၂၀၂၅ ဧပြီလ ၁ ရက်နေ့ မနက်ခင်း နောက်ဆုံးရပြည်တွင်းသတင်းများ
📌 ၁။ အစ္စလာမ်ဘာသာဝင်များ၏ ထူးမြတ်သော အီဒွလ်ဖိသ်ရ်ဝါကျွတ်အီးဒ်နေ့ နေ့ထူးနေ့မြတ် အချိန်အခါသမယတွင် ရပ်ဝေးရပ်နီးမှ အစ္စလာမ်ဘာသာဝင်များအားလုံးအတွက် NUG နိုင်ငံခြားရေးဝန်ကြီး ဆုမွန်ကောင်းတောင်း
📌 ၂။ ထိုင်ဝမ်မှ ကယ်ဆယ်ရေး ကျွမ်းကျင်လုပ်သားများနှင့် စက်ကိရိယာများ မြန်မာနိုင်ငံထဲ အဝင်မခံတာ စိတ်မကောင်းစရာဖြစ်တယ်လို့ သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဆို
📌 ၃။ မြန်မာနိုင်ငံအလယ်ပိုင်း၌ လှုပ်ခတ်ခဲ့သော ငလျင်ကြောင့် ဖြစ်ပေါ်ခဲ့သည့် ထိခိုက်ပျက်စီးမှုများကို ကူညီဆောင်ရွက်ရန် JICA အဖွဲ့ မြန်မာနိုင်ငံသို့ ရောက်ရှိ
📌 ၄။ ကုလသမဂ္ဂနှင့် မိတ်ဖက်အဖွဲ့အစည်းများမှ အသက်ကယ်တုံ့ပြန်ဆောင်ရွက်မှုများအတွက် ကနဦးငွေ ဒေါ်လာ (၁၅) သန်းကို စုပေါင်း ထည့်ဝင်
📌 ၅။ အင်ဒိုနီးရှားက မြန်မာငလျင်ဘေးသင့်ပြည်သူတွေကို ကူညီဖို့ စေလွှတ်
📌 ၆။ လူသားချင်း စာနာထောက်ထားသောအားဖြင့် ကောင်းကင်ကနေ ဗုံးကြဲတိုက်ခိုက်မှုတွေကို ရပ်ပေးတန့်ပေးဖို့ ကိုထိန်လင်း မေတ္တာရပ်ခံစကားဆို
📌 ၇။ "မြေငလျင် သဘာဝဘေး၊ ထောက်ပံ့စာနာ ကူညီပေး" ကမ်ပိန်းမှာ (၃) ရက်အတွင်း မြန်မာငွေကျပ် သိန်းပေါင်း (၈၀၀၀) ကျော်အထိ ရရှိခဲ့
📌 ၈။ သဘာဝဘေး ဒဏ်သင့်ပြည်သူများနှင့်အတူ အခက်အခဲများ ရင်ဆိုင်ကျော်ဖြတ်နိုင်ရန် TCSOs မှ သိန်း (၂၂၀) ကျပ် မတည်လှူဒါန်းသွားမည်
========================
၂၀၂၅ ခုနှစ် ဧပြီလ ၁ ရက်နေ့ မနက်ပိုင်းမှာတင်ပြပေးမယ့် Radio NUG စစ်ရေးသတင်းကောက်နုတ်ချက်များ
🚩 ၁။ ငလျင်ဒဏ်ကြောင့် ပြည်သူလူထု ကပ်ဘေးကြုံနေရချိန်မှာ နောင်ချိုမြို့ကို စစ်ကောင်စီ ဗုံးကြဲတိုက်ခိုက်
🚩 ၂။ ငလျင်ဒဏ် ခံခဲ့ရတဲ့ ရွာသစ်ကုန်း ကျေးရွာကို စစ်ကောင်စီက ဗုံးကြဲခဲ့ပြီး မီးရှို့ဖျက်ဆီး
🚩 ၃။ "မြန်မာစစ်ကောင်စီဟာ နိုင်ငံတစ်ဝန်းက ဒေသအတော်များများမှာ လေကြောင်းကနေ တိုက်ခိုက်နေတာကို ဘယ်လိုလုပ်ပြီး လုပ်ရက်ရတာလဲ"လို့ ထိုင်းလွှတ်တော်အမတ်ထောက်ပြ ပြောဆို
🚩 ၄။ အင်အားပြင်းငလျင်ကြောင့် ပြည်သူများ သဘာဝဘေးဒုက္ခရောက်နေချိန်၌ပင် အကြမ်းဖက်စစ်အုပ်စုက တိုင်းဒေသကြီးသုံးခုနှင့် ပြည်နယ် (၄) ခုက နေရာများကို လေကြောင်းကနေ ဗုံးကြဲ
🚩 ၅။ စစ်ကောင်စီက ဗန်းမော်နဲ့ လိုင်ဇာကို လေကြောင်းတိုက်ခိုက်မှု ပြုလုပ်ခဲ့ပြီး ထိုးစစ်အရှိန်မြှင့်နေ
🚩 ၆။ ကျောက်ဖြူမှာ စစ်ကောင်စီ လက်နက်ကြီးကြောင့် သံဃာ တပါးနဲ့ ပြည်သူတဦး သေဆုံး
🚩 ၇။ ငလျင်ဒဏ်သင့် ဒေသများတွင် ရွှေဘိုခရိုင် အမှတ် (၁၇) တပ်ရင်း နဲ့ အမှတ်(၁၂၂၂) တပ်ရင်း TRI ဗျုဟာတို့က လူသားချင်းစာနာတဲ့ အကူအညီများနဲ့ဆေးကုသပေးမှုတို့ လုပ်ဆောင်
🚩 ၈။ ငလျင်လှုပ်ခတ်မှုကြောင့် နေပြည်တော် စကစရဲ့ တပ်နယ်အတွင်းမှာ သေဆုံးသူ စုစုပေါင်း (၁၀၀) အထက်ရှိ
ဤသတင်းများကို ရေဒီယိုအန်ယူဂျီသတင်းတာဝန်ခံများနှင့် ခိုင်လုံသော မိတ်ဖက်သတင်းရင်းမြစ်များဆီမှ အခြေခံတင်ပြထားခြင်း ဖြစ်ပါတယ်။
========================
📌📌 ၁။ အစ္စလာမ်ဘာသာဝင်များ၏ ထူးမြတ်သော အီဒွလ်ဖိသ်ရ်ဝါကျွတ်အီးဒ်နေ့ နေ့ထူးနေ့မြတ် အချိန်အခါသမယတွင် ရပ်ဝေးရပ်နီးမှ အစ္စလာမ်ဘာသာဝင်များအားလုံးအတွက် NUG နိုင်ငံခြားရေးဝန်ကြီး ဆုမွန်ကောင်းတောင်း
မတ်လ (၃၁) ရက်နေ့မှာ ကျရောက်တဲ့ အစ္စလာမ်ဘာသာဝင်များ၏ ထူးမြတ်သော အီဒွလ်ဖိသ်ရ်ဝါကျွတ်အီးဒ်နေ့ နေ့ထူးနေ့မြတ် အချိန်အခါသမယတွင် NUG နိုင်ငံခြားရေးဝန်ကြီး ဒေါ်ဇင်မာအောင်က ဆုမွန်ကောင်းတောင်းဆိုကြောင်း အခုလို အသိပေးရေးသားထားပါတယ်။
