၂၀၂၅ မတ်လ ၂၉ ရက်နေ့ ညနေခင်း နောက်ဆုံးရပြည်တွင်းသတင်းများ
📌 ၁။ ငလျင်ဒဏ်သင့်ပြည်သူတွေကို အစွမ်းကုန်ကူညီကြဖို့ ကာကွယ်ရေးဝန်ကြီး ညွှန်ကြား
📌 ၂။ ကုလသမဂ္ဂအတွင်းရေးမှူးချုပ်ထံ မြန်မာပြည်သူများငလျင်ဘေးဒဏ်သင့်ခဲ့၍ အကူအညီများလိုအပ်ကြောင်းNUGအစိုးရနဲ့သံအမတ်ကြီးဦးကျော်မိုးထွန်းတို့စာများအစောတလျင်ပေးပို့ခဲ့
📌 ၃။ ငလျင်ကြောင့်သေဆုံးသူ မန္တလေးမြို့မှာလူခုနစ်ရာနီးပါးရှိကြောင်း စစ်အုပ်စုကထုတ်ပြန်သော်လည်း မြေပြင်တွင်သေဆုံးသူ တထောင်ကျော်ခန့်ရှိ
📌 ၄။ အင်တာနက်လိုင်းရနေဆဲ ငလျင်ဒဏ်သင့်ဒေသက ပြည်သူတွေ အခမဲ့ပြည်သူ့ဆေးခန်းမှာ အွန်းလိုင်းကနေ မေးမြန်းနိုင်
📌 ၅။ ငလျင်ကြောင့် မန္တလေး၊ စစ်ကိုင်းနဲ့ အခြား နေရာများမှ အသက်အိုးအိမ်စည်းစိမ် ပျက်စီးဆုံးရှုံးခဲ့မှုအတွက် အလွန်စိတ်ထိခိုက်ဝမ်းနည်းရတယ်လို့ ဒေါ်အောင်ဆန်းစုကြည်ရဲ့သားငယ်ကိုထိန်လင်းပြောကြား
📌 ၆။ ငလျင်ပြန်လည်ထူထောင်ရေးလုပ်ငန်းများလုပ်ဆောင်နိုင်ရန်အတွက် သင်ကြားရေးလုပ်ငန်းစဉ်များ ခေတ္တရပ်ဆိုင်းကြောင်း ဆေးတက္ကသိုလ်(၁)ရန်ကုန် ယာယီ တက္ကသိုလ်ကောင်စီကြေညာ
📌 ၇။ လွတ်မြောက်နယ်မြေက ငလျင်ဒါဏ်သင့်ပြည်သူတွေကို အရေးပေါ်ကူနိုင်ဖို့ အဆိုတော်ဖြူဖြူကျော်သိန်းလက်မှတ်ရေးထိုးထားတဲ့ဂစ်တာလေလံတင်မည်
========================
၂၀၂၅ ခုနှစ် မတ်လ ၂၉ ရက် ညပိုင်းမှာတင်ပြပေးမယ့် Radio NUG စစ်ရေးသတင်းကောက်နုတ်ချက်များ
🚩 ၁။ နိုင်ငံတဝှမ်း ငလျင်ဘေးဒဏ်ခံနေရချိန်မှာ အကြမ်းဖက်စစ်ကောင်စီက စစ်ကိုင်းတိုင်း၊ ပဲခူးတိုင်းနဲ့ ရှမ်းမြောက်ဒေသကို လေကြောင်းကနေတိုက်ခိုက်
🚩 ၂။ ငလျင်ကြောင့် ထိခိုက်ဒဏ်ရာရသူတွေကို လားရှိုးကျန်းမာရေးဌာနက အခမဲ့ ကုသသပေးမယ်လို့ MNDAA ထုတ်ပြန်
🚩 ၃။ မြန်မာငလျင်ဘေးအတွက်တရုတ်နဲ့အိန္ဒိယအကူအညီများစတင်ရောက်ရှိ
🚩 ၄။ UWSAတပ်ဖွဲ့မှ ငလျင်ဘေးသင့်ဒေသရှိ ပြည်သူများအား ဝမ်းနည်း ကြောင်းသဝဏ်လွှာနှင့်အတူငွေကျပ်သန်း (၂၀၀၀)ကူညီလှူဒါန်းမည်
🚩 ၅။ ငလျင်ဒဏ်သင့် ပြည်သူများကူညီရေးအတွက် အရေးပေါ် ရန်ပုံငွေ လှူဒါန်းရရှိမှုငွေစာရင်း ကိုရီးယားနိုင်ငံNUGကိုယ်စားလှယ်ရုံး ထုတ်ပြန်
🚩 ၆။ နိုင်ငံတကာအစိုးရများနဲ့ နိုင်ငံတကာအကူအညီပေးရေးအဖွဲ့များအနေနဲ့ ငလျင်ဒဏ်ခံစားနေရသူတွေကို လူသားချင်းစာနာ ထောက်ထားရေးဆိုင်ရာ အကူအညီတွေပံ့ပိုးပေးဖို့ IEC တိုက်တွန်း
🚩 ၇။ ငလျင်ဘေးဒဏ်သင့် ပြည်သူများအတွက် ကူညီကယ်ဆယ်ရေး၊ စားနပ်ရိက္ခာထောက်ပံ့ရေး၊ ပြန်လည်နေရာချထားရေး ကိစ္စရပ်များအတွက် လူသားစာနာဝန်ကြီးဌာနသို့တိုက်ရိုက်လှူဒါန်းနိုင်
🚩 ၈။ ငလျင်ဒဏ်သင့် မြန်မာပြည်သူများအတွက် အရေးပေါ်အကူအညီအဖြစ် ယူရို ၂ ဒသမ ၅သန်း အီးယူထောက်ပံ့မည်
ဤသတင်းများကို ရေဒီယိုအန်ယူဂျီသတင်းတာဝန်ခံများနှင့် ခိုင်လုံသော မိတ်ဖက်သတင်းရင်းမြစ်များဆီမှ အခြေခံတင်ပြထားခြင်း ဖြစ်ပါတယ်။
========================
📌📌 ၁။ ငလျင်ဒဏ်သင့်ပြည်သူတွေကို အစွမ်းကုန်ကူညီကြဖို့ ကာကွယ်ရေးဝန်ကြီး ညွှန်ကြား
မတ်လ၂၉ရက်
ပြည်သူ့ကာကွယ်ရေးတပ်မတော် PDFနဲ့ ပြည်သူ့ကာကွယ်ရေးအဖွဲ့တွေဖြစ်တဲ့ ပကဖ၊ပအဖ အဖွဲ့တွေအနေနဲ့ ထိန်းချုပ် နယ်မြေအတွင်းမှာရှိတဲ့ တော်လှန်ရေးအဖွဲ့အစည်းတွေနဲ့ပူးပေါင်းပြီး ငလျင်ဒဏ်သင့်ပြည်သူတွေကို အစွမ်းကုန်ကူညီ ပေးကြဖို့ အမျိုးသားညီညွတ်ရေးအစိုးရ - NUG ကာကွယ်ရေးဝန်ကြီးဌာန ဝန်ကြီး ဦးရည်မွန်က ညွှန်ကြားလိုက်ပါတယ်။
