၂၀၂၅ ဧပြီလ ၂ ရက်နေ့ မနက်ခင်း နောက်ဆုံးရပြည်တွင်းသတင်းများ
📌 ၁။ နိုင်ငံတကာပါလီမန်များအဖွဲ့ (IPU) ၏ ဥက္ကဋ္ဌနှင့် အထွေထွေအတွင်းရေးမှူးချုပ်တို့က ငလျင်ဒဏ်ကြောင့် ထိခိုက်ခဲ့ရသည့် မြန်မာပြည်သူများအတွက် ဝမ်းနည်းကြောင်းသဝဏ်လွှာ ပြည်ထောင်စုလွှတ်တော်ကိုယ်စားပြုကော်မတီ ဥက္ကဋ္ဌ ဦးအောင်ကြည်ညွန့်ထံသို့ ပေးပို့ခဲ့
📌 ၂။ လက်ရှိအခြေအနေဟာ လူသားဆန်မှု နှုန်းစံတန်ဖိုးတွေကို ဖေါ်ထုတ်ကျင့်သုံးဖို့နဲ့ ကြံ့ကြံ့ခံနှိုင်စွမ်းကို ပြသရမယ့်အချိန်လည်းဖြစ်တယ်လို့ NUGနိုင်ငံခြားရေးဝန်ကြီးပြော
📌 ၃။ နိုင်ငံတကာနှင့် ပြည်တွင်း ကယ်ဆယ်ရေးအဖွဲ့များဟာစစ်ခေါင်းဆောင် မင်းအောင်လှိုင်နှင့် စကစတို့ ချမှတ်ထားသော တင်းကျပ်သော စည်းမျဉ်းများကြောင့် ဘေးဒဏ်သင့် ဒေသများသို့ သွားရောက်ခွင့် ငြင်းပယ်ခံနေရတယ်လို့ဆို
📌 ၄။ ဧပြီ၁ရက်နေ့တွင်လည်းမန္တလေးမှာရုပ်အလောင်းများ ဆက်လက်ရှာဖွေတွေ့ရှိ
📌 ၅။ မြေငလျင် သဘာဝဘေး ၊ ထောက်ပံ့စာနာ ကူညီပေး ကမ်ပိန်းဟာ သိန်း ၁၀၀၀၀ ပြည့်မီရန်အထိအားပေးကူညီကြ
📌 ၆။ အကြမ်းဖက်စစ်ကောင်စီဟာ ငလျင်ဘေးကနေ နိုင်ငံရေးအမြတ်ထုတ်ဖို့နဲ့ နိုင်ငံတကာ တရားဝင်မှု၊ အသိအမှတ်ပြုမှုကို ရရှိဖို့ပဲ လုပ်ဆောင်နေတယ်လို့ဆို
========================
၂၀၂၅ ခုနှစ် ဧပြီလ ၂ ရက်နေ့ မနက်ပိုင်းမှာတင်ပြပေးမယ့် Radio NUG စစ်ရေးနှင့် ငလျင်ဘေးဒဏ်သတင်းကောက်နုတ်ချက်များ
🚩 ၁။ နိုင်ငံတော်အဆင့် ဝမ်းနည်းခြင်း ကြေညာထားတဲ့ ပထမ ရက်မှာ နောင်ချိုမြို့နယ်ကို စစ်ကောင်စီ ဗုံးကြဲတိုက်ခိုက်
🚩 ၂။ မင်းတပ်မြို့ပေါ်တွင် အကြမ်းဖက်စစ်ကောင်စီမှ ဂျက်ဖိုက်တာဖြင့် ပေါင် ၅၀၀ ဗုံး (၂) လုံးကြဲ၍ လေကြောင်းတိုက်ခိုက်မှု ပြုလုပ်သွားခဲ့
🚩 ၃။ စဉ့်ကူးမြို့နယ်၊ လက်ပန်လှရွာကို စစ်ကောင်စီ ဗုံးကြဲ တိုက်ခိုက်ခဲ့
🚩 ၄။ ငလျင်နောက်ဆက်တွဲ ကယ်ဆယ်ရေး လုပ်ငန်းများ ထိရောက်စွာ ဆောင်ရွက်နိုင်ရန် တလတာ အပစ်ရပ်ကြောင်း ညီနောင် မဟာမိတ် (၃) ဖွဲ ထုတ်ပြန်
🚩 ၅။ မွန်ပြည်သစ်ပါတီ (စစ်အာဏာရှင်တိုက်ဖျက်ရေး)က မြေငလျင်ဒဏ် ခံစားခဲ့ရသည့် ပြည်သူများအတွက် အရေးပေါ်ကူညီကယ်ဆယ်ရေး အပါအဝင် ပြန်လည်ထူထောင်ရေးလုပ်ငန်းစဥ်များတွင် တတ်နိုင်သည့်ဘက်မှ ဝိုင်းဝန်းကူညီသွားမည်
🚩 ၆။ ငလျင်ဒဏ်သင့်နေချိန် လူသားချင်း စာနာထောက်ထားသောအားဖြင့် တအာင်းပြည်အတွင်း ပျော်ပွဲရွှင်ပွဲနှင့် သင်္ကြန်ပွဲတော် မကျင်းပရန်ဆုံးဖြတ်
🚩 ၇။ ငလျင်ဒဏ်သင့်ထားတဲ့ အင်းလေးဒေသက ကျေးရွာ ၂ ခုကို စစ်ကောင်စီနဲ့ PNO ပြည်သူ့စစ် အဖွဲ့တို့က ဒရုန်းဖြင့် ဗုံးကြဲတိုက်ခိုက်
🚩 ၈။ ချောင်းဦးမြို့နယ်မှာ စစ်ကောင်စီက စက်တပ်လေထီး (Paramotor) ဖြင့် လေကြောင်းတိုက်ခိုက်မှု ပြုလုပ်ခဲ့
ဤသတင်းများကို ရေဒီယိုအန်ယူဂျီသတင်းတာဝန်ခံများနှင့် ခိုင်လုံသော မိတ်ဖက်သတင်းရင်းမြစ်များဆီမှ အခြေခံတင်ပြထားခြင်း ဖြစ်ပါတယ်။
========================
📌📌 ၁။ နိုင်ငံတကာပါလီမန်များအဖွဲ့ (IPU) ၏ ဥက္ကဋ္ဌနှင့် အထွေထွေအတွင်းရေးမှူးချုပ်တို့က ငလျင်ဒဏ်ကြောင့် ထိခိုက်ခဲ့ရသည့် မြန်မာပြည်သူများအတွက် ဝမ်းနည်းကြောင်းသဝဏ်လွှာ ပြည်ထောင်စုလွှတ်တော်ကိုယ်စားပြုကော်မတီ ဥက္ကဋ္ဌ ဦးအောင်ကြည်ညွန့်ထံသို့ ပေးပို့ခဲ့