အစ္စလာမ်ဘာသာဝင်များ၏ ထူးမြတ်သော အီဒွလ်ဖိသ်ရ်ဝါကျွတ်အီးဒ်နေ့ နေ့ထူးနေ့မြတ် အချိန်အခါသမယတွင် ရပ်ဝေးရပ်နီးမှ အစ္စလာမ်ဘာသာဝင်များအားလုံး စိတ်၏ချမ်းသာခြင်း ကိုယ်၏ ကျန်းမာခြင်းနှင့် ပြည့်စုံကြပါစေကြောင်း ဆုတောင်းမေတ္တာပို့သအပ်ပါတယ်လို့ ဖော်ပြထားပါတယ်။
ပြီးခဲ့သည့် သောကြာနေ့က မြန်မာနိုင်ငံအတွင်း အင်အားပြင်း ငလျင်လှုပ်ခတ်သည့်အချိန်သည် အစ္စလာမ်ဘာသာဝင်များ စုပေါင်းဝတ်ပြုသည့်အချိန်နှင့်တိုက်ဆိုင်နေခြင်းကြောင့် သာသနိကအဆောက်အအုံများ ပြိုကျပျက်စီးပြီး ဝတ်ပြုလာသူ အစ္စလာမ်ဘာသာဝင် အများအပြား မြင့်မြတ်သော ရှဟီဒီများအဖြစ် ကွယ်လွန်သေဆုံးခဲ့ရခြင်းအတွက်လည်း ကျန်ရစ်သူမိသားစုများနှင့်အတူ ထပ်တူထပ်မျှကြေကွဲဝမ်းနည်းရပါသည်။ ကျန်ရစ်သူမိသားစုများအပေါ် အလ္လာရှင်မြတ်မှ စိတ်ခွန်အားချီးမြှင့်ပေးပါစေကြောင်း ဆုတောင်းအပ်ပါတယ်လို့ ရေးသားထားပါတယ်။
========================
📌📌 ၂။ ထိုင်ဝမ်မှ ကယ်ဆယ်ရေး ကျွမ်းကျင်လုပ်သားများနှင့် စက်ကိရိယာများ မြန်မာနိုင်ငံထဲ အဝင်မခံတာ စိတ်မကောင်းစရာဖြစ်တယ်လို့ သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဆို
ထိုင်ဝမ်မှ ကယ်ဆယ်ရေး ကျွမ်းကျင်လုပ်သားများနှင့် စက်ကိရိယာများ မြန်မာနိုင်ငံထဲ အဝင်မခံဘူးဆိုတာ စိတ်မကောင်းစရာဖြစ်တယ်လို့ သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန ပြည်ထောင်စုဝန်ကြီး ဒေါက်တာတူးခေါင်က မတ်လ (၃၁) ရက်မှာ ယခုလိုဆိုထားပါတယ်။
"လူသားချင်းစာနာမှုလုပ်ငန်းမှာ နိုင်ငံရေးကို ဘေးဖယ်ထားသင့်တယ်။ ထိုင်ဝမ်မှ ကယ်ဆယ်ရေး ကျွမ်းကျင်လုပ်သားများနှင့် စက်ကိရိယာများ မြန်မာနိုင်ငံထဲ အဝင်မခံဘူး ဆိုတာ စိတ်မကောင်းစရာပါ။ ဒီချိန်မှာ နိုင်ငံရေးထက် အုတ်ပုံတွေကြားမှာ အသက်ရှင်လျက် ပိတ်မိနေသူများကို မြန်မြန်ဆန်ဆန်ကယ်ထုတ်နိုင်ဖို့ဆိုတာ ကျွမ်းကျင်လုပ်သားများ၊ စက်ယန္တရားများနှင့် နည်းပညာအထောက်အကူတွေ အင်မတန်လိုအပ်ပါတယ်။ လူများပြီးပွဲမစည် ဖြစ်တာထက် နိုင်ငံတကာမှ ကျွမ်းကျင်ပညာရှင်များရဲ့ အထောက်အကူဟာ အရမ်းကို လိုအပ်နေတာပါ။ နောက်ပြီး မီဒီယာများရဲ့ လှုံ့ဆော်မှုအားနဲ့ နိုင်ငံတကာ အကူအညီတွေ မြန်မြန်ဆန်ဆန်ရောက်လာစေရေးလဲ အရေးကြီးပါတယ်။ နိုင်ငံတကာ မီဒီယာများကို အရည်မရအဖတ်မရ ဆင်ခြေတွေနဲ့ပိတ်ပင်တာဟာ ဒုက္ခရောက်နေတဲ့ ပြည်သူများအတွက် အင်မတန်အကျိုးယုတ်စေပါတယ်" လို့ ဝန်ကြီးက ဆိုပါတယ်။
လက်ရှိ NUG ထိန်းချုပ်နယ်မြေထဲက ငလျင်ဘေးသင့် ပြည်သူတွေအတွက်တော့ အတတ်နိုင်ဆုံး ကူညီဖြေရှင်းပေးဖို့ စီစဉ်နေပြီဖြစ်တယ်လို့ သိရပါတယ်။
"အာဏာကလွဲပြီး ဘာမှ မစဉ်းစားတဲ့လူတွေလက်ထဲ မြန်မာပြည်သူတွေ၊ နာဂစ်တကြိမ်၊ ငလျင်တကြိမ် ခံရတာဟာ ရင်နာစရာကောင်းလှတယ်" လို့ ဝန်ကြီးက ထပ်လောင်းဆိုထားပါတယ်။
========================
📌📌 ၃။ မြန်မာနိုင်ငံအလယ်ပိုင်း၌ လှုပ်ခတ်ခဲ့သော ငလျင်ကြောင့် ဖြစ်ပေါ်ခဲ့သည့် ထိခိုက်ပျက်စီးမှုများကို ကူညီဆောင်ရွက်ရန် JICA အဖွဲ့ မြန်မာနိုင်ငံသို့ ရောက်ရှိ
မြန်မာနိုင်ငံအလယ်ပိုင်း၌ လှုပ်ခတ်ခဲ့သော ငလျင်ကြောင့် ဖြစ်ပေါ်ခဲ့သည့် ထိခိုက်ပျက်စီးမှုများကို ကူညီဆောင်ရွက်ရန် JICA အဖွဲ့ ရန်ကုန်သို့ မတ်လ (၃၁) ရက်မှာ ရောက်ရှိပြီဖြစ်ကြောင်း သတင်းရရှိပါတယ်။
