24th Mar 2025 - Morning Daily News by Radio NUG

 

၂၀၂၅ မတ်လ ၂၄ ရက်နေ့ မနက်ခင်း နောက်ဆုံးရပြည်တွင်းသတင်းများ

📌 ၁။ ထိုင်းနိုင်ငံ၊ အောက်လွှတ်တော်၌ ကျင်းပသည့် ဆွေးနွေးပွဲတွင် မြန်မာရွှေ့ပြောင်းနေထိုင်သူများအရေး မြန်မာလွှတ်တော်ကိုယ်စားလှယ်များ ဆွေးနွေး

📌 ၂။ ကြားကာလဒေသန္တရပြည်သူ့အုပ်ချုပ်ရေးဖော်ဆောင်မှု ဗဟိုကော်မတီနှင့် တနင်္သာရီတိုင်း ပြည်သူ့အုပ်ချုပ်ရေးအဖွဲ့များ အစည်းအဝေး ကျင်းပပြုလုပ်

📌 ၃။ ဆစ်ဒနီမြို့တွင် NUG ပြည်ထဲရေး၊ ကာကွယ်ရေး၊ လျှပ်စစ်နှင့်စွမ်းအင်၊ နိုင်ငံခြားရေးဌာနများမှ တာဝန်ရှိသူများနှင့် မြန်မာပြည်သူများ ရင်းနှီးစွာ တွေ့ဆုံ

📌 ၄။ ဂေဘားလူမျိုးစုများ၏ ဖိနှိပ်ခံခဲ့ရသော အခွင့်အရေးနှင့် လိုလားချက်များနှင့် ပန်းတိုင်များကို ဖော်ဆောင်နိုင်ရန် အခြားသောလူမျိုးစုများနှင့် လက်တွဲ ဆောင်ရွက်နိုင်ရန် KSCC တိုက်တွန်း

📌 ၅။ ဂျပန်နိုင်ငံ နိုင်ငံခြားရေးဝန်ကြီး Takeshi Iwaya က ၂၀၂၆ ခုနှစ် ဇန်နဝါရီလတွင် ကျင်းပမည့် ရွေးကောက်ပွဲအတွက် မြန်မာစစ်အစိုးရ၏ အစီအစဉ်များနှင့် ပတ်သက်ပြီး “အလေးအနက် စိုးရိမ်ပူပန်မှု” ရှိကြောင်း ပြောဆို

📌 ၆။ Mobye Rescue Teamမှ  အဖွဲ့ရဲ့လစဥ်ကုန်ကျစရိတ်ဝင်ငွေ ရရှိရန်နှင့် လယ်သမားများ ဈေးနှိမ်မခံရစေရန် ဆန်စက်နှင့် ဆီစက် ဖွင့်လှစ်

========================

၂၀၂၅ ခုနှစ် မတ်လ ၂၄ ရက်နေ့ မနက်ပိုင်းမှာတင်ပြပေးမယ့် Radio NUG စစ်ရေးသတင်းကောက်နုတ်ချက်များ

🚩 ၁။ ဧရာဝတီ ရေကြည်၊ ငါးသိုင်းချောင်း၊ လေးမျက်နှာ ဒေသတွေအထိ တိုက်ပွဲ ပြင်းထန်လာ

🚩 ၂။ ငါန်းဇွန်တွင် ခရီးသွား ပြည်သူများကို ပေါ်တာစွဲ ငွေကြေးတောင်းခံနေတဲ့ စစ်ကောင်စီတပ်ဖွဲ့ကို ပစ်ခတ် ရှင်းလင်း

🚩 ၃။ ဓနုပြည်သူ့လွတ်မြောက်ရေးတပ်တော်က တပ်ဖွဲ့ဝင်သစ် ရာချီကို စစ်အခြေခံ သင်တန်းပေး

🚩 ၄။ PDF Zolandမှ နိုင်ငံ့တာဝန်ထမ်းဆောင်ရန် သင်တန်းသူ/သားသစ်များ ခေါ်ယူ

🚩 ၅။ စစ်ကောင်စီရဲ့ လေကြောင်းသွားလာမှု သတင်းများကို ဆက်သွယ်အသိပေးကြဖို့ တိုက်တွန်း

🚩 ၆။ ယင်းမာပင် မြို့နယ်မှာ လေကြောင်းရန် ကာကွယ်ရေး လက်ကမ်းစာစောင်များ ဖြန့်ဝေ

ဤသတင်းများကို ရေဒီယိုအန်ယူဂျီသတင်းတာဝန်ခံများနှင့် ခိုင်လုံသော မိတ်ဖက်သတင်းရင်းမြစ်များဆီမှ အခြေခံတင်ပြထားခြင်း ဖြစ်ပါတယ်။

========================

📌📌 ၁။ ထိုင်းနိုင်ငံ၊ အောက်လွှတ်တော်၌ ကျင်းပသည့် ဆွေးနွေးပွဲတွင် မြန်မာရွှေ့ပြောင်းနေထိုင်သူများအရေး မြန်မာလွှတ်တော်ကိုယ်စားလှယ်များ ဆွေးနွေး