ဧပြီ၁ရက်
နိုင်ငံတကာပါလီမန်များအဖွဲ့ (IPU) ဥက္ကဋ္ဌ Madam Dr. Tulia Ackson နှင့် အထွေထွေအတွင်းရေးမှူးချုပ် Mr. Martin Chungong တို့က အင်အားကြီး ငလျင်ဒဏ်ကြောင့် ထိခိုက်ခဲ့ရသည့် မြန်မာပြည်သူများအတွက် ဝမ်းနည်းကြောင်း သဝဏ်လွှာအား ပြည်ထောင်စုလွှတ်တော်ကိုယ်စားပြုကော်မတီ ဥက္ကဋ္ဌ ဦးအောင်ကြည်ညွန့်ထံသို့ ပေးပို့ခဲ့တယ်လို့ သတင်းရရှိပါတယ်။
နိုင်ငံတကာပါလီမန်များအဖွဲ့၏ အကြီးအကဲများက ပေးပို့သည့် သဝဏ်လွှာတွင် နိုင်ငံတကာပါလီမန်များအဖွဲ့နှင့် အဖွဲ့ဝင်ပါလီမန်များကိုယ်စား ကျွန်ုပ်တို့အနေဖြင့် အင်အားကြီးငလျင်ကြောင့် မမျှော်လင့်သော ပျက်စီးဆုံးရှုံးမှုများခံစားခဲ့ကြရသည့် မြန်မာပြည်သူများနှင့် လူကြီးမင်းအတွက် ကိုယ်ချင်းစာမှုနှင့် ဝမ်းနည်းမှုကို ဖော်ပြလိုပါကြောင်း၊ အသက်ဆုံးရှုံးမှု၊ နေရာအနှံ့ ပျက်စီးမှုများနှင့် အလိုအပ်ဆုံးသူများထံသို့ အကူအညီများရရှိရေးဆိုင်ရာ စိန်ခေါ်မှုများအတွက် အလွန်စိတ်မကောင်းဖြစ်ရပါကြောင်း ဖော်ပြပါရှိပါတယ်။
ထို့ပြင် ယခုသဘာဝဘေးအန္တရာယ်ကြောင့် ချစ်ရသူများ ဆုံးရှုံးခဲ့ရသော ဆွေမျိုးသားချင်းများအတွက် ဝမ်းနည်းကြေကွဲကြောင်းနှင့် ဥက္ကဋ္ဌကြီး၊ မြန်မာပြည်သူများနှင့်အတူ ရပ်တည်လျက်ရှိကြောင်း ဖော်ပြထားပါတယ်။
ပြည်ထောင်စုလွှတ်တော် ကိုယ်စားပြုကော်မတီဥက္ကဋ္ဌက ကျေးဇူးတင်ရှိကြောင်း ပြန်ကြားခဲ့ရာတွင် ယခုကဲ့သို့ စာနာနားလည်မှုနှင့် ဝမ်းနည်းမှုတို့အတွက် ကျေးဇူးတင်ရှိပါကြောင်း၊ ယခုကဲ့သို့ မမျှော်လင့်သည့်အခြေအနေကို ကြုံတွေ့နေရပြီး ငလျင်ကြောင့် ထိခိုက်ခံစားခဲ့ရသည့် မြန်မာပြည်သူများအတွက် လိုအပ်သည့် အကူအညီများ မြန်မြန်ဆန်ဆန်ရရှိနိုင်ရေး နိုင်ငံတကာလွှတ်တော် အသိုက်အဝန်းက ကူညီဆောင်ရွက်ပေးစေလိုကြောင်း ထည့်သွင်းပြောကြားခဲ့ပါတယ်။
========================
📌📌 ၂။ လက်ရှိအခြေအနေဟာ လူသားဆန်မှု နှုန်းစံတန်ဖိုးတွေကို ဖေါ်ထုတ်ကျင့်သုံးဖို့နဲ့ ကြံ့ကြံ့ခံနှိုင်စွမ်းကို ပြသရမယ့်အချိန်လည်းဖြစ်တယ်လို့ NUGနိုင်ငံခြားရေးဝန်ကြီးပြော
ဧပြီ၁ရက်
လက်ရှိအခြေအနေဟာ လူသားဆန်မှု နှုန်းစံတန်ဖိုးတွေကို ဖေါ်ထုတ်ကျင့်သုံးဖို့နဲ့ ကြံ့ကြံ့ခံနှိုင်စွမ်းကို ပြသရမယ့်အချိန်လည်းဖြစ်တယ်လို့ NUGနိုင်ငံခြားရေးဝန်ကြီး ဒေါ်ဇင်မာအောင်က ဆိုရှယ်မီဒီယာမှာ ရေးသားပြောကြားထားပါတယ်။
"ကျမတို့ ပြည်သူတွေနဲ့ တော်လှန်ရေး အင်အားစုတွေဟာ ဒီနွေဦးတော်လှန်ရေးကို ထိခိုက်မှာ ၊ စစ်အာဏာရှင်ကို မဖယ်ရှား မဖြုတ်ချနိုင်ပဲ အာဏာရှင်သက်ဆိုးရှည်မှာကိုလည်း စိုးရိမ်ကြောင့်ကြလျက်ရှိတယ် ဆိုတာကို ကျမတို့ကောင်းစွာ နားလည်သဘောပေါက် ခံစားမိပါတယ်။ အထူးသဖြင့် တဖက်မှာလည်း ဘေးအန္တရာယ်ကြုံတွေ့နေရတဲ့ အခြေအနေ အချိန်အခါမှာ အရေးပေါ် နိုင်ငံတကာ အကူအညီတွေ အလျင်အမြန်ဆုံး အထိရောက်ဆုံး ရရှိနိုင်ဖို့ အရေးပေါ် လိုအပ်သလို - အခြားတဖက်မှာလည်း ဒီလိုနိုင်ငံတကာက အကူအညီတွေ လူသားချင်းစာနာမှု ဆိုင်ရာအကူအညီတွေကိုအကြောင်းပြုပြီး - တရားမဝင်အာဏာသိမ်း အကြမ်းဖက်အုပ်ချုပ်နေတဲ့ စစ်အာဏာသိမ်းအဖွဲ့ က အမြတ်ထုတ်အလွဲသုံး သွားမှာကို စိုးရိမ်ကြောင့်ကြစိတ်တွေနဲ့ စိတ်မချမ်းမြေ့ဖွယ်ရာကာလကို ဖြတ်သန်းနေရတာဖြစ်ပါတယ်။ ပြည်သူလူထုရဲ့ စိုးရိမ်သောကနဲ့ ကျမတို့ စိုးရိမ်သောကဟာ ဒီနေရာမှာ တထပ်တည်း ထပ်တူကျတယ်လို့ ပြောချင်ပါတယ်။
