========================
📌📌 ၂။ မြို့နယ် ၂၁မြို့နယ်က ငလျင်ဘေးသင့်ပြည်သူများကို ကျပ်သိန်းပေါင်း ၈၂၅,၇၂၆,၀၀၀ ထောက်ပံ့ပေးခဲ့တယ်လို့ ပြည်ထောင်စုဝန်ကြီး ဒေါက်တာဝင်းမြတ်အေး အသိပေး
ဧပြီ ၃
Radio NUG
အမျိုးသားညီညွတ်ရေးအစိုးရ၊ လူသားချင်းစာနာ ထောက်ထားရေးနှင့် ဘေးအန္တရာယ်ဆိုင်ရာစီမံခန့်ခွဲရေး ဝန်ကြီးဌာနအနေဖြင့် လတ်တလော ဖြစ်ပွားခဲ့သည့် ငလျင်ဘေးဒဏ်ကြောင့် အရေးပေါ် ထောက်ပံ့ကူညီမှုများကို လိုအပ်လျက်ရှိနေသော နေရာ ဒေသအသီးသီးမှ ငလျင်ဘေးဒဏ်သင့် ပြည်သူများထံ ဝန်ကြီးဌာနက လက်ခံရရှိထားသော အလှူငွေများကို ဘေးဒဏ်သင့်ဒေသများတွင် ကူညီကယ်ဆယ်ရေး၊ အရေးပေါ် စားနပ်ရိက္ခာထောက်ပံ့ရေး လုပ်ငန်းများ ဆောင်ရွက်နိုင်ရန်အတွက် ငလျင်ဘေးဒဏ်သင့် ပြည်သူများထံသို့ အကူအညီများရောက်ရှိစေရေး ဆောင်ရွက်ပေးနေသော အဖွဲ့အစည်းများနှင့် ချိတ်ဆက် ထောက်ပံ့လျက်ရှိပါကြောင်း အသိပေးထုတ်ပြန်ထားပါတယ်။
ဧပြီလ ၂ရက်နေ့အထိ ငလျင်ဘေးတုံ့ပြန်ဖို့အတွက် ရရှိထားတဲ့ အလှူငွေ ကျပ် သိန်းပေါင်း ၁၇၁၃၃ သိန်း နဲ့ ၂၈၅၆၈ ကျပ် ရရှိထားပြီး ငလျင်ဘေးသင့်တဲ့ တိုင်းဒေသကြီး ၃ခု၊ ပြည်နယ် ၁ခုမှာ ရှိတဲ့ မြို့နယ် ၂၁မြို့နယ်က ငလျင်ဘေးသင့်ပြည်သူများကို ကျပ်သိန်းပေါင်း ၈၂၅,၇၂၆,၀၀၀ ထောက်ပံ့ပေးခဲ့တယ်လို့ ဝန်ကြီးက ဆိုပါတယ်။
ပြည်တွင်း၊ ပြည်ပက ထောက်ပံ့ကူညီပေးကြတဲ့ ပြည်သူများကိုလည်း ကျေးဇူးတင်ရှိကြောင်း ပြောဆိုထားပြီး စည်းလုံးညီညွတ်မှုနဲ့ ဆက်လက်ပါဝင် ထောက်ပံ့ပေးကြရန် တိုက်တွန်းထားပါတယ်။
========================
📌📌 ၃။ NUG ဂျပန်နိုင်ငံဆိုင်ရာ ကိုယ်စားလှယ်ရုံးမှ မြန်မာနိုင်ငံ ငလျင်ဘေးသင့် ပြည်သူများအား ထောက်ပံ့ကူညီနိုင်ရေးအတွက် ဆက်လက်ဆောင်ရွက်သွားနေ
ဧပြီ ၃
Radio NUG
အမျိုးသားညီညွတ်ရေးအစိုးရ၊ ဂျပန်နိုင်ငံကိုယ်စားလှယ်ရုံးမှ အရေးပေါ်ဖွဲ့စည်းခဲ့သော ငလျင်ဘေးဆိုင်ရာ အရေးပေါ်ကူညီနိုင်ရေးကော်မတီမှ တာဝန်ရှိသူများသည် ဧပြီလ ၃ရက်နေ့တွင် ဂျပန်နိုင်ငံလုံးဆိုင်ရာ အလုပ်သမားသမဂ္ဂများအဖွဲ့ချုပ် (Rengo)ရဲ့ တာဝန်ခံများ၊ အသေးစား အလတ်စား စက်ပစ္စည်းထုတ်လုပ်ရေး အလုပ်သမားသမဂ္ဂ (JAM)၏ ဥက္ကဋ္ဌ၊ တာဝန်ခံများနှင့် တွေ့ဆုံခဲ့ပြီး ငလျင်ဘေးအတွက် အရေးပေါ်အကူအညီနှင့် နောက်ဆက်တွဲ အကူအညီများပေးရန် လက်ရှိပြည်တွင်းအခြေအနေများကို ရှင်းပြကာ မေတ္တာရပ်ခံတောင်းဆိုစာ ပေးအပ်ခဲ့ကြောင်း သတင်းရရှိပါတယ်။
