၂၀၂၅ မတ်လ ၂၃ ရက်နေ့ မနက်ခင်း နောက်ဆုံးရပြည်တွင်းသတင်းများ
📌 ၁။ ပြည်ထောင်စု၀န်ကြီး ဒေါက်တာ၀င်းမြတ်အေးနှင့် ပြင်သစ်နိုင်ငံဆိုင်ရာကိုယ်စားလှယ် ဒေါ်နန်းဆုမွန်အောင်တို့မှ ပြင်သစ်နိုင်ငံခြားရေးဝန်ကြီးဌာန၊ အရှေ့တောင်အာရှဌာနမှူးနှင့် မြန်မာ၊ ထိုင်းတာဝန်ခံတို့နှင့် တွေ့ဆုံဆွေးနွေး
📌 ၂။ ၂၀၂၅ ခုနှစ်၊ အခြေခံပညာပြီးမြောက်ကြောင်း စစ်ဆေးအကဲဖြတ်ခြင်း (စနစ်သစ် ဒွါဒသမတန်း) ဖြေဆိုခွင့်လျှောက်ထားနည်းအဆင့်ဆင့် ထုတ်ပြန်
📌 ၃။ မင်းတပ်မြို့နယ်အတွင်း စစ်ကောင်စီလေကြောင်းပစ်ခတ်မှု၊ သဘာဝတောမီးလောင်ကျွမ်းမှုနှင့် လမ်းသွားလမ်းလာအချို့မှ ဖျက်စီးထားမှုကြောင့် မြို့အတွင်း ခေတ္တရေပြတ်လပ်
📌 ၄။ ဒီမော့ဆိုမှာ စစ်ရှောင် အမျိုးသမီးများအတွက် အခမဲ့ စက်ချုပ်သင်တန်း ဖွင့်လှစ်
========================
၂၀၂၅ ခုနှစ် မတ်လ ၂၃ ရက်နေ့ မနက်ပိုင်းမှာတင်ပြပေးမယ့် Radio NUG စစ်ရေးသတင်းကောက်နုတ်ချက်များ
🚩 ၁။ ပြည်သူတွေက ထိန်းကြောင်း ပဲ့ပြင်၊ အကြံပြု တိုင်ကြားပေးကြဖို့ MDY-PDF မေတ္တာရပ်ခံ ပန်ကြား
🚩 ၂။ တောင်ကုတ်-ပဲခူး ရိုးတိုက်ပွဲသို့ စစ်ကူလာသည့် ကပစ(၆)မှ စစ်ကားများ တိုက်ခိုက်ခံရ
🚩 ၃။ မြင်းခြံ၊ ဆုံရွာတွင် မီးပတ်ရှို့နေတဲ့ ပျူစောထီးများ မိုင်းဆွဲတိုက်ခိုက်ခံရပြီး ၁ ဦးသေဆုံး
🚩 ၄။ နှမ်းခါးကျေးရွာ ဆေးပေးခန်းကို စစ်ကောင်စီက ဗုံးကြဲခဲ့ရာ အရပ်သား ၁၀ ဦးထက်မနည်း သေဆုံး
🚩 ၅။ ပေါက်တောနဲ့ ပုဏ္ဏားကျွန်းကို စစ်ကောင်စီ ဗုံးကြဲတိုက်ခိုက်
🚩 ၆။ ဝက်လက်မြို့နယ်၊ စဉ့်ကိုင်ရွာကို စစ်တပ်က လေယာဉ်ဖြင့် ထပ်မံ ဗုံးကျဲ တိုက်ခိုက်ရာ ပြည်သူ ၃ ဦး ထိခိုက်
🚩 ၇။ မြင်းခြံ၊ ကံဆင့်ရွာမှာ စစ်ကောင်စီ လက်နက်ကြီးနဲ့ ဗုံးကြဲ တိုက်ခိုက်ခဲ့ရာ အမျိုးသား တစ်ဦး သေဆုံး
ဤသတင်းများကို ရေဒီယိုအန်ယူဂျီသတင်းတာဝန်ခံများနှင့် ခိုင်လုံသော မိတ်ဖက်သတင်းရင်းမြစ်များဆီမှ အခြေခံတင်ပြထားခြင်း ဖြစ်ပါတယ်။
========================
📌📌 ၁။ ပြည်ထောင်စု၀န်ကြီး ဒေါက်တာ၀င်းမြတ်အေးနှင့် ပြင်သစ်နိုင်ငံဆိုင်ရာကိုယ်စားလှယ် ဒေါ်နန်းဆုမွန်အောင်တို့မှ ပြင်သစ်နိုင်ငံခြားရေးဝန်ကြီးဌာန၊ အရှေ့တောင်အာရှဌာနမှူးနှင့် မြန်မာ၊ ထိုင်းတာဝန်ခံတို့နှင့် တွေ့ဆုံဆွေးနွေး