ဒီလိုအခြေအနေဟာ ကျမတို့ရဲ့ လူသားဆန်မှု နှုန်းစံတန်ဖိုးတွေကို ဖေါ်ထုတ်ကျင့်သုံးဖို့နဲ့ ကျမတို့ရဲ့ ကြံ့ကြံ့ခံနှိုင်စွမ်း ကို ပြသရမယ့်အချိန်လည်းဖြစ်တယ်"လို့ ဝန်ကြီးက ပြောပါတယ်။
လက်ရှိမှာ နိုင်ငံအဝှမ်း ငလျင်ဘေးသင့်ပြည်သူများနှင့် အမျိုးသားညီညွတ်ရေးအစိုးရ ထိန်းချုပ်နယ်မြေရှိ ငလျင်ဘေးသင့် ပြည်သူများအား ဖြစ်နိုင်သည့် နည်းလမ်းပေါင်းစုံဖြင့် အရေးပေါ်ကယ်ဆယ်ရေးနှင့် ကုသရေးလုပ်ငန်းများ ဆောင်ရွက်နိုင်ရန် ကနဦးတွင် အမေရိကန်ဒေါ်လာ (၁)သန်း လျာထားသုံးစွဲ ဆောင်ရွက်မယ်လို့ အသိပေးကြေညာထားပါတယ်။
========================
📌📌 ၃။ နိုင်ငံတကာနှင့် ပြည်တွင်း ကယ်ဆယ်ရေးအဖွဲ့များဟာစစ်ခေါင်းဆောင် မင်းအောင်လှိုင်နှင့် စကစတို့ ချမှတ်ထားသော တင်းကျပ်သော စည်းမျဉ်းများကြောင့် ဘေးဒဏ်သင့် ဒေသများသို့ သွားရောက်ခွင့် ငြင်းပယ်ခံနေရတယ်လို့ဆို
ဧပြီ၁ရက်
နိုင်ငံတကာနှင့် ပြည်တွင်း ကယ်ဆယ်ရေးအဖွဲ့များဟာစစ်ခေါင်းဆောင် မင်းအောင်လှိုင်နှင့် စကစ တို့ ချမှတ်ထားသော တင်းကျပ်သော စည်းမျဉ်းများကြောင့် ဘေးဒဏ်သင့် ဒေသများသို့ သွားရောက်ခွင့် ငြင်းပယ်ခံနေရတယ်လို့ ဆက်သွယ်ရေး၊ သတင်းအချက်အလက်နဲ့ နည်းပညာဝန်ကြီးဌာန ပြည်ထောင်စုဝန်ကြီး ဦးထင်လင်းအောင်က ဆိုရှယ်မီဒီယာမှာဆိုထားပါတယ်။
"ဒေသအများအပြားရှိ ငလျင်ဘေးအန္တရာယ်ကို တုံ့ပြန်သည့်အနေဖြင့် အမျိုးသားညီညွတ်ရေးအစိုးရ (NUG) မှ လူသားချင်းစာနာ ထောက်ထားမှုဆိုင်ရာ ကယ်ဆယ်ရေးလုပ်ငန်းများ ဆောင်ရွက်ခွင့်ပြုရန်အတွက် ထိုးစစ်အား ယာယီရပ်ဆိုင်းကြောင်း ကြေညာခဲ့ပါတယ်။ သို့သော်လည်း စစ်အစိုးရသည် NUG နှင့် ERO များ ထိန်းချုပ်ထားသော ဒေသများတွင် အရပ်သားများကို ဗုံးကြဲခြင်းနှင့် လေကြောင်းတိုက်ခိုက်မှုများ ဆက်လက်လုပ်ဆောင်နေပါတယ်။ တစ်ချိန်တည်းမှာပင် နိုင်ငံတကာနှင့် ပြည်တွင်း ကယ်ဆယ်ရေးအဖွဲ့များသည်လည်း မင်းအောင်လှိုင်နှင့်စကစတို့ ချမှတ်ထားသော တင်းကျပ်သော စည်းမျဉ်းများကြောင့် ဘေးဒဏ်သင့် ဒေသများသို့ သွားရောက်ခွင့် ငြင်းပယ်ခံနေရတယ်"လို့ဆိုပါတယ်။
မတ်လ၂၈ရက်မွန်းလွဲပိုင်း စစ်ကိုင်းမြို့ကိုဗဟိုပြု၍ လှုပ်ခတ်ခဲ့သော အင်အား၇.၇အဆင့်ရှိ ငလျင်ကြောင့် စစ်ကိုင်း၊ မန္တလေးနဲ့ ရှမ်းပြည်နယ်အောင်ပန်း၊ အင်းလေးတို့တွင် ထိခိုက်သေဆုံးသူများပြားခဲ့ပြီး စစ်ကိုင်းမြို့ကို စကစက တင်းကြပ်စွာပိတ်ဆို့ ကိုင်တွယ်လျက်ရှိပါတယ်။
========================
📌📌 ၄။ ဧပြီ၁ရက်နေ့တွင်လည်းမန္တလေးမှာရုပ်အလောင်းများ ဆက်လက်ရှာဖွေတွေ့ရှိ
ဧပြီ၁ရက်
