2nd SEP 2023 - (Ethnic language program-CHO_DAAI) by Radio NUG ~ Newsletter by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ စက်တင်ဘာလ ( ၂ ) ရက်နေ့ နောက်ဆုံးရပြည်တွင်းသတင်းများ

📌📌 ၁။ ထန်တလန်မြို့တိုက်ပွဲမှာ နှစ်ဖက်ကျဆုံးမှုများပြား၊ ချင်းပူးပေါင်းတပ်ဖွဲ့က လက်နက်များ သိမ်းဆည်းရရှိ

ထန်တလန်မြို့တွင်းတိုက်ပွဲမှာ ချင်းပူးပေါင်းတပ်ဖွဲ့ဘက် ထိခိုက်ကျဆုံးတာ ၁၅ ဦး ရှိတယ်လို့ ချင်းကာကွယ်ရေးတပ်ဖွဲ့ (ထန်တလန်) က ဩဂုတ် ၃၀ရက်နေ့မှာ သတင်းထုတ်ပြန်လာပါတယ်။

ဩဂုတ် ၂၇ ရက်နေ့ စတင်တဲ့ ဒီစစ်ဆင်ရေးကို ချင်းအမျိုးသား တပ်မတော် (CNA)၊ CDF ပူးပေါင်းတပ်ဖွဲ့က လှုပ်ရှားခဲ့တာဖြစ်ပြီး စစ်ကောင်စီတပ်နဲ့ ၂ ရက်ကြာ တိုက်ပွဲ ပြင်းထန်ခဲ့ကြတာပါ။

မြို့တွင်း ၇ နေရာလောက်နဲ့ ဟားခါး - ထန်တလန်အကြားမှာ တိုက်ပွဲဖြစ်ခဲ့တာလို့သိရပြီး စစ်ကောင်စီက လက်နက်ကြီးပစ်ကူတာ၊ လေကြောင်းတိုက်ခိုက်တာတွေကိုပါ ဆက်တိုက်ပြုလုပ်ခဲ့တယ်လို့ ထန်တလန်ဘက်ကလာတဲ့ သတင်းတွေမှာ ဖော်ပြပါတယ်။

တိုက်ပွဲစတင်ဖြစ်ပွားတဲ့ ၃ ရက်အကြာ ချင်းအမျိုးသား တပ်မတော် (CNA) ရဲဘော် ၅ ဦး၊ CDF ထန်တလန် ရဲဘော် ၅ ဦး၊ CDF ဟားခါး ရဲဘော် ၁ ဦးနဲ့ CDF ဇိုဖေ ရဲဘော် ၅ ဦးကျဆုံးတယ်လို့ ချင်းကာကွယ်ရေးတပ်ဖွဲ့ (ထန်တလန်) က တရားဝင် သတင်းထုတ်ပြန်လာပါတယ်။

Tilim Operation 3 လို့ အမည်ပေးထားတဲ့ ဒီစစ်ဆင်ရေးမှာ စစ်ကောင်စီဘက် ၃၀ ကျော် သေဆုံး၊ ၅၀ ထက်မနည်း ထိခိုက်ဒဏ်ရာရပြီး လက်နက် ၅ လက်နဲ့အတူ ကျည်ဆန်တချို့ ချင်းပူးပေါင်းတပ်ဖွဲ့က သိမ်းဆည်းရရှိထားပါတယ်။

ဒီဖြစ်စဉ်နဲ့ ပတ်သက်လို့ စစ်ကောင်စီ သတင်းပြန်ကြားရေးခေါင်းဆောင် ဇော်မင်းထွန်းကလည်း ထန်ထလန်တိုက်ပွဲတွင်း စစ်တပ်ဘက်ထိခိုက်သေဆုံးတာရှိတယ်လို့ ဘီဘီစီမြန်မာပိုင်းကို ဖြေထားပေမယ့် အရေအတွက်အတိအကျကိုတော့ ပြောမသွားပါဘူး။

လက်ရှိမှာ ထန်တလန်မြို့ပေါ် အထိုင်ချနိုင်ဖို့ အင်အားအလုံးအရင်းနဲ့ အစွမ်းကုန်ပြင်ဆင်နေတဲ့ စစ်ကောင်စီတပ်ဖွဲ့နဲ့ ချင်းပူးပေါင်းတပ်ဖွဲ့ကြား အချိန်မရွေး တိုက်ပွဲဆက်ဖြစ်မယ့်အနေအထားလို့လည်း (CNA) ပြောခွင့်ရ ဆလိုင်းထက်နီက BNN သတင်းဌာနရဲ့ မေးမြန်းခန်းတခုမှာ ပြောကြားပါတယ်။