မတ် ၂၂
Radio NUG
အမျိုးသားညီညွတ်ရေးအစိုးရ၊ လူသားချင်းစာနာထောက်ထားရေးနှင့် ဘေးအန္တရာယ် ဆိုင်ရာစီမံခန့်ခွဲရေးဌာန ပြည်ထောင်စု၀န်ကြီး ဒေါက်တာ၀င်းမြတ်အေးနှင့် နိုင်ငံခြားရေး၀န်ကြီးဌာန၊ ပြင်သစ်နိုင်ငံဆိုင်ရာကိုယ်စားလှယ် ဒေါ်နန်းဆုမွန်အောင်တို့သည် ပြင်သစ်နိုင်ငံ၊ နိုင်ငံခြားရေးဝန်ကြီးဌာန၊ အရှေ့တောင်အာရှဌာနမှူး Ms. Mathilde Teruya နှင့် မြန်မာ၊ ထိုင်း တာဝန်ခံ Mr. Frédéric Inza တို့နှင့် တွေ့ဆုံဆွေးနွေးခဲ့ကြောင်း သတင်းရရှိပါတယ်။
အဆိုပါတွေ့ဆုံမှုတွင် လူသားစာနာအကူအညီများနှင့်ပတ်သက်၍ မြေပြင်လိုအပ်ချက်များ၊ အလိုအပ်ဆုံး ပြည်သူများထံသို့ အကူအညီများ ရောက်ရှိရေးကြိုးပမ်းမှုများ၊ နိုင်ငံတကာအဖွဲ့အစည်းများနှင့် မိတ်ဆွေနိုင်ငံများက ပြည်သူများထံ အကူအညီများ တိုက်ရိုက်ရောက်ရှိအောင် ပြောင်းလဲဆောင်ရွက်ပေးရန် နည်းလမ်းများကို အဓိကထား ဆွေးနွေးခဲ့ကြပြီး၊ မြန်မာ့နွေဦးတော်လှန်ရေး၏ လက်တွေ့ကျကျ ရှေ့ဆက်ရန်ရှိသော လမ်းပြမြေပုံကိုလည်း ရှင်းလင်းဆွေးနွေးခဲ့ကြတယ်လို့ သိရပါတယ်။
========================
📌📌 ၂။ ၂၀၂၅ ခုနှစ်၊ အခြေခံပညာပြီးမြောက်ကြောင်း စစ်ဆေးအကဲဖြတ်ခြင်း (စနစ်သစ် ဒွါဒသမတန်း) ဖြေဆိုခွင့်လျှောက်ထားနည်းအဆင့်ဆင့် ထုတ်ပြန်
မတ် ၂၂
Radio NUG
၂၀၂၅ ခုနှစ်၊ အခြေခံပညာပြီးမြောက်ကြောင်း စစ်ဆေးအကဲဖြတ်ခြင်း (စနစ်သစ် ဒွါဒသမတန်း) ကို ၂၀၂၅ ခုနှစ်၊ ဇွန်လတွင် ကျင်းပမည် ဖြစ်ပါသဖြင့် ဖြေဆိုခွင့်လျှောက်ထားခြင်းကို ၂၀၂၅ ခုနှစ်၊ မတ်လ (၂၂) ရက်နေ့မှ ဧပြီလ (၃၀) ရက်နေ့ အထိ mes.moeedu.org website တွင် လျှောက်ထားနိုင်ကြောင်း အမျိုးသားညီညွတ်ရေးအစိုးရ၊ ပညာရေးဝန်ကြီးဌာနမှ သတင်းထုတ်ပြန်ထားပါတယ်။
၂၀၂၅ ခုနှစ်၊ ဒီဇင်ဘာလ (၃၁) ရက်နေ့တွင် အသက် (၁၈) နှစ် ပြည့်မီသူ၊ အခြေခံပညာ ဒွါဒသမတန်း (စနစ်သစ်) သင်ယူလေ့လာဖူးသူ၊ အကြမ်းဖက်အာဏာသိမ်း စစ်အုပ်စုက ကျင်းပသော တက္ကသိုလ်ဝင်တန်း စာမေးပွဲများကို ဝင်ရောက်ဖြေဆိုခဲ့ခြင်း မရှိသူများနှင့် ဝင်ရောက်ဖြေဆိုရန် (လုံးဝ) အစီအစဉ်မရှိသော