မတ် ၂၃ 

Radio NUG 

၂၂-၃-၂၀၂၅ ရက်နေ့မှ ၂၃-၃-၂၀၂၅ ရက်နေ့အထိ ထိုင်းနိုင်ငံ၊ အောက်လွှတ်တော်၌ ထိုင်းနိုင်ငံအောက်လွှတ်တော်၏ အမျိုးသားလုံခြုံရေး၊ နယ်စပ်ရေးရာ၊ အမျိုးသားရေးဆိုင်ရာ မဟာဗျူဟာနှင့် ပြုပြင်ပြောင်းလဲရေးဆိုင်ရာ အမြဲတမ်းကော်မတီနှင့် လူ့အခွင့်အရေးဆိုင်ရာ အာဆီယံလွှတ်တော်ကိုယ်စားလှယ်များအဖွဲ့ (APHR) တို့က ကြီးမှူးကျင်းပခဲ့သည့် “ထိုင်းနိုင်ငံ၏ နယ်စပ်တစ်လျှောက်၌ လုံခြုံရေး မြှင့်တင်ခြင်းနှင့် ငြိမ်းချမ်းရေးတည်ဆောက်ခြင်း အခန်းကဏ္ဍ” ဆွေးနွေးပွဲတွင် မြန်မာနိုင်ငံ၏ လက်ရှိအခြေအနေများ၊ မြန်မာရွှေ့ပြောင်းနေထိုင်သူများအရေး၊ နယ်စပ်ဖြတ်ကျော်မှုခင်းများကိစ္စ၊ ထိုင်း-မြန်မာ နယ်စပ်တစ်လျှောက် လုံခြုံရေးကိစ္စရပ်များ၊ အကြမ်းဖက်စစ်ကောင်စီ၏ အတုအယောင်ရွေးကောက်ပွဲအပေါ် သဘောထားအမြင်များကို မြန်မာလွှတ်တော်ကိုယ်စားလှယ်များမှ အဓိက ဆွေးနွေးဖလှယ်ခဲ့ကြောင်း CRPH မှ သတင်းထုတ်ပြန်ထားပါတယ်။

ဆွေးနွေးပွဲတွင် မြန်မာလွှတ်တော်ကိုယ်စားလှယ်များအနေဖြင့် “ထိုင်းနိုင်ငံရောက် မြန်မာအလုပ်သမားများ အလုပ်လုပ်ခွင့်အတွက် ပြန်လည်သက်တမ်းတိုးရာတွင် အကြမ်းဖက်စစ်ကောင်စီထံသို့ အခွန်မပေးဆောင်ရရေးနှင့် ထိုင်းနိုင်ငံအစိုးရက တရားမဝင် ဝင်ရောက်လာသည့် မြန်မာပြည်သူများအား အကြမ်းဖက်စစ်တပ်ထံသို့ ပြန်လည်ပို့ဆောင်နေမှုသည် ၎င်းတို့၏ လူ့အခွင့်အရေးကိုသာမက အသက်အန္တရာယ်ကိုပါ စိုးရိမ်ရသည့်အတွက် ယင်းသို့လုပ်ဆောင်နေမှုကို ချက်ချင်းရပ်တန့်ပေးနိုင်ရန်၊ မဖြစ်မနေပြန်ပို့ရန် လိုအပ်ပါက အမျိုးသားညီညွတ်ရေးအစိုးရ၊ ပြည်ထောင်စုလွှတ်တော်ကိုယ်စားပြုကော်မတီနှင့် တိုင်းရင်သားအဖွဲ့အစည်းများထံသို့သာ လွှဲပြောင်းပေးခြင်းဖြင့် မြန်မာပြည်သူများအား အသက်အန္တရာယ်ထိခိုက်မှုမှ ကာကွယ်ပေးရန်” တို့ကို ထည့်သွင်းတောင်းဆိုခဲ့တယ်လို့ ဖော်ပြထားပါတယ်။

ယင်းဆွေးနွေးပွဲသို့ တက်ရောက်စဉ်ကာလအတွင်း မြန်မာလွှတ်တော်ကိုယ်စားလှယ်အဖွဲ့သည် မြန်မာ့အရေးအား အစဉ်တစိုက် အားပေးကူညီနေသည့် ထိုင်းနိုင်ငံ၏ လွှတ်တော်အမတ်များဖြင့်လည်း သီးခြားစီတွေ့ဆုံ၍ မြန်မာ့အရေးအခြေအနေများနှင့် နှစ်ဖက်ပူးပေါင်းဆောင်ရွက်သွားနိုင်ရန်များကို ဆွေးနွေးခဲ့တယ်လို့ သိရပါတယ်။

ဆွေးနွေးပွဲသို့ ပြည်ထောင်စုလွှတ်တော်ကိုယ်စားပြုကော်မတီ အတွင်းရေးမှူး ဦးထွန်းမြင့်၊ အလုပ်သမားရေးရာကော်မတီ ဥက္ကဋ္ဌ ဦးဥက္ကာမင်းနှင့် နိုင်ငံတကာဆက်ဆံရေးကော်မတီဝင် ဦးအာကာမျိုးထက်၊  မြန်မာနိုင်ငံမှ တိုင်းရင်းသားအဖွဲ့အစည်းများ၊ လူ့အခွင့်အရေးအဖွဲ့အစည်းများ၊ အရပ်ဖက်အဖွဲ့အစည်းများမှ ကိုယ်စားလှယ်များ၊ အာဆီယံနိုင်ငံများမှ လွှတ်တော်ကိုယ်စားလှယ်များ၊ ကုလသမဂ္ဂ၊ နိုင်ငံတကာအဖွဲ့အစည်းများမှ ပုဂ္ဂိုလ်များ တက်ရောက်ခဲ့ကြောင်း ထုတ်ပြန်ထားပါတယ်။

========================

📌📌 ၂။ ကြားကာလဒေသန္တရပြည်သူ့အုပ်ချုပ်ရေးဖော်ဆောင်မှု ဗဟိုကော်မတီနှင့် တနင်္သာရီတိုင်း ပြည်သူ့အုပ်ချုပ်ရေးအဖွဲ့များ အစည်းအဝေး ကျင်းပပြုလုပ်