ပြင်းထန်ငလျင်ဒဏ်ကြောင့် သဘာဝဘေး ကြုံတွေ့ခဲ့ရတဲ့ ပြည်သူတွေရဲ့ အခက်အခဲတွေကို ပြည်သူ့ကာကွယ်ရေး တပ်မတော်နဲ့ ပြည်သူ့ကာကွယ်ရေးအဖွဲ့တွေအနေနဲ့ မိမိတို့နယ်မြေအတွင်းက တော်လှန်ရေးအဖွဲ့အစည်းတွေနဲ့ ပေါင်းစပ် ညှိနှိုင်းပြီး တတ်စွမ်းသမျှ အစွမ်းကုန်ကူညီဆောင်ရွက်ပေးကြဖို့ လိုအပ်ချက်တွေ ဆောင်ရွက်ထားမှု အခြေအနေ မှတ်တမ်း တွေကို သက်ဆိုင်ရာကွပ်ကဲမှုအဆင့်ဆင့်ကတဆင့် တင်ပြဆောင်ရွက်ကြဖို့ ညွှန်ကြားလိုက်တာဖြစ်ပါတယ်။
တချိန်တည်းမှာပဲ အမျိုးသားညီညွတ်ရေးအစိုးရ ပအဖ၊ ပကဖ အဖွဲ့ဝင်တွေနဲ့ ပြည်သူလူထုပူးပေါင်းပြီး စစ်ကိုင်းတိုင်း အတွင်းက ခရိုင်ချင်းဆက်လမ်းပေါ်မှာ ကူညီကယ်ဆယ်ရေးလုပ်ငန်းတွေ ဆောင်ရွက်နေတဲ့မှတ်တမ်းဓာတ်ပုံတွေလည်း NUG က ဒီနေ့ မတ်လ ၂၉ ရက် မနက်ပိုင်းမှာ ထုတ်ပြန်ထားပါတယ်။
အမျိုးသားညီညွတ်ရေးအစိုးရအနေနဲ့ ငလျင်လှုပ်ပြီး နာရီပိုင်းအကြာမှာပဲ အရေးပေါ်အစည်းအဝေးတွေ ခေါ်ယူပြီး လုပ်ကိုင် ဆောင်ရွက်သင့်တဲ့ကိစ္စတွေကို လုပ်ကိုင်နေသလို ကာကွယ်ရေးဝန်ကြီးဌာန MOD အနေနဲ့လည်း သက်ဆိုင်ရာ PDFတွေ ပြည်သူ့ ပကဖတွေကို ညွှန်ကြားချက်တွေ ထုတ်သလို ပြည်ထဲရေးနဲ့ လူဝင်မှုကြီးကြပ်ရေးဌာနကလည်း ပအဖတွေနဲ့ သက်ဆိုင်ရာဝန်ထမ်းတွေကို ကူညီကယ်ဆယ်ရေးလုပ်ငန်းတွေ အမြန်ဆုံးဆောင်ရွက်ဖို့ ညွှန်ကြားချက်တွေ ထုတ်ခဲ့တယ်လို့ သိရပါတယ်။
========================
📌📌 ၂။ ကုလသမဂ္ဂအတွင်းရေးမှူးချုပ်ထံ မြန်မာပြည်သူများငလျင်ဘေးဒဏ်သင့်ခဲ့၍ အကူအညီများလိုအပ်ကြောင်းNUGအစိုးရနဲ့သံအမတ်ကြီးဦးကျော်မိုးထွန်းတို့စာများအစောတလျင်ပေးပို့ခဲ့
မတ်လ၂၉ရက်
ကုလသမဂ္ဂအတွင်းရေးမှူးချုပ်ထံ မြန်မာပြည်သူများငလျင်ဘေးဒဏ်သင့်ခဲ့၍ အကူအညီများလိုအပ်ကြောင်းNUGအစိုးရနဲ့သံအမတ်ကြီးဦးကျော်မိုးထွန်းတို့စာများအစောတလျင်ပေးပို့ခဲ့ပါတယ်။
မတ်လ၂၈ရက်နေ့မှာပဲ ကုလသမဂ္ဂဆိုင်ရာ မြန်မာနိုင်ငံသံအမတ်ကြီးဦးကျော်မိုးထွန်းက မြန်မာနိုင်ငံမှာငလျင်လှုပ်မှုနဲ့အတူပြည်သူများအရေးပေါ်အကူအညီလိုအပ်ကြောင်းစာအား ကုလသမဂ္ဂအတွင်းရေးမှူးချုပ်ထံလိပ်မူရေးသားပေးပို့ခဲ့ပြီး အမျိုးသားညီညွတ်ရေးအစိုးရရဲ့အရေးပေါ်ကြေညာချက်စာများကိုလည်း သက်ဆိုင်ရာတာဝန်ရှိသူများထံအသီးသီးပေးပို့ခဲ့ပါတယ်။
မတ်လ၂၈ရက်မှာ အမျိုးသားညီညွတ်ရေးအစိုးရအနေဖြင့် ငလျင်လှုပ်ခတ်ပြီးပြီးချင်း အရေးပေါ် အစည်းအဝေးခေါ်ယူကာ အရေးပေါ်အခြေအနေစီမံခန့်ခွဲမှုဆိုင်ရာ ပေါင်းစပ်ညှိနှိုင်းရေးကော်မတီ၏ လုပ်ငန်းစဉ်များကို စတင်သက်ဝင်စေပြီး သက်ဆိုင်ရာ ဝန်ကြီးဌာနများအနေဖြင့် လိုအပ်သော လုပ်ငန်းဆောင်တာများကို ဌာနအလိုက် အလျင်အမြန် လုပ်ဆောင်ကြရန် စီစဉ်ဆောင်ရွက်ခဲ့ပါသေးတယ်။
========================
📌📌 ၃။ ငလျင်ကြောင့်သေဆုံးသူ မန္တလေးမြို့မှာလူခုနစ်ရာနီးပါးရှိကြောင်း စစ်အုပ်စုကထုတ်ပြန်သော်လည်း မြေပြင်တွင်သေဆုံးသူ တထောင်ကျော်ခန့်ရှိ
မတ်လ၂၉ရက်
ငလျင်ကြောင့်သေဆုံးသူ မန္တလေးမြို့မှာလူခုနစ်ရာနီးပါးရှိကြောင်း စစ်အုပ်စုကထုတ်ပြန်သော်လည်းမြေပြင်တွင်သေဆုံးသူ တထောင်ကျော်ခန့်ရှိတယ်လို့ ဒေသ၏သတင်းအရင်းအမြစ်များကဆိုထားပါတယ်။
မတ်လ၂၈ရက်မွန်းလွဲပိုင်း လှုပ်ခတ်တဲ့ငလျင်ကြောင့် မန္တလေးမြို့မှာလူနေအိမ်နဲ့၁၁လွှာအမြင့်ရှိSky Villaတို့မြေကြီးထဲ နစ်မြုပ်ပြိုကျမှုတို့ဖြစ်ပွားခဲ့ပါတယ်။