Rengo နှင့် JAM တာဝန်ခံများမှ ငလျင်ဘေးသင့် မြန်မာပြည်သူများအတွက် အလွန်ဝမ်းနည်း နာကျင်ရကြောင်း၊ အကောင်းဆုံး ပြန်လည်ထူထောင်နိုင်ရန် ဆုတောင်းပေးကြောင်းနှင့် ငလျင်ဘေးသင့် ပြည်သူများအတွက် တဆင့်ချင်း အကူအညီပေးအပ်သွားမည်ဖြစ်ကြောင်း အားပေးစကားများ ပြန်လည်ပြောကြားခဲ့တယ်လို့ သိရပါတယ်။
========================
📌📌 ၄။ ငလျင်ဒဏ်ကြောင့် CDM ကျန်းမာရေးဝန်ထမ်းအချို့နှင့် မိသားစုဝင်များ သေဆုံးခဲ့မှုအပေါ် ဝမ်းနည်းကြောင်း သဝဏ်လွှာပေးပို့
ဧပြီ ၃
Radio NUG
၂၀၂၅ ခုနှစ်၊ မတ်လ (၂၈) ရက်နေ့တွင် မြန်မာနိုင်ငံ၊ စစ်ကိုင်းမြို့၏ အနောက်မြောက်ဘက် (၁၆) ကီလိုမီတာအကွာ၌ အင်အား (၇.၇) ပမာဏရှိ ငလျင်ကြီး (Major Earthquake) နှင့် နောက်ဆက်တွဲငလျင်ငယ်များ လှုပ်ခတ်ခဲ့မှုကြောင့် မြန်မာနိုင်ငံ၌ ပြည်သူများစွာ ထိခိုက်သေဆုံးခဲ့ရာ ၂၀၂၁ ခုနှစ်၊ စစ်အာဏာသိမ်းပြီးနောက်ပိုင်း အကြမ်းမဖက် အာဏာဖီဆန်ရေးလှုပ်ရှားမှု (Civil Disobedience Movement – CDM) ပြုလုပ်ထားသော ကျန်းမာရေးဝန်ထမ်းအချို့နှင့် ယင်းတို့၏ မိသားစုဝင်များလည်း အသက်ဆုံးရှုံးခဲ့ရကြောင်း အမျိုးသားညီညွတ်ရေးအစိုးရ၊ ကျန်းမာရေးဝန်ကြီးဌာနမှ သတင်းထုတ်ပြန်ပါတယ်။
ငလျင်ဒဏ်ကြောင့် သေဆုံးခဲ့ရသည့် ပြည်သူများ၊ CDM ကျန်းမာရေးဝန်ထမ်းများနှင့် ယင်းတို့၏ မိသားစုဝင်များအတွက် များစွာကြေကွဲဝမ်းနည်းရပြီး ဝန်ကြီးဌာနအနေဖြင့် CDM အောင်မြင်ရေးကော်မတီ (CDM Success Committee)၊ CDM ကျန်းမာရေးကွန်ယက် (CDM Medical Network) တို့နှင့်ချိတ်ဆက်၍ ငလျင်ဒဏ်ကြောင့် ထိခိုက်သေဆုံးခဲ့ရသည့် CDM ကျန်းမာရေးဝန်ထမ်းများနှင့် ၎င်းတို့၏ မိသားစုဝင်များအတွက် တတ်အားသမျှ ကူညီထောက်ပံ့မှုများ ပေးအပ်သွားမည်ဖြစ်ကြောင်း အသိပေးထုတ်ပြန်ထားပါတယ်။
========================
📌📌 ၅။ ထိုင်းဝန်ကြီးချုပ် ခေါင်းဆောင်မှုအောက်တွင် ထိုင်းနိုင်ငံသည် စစ်အုပ်စု၏ စစ်ရာဇ၀တ်မှုများနှင့် လူသားမျိုးနွယ်အပေါ် ကျူးလွန်သည့် ရာဇ၀တ်မှုများထဲတွင် ပါ၀င်နေဟု ဆို
ဧပြီ ၃
Radio NUG