ကျောင်းသား၊ ကျောင်းသူများအတွက် ရည်ရွယ်ကျင်းပပေးခြင်းဖြစ်သဖြင့် ပြည်သူနှင့်အတူ ရပ်တည်သည့် အဆိုပါကျောင်းသား၊ ကျောင်းသူများသာ လျှောက်ထားခွင့်ရှိပြီး နယ်မြေစိုးမိုးမှုရရှိသော လွတ်မြောက်နယ်မြေဒေသများရှိ ပညာရေးအဖွဲ့အစည်းများ၏ သတ်မှတ်ချက်နှင့် ကိုက်ညီသော ကျောင်းသား၊ ကျောင်းသူများရှိပါက သက်ဆိုင်ရာ ပညာရေးအဖွဲ့အစည်းများမှတစ်ဆင့် လျှောက်ထားနိုင်တယ်လို့ သိရပါတယ်။
ဖြေဆိုခွင့်လျှောက်ထားနည်းများနှင့် ပတ်သက်ပြီး အခက်အခဲ ရှိပါက enquiry@be.moeedu.org နှင့် beca.info@be.moeedu.org ကို မေးလ်ပို့မေးမြန်းနိုင်တယ်လို့ ဖော်ပြထားပါတယ်။
========================
📌📌 ၃။ မင်းတပ်မြို့နယ်အတွင်း စစ်ကောင်စီလေကြောင်းပစ်ခတ်မှု၊ သဘာဝတောမီးလောင်ကျွမ်းမှုနှင့် လမ်းသွားလမ်းလာအချို့မှ ဖျက်စီးထားမှုကြောင့် မြို့အတွင်း ခေတ္တရေပြတ်လပ်
မတ် ၂၂
Radio NUG
မင်းတပ်မြို့နယ်အတွင်း စစ်ကောင်စီ၏ လေကြောင်း ပစ်ခတ်မှု၊ သဘာဝအလျောက်တောမီးလောင်ကျွမ်းမှုများကြောင့် မင်းတပ်-မတူပီ လမ်းတလျှောက်တွင် သွယ်တန်းထားသော ရေပိုက်လိုင်းများ ပျက်စီးလျက်ရှိကာ မြို့တွင်း၌ ခေတ္တရေပြတ်လပ်မှုများ ဖြစ်ပေါ်နေကြောင်း မင်းတပ်မြို့နယ် ပြည်သူ့အုပ်ချုပ်ရေးအဖွဲ့မှ သတင်းထုတ်ပြန်ထားပါတယ်။
ထို့အပြင် မြို့ပေါ်သို့ သွယ်တန်းထားသော ရေပိုက်လိုင်းများကို လမ်းသွား၊ လမ်းလာအချို့က ဓါး/ပုဆိန်တို့ဖြင့် ခုတ်ထစ်ကာ စည်းကမ်းမဲ့ ဖျက်ဆီးသည့် လက္ခဏာများလည်း တွေ့ရှိရတယ်လို့ ဖော်ပြထားပါတယ်။
ထို့ကြောင့် မြို့နယ်ပြည်သူ့အုပ်ချုပ်ရေး အဖွဲ့အနေဖြင့် ပျက်စီးသွားသည့် ရေပိုက်လိုင်းများ ပြုပြင်ကာ အမြန်ဆုံး ရေပြန်လည်ရရှိနိုင်ရန် ဆောင်ရွက်လျက်ရှိပြီး အများပြည်သူပိုင် ပစ္စည်းများအား အကြောင်းမဲ့ (စည်းကမ်းမဲ့စွာ) ဖျက်ဆီးခြင်းများ တွေ့ရှိပါက မြို့နယ်ပြည်သူ့အုပ်ချုပ်ရေးအဖွဲ့၏ စည်ပင်သာယာရေး နည်းဥပဒေ/လုပ်ထုံးလုပ်နည်းများအရ ထိရောက်စွာ အရေးယူ ဆောင်ရွက်သွားမှာဖြစ်တယ်လို့ အသိပေးထားပါတယ်။