အစ္စလမ်ဘာသာဝင်များအများစုဝတ်ပြုရာဗလီကျောင်းတွင်းမှာလည်း သေဆုံးသူပြည်သူအများစုရှိခဲ့ပြီးရုပ်အလောင်းများမှာမတ်လ၂၉ရက်မနက်အထိထုတ်ယူရရှိခြင်းမရှိသေးဘူးလို့သိရပါတယ်
ရမည်းသင်းမှာ ငလျင်ကြောင့် ပြည်သူ ၁၂ဦး သေဆုံးပြီး ဝမ်းတွင်းမြို့နယ်မှာ၇ဦးသေဆုံးခဲ့တယ်လို့သိရှိရပါတယ်။
ရမည်းသင်းမြို့မှာငလျင်ကြောင့်ပြိုကျပျက်စီးမှုတွေရှိခဲ့ပြီး ပြည်သူ ၁၂ဦး သေဆုံးကာ ပျောက်ဆုံးနေသူတွေလည်းရှိနေပါတယ်။
အလားတူ မိတ္ထီလာခရိုင် ဝမ်းတွင်းမြို့နယ်မှာငလျင်ဒဏ်ကြောင့် ချည်စက်ပြိုကျကာ လူ ၇ ယောက်သေဆုံးပြီး ၇၀ ဦးခန့် ထိခိုက်ဒဏ်ရာ များ ရရှိခဲ့ပါတယ်။
ရှမ်းပြည်နယ်မှာတော့ အောင်ပန်းမြို့ ဟိုတယ်အောင်ပန်းပြိုကျပျက်စီးမှုအောက်မှ မိုးလင်းပေါက်ကယ်ဆယ်ရာ၂၅ဦးအသက်ရှင်ကယ်ထုတ်နိုင်ခဲ့တယ်လို့ မတ်လ၂၉ရက်မနက်ပိုင်း နာရေးကူညီမှုအသင်းအောင်ပန်းကအသိပေးဆိုထားပါတယ်။ကနဦးသတင်းအရ အမျိုးသမီး၃ဦးသေဆုံးကာအမျိုးသမီး၁၇ဦး၊အမျိုးသား၈ဦးဆေးရုံပို့ဆောင်နိုင်ခဲ့တယ်လို့ဖော်ပြပါတယ်။
လက်ရှိမှာစစ်အုပ်စုရဲ့ထုတ်ပြန်ထားမှုအရ မန္တလေးမြို့မှာ ငလျင်ကြောင့် သေဆုံးသူ ၆၉၄ဦး ၊ထိခိုက်ဒဏ်ရာရရှိသူ ၁၆၇၀ဦး၊ ပျောက်ဆုံးနေသူ ၆၈ဦးသာရှိတယ်လို့ဖော်ပြပါတယ်။
========================
📌📌 ၄။ အင်တာနက်လိုင်းရနေဆဲ ငလျင်ဒဏ်သင့်ဒေသက ပြည်သူတွေ အခမဲ့ပြည်သူ့ဆေးခန်းမှာ အွန်းလိုင်းကနေ မေးမြန်းနိုင်
မတ်လ၂၉ရက်
အင်တာနက်လိုင်းရနေဆဲ ငလျင်ဒဏ်သင့်ဒေသက ပြည်သူတွေအနေနဲ့ ကျန်းမာရေးပြသနာတွေကို အွန်းလိုင်းကနေတဆင့် အခမဲ့ပြည်သူ့ဆေးခန်းမှာ မေးမြန်းနိုင်ပြီလို့ FOC-Teleclinic က ဒီနေ့မှာ ထုတ်ပြန်ပါတယ်။
လက်ရှိဖြစ်ပေါ်နေတဲ့ အခြေအနေတွေအရ ငလျင်ဒဏ်သင့်ဒေသတွေက ပြည်သူတွေအနေနဲ့ အကြောင်းအမျိုးမျိုးကြောင့် ဆေးရုံ၊ဆေးခန်းတွေကို မသွားနိုင်ဖြစ်နေပြီး ကျန်းမာရေးကိစ္စ တစ်စုံတစ်ရာ မေးမြန်းချင်တယ်ဆိုရင် FOC-Teleclinic Chatbox မှာ အခမဲ့လာရောက်မေးမြန်းနိုင်ပြီလို့ ဆိုပါတယ်။
ဆေးခန်းဖွင့်ချိန်အနေနဲ့ နေ့စဉ် မြန်မာစံတော်ချိန် မနက် ၈ နာရီက ည ၁၂ နာရီထိဖြစ်ပြီး QR ကို scan ဖတ်လိုက်တာနဲ့ အခမဲ့ ပြည်သူ့ဆေးခန်း - FOC Teleclinic ရဲ့ chatbot ကို တိုက်ရိုက်ရောက်သွားမှာဖြစ်တာကြောင့် chatbot ကနေတဆင့် ဆရာဝန်တွေနဲ့ချိတ်ဆက်ပြီး ကျန်းမာရေးဝန်ဆောင်မှု ရယူနိုင်မှာဖြစ်တယ်လို့ သိရပါတယ်။အခက်အခဲတွေကို ကျော်လွှားနိုင်ဖို့ FOC-Teleclinic အနေနဲ့ ပြည်သူတွေနဲ့အတူ အသင့်ရှိနေပေးမှာလို့လည်း အသိပေးထား ပါတယ်။ငလျင်ကြောင့် ထိခိုက်ဒဏ်ရာသူတွေအနေနဲ့ နီးစပ်ရာ ဆေးရုံ၊ ဆေးခန်း၊ အကူအညီပေးရေးအဖွဲ့တွေကို ဆက်သွယ်ဖို့ တိုက်တွန်းထားပြီး ဆေးရုံ၊ ဆေးခန်းပြဖို့ မလွယ်ကူတဲ့အနေအထားမှာ FOC Teleclinic ရဲ့ Messenger ကနေ ဆက်သွယ်ကာ ကိုယ်ကျန်းမာရေးနဲ့ စိတ်ပိုင်းဆိုင်ရာကျန်းမာရေးအတွက် တိုင်ပင်ဆွေးနွေးနိုင်တယ်လို့ အသိပေးထား ပါတယ်။
========================
📌📌 ၅။ ငလျင်ကြောင့် မန္တလေး၊ စစ်ကိုင်းနဲ့ အခြား နေရာများမှ အသက်အိုးအိမ်စည်းစိမ် ပျက်စီးဆုံးရှုံးခဲ့မှုအတွက် အလွန်စိတ်ထိခိုက်ဝမ်းနည်းရတယ်လို့ ဒေါ်အောင်ဆန်းစုကြည်ရဲ့သားငယ်ကိုထိန်လင်းပြောကြား
မတ်လ၂၉ရက်
ငလျင်ကြောင့် မန္တလေး၊ စစ်ကိုင်းနဲ့ အခြား နေရာများမှ အသက်အိုးအိမ်စည်းစိမ် ပျက်စီးဆုံးရှုံးခဲ့မှုအတွက် အလွန်စိတ်ထိခိုက်ဝမ်းနည်းရတယ်လို့ ဒေါ်အောင်ဆန်းစုကြည်ရဲ့သားငယ်ကိုထိန်လင်းကမတ်လ၂၉ရက်မှာ ဆိုရှယ်မီဒီယာကတဆင့်ပြောပါတယ်။
