30 Nov 2024 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၄ နိုဝင်ဘာလ ( ၃၀ ) ရက်နေ့နောက်ဆုံးရပြည်တွင်းသတင်းများ 

📌📌 ၁။ စစ်ခေါင်းဆောင် မင်းအောင်လှိုင်ကို နိုင်ငံတကာခုံရုံး - ICC က ဖမ်းဝရမ်းထုတ်ဖို့ တင်သွင်း။

 

စစ်ကောင်စီခေါင်းဆောင် မင်းအောင်လှိုင်ကို လူသားမျိုးနွယ်အပေါ် ရာဇ၀တ်မှုကျူးလွန်ကြောင်း အထောက်အထားရှိတဲ့အတွက် နိုင်ငံတကာရာဇ၀တ်ခုံရုံး International Criminal Court  (ICC) ကနေ ဖမ်းဝရမ်းထုတ်ဖို့ တင်သွင်းခံရလိုက်တဲ့အကြောင်း REUTERS သတင်းမှာ ဖော်ပြပါတယ်။

ဝရမ်းထုတ်မှု နောက်ဆက်တွဲအဖြစ် ဖမ်းဆီးနိုင်ရေး ဆက်လက်လုပ်ဆောင်သွားဖို့ ICC ရဲ့ ထုတ်ပြန်ချက်မှာ ဖော်ပြပါတယ်။

နယ်သာလန်နိုင်ငံအခြေစိုက် International Criminal Court  (ICC) ကနေ စစ်ခေါင်းဆောင်ကို ဖမ်းဝရမ်းထုတ်နိုင်ဖို့ တင်သွင်းလိုက်တာ ဖြစ်ပြီး တရားဝင် ဖမ်းဝရမ်းထုတ်ဖို့ အခြေအနေထိတော့ မရောက်သေးဘူးလို့ သိရပါတယ်။

 

========================

 

📌📌 ၂။ မင်းတပ်မြို့ကို စစ်ကောင်စီက ဖျက်အားပြင်းဗုံးသီးတွေနဲ့လေကြောင်းတိုက်ခိုက်မှုပြုလုပ်။

 

မင်းတပ်မြို့ပေါ်ကို နို၀င်ဘာ ၂၈ ရက် မနက် ၁၂ နာရီ ၄၅ မိနစ် ၀န်းကျင်မှာ စစ်ကောင်စီက ဖျက်အားပြင်း ဗုံးတွေနဲ့ လေကြောင်းတိုက်ခိုက်မှု ပြုလုပ်ခဲ့တယ်လို့‌ ‌‌ ဒေသခံ‌တွေက ပြောပါတယ်။

အဲဒီလေကြောင်းတိုက်ခိုက်မှုမှာ စစ်ကောင်စီက ပေါင် ၅၀၀အားထက်နှစ်ဆလောက်ပြင်းတဲ့ဗုံးသီးတွေကို အသုံးပြုပြီးတိုက်ခိုက်ခဲ့တာလို့ ဆိုပါတယ်။

စစ်ကောင်စီက မင်းတပ်မြို့ကို လေကြောင်းတိုက်ခိုက်ရာမှာပုံမှန် ကြဲနေကျ ပေါင်၂၅၀ ဗုံးသီး၊ ၅၀၀အားရှိတဲ့ ဗုံးသီးတွေထက် ပြင်းအားပိုတဲ့ ဗုံးသီးတွေကို အသုံးပြုလာတယ်လို့ ဒေသခံတွေကပြောပါတယ်။

ပြီးခဲ့တဲ့ နို၀င်ဘာလ ၂၅ ရက်နေ့ကလည်းမင်းတပ်မြို့ပေါ်ကို စစ်ကောင်စီးတပ်က ဂျက်ဖိုက်တာနဲ့ ၇ ကြိမ်  ၅၀၀ အားဗုံးသီး ၁၄ လုံး၊ Y-12 ကင်းထောက်ဗုံးကြဲလေယာဉ်နဲ့ အလုံး ၅၀ ထက်မနည်း တိုက်ခိုက်ခဲ့တယ်လို့သိရပါတယ်။

 

========================

 

📌📌 ၃။ ပခုက္ကူလေဆိပ် အသုံးပြုဖို့ စစ်ကောင်စီ ပြင်ဆင်။

 

မကွေးတိုင်း၊ ပခုက္ကူမြို့မှာ တည်ရှိတဲ့ ပခုက္ကူလေဆိပ်ကို စစ်ရေးအတွက်အသုံးပြုဖို့ စစ်ကောင်စီဘက်က အပြင်းအထန် ပြင်ဆင်နေတဲ့အကြောင်း The Irawaddy သတင်းဌာနက ရေးသားပါတယ်။

ပခုက္ကူမြို့မှာတည်ရှိတဲ့ အရပ်ဘက် လေယာဉ်ကွင်းကို နှစ်ပေါင်းများစွာ မသုံးဘဲ ပစ်ထားရာကနေ အခုအခါ စစ်ကောင်စီက စစ်ရေးအတွက် သုံးဖို့ ပြန်လည်ပြင်ဆင်နေပြီး လေဆိပ်ဝန်းကျင် ကျေးရွာတွေကိုလည်း လေကြောင်းပစ်ကူဖြင့် ရှင်းလင်းနေတယ်လို့ ဖော်ပြပါတယ်။ ပခုက္ကူမြို့ဟာ ချင်းပြည်တောင်ပိုင်းနဲ့ မိုင် ၁၀၀ ဝန်းကျင် အကွာအဝေးမှာ တည်ရှိပါတယ်။

စစ်ကောင်စီက ပခုက္ကူလေဆိပ်ကို စစ်ရေးအတွက် အသုံးပြုမယ်ဆိုရင် စစ်ကိုင်း၊ ချင်း၊ မကွေးဒေသတွေကို ဂျက်ဖိုက်တာ အချိန်တိုအတွင်းရောက်နိုင်တာကြောင့် တော်လှန်ရေးအင်အားစု၊ ဒေသခံတွေအနေနဲ့ အထူးသတိထားဖို့လိုအပ်နေတယ်လို့ လေတပ် CDM တဦးက ပြောထားပါတယ်။

The Mindat Postက ပြုစုထားတဲ့ အချက်အလက်တွေအရ ၂၀၂၄ နိုဝင်ဘာလပထမအပတ်မှ ယနေ့အထိ မင်းတပ်မှာ စစ်ကောင်စီ တံတားဦးလေတပ်၊ မကွေးလေတပ်နဲ့ မိတ္ထီလာ ရှမ်းတဲလေတပ်တို့က လေကြောင်းတိုက်ခိုက်မှု အကြိမ် ၁၄၀ ထက်မနည်း ပြုလုပ်ခဲ့ပါတယ်။

ဒီလို တိုက်ခိုက်ခံရတဲ့အချိန်မှာ စစ်ကောင်စီဘက်က Cluster ဗုံး၊ ပေါင် ၅၀၀၊ ပေါင် ၂၅၀ အပြင် ဗုံးသီးပေါင်း ၅၀၀ ကျော် အသုံးပြုထားပါတယ်။

#RadioNUGLocalNews

#SpringRevolution