24 Mar 2025 - (Ethnic language program-Matupi) by The Matupi Times

📌 (ချင်း တိုင်းရင်းသား - Matupi ) ထုတ်လွှင့်မှု အစီအစဥ် ၂၀၂၅ မတ်လ ( ၂၄ ) ရက်နေ့ ရပြည်တွင်းသတင်းများ

📌📌 1/ နှစ်လအတွင်း စစ်ကောင်စီတပ်ဖွဲ့ဝင် ၃၀ ခန့် ရှင်းလင်းနိုင်ခဲ့ပြီး စစ်သုံ့ပန်း ၂၀ ဦး ဖမ်းဆီးရမိကြောင်း CNF ထုတ်ပြန်

The Matupi Times | မတ်လ ၁၈၊ ၂၀၂၅

ချင်းအမျိုးသားတပ်မတော်နှင့် ဒေသန္တရကာကွယ်ရေးတပ်ဖွဲ့အနေဖြင့် ၂၀၂၅ ခုနှစ်၊ နှစ်လတာအတွင်း စစ်ကောင်စီတပ်စခန်းတချို့ သိမ်းပိုက်နိုင်ခဲ့ပြီး၊ စကစတပ်ဖွဲ့ဝင် (၃၀) ခန့်ကို ရှင်းလင်းနိုင်ခဲ့သည့်အပြင် စစ်သုံ့ပန်း (၂၀) ဦးကို ဖမ်းဆီးနိုင်ခဲ့ပြီး လက်နက် (၈၀) ခန့်ကိုလည်း သိမ်းဆည်းနိုင်ခဲ့ကြောင်း၊ ဒီကနေ့ မတ်လ ၁၈၊ ၂၀၂၅ ရက်နေ့မှာ ချင်းအမျိုးသားတပ်ဦး (CNF) က ထုတ်ပြန်ပါတယ်။

လာမည့် မတ်လ ၂၀ ရက်နေ့တွင် ကျရောက်မည့် (၃၇) နှစ်ပြည့် ချင်းတော်လှန်ရေးနေ့အတွက် ချင်းအမျိုးသားတပ်ဦး (CNF) ရဲ့ ဒီကနေ့ သတင်းထုတ်ပြန်ချက်မှာ ထည့်သွင်းဖော်ပြခဲ့ပါသည်။ (၃၇) နှစ်ပြည့် ချင်းတော်လှန်ရေးနေ့အတွက် အကျဉ်းသား (၇၂) ဦးကိုလည်း လွတ်ငြိမ်းချမ်းသာခွင့်ပေးလိုက်ကြောင်း ဆိုပါသည်။

အာဏာသိမ်း စစ်ကောင်စီ၏ အကြမ်းဖက်မှုကြောင့် ပြည်သူများဆုံးရှုံးခဲ့ရသည့် လူမှုဘဝ ပြန်လည်ထူထောင်ရေးအတွက် နိုင်ငံတကာအစိုးရများ၊ အဖွဲ့အစည်းများ၊ စေတနာရှင်များကနေ ပံ့ပိုးကူညီဖို့ကိုလည်း ချင်းအမျိုးသားတပ်ဦး (CNF) က တိုက်တွန်းနှိုးဆော်ထားပါသည်။

========================

📌📌 2/ NGO/INGO နှင့် အခြားဘယ်အဖွဲ့မဆို မတူပီမြို့နယ်အတွင်း လုပ်ငန်းဆောင်ရွက်လိုပါက CDF – Matupi (တပ်မဟာ - ၂) ထံ ခွင့်ပြုချက်ယူရမည်ဟု သတင်းထုတ်ပြန်

The Matupi Times | မတ်လ ၂၀၊ ၂၀၂၅

မတူပီမြို့နယ်အတွင်း လုပ်ငန်းဆောင်ရွက်လိုသည့် NGO/INGO နှင့် အခြားသော မည်သည့်အဖွဲ့အစည်းမဆို ချင်းလဲန်ကာကွယ်ရေးတပ်ဖွဲ့ - မတူပီ (တပ်မဟာ - ၂) ထံ ခွင့်ပြုချက်ယူရမည်ဟု သတင်းထုတ်ပြန်ထားပါသည်။