"မြန်မာနိုင်ငံရဲ့ အကြီးမားဆုံးထိခိုက်စေခဲ့တဲ့ ငလျင်ကြောင့် မန္တလေး၊ စစ်ကိုင်းနဲ့ အခြား နေရာများမှ အသက်အိုးအိမ်စည်းစိမ် ပျက်စီးဆုံးရှုံးခဲ့မှုအတွက် ကျွန်တော် အလွန်စိတ်ထိခိုက်ဝမ်းနည်းရပါတယ်။ ကျွန်တော်လည်း ချစ်ခင်ရတဲ့သူဆုံးရှုံးခဲ့ရတဲ့သူတွေ၊ ထိခိုက်ခဲ့ရတဲ့သူတွေနဲ့ ဒီဖြစ်စဉ်မှာ အဓိကကြုံတွေ့နေရသူတွေနဲ့ ထပ်တူ စိတ်မကောင်းဖြစ်ပါတယ်။ မြန်မာပြည်သူပြည်သားများဟာ မတွေးဝံ့စရာ အကြမ်းဖက်မှုများ၊ တိုက်ခိုက်မှုနှင့် ဖိနှိပ်ချုပ်ချယ်မှုများကို ကြုံတွေ့နေရပြီး ဆင်းရဲဒုက္ခများစွာကို ကြံ့ကြံ့ခံ ရင်ဆိုင်နေကြရပါတယ်။ စစ်အာဏာရှင်ရဲ့ လူသားချင်းမစာနာဘဲ သဘာဝဘေးအန္တရာယ်ကြားကနေ လူသားချင်းစာနာမှု ကင်းမဲ့စွာ ထပ်မံပြီး လေကြောင်းနဲ့ တိုက်ခိုက်ခဲ့တဲ့အပေါ် အင်မတန်ထိခိုက်နာကျင်ရတယ်"လို့ပြောပါတယ်။
ဒါ့အပြင်မိခင်ဖြစ်သူရဲ့ ဆောင်ရွက်မှုနဲ့ဘေးအန္တရာယ်ကာကွယ်ရေးရန်ပုံငွေ ကို မတည် တည်ထောင်ခဲ့မှုဟာယခုအချိန် ထိုထောက်ပံ့ကြေးငွေများကို ယခုလိုအရေးပေါ်လိုအပ်နေတဲ့ ပြည်သူပြည်သားတွေအတွက် အကျိုးရှိရှိ ထောက်ပံ့ပေးရန်အတွက် စစ်အာဏာရှင်တစုက သိမ်းဆည်းထားမယ်လို့ မျှော်လင့်မိတယ်လို့လည်းပြောကြားထားပါတယ်။
"နေပြည်တော်အကျဉ်းထောင်မှာ ထိန်းသိမ်းခံရပြီးအဆက်အသွယ်ဖြတ်တောက်ခြင်းခံရတဲ့ ကျွန်တော့်မိခင် ဒေါ်အောင်ဆန်းစုကြည်ရဲ့ အခြေအနေအပေါ်လည်း စိုးရိမ်ပူပန်နေပါတယ်။ သူ့မရဲ့ လုံခြုံရေးကို အတည်ပြုဖို့ နည်းလမ်းမရှိတဲ့အပြင် စစ်အာဏာရှင်ဘက်ကလည်း လူ့အခွင့်အရေးတစ်ခုဖြစ်တဲ့ ဆက်သွယ်ခွင့်ရရှိဖို့ ငြင်းပယ်နေတာတွေကြောင့် မေမေ့ ကျန်းမာရေးအခြေအနေကို စိုးရိမ်မိပါတယ်။ စစ်အာဏာရှင်ရဲ့ ထိန်းချုပ်ကန့်သတ််ထားခြင်းမရှိဘဲ လိုအပ်နေတဲ့ပြည်သူတွေဆီကို ဆေးဝါးအကူအညီအထောက်အပံ့များ အမြန်ဆုံးရရှိဖို့လိုတယ်။ မြန်မာနိုင်ငံသူ/သားများဟာ စစ်အာဏာရှင်ရဲ့ထိန်းချုပ်ကန့်သတ်မှုမထားတဲ့ လူသားချင်းစာနာမှုဆိုင်ရာ အထောက်အပံ့အကူအညီ အမြန်ဆုံး ရပိုင်ခွင့်ရှိသင့်တယ်။ မေမေ့ရဲ့ အခြေအနေကို စိုးရိမ်ပူပန်ပေးကြတဲ့အတွက် ကျေးဇူးတင်ပါတယ်"လို့ကိုထိန်လင်းကပြောကြားထားပါတယ်။
========================
📌📌 ၆။ ငလျင်ပြန်လည်ထူထောင်ရေးလုပ်ငန်းများလုပ်ဆောင်နိုင်ရန်အတွက် သင်ကြားရေးလုပ်ငန်းစဉ်များ ခေတ္တရပ်ဆိုင်းကြောင်း ဆေးတက္ကသိုလ်(၁)ရန်ကုန် ယာယီ တက္ကသိုလ်ကောင်စီကြေညာ
မတ်လ၂၉ရက်
မတ်၂၈ရက်နေ့တွင် မြန်မာနိုင်ငံအလယ်ပိုင်းကို ဗဟိုပြု၍ လှုပ်ခတ်ခဲ့သော ပြင်းထန်သော ငလျင်ကြီးကြောင့် ပြည်သူများထိခိုက်ခံစားရသည့်အတွက် ဆေးတက္ကသိုလ်(၁) ရန်ကုန်၊ ယာယီ တက္ကသိုလ်ကောင်စီ ၏ ဆရာ၊ ဝန်ထမ်း၊ ကျောင်းသားကျောင်းသူများမှ မြန်မာပြည်သူပြည်သား အားလုံးနှင့်ထပ်တူ ဝမ်းနည်းခံစားရတယ်လို့ဖော်ပြပါတယ်။
ကျောင်းသားကျောင်းသူများ၏ ရုပ်ပိုင်းဆိုင်ရာ စိတ်ပိုင်းဆိုင်ရာများ ပြန်လည်ကုစားနိုင်ရန်နှင့် ပြန်လည်ထူထောင်ရေးလုပ်ငန်းများလုပ်ဆောင်နိုင်စေရန်အတွက် ဆေးတက္ကသိုလ်(၁)ရန်ကုန် ယာယီ တက္ကသိုလ်ကောင်စီ၏ သင်ကြားရေးလုပ်ငန်းစဉ်များအားလုံး (စာမေးပွဲဖြေဆိုရန် စာရင်းပေးသွင်း မှုများ၊ စစ်ဆေးနေဆဲနှင့် စစ်ဆေးမည့်စာမေးပွဲများ၊ Live lectures များ) ကို ၂၀၂၅ ခုနှစ် ဧပြီလ ၁၉ ရက်နေ့ (မြန်မာနှစ်ဆန်း(၃) ရက်နေ့) အထိ ရပ်ဆိုင်းထားမည်ဖြစ်ကြောင်းဆိုပါတယ်။