မတ်လ (၂၈) ရက်နေ့တွင် မြန်မာနိုင်ငံ၌ လှုပ်ခတ်ခဲ့သော ငလျင်ကြောင့် ဖြစ်ပေါ်ခဲ့သည့် မြောက်များစွာသော ထိခိုက်ပျက်စီးမှုများကို ကူညီဆောင်ရွက်ရန် ဂျပန်အပြည်ပြည်ဆိုင်ရာ ပူးပေါင်းဆောင်ရွက်ရေးအေဂျင်စီ (JICA) မှတစ်ဆင့် သဘာဝဘေးအန္တရာယ် ကူညီကယ်ဆယ်ရေးဆိုင်ရာ ကျွမ်းကျင်ပညာရှင်များအဖွဲ့ကို ကနဦးအနေဖြင့် မြန်မာနိုင်ငံသို့စေလွှတ်ရန် (၂၀၂၅) ခုနှစ် မတ်လ (၃၀) ရက်နေ့တွင် ဂျပန်နိုင်ငံအစိုးရက ဆုံးဖြတ်ခဲ့ပါတယ်။
သက်ဆိုင်ရာ JICA ဝန်ထမ်းနှင့် ဆေးဘက်ဆိုင်ရာပညာရှင်များအပါအဝင် အဖွဲ့ဝင် ၅ ဦးပါဝင်သော အဆိုပါအဖွဲ့ သည် လက်ရှိမြေပြင်အခြေအနေ လိုအပ်ချက်များနှင့် လုံခြုံရေးအခြေအနေများကို ကြည့်ရှုသုံးသပ်ပြီးနောက် သဘာဝဘေးအန္တရာယ်ဆိုင်ရာ အရေးပေါ်ကယ်ဆယ်ရေးအဖွဲ့ (JDR) ကို စေလွှတ်ရေးအတွက် ညှိနှိုင်းဆောင်ရွက်မှုများ လုပ်ဆောင်သွားမယ်လို့ ဆိုပါတယ်။
ထို့အပြင် ဂျပန်အစိုးရသည် ငလျင်ဒဏ်သင့်ပြည်သူများအတွက် အခြေခံလိုအပ်သော ပစ္စည်းများအပါအဝင် အရေးပေါ် ကူညီကယ်ဆယ်ရေးဆိုင်ရာပစ္စည်းများကို JICA မှတစ်ဆင့် ထောက်ပံ့ပေးအပ်ရန် ဆုံးဖြတ်ခဲ့တယ်လို့ သိရှိရပါတယ်။
========================
📌📌 ၄။ ကုလသမဂ္ဂနှင့် မိတ်ဖက်အဖွဲ့အစည်းများမှ အသက်ကယ်တုံ့ပြန်ဆောင်ရွက်မှုများအတွက် ကနဦးငွေ ဒေါ်လာ (၁၅) သန်းကို စုပေါင်း ထည့်ဝင်
ကုလသမဂ္ဂအဖွဲ့များနှင့် လူသားချင်းစာနာထောက်ထားရေးဆိုင်ရာ မိတ်ဖက်အဖွဲ့အစည်းများသည် အသက်ကယ် တုံ့ပြန်ဆောင်ရွက်မှုများအတွက် ကနဦးငွေ ဒေါ်လာ (၁၅) သန်းကို စုပေါင်း ထည့်ဝင်ထားခဲ့တယ်လို့ UN Myanmar က အသိပေးထုတ်ပြန်ပါတယ်။
"ဤကြေကွဲဖွယ်အဖြစ်အပျက်ကြောင့် ထိခိုက်ခံစားရသူအားလုံးနှင့်အတူ ကျွန်တော်တို့ တသားတည်း ရှိနေပါတယ်။ စာနာဂရုဏာသက်မိပါတယ်" လို့ ကုလသမဂ္ဂဌာနေ ညှိနှိုင်းရေးမှူးနှင့် လူသားချင်းစာနာမှုဆိုင်ရာ ညှိနှိုင်းရေးမှူး (ယာယီ) မစ္စတာ မာကိုလူဂျီ ကော်စီက ဆိုပါတယ်။
ကုလသမဂ္ဂအဖွဲ့များနှင့် လူသားချင်းစာနာ ထောက်ထားရေးဆိုင်ရာ မိတ်ဖက်အဖွဲ့အစည်းများသည် အသက်ကယ် တုံ့ပြန်ဆောင်ရွက်မှုများအတွက် ကနဦးငွေ ဒေါ်လာ ၁၅ သန်းကို စုပေါင်း ထည့်ဝင်ထားခဲ့ပြီး အရေးပေါ်သုံးပစ္စည်းများကို စုစည်းထားရှိခဲ့တယ်လို့ဆိုပါတယ်။
၎င်းတို့ကို အရေးပေါ် ဆေးဘက်ဆိုင်ရာအဖွဲ့များ၊ ခိုလှုံစရာ ပစ္စည်းများ၊ အရေးပါသည့် တကိုယ်ရေသုံးပစ္စည်းများနှင့် စားနပ်ရိက္ခာ အထောက်အပံ့တို့အတွက် ခွဲဝေသုံးစွဲနေတယ်လို့ အသိပေးပါတယ်။
ဒါ့အပြင် မန္တလေးနဲ့ အနီးတဝိုက်ဒေသတွေမှာ သိသာထင်ရှားစွာ ရှိနေပြီး ထောက်ပံ့ပို့ဆောင်ရေးဆိုင်ရာ အခက်အခဲများရှိနေပေမယ့်လည်း အကူအညီလိုအပ်နေသူများထံ ရောက်ရှိဖို့ အကောင်းဆုံး ကြိုးစားလျက်ရှိတယ်လို့လည်း UN Myanmar ကဖော်ပြပါတယ်။
"ရှေ့လာမယ့် ရက်သတ္တပတ်တွေမှာ အကူအညီ အများကြီး ပိုလိုအပ်လာမှာပါ။ မြန်မာပြည်သူတွေသည် နိုင်ငံတကာ အသိုင်းအဝန်းတစ်ခုလုံး၏ ခိုင်မာသော ထောက်ပံ့ကူညီမှုကို အခုလက်ငင်းကို လိုအပ်နေတာ ဖြစ်ပါတယ်"လို့ မစ္စတာကော်စီမှ ထပ်လောင်းပြောကြားထားပါတယ်။
ကုလသမဂ္ဂအနေဖြင့်လည်း လူသားချင်းစာနာထောက်ထားရေးယာဉ်တန်းများ၊ ဆေးဘက်ဆိုင်ရာ ဝန်ထမ်းများနှင့် အကဲဖြတ်ရေးဆိုင်ရာအဖွဲ့များအား မည်သည့် နေရာဒေသ သို့မဟုတ် ထိန်းချုပ်မှုများမရှိဘဲ ဘေးဒဏ်သင့်သည့် ဒေသများသို့ အတားအဆီးမရှိ သွားရောက်နိုင်ရေးအတွက် တောင်းဆိုတယ်လို့ ဆိုပါတယ်။
========================
📌📌 ၅။ အင်ဒိုနီးရှားက မြန်မာငလျင်ဘေးသင့်ပြည်သူတွေကို ကူညီဖို့ စေလွှတ်
