25th NOV 2023 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ နိုဝင်ဘာလ ( ၂၅ ) ရက်နေ့ နောက်ဆုံးရပြည်တွင်းသတင်းများ

📌📌 ၁။ ချင်းပြည် Rihkhawdar မြို့ ပြည်သူ့အုပ်ချုပ်ရေးကို CNF နဲ့ HPO က ပူးတွဲ အကောင်ထည်ဖော်မယ်လို့ဆို 

 

ချင်းပြည်၊ ဖလမ်းမြို့နယ် ရိခွါဒါရ်မြို့မှာ ပြည်သူလူထုလုံခြုံရေး၊ တရားဥပဒေစိုးမိုးရေး၊ ဒေသတည်ငြိမ်ရေးနဲ့ နယ်စပ်ကုန်သွယ်ရေး အဆင်ပြေစေဖို့ ပြည်သူ့အုပ်ချုပ်ရေးကို အကောင်ထည်ဖော် ဆောင်ရွက်နေတယ်လို့ နိုဝင်ဘာ ၂၃ရက်နေ့က ထုတ်ပြန်လိုက်ပါတယ်။

ဒေသခံ ပြည်သူတွေကိုယ်တိုင် ဖော်ဆောင်တဲ့ မြို့ပြည်သူ့အုပ်ချုပ်ရေးမှာ ချင်းအမျိုးသားတပ်မတော် (CNA) နဲ့ Hualngo People Organization (HPO) တို့က ပူးတွဲပြီး လုပ်ဆောင်မယ်လို့ ပြောပါတယ်။

ရိခွါဒါရ်မြို့စစ်ကောင်စီအထိုင်စခန်း ၂ ခုကို ချင်းအမျိုးသားမတော် (CNA) ဦးဆောင်တဲ့ ချင်းပူးပေါင်းတပ်စု (CDF-Hualngoram, PDA, CDF-Zaniatram, CDF-Thantlang) တို့က ၂၀၂၃ နိုဝင်ဘာ ၁၃ နဲ့ ၁၄ ရက်နေ့တွေမှာ သိမ်းပိုက်ခဲ့ တာပါ။ မြို့သိမ်းအပြီး ၁၀ရက်ဝန်းကျင်အကြာမှာ ပြည်သူ့အုပ်ချုပ်ရေးကို စနစ်လည်ပတ်အောင် အကောင်ထည်ဖော် ဆောင်ရွက် လာတာလည်း ဖြစ်ပါတယ်။

CNF/CNA ရဲ့ ထုတ်ပြန်ချက်မှာ ၂ ဖက်တိုက်ပွဲကာလအတွင်း စစ်ရှောင်တွေနဲ့ ဒဏ်ရာရ ရဲဘော်တွေရဲ့ အခက်အခဲကို ဝိုင်းဝန်းကူညီပံ့ပိုးပေးတဲ့ မီဇိုရမ်ပြည်နယ်အစိုးရအပါအဝင် အိန္ဒိယဗဟိုအစိုးရကို အလေးအနက်ကျေးဇူးတင်ကြောင်း ဖော်ပြပါတယ်။ ရိခေါဒါရ်မြို့သိမ်းတိုက်ပွဲမှာ စစ်ကောင်စီဘက် ထိခိုက်သေဆုံးတာနဲ့ သိမ်းဆည်းရရှိတဲ့ လက်နက် ခဲယမ်းများသလို ချင်းတော်လှန်ရေးပူးပေါင်းတပ်ဖွဲ့ဘက်ကလည်း ကျဆုံးမှုတွေ ရှိခဲ့ပါတယ်။

 

========================

 

📌📌 ၂။ ဖလမ်းမြို့နယ်မှာ စစ်ကောင်စီတပ်က အခြေချစခန်း ၂ ခုကနေ စွန့်ခွာသွား

 

ဖလမ်းမြို့နယ်မှာ စစ်ကောင်စီတပ်က တပ်စွဲထားတဲ့ စခန်း ၂ ခုကို ရုတ်တရက်စွန့်ခွာခဲ့တယ်လို့ သိရပါတယ်။

နိုဝင်ဘာ ၁၅ က ကလေး - ဖလမ်းလမ်းမပေါ်ရှိ ဗါရ်းစခန်းကို စွန့်ခွာတာဖြစ်ပြီး နိုဝင်ဘာ ၂၂ မှာလည်း ထင်းရှုးမြိုင်စခန်းကို ရုတ်တရက် စွန့်ခွာသွားတယ်လို့ ချင်းအမျိုးသားအဖွဲ့ချုပ် (CNO) က သတင်းထုတ်ပြန်ပါတယ်။