ဧပြီလ ၁၉ ရက်နေ့မှစ၍ အတန်းစဉ်အလိုက် သင်ကြားရေး နှင့် စာမေးပွဲဖြစ်စဉ်များအတွက် ကြေညာချက်များထုတ်ပြန်၍ ဆက်လက်ဆောင်ရွက်သွား မယ်လို့ဖော်ပြပါတယ်။
========================
📌📌 ၇။ လွတ်မြောက်နယ်မြေက ငလျင်ဒါဏ်သင့်ပြည်သူတွေကို အရေးပေါ်ကူနိုင်ဖို့ အဆိုတော်ဖြူဖြူကျော်သိန်းလက်မှတ်ရေးထိုးထားတဲ့ဂစ်တာလေလံတင်မည်
မတ်လ၂၉ရက်
Phyu Phyu Kyaw Thein committee အနေနဲ့ လွတ်မြောက်နယ်မြေက ငလျင်ဒါဏ်သင့်ပြည်သူတွေကို အရေးပေါ်ကူနိုင်ဖို့ နောက်တပတ် ဧပြီလ ၅ရက်နေ့၊ စနေနေ့၊ Riverside Theatre မှာကျင်းပမယ့် Phyu Phyu in Sydney show မှာ ပစ္စည်းသုံးမျိုးကို လေလံတင်ပြီး ရံပုံငွေကောက်ခံဖို့ ဆုံးဖြတ်ထားတယ်လို့ PhyuPhyuInAustralia team က ဖော်ပြပါတယ်။
လေလံတင်မယ့် ပစ္စည်းတွေကတော့ အဆိုတော်ဖြူဖြူကျော်သိန်းကိုယ်တိုင်တီးခတ်ပြီး လက်မှတ်ရေးထိုးထားတဲ့ ဂစ်တာ တလက်။ထားထက်ထက် ကိုယ်တိုင်ထိုးထားတဲ့ handmade တချောင်းထိုး အရုပ် ၊ ကံကော်ပင် တပင်တို့ဖြစ်ကြပါတယ်။
အခု တင်ပြခဲ့တဲ့ သတင်းအတွေကို Radio NUG သတင်းထောက်ကို မင်းသီဟန်နှင့်ကိုခန့်တို့မှ ပေးပို့ထားတာ ဖြစ်ပါတယ်။
========================
========================
🚩🚩 ၁။ နိုင်ငံတဝှမ်း ငလျင်ဘေးဒဏ်ခံနေရချိန်မှာ အကြမ်းဖက်စစ်ကောင်စီက စစ်ကိုင်းတိုင်း၊ ပဲခူးတိုင်းနဲ့ ရှမ်းမြောက်ဒေသကို လေကြောင်းကနေတိုက်ခိုက်
မတ်လ၂၉ရက်
မြန်မာနိုင်ငံတဝှမ်း ငလျင်ဘေးဒဏ်ခံစားနေရချိန်မှာ အကြမ်းဖက်စစ်ကောင်စီတပ်က စစ်ကိုင်းတိုင်း၊ ပဲခူးတိုင်းနဲ့ ရှမ်းမြောက် ဒေသကို လေကြောင်းကနေတိုက်ခိုက်ခဲ့တယ်လို့ ဒေသသတင်းရင်းမြစ်တွေက ဆိုပါတယ်။
မနေ့ မတ်လ ၂၈ ရက်နေ့ မွန်းလွဲပိုင်းက မြန်မာနိုင်ငံအလယ်ပိုင်းဒေသကို ဗဟိုပြုလှုပ်ခဲ့တဲ့ အင်အားပြင်းငလျင်ကြောင့် မြန်မာပြည်သူတွေ အတိဒုက္ခရောက်နေချိန်မှာ စစ်ကောင်စီက လေကြောင်းတိုက်ခိုက်မှုတွေ လုပ်ဆောင်ခဲ့တာပဲဖြစ်ပါတယ်။
ပြင်းအား ၇ ဒသမ ၇ အဆင့်ရှိတဲ့ ငလျင်ကြီး လှုပ်ခတ်သွားခဲ့တာကြောင့် ငလျင်ဒဏ်ခံရတဲ့ စစ်ကိုင်း၊ မန္တလေး၊ မကွေး၊ ပဲခူး တိုင်း၊ နေပြည်တော်ကောင်စီနယ်မြေနဲ့ ရှမ်းပြည်နယ်အရှေ့မြောက်ပိုင်းဒေသတွေကို စစ်ကောင်စီက သဘာဝဘေးအန္တရာယ် ဆိုင်ရာ စီမံခန့်ခွဲမှု အရေးပေါ်အခြေအနေ ကြေညာခဲ့ပေမယ့် တဖက်မှာ အရပ်သားပြည်သူတွေနေထိုင်ရာနေရာတွေကို လေကြောင်းကနေ တိုက်ခိုက်ခဲ့တာလည်း ဖြစ်ပါတယ်။
စစ်ကောင်စီဟာ စစ်ကိုင်းတိုင်းထဲက ချောင်းဦးမြို့နယ်ကို မတ်လ ၂၈ ရက် ညပိုင်းမှာ လေယာဉ်နဲ့ဗုံးကြဲတိုက်ခိုက်ခဲ့တာ ဖြစ်ပြီး ပဲခူးတိုင်း ဖြူးမြို့နယ် စစ်တောင်းမြစ်အရှော့ဘက်ကို မွန်းလွဲ ၂ နာရီနဲ့ ၃ နာရီကြားမှာ တိုက်ခိုက်ခဲ့သလို မွန်းလွဲ ၁ နာရီနဲ့ ၂ နာရီကြားမှာ ရှမ်းမြောက်ဒေသ နောင်ချိုမြို့နယ်ကို ဗုံးကြဲတိုက်ခိုက်သွားတာလို့ ဒေသတွင်းသတင်းရင်းမြစ်တွေက ပြောဆိုကြပါတယ်။
မနေ့ မတ်လ ၂၈ ရက်နေ့ကလှုပ်ခတ်ခဲ့တဲ့ ငလျင်ကြောင့် မြန်မာနိုင်ငံ အလယ်ပိုင်းဒေသတခုလုံးနဲ့စပ်ဆက်ဒေသတွေက ပြည်သူတွေဟာ ကြီးမားတဲ့ဆုံးရှုံးမှုတွေနဲ့ရင်ဆိုင်ခဲ့ရပါတယ်။
========================
🚩🚩 ၂။ ငလျင်ကြောင့် ထိခိုက်ဒဏ်ရာရသူတွေကို လားရှိုးကျန်းမာရေးဌာနက အခမဲ့ ကုသသပေးမယ်လို့ MNDAA ထုတ်ပြန်
မတ်လ၂၉ရက်
မြန်မာနိုင်ငံအလယ်ပိုင်းကိုဗဟိုပြု လှုပ်ခတ်ခဲ့တဲ့ငလျင်ကြောင့် ထိခိုက်ဒဏ်ရာရသူတွေကို လားရှိုးကျန်းမာရေးဌာနက အခမဲ့ ကုသသပေးမယ်လို့ ကိုးကန့်တပ်မတော် - MNDAA ထုတ်ပြန်ကြေညာထားပါတယ်။