ထိုင်းဝန်ကြီးချုပ် ပိတ်ထောင်တန်ရှင်နဝတ်ရဲ့ ခေါင်းဆောင်မှုအောက်တွင် ထိုင်းနိုင်ငံသည် စစ်အုပ်စု၏ စစ်ရာဇ၀တ်မှုများနှင့် လူသားမျိုးနွယ်အပေါ် ကျူးလွန်သည့် ရာဇ၀တ်မှုများထဲတွင် ပါ၀င်နေခဲ့ကြောင်း သွေးစွန်းငွေမှ အသိပေးဖော်ပြပါတယ်။
ထိုင်းအစိုးရ၏ သံတမန်ရေးရာအရ မြန်မာအကြမ်းဖက် စစ်ခေါင်းဆောင် မင်းအောင်လှိုင်အနေဖြင့် ထိုင်းနိုင်ငံတွင် ပြုလုပ်သွားမည့် “BIMSTEC” ဒေသတွင်း ထိပ်သီးအစည်းအဝေးကို တက်ရောက်ခြင်းသည် အနောက်နိုင်ငံများ၏ ပိတ်ဆို့အရေးယူမှုများကို ကျယ်ကျယ်ပြန့်ပြန့် ရင်ဆိုင်နေရချိန် ထိုင်းနိုင်ငံ၏ ဖိတ်ခေါ်မှုဖြင့် အဆင့်မြင့်အစည်းအဝေးများ တက်ရောက်ခွင့်မှတဆင့် တရားဝင် အသိအမှတ်ပြုမှုရရှိရန် ကြိုးပမ်းခြင်းဖြစ်ကြောင်း ဖော်ပြထားပါတယ်။
The New Humanitarian (၂၀၂၅) ၏ အဆိုအရ ၂၀၂၄ ခုနှစ်အတွင်း မြန်မာနိုင်ငံမှ ထွက်ပြေးတိမ်းရှောင်လာသူ ၆,၃၀၀ ကျော်ကို ထိုင်းနိုင်ငံမှာ ဖမ်းဆီးရမိပြီး နေရပ်ပြန်ပို့ခဲ့သည့်အတွက် စစ်တပ်၏ စစ်မှုထမ်းရန် အဓမ္မစစ်သားအဖြစ် သွပ်သွင်းသည့် အရင်းအမြစ်တခု ဖြစ်လာခဲ့တယ်လို့ သိရပါတယ်။
ထိုင်းနိုင်ငံသည် နိုင်ငံပိုင် စွမ်းအင်ကုမ္ပဏီ PTT သည် မြန်မာ့ ရေနံနှင့် သဘာဝဓာတ်ငွေ့ ဝန်ဆောင်မှုကဏ္ဍတွင် ထိပ်တန်း ရင်းနှီးမြှုပ်နှံသူတဦးဖြစ်ပြီး EU ၏ ပိတ်ဆို့ခံထားရမှုနှင့် US ထံမှ ကန့်သတ်ခံထားရသော Myanma Oil and Gas Enterprise (MOGE) နှင့် စီးပွားမိတ်ဖက် လုပ်နေကာ ပြည်သူများကို ဖမ်းဆီးနှင်ထုတ်ခြင်းပြုရန် ခွင့်ပြုခြင်းနှင့် စစ်အုပ်စုနှင့် စီးပွားရေးပူးပေါင်းဆောင်ရွက်မှုများလုပ်ရန် ခွင့်ပြုပေးခြင်းတို့ကို ကြည့်ခြင်းအားဖြင့် ထိုင်းအစိုးရသည် မြန်မာနိုင်ငံ၏ အကြမ်းဖက်စစ်အုပ်စုကို တက်တက်ကြွကြွ ထောက်ခံပံ့ပိုးနေကြောင်း မြင်သာတယ်လို့ ဆိုထားပါတယ်။
ထို့အပြင် အင်အားပြင်း ငလျင်လှုပ်ခတ်ခဲ့သည့် မတ်လ ၂၈ ရက်မှ ဧပြီလ ၁ ရက်နေ့အတွင်း အကြမ်းဖက်စစ်အုပ်စုသည် လေကြောင်းတိုက်ခိုက်မှု အနည်းဆုံး (၂၂) ကြိမ်ထိ ပြုလုပ်ခဲ့ပြီး အကြမ်းဖက်စစ်ခေါင်းဆောင် မင်းအောင်လှိုင်ကို ထိုင်းအစိုးရဲ့ ဖိတ်ခေါ်မှုအပေါ် ထိုင်း-မြန်မာ အရပ်ဘက်အဖွဲ့အစည်းများမှလည်း ရှုတ်ချကန့်ကွက်ခြင်းများ ပြုလုပ်လျက်ရှိပါတယ်။
========================
📌📌 ၆။ တအာင်းပြည်၊ လူဝင်မှုကြီးကြပ်ရေးဌာနမှ ဝန်ထမ်း (၁၀၀)ဦး ခေါ်ယူမည်
ဧပြီ ၃