ထွက်ပြေးတဲ့ စစ်ကောင်စီတပ်ဖွဲ့ကို ဒေသခံကာကွယ်ရေးပူးပေါင်းတပ်က ပိတ်ဆို့ထားပြီး အချိန်မရွေး တိုက်ပွဲပြင်းထန် နိုင်တာကြောင့် ဖလမ်းမြို့နယ် ခွန်လီတောင်ကြော၊ ဗားလုံးတောင်ကြောနဲ့ ဝေဘူလတောင်ကြောမှာ ပြည်သူတွေ သွားလာတာမလုပ်ကြဖို့ အသိပေးထားပါတယ်။

အထိုင်စခန်း ၂ ခုစွန့်ခွာတဲ့ စစ်ကောင်စီတပ်ဖွဲ့ဝင်တွေဟာ ဖလမ်းမြို့အခြေစိုက် ခလရ ၂၆၈ တပ်ရင်းကို ပြန်လည် ပူးပေါင်းတာလို့လည်း ပြောဆိုကြပါတယ်။

နိုင်ငံအနှံ့မှာ စစ်ကောင်စီအခြေချစခန်းတွေ သိမ်းယူခံရတာ ဆက်တိုက်ဖြစ်ပွားနေပြီး ချင်းပြည်မှာလည်း (CNA) ဦးဆောင်တဲ့ ချင်းပူးပေါင်းတပ်စု (CDF-Hualngoram, PDA, CDF-Zaniatram, CDF-Thantlang) တို့က ၂၀၂၃ နိုဝင်ဘာ ၁၃ နဲ့ ၁၄ ရက်နေ့တွေမှာ ဖလမ်းမြို့နယ် Rihkhawdarမြို့အနီး စစ်ကောင်စီ Tio စခန်းနဲ့ Rih စခန်းကို သိမ်းပိုက်ခဲ့ပါတယ်။

Operation 1027 က အစပြုတဲ့ စခန်းသိမ်းတိုက်ပွဲတွေကို ကြိုဆိုထောက်ခံတဲ့အနေနဲ့ မိတ်ဖက်တော်လှန်ရေး အဖွဲ့အစည်းတွေနဲ့ CNDF Special Operation (အထူးစစ်ဆင်ရေး) ပြုလုပ်ခဲ့ပြီး စစ်ကောင်စီစခန်း ၃ ခုသိမ်းယူနိုင်ကြောင်း ချင်းအမျိုးသားကာကွယ်ရေးတပ်ဖွဲ့ (CNDF) က နိုဝင်ဘာ ၁၇ ရက်နေ့ ထုတ်ပြန်ပါတယ်။

 

========================

 

📌📌 ၃။ မင်းတပ်မြို့ စည်ပင်သာယာဝပြောရေး လုပ်ဆောင်နေတယ်လို့ စစ်ကောင်စီပြော

 

မင်းတပ်မြို့ပေါ် သာယာဝပြောရေးနဲ့ ဖွံ့ဖြိုးရေး ဦးစားပေးဆောင်ရွက်နေတယ်လို့ စစ်ကောင်စီက သတင်းထုတ်ပြန် ပါတယ်။ ၂၀၂၃ခုနှစ်အတွင်း မင်းတပ်မြို့၊ ဘဝသစ်ရပ်ကွက်မှာ အရှည် ပေ ၉၈၀ (၀.၁၈ မိုင်) ကပ်တရာလမ်းကို ကျပ်သိန်း ၂၀၀ အကုန်ကျခံပြီး ပြုလုပ်ထားတယ်လို့ ပြောပါတယ်။ 

နောက်ပြီး ခေါနူးသုမ်ကတ္တရာလမ်းကိုလည်း ပြည်နယ်ရန်ပုံငွေနဲ့ ပြုပြင်ပေးထားတယ်လို့ ဆိုပါတယ်။

မင်းတပ်အတွက်ရရှိတဲ့ ပြည်နယ်ရန်ပုံငွေ ခွဲတမ်းတွေကို စစ်ကောင်စီခန့်ထားတဲ့ စစ်နယ်မြေမှူး ဗိုလ်မှူးကြီး ကျော်ဝင်းမြင့် ဆိုသူနဲ့ မင်းတပ် ခရိုင်စီမံအုပ်ချုပ်ရေးအဖွဲ့ ဥက္ကဋ္ဌနေရာယူထားတဲ့ နေမျိုးသန်းဆိုသူတွေက အဓိက ကိုင်တွယ်နေကြတာပါ။ 

