17th SEP 2023 - (Ethnic language program-Matupi) by The Matupi Times

📌 (ချင်း တိုင်းရင်းသား - Matupi ) ထုတ်လွှင့်မှု အစီအစဥ် ၂၀၂၃ စက်တင်ဘာလ ( ၃ ) ရက်နေ့ ရပြည်တွင်းသတင်းများ 

📌📌 1. Chin Star Top 30 ၏ 1st Round သီဆိုယှဉ်ပြိုင်မှု ရလဒ်များကြေငြာ

 

စက်တင်ဘာ ၁၃,၂၀၂၃

စက်တင်ဘာ ၈,၂၀၂၃ရက်နေ့မှစတင်ကျင်းပခဲ့သည့် Chin Star သီချင်းဆိုပြိုင်ပွဲ Top 30 ၏ 1st Round(ပထမအကြိမ်) သီဆိုယှဉ်ပြိုင်မှု ရမှတ်များကို ယနေ့တွင်ကြေငြာခဲ့ပြီး မတူပီမြို့ မှပါဝင်ယှဉ်ပြိုင်သည့် Tuem Tracy Lar သည် ရမှတ် (၂၅၁) မှတ်ဖြင့် အဆင့်(၈)နေရာရရှိခဲ့သည်။

အဆိုပါပြိုင်ပွဲယှဉ်ပြိုင်မှုကို (1st ,2nd,3rd,4th Round )အထိလေးကြိမ်ယှဉ်ပြိုင်သွားရမည်ဖြစ်ပြီး ယခုအပတ် (ပထမအကြိမ်) သီဆိုယှဉ်ပြိုင်မှုတွင် ရမှတ်ကောင်းမရရှိသည့်  ပြိုင်ပွဲဝင်များအနေဖြင့်လည်း ဆက်လက်ကြိုးစားခွင့်ရှိသေးကြောင်းသိရသည်။

Top 30  ၏ 2nd Round(ဒုတိယအကြိမ်) သီဆိုယှဉ်ပြိုင်မှုများကို ယခုလာမည့် စက်တင်ဘာ ၁၅-၁၆,၂၀၂၃ (သောကြာနှင့်စနေ ) နေ့တို့တွင် ဆက်လက်ကျင်းပသွားမယ်လို့သိရပါတယ်။

 

========================

 

📌📌 2. အားယူထပျံ အောက်ချင်းအားမာန် ကန်ပိန်းမှတဆင့် ကျည်တောင့်များ CDF-Mindat လက်ခံရရှိ 

 

စက်တင်ဘာ ၁၀ ၊ ၂၀၂၃

အားယူထပျံ အောက်ချင်းအားမာန် ကန်ပိန်းကို မေလ ၁၉,၂၀၂၃ရက်နေ့ မှ ဇူလိုင်လ ၄,၂၀၂၃ရက်နေ့ထိပြုလုပ်ခဲ့ပြီး ကမ်ပိန်းမှ တော်လှန် ပြည်သူများ ၏ ပံ့ပိုးကူညီမှုဖြင့် ဝယ်ယူသည့် တိုက်ပွဲအတွက်လိုအပ်နေသော ကျည်တောင့်အချို့ကို ချင်းကာကွယ်ရေးတပ်ဖွဲ့-မင်းတပ် (CDF-Mindat) ကလက်ခံရရှိပြီးဖြစ်ကြောင်း ယနေ့ စက်တင်ဘာ ၁၀, ၂၀၂၃ ရက်နေ့တွင် သတင်းထုတ်ပြန်သည်။

အဆိုပါ ကမ်ပိန်းတွင် ပါဝင်အားဖြည့် ကူညီပေးခဲ့ကြသော အဖွဲ့အစည်းများ နှင့် မိဘပြည်သူများ၊ ပါဝင်အားဖြည့်ပေးကြသော တော်လှန် ပြည်သူများ အားလုံးကို ချင်းကာကွယ်ရေးတပ်ဖွဲ့-မင်းတပ် (CDF-Mindat) အနေဖြင့် အထူးကျေးဇူးတင်ရှိကြောင်း ရေးသားဖော်ပြထားသည်။