ဧပြီ၁ရက်နေ့တွင်လည်းမန္တလေးမှာ ရုပ်အလောင်းများဆက်လက်ရှာဖွေတွေ့ရှိတယ်လို့ သတင်းရရှိပါတယ်မန္တလေးတိုင်းဒေသကြီးအတွင်း ငလျင်လှုပ်ခတ်မှုကြောင့် (၁၅၁၆)လမ်း၊ (၈၆၈၇)လမ်းကြားရှိ RCC (၇)ထပ် အဆောက်အဦ ပြိုကျပျက်စီး၍ ပိတ်မိနေသူများအား ဧပြီ ၁ရက်နေ့တွင် ကယ်ဆယ်ရေးအဖွဲ့များနဲ့ အိန္ဒိယနိုင်ငံမှ ရှာဖွေကယ်ဆယ်ရေးတပ်ဖွဲ့ဝင်များနှင့် ပူးပေါင်း၍ ရှာဖွေကယ်ဆယ်ရေးလုပ်ငန်းများ ဆောင်ရွက်ရာ အမျိုးသားတဦး အမျိုးသမီးနှစ်ဦး ရုပ်အလောင်းများ ရှာဖွေတွေ့ရှိခဲ့ပါတယ်။
အလားတူ ၃၆ လမ်း၊ ၇၉၈၀လမ်းကြားရှိ TULIP တည်းခိုခန်း အဆောက်အဦ ပြိုကျပျက်စီးသည့်နေရာတွင် ရှာဖွေကယ်ဆယ်ရာ သေဆုံး သူအမျိုးသား(၂)ဦး၏ ရုပ်အလောင်းများအား ရှာဖွေတွေ့ရှိခဲ့ပါတယ်။
Sky Villa အဆောက်အဦ ပြိုကျပျက်စီးသည့်နေရာတွင် ပြည်တွင်း ရှာဖွေကယ်ဆယ်ရေးတပ်ဖွဲ့ဝင်များနဲ့ တရုတ်ပြည်သူ့သမ္မတနိုင်ငံမှ ရှာဖွေကယ်ဆယ်ရေးတပ်ဖွဲ့ဝင်များနှင့် ပူးပေါင်း၍ ရှာဖွေကယ်ဆယ်ရေးလုပ်ငန်းများ ဆောင်ရွက်ရာ ၀၀ ၃၀ အချိန်တွင် မ (၁)ဦး၊ ၀၄ ၀၀ အချိန်တွင် ကျား(၁)ဦး၊ ၁၀ ၀၈ အချိန်တွင် မ(၁)ဦး၊ ၁၀ ၅၄ အချိန်တွင် ကျား(၁)ဦး၊ ၁၁ ၃၄ အချိန်တွင် ကျား(၁)ဦး၊ ၁၁ ၄၁ အချိန်တွင် မ (၁)ဦး တို့၏ ရုပ်အလောင်းများအား ရှာဖွေတွေ့ရှိခဲ့တယ်လို့ သိရပါတယ်။
မန္တလေးတိုင်းဒေသကြီးအတွင်း စုစုပေါင်းလူဦးရေ (၄၀၃)ဦးအား အသက်ရှင်လျက် ကယ်ထုတ်နိုင်ခဲ့ပြီး သေဆုံးသူ (၂၅၉)ဦး၏ ရုပ်အလောင်းများကို ထုတ်ယူနိုင်ထားတယ်လို့ဆိုပါတယ်။
========================
📌📌 ၅။ မြေငလျင် သဘာဝဘေး ၊ ထောက်ပံ့စာနာ ကူညီပေး ကမ်ပိန်းဟာ သိန်း ၁၀၀၀၀ ပြည့်မီရန်အထိအားပေးကူညီကြ
ဧပြီ၁ရက်
မြေငလျင် သဘာဝဘေး ၊ ထောက်ပံ့စာနာ ကူညီပေး ကမ်ပိန်းဟာ သိန်း ၁၀၀၀၀ ပြည့်မီရန်အထိ အားပေးကူညီခဲ့ကြပါတယ်။ ပြည်တွင်းပြည်ပ နိုင်ငံအရပ်ရပ်မှ ပြည်သူများ၏ စာနာရက်ရောစွာ စုပေါင်းပါဝင် ကူညီလှူဒါန်းမှုများကြောင့် Spring Development Bank မှ ဦးဆောင်ပြုလုပ်ပေးနေတဲ့ မြေငလျင် သဘာဝဘေး ၊ ထောက်ပံ့စာနာ ကူညီပေး ကမ်ပိန်းဟာ သိန်း ၁၀၀၀၀ ပြည့်ရန် သိန်း ၅၀၀ သာ လိုပါတော့တယ်လို့ဧပြီ၁ရက်နေ့ညပိုင်းအသိပေးဖော်ပြပါတယ်။ ဒါဟာ ငလျင်ဘေးကြောင့် စိတ်ပူပန်သောကရောက်နေရပြီး အာဏာရှင်ကောင်စီရဲ့ လူမဆန်စွာ ပစ်ပယ်နှောင့်ယှက်နေမှုများကြောင့် ခံပြင်းနာကျည်းနေရတဲ့ ပြည်သူများအတွက် ခွန်အားများစွာ ပေးနိုင်တဲ့ စုပေါင်းညီညွတ်မှုတစ်ခုဖြစ်တယ်လို့ ဆိုပါတယ်။
ကမ်ပိန်းမှ ရရှိသမျှထောက်ပံ့ငွေများကို Ministry of Humanitarian Affairs and Disaster Management - NUG သို့ အမြန်ဆုံးလွှဲပြောင်း၍ ငလျင်ဘေးသင့်ဒေသမှ ပြည်သူများကို ကူညီပေးလျက်ရှိပြီး ဆက်လက်၍လည်း ဧပြီလ ၁၁ ရက်နေ့အထိ SCF တွင် စိတ်ချယုံကြည်စွာ ဝိုင်းဝန်းပေးပို့ လှူဒါန်းနိုင်တယ်လို့သိရပါတယ်။
========================
📌📌 ၆။ အကြမ်းဖက်စစ်ကောင်စီဟာ ငလျင်ဘေးကနေ နိုင်ငံရေးအမြတ်ထုတ်ဖို့နဲ့ နိုင်ငံတကာ တရားဝင်မှု၊ အသိအမှတ်ပြုမှုကို ရရှိဖို့ပဲ လုပ်ဆောင်နေတယ်လို့ဆို
ဧပြီ၁ရက်
အကြမ်းဖက်စစ်ကောင်စီဟာ ငလျင်ဘေးကနေ နိုင်ငံရေးအမြတ်ထုတ်ဖို့နဲ့ နိုင်ငံတကာ တရားဝင်မှု၊ အသိအမှတ်ပြုမှုကို ရရှိဖို့ပဲ လုပ်ဆောင်နေတယ်လို့ မန္တလေးလူထုသပိတ်ခေါင်းဆောင် ဒေါက်တာတေဇာဆန်းက ဆိုပါတယ်။
