7th OCT 2023 - (Ethnic language program-CHO_DAAI) by Radio NUG ~ Newsletter by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ အောက်တိုဘာလ ( ၇ ) ရက်နေ့ နောက်ဆုံးရပြည်တွင်းသတင်းများ

📌📌 ၁။ ရဲတပ်ဖွဲ့ဝင် ၄ ဦးကို PDF – Zoland က ဖမ်းဆီး ရမိ

ချင်းပြည်နယ်၊ တီးတိန်မြို့အခြေစိုက် စစ်ကောင်စီလက်အောက်ခံ ဒုတပ်ကြပ်အဆင့်အပါအဝင် ရဲတပ်ဖွဲ့ဝင် ၄ ဦးကို ဖမ်းဆီးရမိတယ်လို့ PDF – Zoland က အောက်တိုဘာ ၂ ရက်နေ့ ကြေညာပါတယ်။

သူတို့ ၄ ဦးဟာ တီးတိန် - ရိဒ်ကားလမ်းမပေါ်က ပြည်သူတွေထံကနေ မတန်မဆငွေကြေး တောင်းယူနေသူတွေ ဖြစ်တာကြောင့် ဖမ်းဆီးထိန်းသိမ်းရတာလို့ ကာကွယ်‌ရေးတပ်ဖွဲ့ဖက်က ပြောပါတယ်။

ဒါ့အပြင် မူးယစ်စိတ်ကြွဆေးပြား သုံးစွဲထားတဲ့ သက်သေကို စစ်ဆေးတွေ့ရှိထားတဲ့အကြောင်း PDF - Zoland တာဝန်ရှိ သူတဦးရဲ့ ပြောဆိုချက်ကို Khonumthung Burmese မှာ ဖော်ပြပါတယ်။

ဖမ်းဆီးရမိသူတွေကို ကောင်းကောင်းမွန်မွန်ထားရှိပေမယ့် ဘယ်လိုအရေးယူမှုတွေ ဆက်လုပ်မယ်ဆိုတာတော့ မသိရ ပါဘူး။၂၀၂၃ ဩဂုတ်လတုန်းကလည်း စစ်ကောင်စီခန့်ထားတဲ့ ခရိုင်အုပ်ချုပ်ရေးမှူးရဲ့ မော်တော်ယာဉ်တစီးကို တီးတိန်မြို့ပေါ်မှာ ပြည်သူ့ကာကွယ်ရေးတပ်ဖွဲ့က သိမ်းယူနိုင်ခဲ့ပါတယ်။

========================

📌📌 ၂။ CDF မင်းတပ်အတွက် လက်၊နက် တပ်ဆင်မှု ပြုလုပ်

International Mindat K'Cho Organization (IMCO)၊ Heal the world၊ CEA (Norway) အဖွဲ့ ၃ ဖွဲ့က ပူးပေါင်းပြီး ချင်းကာကွယ်ရေးတပ်ဖွဲ့ (မင်းတပ်) ကို လက်၊နက် တပ်ဆင်ပေးခဲ့တယ်လို့ ထုတ်ပြန် ကြေညာလာပါတယ်။

AK - 47 အမျိုးအစား အလက် ၄၀၊ ကျ၊ည်ဆန်အတောင့် ၁၂၀၀၀ နဲ့ ကျ၊ည်အိမ် ၁၂၀ ခုတို့ကို ၂၀၂၃ စက်တင်ဘာလ နောက်ဆုံးအပတ်ထဲမှာ ချင်းကာကွယ်ရေးတပ်ဖွဲ့ (မင်းတပ်) ထံ အပ်နှံခဲ့တာလို့ IMCO က ပြောပါတယ်။

ချင်းကာကွယ်ရေးတပ်ဖွဲ့ (မင်းတပ်) ကို ခုလိုလက်၊နက်တပ်ဆင်နိုင်ဖို့ ၂၀၂၂ ဇွန်လကတည်းက စတင်ကြိုးပမ်း လုပ်ဆောင်ခဲ့တာပါ။

