11th MAR 2023 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ မတ်လ ( ၁၁ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ ပလက်ဝမှာ CDF ပလက်ဝ/CNA ပူး ပေါင်းတပ်ဖွဲ့နှင့် စစ် ကောင်စီတပ်တို့ တိုက်ပွဲဖြစ်၊ စစ်ကောင်စီတပ်သား ၈ ဦး ‌သေ

 

ပလက်ဝမြို့နယ်မှာ CDF ပလက်ဝ/CNA ပူး ပေါင်းတပ်ဖွဲ့နှင့် စစ် ကောင်စီတပ်တို့ တိုက်ပွဲဖြစ်ပွားခဲ့ပြီး စစ် ကောင်စီတပ်ဖွဲ့ဝင် ၈ ဦး သေဆုံး၊ ၁၅ ဦးထိခိုက်ဒဏ်ရာရတယ်လို့ CDF ပလက်ဝက မတ်လ ၉ ရက်နေ့က သတင်းထုတ်ပြန်ပါတယ်။

 

လိုင်လင်းပီမြို့က နေ မတူပီမြို့ နယ်၊ ထေဘွေ့စခန်းကို အင်အားဖြည့်ဖို့လာတဲ့ စစ်ကောင်စီတပ်နဲ့ ပလက်ဝမြို့နယ် ကိန်းကန်း ကုန်းကျေးရွာနှင့် စခီဟာကျေးရွာအကြားရှိ လာကီချောင်းအနီးမှာ တိုက်ပွဲဖြစ်ပွားခဲ့တာလို့ ဆိုပါတယ်။

 

ပစ်ခတ်တိုက်ခိုက်မှုဟာ မနက် ၁၀ နာရီ ၅၄ မိနစ်မှ ၁၁ နာရီ ၄၁ မိနစ်ကြားမှာ တစ်ကြိမ်၊ နေ့လယ် ၁၂ နာရီ ၂၀ မိနစ်မှ ၁၂ နာရီ ၄၀ မိနစ်ကြားတွင် တစ်ကြိမ် စုစုပေါင်းတိုက်ပွဲ ၂ ကြိမ် ဖြစ်ပွားခဲ့တာလို့ သိရပါတယ်။ မိမိတို့ ပူးပေါင်းတပ်မှ အထိအခိုက်မရှိ ကောင်းမွန်စွာပြန်လည်ဆုတ်ခွာနိုင်ခဲ့တယ်လို့လည်း CDF ပလက်ဝက သတင်းထုတ်ပြန်ထားပါတယ်။

 

CDF ပလက်ဝကို ၂၀၂၁၊ ဧပြီ ၂၈ ရက် နေ့မှာ စတင်ဖွဲ့စည်းခဲ့တာဖြစ်ပြီး လက်ရှိမှာ ချင်းပြည်ကာကွယ် ရေးတပ် ပေါင်းစု ကော်မတီ (CJDC) အဖွဲ့ဝင်အဖြစ်လည်း ရပ်တည်နေတာဖြစ်ပါတယ်။

 

========================

 

📌📌 ၂။ အာဏာသိမ်းပြီး နောက်ပိုင်း မင်းတပ်မှာ ပထမဆုံးအကြိမ် ဆယ်တန်းစာ မေးပွဲ ကျင်းပ

 

၂၀၂၂ - ၂၀၂၃ ခုနှစ် တက္ကသိုလ်ဝင်တန်း စာမေးပွဲကို မင်းတပ်မြို့မှာ စတင်ကျင်းပနေ ပြီလို့ သိရပါတယ်။ စစ်ကောင်စီ အာဏာ သိမ်းကာလ ၂ နှစ်အတွင်းမှာ ပထမဆုံးအကြိမ် ပြန်လည်ကျင်းပတာလည်း ဖြစ်ပါတယ်။

 

၂၀၂၃ ခုနှစ် တက္ကသိုလ်ဝင်တန်း စာမေးပွဲကို မတ်လ ၈ ရက်နေ့ကစလို့ တစ်နိုင်ငံလုံးမှာ တပြိုင်တည်း ကျင်းပနေတာပါ။