အားယူထပျံ အောက်ချင်းအားမာန် ကမ်ပိန်းကို ယခင်မေလ ၁၉,၂၀၂၃ရက်နေ့ မှ ဇွန်လ၁၉ရက်နေ့ထိသတ်မှတ်ခဲ့ပြီး နောက် ဇူလိုင်လ ၄,၂၀၂၃ရက်နေ့ထိကာလ ထပ်မံတိုးမြှင့်ကာ ပြုလုပ်ခဲ့သည်။ ကမ်ပိန်း ကာလသတ်မှတ်ရက် ပြီးဆုံးသည့်‌နေ့တွင် မျှော်မှန်း Target သိန်း ၅၀၀၀ မပြည့်မှီခဲ့သော်လည်း (၇၀) % ထိရရှိခဲ့တယ်လို့သိရပါတယ်။

 

========================

 

📌📌 3. မတူပီစစ်ဗျူဟာမှ စကစ တပ်ကြပ်(၂)ဦး လက်နက်အပြည့်အစုံဖြင့် CDF-Matupi ထံအလင်းဝင်

 

စက်တင်ဘာ ၉,၂၀၂၃

၂၀၂၃ ခုနှစ်၊ သြဂုတ်လ(၂၈)ရက်နေ့တွင် မတူပီမြို့ အခြေစိုက် ၊စစ်ဗျူဟားစခန်းမှ စကစတပ်ဖွဲ့ဝင် တပ်ကြပ်ကြီး ထွန်းဇော် နှင့် ဒုတပ်ကြပ် ဝေလွင် တို့သည် ၎င်းတို့၏လက်နက်ခဲယမ်းနဲ့အတူ CDF.Matupi ထံသို့ CDM ပြုလုပ်ကာအလင်းဝင်ရောက်ခဲ့ကြောင်း သိရသည်။

အလင်းဝင်လာသည့် တပ်ကြပ်(၂)ဦးသည် ၎င်းတို့နဲ့အတူ သေနတ်အမျိုးအစား MA 1၊ MA 2၊လက်ပစ်ဗုံး(၂)လုံး ၊ကျည်ဆံ(၅၃၀) ထောင့်၊ ကျည်ဘောက်(၈)ခုနှင့်အတူ အလင်းဝင်ခဲ့ပြီး  CDF.Matupi မှ သတ်မှတ်ထားသည့်အတိုင်း ဆုငွေသိန်း (၆၀)စီ ချီးမြင့်ပေးအပ်ခဲ့သည်။

စကစလက်အောက်တွင်ဆက်လက်တာဝန်ထမ်းဆောင်လိုခြင်းမရှိဘဲ အလင်းဝင်ရောက်လိုသည့် စစ်သားနှင့် ရဲများအနေဖြင့် လက်နက်ခဲယမ်းနှင့်အတူ CDF.Matupi ထံ CDM ပြုလုပ် အလင်းဝင်လာပါက ထိုက်သင့်သော ဆုငွေ ချီးမြင့်ပြီး လုံခြုံရေး နှင့် အခြားလိုအပ်ချက်များကို တာဝန်ယူ ဆောင်ရွက်ပေးမည်ဖြစ်ပြီး အချိန်မရွေးဆက်သွယ်နိုင်ကြောင်းနှင့်  CDF.Matupi မှ ကောင်းမွန်စွာ ကြိုဆိုသွားမည်ဖြစ်ကြောင်း ယနေ့ စက်တင်ဘာလ ၉,၂၀၂၃ရက်နေ့တွင်သတင်းထုတ်ပြန်သည်။

 

========================

 