========================

📌📌 ၂။ စစ်ကောင်စီလက်အောက်ခံ ကား ၁ စီး သိမ်းဆည်းထားတယ်လို့ ချင်းကာကွယ်ရေးတပ်ဖွဲ့ (မင်းတပ်) က အတည်ပြု ထုတ်ပြန်

စစ်ကောင်စီ လက်အောက်ခံ ကား ၁ စီး သိမ်းဆည်းရရှိထားတယ်လို့ ချင်းကာကွယ်ရေးတပ်ဖွဲ့(မင်းတပ်)က ဩဂုတ်လ ၂၈ရက်နေ့က အတည်ပြုထုတ်ပြန်ပါတယ်။

ဩဂုတ်လ ၂၀ ရက်နေ့က သွားရောက်သိမ်းဆည်းခဲ့တာလို့ ပြောပါတယ်။

မင်းတပ်မှာ ခရိုင်ပြည်သူ့ဆေးရုံကား ပျောက်ဆုံးထားတာရှိခဲ့ပေမယ့် ချင်းကာကွယ်ရေးတပ်ဖွဲ့ (မင်းတပ်) ရဲ့ ထုတ်ပြန်ချက်မှာတော့ စစ်ကောင်စီလက်အောက်ခံ မော်တော်ယာဉ် ၁ စီးလို့သာဆိုထားပြီး အသေးစိပ်ဖော်ပြတာ မရှိသေးပါဘူး။

ခရိုင်ပြည်သူ့ဆေးရုံကား ပျောက်ဆုံးမှုကြောင့် စစ်ကောင်စီတပ်က ဆေးရုံ၊ စာသင်ကျောင်းတွေ လည်ပတ်ခွင့် ပိတ်ထားခဲ့ပြီး လက်ရှိမှာတော့ ပုံမှန်အတိုင်း ပြန်လည်ပတ်နေပြီလို့ မင်းတပ်ခရိုင် ပညာရေးအသိုင်းအဝန်းနဲ့ နီးစပ်သူတွေက ပြောပါတယ်။

စစ်ကောင်စီ ထိန်းချုပ်နေတဲ့ မင်းတပ်မှာ အခုဩဂုတ်လ နောက်ဆုံးအပတ်ထဲ ထိတွေ့ ပစ်ခတ်မှု ၂ ကြိမ်ရှိထားပြီး စစ်ကောင်စီတပ်ဖွဲ့ဝင် ၂ ဦး သေဆုံးတယ်လို့လည်း ချင်းကာကွယ်ရေးတပ်ဖွဲ့ (မင်းတပ်) ရဲ့ ထုတ်ပြန်ချက်မှာ တွေ့ရပါတယ်။

မြို့တွင်း ထိတွေ့ပစ်ခတ်မှု ခပ်စိပ်စိပ်ရှိလာတဲ့ မင်းတပ်မှာ အရပ်သားပြည်သူတွေကို ဒေသကာကွယ်ရေးတပ်ဖွဲ့နဲ့ ပတ်သက်တယ်ဆိုတဲ့ စွပ်စွဲချက်နဲ့ ဖမ်းဆီးခံရတာမျိုး ကြုံနေရပါတယ်။

ဒီလိုဖြစ်စဉ်ကို ချင်းကာကွယ်ရေးတပ်ဖွဲ့(မင်းတပ်)က သိရှိထားပြီး မြို့ပေါ်နေ ပြည်သူတွေအနေနဲ့ နေထိုင်သွားလာမှု အထူးသတိပြုဖို့ကိုပဲ အလေးအနက်ထား တိုက်တွန်းထားပါတယ်။

မင်းတပ်မှာ ၂၀၂၃ ဇူလိုင်လကုန်ကပဲ စစ်ကောင်စီ ယာဉ် အနီးကပ်ပစ်ခတ်ခံရတဲ့ဖြစ်စဉ် ထပ်ဖြစ်ထားသလို အာဏာသိမ်းကာလ စစ်ကောင်စီမော်တော်ယာဉ် ၁၀ စီးထက်မနည်းကို ဒေသကာကွယ်ရေးတပ်ဖွဲ့က မီးရှို့ဖျက်ဆီးနိုင် ခဲ့ပါတယ်။