မင်းတပ်မြို့ပေါ်မှာတော့ အ.ထ.က (၁)ကျောင်းမှာ ဖြေဆိုနေကြပြီး လာရောက်ဖြေဆိုသူ နည်းတယ်လို့လည်း မင်းတပ်မြို့ ပညာ ရေးဌာနအသိုင်းအ၀န်းနဲ့ နီးစပ်သူတစ်ဦးက ဆိုပါတယ်။

 

“အထက-၁ တစ်ခုထဲမှာပဲဖြေကြတယ်၊ မြို့ထဲ အစစ်ဆေးလည်း ပုံမှန်ထက်တင်းကြပ်ထားတယ်။ စာမေးပွဲ လာဖြေတဲ့သူက အရမ်းတော့မများဘူး၊ အယောက် ၈၀ နီးပါးရှိမယ်။” လို့ သူက ပြောပါတယ်။

 

၂၀၂၁ နဲ့ ၂၀၂၂ ခုနှစ်တွေက စစ်ကောင်စီ အာဏာသိမ်းတာကြောင့် မင်းတပ်မြို့မှာ တက္ကသိုလ်ဝင်တန်းစာမေးပွဲ မကျင်းပ နိုင်ခဲ့ပါဘူး။ ၂၀၂၃ ခုနှစ် တက္ကသိုလ်ဝင်တန်းစာမေးပွဲကို မတ်လ ၈ ရက်ကနေ ၁၈ ရက်ထိ ကျင်းပမှာဖြစ်ပြီး ချင်းပြည် နယ်က ကန်ပက်လက်မြို့နဲ့ ထန်တလန်မြို့ကလွဲရင် ကျန်မြို့တွေမှာ စာမေးပွဲဖြေဆိုနေကြတာ တွေ့ရပါတယ်။

 

အာဏာသိမ်းပြီးတဲ့နောက် ဒုတိယအကြိမ်ကျင်းပတဲ့ ၂၀၂၂ - ၂၀၂၃ ခုနှစ် တစ်နိုင်ငံလုံးမှာ တက္ကသိုလ်ဝင်တန်းစာမေးပွဲ ဝင်ရောက် ဖြေဆိုဖို့ စာရင်းပေးထားတဲ့သူ ၁၇၉,၇၄၂ ဦးရှိတယ်လို့ စစ်ကောင်စီက သတင်းထုတ်ပြန်ထားပါတယ်။

 

========================

 

📌📌 ၃။ The Youth Force (Saw & Kyaukhtu)စစ်ကူအသွားလမ်းမှာ ပစ်ခတ်ခံရ၊ ကာကွယ်ရေး ရဲဘော်တစ်ဦးကျဆုံး

 

မကွေးတိုင်း၊ ဆောမြို့နယ်ထဲ ဖြစ်ပွားနေတဲ့ တိုက်ပွဲကို စစ်ကူသွားတဲ့ ကာကွယ်ရေး ရဲဘော်တစ်ဦး ကျတယ်လို့ The Youth Force (Saw & Kyaukhtu) က မတ်လ ၇ ရက်နေ့က သတင်းထုတ်ပြန်ပါတယ်။ မတ်လ ၆ ရက်နေ့ စစ်ကူသွားတဲ့လမ်းမှာ စစ်ကောင်စီတပ်ရဲ့ ချောင်းမြောင်းပစ်ခတ်ခံရတဲ့ချိန် ရဲဘော်၊ ရဲဘက်တွေအတွက် ကာပစ်ပေးရင်း ရဲဘော် ဇင်ဖြိုးလွင် မြင့်မြတ် စွာကျဆုံးတာလို့ The Youth Force (Saw & Kyaukhtu) ရဲ့ ထုတ်ပြန်ချက်မှာ ဖော်ပြထားပါတယ်။

 