လုပ်ငန်းဆောင်ရွက်လိုသည့် အဖွဲ့အစည်းများအနေနဲ့ CDF-Matupi (တပ်မဟာ - ၂) တပ်မဟာရုံးထံ ကြိုတင်အကြောင်းကြားပြီး ခွင့်ပြုချက်ရယူမှသာ လုပ်ငန်းဆောင်ရွက်ခွင့်ပြုမည်ဟု မတ်လ ၂၀၊ ၂၀၂၅ ရက်နေ့တွင် CDF – Matupi (တပ်မဟာ - ၂) မှ သတင်းထုတ်ပြန်သည်။

ဒါ့အပြင် ချင်းလဲန်ကာကွယ်ရေးတပ်ဖွဲ့ - မတူပီ (တပ်မဟာ - ၂) နယ်မြေအတွင်း ပြည်သူ့ဝန်ဆောင်မှု ပေးရာတွင် CC/CB ဟု ပြောဆိုခြင်း၊ မိမိဆန္ဒမပါဘဲ CC/CB ကို အတင်းအဓမ္မ ထောက်ခံစေခြင်း၊ အခွင့်အရေးနှင့် ပြည်သူများကို စည်းရုံးခြင်း၊ စည်းဝေးခြင်း၊ စည်းလုံးပြီးသော ကျေးရွာများကို အဖွဲ့ကွဲစေခြင်းများ တွေ့ရှိပါက မည်သည့် လူပုဂ္ဂိုလ်၊ အဖွဲ့အစည်းမဆို ပြစ်ဒဏ်ခံရမည်ဟု ဆိုပါသည်။

လက်ရှိတွင် CDF-Matupi (တပ်မဟာ - ၂) အနေဖြင့် မတူပီမှ စစ်ဘေးရှောင် ပြည်သူများ နေရပ်သို့ လွတ်လပ်စွာ ပြန်လာနိုင်ရေးကို ဦးစားပေးဆောင်ရွက်လျှက်ရှိပြီး၊ နေရပ်ပြန်မည့် ပြည်သူများအနေနဲ့ ကျေးရွာ တောတောင်များတွင် ပေါက်ကွဲစေတတ်သည့် ပစ္စည်းတွေ့ရှိပါက သက်ဆိုင်ရာ တပ်ရင်းတပ်ဖွဲ့များထံ ချက်ချင်း အသိပေးအကြောင်းကြားရန် ထုတ်ပြန်ချက်တွင် ဖော်ပြထားပါသည်။

မတူပီမြို့ကို ချင်းညီနောင်များနှင့် မဟာမိတ်များက Operation CB အဖြစ် ၂၀၂၄ ခုနှစ် ဇွန်လ (၉) ရက်နေ့တွင် စတင် တိုက်ခိုက်ခဲ့ရာ ဇွန်လ (၂၉) ရက်နေ့တွင် အပြီးသတ် သိမ်းပိုက်နိုင်ခဲ့ပြီး၊ လက်ရှိတွင် မတူပီမြို့နယ် ပြည်သူ့အုပ်ချုပ်ရေးအဖွဲ့အနေဖြင့် မတူပီမြို့ ပြန်လည်တည်ဆောက်ရေး လုပ်ငန်းများကို CDF-Matupi (တပ်မဟာ - ၁) နှင့်အတူ အကောင်ထည်ဖော် ဆောင်ရွက်လျှက်ရှိပါသည်။

========================

📌📌 3/ အိန္ဒိယ-မြန်မာနယ်စပ် တီအိုချောင်းမှာ ချင်းလူငယ် (၁) ဦး မတော်တဆရေနစ်သေဆုံး

The Matupi Times | မတ်လ ၂၀၊ ၂၀၂၅

အိန္ဒိယ-မြန်မာနယ်စပ်၊ ဇိုခေါထာရ် တီအိုချောင်းတွင် ယမန်နေ့ (မတ်လ ၁၉၊ ၂၀၂၅) ညနေပိုင်း၌ ချင်းလူငယ်တစ်ဦး ရေဆင်းချိုးရင်း မတော်တဆရေနစ်သေဆုံးသွားကြောင်း ဒေသခံသတင်းရင်းမြစ်များထံမှ သိရသည်။

