17th JUN 2023 - (Ethnic language program-CHO_DAAI) by Radio NUG

 

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ ဇွန်လ ( ၁၇ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ မင်းတပ် လူငယ်၊ လူရွယ်တွေကို ပြည်တွင်း၊ ပြည်ပ စေလွှတ်တာ လျှော့ချဖို့ မြို့နယ် ပအဖ မေတ္တာရပ်ခံ

 

မင်းတပ်မြို့နယ်အတွင်းက လူငယ်၊ လူရွယ်တွေကို ပြည်တွင်း၊ ပြည်ပဘက် စေလွှတ်တာ ဆက်မပြုလုပ်ဖို့ မေတ္တာရပ်ခံတယ်လို့ မင်းတပ်မြို့နယ် ပြည်သူ့အုပ်ချုပ်ရေးအဖွဲ့က ဇွန်လ ၈ ရက်နေ့ ရက်စွဲနဲ့ ကြေညာပါတယ်။

 

တော်လှန်‌ရေးကာလအတွင်းမှာ ချင်းကာကွယ်ရေးတပ်ဖွဲ့ (မင်းတပ်) အနေနဲ့ မင်းတပ်မြို့နယ်က ပြည်သူ့စည်းစိမ်၊ ဥစ္စာထိန်းသိမ်းစောင့်ရှောက်နေရပြီး ဒီလုပ်ငန်းစဉ်တွေအတွက် လူငယ်တွေ ပိုမိုလိုအပ်လာတယ်လို့ ပြောပါတယ်။

 

အာဏာသိမ်းကာလ CDM ဝန်ထမ်းတွေ၊ လူငယ်တွေအပါအဝင် မြို့နယ်အတွင်းကနေ တခြားသော ပြည်တွင်း၊ ပြည်ပဘက်ကို အခြေချဖို့သွားနေတာ၊ အလုပ်ကိုင်သစ်ရှာဖွေဖို့သွားနေတာမျိုးဟာ အရင်အချိန်ထက် ပိုများနေတယ်လို့ မင်းတပ်မြို့နယ် ဒေသခံတွေက ပြောပါတယ်။

 

ဒီကာလမှာ မြို့နယ် ပညာရေးအတွက်လည်း နေရာ၊ ဒေသအလိုက် မူလတန်း၊ အလယ်တန်း၊ အထက်တန်းတွေကို ဖွင့်လှစ်သင်ကြားပေးနေတယ်လို့လည်း မြို့နယ် ပအဖ က ဆိုပါတယ်။

 

အခုနဲ့ ‌နောင်လာမယ့် နိုင်ငံရေး ဦးဆောင်မှုအပိုင်းတွေမှာ လူငယ်တွေရဲ့ ပါဝင်မှုက အရေးကြီးဆုံးဖြစ်နေတာကြောင့် မိဘပြည်သူတွေအနေနဲ့ စစ်ကောင်စီရဲ့ ကျောင်းမှာ အပ်နှံတာ မလုပ်ဖို့ တားမြစ်ထားပါသေးတယ်။

 

ဒါ့အပြင် လူငယ်တွေကို အလုပ်လုပ်ကိုင်ဖို့ နယ်ခြား၊ ပြည်ပဘက် စေလွှတ်တာမျိုးကိုလည်း မခိုင်းစေကြဖို့ မင်းတပ်မြို့နယ် ပြည်သူ့အုပ်ချုပ်ရေးအဖွဲ့က ၂၀၂၃ ဇွန်လ ၈ ရက်နေ့ ရက်စွဲနဲ့ မေတ္တာရပ်ခံထားပါတယ်။

 

========================

 

📌📌 ၂။ မင်းတပ်မှာ တက္ကသိုလ်ဝင်စာမေးပွဲ အောင်ချက်ကောင်း

 

၂၀၂၂ – ၂၀၂၃ ခုနှစ် ပညာသင်နှစ်တက္ကသိုလ်ဝင်တန်း စာမေးပွဲအောင်စာရင်းကို စစ်ကောင်စီက ဇွန်လ ၉ ရက်နေ့မှာ ထုတ်ပြန်ပါတယ်။

 