 မတ် ၂၃ 

Radio NUG 

အမျိုးသားညီညွတ်ရေးအစိုးရ၊ ကြားကာလဒေသန္တရပြည်သူ့အုပ်ချုပ်ရေးဖော်ဆောင်မှု ဗဟိုကော်မတီနှင့် တနင်္သာရီတိုင်းမှ ပြည်သူ့အုပ်ချုပ်ရေးအဖွဲ့များ တွေ့ဆုံ ဆွေးနွေးပွဲအစည်းအဝေး (၃/၂၀၂၅)ကို မတ်လ ၂၃ရက်နေ့ မနက်(၁၀:၀၀) နာရီအချိန်တွင် ကျင်းပပြုလုပ်ခဲ့ရာ အစည်းအဝေး၌ ကြားကာလဒေသန္တရ ပြည်သူ့အုပ်ချုပ်ရေးဖော်ဆောင်မှု ဗဟိုကော်မတီ အတွင်းရေးမှူးအဖွဲ့ဝင်၊ ပညာရေးဝန်ကြီးဌာန၊ အမြဲတမ်းအတွင်းဝန်မှ အဖွင့်အမှာစကား‌ပြောကြားခဲ့ကြောင်း သတင်းရရှိပါတယ်။

ထို့နောက်  ပြည်သူ့အုပ်ချုပ်ရေးအဖွဲ့ဝင်များမှ အုပ်ချုပ်ရေးဆိုင်ရာ ပေါင်းစပ်လုပ်ငန်းများနှင့် ပတ်သက်၍ သိရှိလိုသည်များကို ဆွေးနွေးခဲ့ကြရာ ဝန်ကြီးဌာန အသီးသီး၏ တာဝန်ရှိသူများမှ ပြန်လည်ဖြေကြားခဲ့ပြီး အဆိုပါတွေ့ဆုံပွဲသို့  အမြဲတမ်းအတွင်းဝန်များ၊ ဒုတိယအတွင်းဝန်များ၊ တွဲဖက်အတွင်းဝန်များ၊ ဌာနဆိုင်ရာများမှ တာဝန်ရှိသူများနှင့် တနင်္သာရီတိုင်းမှ ပြည်သူ့အုပ်ချုပ်ရေးအဖွဲ့ဝင်များ တက်ရောက်ခဲ့ကြကာ အစည်းအဝေးကို မနက် (၁၁:၃၀) နာရီအချိန်တွင် ရပ်နားခဲ့တယ်လို့ သိရပါတယ်။

========================

📌📌 ၃။ ဆစ်ဒနီမြို့တွင် NUG ပြည်ထဲရေး၊ ကာကွယ်ရေး၊ လျှပ်စစ်နှင့်စွမ်းအင်၊ နိုင်ငံခြားရေးဌာနများမှ တာဝန်ရှိသူများနှင့် မြန်မာပြည်သူများ ရင်းနှီးစွာ တွေ့ဆုံ

မတ် ၂၃ 

Radio NUG 

မတ်လ ၂၃၊ နေ့လယ် ၂:၀၀ နာရီတွင် အမျိုးသားညီညွတ်ရေး အစိုးရ၏ ပြည်ထဲရေး၊ ကာကွယ်ရေး၊ လျှပ်စစ်နှင့်စွမ်းအင်၊ နိုင်ငံခြားရေးဌာနများမှ တာဝန်ရှိသူများနှင့် မြန်မာပြည်သူများ ဆစ်ဒနီမြို့တွင် ရင်းနှီးစွာ တွေ့ဆုံခဲ့ကြောင်း သတင်းရရှိပါတယ်။

တွေ့ဆုံပွဲတွင် ယခုကာလအတွင်း ဖြစ်ပွားနေသော မြန်မာပြည်အရေးအား ရှင်းပြပြောဆိုခြင်း၊ တော်လှန်ရေးအင်အားစုများ၏ နွေဦးတော်လှန်ရေး အဆုံးသတ်ပွဲများ အရှိန်အဟုန်မြှင့်တင်ဆောင်ရွက်ရန် အစီအစဉ်များကို တင်ပြခြင်းနှင့် လျှပ်စစ်နှင့် စွမ်းအင်ဝန်ကြီးဌာန၏ စွန်းဆောင်မှုများကို ရှင်းလင်းတင်ပြခြင်းတို့ကို အိမ်မဲမြို့နယ် မဲဆန္ဒနယ် ပြည်သူ့လွှတ်တော်ကိုယ်စားလှယ် ဒေါ်သန္တာ၊ ပြည်ထဲရေးနှင့် လူဝင်မှုကြီးကြပ်ရေးဝန်ကြီးဌာန၏ အမြဲတန်းအတွင်းဝန် ဦးကွမ်မင်း၊ ကာကွယ်ရေး ဝန်ကြီးဌာနမှ ပြောရေးဆိုခွင့်ရှိသူ ဦးမောင်မောင်ဆွေ၊  သြစတြေးလျနိုင်ငံဆိုင်ရာ ကိုယ်စားလှယ် ဒေါက်တာထွန်းအောင်ရွှေနှင့် လျှပ်စစ်နှင့်စွမ်းအင် ဝန်ကြီးဌာန အတွင်းဝန် ဦးထက်နိုင်ဦးတို့က အချက်အလက် စုံညီစွာ ဆွေးနွေးခဲ့ကြတယ်လို့ သိရပါတယ်။

တွေ့ဆုံပွဲကို တက်ရောက်ကြတဲ့ လူထုမှ မေးခွန်းများကို ပွင့်ပွင့်လင်းလင်း မေးမြန်းခဲ့ပြီး သက်ဆိုင်ရာပုဂ္ဂိုလ်များက မေးခွန်းတိုင်းအား ဖြေကြားခဲ့ကြတယ်လို့ သိရပါတယ်။