အင်ဒိုနီးရှား လေတပ်တပ်ဖွဲ့ဝင်များနှင့် National Mitigation Agency တာဝန်ရှိသူများက မြန်မာနိုင်ငံရှိ ငလျင်ဘေးသင့်များအတွက် လူသားချင်းစာနာမှုအကူအညီများကို ဂျာကာတာမြို့ Halim Perdanakusuma လေတပ်အခြေစိုက်စခန်းရှိ Hercules C-130 သယ်ယူပို့ဆောင်ရေးလေယာဉ်မှာ မတ်လ (၃၁) ရက်က ထည့်သွင်းပြင်ဆင်ခဲ့ကြတယ်လို့ သတင်းရရှိပါတယ်။
ကယ်ဆယ်ရေးအဖွဲ့ Indonesian Search and Rescue Team (INASAR) ဟာ ဧပြီလ (၁) ရက်နေ့မှာ မြန်မာနိုင်ငံကို စတင်ထွက်ခွာမှာဖြစ်ပြီး အကူအညီပစ္စည်းတွေကို ဧပြီလ (၃) ရက်နေ့မှာ ပို့ဆောင်မှာ ဖြစ်တယ်လို့ အင်ဒိုနီးရှား နိုင်ငံခြားရေးဝန်ကြီးက ပြောကြားထားပါတယ်။
========================
📌📌 ၆။ လူသားချင်း စာနာထောက်ထားသောအားဖြင့် ကောင်းကင်ကနေ ဗုံးကြဲတိုက်ခိုက်မှုတွေကို ရပ်ပေးတန့်ပေးဖို့ ကိုထိန်လင်း မေတ္တာရပ်ခံစကားဆို
လူသားချင်း စာနာထောက်ထားသောအားဖြင့် ကောင်းကင်ကနေ ဗုံးကြဲတိုက်ခိုက်မှုတွေကို ရပ်ပေးတန့်ပေးဖို့ ဒေါ်အောင်ဆန်းစုကြည်ရဲ့သားငယ် ကိုထိန်လင်းက မတ်လ (၃၁) ရက်မှာ မေတ္တာရပ်ခံစကား ဆိုလိုက်ပါတယ်။
"ကျွန်တော် ဒီနေ့ Fort Wayne က မြန်မာနွယ်ဖွား မိသားစုများနဲ့တွေ့ဆုံခဲ့တယ်။ ကျွန်တော်တို့အားလုံး မြန်မာပြည်သူတွေနဲ့ထပ်တူ ဝမ်းနည်း စိတ်မကောင်းဖြစ်နေကြတယ်။ ငလျင်ဒဏ်ကြောင့် အသက်ဆုံးရှုံးသွားသူတွေ၊ ကူရာမဲ့ ကယ်ရာမဲ့ ဖြစ်နေသူတွေ၊ အုတ်ပုံတွေ အပျက်အဆီးတွေကြား အသက်ရှင်ဖို့ ကြိုးစားနေသူတွေ၊ သူတို့တွေအတွက် ဝမ်းနည်းကြေကွဲရပါတယ်။ ကြောက်မက်စရာ ငလျင်ဒဏ်ကြောင့် ဒုက္ခရောက်နေသူတွေကို ကယ်ဆယ်ဖို့ ကြိုးစားနေချိန်မှာ တဖက်မှာလည်း ပြည်သူတွေကို စစ်တပ်က ဗုံးတွေကြဲပြီး တိုက်ခိုက်နေတယ်ဆိုတာကို မီဒီယာတွေက အချိန်နဲ့တပြေးညီ သတင်းပေးနေတယ်။ အင်မတန် လူမဆန်တဲ့ လုပ်ရပ်ပါပဲ။ စစ်တပ်ကို ကျွန်တော် မေတ္တာရပ်ခံပါတယ်။ လူသားချင်း စာနာထောက်ထားသောအားဖြင့် အခုအချိန်မှာ ကောင်းကင်ကနေ ဗုံးကြဲတိုက်ခိုက်မှုတွေကို ရပ်ပေးပါ။ နိုင်ငံတကာနဲ့ အဖွဲ့အစည်းပေါင်းစုံက အကူအညီတွေကို ပိတ်ဆို့တားဆီးနေမှုကို ရပ်ပေးပါ" လို့ ကိုထိန်လင်းက ဆိုပါတယ်။
မြန်မာနွယ်ဖွား မိသားစုတွေ ထည့်ဝင်တဲ့ အလှူငွေတွေကို Aid to Burma က ငလျင်ဒဏ်ကြောင့် ဒုက္ခရောက်သူတွေအတွက် ကူညီဖို့ သုံးစွဲသွားမှာဖြစ်ပြီးတော့ ယခုအချိန်ဟာ ပြည်သူတွေရဲ့ အသက်ကို ကယ်ရမယ့်အချိန်ဖြစ်တယ်လို့ ကိုထိန်လင်းက ဆိုပါတယ်။
စစ်ကောင်စီက မတ်လ (၂၈) နေ့မှ (၃၀) ရက်နေ့အထိ လေကြောင်းက ဗုံးကြဲတိုက်ခိုက်မှုအကြိမ်ရေ (၁၁) ကြိမ်ပြုလုပ်ခဲ့ပြီး အပြစ်မဲ့ပြည်သူ (၁၀) ဦး သေဆုံးခဲ့ရပါတယ်။
========================
📌📌 ၇။ "မြေငလျင် သဘာဝဘေး၊ ထောက်ပံ့စာနာ ကူညီပေး" ကမ်ပိန်းမှာ (၃) ရက်အတွင်း မြန်မာငွေကျပ် သိန်းပေါင်း (၈၀၀၀) ကျော်အထိ ရရှိခဲ့
ကမ်ပိန်းစတင်ပြီး (၃) ရက်အတွင်း ရရှိခဲ့သည့် သိန်းပေါင်း (၈၀၀၀) ကျော်ကို အချိန်နှင့်တပြေးညီ အကူအညီပေးနိုင်စေရန် SCF မှ အမြန်ဆုံးလွှဲပြောင်းပေးလျက်ရှိတယ်လို့ သတင်းထုတ်ပြန်ပါတယ်။
နိုင်ငံအရပ်ရပ်မှ Spring Development Bank ၊ အောင်လံလွှင့်ချီ နွေဦးထီ၊ Spring Crowd Fund - နွေဦးလူထုရန်ပုံငွေ အသုံးပြုသူ ပြည်တွင်းပြည်ပ ပြည်သူများ၏ စုပေါင်းပါဝင်မှုများကြောင့် "မြေငလျင် သဘာဝဘေး၊ ထောက်ပံ့စာနာ ကူညီပေး" ကမ်ပိန်းမှာ (၃) ရက်အတွင်း မြန်မာငွေကျပ် သိန်းပေါင်း (၈၀၀၀) ကျော်အထိ ရရှိပြီး နောက်ထပ်လည်း ဆက်တိုက်ပါဝင်လှူဒါန်းပေးနေကြတဲ့အတွက် ပြည်သူများအားလုံးကို ကျေးဇူးအထူးတင်ရှိကြောင်း ဆိုပါတယ်။