ပြည်သူများအနေဖြင့် ရေပိုက်လိုင်း ဖျက်ဆီးသူများကို တွေ့ရှိပါက အုပ်ချုပ်ရေးအဖွဲ့ထံသို့ သတင်းပေးပို့ခြင်း၊ သတိပေးခြင်းနှင့် ရေပိုက်လိုင်းများအား ကိုယ်တိုင်ထိန်းသိမ်းကြပ်မတ်ပေးခြင်းဖြင့် ပူးပေါင်းပါဝင်ပေးကြပါရန် မေတ္တာရပ်ခံထားပါတယ်။
ရေပိုက်လိုင်းများ ပြန်လည်ပြုပြင်ထိန်းသိမ်းရန်အတွက် ပြည်တွင်း/ပြည်ပအကူအညီများ လိုအပ်လျက်ရှိပြီး ရေပိုက်လိုင်းသွယ်တန်းရေး အလှူများကိုလည်း ကြိုဆို လက်ခံလျက်ရှိကြောင်း အသိပေးထားပါတယ်။
========================
📌📌 ၄။ ဒီမော့ဆိုမှာ စစ်ရှောင် အမျိုးသမီးများအတွက် အခမဲ့ စက်ချုပ်သင်တန်း ဖွင့်လှစ်
မတ်လ ၂၂
Radio NUG
ကရင်နီပြည်၊ ဒီမော့ဆို အနောက်ဘက်ခြမ်း တနေရာမှာ စစ်ဘေးရှောင် အမျိုးသမီးများအတွက် အခမဲ့ စက်ချုပ်သင်တန်း ဖွင့်လှစ်ထားတယ်လို့ Karenni People Voice က ဖော်ပြထားပါတယ်။
အဆိုပါ သင်တန်းကို စစ်ရှောင် အမျိုးသမီးများ အလုပ်အကိုင် အခွင့်အလမ်း ရရှိစေရန် ရည်ရွယ်ကာ အခမဲ့ သင်ကြားပေးမှာဖြစ်ပြီး သင်တန်းကာလ ၂ လတာ ကြာမြင့်မှာ ဖြစ်တယ်လို့ ဆိုပါတယ်။
လက်ရှိ သင်တန်းမှာ သင်တန်းသူ ၁၃ ဦး ရှိနေပြီး သင်တန်းအတွက် အသုံးပြုနိုင်ဖို့ ပိတ်စနဲ့ စက္ကူစများ လိုအပ်နေတယ်လို့ သင်တန်းဦးဆောင်သူ ဒေါ်မီးမီးခမ်းက ပြောပါတယ်။
ဒီမော့ဆို အနောက်ခြမ်းမှာ စစ်ရှောင်ဦးရေ ၅၀,၀၀၀ နီးပါးရှိကာ အလုပ်အကိုင် အခွင့်အလမ်း ရှားပါးမှုကြောင့် စားဝတ်နေရေး အခက်အခဲများ ကြုံတွေ့နေကြရတယ်လို့ သိရပါတယ်။
အခုတင်ပြခဲ့တဲ့ သတင်းတွေကို Radio NUG သတင်းထောက် မင်းစစ်သွေးနဲ့ ခါးရှဲလ်တို့က ပေးပို့ထားတာ ဖြစ်ပါတယ်။
========================
========================
🚩🚩 ၁။ ပြည်သူတွေက ထိန်းကြောင်း ပဲ့ပြင်၊ အကြံပြု တိုင်ကြားပေးကြဖို့ MDY-PDF မေတ္တာရပ်ခံ ပန်ကြား
မတ်လ ၂၂
Radio NUG
အမျိုးသားညီညွတ်ရေး အစိုးရ၊ ကာကွယ်ရေး ဝန်ကြီးဌာနရဲ့ ကွပ်ကဲမှုအောက်က ပြည်သူ့ကာကွယ်ရေး တပ်မတော် (မန္တလေး) အား ပြည်သူလူထုက လိုအပ်သလို ပဲ့ပြင်ထိန်းကြောင်း အကြံပြု တိုင်ကြားပေးကြဖို့ MDY-PDF မေတ္တာရပ်ခံ ပန်ကြားထားပါတယ်။