"ဒီလိုအချိန်မျိုးမှာ ငလျင်ကြီး လှုပ်အပြီး ဖက်ဆစ်တပ် လုပ်နေတာကတော့ အဓိက (၂) ခုကို တွေ့ရတယ်။ ပထမတခုကတော့ ဒီငလျင်ဘေးကနေ သူတို့အတွက် နိုင်ငံရေးအမြတ်ထုတ်ဖို့ပဲ။ နိုင်ငံတကာ တရားဝင်မှု၊ အသိအမှတ်ပြုမှုကို ရရှိဖို့ပဲ။ နောက်ဒုတိယတခုကတော့ ပိုဆိုးပါတယ်။ ဖက်ဆစ်တပ်ဟာ ငလျင်လှုပ်ပြီးကာလ အချိန်မိနစ်ပိုင်းကနေစပြီး ယခုချိန်ထိ အရပ်သားပြည်သူတွေကို လေကြောင်းကနေ ဗုံးကြဲတိုက်ခိုက်မှု မလုပ်တဲ့ နေ့ရက်ဆိုတာ မရှိပါဘူး။ လူထုကို ပါရာမော်တာ စက်တပ်လေထီးကနေ မပစ်ခတ်တဲ့ နေ့ရက်ဆိုတာ မရှိပါဘူး။ မြေပြင်ကနေ စစ်ကြောင်း မထိုးတဲ့ နေ့ရက်ဆိုတာ မရှိပါဘူး"လို့ ဆိုပါတယ်။
စကစတပ်ဟာ ငလျင်ဒဏ်ကို ဆိုးဆိုးရွားရွား ခံစားနေရတဲ့ စစ်ကိုင်းဒေသ၊ မန္တလေးဒေသ၊ မကွေးဒေသလို နေရာတွေမှာပါ စစ်ကြောင်းထိုးတာ၊ လေကြောင်းတိုက်ခိုက်တာတွေက အချိန်တိုင်းမှာ ကျူးလွန်နေကြောင်းသိရှိရပါတယ်။
အခုတင်ပြခဲ့တဲ့ သတင်းတွေကို Radio NUG သတင်းထောက် မင်းသီဟန်နှင့် မင်းစစ်သွေးတို့က ပေးပို့ထားတာ ဖြစ်ပါတယ်။
========================
========================
🚩🚩 ၁။ နိုင်ငံတော်အဆင့် ဝမ်းနည်းခြင်း ကြေညာထားတဲ့ ပထမ ရက်မှာ နောင်ချိုမြို့နယ်ကို စစ်ကောင်စီ ဗုံးကြဲတိုက်ခိုက်
ဧပြီလ ၁ ရက်၊ Radio NUG
စစ်ကောင်စီက နိုင်ငံတော်အဆင့် ဝမ်းနည်းခြင်း အထိမ်းအမှတ် ကြေညာထားတဲ့ ပထမရက်မှာ နောင်ချိုမြို့နယ်အတွင်းက ကျေးရွာ ၂ ရွာကို လေကြောင်းကနေ ဗုံးကြဲတိုက်ခိုက်ခဲ့တယ်လို့ PSLF/TNLA က သတင်းထုတ်ပြန်ထားပါတယ်။
ဧပြီလ ၁ ရက်နေ့ မနက် ၁၁ နာရီဝန်းကျင်မှာ နောင်ချိုမြို့နယ်၊ တောင်လှရွာနဲ့ ဂေါ်ရခါးရွာတို့ကို ဒရုန်းဖြင့် ၁ ကြိမ် ၊ ဂျက်ဖိုက်တာဖြင့် ၁ ကြိမ် ဗုံးကြဲတိုက်ခိုက်ခဲ့တာကြောင့် အရပ်သား ၅ ဦး ဒဏ်ရာရခဲ့ကာ နေအိမ် ၂ လုံး ပျက်စီးခဲ့တယ်လို့ ဆိုပါတယ်။
ထို့အပြင် မတ်လ ၃၁ ရက်နေ့ကလည်း နောင်ချိုမြို့နယ် ကျောက်ကြမ်းကျေးရွာကို ၁၂၀ မမ ဗုံးသီး သယ်ဆောင်လာတဲ့ ဒရုန်းဖြင့် ဗုံးကြဲတိုက်ခိုက်ခဲ့ပါသေးတယ်။
ငလျင်လှုပ်ခတ်ခဲ့တဲ့ မတ်လ ၂၈ ရက်၊ နေ့လည် ၁ နာရီကျော်ကလည်း နောင်လင်ကျေးရွာအတွင်းကို ပေါင် ၂၅၀ ဗုံးသီး ၂ လုံး ကြဲချခဲ့တာကြောင့် နေအိမ် ၃ လုံးနဲ့ စာသင်ကျောင်း ၂ ကျောင်း ပျက်စီးခဲ့ပါသေးတယ်။
========================
🚩🚩 ၂။ မင်းတပ်မြို့ပေါ်တွင် အကြမ်းဖက်စစ်ကောင်စီမှ ဂျက်ဖိုက်တာဖြင့် ပေါင် ၅၀၀ ဗုံး (၂) လုံးကြဲ၍ လေကြောင်းတိုက်ခိုက်မှု ပြုလုပ်သွားခဲ့
ဧပြီလ ၁ ရက်
မင်းတပ်မြို့ပေါ်တွင် အကြမ်းဖက်စစ်ကောင်စီမှ ဂျက်ဖိုက်တာဖြင့် ပေါင် ၅၀၀ ဗုံး (၂) လုံးကြဲ၍ လေကြောင်းတိုက်ခိုက်မှု ပြုလုပ်သွားခဲ့တယ်လို့ မင်းတပ်ပအဖက အတည်ပြုထားပါတယ်။
မင်းတပ်မြို့ပေါ်တွင် ဧပြီ၁ရက်ညနေ ၆:၂၅ မိနစ်ဝန်းကျင်၌ အကြမ်းဖက်စစ်ကောင်စီမှ ဂျက်ဖိုက်တာဖြင့် ပေါင် ၅၀၀ ဗုံး (၂) လုံးကြဲ၍ လေကြောင်းတိုက်ခိုက်မှု ပြုလုပ်သွားခဲ့တယ်လို့ဆိုပါတယ်။