မနေ့ မတ်လ ၂၈ ရက် မွန်းလွဲပိုင်းမှာ လှုပ်ခတ်ခဲ့တဲ့ အင်အားပြင်းငလျင်ဒဏ်ကြောင့် မန္တလေး၊စစ်ကိုင်းမြို့ နဲ့ စပ်ဆက်ဒေသတွေမှာ ထိခိုက်ဒဏ်ရာရသူ များစွာရှိနေတာကြောင့် MNDAA ဘက်က အခုလိုထုတ်ပြန်ကြေညာ လိုက်တာဖြစ်ပါတယ်။
အထူးဒေသ ၁ လားရှိုးမြို့ ကျန်းမာရေးဌာနအနေနဲ့ လူသားချင်းစာနာထောက်ထားမှုအပြည့်နဲ့ ငလျင်ဒဏ် ကြောင့် ထိခိုက်ဒဏ်ရာရသူတွေ ဆေးကုသမှုခံယူမယ်ဆိုရင် အခမဲ့ကုသပေးမမယ်လို့ အထူးဒေသ - ၁ ကျန်းမာရေးဌာန တာဝန်ရှိသူတဦးက ပြောထားပါတယ်။
လုံခြုံရေးအခြေအနေတွေကြောင့် ငလျင်ဒဏ်သင့်ဒေသကလူနာတွေကို သွားရောက်ခေါ်ယူပြီး ဆေးကုသပေးတာမျိုး မလုပ်နိုင်သေးပေမယ့် အရေးပေါ် ကြုံလာရင်တော့ ကူညီပေးဖို့ အသင့်ပြင်ထားတယ်လို့ MNDAA အထူးဒေသ - ၁ ငလျင်ဒဏ်ကူညီကယ်ဆယ်ရေးအဖွဲ့က အရေးပေါ် ကြေညာထားပါတယ်။
အထူးဒေသ ၁ ကျန်းမာရေးဌာနနဲ့ သက်ဆိုင်ရာဌာနတွေအပါအဝင် လူမှုကူညီရေးအသင်းအဖွဲ့တွေဘက်က လူအင်အား၊ဆေးပစ္စည်းနဲ့ သယ်သူပို့ဆောင်ရေးယာဉ်တွေ အဆင်သင့်ပြင်ဆင်ထားတယ်လို့ သိရပါတယ်။
လတ်တလောမှာ စစ်ကောင်စီနဲ့ ညှိနှိုင်းလို့မရသေးတဲ့အတွက် MNDAA ဘက်က ငလျင်ဒဏ်သင့်လူနာတွေကို သွားရောက်ခေါ်ယူနိုင်တာမျိုးမရှိသေးဘူးလို့ သိရပါတယ်။
MNDAA ဟာ လားရှိုးနဲ့ ကိုးကန့်ဒေသကို တိုက်ခိုက်သိမ်းပိုက်ထားတဲ့တပ်ဖွဲ့ဖြစ်ပြီး လက်ရှိမှာ တရုတ်အစိုးရရဲ့ ကြားဝင် ညှိနှိုင်းပေးမှုကြောင့် စစ်ကောင်စီနဲ့ အပစ်ရပ်စဲထားပါတယ်။
========================
🚩🚩 ၃။ မြန်မာငလျင်ဘေးအတွက်တရုတ်နဲ့အိန္ဒိယအကူအညီများစတင်ရောက်ရှိ
မတ်လ၂၉ရက်
မြန်မာငလျင်ဘေးအတွက်တရုတ်နဲ့အိန္ဒိယအကူအညီများ စတင်ရောက်ရှိတယ်လို့ သတင်းရရှိပါတယ်။မတ်လ ၂၉ ရက် မနက် ၇:၁၀ တွင် တရုတ်နိုင်ငံ ယူနန်ပြည်နယ်မှ ကယ်ဆယ်ရေးဆေးကုသ မှုအဖွဲ့ဝင် ၃၇ ဦး ရန်ကုန်အပြည်ပြည်ဆိုင်ရာလေဆိပ်သို့ ရောက်ရှိခဲ့ပါတယ်။
အဆိုပါအဖွဲ့သည် မြန်မာနိုင်ငံ၏ ငလျင်ဘေးအန္တရာယ်ဖြစ်ပွားပြီးနောက် အချိန်မီ အရေးပေါ်ကူညီရန် ညဉ့်နက်အထိ ခရီးဆက်လာကာ ငလျင်ဖြစ်ပြီး ၁၈ နာရီအတွင်း မြန်မာနိုင်ငံသို့ ပထမဆုံးရောက်ရှိလာသော အပြည်ပြည်ဆိုင်ရာကယ်ဆယ်ရေးအဖွဲ့ ဖြစ်တယ်လို့ တရုတ်နိုင်ငံသံရုံးရန်ကုန်ကဖော်ပြပါတယ်။
အလားတူ အိန္ဒိယလေတပ်ရဲ့ ပထမအကြိမ်လေယာဉ် မြန်မာ ငလျင်အတွက် အကူအညီပစ္စည်းများ တင်ဆောင်ပြီးရန်ကုန်လေဆိပ်ကို မတ်လ၂၉ရက်မနက်ပိုင်းမှာဆိုက်ရောက်ခဲ့တယ်လို့သတင်းရရှိပါတယ်။
========================
🚩🚩 ၄။ UWSAတပ်ဖွဲ့မှ ငလျင်ဘေးသင့်ဒေသရှိ ပြည်သူများအား ဝမ်းနည်း ကြောင်းသဝဏ်လွှာနှင့်အတူငွေကျပ်သန်း (၂၀၀၀)ကူညီလှူဒါန်းမည်
မတ်လ၂၉ရက်
UWSAတပ်ဖွဲ့မှ ငလျင်ဘေးသင့်ဒေသရှိ ပြည်သူများအား ဝမ်းနည်း ကြောင်းသဝဏ်လွှာနှင့်အတူငွေကျပ်သန်း (၂၀၀၀)ကူညီလှူဒါန်းမည်ဖြစ်ကြောင်း မတ်လ၂၈ရက်ညပိုင်းမှာ ”ဝ”ပြည်နယ်ပြင်ပဆက်ဆံရေးရုံး တာဝန်ခံ ဦးညီရန်းက အသိပေးဆိုထားပါတယ်။
"မိမိတို့UWSAတပ်ဖွဲ့မှ ငလျင်ဘေးသင့်ဒေသရှိ ပြည်သူများအား ဝမ်းနည်း ကြောင်းသဝဏ်လွှာနှင့်အတူငွေကျပ်သန်း (၂၀၀၀)ကူညီလှူဒါန်းမည်ဖြစ်ကြောင်း ပဏာမ သိရပါတယ်"လို့ ဖော်ပြပါတယ်။
မတ်လ၂၈ရက်မွန်းလွဲပိုင်းလှုပ်ခတ်တဲ့ဖျက်အားပြင်းငလျင်ကြောင့် ရှမ်းပြည်နယ်အောင်ပန်းနဲ့အင်းလေးစတဲ့နေရာများမှာလည်း ငလျင်ဒဏ်ခံခဲ့ရပါတယ်။
========================
