26th AUG 2023 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ သြဂုတ်လ ( ၂၆ ) ရက်နေ့ နောက်ဆုံးရပြည်တွင်းသတင်းများ  

📌📌 ၁။ ချင်းပြည်နယ် ပြည်သူ့ရဲတပ်ဖွဲ့ ဖွဲ့စည်းကြောင်း ကြေညာ

 

ချင်းပြည်နယ် ပြည်သူ့ရဲတပ်ဖွဲ့ကို ဥပဒေနဲ့အညီ စတင်ဖွဲ့စည်းလိုက်တယ်လို့ (Chin State People's Police) က ဩဂုတ် ၂၀ ရက်နေ့မှာ တရားဝင် ကြေညာလာပါတယ်။ 

 

ချင်းပြည်နယ်အတွင်း လုံခြုံရေးနဲ့ တရားဥပဒေစိုးမိုးရေးတွေမှာ စနစ်တကျရှိစေနိုင်ဖို့နဲ့ ထိထိရောက်ရောက် ပိုမိုဆောင် ရွက်နိုင်စေဖို့အတွက်လို့ ပြောပါတယ်။

 

ချင်းပြည်နယ် ပြည်သူ့ရဲတပ်ဖွဲ့ကို ရဲ CDM အရာရှိတွေက ဦးဆောင် ညွှန်ကြားနေတာပါ။

 

ကြားကာလ ချင်းအမျိုးသား အတိုင်ပင်ခံကောင်စီ (ICNCC) က အသိမှတ်ပြုထားသလို NUG ရဲ့ ပြည်ထဲရေးနဲ့ လူဝင်မှုကြီးကြပ်ရေးဝန်ကြီးဌာနနဲ့လည်း တရားဝင်မဟာမိတ်ဖွဲ့စည်းထားတယ်လို့ (Chin State People's Police Force) ရဲ့ ကြေညာချက်မှာ ဖော်ပြပါတယ်။

 

ပြည်သူ့လုံခြုံရေး၊ ပြည်သူ့အကျိုးပြုလုပ်ငန်း ဆောင်ရွက်ရေး၊ ပြစ်မှုကျူးလွန်သူတွေကို စုံစမ်းဖော်ထုတ် အရေးယူရေး၊ မူးယစ်ဆေးဝါးရောင်းဝယ်ဖောက်ကားမှု တားဆီးနှိမ်နှင်း‌ရေးနဲ့ ဖက်ဒရယ်ဒီမိုကရေစီထွန်းကားရေးတွေကို လုပ်ဆောင်ဖို့ဖြစ်တယ်လို့ ချင်းပြည်နယ် ပြည်သူ့ရဲတပ်ဖွဲ့ဥပဒေနှင့် ဖွဲ့စည်းပုံ အခန်း (၂) မှာ ပြဌာန်းပါတယ်။

 

ချင်းပြည်နယ် ပြည်သူ့ရဲတပ်ဖွဲ့အနေနဲ့ ၂၀၂၃ ဇွန်လကုန်က အခြေခံစစ်ရေးပြ၊ အမှုစစ်၊ နိုင်ငံတကာဥပဒေ၊ လူ့အခွင့်အရေး၊ Federal ရဲတပ်ဖွဲ့စနစ်၊ နိုင်ငံတကာရဲတပ်ဖွဲ့ကျင့်ဝတ် ဥပဒေစတဲ့ ဘာသာရပ်တွေကိုချင်းပြည်နယ်အတွင်း မြို့နယ် အသီးသီးက ပြည်နယ်အဆင့် သင်တန်းသား ၈၈ ဦးကို သင်ကြားပို့ချခဲ့ပါတယ်။

 

========================

 

📌📌 ၂။ မင်းတပ်မြို့နယ်မှာ SAVE Team ဆေးအဖွဲ့က ကျန်းမာရေး စောင့်ရှောက်မှုပေး

 

