20th MAY 2023 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ မေလ ( ၂၀ ) ရက်နေ့ နောက်ဆုံးရပြည်တွင်းသတင်းများ

📌📌 ၁။ လေပြင်းကြောင့် အဆောက်အုံ ၄၀ ကျော်ပျက်စီးတဲ့ မင်းတပ်မှာ လေကြောင်းတိုက်ခိုက်မှု ခံရပြန်

 

မင်းတပ်မြို့နယ်ထဲကို စစ်ကောင်စီက လေကြောင်းတိုက်ခိုက်မှု ထပ်မံပြုလုပ်နေတယ်လို့ သိရပါတယ်။

 

လေပြင်းတိုက်ခတ်တာအရှိန်လျော့သွားတဲ့ ၁ ရက်အကြာ မေလ ၁၆ ရက် မနက်ပိုင်းမှာ စစ်ကောင်စီရဲ့ ဂျက်ဖိုက်တာက ၂ ကြိမ် ဗုံးကျဲတာလို့ ဒေသခံတွေက ဆိုပါတယ်။

 

စစ်ကောင်စီ လေကြောင်းတိုက်ခိုက်တဲ့ နေရာနဲ့ ထိခိုက်ပျက်စီးတာတွေကိုတော့ အသေးစိပ် မသိရသေးပါဘူး။ 

 

ပြီးခဲ့တဲ့ မေလ ၁၄ ရက်ညပိုင်း တိုက်ခတ်တဲ့ လေပြင်းကြောင့် မင်းတပ်မြို့နယ် တိုက်နယ် အမှတ် ၁၀၊ ၁၃ ကျေးရွာတွေမှာ နေအိမ်ပျက်စီးတာတွေများနေတဲ့အကြောင်း HKL Mindat ရဲ့ လူမှုကွန်ရက်စာမျက်နှာကနေ ဖော််ပြပါတယ်။

 

နေအိမ်၊ အဆောက်အအုံ ၄၀ ဝန်းကျင်နဲ့ စပါးကျီတွေ ပြိုလဲပျက်စီးသွားတာလို့ ခန့်မှန်းရပေမယ့် ဖုန်းလိုင်းအခက်ခဲကြောင့် မြေပြင်အဆက်အသွယ် မပြုလုပ်နိုင်သေးပါဘူး။

 

မိုခါ မုန်တိုင်း‌ကြောင့် ချင်းပြည်နယ်တဝန်းမှာ နေအိမ်၊ အဆောက်အအုံ ပျက်စီးမှု ၅၀၀ ကျော်ရှိနိုင်ပြီး မတူပီမြို့နယ်အတွင်း ပျက်စီးထိခိုက်မှုအများဆုံးလို့ Chin Health Organization က ဒီနေ့အစောပိုင်းမှာ ထုတ်ပြန်ထားပါတယ်။

 

========================

 

📌📌 ၂။ မင်းတပ်မှာ လေပြင်းကြောင့် မြေပြိုပြီး အဆောက်အအုံတချို့ ပြိုလဲ

 

မိုခါမုန်တိုင်း အရှိန်ကြောင့် မင်းတပ်မြို့နယ်မှာ မြေပြိုကျပြီး အဆောက်အအုံတချို့ ပြိုလဲတာရှိတယ်လို့ သိရပါတယ်။

 

ကျေးရွာချင်းဆက် လမ်းတွေပေါ်မှာ မြေပြိုကျတာနဲ့ ရွာတချို့မှာ နေအိမ်တွေ ပြိုလဲတာလို့ ‌ဒေသခံတဦးက ပြောပါတယ်။

 

“လမ်းတွေပေါ် မြေပြိုကျတာရှိတယ်၊ တချို့ရွာတွေမှာ စပါးကျီနဲ့ အိမ်အမိုးလန်တယ်။ အတိကျ သိရဖို့တော့ ခက်နေသေးတယ်။” လို့ ဖုန်းလိုင်းအဆက်သွယ်ရတဲ့ မေလ ၁၅ ရက်နေ့ ညနေ ၆ နာရီကျော်မှာ ပြောပါတယ်။

 

မင်းတပ်မှာ မိုခါမုန်တိုင်း အရှိန်ပျယ်သွားပြီး မနက်ပိုင်းကနေ ပုံမှန်လို ရာသီဥတု ပွင့်လင်းနေတယ်လို့လည်း သူက ဆက်ပြောပါတယ်။

 