ရရှိထောက်ပံ့ငွေများကို ငလျင်ဘေးသင့်ဒေသများအတွက် အမြန်ဆုံးကူညီနိုင်အောင် ပထမအကြိမ်အဖြစ် သိန်း (၂၀၀၀) ကျပ်တိတိ၊ ဒုတိယအကြီမ်အဖြစ် သိန်း (၂၅၀၀) ကျပ်တိတိ၊ တတိယအကြိမ်အဖြစ် သိန်း (၂၇၀၀) ကျပ်တိတိတို့ကို Ministry of Humanitarian Affairs and Disaster Management - NUG သို့ အောင်မြင်စွာလွှဲပြောင်းပေးလိုက်နိုင်ပြီးဖြစ်တယ်လို့ ဖော်ပြပါတယ်။
ဆက်လက်၍လည်း ဧပြီလ (၁၁) ရက်နေ့အထိ SCF တွင် စိတ်ချယုံကြည်စွာ ဝိုင်းဝန်းပေးပို့ လှူဒါန်းနိုင်တယ်လို့လည်း အသိပေးကြေညာထားပါတယ်။
========================
📌📌 ၈။ သဘာဝဘေး ဒဏ်သင့်ပြည်သူများနှင့်အတူ အခက်အခဲများ ရင်ဆိုင်ကျော်ဖြတ်နိုင်ရန် TCSOs မှ သိန်း (၂၂၀) ကျပ် မတည်လှူဒါန်းသွားမည်
သဘာဝဘေး ဒဏ်သင့်ပြည်သူများနှင့်အတူ အခက်အခဲများ ရင်ဆိုင်ကျော်ဖြတ်နိုင်ရန် တအာင်းအရပ်ဖက်အဖွဲ့အစည်း - TCSOs အနေဖြင့် ငလျင်ဘေးဒဏ်သင့်ပြည်သူများအတွက် အလှူငွေ သိန်း (၂၂၀) ကျပ် မတည်လှူဒါန်းသွားမည်ဖြစ်ကြောင်း သိရပါတယ်။
အင်အားပြင်းငလျင်ဒဏ်ကြောင့် ပြည်သူလူထု ထိခိုက်နစ်နာ ဆုံးရှုံးမှုအပေါ် တအာင်းအရပ်ဖက်အဖွဲ့အစည်းများမှ ဝိုင်းဝန်းကူညီထောက်ပံ့မည့်အစီအစဉ် ထုတ်ပြန်ချက်မှာ အခုလို ဖော်ပြထားတာ ဖြစ်ပါတယ်။
လူသားချင်းစာနာထောက်ထားမှုအနေဖြင့် သဘာဝဘေး ဒဏ်သင့်ပြည်သူများနှင့်အတူ အခက်အခဲများ ရင်ဆိုင်ကျော်ဖြတ်နိုင်ရန် တအာင်းအရပ်ဖက်အဖွဲ့အစည်း - TCSOs အနေဖြင့် ငလျင်ဘေးဒဏ်သင့်ပြည်သူများအတွက် အလှူငွေ သိန်း (၂၂၀) ကျပ် မတည်လှူဒါန်းသွားမယ်လို့ ဖော်ပြထားပါတယ်။
ဒါ့အပြင်တအာင်းဒေသရှိ နမ့်ခမ်း၊ ကွတ်ခိုင်၊ နမ့်ဆန်၊ ကျောက်မဲ၊ မိုးကုတ်နှင့် နမ္မတူမြို့နယ် (၆) မြို့နယ်တို့တွင် အလှူခံဌာန ဖွင့်လှစ်သွားမည်ဖြစ်ပြီး ပြည်တွင်း၊ ပြည်ပ အလှူရှင်များ၊ မဟာမိတ်အဖွဲ့အစည်းများ တက်စွမ်းသလောက် တအာင်းအရပ်ဖက်အဖွဲ့အစည်း - TCSOs နှင့်အတူ လက်တွဲကာ “ပြည်သူမှ ပြည်သူသို့ People to People” ဖြင့် ပါဝင်လှူဒါန်းပေးကြပါရန် တိုက်တွန်းနှိုးဆော် အသိပေးထားပါတယ်။
အခုတင်ပြခဲ့တဲ့ သတင်းတွေကို Radio NUG သတင်းထောက် မင်းသီဟန်နဲ့ မင်းစစ်သွေးတို့က ပေးပို့ထားတာ ဖြစ်ပါတယ်။
========================
========================
🚩🚩 ၁။ ငလျင်ဒဏ်ကြောင့် ပြည်သူလူထု ကပ်ဘေးကြုံနေရချိန်မှာ နောင်ချိုမြို့ကို စစ်ကောင်စီ ဗုံးကြဲတိုက်ခိုက်
မြန်မာနိုင်ငံမှာ ပြည်သူလူထုများ ငလျင်ဒဏ်ကြောင့် ကပ်ဘေးအန္တရာယ် ကြုံနေရချိန်မှာ ရှမ်းပြည်နယ်မြောက်ပိုင်း၊ TNLA ထိန်းချုပ်နယ်မြေ၊ နောင်ချို မြို့နယ်ကို စစ်ကောင်စီက ဒရုန်းဖြင့် လာရောက်ဗုံးကြဲ တိုက်ခိုက်ခဲ့တယ်လို့ PSLF/ TNLA က ထုတ်ပြန်ထားပါတယ်။
မတ်လ (၃၁) ရက်နေ့ မနက် (၁၀း၁၀) နာရီခန့်မှာ စစ်ကောင်စီက (၁၂၀) မမ ဗုံးသီး သယ်ဆောင်လာတဲ့ ဒရုန်းဖြင့် ကျောက်ကြမ်းကျေးရွာကို လာရောက်ဗုံးကြဲ တိုက်ခိုက်ခဲ့တာဖြစ်ပါတယ်။
အလားတူ ငလျင်လှုပ်ခတ်ခဲ့သည့် မတ်လ (၂၈) ရက်နေ့ နေ့လည် (၁း၀၅) နာရီခန့်မှာလည်း နောင်ချိုမြို့နယ်၊ နောင်လင်ကျေးရွာကို ဂျက်ဖိုက်တာဖြင့် ပေါင် (၂၅၀) ဗုံး (၂) လုံး လာရောက်ကြဲချ တိုက်ခိုက်ခဲ့ရာ စာသင်ကျောင်း (၂) ကျောင်းနဲ့ ဒေသခံနေအိမ် (၃) လုံး ထိမှန်ပျက်စီးခဲ့ရတယ်လို့ သိရပါတယ်။