Radio NUG
တအာင်းပြည် လူဝင်မှုကြီးကြပ်ရေးဌာန (Ta'ang Land Immigration Department )အနေဖြင့် တအာင်းပြည်၏ လူဦးရေစာရင်းနှင့် လူဝင်မှုကြီးကြပ်ရေးလုပ်ငန်းများ စတင်လုပ်ကိုင်နိုင်ရန် လိုအပ်နေသော ဝန်ထမ်း (၁၀၀)ဦး ခေါ်ယူသွားမည်ဖြစ်ကြောင်း သတင်းထုတ်ပြန်ပါတယ်။
တအာင်းပြည်အတွင်းရှိ ပြည်သူများ၏ လုံခြုံရေး၊ တိုးတက်ဖွံ့ဖြိုးရေးကိစ္စရပ်များကို စနစ်တကျဆောင်ရွက်နိုင်ရန်အတွက် PSLF/TNLAအုပ်ချုပ်သော မြို့နှင့်ကျေးရွာအတွင်းရှိ မိဘပြည်သူလူထုများကို လူဦးရေစီစစ်ပြီး အိမ်ထောင်စုစာရင်း ထုတ်ပေးခြင်း၊ ပြည်နယ်သားမှတ်ပုံတင် စီစစ်ထုတ်ပေးခြင်းနှင့် နိုင်ငံသား (ဧည့်ပြည်နယ်သား) စီစစ်သတ်မှတ်ခြင်းလုပ်ငန်းများ ဆောင်ရွက်သွားမည်ဖြစ်တာကြောင့် လူမျိုး၊ ဘာသာမရွေး သတ်မှတ်ထားသည့် အရည်အချင်းပြည့်မှီသူများ လာရောက်လျှောက်ထားနိုင်တယ်လို့ ဖော်ပြထားပါတယ်။
အခုတင်ပြခဲ့တဲ့ သတင်းတွေကို Radio NUG သတင်းထောက် ခါးရှဲလ်က ပေးပို့ထားတာ ဖြစ်ပါတယ်။
========================
========================
🚩🚩 ၁။ အပစ်ရပ်တယ်လို့ လီဆယ်ထုတ်ပြန်ပြီး ညောင်ဦးမြို့နယ်မှာ စစ်ကောင်စီ စစ်ကြောင်းထိုးနေ
ဧပြီလ ၃ ရက်
Radio NUG
စစ်ကောင်စီက အပစ်ရပ်တယ်လို့ ကြေညာထားပြီး နောက်တနေ့ မနက်မှာပဲ မန္တလေးတိုင်း၊ ညောင်ဦး မြို့နယ်အတွင်း စစ်ကြောင်းထိုးကာ ပစ်ခတ် တိုက်ခိုက်တာတွေ လုပ်ဆောင်နေတယ်လို့ ကာကွယ်ရေး ဝန်ကြီးဌာန (MOD) က ထုတ်ပြန်ထားပါတယ်။
ဧပြီလ ၃ ရက်နေ့ မနက် ၆ နာရီခန့်က ညောင်ဦးမြို့နယ်၊ ငါ့သရောက် ရဲစခန်းကနေ တင့်ကား ၂ စီးဖြင့် စစ်ကြောင်းထိုးလာတဲ့ စစ်ကောင်စီတပ်က လမ်းတလျောက်မှ မြေသန့်တောင်၊ မအူပင်၊ ကြအိုကျေးရွာများကို ပွိုင့်ဖိုက် စစ်သေနတ် အပါအဝင် လက်နက်မျိုးစုံဖြင့် ပစ်ခတ်တိုက်ခိုက်ခဲ့တာပါ။
အလားတူ စစ်ကောင်စီတပ် အင်အား (၂၀၀) ခန့်ဟာ ညောင်ဦးမြို့နယ်၊ ကျောက်ပြင်ကန် ကျေးရွာကို စစ်ကြောင်းထိုး ဝင်ရောက်လာကာ မီးရှို့ဖျက်ဆီးမှုတွေ လုပ်ဆောင်နေတယ်လို့ ပြည်သူ့ဒီမိုကရက်တစ် တပ်တော် PDA က ထုတ်ပြန်ထားပါတယ်။
ထို့အပြင် ကျောက်ပြင်ကန် ကျေးရွာကနေ ၆၀ မမ လက်နက်ကြီး၊ လက်နက်ငယ်များ ရမ်းသမ်းပစ်ခတ်တာတွေကို လုပ်ဆောင်ခဲ့ပြီး စစ်ဘေးရှောင် ပြည်သူများ နေထိုင်လျက်ရှိတဲ့ တဲများကို မီးရှို့ဖျက်ဆီးခဲ့တယ်လို့ ဆိုပါတယ်။