ရေနစ်သေဆုံးသူမှာ Elija Lalnunhliama (အသက် ၁၅ နှစ်) ဖြစ်ပြီး၊ ကလေးမြို့နယ် လက်ပံချောင်းကျေးရွာ ဇာတိဖြစ်ကာ မီဇိုရမ်ပြည်နယ်၊ အိုင်ဇောလ်မြို့ရှိ ကျောင်းတွင် ပညာသင်ကြားနေသူ ဖြစ်ကြောင်း သိရသည်။

Lalnunhliama သည် နွေရာသီကျောင်းပိတ်ရက်တွင် နေရပ်ပြန်လာပြီး ဇိုခေါထာရ် တည်းခိုခန်းတွင် တည်းနေစဉ် ယမန်နေ့ နေ့ခင်းပိုင်းတွင် သူငယ်ချင်းများနှင့် ရေဆင်းချိုးရာ JCB စက်ကြီးများဖြင့် သဲစုပ်ထုတ်ထားသည့် တွင်းထဲသို့ ပြုတ်ကျမတော်တဆ ရေနစ်သေဆုံးသွားခြင်းဖြစ်ကြောင်း သိရသည်။

Elija Lalnunhliama ၏ ရုပ်အလောင်းကို ကလေးမြို့၊ တာဟန်း တွင် သင်္ဂြိုဟ်ရန် သယ်ယူသွားကြောင်း သိရသည်။

========================

📌📌 4/ ရန်ကုန်မြို့တွင် ဒဏ်ရာများနဲ့ သေဆုံးနေသည့် မတူပီ (ချင်း) အမျိုးသားတစ်ဦး၏ ရုပ်အလောင်း တွေ့ရှိ

The Matupi Times | မတ်လ ၂၁၊ ၂၀၂၅

ရန်ကုန်၊ အရှေ့ဒဂုံမြို့နယ်၊ ၁၂၀ ရပ်ကွက်၊ မင်းရဲကျော်စွာလမ်း ရေမြောင်းထဲတွင် အသက် ၃၀ ကျော် (ချင်း) အမျိုးသားတစ်ဦး ရဲ့ ရုပ်အလောင်းကို မတ်လ ၁၉ ရက်နေ့ တွေ့ရှိခဲ့ကြောင်း သိရသည်။

သေဆုံးသူမှာ ချင်းပြည်နယ်၊ မတူပီမြို့နယ် ဒေသခံ ဦးဆန်းပွီး (အသက် ၃၀ ကျော်) ဖြစ်ကြောင်း သိရပြီး၊ ညာဘက်မျက်လုံးတဝိုက် ထိခိုက်ဒဏ်ရာ၊ ဦးခေါင်းပေါက်ပြဲဒဏ်ရာများနှင့် မြောင်းထဲတွင် သေဆုံးနေသည့်အခြေအနေဖြင့် တွေ့ရှိခဲ့ကြောင်း သိရသည်။

သေဆုံးမှုနှင့်ပတ်သက်၍ နီးစပ်သူတစ်ဦးက The Matupi Times သို့ ပြောကြားခဲ့သည်-

"သူသေဆုံးတာက မတ်လ ၁၉ ရက်နေ့ မနက်ပိုင်းမှာပါ။ နာရေးကူညီမှုအသင်းမှ သိရသည့် ဆေးရုံ၏ အစီရင်ခံမှုအရ မနက် ၇ နာရီလောက်မှာ ဆုံးသွားတယ်။ သူမနက်အစောပိုင်းမှာ နိုင်ငံခြားရှိ မိသားစုဝင်များနဲ့ ဖုန်းပြောပြီး အိမ်ကထွက်သွားတယ်။ သေဆုံးတဲ့ သတင်းကိုတော့ မနက် ၉ နာရီလောက်မှ သိရတယ်။"

သေဆုံးသူ၏ ရုပ်အလောင်းကို မတ်လ ၁၉ ရက်နေ့တွင် သက်ဆိုင်ရာ တာဝန်ရှိသူများမှ ထုတ်ယူခွင့် မပြုခဲ့ဘဲ၊ မတ်လ ၂၀ ရက်နေ့မှသာ ထုတ်ယူခွင့်ပြုခဲ့ကြောင်း သိရသည်။