မင်းတပ်မြို့နယ်မှာ SAVE Team က ကျန်းမာရေးကာကွယ်စောင့်ရှောက်မှု ပေးနေတယ်လို့ သိရပါတယ်။

 

ကျောင်းကျန်းမာရေးအပြင် ကလေးသူငယ်တွေကို သန်ချဆေး၊ Vit - A တိုက်ကျွေးတာ၊ ပြည်သူတွေကို ကျန်းမာရေး အသိပညာပေးတာနဲ့ စောင့်ရှောက်မှုတွေ ဆက်တိုက်လုပ်ပေးနေတယ်လို့ အဲဒီ ဆေးအဖွဲ့တာဝန်ခံတွေက ပြောပါတယ်။

 

ကျေးရွာတိုင်းမှာ တကိုယ်ရည်သန့်ရှင်းရေးနဲ့ သက်ဆိုင်တဲ့ လက်တွေ့ကွင်းဆင်းစစ်ဆေးတာမျိုးပါ ပြုလုပ်နေတာပါ။

 

မင်းတပ်မှာ စစ်ကောင်စီက ဆက်သွယ်ရေး၊ ကုန်သွယ်ရေးလမ်းကြောင်းတွေ ပိတ်ထားတာကြောင့် စားသောက်ကုန်နဲ့ ဆေးပစ္စည်းဈေးနှုန်းမြင့်မားနေဆဲလို့ ဒေသခံတချို့က ပြောပါတယ်။

 

SAVE Team ဆေးအဖွဲ့ဟာ အာဏာသိမ်းနောက်ပိုင်း မင်းတပ်မြို့နယ်၊ ကျေးရွာ ၁၂ ရွာဝန်းကျင်မှာ ပြည်သူ့ကျန်းမာရေး စောင့်ရှောက်မှုပေးနေတဲ့ မင်းတပ်လူငယ် ပရဟိတအဖွဲ့အစည်းတခုလည်း ဖြစ်ပါတယ်။

 

========================

 

📌📌 ၃။ နိုင်ငံအနှံ့မှာ ဒရုန်း (Drone) အစင်းရေ ၄၀၀ ကျော် ဖြန့်ဝေ အသုံးပြုနေဟု NUG ပြော

 

နိုင်ငံအနှံ့ တိုင်းနဲ့ ပြည်နယ်အသီးသီးကို ဒရုန်း (Drone) အစင်း ၄၀၀ ကျော် ဖြန့်ဝေ အသုံးပြုနေတယ်လို့ MoD NUG က ထုတ်ပြန် ကြေညာပါတယ်။

 

တော်လှန်ရေးအတွက် ပြည်သူလူထုရဲ့ ပါဝင်မှုတွေကို စုစည်းပြီး ပို့ဆောင်နိုင်ခဲ့တာလို့ သြဂုတ် ၂၃ရက်နေ့ ထုတ်ပြန် ချက်မှာ ဖော်ပြပါတယ်။

 

ပို့ဆောင်ထားတဲ့ ဒရုန်း (Drone) အစင်း ၄၀၀ ကျော်ဟာ ရှေ့တန်းစစ်မြေပြင်တွေမှာ ထောက်လှမ်းရေး၊ တိုက်ခိုက်ရေးနဲ့ ဝါဒဖြန့်ချိရေးတွေကို တာဝန်ထမ်းဆောင်နေကြပြီလို့လည်း ဆိုပါတယ်။

 

၂၀၂၃ ဩဂုတ်လအတွင်းမှာပဲ ပြည်သူ့ကာကွယ်ရေးတပ်မ‌တော် (PDF) တပ်ရင်းပေါင်း ၃၀၀ ကျော်နဲ့ မြို့နယ်ပေါင်း ၂၆၀ မှာ ဖွဲ့စည်းထားတဲ့ ပြည်သူ့ကာကွယ်ရေးတပ်ဖွဲ့ (ပကဖ) အင်အား သိန်းချီ ရှိနေတဲ့အကြောင်း NUG ကာကွယ်ရေး ဝန်ကြီးက ပြောကြားထားပါတယ်။