အာဏာသိမ်းကာလ မင်းတပ်မှာ ပထမဆုံးကျင်းပတဲ့ ၂၀၂၃ တက္ကသိုလ်ဝင်စာမေးပွဲမှာ ခုံအမှတ် ခမ - ၂ က သိပ္ပံဘာသာရပ်မှာ ဓာတု၊ ရူပ၊ ဇီဝဗေဒ ၃ ဘာသာ ဂုဏ်ထူးပါတယ်လို့ ထုတ်ပြန်ထားသလို အောင်ချက်ကောင်းတယ်လို့လည်း ပညာရေးအသိုင်းအဝန်းနဲ့ နီးစပ်သူတွေက ပြောပါတယ်။

 

၂၀၂၃ ခုနှစ် တက္ကသိုလ်ဝင်တန်း စာမေးပွဲကို ပြီးခဲ့တဲ့ မတ်လ ၈ ရက်နေ့က တနိုင်ငံလုံးမှာ တပြိုင်တည်း ကျင်းပခဲ့တာပါ။ 

 

မင်းတပ်စာဖြေဌာနအနေနဲ့ အထက ၁ ကျောင်းမှာ စာမေးပွဲစစ်ပြီး ဖြေဆိုသူ အယောက် ၈၀ နီးပါးရှိတယ်လို့ လက်ရှိ မင်းတပ်မြို့ ပညာရေးဝန်ထမ်း တဦးက The Mindat Post ကို စာမေးပွဲစတင်ကျင်းပတဲ့ ၂၀၂၃ မတ်လ ၈ ရက်နေ့က ပြောခဲ့ဖူးပါတယ်။

 

၂၀၂၁ နဲ့ ၂၀၂၂ ခုနှစ်တွေက စစ်ကောင်စီ အာဏာသိမ်းတာကြောင့် မင်းတပ်မှာ တက္ကသိုလ်ဝင်တန်း စာမေးပွဲ ကျင်းပနိုင်ခဲ့တာမရှိသလို ကန်ပက်လက်၊ ထန်တလန်မြို့နယ်တွေမှာတော့ ခုချိန်ထိ မကျင်းပနိုင်သေးပါဘူး။

 

ချင်းတပြည်နယ်လုံးမှာ ၂၀၂၃ ခုနှစ် တက္ကသိုလ်ဝင်တန်း အောင်ချက်ရာခိုင်နှုန်း ၇၂.၄၂ အထိရှိနေပြီး တနိုင်ငံလုံးအတိုင်းအတာနဲ့ အဆင့် ၅ မှာ ရပ်တည်နေသလို တက္ကသိုလ်ဝင်တန်း စာမေးပွဲဖြေဆိုတဲ့ သက်တမ်းတလျှောက် အောင်ချက်ရာခိုင်နှုန်း အမြင့်ဆုံးနှစ်လို့လည်း ဆိုနိုင်ပါတယ်။ 

 

========================

 

📌📌 ၃။ မတူပီမှာ ဒေသကာကွယ်‌ရေးတပ်ဖွဲ့နဲ့ စစ်ကောင်စီတပ်အကြား စစ်‌ရေးတင်းမာနေ

 

မင်းတပ် - မတူပီ မော်တော်ကားလမ်းပိုင်းဘေးပတ်လည် မတူပီနယ်တွေမှာ အင်အားသုံး စစ်ကြောင်းထိုးနေတဲ့ စစ်ကောင်စီတပ်နဲ့ ဒေသကာကွယ်‌ရေးတပ်အကြား စစ်ရေးတင်းမာနေတယ်လို့ ချင်းကာကွယ်ရေးတပ်ဖွဲ့ (မတူပီ) က ဇွန်လ ၇ ရက်နေ့ သတင်းထုတ်ပြန်ပါတယ်။

 

၂၀၂၃ ဇွန်လ ၆ ရက်နေ့က မတူပီနယ် ရမ်တိန်းကျေးရွာဟောင်းကို ဝင်ရောက်လာတဲ့ စစ်ကောင်စီတပ်သား ၁၂၀ ဝန်းကျင်နဲ့ ဒေသကာကွယ်ရေးတပ်တို့ အပြန်အလှန် ပစ်ခတ်မှု ဖြစ်ပွားပြီးတဲ့နောက် ခုလိုစစ်ရေးတင်းမာနေတာပါ။

 