အစီအစဉ် ဖြစ်မြောက်ရေးအတွက် ပါဝင်ကြသော တက်ရောက်လာသူ ပြည်သူလူထုနှင့်တကွ ပါဝင်ဆွေးနွေး တင်ပြသူများ၊ အကျွေးအမွေး လှူဒါန်းသော မအိနု နှင့် မပုတိုနှင့် အဖက်ဖက်မှ ဝိုင်းဝန်း လုပ်ဆောင်ကြသော volunteer များ နှင့် Support Group Members များ အားလုံးကို အစီအစဉ် ဖြစ်မြောက်ရေး ကော်မတီ CRPH/ NUG Support Group (NSW) မှ အထူးကျေးဇူး တင်ရှိပါကြောင်း မှတ်တမ်းတင် ‌ဖော်ပြထားပါတယ်။

========================

📌📌 ၄။ ဂေဘားလူမျိုးစုများ၏ ဖိနှိပ်ခံခဲ့ရသော အခွင့်အရေးနှင့် လိုလားချက်များနှင့် ပန်းတိုင်များကို ဖော်ဆောင်နိုင်ရန် အခြားသောလူမျိုးစုများနှင့် လက်တွဲ ဆောင်ရွက်နိုင်ရန် KSCC တိုက်တွန်း

မတ် ၂၃ 

Radio NUG 

မတ်လ (၂၃) ရက်နေ့တွင် ကျရောက်တဲ့ ဂေဘားလူမျိုးစုတို့၏ (၁၅၇) နှစ်ပြည့် အမျိုးသားနေ့သို့ ပေးပို့သည့် သဝဏ်လွှာမှာ တရားမဝင် အာဏာသိမ်းစစ်တပ်၏ နည်းလမ်းမျိုးစုံဖြင့် အကြမ်းဖက် နှိမ်နှင်းတိုက်ခိုက်မှုများကြားမှ မြေစာပင်ဖြစ်ခဲ့ကြရသည့် အဖိနှိပ်ခံများထဲတွင် ဂေဘားလူမျိုးစုများလည်း အပါအဝင်ဖြစ်ကြောင်း၊ တရားမဝင်အာဏာသိမ်းစစ်တပ် နေဝင်ချုပ်ငြိမ်းရန်အတွက် လူမျိုးပေါင်းစုံ၊ လူတန်းစား ပေါင်းစုံတို့၏ အားသွန်ခွန်စိုက်ဆန့်ကျင်တော်လှန်နေသည့် လူထုတော်လှန်ရေးတွင် ဂေဘားလူမျိုးစုသည်လည်း မတတ်စွမ်းသည့်နည်းလမ်းများဖြင့် ဆက်လက်ပူးပေါင်းပါဝင်ကာ နှစ်ပေါင်းများစွာ ဖိနှိပ်ခံခဲ့ရသော တိုင်းရင်းသားများ၏ အခွင့်အရေးကို ပြန်လည်ရယူရန်အတွက်နှင့် တိုင်းရင်းသားများ၏ လိုလားချက်များနှင့် ပန်းတိုင်များကို ဖော်ဆောင်နိုင်ရန်အတွက် အမျိုးသားရေး စိတ်ဓါတ်ဖြင့် ပြည်နယ်အတွင်းရှိ အခြားသောလူမျိုးစုများနှင့်အတူ ဆက်လက်လက်တွဲ ဆောင်ရွက်နိုင်ပါရန် ကရင်နီပြည်အတိုင်ပင်ခံကောင်စီ KSCCမှ တိုက်တွန်းထားပါတယ်။

(၁၅၇) နှစ်ပြည့် ဂေဘားအမျိုးသားနေ့အား လှိုက်လှဲစွာ ကြိုဆိုဂုဏ်ပြုပါကြောင်းနှင့် ဂေဘားတစ်မျိုးသားလုံးနှင့်အတူ အခြားသော တိုင်းရင်းသားညီအစ်ကိုမောင်နှမများအားလုံး စိတ်၏ ချမ်းသာခြင်း၊ ကိုယ်၏ကျန်းမာခြင်းနှင့် တလုံးတဝတည်း ပြည့်စုံနိုင်ကြပါစေကြောင်း သဝဏ်လွှာတွင် ဆုတောင်းပေးထားပါတယ်။

ဂေဘားလူမျိုးစုများသည် ကရင်နီပြည်တွင် ဖြန့်ကျက်နေထိုင်သော လူမျိုးစုတစ်ခုဖြစ်ပြီး ကိုယ်ပိုင်စာပေ၊ ကိုယ်ပိုင်ယဉ်ကျေးမှုနှင့် ရှင်သန်ခဲ့သော လူမျိုးစုဖြစ်ကာ လက်ရှိနိုင်ငံရေး အကြပ်အတည်းကာလတွင် တရားမဝင်အာဏာသိမ်းစစ်တပ်အား တိုက်ထုတ်တွန်းလှန်ပြီး ဖက်ဒရယ် ဒီမိုကရေစီစနစ် ပေါ်ထွန်းရေးအတွက် အခြားသောတိုင်းရင်းသားများနည်းတူ ဂေဘားအမျိုးသားတို့၏ ဘက်ပေါင်းစုံမှ ပါဝင်ကြိုးပမ်းမှုများသည် ကရင်နီပြည်အတွက် ကြီးမားသော အင်အားများဖြစ်စေကြောင်း ဖော်ပြထားပါတယ်။

========================

📌📌 ၅။ ဂျပန်နိုင်ငံ နိုင်ငံခြားရေးဝန်ကြီး Takeshi Iwaya က ၂၀၂၆ ခုနှစ် ဇန်နဝါရီလတွင် ကျင်းပမည့် ရွေးကောက်ပွဲအတွက် မြန်မာစစ်အစိုးရ၏ အစီအစဉ်များနှင့် ပတ်သက်ပြီး “အလေးအနက် စိုးရိမ်ပူပန်မှု” ရှိကြောင်း ပြောဆို