အဆိုပါတိုက်ခိုက်မှုတွင် နေအိမ်ထိခိုက်ပျက်စီးမှုရှိခဲ့ပြီး လူသူထိခိုက်ဒဏ်ရာရမှု မရှိကြောင်းနှင့် မြို့ပေါ်နေပြည်သူများအနေဖြင့် လေကြောင်းအန္တရာယ်ကို အထူးသတိထားကြရန် မင်းတပ်ပအဖကအသိပေးနှိုးဆော်ထားပါတယ်။
========================
🚩🚩 ၃။ စဉ့်ကူးမြို့နယ်၊ လက်ပန်လှရွာကို စစ်ကောင်စီ ဗုံးကြဲ တိုက်ခိုက်ခဲ့
ဧပြီလ ၁ ရက်၊ Radio NUG
မန္တလေးတိုင်း၊ စဉ့်ကူးမြို့နယ် လက်ပန်လှရွာကို စစ်ကောင်စီတပ်က လေယာဉ်ဖြင့် ဗုံးကျဲတိုက်ခိုက်ခဲ့တာကြောင့် နေအိမ်များ မီးလောင်ပြာကျ ခဲ့ရတယ်လို့ ခရိုင် ပကဖ အဖွဲ့ထံက သိရပါတယ်။
မတ်လ ၃၁ ရက်နေ့ ညနေ ၅ နာရီ ၅၄ မိနစ်ခန့်မှာ လက်ပန်လှရွာ ပြည်စိုးအောင် ရပ်ကွက်ကို ဗုံးကြဲတိုက်ခိုက်ခဲ့တာဖြစ်ပြီး နေအိမ် ၂ လုံးနဲ့ တဲ ၁ လုံး မီးလောင်ပျက်စီးခဲ့ရတယ်လို့ ဆိုပါတယ်။
ဗုံးတိုက်ခိုက်မှုကြောင့် ရွာလုံးကျွတ် ထွက်ပြေးတိမ်းရှောင် ခဲ့ရပြီး အရပ်သား ပြည်သူ ထိခိုက်မှု မရှိခဲ့ဘူးလို့ သိရပါတယ်။
ငလျင်ဘေး သင့်နေချိန်မှာ တော်လှန်ရေးတပ်ဖွဲ့တွေဘက်က ထိုးစစ်ဆင် တိုက်ခိုက်မှုများကို ရပ်တန့်ထားပေမယ့် စစ်ကောင်စီက လေကြောင်းတိုက်ခိုက်မှုများကို နေ့စဉ်ရက်ဆက် ဆက်လက်လုပ်ဆောင်နေတာ ဖြစ်ပါတယ်။
========================
🚩🚩 ၄။ ငလျင်နောက်ဆက်တွဲ ကယ်ဆယ်ရေး လုပ်ငန်းများ ထိရောက်စွာ ဆောင်ရွက်နိုင်ရန် တလတာ အပစ်ရပ်ကြောင်း ညီနောင် မဟာမိတ် (၃) ဖွဲ ထုတ်ပြန်
ဧပြီလ ၁ ရက်၊ Radio NUG
ငလျင်နောက်ဆက်တွဲ ကယ်ဆယ်ရေး လုပ်ငန်းများ အမြန်ဆုံး ထိရောက်စွာ ဆောင်ရွက်နိုင်ရန် တိုက်ပွဲဖြစ်နေတဲ့ နေရာများမှာ ထိုးစစ်များကို ပြုလုပ်မှာ မဟုတ်ဘဲ တလတာ တဖက်သတ် အပစ်ရပ်ကြောင်း ညီနောင်မဟာမိတ် ၃ ဖွဲ့က ထုတ်ပြန်လာပါတယ်။
မတ်လ ၂၈ ရက်နေ့က လှုပ်ခတ်ခဲ့တဲ့ ရစ် (ခ်)တာစကေး (၇.၇) အဆင့်ရှိ အင်အား အလွန်ပြင်းထန်တဲ့ ငလျင်ကြီး တခုနဲ့ နောက်ဆက်တွဲ ငလျင်များကြောင့် စစ်ကိုင်းကိုင်း၊ မန္တလေးတိုင်း၊ ရှမ်းပြည်နယ်၊ ပဲခူးတိုင်းနဲ့ နေပြည်တော် အပါအဝင် မြန်မာနိုင်ငံအတွင်းက နေရာဒေသ အများအပြားမှာ ထိခိုက်ပျက်စီး သေဆုံးမှုတွေ ဖြစ်ပွားခဲ့တယ်လို့ ဆိုပါတယ်။
အဆိုပါ ငလျင်ကြောင့် ပြည်သူလူထုများစွာရဲ့ အသက်အိုးအိမ်စည်းစိမ်၊ အိမ်မွေးတိရိစ္ဆာန်၊ လူနေအိမ်၊ တိုက်တာ အဆောက်အုံများ၊ စာသင်ကျောင်းများ၊ ဆေးရုံ ဆေးပေးခန်းများ၊ ဘုရားကျောင်းကန် စေတီပုထိုးများ၊ ဗလီများ အပါအဝင် သာသနိက အဆောက်အအုံများ၊ တန်ဖိုးမဖြတ်နိုင်တဲ့ ရှေးဟောင်းအမွေအနှစ် မြောက်များစွာ ပျက်စီး ဆုံးရှုံးခဲ့ရပြီး ဖြစ်တယ်လို့ ဖော်ပြထားပါတယ်။
ညီနောင်မဟာမိတ် (၃) ဖွဲ့အနေဖြင့် ငလျင်နောက်ဆက်တွဲ အခြေအနေများကို အလေးအနက်ထား စောင့်ကြည့် လေ့လာပြီး ငလျင်ဒဏ်သင့် မြို့များမှာ အရေးပေါ်ကူညီကယ်ဆယ်ရေး၊ ရှာဖွေရေးလုပ်ငန်းများ လုပ်ဆောင်နေတဲ့ ပြည်တွင်းပြည်ပက ကူညီကယ်ဆယ်ရေး စေတနာ့ဝန်ထမ်းများ စိတ်လက်ကြည်သာစွာ လုပ်ကိုင်နိုင်ကြစေဖို့နဲ့ အရေးတကြီး လိုအပ်နေတဲ့ လူသားချင်းစာနာ ထောက်ထားမှုဆိုင်ရာ လုပ်ငန်းများ အမြန်ဆုံး ထိထိရောက်ရောက် ဆောင်ရွက်နိုင်ဖို့ အထူးလိုလားတယ်လို့ ပြောပါတယ်။