ဇွန်လ ၆ ရက်နေ့ ထိတွေ့ပစ်ခတ်မှုမှာ နှစ်ဘက်ထိခိုက်သေဆုံးတာမရှိပေမယ့် ရမ်တိန်းကျေးရွာဟောင်းရဲ့ ၂ မိုင်ဝန်းကျင်အကွာမှာ စစ်ကောင်စီတပ်ဖွဲ့ဝင်တွေ ဇွန်လ ၇ ရက်နေ့အထိ နေရာယူထားဆဲလို့ ချင်းကာကွယ်ရေးတပ်ဖွဲ့ (မတူပီ) က ထုတ်ပြန်ထားပါတယ်။

 

ဒေသကာကွယ်ရေးတပ်ဖွဲ့နဲ့ စစ်ကောင်စီတပ်အကြား ပစ်ခတ်တိုက်ပွဲတွေ ဆက်ရှိလာနိုင်တာကြောင့် မတူပီ - မင်းတပ်လမ်းမပေါ် ခရီးထွက်သွားလာတာကို Chinland Defense Force - Matupi က‌ လောလောဆယ် တားမြစ်ထားပါတယ်။

 

========================

 

📌📌 ၄။ ဟားခါး - ထန်တလန်အကြားတိုက်ပွဲ ဆက်လက်ပြင်းထန်

 

တိုက်ပွဲတွေ ဆက်တိုက်ပြင်းထန်နေတဲ့ ဟားခါး - ထန်တလန်အကြား သီမစ်လွင်ပြင်အနီးမှာ ချင်းအမျိုးသားတပ်မတော် (CNA) မှ ရဲဘော် ၃ ဦးနဲ့ CDF - Zophei မှ ရဲဘော် ၁ ဦး တိုင်းပြည်နဲ့ လူမျိုးအတွက် အသက်ပေး ကျဆုံးသွားတယ်လို့ ချင်းဂျာနယ်က ဖော်ပြပါတယ်။

 

ရဲဘော် ၄ ဦးဟာ ဇွန်လ ၅ ရက်နဲ့ ဇွန်လ ၆ ရက်နေ့ တိုက်ပွဲတွေမှာ ကျဆုံးတာလို့ ဆိုပါတယ်။

 

စစ်ကောင်စီတပ်ဟာ ကုန်းကြောင်း၊ လေကြောင်း၊ ဟားခါးမြို့ကနေ လက်နက်ကြီးပစ်ကူတွေနဲ့ ဟားခါး - ထန်တလန်အကြားကို အင်အားအကုန်နဲ့ စစ်ကြောင်းထိုးနေတာပါ။

 

ဇွန်လ ၆ ရက်နေ့ တိုက်ပွဲမှာ ကျဆုံး ချင်းအမျိုးသားတပ်မတော် ရဲဘော် ဆလိုင်း နိုင်းမနားထန်းဟာ ကန်ပက်လက်မြို့နယ် ဇာတိဖြစ်ပြီး ကျဆုံးချိန်မှာ အသက် ၁၈၊ ၁၉ နှစ်ဝန်းကျင်သာရှိသေးတယ်လို့ သူနဲ့ ဆွေမျိုးတော်စပ်သူက The Mindat Post ကို ပြောပါတယ်။

 

၂၀၂၃ နှစ်ဦးပိုင်းကတည်းက ဟားခါး - ထန်တလန်နယ်တွေမှာ ချင်းအမျိုးသားတပ်မတော်၊ ချင်းကာကွယ်ရေးတပ်ဖွဲ့ပူးပေါင်းတွေနဲ့ စစ်ကောင်စီတပ်အကြား တိုက်ပွဲပြင်းထန်နေပြီး နှစ်ဘက်ထိခိုက် ဆုံးရှုံးတာတွေ ရှိနေပါတယ်။

 

ဇွန်လ ၅ ရက်နေ့တိုက်ပွဲအတွင်း စစ်ကောင်စီတပ်သား ၇ ဦး သေဆုံးတယ်လို့ မြေပြင်သတင်းအရင်းအမြစ်တွေထံမှ သိရတဲ့အကြောင်းလည်း ချင်းဂျာနယ်က ဖော်ပြထားပါတယ်။

 

တိုက်ပွဲတွေ ဆက်တိုက်ပြင်းထန်နေတဲ့ ချင်းပြည်မြောက်ပိုင်းမှာ စစ်ကောင်စီက ကုန်းကြောင်း၊ လေကြောင်းနဲ့ အပြင်းအထန်ထိုးစစ်ဆင်နေပါတယ်။

 

#RadioNUGLocalNews

#SpringRevolution