စစ်တပ်စစ်ကြောင်းက ကျောက်ပြင်ကန်ကျေးရွာကို ပထမအကြိမ် မီးရှိ့ဖျက်ဆီးခဲ့ဖူးပြီး ငွေကျပ် သိန်း ၅,၀၀၀ နီးပါး တန်ဖိုးရှိ ပြည်သူပိုင် ပစ္စည်းများကို ခိုးယူဖောက်ထွင်း သယ်ဆောင်သွားခဲ့ဖူးတယ်လို့ သိရပါတယ်။
========================
🚩🚩 ၂။ အပစ်ရပ်သည်လို့ လီဆယ်လှည့်ဖြားတဲ့ စစ်ကောင်စီမှ သပိတ်ကျင်း၊ ကနီ၊ ဟုမ္မလင်းနှင့် တောင်သာမြို့နယ်များတွင် လေကြောင်းတိုက်ခိုက်မှုများ ပြုလုပ်
ဧပြီ ၃
Radio NUG
ဧပြီလ (၃) ရက်နေ့၊ မွန်းလွဲ (၁၂:၄၀) နာရီခန့်တွင် မန္တလေးတိုင်း၊ သပိတ်ကျင်းမြို့နယ်၊ (၇) မိုင်ကျေးရွာအနီးသို့ အကြမ်းဖက် စစ်ကောင်စီက လေကြောင်းတိုက်ခိုက်မှု (၂) ကြိမ် ပြုလုပ်ခဲ့ကြောင်း အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနမှ သတင်းထုတ်ပြန်ပါတယ်။
ထို့အပြင် အနောက်မြောက်တိုင်းစစ်ဌာနချုပ် (နမခ)မှ တက်လာသည့် အကြမ်းဖက်စစ်ကောင်စီတပ်၏ Paramotor (၂)စီးသည် စစ်ကိုင်းတိုင်း၊ ကနီမြို့နယ်၊ မုဌောရွာနှင့် နတ်ကြီးရွာသို့ ၂၀၂၅ ခုနှစ်၊ ဧပြီလ (၃) ရက်နေ့ နေ့လယ် (၁၂:၂၂ နာရီ၊ ၁၂:၃၅ နာရီ၊ ၁၂:၃၆ နာရီ၊ ၁၂:၃၇ နာရီ၊ ၁၂:၅၂ နာရီအချိန်များတွင် ဗုံးသီးကြဲချ တိုက်ခိုက်ခဲ့ပြီး တောင်ပျောက်ရွာကိုလည်း စက်သေနတ်ဖြင့် ပစ်ခတ်သွားတယ်လို့ သိရပါတယ်။
အလားတူ ဟုမ္မလင်းလေတပ်စခန်းဌာနချုပ်မှ တက်လာသော အကြမ်းဖက်စစ်တပ်၏ MI-2 ဘက်စုံသုံး ရဟတ်ယာဥ်သည် စစ်ကိုင်းတိုင်း၊ ဟုမ္မလင်းမြို့နယ်၊ ဖာနိုင်း၊ စန်းဆိုင်၊ ပဲနို့ဆွတ်ရွာနှင့် ရွှေမှော်အနီးသို့ တိုက်ပွဲဖြစ်ပွားခြင်းမရှိဘဲ ဧပြီလ (၃) ရက်နေ့၊ နံနက် (၉:၃၀)နာရီ ခန့်တွင် ဗုံးသီး (၁၃)လုံးချ တိုက်ခိုက်ခဲ့တယ်လို့ ဖော်ပြထားပါတယ်။
ဧပြီလ (၂) ရက်နေ့၊ နံနက် (၂) နာရီခန့်တွင်လည်း မန္တလေးတိုင်း၊ တောင်သာမြို့နယ်၊ သဲတောကျေးရွာကို အကြမ်းဖက်စစ်တပ်က Paramotor (၃)စီးနှင့် ၁၂၀ မမ ဗုံးသီး (၈)လုံးကြဲချ တိုက်ခိုက်ခဲ့ရာ သဲတောကျေးရွာ အရှေ့ဘက် တောင်သာနှင့် ကျောက်ပန်းတောင်းသွား ကားလမ်းမ၏ အရှေ့ဘက် ရေကျော် အလယ်တန်းစာသင်ကျောင်းနှင့် ပြည်သူ့နေအိမ် ထိခိုက်ပျက်စီးခဲ့ကြောင်း ထုတ်ပြန်ထားပါတယ်။
========================
🚩🚩 ၃။ စစ်ကောင်စီက စစ်ကိုင်းနဲ့ မကွေးမှာ စစ်ကြောင်းထိုး ပစ်ခတ်တာတွေကို ဆက်လက်လုပ်ဆောင်
