09 Nov 2024 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၄ နိုဝင်ဘာလ ( ၉ ) ရက်နေ့နောက်ဆုံးရပြည်တွင်းသတင်းများ 

📌📌 ၁။ ‘နွေဦးဇာတ်ခုံ’ ရုပ်ရှင်ဇာတ်လမ်းအားပေးမှု ၂၀၀ ရာခိုင်နှုန်း အောင်မြင်။

 

‘နွေဦးဇာတ်ခုံ’ ဇာတ်လမ်းတို ပရောဂျက်ဟာ ၂၀၀ ရာခိုင်နှုန်းနီးပါး အောင်မြင်တယ်လို့ ပွဲစီစဉ်ဦးဆောင်သူ International Mindat K’Cho Organization (IMCO) ဘက်က ထုတ်ပြန်ပါတယ်။

ဒီဇာတ်လမ်းကို ချင်းကာကွယ်ရေးတပ်ဖွဲ့ (မင်းတပ်)၊ CDM ဝန်ထမ်းနဲ့ ပြည်သူတွေပူးပေါင်းတင်ဆက်တာဖြစ်ပြီး ဒါရိုက်တာအဖြစ် Chin Gyi က ရိုက်ကူးထားတာပါ။

ဇာတ်လမ်းတိုရဲ့ Project Target ကို ကျပ်သိန်း ၁,၂၀၀ မျှော်မှန်းခဲ့ပြီး ပရောဂျက်ကာလပြီးဆုံးချိန်မှာ ကျပ်သိန်းပေါင်း ၂,၃၀၀ ကျော်ရရှိတယ်လို့ သိရပါတယ်။

လက်မှတ်ဝယ်ယူအားပေးကြတဲ့ ပြည်တွင်းပြည်ပရှိ မိဘပြည်သူ၊ ရုပ်ရှင်လက်မှတ် ကူညီရောင်းချပေးတဲ့ ပြည်တွင်း၊ ပြည်ပအဖွဲ့အစည်းနဲ့ လူပုဂ္ဂိုလ်အသီးသီးကို အထူးကျေးဇူးတင်ရှိပါကြောင်း (IMCO) က မှတ်တမ်းတင် ဂုဏ်ပြုထားပါတယ်။

 

========================

 

📌📌 ၂။ ချင်းပြည်နယ် ဖွံ့ဖြိုးတိုးတက်ကြောင်း စစ်ကောင်စီခန့် ဝန်ကြီးဆို၊ နေကြာနဲ့ ကိုက်လန်စိုက်ဖို့ ပြော။

 

ချင်းပြည်နယ် ဖွံ့ဖြိုးတိုးတက်နေတယ်လို့ စစ်ကောင်စီခန့် ဝန်ကြီး ဒေါက်တာဝုန်ဆွန်းထန်က ပြောလိုက်ပါတယ်။

နိုဝင်ဘာ ၆ ရက်နေ့ ပြုလုပ်တဲ့ ချင်းပြည်နယ်ဖွံ့ဖြိုးတိုးတက်မှုမှတ်တမ်းပြုစုနိုင်ရေး လုပ်ငန်းညှိနှိုင်းအစည်းအဝေးမှာ အခုလို ပြောတာပါ။

၂၀၂၁ ဖေဖော်ဝါရီ ၁ ရက်နေ့ကနေ ၂၀၂၃ ဇန်နဝါရီ ၃၁ ရက်နေ့အထိ ပြည်နယ်အတွင်းရှိ ဌာနဆိုင်ရာအားလုံးက အချိတ်အဆက်မိမိ စည်းစည်းလုံးလုံး ဆောင်ရွက်ခဲ့လို့ ချင်းပြည်နယ်၊ ဖွံ့ဖြိုးတိုးတက်နေတာလို့ စစ်ကောင်စီခန့် ဝန်ကြီးက ဆိုပါတယ်။ 

ဆက်လက်ပြီး ဖွံ့ဖြိုးတိုးတက်မှုမှတ်တမ်းကို အမှားအယွင်းကင်းကင်း၊ အဆင့် အတန်းရှိရှိ ပြုစုတင်ပြရမယ်လို့လည်း သူကပြောသွားပါတယ်။

ချင်းပြည်နယ်ရဲ့ ဖွံ့ဖြိုးတိုးတက်မှုကို ဘယ်လိုအချက်အလက်တွေအပေါ်အခြေခံပြီး ပြောတယ်ဆိုတာကို မသိရပါဘူး။

ဒီမတိုင်ခင် တစ်ရက်အလိုက ဟားခါးမြို့နယ်အတွင်း နေကြာနဲ့ ကိုက်လန်စိုက်ဖို့ စစ်ကောင်စီက ဖြန့်ဝေတာမျိုးလည်း လုပ်ခဲ့ပါတယ်။ 

ဖွံ့ဖြိုးတိုးတက်တယ်လို့ စစ်ကောင်စီခန့် ဝန်ကြီးပြောဆိုတဲ့ ချင်းပြည်နယ်မှာ ၃ နှစ်တာကာလအတွင်း လေကြောင်းတိုက်ခိုက်ခံရမှု ၅၁၅ ကြိမ်ရှိခဲ့ပြီး ဗုံးအလုံးရေ ၁၂၃၉ လုံးထက်မနည်း ကြဲချခံရတယ်လို့ ချင်းလူ့အခွင့်အရေးအဖွဲ့ (CHRO) က ၂၀၂၄ အောက်တိုဘာလ ၂၉ ရက်နေ့မှာ ထုတ်ပြန်ပါတယ်။

 

========================

 

📌📌 ၃။ ဒေါ်နယ်ထရမ့် သမ္မတဖြစ်လာဖို့ ရာခိုင်နှုန်းများနေ။

 

မဲဆွယ်ကာလမှာ ထိခိုက်ဒဏ်ရာရတဲ့အထိ အကြိမ်ကြိမ် လုပ်ကြံခံရတဲ့ အသက် ၇၈ နှစ်အရွယ် ဒေါ်နယ်ထရမ့်ဟာ ဒုတိယအကြိမ် သမ္မတဖြစ်လာခဲ့ပြီလို့ Fox News သတင်းဌာနက ကြေညာလိုက်ပါတယ်။

အမေရိကန်ရဲ့ ၂၀၂၄ ရွေးကောက်ပွဲမှာ ဒီမိုကရစ်တစ်ပါတီရဲ့ လက်ရှိ အမေရိကန်ဒုသမ္မတ ကာမလာဟဲရစ်ကို အနိုင်ယူပြီး သမ္မတဖြစ်လာတာလို့ ဖော်ပြပါတယ်။ 

မဲအနိုင်ရတဲ့ သမ္မတ ဒေါ်နယ်ထရမ့်အနေနဲ့ ၂၀၂၅၊ ဇန်နဝါရီ ၂၀ ရက်နေ့ အမေရိကန်လွှတ်တော်မှာ ကျမ်းသစ္စာကျိန်ဆိုသွားမယ်လို့ သိရပါတယ်။

ဒေါ်နယ်ထရမ့်ဟာ နိုင်ငံနယ်စပ်လုံခြုံရေး၊ လူဝင်မှုကြီးကြပ်ရေးနဲ့ အမေရိကန် စီးပွားရေး ပြန်လည်ဦးမော့လာဖို့ ဦးစားပေး မဲဆွယ်လေ့ရှိသူ ဖြစ်ပါတယ်။

#RadioNUGLocalNews

#SpringRevolution