25 Oct 2025 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၅ အောက်တိုဘာလ ( ၂၅ ) ရက်နေ့နောက်ဆုံးရပြည်တွင်းသတင်းများ

📌📌 ၁။ ဟားခါးမြို့နယ် ဇာထာလ်ရွာစာသင်ကျောင်းကို စစ်ကော်မရှင်က လေကြောင်းကနေ ဗုံးကြဲတိုက်ခိုက်။

 

ချင်းပြည်နယ်၊ ဟားခါးမြို့နယ် ဇာထာလ်( Zathal) ကျေးရွာကစာသင်ကျောင်းကို စစ်ကော်မရှင်တပ်က အောက်တိုဘာလ ၂၁ ရက်နေ့ မနက်  ၁ နာရီဝန်းကျင်လောက်မှာ လေကြောင်းကနေ  ၂ ကြိမ်ဗုံးကြဲတိုက်ခိုက်ခဲ့တယ်လို့  ဆဲန်ထန်ကောင်စီ(Senthang Central Council) က အောက်တိုဘာလ ၂၁ရက်နေ့မှာထုတ်ပြန်ပါတယ်။

စစ်ကော်မရှင်က ဇာထာလ်( Zathal) ကျေးရွာစာသင်ကျောင်းကို ပစ်မှတ်ထားပြီး ၁၂ နာရီ ၅၅ မိနစ်မှာ တစ်ကြိမ်  ၁နာရီမှာ ၁ ကြိမ် စုစုပေါင်း ၂ ကြိမ် လေကြောင်းကနေ ဗုံးကြဲခဲ့ပြီး အခုလို ကလေးသူငယ်နဲ့ ပြည်သူတွေပေါ် ပစ်မှတ်ထား လေကြောင်းတိုက်ခိုက်ခြင်းလုပ်ရပ်ပေါ် ပြင်းထန်စွာ ကန့်ကွက်ကြောင်းကိုလည်း ဆဲန်ထန်ကောင်စီက ထုတ်ပြန်ပါတယ်။

စစ်ကော်မရှင်အနေနဲ့ ၎င်းတို့ လုပ်မယ့် ရွေးကောက်ပွဲ အစီအစဉ် အောင်မြင်နိုင်ရေးအတွက် ပြည်သူလူထုပေါ် အကြမ်းဖက်နည်းလမ်းနဲ့ ခြိမ်းခြောက်တိုက်ခိုက်မှုတွေ ဆက်လက်ကျူးလွန်နေတဲ့အတွက် စစ်ကော်မရှင်ရဲ့ တရားမဝင်ရွေးကောက်ပွဲမှာ ပူးပေါင်းဆောင်ရွက်ခြင်း မလုပ်ကြဖို့၊ စာသင်ကျောင်းတွေကို အကန့်အသတ်မရှိ ပိတ်ထားဖို့နဲ့ လူစုလူဝေးဖြင့် ပွဲလမ်းသဘင်တွေကို အတက်နိုင်ဆုံး ရှောင်ကြဉ်ဖို့လည်း ဆဲန်ထန်ကောင်စီက ထုတ်ပြန်ထားပါတယ်။

အောက်တိုဘာလ ၁၃ ရက်နေ့ကလည်း ဟားခါးမြို့နယ် ဗန်ဟားကျေးရွာရှိ စာသင်ကျောင်းကို စစ်ကော်မရှင်က လေကြောင်းကနေ ဗုံးကြဲတိုက်ခိုက်ခဲ့လို့ ကျောင်းသား ၂ ဦးသေဆုံး အမြောက်အများ ထိခိုက်ဒဏ်ရာရခဲ့ပါတယ်။

 

========================

 

📌📌 ၂။ ဆောမြို့ မှာ စစ်ဘေးရှောင် အသက် ၆၀ ဝန်းကျင် ချင်းအမျိုးသမီးတစ်ဦး လက်ဝတ်လက်စားလုယက်ခံရပြီး အသတ်ခံရ။

 

မကွေးတိုင်း၊ ဆောမြို့မှာ စစ်ဘေးရှောင်နေတဲ့ မင်းတပ်မြို့နယ်ဒေသခံ အသက် ၆၀ ဝန်းကျင်အရွယ် ဒေါ်ရှိန်းခေါဝါ ဆိုသူဟာ တောတွင်းတစ်နေရာမှာ ပစ္စည်းလုပြီး အသတ်ခံရတယ်လို့ ဆိုပါတယ်။