ဧပြီလ ၃ ရက်
Radio NUG
စစ်ကောင်စီက တနိုင်ငံလုံး အပစ်ရပ် ကြေညာထားပေမယ့် စစ်ကိုင်းတိုင်း၊ ဆားလင်းကြီးနဲ့ ယင်းမာပင် မြို့နယ်၊ မကွေးတိုင်း စလင်းမြို့နယ်တို့မှာ စစ်ကြောင်းထိုး ပစ်ခတ်မှုတွေကို ဆက်လက် လုပ်ဆောင်နေတယ်လို့ သိရပါတယ်။
ဧပြီ ၂ ရက်နေ့ ညပိုင်းမှာ ဆားလင်းကြီးနဲ့ ယင်းမာပင် မြို့နယ်အတွင်းက တရုတ်ကြေးနီ စီမံကိန်းအနီးရှိ ကျေးရွာတွေကို စစ်ကောင်စီ တပ်အင်အား ၁၃၀ ခန့်က စစ်ကြောင်း နှစ်ကြောင်းခွဲကာ ထိုးလာတယ်လို့ ဆိုပါတယ်။
စစ်ကြောင်းထိုးလာတာကြောင့် ဆားလင်းကြီး မြို့နယ် ဒုံးတောရွာ၊ ဂုံတောရွာ၊ ရွာသာရွာနဲ့ ယင်းမာပင် မြို့နယ် ကျေးစာကျရွာ၊ ဘိန်းနွယ်ချောင်ရွာ၊ ပေကုန်းရွာ၊ အနီးတဝိုက် ကျေးရွာတွေက ဒေသခံ ၁၀,၀၀၀ ကျော် ထွက်ပြေး တိမ်းရှောင်နေရတယ်လို့ ချင်းတွင်းရိုးမ မဟာမိတ်တပ်ပေါင်းစုထံက သိရပါတယ်။
အလားတူ မကွေးတိုင်း၊ စလင်းမြို့နယ် ဆင်ဖြူကျွန်း-တညောင် လမ်းပိုင်းမှာ စစ်ကောင်စီ တပ်တွေက စစ်ကြောင်းထိုးနေပြီး ဧပြီလ ၃ ရက်နေ့ မနက်ပိုင်းမှာတော့ ကံပြားရွာဘက်ကို စစ်ကြောင်းဆက်ထိုးနေတာပါ။
အဆိုပါ စစ်ကြောင်းတွေဟာ ကျေးရွာတွေထဲ ဝင်ရောက်မွှေနှောက်တာ လက်နက်ကြီး ပစ်ခတ်တာတွေ လုပ်ဆောင်နေတာကြောင့် အနီးနားကျေးရွာတွေက ဒေသခံပြည်သူတွေ ထွက်ပြေးတိမ်းရှောင်နေကြရတယ်လို့ သိရပါတယ်။
မတ်လ ၂၈ ရက်နေ့က လှုပ်ခတ်ခဲ့တဲ့ ငလျင်ကြောင့် လူထိခိုက်သေဆုံးမှု များပြားခဲ့ရာ ကယ်ဆယ်ရေး လုပ်ငန်းတွေကို လုပ်ဆောင်နိုင်ဖို့ NUG အစိုးရက ထိုးစစ် နှစ်ပတ်ရပ်မယ်လို့ မတ်လ ၂၉ ရက်နေ့ ညမှာ ထုတ်ပြန်ထားပါတယ်။
စစ်ကောင်စီဘက်ကလည်း ဧပြီလ ၂ ရက်၊ ညပိုင်းမှာ ၃ ပတ်ကြာ အပစ်ရပ်မယ်လို့ ထုတ်ပြန်ခဲ့ပေမယ့် ယနေ့အထိ အမှန်တကယ် အပစ်ရပ်တာ မရှိဘဲ စစ်ကြောင်းထိုး ပစ်ခတ်တာတွေအပြင် လေကြောင်းမှ ဗုံးကြဲ တိုက်ခိုက်မှုတွေကို ဆက်လက်လုပ်ဆောင်နေတာ ဖြစ်ပါတယ်။
========================
🚩🚩 ၄။ စစ်ကောင်စီလက်အောက်ခံ PNO/PNAက တောမီးရှို့မှုကြောင့် ကျေးရွာ ၂ရွာကို မီးကူးစက်ပြီး နေအိမ် ၂၄လုံးခန့် မီးလောင်ပျက်စီး
ဧပြီ ၃
Radio NUG