MDY-PDF အနေဖြင့် အာဏာရှင်စနစ်ရဲ့ တွန်းပို့မှုကြောင့် လက်နက်ကိုင် လမ်းစဉ်ကို ရွေးချယ်ခဲ့ရပြီး ဈေးကြီးမှန်း အရင်းအနှီးကြီးမှန်း ဘေးထွက်ဆိုးကျိုးများမှန်း နားလည်ကြပြီးသား ဖြစ်ပေမယ့် ဖက်စစ် အာဏာရူးကို ဒီလိုမှ မတွန်းလှန်ရင် တိုင်းပြည်နဲ့ လူထုအတွက် ပိုမိုဆိုးရွား နစ်နာမှာကို သိလို့သာလျှင် ဒီလမ်းစဉ်ကို ရွေးချယ်ခဲ့တာလို့ ဆိုပါတယ်။
လောကီလူသားတွေပဲ ဖြစ်တာကြောင့် အခြေအနေ ဖန်တီးလာရင် ဖောက်လွဲဖောက်ပြန် ဖြစ်တက်ကာ ရာထူး၊ အာဏာ၊ ငွေကြေး၊ လုပ်ပိုင်ခွင့် အထူးသဖြင့် လက်နက်က ရရှိလာတဲ့ ရာထူး၊ အာဏာက လူကို (တော်လှန်ရေး သမားတွေကို) ဖောက်ပြန်စေတတ်တယ်လို့ ဖော်ပြပါတယ်။
ပြည်သူလူထုအနေဖြင့် ပြည်သူကြားက ပေါက်ဖွားလာတဲ့ PDF သားသမီးများကို လိုအပ်သလို ပဲ့ပြင်၊ ထိန်းကြောင်းပေးကြဖို့ အရေးကြီးကြောင်း MDY-PDF အနေနဲ့ “ပြည်သူသာ အမိ ပြည်သူသာ အဖ” မူကို ကိုင်ဆွဲထားတာကြောင့် လူထုရဲ့ ထိန်းကျောင်း၊ လမ်းညွှန်မှုကို တန်ဖိုးထား လေးစားလိုက်နာကြဖို့ လိုတယ်လို့ ဆိုပါတယ်။
MDY-PDF တပ်ဖွဲ့ဝင် တစ်ဦးဦးဖြစ်စေ၊ တပ်ရင်း၊ တပ်ဖွဲ့၊ ဌာန တစ်ခုခုကဖြစ်စေ စစ်သည်တော် ကျင့်ဝတ် စည်းကမ်းတွေ၊ တပ်ဖွဲ့က ချမှတ်ထားတဲ့ စည်းမျဉ်းစည်းကမ်းတွေကို ကျူးလွန်ချိုးဖောက်နေတာကို မြင်ခဲ့ ကြုံခဲ့ ကြားခဲ့ပါက တိုင်ကြားပေးကြဖို့ ဖိတ်ခေါ် ပန်ကြား ထားပါတယ်။
တိုင်တန်းရာမှာလည်း လိုအပ်တဲ့ စုံစမ်းစစ်ဆေး အရေးယူမှုများ ဆက်လက်ဆောင်ရွက်နိုင်ရန်အတွက် လိုအပ်တဲ့ သက်သေ သက္ကာယ၊ အထောက်အထား၊ အချက်အလက်တွေကို တတ်နိုင်သမျှ ကူညီပေးဖို့နဲ့ လိုအပ်လာရင် ပူးပေါင်းပါဝင်ပေးကြဖို့လည်း MDY-PDF က မေတ္တာရပ်ခံပါတယ်။
MDY-PDF ကို တိုင်ကြား၊ လမ်းညွန်၊ အကြံပြုလိုတာများ ရှိပါက - စစ်ဂနယ်၊ တယ်လီဂရမ်၊ အီးမေးလ်တို့နဲ့ တပ်ဖွဲ့ရဲ့ Facebook စာမျက်နှာတို့ကနေ ဆက်သွယ်နိုင်တယ်လို့ အသိပေးထားပါတယ်။
========================
🚩🚩 ၂။ တောင်ကုတ်-ပဲခူး ရိုးတိုက်ပွဲသို့ စစ်ကူလာသည့် ကပစ(၆)မှ စစ်ကားများ တိုက်ခိုက်ခံရ
မတ် ၂၂
Radio NUG
မတ်လ ၂၂ ရက်နေ့ မနက်ပိုင်းတွင် တောင်ကုတ်မြို့နယ်နှင့် ပဲခူးတိုင်းဒေသကြီးကို ဆက်သွယ်ထားသည့် ရိုးတိုက်ပွဲသို့ စစ်ကူလာသည့် ကပစ (၆)မှ စစ်ကားများကို အာရက္ခတပ်တော် (AA) ဦးဆောင်သည့် တော်လှန်ရေးတပ်ဖွဲ့၏ လက်နက်ကြီးပစ်ခတ်တိုက်ခိုက်ခဲ့ကြောင်း နိရဉ္စရာသတင်းဌာနမှ ဖော်ပြထားပါတယ်။