မတ် ၂၃ 

Radio NUG 

မတ် ၂၁ ရက်က ပြုလုပ်သည့် နိုင်ငံခြားရေး ဝန်ကြီးဌာန အစည်းအဝေးတွင် အတိုက်အခံလွှတ်တော်အမတ်တစ်ဦး၏ မေးခွန်းအတွက် ဂျပန်နိုင်ငံ နိုင်ငံခြားရေးဝန်ကြီး Takeshi Iwaya က ၂၀၂၆ ခုနှစ် ဇန်နဝါရီလတွင် ကျင်းပမည့် ရွေးကောက်ပွဲအတွက် မြန်မာစစ်အစိုးရ၏ အစီအစဉ်များနှင့် ပတ်သက်၍ “အလေးအနက် စိုးရိမ်ပူပန်မှု” ရှိကြောင်း ပြောဆိုခဲ့တယ်လို့ Human Rights Watch မှာ ဖော်ပြထားပါတယ်။

“ဂျပန်အစိုးရက ဒေါ်အောင်ဆန်းစုကြည် အပါအဝင် အထိန်းသိမ်းခံထားရသူတွေကို လွှတ်ပေးရေးနဲ့ လက်ရှိအခြေအနေတွေကို ဖြတ်ကျော်ဖို့ တွေ့ဆုံဆွေးနွေးမှုတွေလိုမျိုး နိုင်ငံရေးတိုးတက်မှုမရှိပေမယ့် အမျိုးသားအဆင့် ရွေးကောက်ပွဲတွေ ကျင်းပဖို့ ဂျပန်အစိုးရက အလေးအနက် စိုးရိမ်မိတယ်"လို့ ဝန်ကြီး Iwaya က ပြောပါတယ်။

စစ်အစိုးရ၏ အစီအမံများကို ဆန့်ကျင်ရာတွင် ဂျပန်တစ်နိုင်ငံတည်းမဟုတ်ဘဲ  မလေးရှားနိုင်ငံခြားရေးဝန်ကြီး မိုဟာမက် ဟာဆန်ကလည်း သတင်းထောက်များအား “ရွေးကောက်ပွဲဟာ လောလောဆယ် ဦးစားပေးမဟုတ်ဘူးလို့ သူတို့ [မြန်မာစစ်အစိုးရ] ကို ပြောခဲ့ကြောင်း၊  ကုလသမဂ္ဂ လူ့အခွင့်အရေး ကျွမ်းကျင်သူများက ရွေးကောက်ပွဲကို “လိမ်လည်မှု” ဟုခေါ်ရန် တိုက်တွန်းထားကြောင်း ဖော်ပြထားပါတယ်။

စစ်အစိုးရ၏ အစီအစဉ်များအပေါ် ဂျပန်အစိုးရ၏ စိုးရိမ်ပူပန်မှုကို ဖော်ပြခြင်းသည် ကောင်းမွန်သော အစပြုခြင်းဖြစ်သော်လည်း ပိုမိုလုပ်ဆောင်သင့်ကြောင်း၊ ဂျပန်သည် အရှေ့တောင်အာရှနိုင်ငံများအသင်း (အာဆီယံ) အဖွဲ့ဝင်နိုင်ငံများ၊ တောင်ကိုရီးယားနှင့် အိန္ဒိယတို့ အပါအဝင် အခြားသော အစိုးရများကို စစ်အစိုးရ၏ ရွေးကောက်ပွဲ အစီအစဉ်များကို လူသိရှင်ကြား ပြစ်တင်ရှုတ်ချကာ လွတ်လပ်၍ တရားမျှတမှု မရနိုင်သည့် ရွေးကောက်ပွဲအတွက် နည်းပညာပိုင်းဆိုင်ရာ ပံ့ပိုးကူညီမှုမပေးဘဲ စည်းရုံးသင့်ကြောင်း အကြံပြုရေးသားထားပါတယ်။

========================

📌📌 ၆။ Mobye Rescue Teamမှ  အဖွဲ့ရဲ့လစဥ်ကုန်ကျစရိတ်ဝင်ငွေ ရရှိရန်နှင့် လယ်သမားများ ဈေးနှိမ်မခံရစေရန် ဆန်စက်နှင့် ဆီစက် ဖွင့်လှစ်

မတ် ၂၃ 

Radio NUG 

မြို့ဗြဲဒေသအခြေစိုက် ကူညီကယ်ဆယ်ရေးအဖွဲ့ (Mobye Rescue Team) ၏  လစဥ်ကုန်ကျစရိတ်ဝင်ငွေ ရရှိရန်နှင့် လယ်သမားများ ဈေးနှိမ်မခံရစေရန် ဆန်စက်နှင့် ဆီစက်ကို မတ်လ ၂၃ ရက်နေ့တွင် ဖွင့်လှစ်ခဲ့ကြောင်း KPV သတင်းဌာနမှာ ဖော်ပြထားပါတယ်။

" ရည်ရွယ်ချက်ကတော့ (၂)  ချက်ရှိပါတယ် ။ ပထမအချက်ကတော့ အဖွဲ့ရဲ့လစဥ်ကုန်ကျစရိတ်ဝင်ငွေ ရရှိရန်အတွက်ဖြစ်ပြီးတော့ နောက်တစ်ချက်ကတော့ ဆန်စက်ဘာလို့ရွေးချယ်သလဲဆိုရင် လယ်သမားတွေက စပါးရောင်းဖို့နေရာသိပ်မရှိကြတော့ လက်ရှိမှာ စျေးအနှိမ်ခံနေရတယ်။ ဆိုတော့ လယ်သမားတွေအတွက်လည်း သင့်တင့်မျှတတဲ့စျေးနှုန်း ရအောင် နောက်တဖက်မှာလည်း အဖွဲ့ဝင်ငွေရအောင် လုပ်ဆောင်ရခြင်းဖြစ်ပါတယ် " ဟု Mobye Rescue Team ၏ တာဝန်ခံ ကိုမျိုးအောင်က ပြောကြားထားပါတယ်။