ဒီပရောဂျက်အတွက် အမေရိကန်ဒေါ်လာ ၁၈၅၀၀၀ (တသိန်းရှစ်သောင်းငါးထောင်) ဝန်းကျင်ကုန်ကျနိုင်ပြီး ဒေါက်တာ အငြိမ်း ဦးဆောင်တဲ့ Heal the World အဖွဲ့နဲ့ CEA (Norway) တို့က ဒေါ်လာ ၃၅၀၀၀ (သုံးသောင်းငါးထောင်) နီးပါး ပူးပေါင်းအားဖြည့်ခဲ့တယ်လို့ ဆိုပါတယ်။

နောက်ထပ် ရှိနေသေးတဲ့ ပရောဂျက်လက်ကျန်ကနေ AK - 47 ၁၀ လက်၊ ကျ၊ည်တောင့် ၃၀၀၀ နဲ့ ကျ၊ည်အိမ် ၃၀ ခုကို ချင်းကာကွယ်ရေးတပ်ဖွဲ့ (မင်းတပ်) ထံ မကြာမီ ပြန်လည် တပ်ဆင်ပေးမယ်လို့လည်း သိရပါတယ်။

ချင်းကာကွယ်ရေးတပ်ဖွဲ့ (မင်းတပ်) အတွက် လက်၊နက်တပ်ဆင်ဖို့ အဖက်ဖက်က ဝိုင်းဝန်းကူညီအားဖြည့်တဲ့ အဖွဲ့ အစည်းအသီးသီးနဲ့ သက်ဆိုင်ရာလူပုဂ္ဂိုလ်အယောက်ချင်းစီတိုင်းကို ကျေးဇူးတင်ရှိတဲ့အကြောင်း International Mindat K'Cho Organization (IMCO) က မှတ်တမ်းတင်ထားပါတယ်။

========================

📌📌 ၃။ အသက် ၁၇ နှစ်အရွယ် စစ်ကောင်စီတပ်ဖွဲ့ဝင် ၁ ဦး CNDF ထံ အလင်းဝင် ခိုလှုံ

ဖလမ်းမြို့နယ်၊ ကလေး - ဖလမ်းကားလမ်းမပေါ် ထင်းရူးစခန်းမှာ တည်ရှိတဲ့ စစ်ကောင်စီတပ်စခန်းကနေ တပ်သား ပြည့်ဖြိုးအောင် Chin National Defence Force (CNDF) ထံ အလင်းဝင် ခိုလှုံလာတယ်လို့ The Rihli Voice မှာ ‌ဖော်ပြပါတယ်။

အသက် ၁၇ နှစ်အရွယ် တပ်သား ပြည့်ဖြိုးအောင်ဟာ MA1 ကျည်ဆန် ၃၄၅ တောင့်၊ လက်ပစ်ဗုံး ၂ လုံး၊ ၄၀ မမဗုံးသီး ၂ လုံးနဲ့အတူ စက်တင်ဘာ ၂၆ ရက်နေ့က အလင်းဝင်လာတာလို့ ဆိုပါတယ်။

အလင်းဝင်လာသူကို လွတ်မြောက်နယ်မြေ ပို့ဆောင်ထားတယ်လို့လည်း သိရပါတယ်။

တပ်သား ပြည့်ဖြိုးအောင်ဟာ ၂၀၂၀ စက်တင်ဘာလတုန်းက ဖမ်းဆီးခံရပြီးတဲ့နောက် စစ်ကောင်စီတပ်သားလုပ်ဖို့ အတင်းအဓမ္မ စေခိုင်းခံရသူလို့ သူကိုယ်တိုင်က ထွက်ဆိုထားပါတယ်။

ပြီးခဲ့တဲ့ လပိုင်းလောက်ကပဲ ချင်းပြည်နယ်၊ မတူပီမြို့နယ်မှာလည်း စစ်သုံးပစ္စည်းနဲ့အတူ CDF မတူပီထံ အလင်းဝင် ခိုလှုံလာတဲ့ စစ်ကောင်စီတပ်ဖွဲ့ဝင် ၄ ဦးအထိ ရှိပါတယ်။