🚩🚩 ၅။ ငလျင်ဒဏ်သင့် ပြည်သူများကူညီရေးအတွက် အရေးပေါ် ရန်ပုံငွေ လှူဒါန်းရရှိမှုငွေစာရင်း ကိုရီးယားနိုင်ငံNUGကိုယ်စားလှယ်ရုံး ထုတ်ပြန်
မတ်လ၂၉ရက်
ငလျင်ဒဏ်သင့် ပြည်သူများကူညီရေးအတွက် အရေးပေါ် ရန်ပုံငွေ လှူဒါန်းရရှိမှုငွေစာရင်းကို ကိုရီးယားနိုင်ငံNUGကိုယ်စားလှယ်ရုံးက မတ်လ ၂၉ ရက်၊ ၁၁ နာရီ ၃၂ မိနစ်အထိ လက်ခံရရှိငွေ စာရင်းများ
ထုတ်ပြန်ပါတယ်။
NUG ထိန်းချုပ်ထားသော ဒေသများရှိ စားနပ်ရိက္ခာနှင့် အရေးပေါ်အကူအညီ လိုအပ်နေသော ငလျင်ဒဏ်သင့် ပြည်သူများကို ဒေသခံအုပ်ချုပ်ရေးနှင့် လူမှုအဖွဲ့အစည်းများမှတဆင့် ကူညီရေးလုပ်ငန်းများကို စတင်ဆောင်ရွက်နေပြီဖြစ်ပါတယ်။ရရှိငွေအားလုံးကို NUG MoHADM သို့ ပေးပို့သွားမှာဖြစ်တယ်လို့ ကိုရီးယားနိုင်ငံNUGကိုယ်စားလှယ်ရုံးကဆိုထားပါတယ်။
၂၀၂၅ မတ်လ ၂၈ ရက်နေ့တွင် ဖြစ်ပေါ်ခဲ့သော စစ်ကိုင်းငလျင်ကြီးကြောင့် ထိခိုက်နစ်နာကြရသော မြန်မာပြည်သူများအား ကူညီစောင့်ရှောက်ပေးရန်အမျိုးသားညီညွတ်ရေးအစိုးရ လူသားချင်းစာနာထောက်ထားရေးနှင့် ဘေးအန္တရာယ်ဆိုင်ရာစီမံခန့်ခွဲရေး ဝန်ကြီးဌာနမှ "အရေးပေါ်ရန်ပုံငွေ" ထူထောင်၍ ဆောင်ရွက်လျက်ရှိပါတယ်။
========================
🚩🚩 ၆။ နိုင်ငံတကာအစိုးရများနဲ့ နိုင်ငံတကာအကူအညီပေးရေးအဖွဲ့များအနေနဲ့ ငလျင်ဒဏ်ခံစားနေရသူတွေကို လူသားချင်းစာနာ ထောက်ထားရေးဆိုင်ရာ အကူအညီတွေပံ့ပိုးပေးဖို့ IEC တိုက်တွန်း
မတ်လ၂၉ရက်
နိုင်ငံတကာအစိုးရများနဲ့ နိုင်ငံတကာအကူအညီပေးရေးအဖွဲ့များအနေနဲ့ ငလျင်ဒဏ်ခံစားနေရသူတွေကို လူသားချင်း စာနာ ထောက်ထားရေးဆိုင်ရာ အကူအညီတွေပံ့ပိုးပေးဖို့ ကရင်နီပြည် ကြားကာလအုပ်ချုပ်ရေးကောင်စီ IEC က တိုက်တွန်း တောင်းဆိုလိုက်ပါတယ်။
မနေ့ မတ်လ ၂၈ ရက်က လှုပ်ခတ်ခဲ့တဲ့ အင်အားပြင်း ငလျင်ဘေးအန္တရာယ်နဲ့ပတ်သက်လို့ IEC က စစ်ကိုင်းနဲ့ မန္တလေးတိုင်း အပါအဝင် နိုင်ငံတဝန်းလုံး ငလျင်ဒဏ်ခံစားနေရတဲ့ ပြည်သူတွေအတွက် အရေးပေါ် လူသားချင်းစာနာထောက်ထားရေး ဆိုင်ရာ အကူအညီတွေ ပံ့ပိုးပေးဖို့ တိုက်တွန်းတောင်းဆိုလိုက်တာဖြစ်ပါတယ်။
လူသားချင်းစာနာထောက်ထားရေးအကူအညီပေးရာမှာ အမှန်တကယ်လိုအပ်နေတဲ့ အောက်ခြေပြည်သူတွေဆီ တိုက်ရိုက် ရောက်ရှိစေရေး ဒေသခံအရပ်ဖက်အဖွဲ့အစည်းတွေနဲ့ ပူးပေါင်းဆောင်ရွက်ပေးဖို့လည်း အလေးအနက်ထား တိုက်တွန်းထား ပါသည်၊၊
တရားမဝင် အာဏာသိမ်းစစ်တပ်က ငလျင်ဘေးကို အကြောင်းပြုပြီး ပိုမိုဆိုးရွားတဲ့ ဖိနှိပ်ကန့်သတ်မှုတွေ လုပ်ဆောင်လာ နိုင်တာကိုလည်း သတိကြီးစွာနဲ့ တုံ့ပြန်ရမယ်လို့ အသိပေးထားပါတယ်။
ကရင်နီပြည်မှာလည်း ငလျင်လှုပ်ခတ်မှုဒဏ် သက်ရောက်ခဲ့တာရှိပြီး ထိခိုက်ပျက်စီးတာတွေ အမြောက်အမြား မရှိခဲ့ပေမယ့် ပြည်သူလူထုအနေနဲ့ တုန်လှုပ်ခြောက်ခြားနေကြတယ်လို့ သိရပါတယ်။
ငလျင်ဒဏ် နောက်ဆက်တွဲအနေနဲ့ ပြည်သူတွေ အငတ်ဘေးနဲ့ ပိုမိုကြုံလာရနိုင်ပြီး ဘေးထွက်ဆိုးကျိုးတွေရှိလာမှာကိုလည်း အလွန်စိုးရိမ်ရတဲ့အတွက် ပြည်သူလူထုအနေနဲ့ သက်ဆိုင်ရာ ဒေသန္တရအုပ်ချုပ်ရေးအဖွဲ့တွေ လူမှုကယ်ဆယ်ရေးအသင်းအဖွဲ့ တွေနဲ့ပူးပေါင်းပြီး သဘာဝဘေးအန္တရာယ်ဆိုင်ရာအတွက် ကြိုတင်ကာကွယ်ပြင်ဆင်တာတွေ လုပ်ထားကြဖို့ နှိုးဆော်ထား ပါတယ်။
ဒါ့အပြင် ငလျင်ဘေးအန္တရာယ်ကြောင့် ကရင်နီပြည်အတွင်း လာရောက်ခိုလှုံလိုတဲ့ ပြည်သူတွေရှိမယ်ဆိုရင် လာရောက် ခိုလှုံနိုင်ပြီး အတတ်နိုင်ဆုံး ကြိုဆိုပံ့ပိုးပေးမယ်လို့ အသိပေး ဖိတ်ခေါ်ထားပါတယ်။