စစ်ကားတချို့မီးလောင်ပျက်စီးပြီး စစ်ကောင်စီတပ်ဖွဲ့ဝင်တချို့ဒဏ်ရာရ သေဆုံးသူများ ရှိတယ်လို့ သိရပါတယ်။
စစ်ကောင်စီကလည်း တိုက်ပွဲဖြစ်ပွားနေသည့် ညောင်ကျိုးနှင့် ညောင်ခြေထောက်ကျေးရွာအထက်က တောင်တန်းများကို မတ်လ ၂၁ရက်နှင့် မတ်လ ၂၂ရက်နေ့တွင် စက်တပ်လေထီး၊ ဂျက်ဖိုက်တာ၊ Y-12 လေယာဉ်များဖြင့် ဗုံးကြဲတိုက်ခိုက်ခဲ့ပြီး ကပစ (၆)အတွင်းမှလည်း လက်နက်ကြီးများဖြင့် တိုက်ပွဲဖြစ်ပွားရာနေရာများသို့ ပစ်ခတ်နေကာ တိုက်ပွဲများဆက်လက်ပြင်းထန်နေတယ်လို့ သိရပါတယ်။
========================
🚩🚩 ၃။ မြင်းခြံ၊ ဆုံရွာတွင် မီးပတ်ရှို့နေတဲ့ ပျူစောထီးများ မိုင်းဆွဲတိုက်ခိုက်ခံရပြီး ၁ ဦးသေဆုံး
မတ်လ ၂၂
Radio NUG
မန္တလေးတိုင်း၊ မြင်းခြုံမြို့နယ်၊ ဆုံရွာ အရှေ့ဘက်က ယာခင်းများကို မီးပတ်ရှို့နေတဲ့ ပျူစောထီးများကို မိုင်းဆွဲတိုက်ခိုက်ခဲ့ရာ ၁ ဦး သေဆုံးပြီး ၂ ဦး ဒဏ်ရာရခဲ့တယ်လို့ ရွှေဂျိုးဖြူ ပြည်သူ့ကာကွယ်ရေးတပ်ဖွဲ့က ထုတ်ပြန်ထားပါတယ်။
မတ်လ ၂၂ ရက်နေ့ မနက် ၁၀ နာရီ ၄ မိနစ် အချိန်မှာ ယာခင်းများကို မီးပတ်ရှို့နေတဲ့ ပျူစောထီး အဖွဲ့ကို ရွှေဂျိုးဖြူ ပြည်သူ့ကာကွယ်ရေးတပ်ဖွဲ့ (MGN) ၊ Aung San's Blood Civilians Defense Force (ABCDF)နဲ့ မြင်းခြံမြောက်ပိုင်းသားများ ပြောက်ကျားတပ်ဖွဲ့ (MNGF) တို့က မိုင်းဆွဲတိုက်ခိုက်ခဲ့တာလို့ ဆိုပါတယ်။
မိုင်းဆွဲတိုက်ခိုက်မှုကြောင့် ပျူစောထီးတစ်ဦး သေဆုံးသွားခဲ့ပြီး ၂ ဦး ဒဏ်ရာရရှိခဲ့တယ်လို့ သိရပါတယ်။
========================
🚩🚩 ၄။ နှမ်းခါးကျေးရွာ ဆေးပေးခန်းကို စစ်ကောင်စီက ဗုံးကြဲခဲ့ရာ အရပ်သား ၁၀ ဦးထက်မနည်း သေဆုံး
မတ်လ ၂၂
Radio NUG
မကွေးတိုင်း၊ ဂန့်ဂေါမြို့နယ်၊ နှမ်းခါးကျေးရွာက ဆေးပေးခန်းကို စစ်ကောင်စီက ဗုံးကြဲတိုက်ခိုက်ခဲ့ရာ အရပ်သား ၁၀ ဦးထက်မနည်း သေဆုံးသွားခဲ့တယ်လို့ ဒေသခံ သတင်းရင်းမြစ်ထံက သိရပါတယ်။
မတ်လ ၂၂ ရက် မနက် ၈ နာရီ ၃၈ မိနစ်မှာ တိုက်ပွဲဖြစ်ပွားခြင်း မရှိဘဲ ဂျက်ဖိုက်တာနဲ့ ဗုံးကြဲတိုက်ခိုက်ခဲ့တာဖြစ်ပြီး ဆေးခန်းက ဆရာဝန်မတစ်ဦးနဲ့ ကလေးတွေ အပါအဝင် ဆေးခန်းလာပြတဲ့ အရပ်သား ၉ ဦး သေဆုံးခဲ့တာလို့ ဆိုပါတယ်။