မိုခါအရှိန်ကြောင့် ကြီးကြီးမားမား ထိခိုက်တာပျက်စီးတာမျိုး မရှိဘူးလို့ ခန့်မှန်းရတဲ့အကြောင်း မင်းတပ်မြို့နယ်ပြည်သူ့အုပ်ချုပ်ရေးအဖွဲ့ အတွင်းရေးမှူး ဆလိုင်းယောမာန်က လူမှုကွန်ရက်စာမျက်နှာကနေတဆင့် အသိပေးထားပါတယ်။

 

မေလ ၁၄ ရက်ညပိုင်းမှာ ချင်းပြည်နယ်ထဲ ဝင်တိုက်ခတ်တဲ့ လေပြင်းကြောင့် မတူပီ၊ ကန်ပက်လက်၊ ဟားခါး၊ ပလက်ဝနယ်တွေမှာတော့ ထိခိုက်ပျက်စီးတာများတယ်လို့ ဒေသတွင်း သတင်းဌာနတွေက ဖော်ပြကြပါတယ်။

 

ကန်ပက်လက်မြို့နယ်မှာလည်း ကျေးရွာတချို့က လူနေအိမ်များတချို့နှင့် စစ်ဘေးရှောင်စခန်းတချို့ ပျက်စီးတယ်လို့Kanpetlet Township Mocha Cyclone Emergency Response Committeeက ဆိုပါတယ်။

 

========================

 

📌📌 ၃။ စစ်ကောင်စီ မှားချတဲ့ လက်နက်ခဲယမ်းထုပ် CNA, CDF က အရယူ

 

ဟားခါးမြို့နယ်တနေရာမှာ စစ်ကောင်စီတပ် ရဟတ်ယာဉ်က မှားချတဲ့ လက်နက်ခဲယမ်းပါတယ်လို့ ယူဆရတဲ့အထုပ်ကို ချင်းအမျိုးသားတပ်မတော်နဲ့ ချင်းကာကွယ်‌ရေးတပ်ဖွဲ့ (ဟားခါး) ပူး‌ပေါင်းတပ်က အရယူတယ်လို့ ချင်းဂျာနယ်က ဖော်ပြပါတယ်။

 

စစ်ကောင်စီတပ် ရဟတ်ယာဉ်ကနေ လက်နက်ခဲယမ်း အထုပ် ၂၀ ကျော် အခုမေလအစောပိုင်းက လာပို့ဆောင်တဲ့ချိန်မှာ ချင်းကာကွယ်‌ရေးပူး‌ပေါင်းတပ်က အရယူတာလို့ ဆိုပါတယ်။

 

အဲဒီအထုပ်မှာပါတဲ့ လက်နက်ခဲယမ်းအမျိုးအစားတွေကိုတော့ ဖော်ပြမထားသလို သီးခြားအတည် မပြုနိုင်ပါဘူး။

 

လက်ရှိ မေလ ဒုတိယအပတ်ထိ ချင်းအမျိုးသားတပ်မတော်၊ ချင်းကာကွယ်‌ရေးတပ်ဖွဲ့ ပူး‌ပေါင်းတပ်နဲ့ စစ်ကောင်စီတပ်တို့ ဟားခါး - ဖလမ်းအကြားမှာ စစ်ရေးတင်းမာနေပြီး တိုက်ပွဲတွေ ပြင်းထန်နေတယ်လို့ ချင်းဂျာနယ်က ဆိုပါတယ်။

 

========================

 

📌📌 ၄။ ထိုင်းရွေးကောက်ပွဲတွင် လူငယ်နိုင်ငံရေးသမားများ ဦးဆောင် အနိုင်ရ, ညွန့်ပေါင်းအစိုးရ ပြုလုပ်သွားမည် ဟုဆို 

 

ထိုင်းအထွေထွေ ရွေးကောက်ပွဲကော်မရှင် ကြေညာချက်အရ Move Forward Party - MFP (လိမ္မော်ရောင်ပါတီ) က စုစုပေါင်း ကိုယ်စားလှယ်နေရာ ၁၅၂ နေရာရရှိထားပြီး ‌အောက်လွှတ်တော် နေရာအများဆုံး ရရှိထားတယ်လို့ သိရပါတယ်။ 

 

MFP ပါတီဟာ အောက်လွှတ်တော်မှာ ဆန္ဒနယ် ၁၁၃ နေရာမှာအနိုင်ရရှိခဲ့ပြီး၊ ပါတီစာရင်းအခြေပြုအချိုးကျ ကိုယ်စားပြုစနစ်အရ အမတ် နေရာ ၃၉ နေရာအနိုင်ရခဲ့ကာ စုစုပေါင်း ၁၅၂ နေရာနဲ့ ရွေးကောက်ပွဲ အနိုင်ရရှိသွားတာ ဖြစ်ပါတယ်။ 