မတ်လ ၆ ရက်နေ့ ကျဆုံးတဲ့ ရဲဘော် ဇင်ဖြိုးလွင်ဟာ အသက် ၂၀ ဝန်းကျင်သာရှိပြီး စစ်အာဏာသိမ်းပြီးတဲ့နောက် ဂန့်ဂေါခရိုင် အမှတ် (၁၃) The Youth Force (Saw & Kyaukhtu)ရဲ့ ပထမဆုံး အသက်ပေးကျဆုံးသူ ဖြစ်တယ်လို့ သိရပါတယ်။ တိုင်းပြည်နဲ့ လူမျိုးအတွက် တာဝန်ထမ်းဆောင်ရင်း အသက်ပေးလှူတဲ့ ရဲဘော် ဇင်ဖြိုးလွင်ကို အလေးနီပြုရင်း တပ်ဖွဲ့ဝင်တွေအနေနဲ့ မပြီးဆုံးသေးတဲ့ တော်လှန်ရေးကို အောင်မြင်ပြီးဆုံးတဲ့အထိ ကြိုးစားဆောင်ရွက်သွားမယ်လို့ The Youth Force (Saw & Kyaukhtu) က ကတိပြုထားပါတယ်။ 

 

The Youth Force (Saw & Kyaukhtu) ဟာ မကွေးတိုင်း၊ ဂန့်ဂေါခရိုင်အမှတ် (၁၃) တပ်ရင်းဖြစ်ပြီး CDF မင်းတပ်၊ CDF ကန်ပက် လက်အပါအဝင် စစ်ကောင်စီတော်လှန်နေတဲ့ အဖွဲ့အစည်းတွေနဲ့ မဟာမိတ်ဖွဲ့ထားပါတယ်။

 

========================

 

📌📌 ၄။ မြန်မာစစ်တပ်ထုတ်လုပ်တဲ့ လက်နက်ခဲယမ်း ရုရှားက ဝယ်ယူမယ်

 

မြန်မာစစ်တပ် ကာကွယ်ရေးပစ္စည်းစက်ရုံတွေကထုတ်တဲ့ လက်နက်ခဲယမ်းတွေ ရုရှားက ပြန်လည်ဝယ်ယူမယ့်အကြောင်း နေပြည်တော်စစ်ဘက်သတင်းရင်းမြစ်ကို ကိုးကားပြီး ရန်ကုန်ခေတ်သစ်က မတ်လ ၉ ရက်က ရေးသားပါတယ်။ 

 

မြန်မာစစ်တပ် ကာကွယ်ရေးပစ္စည်းထုတ်လုပ်ရေးစက်ရုံ (ကပစ) က ထုတ်တဲ့ လက်နက်ကြီးကျည်၊ ခဲယမ်းတွေကို အဓိကဝယ်ယူမှာဖြစ်ပြီး ဒီလိုဝယ်ယူဖို့အတွက် ရုရှားစစ်ဘက်ဆိုင်ရာကိုယ်စားလှယ်တွေ ပြီးခဲ့တဲ့နှစ်က မြန်မာနိုင်ငံကို လာရောက်ဆွေးနွေးမှုရှိတယ်လို့ ဆိုပါတယ်။

 

“ရုရှားက မြန်မာကပစထုတ်တဲ့ ခဲယမ်းတွေဝယ်ဖို့ရှိတယ်။ ခဲယမ်းကို အဓိကဝယ်မှာလို့ သိရတယ်” လို့ နေပြည်တော် စစ်ဘက်သတင်းရင်းမြစ်က ပြောတဲ့အကြောင်း ဖော်ပြပါတယ်။

 

၂၀၂၂ နိုဝင်ဘာလ ၂၈ ရက်နေ့ကနေ ဒီဇင်ဘာလ ၂ ရက်နေ့အထိ ရုရှားစစ်တပ် ဒုတိယကြည်းတပ်ဦးစီးချုပ် Colonel-General Kim Alexey Rostislavovich နဲ့အဖွဲ့ နေပြည်တော်မှာလာရောက် ဆွေးနွေးခဲ့တဲ့ထဲမှာလည်း မြန်မာစစ်တပ်ထုတ် လက်နက်ခဲ ယမ်းအများစုကို ရုရှားဘက်က ပြန်လည်ဝယ်ယူမယ့်ကိစ္စရပ်တွေ ပါဝင် နေတယ်လို့ ရန်ကုန်ခေတ်သစ်သတင်းဌာနက ရေးသား ထားပါတယ်။

#RadioNUGLocalNews

#SpringRevolution