ထို့အပြင် ဂန့်ဂေါမြို့နယ်မှ လက်လွှတ်ထားရတဲ့ ကျေးရွာများကို ပြန်လည်ထိန်းချုပ်နိုင်ဖို့ စစ်ကောင်စီက အင်အား အများအပြားသုံးကာ စစ်ကြောင်းထိုးနေတာကြောင့် ဒေသခံ ၄၀၀၀ ဝန်းကျင် စစ်ဘေးရှောင်နေကြရတယ်လို့ ယောအလင်းတန်းက ထုတ်ပြန်ထားပါတယ်။
မတ်လ ၁၈ ရက် ည ၁၁ နာရီခန့်မှာ ခလရ ၅၀ မှ စစ်ကောင်စီ အင်အား ၁၂၀ ခန့်ဟာ မြို့တောင်ဘက်က ပျားရွာ၊ အောင်မြင်ရွာ (ရှောက်ပင်)၊ အနောက်ဂန့်ဂေါရွာ၊ ရှုံးရှီရွာစတဲ့ ကျေးရွာတွေကို စစ်ကြောင်းထိုး ဝင်ရောက်ခဲ့တယ်လို့ ဆိုပါတယ်။
အဆိုပါ စစ်ကြောင်းဟာ အောင်မြင်ကျေးရွာမှာ တပ်စွဲထားပြီး ဒေသခံရွာသားတချို့ကို ဖမ်းဆီးထားကာ ကျေးရွာအနီးဝန်းကျင်မှာ ဘန်ကာ၊ ကတုတ်ကျင်းများ ပြုလုပ်ပြီး ခံစစ်ပြင်နေတယ်လို့ သိရပါတယ်။
အောင်မြင်ကျေးရွာဟာ ဂန့်ဂေါ-မင်းရွာ၊ ဂန့်ဂေါ-အိုက်ကား လမ်းပိုင်းပေါ်က အချက်အချာကျတဲ့ နေရာ ဖြစ်တာကြောင့် တော်လှန်ရေး တပ်ဖွဲ့များရော စစ်ကောင်စီအတွက်ပါ အရေးပါတဲ့နေရာဖြစ်ပါတယ်။
========================
🚩🚩 ၅။ ပေါက်တောနဲ့ ပုဏ္ဏားကျွန်းကို စစ်ကောင်စီ ဗုံးကြဲတိုက်ခိုက်
မတ်လ ၂၂
Radio NUG
ရခိုင်ပြည်နယ်၊ ပေါက်တောမြို့နယ်နဲ့ ပုဏ္ဏားကျွန်းမြို့နယ်တို့ကို စစ်ကောင်စီက ဂျက်ဖိုက်တာဖြင့် ဗုံးကြဲ တိုက်ခိုက်ခဲ့တယ်လို့ ဒေသအခြေစိုက် Arakan Princess Media က ဖော်ပြထားပါတယ်။
မတ်လ ၂၂ ရက် မနက် ၂ နာရီခွဲခန့်မှာ ဂျက်ဖိုက်တာဖြင့် ပေါက်တောမြို့နယ်၊ သဲခုံရွာကို စာသင်ကျောင်းအနီးကို ဗုံး ၁ လုံး၊ ၂ နာရီ ၃၆ မိနစ်မှာ မင်းတဲရွာ ဘုန်းကြီးကျောင်းအနီးကို ဗုံးတစ်လုံး ကြဲချခဲ့တယ်လို့ ဆိုပါတယ်။
အလားတူ မနက် ၈ နာရီ ၄၅ မိနစ်မှာ ပုဏ္ဏားကျွန်းမြို့နယ်၊ ကျော်ဇံရွာအနီးကို ဂျက်ဖိုက်တာ တစ်စီးဖြင့် ဗုံး ၃ လုံး ကြဲချတိုက်ခိုက် ခဲ့ပါသေးတယ်။
အဆိုပါ ဗုံးကြဲတိုက်ခိုက်မှုများအတွင်း လူထိခိုက်မှု မရှိခဲ့ပေမယ့် သံခုံရွာ စာသင်ကျောင်းနဲ့ ကျော်ဇံရွာမှ တဲတစ်လုံး ပျက်စီးခဲ့တယ်လို့ သိရပါတယ်။
========================
🚩🚩 ၆။ ဝက်လက်မြို့နယ်၊ စဉ့်ကိုင်ရွာကို စစ်တပ်က လေယာဉ်ဖြင့် ထပ်မံ ဗုံးကျဲ တိုက်ခိုက်ရာ ပြည်သူ ၃ ဦး ထိခိုက်