အာဏာသိမ်းကာလ ၂ နှစ်ကျော်အတွင်း စစ်ကောင်စီလက်အောက်ကနေ အာဏာဖီဆန်ပြီး ခိုလှုံလာတဲ့ စစ်ကောင်စီ တပ်ဖွဲ့ဝင် ဦးရေ ၁၄၀၀၀ ကျော် ရှိနေတယ်လို့ (NUG) က ၂၀၂၃ စက်တင်ဘာလဆန်းပိုင်းမှာ ထုတ်ပြန်ထားပါတယ်။

========================

📌📌 ၄။ စစ်တပ်၏ ရက်စက်ကြမ်းကြုတ်မှုများမှ လွတ်မြောက်ပြီး သက်ဆိုင်ရာနိုင်ငံများ၌ ခိုလှုံလာသည့် အမျိုးသမီးနှင့် မိန်းကလေးငယ်များအား ကာကွယ်ပေးရန် သံအမတ်ကြီး ဦးကျော်မိုးထွန်း အိမ်နီးချင်းနိုင်ငံများကို တိုက်တွန်း

အောက်တိုဘာ၄ရက်ကျင်းပတဲ့(၇၈) ကြိမ်မြောက် ကုလသမဂ္ဂ အထွေထွေညီလာခံ၏ တတိယကော်မတီအစည်းအဝေး၌ အမျိုးသမီးများ ဖွံ့ဖြိုးတိုးတက်မှုဆိုင်ရာ အထွေထွေဆွေးနွေးမှုတွင် ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ် သံအမတ်ကြီး ဦးကျော်မိုးထွန်းမှ အခုလိုပြောကြားခဲ့ပါတယ်။

"မြန်မာနိုင်ငံအတွင်း၊ အထူးသဖြင့် ပဋိပက္ခဖြစ်ပွားရာဒေသများရှိ အမျိုးသမီးများနှင့် မိန်းကလေးငယ် များသည် စစ်တပ်၏ လိင်ပိုင်းဆိုင်ရာ အကြမ်းဖက်မှုများမှ အကာအကွယ် လိုအပ်လျက်ရှိကြောင်း၊ အသက်ရှင်ကျန်ရစ်သူများအနေဖြင့် တရားမျှတမှုကို ရပိုင်ခွင့်ရှိကြောင်း၊ စစ်တပ်၏ ရက်စက်ကြမ်းကြုတ်မှုများမှ လွတ်မြောက်ပြီး သက်ဆိုင်ရာနိုင်ငံများ၌ ခိုလှုံလာသည့် ပြည်သူများ အထူးသဖြင့် အမျိုးသမီးနှင့် မိန်းကလေးငယ်များအား ကာကွယ်ပေးရန် ဒေသတွင်းနိုင်ငံများ အထူးသဖြင့် အိမ်နီးချင်းနိုင်ငံများကို တိုက်တွန်း လိုကြောင်း"သံအမတ်ကြီးကပြောကြားခဲ့ပါတယ်။

နိုင်ငံရေးအကျဉ်းသားများ ကူညီစောင့်ရှောက်ရေးအဖွဲ့၏ ထုတ်ပြန်ချက်အရ လွန်ခဲ့သည့် ၃၁ လအတွင်း စစ်တပ်၏ မတရားသတ်ဖြတ်မှုကြောင့် လူပေါင်း ၄၁၄၁ ဦး သေဆုံးခဲ့ပြီး၊ ၆၁၃ ဦး ကျော်မှာ အမျိုးသမီးများ ဖြစ်ကြောင်းသိရပါတယ်။

"စစ်တပ်မှ တရားမ၀င်ကွပ်မျက်ခြင်းခံခဲ့ရသော အမျိုးသမီးများ၏ ရုပ်အလောင်းများ၌ လိင်ပိုင်းဆိုင်ရာ အကြမ်းဖက်မှုနှင့် ကိုက်ညီသောဒဏ်ရာများ တွေ့ရှိရကြောင်း၊ ယင်းကဲ့သို့ လူမဆန်သည့်လုပ်ရပ်များကို ရပ်တန့်ရမည် ဖြစ်ကြောင်း"လည်း သံအမတ်ကြီးကထပ်လောင်းပြောကြားခဲ့ပါတယ်။