စစ်ကောင်စီက ငလျင်လှုပ်ခတ်ပြီးနောက် မတ်လ (၃၁) ရက်နေ့ ကနေ ဧပြီလ (၆) ရက်နေ့အထိ နိုင်ငံတော်အဆင့် ဝမ်းနည်းခြင်း အထိမ်းအမှတ်နေ့ရက်အဖြစ် သတ်မှတ်ကြေညာထားပေမယ့် အရပ်သားပြည်သူများကို ပစ်မှတ်ထား ဗုံးကြဲတိုက်ခိုက်မှုများကိုတော့ ဆက်လက်လုပ်ဆောင်နေတာ ဖြစ်ပါတယ်။
========================
🚩🚩 ၂။ ငလျင်ဒဏ် ခံခဲ့ရတဲ့ ရွာသစ်ကုန်း ကျေးရွာကို စစ်ကောင်စီက ဗုံးကြဲခဲ့ပြီး မီးရှို့ဖျက်ဆီး
မကွေးတိုင်း၊ ပေါက်မြို့နယ်ထဲက ငလျင်ဒဏ်ခံရတဲ့ ရွာသစ်ကုန်းကျေးရွာကို စစ်ကောင်စီက ဗုံးကြဲခဲ့ပြီး မြေပြင်စစ်ကြောင်းကလည်း ဝင်ရောက်မီးရှို့ ဖျက်ဆီးခဲ့တယ်လို့ သိရပါတယ်။
မတ်လ (၃၀) ရက်နေ့ မနက် (၁၀း၃၀) နာရီဝန်းကျင်မှာ စစ်ရဟတ်ယာဉ်ဖြင့် ဗုံးကြဲသွားခဲ့တာဖြစ်ပြီး မြေပြင် စစ်ကြောင်းကလည်း လူနေအိမ်တွေကို မီးရှို့ဖျက်ဆီးခဲ့တယ်လို့ ဒေသခံတွေက ဆိုပါတယ်။
ဗုံးကြဲတိုက်ခိုက်ပြီး မီးရှို့ဖျက်ဆီးခံရတာကြောင့် အိမ်ခြေ (၁၀၀) နီးပါးသာရှိတဲ့ ရွာသစ်ကုန်းကျေးရွာက လူနေအိမ် အားလုံး ပျက်စီးခဲ့ရသလို မတ်လ (၂၈) ရက် ငလျင်လှုပ်ခတ်စဉ်ကလည်း ရွာဦးဘုန်းတော်ကြီး ပရဟိတကျောင်းနဲ့ လူနေအိမ်တချို့ ထိခိုက်ပျက်စီးခဲ့တယ်လို့ သိရပါတယ်။
မတ်လ (၃၀) ရက် ညနေပိုင်းအထိ ရွာသစ်ကုန်းကျေးရွာအနီးမှာ စစ်ကောင်စီစစ်ကြောင်း ရှိနေသေးပြီး ငလျင်ဒဏ်နဲ့ စစ်မိစ္ဆာတွေကြောင့် ထွက်ပြေးတိမ်းရှောင်နေကြရတဲ့ ဒေသခံတွေအတွက် အကူအညီ အရေးပေါ် လိုအပ်နေတယ်လို့ ရွာသစ်ကုန်းကျေးရွာ၊ အောင်ချမ်းသာကျောင်းတိုက်၊ ဖြူစင်မေတ္တာ မိဘမဲ့ကျောင်း ဆရာတော် ဦးသုဇနက DVB သတင်းဌာနမှတဆင့် မေတ္တာရပ်ခံထားပါတယ်။
ထို့အပြင် မတ်လ (၃၁) ရက်နေ့ မနက် (၆း၀၀) နာရီခန့်မှာ စလင်းမြို့နယ်၊ တညောင် ရွာထိပ်ကို လေကြောင်း တိုက်ခိုက်မှု (၈) ကြိမ်ခန့် လုပ်ဆောင်သွားခဲ့သေးတယ်လို့ သိရပါတယ်။
========================
🚩🚩 ၃။ "မြန်မာစစ်ကောင်စီဟာ နိုင်ငံတစ်ဝန်းက ဒေသအတော်များများမှာ လေကြောင်းကနေ တိုက်ခိုက်နေတာကို ဘယ်လိုလုပ်ပြီး လုပ်ရက်ရတာလဲ"လို့ ထိုင်းလွှတ်တော်အမတ်ထောက်ပြ ပြောဆို
"မြန်မာစစ်ကောင်စီဟာ နိုင်ငံတစ်ဝန်းက ဒေသအတော်များများမှာ လေကြောင်းကနေ တိုက်ခိုက်နေတာကို ဘယ်လိုလုပ်ပြီး လုပ်ရက်ရတာလဲ" လို့ ထိုင်းနိုင်ငံက တရားမျှတရေးပါတီလွှတ်တော်အမတ် ကန်နာဝီ ဆစ်ဘ်ဆန်က ၄င်းရဲ့လူမှုကွန်ရက်မှာ အသေးစိတ်ရေးသားထားပြီး မြန်မာနိုင်ငံမှာရှိတဲ့ စစ်ပွဲတွေနဲ့ စစ်ရေးဆိုင်ရာ လှုပ်ရှားမှုတွေကို ချက်ချင်းရပ်ဖို့ တောင်းဆိုမှရလိမ့်မယ်လို့ ပြောထားပါတယ်။
"မြန်မာ၊ ထိုင်းနဲ့ တရုတ်နိုင်ငံတို့ရဲ့ အစိတ်အပိုင်းတချို့မှာ ကြီးမားတဲ့ ငလျင်ဒဏ်ကို ခံစားနေရသူတွေကို ကူညီနေချိန်မှာပဲ စစ်ကောင်စီဟာ နိုင်ငံတစ်ဝန်းက ဒေသအတော်များများမှာ လေကြောင်းကနေ တိုက်ခိုက်နေတာကို ဘယ်လိုလုပ်ပြီး လုပ်ရက်ရတာလဲ။ မြန်မာနိုင်ငံမှာ ငလျင်လှုပ်ပြီးကတည်းက စစ်ကောင်စီဟာ မကွေးတိုင်း၊ ကချင်ပြည်နယ်၊ ရှမ်းပြည်နယ်၊ ကယားပြည်နယ်၊ ကရင်ပြည်နယ်နဲ့ ပဲခူးတိုင်းတို့မှာ လေကြောင်းကနေ ပိုပြီး တိုက်ခိုက်နေတယ်လို့ သတင်းတွေ ဆက်တိုက်ထွက်နေပါတယ်။ မတ်လ ၂၈ ရက်နေ့ကစပြီး မနေ့ကအထိ တိုက်ခိုက်နေပြီး ဆက်ပြီး လုပ်လိမ့်မယ်လို့လည်း ခန့်မှန်းနေကြတယ်။ ဘာတွေဖြစ်နေတာလဲ။ ဒီလို ဆိုးရွားတဲ့ လူသားချင်းစာနာထောက်ထားမှုဆိုင်ရာ အခြေအနေမျိုးမှာ မြန်မာနိုင်ငံမှာရှိတဲ့ စစ်ပွဲတွေကို ချက်ချင်းရပ်ဖို့၊ စစ်ရေးဆိုင်ရာ လှုပ်ရှားမှုတွေကို ချက်ချင်းရပ်ဖို့ နည်းလမ်းပေါင်းစုံနဲ့၊ ပူးပေါင်းဆောင်ရွက်မှုတွေနဲ့ တောင်းဆိုရပါမယ်" လို့ ရေးသားထားပါတယ်။