 

Pheu Thai ပါတီကတော့ မဲဆန္ဒနယ် ၁၁၂ နေရာမှာ အောက်လွှတ်တော်အမတ် ၁၁၂ နေရာအ နိုင်ရခဲ့ပြီး၊ ပါတီစာရင်းအခြေပြုအချိုးကျ ကိုယ်စားပြုစနစ်ကနေ အောက်လွှတ်တော်အမတ်နေရာ ၂၉ နေရာမှာ အနိုင်ရခဲ့လို့အောက်လွှတ်တော်အမတ် စုစုပေါင်း ၁၄၁ နေရာနဲ့ ဒုတိယနေရာမှာ ရှိနေတာပါ။

 

လက်ရှိဝန်ကြီးချုပ် ပရာယွတ်ချန်အိုချာရဲ့ United Thai Nation Party(UTN) ကတော့ အောက်လွှတ်တော်အမတ်နေရာ စုစုပေါင်း ၃၆ နေရာသာ အနိုင်ရရှိခဲ့ပြီး၊ အနိုင်ရပါတီ နံပါစဉ် ၅ နေရာမှာ ရှိနေပါတယ်။ 

 

အနိုင်ရထားတဲ့ Move Forward ပါတီခေါင်းဆောင် ဖီထာ လဲမ်ဂျာရိုရတ် (Pita Limjaroenrat) က သူကိုယ်တိုင် ဝန်ကြီးချုပ်အဖြစ် ဦးဆောင်ပြီး ၆ ပါတီ ဖွဲ့ ထဲက ရွေးကောက်ခံ လွတ်တော်ကိုယ်စားလှယ်ဦးရေ ၃၀၉ ဦးနှင့် ညွန့်ပေါင်းအစိုးရ ဖွဲ့သွားမယ်လို့ သတင်းစာရှင်းလင်းပွဲမှာ ပြောကြားလိုက်တယ်လို့ သိရပါတယ်။ 

 

ဒုတိယနေရာမှာ ရှိနေတဲ့ ထိုင်းဝန်ကြီးချုပ်ဟောင်း သက်ဆင်ရဲ့သမီးခေါင်းဆောင်တဲ့ Pheu Thai ပါတီကလည်း Move Forward ပါတီကို ကန့်ကွက်သွားမှာ မဟုတ်ကြောင်း၊ ဒီပါတီရဲ့ အနိုင်ရရှိမှုအပေါ် ဝမ်းမြောက်ဂုဏ်ယူကြောင်းနှင့် ရှေ့ဆက်ပူးပေါင်းဆောင်ရွက်သွားမယ်လို့ ထုတ်ပြန်ကြေညာထားပါတယ်။ 

 

ဒီပါတီ နှစ်ခုဟာ ရွေးကောက်ပွဲမတိုင်ခင်ကတည်းက မဟာမိတ်ဖွဲ့ထားပြီး ဖြစ်တယ်လို့လည်း သိရပါတယ်။ 

 

ထိုင်းနိုင်ငံရဲ့ ဝန်ကြီးချုပ်အသစ်ဖြစ်လာဖို့ ရှိနေတဲ့ Move Forward ပါတီ ခေါင်းဆောင် ဖီထာဟာ မြန်မာ့အရေးနဲ့ ပတ်သက်ပြီး လူသားချင်းစာနာထောက်ထားမှု လမ်းကြောင်းတွေ ထိုင်းနိုင်ငံအနေနဲ့ ဖွင့်လှစ်ပေးဖို့ လိုအပ်ကြောင်း ဒေသတွင်းတည်ငြိမ်အေးချမ်းရေးဟာ အရေးကြီးပြီး မြန်မာ့အရေး ကိစ္စတွေကို နိုင်ငံတကာ အသိုင်းအဝိုင်းနဲ့အတူ ဖိအားပေးသွားနိုင်ဖို့ စတဲ့ အကြောင်းတွေ ဒီကနေ့ မေလ ၁၅ ရက်နေ့မှာ ပြုလုပ်တဲ့ သတင်းစာရှင်းလင်းပွဲမှာ ပြောဆိုသွားတယ်လို့ ထိုင်းဒေသတွင်း သတင်းရင်းမြစ် Coconut Bangkok သတင်းဌာနက ရေးသားဖော်ပြပါတယ်။

#RadioNUGLocalNews

#SpringRevolution