ထို့ကြောင့် ညီနောင်မဟာမိတ်များ အနေဖြင့် စစ်ကောင်စီနဲ့ တိုက်ပွဲဖြစ်ပွားလျက်ရှိတဲ့ နေရာများမှာ မိမိကိုယ်မိမိ ခုခံကာကွယ်တဲ့ တုံ့ပြန်မှုမျိုးမှလွဲပြီး စတင်ထိုးစစ်ဆင် တိုက်ခိုက်မှုများ ပြုလုပ်မှာ မဟုတ်ဘဲ ဧပြီလ ၁ ရက်နေ့မှ ၃၀ ရက်နေ့အထိ တလတာ တဖက်သတ် အပစ်အခတ် ရပ်စဲကြောင်း အသိပေးထုတ်ပြန်ထားပါတယ်။
========================
🚩🚩 ၅။ မွန်ပြည်သစ်ပါတီ (စစ်အာဏာရှင်တိုက်ဖျက်ရေး)က မြေငလျင်ဒဏ် ခံစားခဲ့ရသည့် ပြည်သူများအတွက် အရေးပေါ်ကူညီကယ်ဆယ်ရေး အပါအဝင် ပြန်လည်ထူထောင်ရေးလုပ်ငန်းစဥ်များတွင် တတ်နိုင်သည့်ဘက်မှ ဝိုင်းဝန်းကူညီသွားမည်
ဧပြီ၁ရက်
မွန်ပြည်သစ်ပါတီ (စစ်အာဏာရှင်တိုက်ဖျက်ရေး)က မြေငလျင်ဒဏ် ခံစားခဲ့ရသည့် ပြည်သူများအတွက် အရေးပေါ်ကူညီကယ်ဆယ်ရေး အပါအဝင် ပြန်လည်ထူထောင်ရေးလုပ်ငန်းစဥ်များတွင် တတ်နိုင်သည့်ဘက်မှ ဝိုင်းဝန်းကူညီသွားမည်ဖြစ်ကြောင်းထုတ်ပြန်ပါတယ်။
လက်ရှိအချိန်တွင် အဆောက်အအုံများထဲတွင် ပိတ်မိနေဆဲ ပြည်သူများအတွက် လွန်စွာစိုးရိမ်ပူပန်မိပြီး ပြည်သူများ ငလျင်ဒဏ်ပြင်းထန်စွာ ခံစားနေရချိန်တွင် ငလျင်ဒဏ်သင့်ဒေသများတွင် စစ်ကောင်စီမှ လေကြောင်းတိုက်ခိုက်မှုများ ဆက်တိုက်ပြုလုပ်နေသဖြင့် ပြည်သူများ ထပ်ဆင့်ဒုက္ခ ကြုံတွေ့နေရသည့်အပေါ် လွန်စွာ ဝမ်းနည်းကြေကွဲရတယ်လို့ဖော်ပြပါတယ်။
ငလျင်ဒဏ်သင့်ပြည်သူများအား ကယ်ဆယ်ရေးလုပ်ငန်းများအတွက် ရောက်ရှိပြီး၊ ရောက်ရှိနေဆဲဖြစ်သော နိုင်ငံတကာ အစိုးအရအဖွဲ့အစည်းများ၊ နိုင်ငံတကာကယ်ဆယ်ရေးအဖွဲ့အစည်းများနှင့် လက်ရှိ ကယ်ဆယ်ရေးလုပ်ငန်းများ ဆောင်ရွက်နေကြသော ပြည်တွင်းနှင့် ဒေသခံလူမှုအဖွဲ့အစည်းများအားလုံးကို NMSP-AD အနေဖြင့် ကျေးဇူးတင်ရှိပြီး အခြားကျန်ရှိနေသည့် နိုင်ငံများလည်း ပါဝင်ကူညီပေးကြရန် မေတ္တာရပ်ခံအပ်တယ်လို့ဆိုပါတယ်။
NMSP-AD အနေဖြင့် မြေငလျင်ဒဏ် ခံစားခဲ့ရသည့်ပြည်သူများအတွက် အရေးပေါ်ကူညီကယ်ဆယ်ရေး အပါအဝင် ပြန်လည်ထူထောင်ရေးလုပ်ငန်းစဥ်များတွင် တတ်နိုင်သည့်ဘက်မှ ဝိုင်းဝန်းကူညီသွားမည်ဖြစ်ပြီး မိမိတို့မွန်ပြည်သူများအနေဖြင့်လည်း ငလျင်ဒဏ်သင့် ပြည်သူများအား တတ်နိုင်သည့်ဘက်မှ ဝိုင်းဝန်းကူညီ ပေးကြရန် တိုက်တွန်းအပ်တယ်လို့ဖော်ပြပါတယ်။
========================
🚩🚩 ၆။ ငလျင်ဒဏ်သင့်နေချိန် လူသားချင်း စာနာထောက်ထားသောအားဖြင့် တအာင်းပြည်အတွင်း ပျော်ပွဲရွှင်ပွဲနှင့် သင်္ကြန်ပွဲတော် မကျင်းပရန်ဆုံးဖြတ်
ဧပြီ၁ရက်
ငလျင်ဒဏ်သင့်နေချိန် လူသားချင်း စာနာထောက်ထားသောအားဖြင့် တအာင်းပြည်အတွင်း ပျော်ပွဲရွှင်ပွဲနှင့် သင်္ကြန်ပွဲတော် မကျင်းပရန် ဆုံးဖြတ်လိုက်တယ်လို့ ဧပြီလ ၁ရက်တွင် ဗဟိုအုပ်ချုပ်ရေးဌာနမှ စာထုတ်ပြန် ညွှန်ကြားလိုက်တာလို့သိရပါတယ်။ PSLF/TNLA အုပ်ချုပ်သည့် ကျောက်မဲခရိုင်၊ မိုးကုတ်ခရိုင်၊ ကွတ်ခိုင်ခရိုင်၊ နမ့်ဆန်ခရိုင်နှင့် နမ့်ခမ်းခရိုင်တို့တွင် ပျော်ပွဲရွှင်ပွဲနှင့် သင်္ကြန်ပွဲတော် မပြုလုပ်ရန် ဗဟိုအုပ်ချုပ်ရေးဌာနမှ ဧပြီ (၁)ရက်တွင် ထုတ်ပြန်ပါတယ်။ သင်္ကြန်ပွဲတော်ကို ကျင်းပရန်စီစဥ်ထားသော်လည်း မတ်လ (၂၈)ရက်တွင် ပြင်းအား ၇.၇ အဆင့်ရှိသည့် ငလျင်လှုပ်ခတ်သွားခဲ့သောကြောင့် လူထောင်ချီ သေဆုံးခဲ့ပြီး လက်ရှိအချိန်ထိ ကယ်ဆယ်ရေးလုပ်ငန်းများ လုပ်ဆောင်နေရဆဲဖြစ်တယ်လို့ ဆိုပါတယ်။ ထို့ကြောင့် လူသားချင်း စာနာထောက်ထားသောအားဖြင့် သင်္ကြန်ပွဲတော် ကျင်းပခြင်းကို ဖျက်သိမ်းခဲ့ပြီး ဒေသအတွင်းတွင် ကျင်းပမည့် ပျော်ပွဲရွှင်ပွဲများလည်း မကျင်းပရန် မေတ္တာရပ်ခံ စာထုတ်ပြန်အပ်တယ်လို့ဖော်ပြပါတယ်။