မြန်မာနိုင်ငံမှာ ဖြစ်ပွားခဲ့တဲ့ ငလျင်ကြောင့် အရေးပေါ် အခြေအနေကို ကူညီဖို့ ထိုင်းနိုင်ငံက အဖွဲ့ကို စေလွှတ်ထားပြီးပြီဆိုပေမဲ့ ဒီအခွင့်အရေးကို အသုံးချပြီး မြန်မာစစ်တပ်ကို စစ်ဆင်ရေးတွေ ချက်ချင်းရပ်တန့်ဖို့ ပြောသင့်တယ်လို့ လွှတ်တော်အမတ် ကန်နာဝီ ဆစ်ဘ်ဆန်က ပြောပါတယ်။
========================
🚩🚩 ၄။ အင်အားပြင်းငလျင်ကြောင့် ပြည်သူများ သဘာဝဘေးဒုက္ခရောက်နေချိန်၌ပင် အကြမ်းဖက်စစ်အုပ်စုက တိုင်းဒေသကြီးသုံးခုနှင့် ပြည်နယ် (၄) ခုက နေရာများကို လေကြောင်းကနေ ဗုံးကြဲ
နိုင်ငံရေးအကျဉ်းသားများ ကူညီစောင့်ရှောက်ရေးအသင်း၏ စောင့်ကြည့်လေ့လာမှုများအရ မတ်လ (၂၈) ရက်၊ နေ့လယ်ပိုင်းတွင် လှုပ်ခတ်သည့် အင်အားပြင်းငလျင်ကြောင့် ပြည်သူများ သဘာဝဘေးဒုက္ခရောက်နေချိန်၌ပင် အကြမ်းဖက်စစ်အုပ်စုက စစ်ကိုင်းတိုင်း၌ ချောင်းဦးမြို့နယ်၊ ကချင်ပြည်နယ်၌ ဗန်းမော်မြို့နယ်၊ ရှမ်းပြည်နယ်၌ နောင်ချိုမြို့နယ်၊ မကွေးတိုင်း၌ ပေါက်မြို့နယ်၊ ရခိုင်ပြည်နယ်၌ ကျောက်ဖြူမြို့နယ်၊ ပဲခူးတိုင်း၌ ဖြူးမြို့နယ်တို့နှင့် ကရင်ပြည်နယ်တို့ကို လေကြောင်းတိုက်ခိုက်မှုများ အဆက်မပြတ် ပြုလုပ်ခဲ့တယ်လို့ သိရှိရပါတယ်။
လေကြောင်းတိုက်ခိုက်မှုကြောင့် လူနေအိမ်နှင့် ဆိုင်ခန်းများ ထိခိုက်ပျက်စီးခဲ့ပြီး အရပ်သားထိခိုက်မှုများလည်းရှိခဲ့သလို အချို့နေရာများတွင် တယ်လီဖုန်းလိုင်းနှင့် အင်တာနက်လိုင်းအခက်အခဲများကြောင့် မြေပြင်အခြေအနေမှာ စုံစမ်းရခက်ခဲနေဆဲဖြစ်ကြောင်း သိရပါတယ်။
ထို့အပြင် ငလျင်ဒဏ်သင့်ဒေသများရှိ အကျဉ်းထောင်များ၏ သက်ရောက်မှုအခြေအနေ၊ အကျဉ်းသားများ၏ ဘေးအန္တရာယ်ထိခိုက်မှု ကိစ္စရပ်များနှင့်ပတ်သက်၍လည်း စစ်အုပ်စုက တိကျသည့်သတင်းထုတ်ပြန်ချက်များ မပေးဘဲ သတင်းအမှောင်ချထားလျက်ရှိသဖြင့် အကျဉ်းသားများ၏ ဘေးကင်းလုံခြုံရေးအတွက် မိသားစုဝင်များက စိုးရိမ်လျက်ရှိနေတယ်လို့ သိရှိရပါတယ်။
========================
🚩🚩 ၅။ စစ်ကောင်စီက ဗန်းမော်နဲ့ လိုင်ဇာကို လေကြောင်းတိုက်ခိုက်မှု ပြုလုပ်ခဲ့ပြီး ထိုးစစ်အရှိန်မြှင့်နေ
ငလျင်ဘေးကြောင့် ပြည်သူလူထု ဒုက္ခကြုံနေချိန်မှာ တိုက်ပွဲအရှိန်လျော့ထားလိုပေမယ့် စစ်ကောင်စီက လိုင်ဇာနဲ့ ဗန်းမော်ကို လေကြောင်းတိုက်ခိုက်မှု ပြုလုပ်ခဲ့ကာ ထိုးစစ်အရှိန်မြှင့်နေတယ်လို့ KIA ပြန်ကြားရေး တာဝန်ခံ ဗိုလ်မှူးကြီး နော်ဘူက Mizzima သတင်းဌာနကို ပြောကြားခဲ့ကြောင်း သိရှိရပါတယ်။
မတ်လ (၃၀) ရက်နေ့က ဗန်းမော်မြို့ကို ဂျက်ဖိုက်တာဖြင့် ဗုံးကြဲတိုက်ခိုက်ခဲ့ပြီး ည (၁၁း၄၅) နာရီမှာ လိုင်ဇာမြို့အနီးကို အသေခံ ဒရုန်းများဖြင့် တိုက်ခိုက်ခဲ့တယ်လို့ ဗိုလ်မှူးကြီး နော်ဘူက ဆိုပါတယ်။
ထို့အပြင် ဝိုင်းမော်မြို အနီးမှာလည်း စစ်ကောင်စီရဲ့ ခလရ - ၅၈ တပ်ရင်းက မြေပြင်ထိုးစစ်ဆင်နေကာ တိုက်ပွဲအရှိန်မြှင့်နေတာကြောင့် ခုခံစစ်ပွဲတွေ ဖြစ်နေရတယ်လို့ ဆက်ပြောပါတယ်။
ငလျင်ဘေးကြောင့် ပြည်သူများထိခိုက်သေဆုံးမှုအတွက် ဝမ်းနည်းရပြီး ပြန်လည်ထူထောင်ရေးလုပ်ငန်းများနဲ့ လူသားချင်းစာနာထောက်ထားရေး အကူအညီများကို ကချင်လူထု တရပ်လုံးနဲ့အတူ တတ်နိုင်သမျှ ပံ့ပိုးကူညီသွားမယ်လို့ ကချင်လွတ်လပ်ရေးအဖွဲ့ (KIO) က မတ်လ (၃၀) ရက်နေ့မှာ ထုတ်ပြန်ထားပါတယ်။
ငလျင်ဘေးသင့် ပြည်သူများအား ကူညီကယ်ဆယ်ရေး ဆောင်ရွက်နိုင်ဖို့ မတ်လ (၃၀) ရက်မှ ဧပြီလ (၁၂) ရက်နေ့အထိ ထိုးစစ်ရပ်ထားမယ်လို့ အမျိုးသားညီညွတ်ရေးအစိုးရ (NUG) ကလည်း ထုတ်ပြန်ထားပေမယ့် စစ်ကောင်စီက မြေပြင်ထိုးစစ်များအပြင် လေကြောင်း တိုက်ခိုက်မှုများကိုပါ ဆက်လက်လုပ်ဆောင်နေတာပဲ ဖြစ်ပါတယ်။