အဆိုပါ ဆန်စက် ၊ ဆီစက် အပြင် ဆန်ရောင်းဝယ်ရေးလုပ်ငန်းကို  Clean Yangon နှင့် ပြည်ပ အလှူရှင်တစ်ဦး တို့က ပူးပေါင်းမတည်ပံ့ပိုးပေးထားကြောင်း၊ တော်လှန်ရေးကာလ ရှည်ကြာလာတာနှင့်အမျှ ငွေကြေးအကျပ်အတည်းကို ဖြေရှင်းဖို့အတွက် လူမှုစီးပွားရေး (social enterprise) တစ်ခုကိုလည်း လည်ပတ်စေလိုကြောင်းနှင့် တော်လှန်ရေးအလွန်ကာလ ပြည်လည်ထူထောင်ရေးကာလတွင်လည်း အဆင်ပြေမည်ဖြစ်ကြောင်း သိရပါတယ်။

အခုတင်ပြခဲ့တဲ့ သတင်းတွေကို Radio NUG သတင်းထောက် ခါးရှဲလ်က ပေးပို့ထားတာ ဖြစ်ပါတယ်။

========================

========================

🚩🚩 ၁။ ဧရာဝတီ ရေကြည်၊ ငါးသိုင်းချောင်း၊ လေးမျက်နှာ ဒေသတွေအထိ တိုက်ပွဲ ပြင်းထန်လာ

မတ်လ ၂၃၊ 

Radio NUG

ဧရာဝတီတိုင်း၊ ရေကြည်၊ ငါးသိုင်းချောင်း၊ လေးမျက်နှာ မြို့နယ် ထိစပ် ဒေသများအထိ တိုက်ပွဲများ ပြင်းထန်နေပြီး စစ်ကောင်စီက ဂျက်ဖိုက်တာနဲ့ စက်တပ်လေထီးများဖြင့်ပါ တိုက်ခိုက်နေတယ်လို့ People Spring က ဖော်ပြထားပါတယ်။

မတ်လ ၁၅ ရက်နေ့က စတင်ကာ အာရက္ခတပ်တော် (AA) နဲ့ PDF ပူးပေါင်းတပ်များက ရေကြည်မြို့၊ မြောက်စမ်းရွာ အခြေစိုက် အမတ (၃၄၄) တပ်နဲ့ သာပေါင်းမြို့နယ် အခြေစိုက် ခမရ (၃၀၈) တပ်တို့ကို စစ်ရေးအရှိန် မြှင့်လိုက်ပြီး နောက်ပိုင်း ဒေသတွင်းမှာ တိုက်ပွဲများ ပြင်းထန်လာတာပါ။

မတ်လ ၁၇ ရက်နေ့မှာ ဝတ်ကုန်းရွာကို ဗုံးကြဲခဲ့ပြီးနောက်ပိုင်း စစ်ကောင်စီက အဆိုပါ ဒေသတဝိုက်က ချင်းလယ်၊ တုံးတော၊ ဝတ်ကုန်းနဲ့ ကညင်တိုင်းရွာများကို လေကြောင်းက တိုက်ခိုက်မှုများ ပိုမိုပြုလုပ်လာတယ်လို့ ဒေသခံတွေက ဆိုပါတယ်။

လက်ရှိမှာ ဒေသခံ ပြည်သူ ၅၀၀၀ ခန့်ဟာ နေရပ်စွန့်ခွာ ထွက်ပြေးနေကြရပြီး အကူအညီများ ပေးကြဖို့ အရပ်ဘက် အဖွဲ့များက တိုက်တွန်းထားပါတယ်။

========================

🚩🚩 ၂။ ငါန်းဇွန်တွင် ခရီးသွား ပြည်သူများကို ပေါ်တာစွဲ ငွေကြေးတောင်းခံနေတဲ့ စစ်ကောင်စီတပ်ဖွဲ့ကို ပစ်ခတ် ရှင်းလင်း

မတ်လ ၂၃၊ 

Radio NUG

မန္တလေးတိုင်း၊ မြင်းခြံခရိုင်၊ ငါန်းဇွန်မြို့နယ်၊ မြို့သာကျေးရွာ စက်မှုဇုန်အနီးမှာ ခရီးသွား ပြည်သူများကို ပေါ်တာဆွဲ ဖမ်းဆီး၊ အဓမ္မ ငွေကြေးတောင်းခံနေတဲ့ စစ်ကောင်စီ တပ်ဖွဲ့ကို ဝင်ရောက်ပစ်ခတ် ရှင်းလင်းခဲ့တယ်လို့ နဂါးနီပြောက်ကျား တပ်ဖွဲ့က ထုတ်ပြန်ထားပါတယ်။

မြို့သာ စက်မှုဇုန် အင်းဝဘဏ်အနီးမှာ တပ်စွဲထားတဲ့ စစ်ကောင်စီ တပ်အင်အား ၅၀ ခန့်ထဲက စစ်သား ၁၅ ဦးဟာ မတ်လ ၂၁ ရက်နေ့က ဘဏ်အနီး မီတာ ၃၀၀ ခန့်အကွာမှာ ပေါ်တာဆွဲ ငွေကြေးတောင်းခံမှု ပြုလုပ်နေတာလို့ ဆိုပါတယ်။