ပြီးခဲ့တဲ့ လတွေက မင်းတပ်မြို့ပေါ်မှာ အိမ်ထောင်စုစာရင်း အတိအကျ ကောက်ယူတာမျိုးရှိနေပြီး ဘာကြောင့်ဆိုတာတော့ မသိရဘူးလို့ ကိုယ်တိုင်စာရင်းပေးခဲ့သူက ပြောပါတယ်။

မင်းတပ်မှာ ၂ ဖက် ပစ်ခတ်မှုတွေ ဆက်မရှိတာ လအတန်ကျော်ကြာနေပေမယ့် စစ်ကောင်စီတပ်ဘက်က အစုလိုက် ကင်းလှည့်တာ၊ အစစ်အဆေး တင်းကျပ်တာမျိုးတော့ ရှိနေဆဲဖြစ်ပါတယ်။

 

========================

 

📌📌 ၄။ ကျောက်ထု အမြောက်တပ်ရှိ တပ်သား ၂၀ ခန့် ထပ်မံထွက်ပြေး

 

မကွေးတိုင်း၊ ကျောက်ထုမြို့အခြေစိုက် အမတ (၃၆၈)တပ်က ဒုအရာခံဗိုလ် ၁ ဦး လက်နက်အပြည့်အစုံနဲ့ အလင်းဝင်တဲ့ တပတ်အတွင်းမှာပဲ စစ်ကောင်စီတပ်ဖွဲ့ဝင် ၂၀ ခန့် ထပ်မံ ထွက်ပြေးသွားတယ်လို့ သိရပါတယ်။

နိုဝင်ဘာ ၁၇ ရက်နဲ့ ၂၀ ရက်နေ့တွေမှာ အမတ (၃၆၈) က စစ်ကောင်စီတပ်ဖွဲ့ဝင် ၁၈ ဦး ထွက်ပြေးတာလို့ ယောအလင်း တန်းက ဖော်ပြပါတယ်။ထွက်ပြေးသူတွေကို စစ်ကောင်စီက ပိတ်ဆို့ပြီး ၄ ဦး ပြန်မိထားတယ်လို့ ဆိုပါတယ်။ နောက်ထပ် ကျန်တဲ့ တပ်သား ၁၄ ဦးကိုတော့ လိုက်လံ ရှာဖွေနေဆဲ အခြေအနေပါ။

အမတ (၃၆၈) တပ်က စစ်ကောင်စီတပ်ဖွဲ့ဝင် ဆယ်ချီထွက်ပြေးနေတာနဲ့ပတ်သက်လို့ မှန်ကန်ကြောင်း၊ ပြည်သူ့ဘက် ကူးပြောင်းလိုသူတွေ ကာကွယ်ရေးတပ်ဖွဲ့ကို ချိတ်ဆက်ကြဖို့ ဆော၊ ကျောက်ထုနယ်အခြေစိုက် ဂန့်ဂေါခရိုင်အမှတ် (၁၃) တပ်ရင်း တပ်ရင်းမှူးက သူ့လူမှုကွန်ရက်ကနေ အသိပေးထားပါတယ်။ အလင်းဝင်လာသူတွေကို ရုပ်ပိုင်း၊ စိတ်ပိုင်းဆိုင်ရာ လုံခြုံမှုနဲ့ လိုအပ်တဲ့ ကူညီပံ့ပိုးမှုတွေ ကြိုးစားဆောင်ရွက်ပေးမယ်လို့လည်း ပြောပါတယ်။

ကျောက်ထုမြို့တွင်း နေထိုင်သူကတော့ တပ်ဖွဲ့ဝင် ထွက်ပြေးနှုန်းမြင့်လာတဲ့ စစ်ကောင်စီက အနီးအနားကျေးရွာတွေကို ဦးတည်ပြီး လက်နက်ကြီးပစ်တာ ခပ်စိပ်စိပ်ပြုလုပ်နေတယ်လို့ ပြောပါတယ်။

တို၊က်ပွဲပြင်းထန်နေတဲ့ ရှမ်းမြောက်ပိုင်းနဲ့ ကရင်နီဘက်မှာ စစ်ကောင်စီရဲ့ တပ်ရင်း၊ တပ်မအလိုက် လက်နက်ချ အလင်းဝင် တာမျိုး ရှိခဲ့သလို မြို့သိမ်းတို၊က်ပွဲစတင်တဲ့ချိန်ကနေ ၁ လ နီးပါးအတွင်း စစ်ကောင်စီတပ်ဖွဲ့ဝင် ၃၄ ဦး အလင်းဝင် လာတယ် လို့NUGက ထုတ်ပြန်ပါတယ်။

#RadioNUGLocalNews

#SpringRevolution