========================
🚩🚩 ၆။ ကျောက်ဖြူမှာ စစ်ကောင်စီ လက်နက်ကြီးကြောင့် သံဃာ တပါးနဲ့ ပြည်သူတဦး သေဆုံး
ရခိုင်ပြည်နယ်၊ ကျောက်ဖြူမြို့နယ်၊ ဇင်ချောင်းကုန်ဘွေရွာကို စစ်ကောင်စီ ရေတပ်မှ လက်နက်ကြီးနဲ့ ပစ်ခတ်ခဲ့တာကြောင့် သံဃာ တပါးနဲ့ အရပ်သား ပြည်သူ တဦး သေဆုံးခဲ့တယ်လို့ Arakan Princess Media က ဖော်ပြထားပါတယ်။
မတ်လ (၃၁) ရက်နေ့ မနက် (၉) နာရီကျော်ခန့်မှာ မင်းရပ်တိုက်နယ်၊ ဝါးနက်ချွိန်ရွာအနီးမှာ ကျောက်ချထားတဲ့ စစ်ကောင်စီရဲ့ နေဗီ စစ်သင်္ဘော တစီးကနေ ဇင်ချောင်းကုန်ဘွေရွာကို လက်နက်ကြီး (၃) လုံး ပစ်ခတ်ခဲ့တာလို့ သိရပါတယ်။
လက်နက်ကြီး ကျရောက်ပေါက်ကွဲမှုကြောင့် သက်တော် (၃၂) နှစ်ရှိ အသျှင်အာဒိစ္စ နဲ့ အသက် (၃၀) ခန့်ရှိ ဦးဘဂျမ်းဆိုသူတို့ နှစ်ဦး သေဆုံးခဲ့ရပြီး ဆရာတော်ကြီး တပါးနဲ့ ကိုရင်တပါး အပါအဝင် ပြည်သူ (၇) ဦး ပြင်းထန်ဒဏ်ရာ ရရှိခဲ့ပါတယ်။
ထို့အပြင် ကျောက်ဖြူမြို့နယ်၊ ကုလဘာရွာကိုလည်း စစ်ကောင်စီက မတ်လ (၃၀) ရက်နေ့ညက ဒရုန်းနဲ့ ဗုံးကြဲတိုက်ခိုက်ခဲ့ပါသေးတယ်။
ညနေ (၇း၂၀) နာရီခန့်မှာ ဒရုန်း တစီးဖြင့် ဗုံး (၂) လုံး ကြဲချတိုက်ခိုက်ခဲ့တာဖြစ်ပြီး နေအိမ်နဲ့ ဆိုင်ခန်း တခန်း ပျက်စီးခဲ့ရပြီး အရပ်သား ထိခိုက်မှုတော့ မရှိခဲ့ဘူးလို့ သိရှိရပါတယ်။
========================
🚩🚩 ၇။ ငလျင်ဒဏ်သင့် ဒေသများတွင် ရွှေဘိုခရိုင် အမှတ် (၁၇) တပ်ရင်း နဲ့ အမှတ်(၁၂၂၂) တပ်ရင်း TRI ဗျုဟာတို့က လူသားချင်းစာနာတဲ့ အကူအညီများနဲ့ဆေးကုသပေးမှုတို့ လုပ်ဆောင်
ငလျင်ဒဏ်သင့် ဒေသများတွင် လူသားချင်းစာနာမှုဆိုင်ရာ လုပ်ငန်းများဖြစ်သည့် စားနပ်ရိက္ခာများ ဖြန့်ဝေပေးခြင်းကို ပြည်သူ့ကာကွယ်ရေးတပ်မတော် (PDF)၊ ရွှေဘိုခရိုင် အမှတ် (၁၇) တပ်ရင်းက ဆောင်ရွက်ခဲ့တယ်လို့ ကာကွယ်ရေးဝန်ကြီးဌာနက ထုတ်ပြန်ပါတယ်။
အလားတူ ငလျင်ဒဏ်သင့် ဒေသများတွင် ဆေးကုသပေးခြင်းအား ပြည်သူ့ကာကွယ်ရေးတပ်မတော် (PDF)၊ အမှတ် (၁၂၂၂) တပ်ရင်း TRI ဗျုဟာက လုပ်ဆောင်ခဲ့ကြတယ်လို့လည်း သတင်းရရှိပါတယ်။
========================
🚩🚩 ၈။ ငလျင်လှုပ်ခတ်မှုကြောင့် နေပြည်တော် စကစရဲ့ တပ်နယ်အတွင်းမှာ သေဆုံးသူ စုစုပေါင်း (၁၀၀) အထက်ရှိ
ငလျင်လှုပ်ခတ်မှုကြောင့် နေပြည်တော် စကစရဲ့တပ်နယ်အတွင်းမှာ သေဆုံးသူ စုစုပေါင်း (၁၀၀) အထက်ရှိတယ်လို့ CDM ဗိုလ်ကြီးဇင်ယော်ကအသိပေး ဆိုထားပါတယ်။
"နေပြည်တော် တပ်နယ်အတွင်းမှာ စုစုပေါင်း သေဆုံး (၁၀၀) အထက်မှာရှိပါတယ်။ ဒုချုပ်စိုးဝင်းရဲ့ ဒုတိယအရန်တပ်ဖြစ်တဲ့ ခမရ - ၃၀၃၊ သေဆုံး (၆) ယောက်၊ ဒဏ်ရာရ (စိုးရိမ်ရ) (၂၇) ယောက် ဖြစ်ပါတယ်။ မင်းအောင်လှိုင်ရဲ့ ကိုယ်ရံတော်တပ်ဖြစ်တဲ့ ခမရ - ၃၀၅ ကတော့ အုပ်ချုပ်မှုနဲ့ လူနေအဆောက်အဦးအားလုံး ပြိုကျပျက်စီးသွားတာကြောင့် အုပ်ချုပ်မှုရုံးလုပ်ငန်းတွေကို သစ်ပင်အောက်မှာ လုပ်ကိုင်ဆောင်ရွက်နေကြရပါတယ်" လို့ ဆိုထားပါတယ်။
ဒါ့အပြင် စစ်ရုံးချုပ်ရဲ့ နေရာ (၅၀) ရာခိုင်နှုန်းမှာ မြေကြီးပေါ်အိပ် မြေကြီးပေါ်စားရတဲ့ အခြေအနေကို ရောက်သွားနေပြီ ဖြစ်တယ်လို့ ဆိုပါတယ်။
စစ်တပ်အဆောက်အဦးအများစုနေ ပြည်တော်မှာ ပြိုကျရခြင်းမှာ ဘိလပ်မြေအတုကြောင့်ဖြစ်တယ်လို့လည်း ၄င်းက ဆိုထားပါတယ်။
အခုတင်ပြခဲ့တဲ့ သတင်းတွေကို Radio NUG သတင်းထောက် မင်းသီဟန်နဲ့ မင်းစစ်သွေးတို့က ပေးပို့ထားတာ ဖြစ်ပါတယ်။
No comments:
Post a Comment