အဆိုပါ ပေါ်တာဆွဲ ငွေကြေးတောင်းခံနေတဲ့ စစ်ကောင်စီ တပ်ဖွဲ့ကို မနက် ၉ နာရီ ၄၅ မိနစ် အချိန်ခန့်မှာ နဂါးနီပြောက်ကျားတပ်ဖွဲ့ - မြင်းခြံ၊ ငါန်းဇွန်မြို့နယ် တပ်ရင်း ၆ တပ်ခွဲ ၃ နဲ့ ငါန်းဇွန် ပကဖ ပူးပေါင်းအဖွဲ့ က ဝင်ရောက်ပစ်ခတ် ရှင်းလင်းခဲ့တာပါ။

တိုက်ခိုက်မှုအတွင်း စစ်ကောင်စီ တပ်ဖွဲ့ဝင် ၄ ဦး သေဆုံးခဲ့ပြီး ၁ ဦး အပြင်းအထန် ဒဏ်ရာရခဲ့တယ်လို့ တပ်တွင်း ဖရဲသီးထံမှ သိရကြောင်း ထုတ်ပြန်ချက်မှာ ဖော်ပြထားပါတယ်။

========================

🚩🚩 ၃။ ဓနုပြည်သူ့လွတ်မြောက်ရေးတပ်တော်က တပ်ဖွဲ့ဝင်သစ် ရာချီကို စစ်အခြေခံ သင်တန်းပေး

မတ်လ ၂၃၊ 

Radio NUG

ဓနုပြည်သူ့လွတ်မြောက်ရေးတပ်တော် - DPLA က တပ်ဖွဲ့ဝင်သစ် ရာနဲ့ချီကို စစ်သင်တန်း ပေးနေတယ်လို့ ရွှေဖီမြေ သတင်းက ဖော်ပြထားပါတယ်။

တအောင်းတပ်မတော် TNLA နှင့်အတူ ပူးပေါင်းပြီး စစ်ကောင်စီကို တိုက်ခိုက်နေတဲ့ DPLA/DPLF ရဲ့ အပတ်စဉ် ၆ အခြေခံ စစ်သင်တန်းကို လွတ်မြောက်နယ်မြေ တနေရာမှာ ပြုလုပ်ခဲ့တာပါ။

အဆိုပါ သင်တန်းမှာ DPLA ထံ ဆက်သွယ် ရောက်ရှိလာတဲ့ လူငယ်တွေနဲ့ တပ်သား စုဆောင်းထားတဲ့သူတွေ ပါဝင်တက်ရောက်နေပြီး အမျိုးသမီးတွေလည်း ပါဝင်တက်ရောက်နေတယ်လို့ ဆိုပါတယ်။

DPLA အနေနဲ့ ဓနုလူမျိုးကို ကိုယ်စားပြုတဲ့ တပ်ဖြစ်ဖို့ ကြိုးစားနေပြီး ရှမ်းတောင် ဒေသက ရပ်စောက်၊ ရွာငံနဲ့ ကလော မြို့နယ်တို့မှာ အခြေချ လှုပ်ရှားနိုင်ဖို့ ကြိုးစားနေတယ်လို့ သိရပါတယ်။

၂၀၂၂ ခုနှစ် ဩဂုတ်လ ၇ ရက်နေ့က ဓနုလူငယ်တွေ စတင်ဖွဲ့စည်းခဲ့တဲ့ DPLA ဟာ လက်ရှိမှာ အင်အား ထောင်နဲ့ချီရှိနေပြီး တောင်ခမ်းဒေသ တိုက်ပွဲမှာ TNLA နဲ့ အတူတိုက်ပွဲဝင်နေသလို ရပ်စောက်မြို့နယ်၊ ကျောက်ဂူဒေသမှာလည်း စစ်ကောင်စီနဲ့ မကြာခဏ တိုက်ပွဲဖြစ်ပွားနေပါတယ်။

========================

🚩🚩 ၄။ PDF Zolandမှ နိုင်ငံ့တာဝန်ထမ်းဆောင်ရန် သင်တန်းသူ/သားသစ်များ ခေါ်ယူ

မတ် ၂၃ 

Radio NUG 

PDF Zolandမှ နိုင်ငံ့တာဝန်ထမ်းဆောင်ရန် သင်တန်းသူ/သားသစ်များ လက်ခံနေပြီဖြစ်ကြောင်း၊ ပြည်ချစ်လူငယ်တွေအတွက် စကစကို တွန်းလှန်ရန် စာရင်းပေးသွင်းနိုင်ပြီဖြစ်ကြောင်း မတ်လ ၂၃ရက်နေ့တွင် သတင်းထုတ်ပြန်ထားပါတယ်။

PDF Zoland တွင် ဝင်ရောက်မည့် ရဲဘော်သစ်များသည် ZFU/PDF Zoland ၏ စစ်ရေး၊ နိုင်ငံရေး ရပ်တည်ချက်များ အားလုံး လက်ခံနိုင်သူ ဖြစ်ရမှာ ဖြစ်ပြီး အနည်းဆုံး တစ်နှစ်တိတိ တာဝန် ထမ်းဆောင်ရန်နှင့် ပေးအပ်သော ကျရာတာဝန်များကို ကျေပွန်အောင် ထမ်းဆောင်နိုင်သူ ဖြစ်ရမှာဖြစ်ကာ အထက်အမိန့် နာခံနိုင်သူ ဖြစ်ရမယ်လို့ ဖော်ပြထားပါတယ်။

ရဲဘော်သစ်များသည် အနည်းဆုံး အသက် (၁၈) နှစ် ပြည့်ပြီးသူ ဖြစ်ရမှာဖြစ်ပြီး အသက်မပြည့်သေးသောသူဖြစ်ပါက မိဘ (သို့မဟုတ်) ဆွေမျိုးတစ်ယောက်ယောက်၏ ထောက်ခံမှု လိုအပ်မှာ ဖြစ်ကာ ကျန်းမာရေးကောင်းမွန်သောသူ ဖြစ်ရမယ်လို့ သိရပါတယ်။