မတ်လ ၃၁ ရက်နေ့ မွန်းလွဲပိုင်းတွင် PNO/PNA တပ်စွဲရာနေရာ ဆောင်းပြောင်းနှင့် နောင်ဝိုးဘက်မှ တောမီး စတင်ရှို့ခဲ့ပြီး တစ်ဆက်တစပ်တည်းရှိ သောင်မဲသင်းနှင့် လုံးပျဉ်ကျေးရွာများသို့ တောမီး ကူးစက်ကာ အရပ်သားနေအိမ် ၂၀ ခန့်နှင့် လုံးပျဉ်ကျေးရွာတွင် နေအိမ် ၄ လုံးခန့် အသီးသီး မီးလောင် ပျက်စီးဆုံးရှုံးခဲ့ကြောင်း ပအိုဝ်းအမျိုးသားကာကွယ်ရေးတပ်ဖွဲ့-ခမ်းကောင် (PNDF-KK)မှ သတင်းထုတ်ပြန်ပါတယ်။
PNDF-KK နှင့် KNDF အပါအဝင် မဟာမိတ် တပ်ပေါင်းစုများက ကျေးရွာများသို့ ကူးဆက်နေသော တောမီးငြိမ်းသတ်နိုင်ရေး ကူညီဆောင်ရွက်ခဲ့ရတယ်လို့ သိရပါတယ်။
PNO/PNA သည် သောင်မဲသင်းကျေးရွာနှင့် လုံပျဉ်ကျေးရွာတို့ဘက်သို့ လက်နက်ကြီးများဖြင့်လည်းကောင်း၊ အသေခံဒရုန်းများဖြင့်လည်းကောင်း နေ့စဉ်လိုလို တိုက်ပွဲဖြစ်ပွားခြင်း မရှိဘဲ ပစ်ခတ်လျက်ရှိတယ်လို့ ဖော်ပြထားပါတယ်။
========================
🚩🚩 ၅။ ဖရူဆို မြို့အတွင်းက နေအိမ်များကို စစ်ကောင်စီက အကြောင်းမဲ့ မီးရှို့ဖျက်ဆီး
ဧပြီလ ၃ ရက်
Radio NUG
ကရင်နီပြည်နယ်၊ ဖရူဆိုမြို့အတွင်းက ပြည်သူလူထု နေအိမ်များကို စစ်ကောင်စီတပ်က အကြောင်းမဲ့ မီးရှို့ဖျက်ဆီးခဲ့တယ်လို့ ကရင်နီအမျိုးသားများ ကာကွယ်ရေးတပ် - KNDF က ထုတ်ပြန်ထားပါတယ်။
မတ်လ ၃၁ ရက်နေ့မှာ ဖရူဆိုမြို့ မြို့မရဲစခန်းအတွင်း ခြေကုတ်ယူထားတဲ့ စစ်ကောင်စီတပ်ဖွဲ့က တိုက်ပွဲ တစုံတရာ ဖြစ်ပွားခြင်း မရှိဘဲ ညောင်ဇင် ရပ်ကွက်နှင့် ရွှေပြည်သာ ရပ်ကွက်တို့က နေအိမ်များကို မီးရှို့ ဖျက်ဆီးခဲ့တာလို့ ဆိုပါတယ်။
ဧပြီလ ၁ ရက်နေ့ ညပိုင်းအထိ မီးဆက်လက် လောင်ကျွမ်းနေခဲ့ပြီး အနည်းဆုံး ပြည်သူလူထုပိုင် နေအိမ် ၆ လုံး မီးလောင်ပျက်ဆီး ခဲ့တယ်လို့ သိရပါတယ်။
ဖရူဆိုမြို့မှာ တိုက်ပွဲမရှိတာ ကြာမြင့်နေပြီဖြစ်ပြီး ဒေသခံ လူထုများ နေထိုင်နေမှု မရှိသလို စစ်ကောင်စီ တပ်ဖွဲ့နဲ့ ၎င်းတို့ရဲ့ နောက်လိုက်များက ပြည်သူလူထု ပစ္စည်းများ နေအိမ်များကို ဖောက်ထွင်းယူဆောင်၊ မီးရှိုဖျက်ဆီးတာတွေကို ဥပဒေမဲ့ ပြုလုပ်နေကြတယ်လို့ သိရှိရပါတယ်။
========================
🚩🚩 ၆။ ပြည်သူ့ဒီမိုကရက်တစ်အဖွဲ့/ ပြည်သူ့ဒီမိုကရက်တစ် တပ်တော် (၄) နှစ်ပြည့် အခမ်းအနား ကျင်းပ
ဧပြီလ ၃ ရက်
Radio NUG
ပြည်သူ့ဒီမိုကရက်တစ်အဖွဲ့/ ပြည်သူ့ဒီမိုကရက်တစ်တပ်တော် (PDO/PDA) ရဲ့ ၄ နှစ်ပြည့် အခမ်းအနားကို တပ်တော်ရဲ့ စစ်ဒေသ အသီးသီးမှာ အောင်မြင်စွာ ကျင်းပနိုင်ခဲ့တယ်လို့ ထုတ်ပြန်ထားပါတယ်။