📌📌 4. ဗမာအမျိုးသားတော်လှန်ရေးတပ်မတော် (BNRA) ဖွဲ့စည်းခြင်းကို ကြိုဆို‌ကြောင်း CNO/CNDF မှသဝဏ်လွှာပေးပို့

 

The Matupi Times       ၁၄ စက်တင်ဘာ ၂၀၂၃

ဒေသတွင်းပြည်သူ့ကာကွယ်ရေး အဖွဲ့များ ပူးပေါင်းကာ ဗမာအမျိုးသားတော်လှန်ရေးတပ် (BNRA) ကို ဖွဲ့စည်းကြောင်း ကို စက်တင်ဘာ ၉,၂၀၂၃ ရက်နေ့က တရားဝင်ကြေညာခဲ့ပြီးနောက် ဗမာအမျိုးသားတော်လှန်ရေးတပ် (BNRA) ဖွဲ့စည်းခြင်းအပေါ် CNO/CNDF ကဆန္ဒပြုဆုတောင်း သဝဏ်လွှာပေးပို့ခဲ့ကြောင်း သိရသည်။ 

ဗမာအမျိုးသားတော်လှန်ရေးတပ် (BNRA) ၏ရည်မှန်းချက်(၄)ချက်ကိုကြိုဆိုလက်ခံပြီးစစ်အာဏာရှင်စနစ်ချုပ်ငြိမ်းရေး၊ ဖက်ဒရယ်ဒီမိုကရေစီစနစ် ဖော်ဆောင်ရေး၊ မိမိဒေသကံကြမ္မာအတွက် ဒေသခံပြည်သူများကိုယ်တိုင် ဖန်တီးခွင့် ရရှိရေးတို့ အတွက် အတူတကွလက်တွဲကာ တိုက်ပွဲဝင်ရန်ကြိုဆိုကြောင်း သဝဏ်လွှာမှာ ရေးသားဖော်ပြထားပါတယ်။

ဗမာအမျိုးသားတော်လှန်ရေးတပ် (BNRA) ဖွဲ့စည်းခြင်းအပေါ် ဝမ်း‌မြောက်ကြိုဆိုတဲ့အကြောင်းကို ချင်းကာကွယ်ရေးတပ်ဖွဲ့ များဖြစ်သည့် CDF-Mindat  နှင့် CDF-Matupi တို့ကလည်း ဝမ်းမြောက်ကြောင်း သဝဏ်လွှာအသီးသီးပေးပို့ခဲ့ကြတယ်လို့သိရပါတယ်။

 

========================

 

📌📌 5. CDF-Mindat ၏မွန်းမံသင်တန်းအပတ်စဉ် (၃) စစ်သင်တန်းအောင်မြင်စွာပြီးဆုံး

 

၁၄  စက်တင်ဘာလ  ၂၀၂၃ 

ချင်းကာကွယ်ရေး တပ်ဖွဲ့(မင်းတပ်) ၏ မွန်းမံသင်တန်းအပတ်စဉ် (၃) စစ်သင်တန်းကို ၁၃.စက်တင်ဘာ.၂၀၂၃ ရက်နေ့တွင် အောင်မြင် စွာပြီးဆုံးခဲ့ပြီဖြစ်ကြောင်း CDF-Mindat၏ ထုတ်ပြန်ချက်အရသိရသည်။

သတင်းထုတ်ပြန်ချက်တွင် ချင်းကာကွယ်ရေးတပ်ဖွဲ့(မင်းတပ်) ကိုကူညီထောက်ပံ့ပေးကြပါသော ထောက်ပို့မဏ္ဍိုင် မှ တော်လှန်ရေးသမားများအား ချင်းကာကွယ်ရေးတပ်ဖွဲ့(မင်းတပ်) မှအထူးပင်ကျေးဇူးတင်ရှိကြောင်း ရေးသားဖော်ပြထားပါတယ်။

 

#RadioNUGLocalNews

#SpringRevolution