ကရင်နီပြည် ကြားကာလအုပ်ချုပ်ရေးကောင်စီအနေနဲ ကရင်နီပြည်က အင်အားစုတွေနဲ့ပူးပေါင်းပြီး ငလျင်ဒဏ်ကြောင့် ထိခိုက်နစ်နာဆုံးရှုံးခဲ့ရသူတွေကို ပံ့ပိုးကူညီတာတွေ လုပ်ဆောင်သွားမယ်လို့လည်း ထုတ်ပြန်ထားပါတယ်။
========================
🚩🚩 ၇။ ငလျင်ဘေးဒဏ်သင့် ပြည်သူများအတွက် ကူညီကယ်ဆယ်ရေး၊ စားနပ်ရိက္ခာထောက်ပံ့ရေး၊ ပြန်လည်နေရာချထားရေး ကိစ္စရပ်များအတွက် လူသားစာနာဝန်ကြီးဌာနသို့တိုက်ရိုက်လှူဒါန်းနိုင်
မတ်လ၂၉ရက်
အမျိုးသားညီညွတ်ရေးအစိုးရ၊ လူသားချင်း စာနာထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာနအနေဖြင့် လတ်တလော ငလျင်ဘေးဒဏ်ကြောင့် အရေးပေါ် ထောက်ပံ့အကူအညီ လိုအပ်လျက်ရှိတဲ့ နေရာဒေသအသီးသီးမှ ငလျင်ဘေးဒဏ်သင့် ပြည်သူများအတွက် ကူညီကယ်ဆယ်ရေး၊ စားနပ်ရိက္ခာထောက်ပံ့ရေး၊ ပြန်လည်နေရာချထားရေး ကိစ္စရပ်များအတွက် ဝန်ကြီးဌာန၏ QR code များသို့ တိုက်ရိုက် ပါဝင်လှူဒါန်းနိုင်တယ်လို့အသိပေးဖော်ပြပါတယ်။လက်ခံရရှိသော ကူညီကယ်ဆယ်ရေး အလှူငွေများကို ငလျင်ဘေးဒဏ်သင့် ပြည်သူများထံသို့ မြေပြင်ရှိ တိုက်ရိုက်ကူညီဆောင်ရွက်ပေးနေသာ အဖွဲ့အစည်းများနှင့် ချိတ်ဆက် ထောက်ပံ့ပေးသွားမယ်လို့ဆိုထားပါတယ်။
========================
🚩🚩 ၈။ ငလျင်ဒဏ်သင့် မြန်မာပြည်သူများအတွက် အရေးပေါ်အကူအညီအဖြစ် ယူရို ၂ ဒသမ ၅သန်း အီးယူထောက်ပံ့မည်
မတ်လ၂၉ရက်
ဥရောပသမဂ္ဂ EU အနေနဲ့ မြန်မာနိုင်ငံက ငလျင်ဒဏ်သင့် ပြည်သူတွေအတွက် ကနဦးအနေနဲ့ အရေးပေါ်အကူအညီအဖြစ် ယူရို ၂ ဒသမ ၅ သန်း ကူညီပံ့ပိုးပေးဖို့ ဆုံးဖြတ်လိုက်တယ်လို့ ဒီနေ့ မတ်လ ၂၉ ရက်မှာ ထုတ်ပြန်ကြေညာပါတယ်။
လူအများအပြားသေဆုံးပြီး ထိခိုက်ဒဏ်ရာရမှုတွေ ဖြစ်ပေါ်စေခဲ့တဲ့ အင်အားပြင်းငလျင်လှုပ်ခတ်ခဲ့တာအတွက် အီးယူက လူသားချင်းစာနာထောက်ထားမှုအကူအညီပေးအပ်ဖို့ ဆုံးဖြတ်ခဲ့တာပဲဖြစ်ပါတယ်။
အခုထောက်ပံ့မယ့် လူသားချင်းစာနာထောက်ထားမှုဆိုင်ရာ ခွဲဝေချထားပေးမှုဟာ မြန်မာနိုင်ငံက အထိခိုက်လွယ်ဆုံး သူတွေအတွက် အရေးပေါ်လိုအပ်ချက်တွေကို ဖြည့်ဆည်းပေးဖို့နဲ့ အသက်တွေကို ကယ်တင်ဖို့အတွက် အထောက်အကူ ဖြစ်စေမယ်လို့ အီးယူ ထုတ်ပြန်ချက်က ဆိုပါတယ်။
အီးယူအနေနဲ့ နောက်ထပ် အကူအညီတွေ ပေးအပ်ပံ့ပိုးနိုင်ဖို့အတွက် မြေပြင်အခြေအနေနဲ့ လိုအပ်ချက်တွေကို အကဲဖြတ် နေတယ်လို့လည်း အသိပေးထားပါတယ်။
မြန်မာနိုင်ငံက ငလျင်ဒဏ်သင့် ပြည်သူတွေအတွက် ကနဦးအနေနဲ့ အရေးပေါ်အကူအညီအဖြစ် ယူရို ၂ ဒသမ ၅ သန်း ကူညီပံ့ပိုးပေးဖို့ ဆုံးဖြတ်လိုက်တဲ့အတွက် အခုခွဲဝေချထားပေးမှုနဲ့ဆိုရင် အခုနှစ်အတွင်း မြန်မာနိုင်ငံအတွက် ထောက်ပံ့တဲ့ လူသားချင်းစာနာထောက်ထားမှုဆိုင်ရာ အကူအညီဟာ စုစုပေါင်း ယူရို ၃၅ သန်းအထိ ရောက်ရှိသွားပြီလို့ သိရပါတယ်။
နိုင်ငံတကာအစိုးရများနဲ့ နိုင်ငံတကာအကူအညီပေးရေးအဖွဲ့များအနေနဲ့ ငလျင်ဒဏ်ခံစားနေရသူတွေကို လူသားချင်း စာနာ ထောက်ထားရေးဆိုင်ရာ အကူအညီတွေပံ့ပိုးပေးရာမှာ အမှန်တကယ်လိုအပ်နေတဲ့ အောက်ခြေပြည်သူတွေဆီ တိုက်ရိုက် ရောက်ရှိစေရေး ဒေသခံအရပ်ဖက်အဖွဲ့အစည်းတွေနဲ့ ပူးပေါင်းဆောင်ရွက်ပေးဖို့ ကရင်နီပြည် ကြားကာလအုပ်ချုပ်ရေး ကောင်စီ IEC က တိုက်တွန်းထားပါတယ်။
အခုတင်ပြခဲ့တဲ့ စစ်ရေးသတင်းကိုတော့ Radio NUGသတင်းထောက် ကိုခန့်နှင့်မင်းသီဟန်တို့မှ ပေးပို့ထားတာဖြစ်ပါတယ်
No comments:
Post a Comment