========================

📌📌 ၃။ CDF-Kanpetletက “ဝိတိုရိယသူရဲကောင်း စုပေါင်းအားသစ်လောင်း” သိန်း ၅၀၀၀Campaign စတင်

ချင်းကာကွယ်ရေးတပ်ဖွဲ့(ကန်ပက်လက်)က “ဝိတိုရိယသူရဲကောင်း စုပေါင်းအားသစ်လောင်း” သိန်း ၅၀၀၀Campaign

ကို ဩဂုတ်လ ၃၁ရက်နေ့က စတင်နေပြီလို့ ဆိုပါတယ်။

ဒီ Campaign ဟာ CDf-Kanpetlet နဲ့ နိုင်ငံတကာပူးပေါင်း ဆောင်ရွက်ရေးဝန်ကြီးဌာန(MOIC)တို့ ပူးပေါင်းပြုလုပ်တာဖြစ်ပြီး Campaignကာလကို ဩဂုတ်လ ၃၁ရက်နေ့မှ အောက်တိုဘာလ ၁၅ရက်‌အထိ သတ်မှတ်ထားပါတယ်။

ချင်းကာကွယ်ရေးတပ်ဖွဲ့ CDF-Kanpetlet ဟာ စစ်တပ်အာဏာစသိမ်းချိန်ကစပြီး တိုက်ပွဲပေါင်း (၁၅၀)ကျော် ဆင်နွှဲခဲ့ပြီး အကြမ်းဖက်စစ်ကောင်စီ အရာရှိတချို့ အပါအဝင် အနည်းဆုံး အယောက် (၂၀၀) ခန့်ကို ရှင်းလင်းနိုင်ခဲ့တယ်လို့ ဆိုပါတယ်။ တိုက်ပွဲကာလအတွင်း ကာကွယ်ရေးရဲ‌‌‌‌ဘော် (၁၆) ဦး မြင့်မြတ်စွာ အသက်ပေးလှူခဲ့တယ် ထုတ်ပြန်ချက်မှာ တွေ့ရပါတယ်။

၂၀၂၁ ခုနှစ်တည်းက စလို့ အကြမ်းဖက်စစ်ကောင်စီနဲ့ တိုက်ပွဲများ ဆက်တိုက်ပြင်းထန်ခဲ့သလို လက်နက်အင်အား ကွာဟလွန်းမှုကြောင့် တပ်ရင်း (၂) စခန်းကို သုံးကြိမ်အထိ လက်လွှတ်ခဲ့ရဖူးပြီး တပ်မဟာဌာနချုပ်ကိုလည်း (၁) ကြိမ် လက်လွှတ်ခဲ့ရဖူးတယ်လို့ CDF-Kanpetletက ဆိုပါတယ်။

အများအားဖြင့် ချင်းရိုးရာတူမီးတွေနဲ့ တိုက်ပွဲဝင်ရာက ထိရောက်တဲ့တန်ပြန်ထိုးစစ်များ စတင်နိုင်ဖို့နဲ့ စစ်ကောင်စီ၏ အထိုင်စခန်းများကိုပါ ပြန်လည်သိမ်းပိုက်နိုင်ဖို့အတွက် လိုအပ်တဲ့ လက်နက်ကြီး လက်နက်ငယ်များ၊ ကျည်ဆံများ ဖြည့်တင်းနိုင်ရေးအတွက် “ဝိတိုရိယသူရဲကောင်း စုပေါင်းအားသစ်လောင်း” ခေါင်းစဥ်ဖြင့် ကျပ်သိန်း (၅,၀၀၀) Campaignကို ၃၁.၈.၂၀၂၃ မှ ၁၅.၁၀.၂၀၂၃ အထိ (၄၅) ရက်တိတိ ပြုလုပ်ရတယ်လို့ ထုတ်ပြန်ပါတယ်။

ယခုပြုလုပ်တဲ့ Campaign ဟာ CDF-Kanpetlet တပ်ဖွဲ့အတွက် အသက်သွေးကြောသဖွယ် အရေးကြီးနေတာကြောင့် ပြည်တွင်းပြည်ပရှိ မိဘပြည်သူများနှင့် နိုင်ငံတဝှမ်းလုံးရှိ တိုင်းရင်းသား ညီအစ်ကိုမောင်နှမအားလုံး အလေးထားပါဝင် အားဖြည့်ပေးကြဖို့ CDF-Kanpetletက တိုက်တွန်းနှိုးဆော်ထားပါတယ်။