ဧပြီလ ၁ ရက်နေ့က ပြုလုပ်ခဲ့တဲ့ (PDO/PDA) ရဲ့ ၄ နှစ်ပြည့် အခမ်းအနားမှာ အလံတင် အခမ်းအနားနဲ့ သစ္စာအဓိဌာန်ဆိုခြင်း၊ ၄ နှစ်ပြည့် အထိမ်းအမှတ် မိန့်ခွန်းပြောကြားခြင်း၊ ဗဟိုကော်မတီနဲ့ ဗဟိုဌာနချုပ် အသီးသီးမှ ပေးပို့တဲ့ သဝဏ်လွှာများကို ဖတ်ကြားခြင်းများ ပြုလုပ်ခဲ့တယ်လို့ ဆိုပါတယ်။
ထို့ပြင် (PDO/PDA) အမှတ် (၂) စစ်ဒေသ ကျေးရွာအုပ်ချုပ်ရေး၊ ကျေးရွာကာကွယ်ရေး အရန်တပ်ဖွဲ့ နဲ့ ကျေးရွာ ပြည်သူလူထုမှ အမှတ်တရ စကားများ ပြောကြားခြင်း၊ ရှေ့တန်း စစ်မြေပြင်တွင် ရွပ်ရွပ်ချွံချွံ တိုက်ပွဲဝင်ကာ ပေးဆပ်စွန့်လွှတ်ခဲ့တဲ့ ရဲဘော်များကို မှတ်တမ်းတင် ဂုဏ်ပြုခြင်းများ ပြုလုပ်ခဲ့တယ်လို့ သိရပါတယ်။
ညဘက်မှာလည်း ကျေးရွာနေ ပြည်သူလူထုအား ပြည်သူ့ဒီမိုကရက်တစ် အဖွဲ့ / ပြည်သူ့ဒီမိုကရက်တစ် တပ်တော် (PDO/PDA) ရဲ့ အမှတ်တရ ဗီဒီယိုများ ဖွင့်လှစ်ပြသခြင်းတို့ ပြုလုပ်ခဲ့တယ်လို့ သိရပါတယ်။
========================
🚩🚩 ၇။ တောင်ညိုတပ်ရင်း (၃) နှစ်ပြည့် နှင့် ဆုပေးပွဲ အခမ်းအနား ကျင်းပ
ဧပြီလ ၃ ရက်
Radio NUG
တောင်ညိုတပ်ရင်း ၃ နှစ်ပြည့်နှင့် ဆုပေးပွဲ အခမ်းအနားကို ဧပြီ ၁ ရက်နေ့က ကျင်းပပြုလုပ်ခဲ့ကြောင်း Taung Nyo Column က သတင်းထုတ်ပြန်ထားပါတယ်။
အခမ်းအနားတွင် အမိန့်နာခံမှုနှင့် စည်းကမ်းကောင်းမွန်သော ရဲဘော်များကို ဆုပေးခြင်း၊ တပ်ရင်းမှာ ၃ နှစ်တာ ဖြတ်သန်းခဲ့ရတဲ့ အခက်အခဲများ၊ ဖော်ဆောင်နိုင်တဲ့ တိုက်ပွဲများအကြောင်း ချပြ ဖတ်ကြားခြင်း၊ တပ်ရင်းမှူးများမှ အားပေးစကား ပြောကြားခြင်းနှင့်အတူ ရှေ့ဆက်၍ ငါတို့တောင်ညို ဘယ်တော့မှမပြို ဆိုတဲ့ ဆောင်ပုဒ်အတိုင်း ဆက်သွားကြမည်ဖြစ်ကြောင်း ပြောကြားရင်း အခမ်းအနား ပိတ်သိမ်းခဲ့တယ် လို့ ဆိုပါတယ်။
၃ နှစ်တာကာလအတွင်း ပျောက်ကြားတိုက်ပွဲ ၆၇ ကြိမ်ထပ်မနည်း ဖော်ဆောင်နိုင်ခဲ့ကာ တိုက်ပွဲအတွင်း ရန်သူ ၂၅၈ ဦး သေဆုံး၊ ၂၃၃ ဦး ဒဏ်ရာရခဲ့ကာ စစ်ကား ၂၉ စီး ပျက်စီးခဲ့တယ်လို့ သိရပါတယ်။
အဆိုပါ တိုက်ပွဲများအတွင်း တောင်ညိုတပ်ရင်း ဘက်မှလည်း ကျဆုံးရဲဘော် ၆ ဦး ရှိခဲ့တယ်လို့ ဖော်ပြ ထားပါတယ်။
အခုတင်ပြခဲ့တဲ့ သတင်းတွေကို Radio NUG သတင်းထောက် မင်းစစ်သွေးနှင့် ခါးရှဲလ်တို့က ပေးပို့ထားတာ ဖြစ်ပါတယ်။
No comments:
Post a Comment