========================
🚩🚩 ၇။ ငလျင်ဒဏ်သင့်ထားတဲ့ အင်းလေးဒေသက ကျေးရွာ ၂ ခုကို စစ်ကောင်စီနဲ့ PNO ပြည်သူ့စစ် အဖွဲ့တို့က ဒရုန်းဖြင့် ဗုံးကြဲတိုက်ခိုက်
ဧပြီလ ၁ ရက်၊ Radio NUG
ငလျင်ဒဏ် သင့်ထားပြီး အကူအညီများစွာ လိုအပ်နေတဲ့ ရှမ်းပြည်နယ် တောင်ပိုင်း၊ တောင်ကြီးခရိုင်၊ အင်းလေး ဒေသက ကျေးရွာ ၂ ရွာကို စစ်ကောင်စီတပ်နဲ့ PNO အသွင်ပြောင်း ပြည်သူ့စစ်တပ်တို့က ၂ ရက်ဆက် ဒရုန်းဖြင့် ဗုံးကြဲတိုက်ခိုက်ခဲ့တယ်လို့ သိရပါတယ်။
မတ်လ ၃၁ ရက်နေ့ တနေ့တာအတွင်း ညောင်ရွှေမြို့နယ်၊ ရေပူကျေးရွာကို ဒရုန်းနဲ့ ဗုံးကြဲတိုက်ခိုက်မှု ၈ ကြိမ်တိုင် ပြုလုပ်ခဲ့ပြီး ဒေသခံ ပြည်သူများရဲ့ နေအိမ် ၂ လုံး ထိခိုက်ပျက်စီး ခဲ့တယ်လို့ ဆိုပါတယ်။
အလားတူ မတ်လ ၃၀ ရက်နေ့ကလည်း ညောင်ရွှေမြို့နယ်၊ ဘုရားတောင်ကျေးရွာကို ဒရုန်း၊ လက်နက်ကြီးများနဲ့ ၆ ကြိမ်ထပ်မနည်း ပစ်ခတ်တိုက်ခိုက်ခဲ့ရာ နေအိမ် ၁ လုံး ထိမှန်ပျက်စီးခဲ့ရတယ်လို့ သိရပါတယ်။
ငလျင်ဒဏ်ကြောင့် အင်းလေးဒေသအတွင်း ထိခိုက်သေဆုံးမှုများနဲ့ ပတ်သက်ပြီး အင်းလေးဒေသလူ့အခွင့်အရေး အဖွဲ့က ထုတ်ပြန်ထားချက်အရ သေဆုံးသူ ၈၉ ဦးထိ ရှိခဲ့ပြီး အလုံးစုံ ပြိုကျပျက်စီးတဲ့ နေအိမ်နဲ့ လူနေလို့ မရတဲ့ အခြေအနေ ဖြစ်နေတဲ့ နေအိမ် စုစုပေါင်း ၂,၃၃၇ လုံးထိ ရှိခဲ့တာ ဖြစ်ပါတယ်။
========================
🚩🚩 ၈။ ချောင်းဦးမြို့နယ်မှာ စစ်ကောင်စီက စက်တပ်လေထီး (Paramotor) ဖြင့် လေကြောင်းတိုက်ခိုက်မှု ပြုလုပ်ခဲ့
ဧပြီလ ၁ ရက်၊ Radio NUG
စစ်ကိုင်းတိုင်း၊ ချောင်းဦးမြို့နယ်၊ နွယ်ခွေကျေးရွာ တဝိုက်ကို စစ်ကောင်စီက စက်တပ်လေထီး (Paramotor) ဖြင့် လေကြောင်းတိုက်ခိုက်မှု ဆက်တိုက်ပြုလုပ်ခဲ့တယ်လို့ သိရပါတယ်။
မတ်လ ၃၁ ရက်နေ့ ည ၉ နာရီခွဲ ဝန်းကျင်မှာ မုံရွာမြို့၊ အနောက်မြောက်တိုင်း စစ်ဌာနချုပ် (နမခ) မှ တက်လာတဲ့ စက်တပ်လေထီး (Paramotor) လေကြောင်းတိုက်ခိုက်မှု ၅ ကြိမ် ပြုလုပ်ခဲ့တာပါ။
ထို့အပြင် ဧပြီလ ၁ ရက်နေ့ မနက်ပိုင်းမှာလည်း ချောင်းဦး မြို့အရှေ့ပိုင်းက တနေရာကို လေကြောင်းတိုက်ခိုက်မှု ထပ်မံပြုလုပ်သွားခဲ့ပြီး အခြေအနေ အသေးစိတ်ကိုတော့ မသိရသေးပါဘူး။
ငလျင်လှုပ်ခတ်ခဲ့တဲ့ မတ်လ ၂၈ ရက်နေ့ကလည်း နွယ်ခွေကျေးရွာကို စစ်ကောင် စီတပ်က စက်တပ်လေထီးဖြင့် လေကြောင်းတိုက်ခိုက်မှုများ ပြုလုပ်ခဲ့သေးတယ်လို့ သိရပါတယ်။
ချောင်းဦး မြို့နယ်ဟာ ငလျင်ဒဏ်ကို ဆိုးဝါးစွာ ခံစားခဲ့ရတဲ့ စစ်ကိုင်းမြို့နဲ့ မဝေးတဲ့ မြို့တမြိုလည်း ဖြစ်ပါတယ်။
အခုတင်ပြခဲ့တဲ့ သတင်းတွေကို Radio NUG သတင်းထောက် မင်းစစ်သွေးနှင့် မင်းသီဟန်တို့က ပေးပို့ထားတာ ဖြစ်ပါတယ်။
No comments:
Post a Comment