"သူ့ရဲ့ ရုပ်အလောင်းကို ၁၉ ရက်နေ့မှာ ဆေးရုံတာဝန်ရှိသူတွေက ထုတ်ယူခွင့် မပြုဘူး။ နောက်တရက် မတ်လ ၂၀ ရက်နေ့ မနက် ၁၀ နာရီလောက်မှသာ ထုတ်ခွင့်ပေးတာ။"

သေဆုံးမှုနှင့်ပတ်သက်၍ တာဝန်ရှိသူများက "ဆိုင်ကယ်ဖြင့် ဓာတ်တိုင်ဝင်တိုက်မိသဖြင့် မြောင်းထဲ ပြုတ်ကျသေဆုံးသည်" ဟု ဖော်ပြခဲ့သော်လည်း၊ မဖြစ်နိုင်ကြောင်း သေဆုံးသူ၏ နီးစပ်သူက ကြံကြားခဲ့သည်။

"ဓာတ်တိုင်က တော်တော်လဲဟောင်းနေပြီ။ သူ့ရဲ့ ဒဏ်ရာတွေကလည်း ဆိုင်ကယ်မှောက်သေတဲ့ပုံ မဟုတ်ဘဲ အမဲကွက်တွေဖြစ်နေတယ်။ လူတွေရဲ့ လက်ချက်လို့ ထင်ပါတယ်။ ဒီသေဆုံးမှု အမှုမှန် ပေါ်ပေါက်စေချင်ပါတယ်။"

သေဆုံးသူ ဦးဆန်းပွီး ၏ ရုပ်အလောင်းကို ယမန်နေ့ (မတ်လ ၂၀ ရက်နေ့) တွင် သင်္ဂြိုဟ်ခဲ့ကြောင်း သိရသည်။

========================

📌📌 5/ မင်းတပ်မြို့နယ်တွင် မွေးမြူထားသည့် နွားနောက်များကို ဒေါင့်သန်းရောဂါ ကာကွယ်ဆေး အခမဲ့ ထိုးနှံမည်

၁၉ မတ်၊ ၂၀၂၅

မင်းတပ်မြို့နယ် အတွင်း မွေးမြူထားသည့် နွားနောက်များကို ဒေါင့်သန်းရောဂါ ကာကွယ်ဆေး (Anthrax Vaccine) အခမဲ့ ထိုးနှံပေးမည် ဟု မြို့နယ်ပြည်သူ့အုပ်ချုပ်ရေးအဖွဲ့က မတ်လ ၁၉ ရက်နေ့တွင် ကြေညာခဲ့သည်။

ချင်းပြည်နယ်တောင်ပိုင်း မင်းတပ်မြို့နယ် အတွင်း ဒေါင့်သန်းရောဂါ ဖြစ်ပွားနေသော ကျွဲ၊ နွား၊ နွားနောက်များအတွက် မြို့နယ်ပြည်သူ့အုပ်ချုပ်ရေးအဖွဲ့က ကာကွယ်ဆေး အခမဲ့ထောက်ပံ့မည်ဖြစ်သည်။

ထို့ကြောင့် နွား၊ ကျွဲ၊ ဆိတ်၊ ဝက် များကို မွေးမြူနေသူများအနေဖြင့် အကောင်ရေ စာရင်းပြုစု၍ မြို့နယ်မွေးမြူရေးနှင့် ကုသရေးဌာနနှင့် ချိတ်ဆက်ကာ သွားရောက်ထိုးနှံနိုင်ကြောင်း** ထုတ်ပြန်ထားသည်။

၂၀၂၅ ခုနှစ် ဖေဖော်ဝါရီလနှောင်းပိုင်းတွင်လည်း မင်းတပ်မြို့နယ် မွေးမြူရေးနှင့် ကုသရေးဌာန မှ အိမ်မွေး ခွေးနှင့် ကြောင်များကို ကာကွယ်ဆေး ထိုးနှံပေးခဲ့သည့် မှတ်တမ်းရှိသည်။

#RadioNUGLocalNews

#SpringRevolution