ရဲဘော်သစ်များသည် လူမျိုး၊ ဘာသာ၊ နိုင်ငံရေးပါတီ ခွဲခြားထားခြင်း မရှိသူ ဖြစ်ရမှာဖြစ်ပြီး လူပုဂ္ဂိုလ်တစ်ဦး၊ အဖွဲ့အစည်းတစ်ဖွဲ့၏ စေခိုင်းမှုမပါဘဲ မိမိကိုယ်ပိုင် ဆုံးဖြတ်ချက်ဖြင့်သာ ဝင်ရောက်သောသူ ဖြစ်ရမယ်လို့ အသိပေးထားပါတယ်။

========================

🚩🚩 ၅။ စစ်ကောင်စီရဲ့ လေကြောင်းသွားလာမှု သတင်းများကို ဆက်သွယ်အသိပေးကြဖို့ တိုက်တွန်း

မတ်လ ၂၃၊ 

Radio NUG

စစ်ကောင်စီရဲ့ လေကြောင်းသွားလာမှု သတင်းများကို အင်တာနက်ရရှိတဲ့ ဒေသက ပြည်သူများအနေနဲ့ ရနိုင်တဲ့ နည်းလမ်းမှန်သမျှနဲ့ ပြည်သူမှ ပြည်သူသို့ အချင်းချင်း ပြန်လည်မျှဝေပေးကြဖို့ ယောအလင်းတန်းက ဖိတ်ခေါ်ထားပါတယ်။

စစ်ကောင်စီက ပြည်သူတွေအပေါ် နေ့စဉ်နဲ့အမျှ ရက်စက်ယုတ်မာမှုများကို လေကြောင်းအားကိုးကာ ဆိုးဝါးစွာ ပြုလုပ်နေရာ ပြည်သူတွေအနေနဲ့ လေကြောင်းတိုက်ခိုက်ခံရမှု အန္တရာယ်များကနေ ထိခိုက် ပျက်စီး ဆုံးရှုံးမှုများ နည်းပါးစေဖို့ အချင်းချင်း ကူညီမျှဝေ ပေးကြဖို့ကို တောင်းဆိုထားတာပါ။

အင်တာနက်ရရှိတဲ့ ဒေသက ပြည်သူများအနေဖြင့် မိမိတို့ ဒေသတွင်းက ကာကွယ်ရေး အဖွဲ့အစည်းများ ပြည်သူများနဲ့ ဆက်သွယ်ရေး အခက်အခဲဖြစ်နေတဲ့ ဒေသက ပြည်သူများ အထိပါ ဆက်သွယ်အသိပေး ရနိုင်တဲ့ နည်းလမ်းမှန်သမျှ အသုံးပြုကာ မျှဝေပေးကြဖို့ အသိပေးထားပါတယ်။

စစ်ကောင်စီက ယခုလအတွင်း ယောဒေသကို လေကြောင်း တိုက်ခိုက်မှု ၁၀ ကြိမ်ထက်မနည်း ပြုလုပ်ထားပြီး တခြားဒေသတွေနဲ့ ယှဉ်လိုက်ရင် အတော်ကို များလွန်းနေတယ်လို့ ဆိုပါတယ်။

ဒီထက်မက တိုက်ခိုက်မှုတွေကို ပြုလုပ်လာနိုင်တာကြောင့် ပြည်သူတွေအနေနဲ့ ကြိုတင်ပြင်ဆင်စရာတွေ ပြုလုပ်ထားကာ ဗုံးခိုကျင်းများ မဖြစ်မနေ တူးထားကြဖို့ လေကြောင်းရန် သတင်းများကို အထူးဂရုစိုက် နားစွင့်ပေးကြဖို့ သတိပေး တိုက်တွန်းထားပါတယ်။

========================

🚩🚩 ၆။ ယင်းမာပင် မြို့နယ်မှာ လေကြောင်းရန် ကာကွယ်ရေး လက်ကမ်းစာစောင်များ ဖြန့်ဝေ

မတ်လ ၂၃၊ 

Radio NUG

စစ်ကိုင်းတိုင်း ယင်းမာပင်မြို့နယ်မှာ လေကြောင်းရန်ကာကွယ်ရေး အသိပညာပေး လက်ကမ်းစာစောင်များကို ဖြန့်ဝေပေးခဲ့တယ်လို့ ဗမာလွတ်မြောက်ရေး ဒီမိုကရက်တစ်တပ်ဦး (BLDF) က ထုတ်ပြန်ထား ပါတယ်။

 

မတ်လ ၂၃ ရက်နေ့က ယင်းမာပင်မြို့နယ်အတွင်းရှိ လူစည်ကားရာ နေရာများမှာ လက်ကမ်းစာစောင်များကို ပြည်သူလူထုထံ ဖြန့်ဝေပေးခဲ့တာလို့ ဆိုပါတယ်။

ထိုသို့ ဖြန့်ဝေရာမှာ အဘက်ဘက်မှ ကူညီပေးခဲ့ကြတဲ့ ရပ်ကျေး ပြည်သူ့ ကာကွယ်ရေးအဖွဲ့နဲ့ ပြည်သူ့ အုပ်ချုပ်ရေးအဖွဲ့တို့ကို အထူးကျေးဇူးတင်ကြောင်း ထုတ်ပြန်ချက်မှာ ဖော်ပြထားပါတယ်။

အခုတင်ပြခဲ့တဲ့ စစ်ရေးသတင်းတွေကို Radio NUG သတင်းထောက် မင်းစစ်သွေးနဲ့ ခါးရှဲလ်တို့က ပေးပို့ထားတာ ဖြစ်ပါတယ်။

#RadioNUGLocalNews

#SpringRevolution