မတ် ၂၂
Radio NUG
မတ်လ ၂၂ ရက်နေ့ နံနက် ၂ နာရီ ၅၀ မိနစ်နှင့် ၅၆ မိနစ်ခန့်တွင် ဝက်လက်မြို့နယ်၊ စဉ့်ကိုင်ရွာကို အကြမ်းဖက် စစ်တပ်က လေယာဉ်ဖြင့် ၂ကြိမ် ဗုံးကြဲ တိုက်ခိုက်ခြင်းကြောင့် ပြည်သူ ၃ ဦး ထိခိုက်ဒဏ်ရာရရှိခဲ့ကြောင်း Voice Of Mandalay မှ သတင်းဖော်ပြထားပါတယ်။
အကြမ်းဖက် စစ်တပ်၏ လေကြောင်း တိုက်ခိုက်မှုအတွင်း ပြည်သူ ၃ ဦး ထိခိုက် ဒဏ်ရာ (မစိုးရိမ်ရ) ရရှိခဲ့ပြီး နေအိမ်များ ထိခိုက်ပျက်စီးမှု မရှိဘူးလို့ သိရပါတယ်။
စဉ့်ကိုင်ရွာကို မတ်လ ၁၆ ရက်နေ့က လေကြောင်း တိုက်ခိုက်မှု ပြုလုပ်ခဲ့ပြီး အသက် ၆ လအရွယ် ကလေးငယ် ၁ ဦး အပါအဝင် ပြည်သူ ၄ ဦးသေဆုံးခဲ့ကာ မတ်လ ၂၀ ရက်နေ့ကလည်း ကျေးရွာ ဘုရားဝင်းကို လေကြောင်းဖြင့် ထပ်မံ ဗုံးကြဲတိုက်ခိုက်ခြင်းကြောင့် ပြည်သူ ၂ ဦး ထိခိုက်ဒဏ်ရာရရှိခဲ့ပါတယ်။
========================
🚩🚩 ၇။ မြင်းခြံ၊ ကံဆင့်ရွာမှာ စစ်ကောင်စီ လက်နက်ကြီးနဲ့ ဗုံးကြဲ တိုက်ခိုက်ခဲ့ရာ အမျိုးသား တစ်ဦး သေဆုံး
မတ်လ ၂၂
Radio NUG
မန္တလေးတိုင်း၊ မြင်းခြံမြို့နယ်၊ ကံဆင့်ရွာကို စစ်ကောင်စီက လက်နက်ကြီးနဲ့ ပစ်ခတ်ခဲ့ပြီး လေကြောင်းကနေ ဗုံးကြဲခဲ့တာကြောင့် အမျိုးသားတစ်ဦး သေဆုံးခဲ့ကာ နေအိမ်များ မီးလောင်ပျက်ဆီးခဲ့ရတယ်လို့ ဒေသခံ သတင်းရင်းမြစ်က သိရပါတယ်။
မတ်လ ၂၀ ရက်နေ့ ည ၁၁ နာရီကျော်မှာ မြင်းခြံ မြို့ပေါ်ရှိ ခမရ (၁၅) တပ်ရင်းကနေ ဟောင်ဝှစ်ဇာ လက်နက်ကြီးနဲ့ ၅ ချက် ပစ်ခတ်ခဲ့ပြီးနောက် ဂျက်ဖိုက်တာဖြင့် ဗုံးသီး ၂ လုံး ကြဲချခဲ့တာလို့ ဆိုပါတယ်။
ဗုံးကြဲ တိုက်ခိုက်မှုအတွင်း အသက် (၄၇) နှစ် အရွယ်ရှိ ဦးလှကို ဗုံးစထိမှန်ကာ ပွဲချင်းပြီး သေဆုံးခဲ့ပြီး နေအိမ် ၃ လုံးလည်း မီးလောင်ပျက်စီးခဲ့ရတယ်လို့ သိရပါတယ်။
သေဆုံးသွားခဲ့သူဟာ မြင်းခြံ ပ.က.ဖ တိုက်နယ် (၂) ဒု-တာဝန်ခံ ဖြစ်တယ်လို့ ပြောဆိုနေတာတွေလည်း ရှိနေပြီး သီးခြား အတည်ပြုနိုင်ခြင်း မရှိသေးပါဘူး။
အခုတင်ပြခဲ့တဲ့ စစ်ရေးသတင်းတွေကို Radio NUG သတင်းထောက် မင်းစစ်သွေးနဲ့ ခါးရှဲလ်တို့က ပေးပို့ထားတာ ဖြစ်ပါတယ်။
No comments:
Post a Comment