 

၂၀၂၃ ခုနှစ်ကို “အဆုံးသတ်တိုက်ပွဲ၏ အဆုံးအဖြတ်နှစ်” အဖြစ် သတ်မှတ်ကြေညာထားတဲ့ အမျိုးသားညီညွတ်ရေးအစိုးရ (NUG) အနေနဲ့ လက်တွေ့အကောင်အထည်ဖော်ဖို့ တောင်းဆိုတာမျိုးလည်း ရှိနေပါတယ်။

 

========================

 

📌📌 ၄။ မြန်မာစစ်တပ်ကို အရေးယူနိုင်ရေး ဝိုင်းလုပ်ဆောင်ကြဖို့ ကုလမဟာမင်းကြီး တိုက်တွန်း

 

ရိုဟင်ဂျာတွေအပါအဝင် လူနည်းစုတိုင်းရင်းသားတွေအပေါ် ကျူးလွန်နေတဲ့ ရာဇဝတ်မှုတွေအတွက် မြန်မာစစ်တပ်ကို အရေးယူနိုင်ရေး နိုင်ငံတကာရဲ့ ကြိုးပမ်းအားထုတ်မှုတွေကို ဝိုင်းဝန်းထောက်ခံပေးကြဖို့ ကုလသမဂ္ဂလူ့အခွင့်အရေး ဆိုင်ရာ မဟာမင်းကြီး Volker Turk က တောင်းဆိုလိုက်ပါတယ်။

 

ရိုဟင်ဂျာတွေ ဖိနှိပ်သတ်ဖြတ်ခံရတာတွေအပြင် လတ်တလော နိုင်ငံတွင်း လူ့အခွင့်အရေး ချိုးဖောက်မှုတွေကို တားဆီးဖို့ ထိထိရောက်ရောက် အခုထက်မကပိုလုပ်ဖို့လိုတယ်လို့လည်း သူကပြောပါတယ်။

 

ရိုဟင်ဂျာတွေ လူမျိုးတုံးသတ်ဖြတ်ခံရတာ ခြောက်နှစ်ပြည့်တဲ့နေ့မှာ ကုလသမဂ္ဂလူ့အခွင့်အရေးဆိုင်ရာ မဟာမင်းကြီး Volker Turk က ကြေညာချက်ထုတ်ပြန်တောင်းဆိုတာ ဖြစ်ပါတယ်။

 

ရိုဟင်ဂျာတွေ လွတ်လွတ်လပ်လပ် နေရပ်ပြန်ရဖို့၊ တခြားလူမျိုးစုတွေလိုပဲ လူမျိုးစုအဖြစ် အသိအမှတ်ပြုခံရဖို့၊ လုံခြုံရေးနဲ့ လူ့အခွင့်အရေး အပြည့်အဝရဖို့ လိုလားကြောင်း မဟာမင်းကြီးက ပြောပါတယ်။

 

လွန်ခဲ့တဲ့ ခြောက်နှစ်က မြန်မာစစ်တပ်ရဲ့ ရိုဟင်ဂျာတွေအပေါ် ကျူးလွန်ခဲ့တဲ့ လူမျိုးတုံးသတ်ဖြတ်မှုတွေကြောင့် မွေးကင်းစ ကလေးငယ်တွေအပါအဝင် လူပေါင်း တစ်သောင်းလောက် သတ်ဖြတ်ခံခဲ့ရပြီး၊ လူပေါင်း ခုနစ်သိန်းကျော် ဘင်္ဂလားဒေ့ရှ်ဘက် ထွက်ပြေးခဲ့ရတယ်လို့ ကုလမဟာမင်းကြီးရဲ့ ထုတ်ပြန်ချက်မှာပါပါတယ်။

#RadioNUGLocalNews

#SpringRevolution