အောက်တိုဘာ ၁၇ ရက်နေ့က ဆောမြို့ပေါ်ကနေ ထင်းရှာဖို့သွားတဲ့ ဒေါ်ရှိန်းခေါဝါကို ဓားပြတိုက်လုယက် သတ်ဖြတ်ကြပြီး ၃ ရက်အကြာ အောက်တိုဘာ ၂၀ ရက်နေ့မှာ ပြန်လိုက်ရှာရာက တောတွင်းတစ်နေရာမှာ ရုပ်အလောင်း ပြန်တွေ့တာဖြစ်ပါတယ်။ ဒေါ်ရှိန်းခေါဝါ ရုပ်အလောင်းပြန်တွေ့စဉ် ခန္ဓာကိုယ်ပေါ်ရှိ လက်ဝတ်လက် စားတချို့ မရှိတော့ဘူးလို့လည်း သိရပါတယ်။

အဆိုပါဖြစ်စဉ်နဲ့ပတ်သက်လို့ ဆောမြို့နယ် ပြည်သူ့အုပ်ချုပ်ရေးအဖွဲ့က ဖြစ်စဉ်သိနိုင်ဖွယ်ရှိတဲ့ မသင်္ကာသူအမျိုးသားတစ်ဦးကို စစ်ဆေးနေသလို ထွက်ပြေးလွတ်မြောက်နေသူ လူသတ်တရားခံကိုလည်း စုံစမ်းနေဆဲလို့ ဆိုပါတယ်။

 

========================

 

📌📌 ၃။ စစ်ခေါင်းဆောင် တက်ခွင့်မရလိုက်တဲ့ အာဆီယံထိပ်သီးအစည်းအဝေး မြန်မာကိုယ်စားပြုတက်ဖို့ ဦး‌ဟောက်ခန့်ဆုမ်း မလေးရှားရောက်နေ။

 

မြန်မာနိုင်ငံခြားရေးဝန်ကြီးဌာန အမြဲတမ်းအတွင်းဝန် ဦး‌ဟောက်ခန့်ဆုမ်းဟာ ၄၇ ကြိမ်မြောက် အာဆီယံထိပ်သီးစည်းအဝေးနဲ့ ဆက်စပ်အစည်းအဝေး မတိုင်မီ အောက်တိုဘာ ၂၃ရက်‌နေ့က

မလေးရှားနိုင်ငံ ကွာလာလမ်ပူ အပြည်ပြည်ဆိုင်ရာလေဆိပ်ကို ရောက်နေပြီလို့ BERNAMA သတင်းဌာနက ရေးသားပါတယ်။

အောက်တိုဘာ ၂၆ ရက်မှ ၂၈ ရက်နေ့အထိ ကျင်းပမယ့် ၄၇ ကြိမ်မြောက် အာဆီယံထိပ်သီးစည်းအဝေးမှာ စစ်ခေါင်းဆောင်မင်းအောင်လှိုင် တက်ရောက်မယ်လို့ သတင်းထွက်ပေမယ့် အိမ်ရှင်အဖြစ်လက်ခံကျင်းပတဲ့ မလေးရှားဝန်ကြီးချုပ် အန်ဝါ အီဘရာဟင်က မြန်မာစစ်ခေါင်းဆောင်ကို မဖိတ်တဲ့အကြောင်း အောက်တိုဘာ ၂၂ ရက်နေ့က ပြန်လည် ပြောဆိုပါတယ်။

၄၇ ကြိမ်မြောက် အာဆီယံထိပ်သီးစည်းအဝေးမှာ အမေရိကန်သမ္မတ ဒေါ်နယ်ထရမ့်ကိုယ်တိုင် တက်ရောက်ဖို့ရှိနေပြီး အာဆီယံနိုင်ငံအကြီးအကဲတွေ၊ တခြား တရုတ်၊ ဂျပန်၊ အိန္ဒိယအပါအဝင် ကမ္ဘာတဝန်းမှ ထိပ်တန်းကိုယ်စားလှယ်တွေ အများစု ပါဝင်တက်ရောက်ဖို့ ရှိနေတာပါ။ 

၄၇ ကြိမ်မြောက် အာဆီယံထိပ်သီးစည်းအဝေး မြန်မာနိုင်ငံကိုယ်စားပြုတက်ရောက်မယ့် နိုင်ငံခြားရေးဝန်ကြီးဌာန အမြဲတမ်းအတွင်းဝန် ဦး‌ဟောက်ခန့်ဆုမ်းဟာ ယခင်က ကနေဒါနိုင်ငံဆိုင်ရာ မြန်မာသံအမတ်၊ အာဆီယံရေးရာဦးစီးဌာန ညွှန်ကြားရေးမှူးချုပ်အဖြစ် တာဝန်ယူဖူးသူလို့ သိရပါတယ်။

#RadioNUGLocalNews

#SpringRevolution