၂၀၂၅ ဧပြီလ ၃ ရက်နေ့ ညနေခင်း နောက်ဆုံးရပြည်တွင်းသတင်းများ
📌 ၁။ မင်းကွန်းဒေသမှာ ငလျင်ကြောင့် ထိခိုက်သေဆုံးသူ ၄၀ နီးပါးရှိနေပြီး သောက်သုံးရေ ခက်ခဲနေ
📌 ၂။ စစ်ခေါင်းဆောင် မင်းအောင်လှိုင် BIMSTEC အစည်းအဝေးတက်ခွင့်ပြုတဲ့အပေါ် ထိုင်းအစိုးရ ဝေဖန်ခံရ
📌 ၃။ မြန်မာစစ်တပ်နဲ့ တော်လှန်ရေးတပ်တွေကြား ယာယီ အပစ်အခတ်ရပ်စဲရေးကြေညာချက်ကို ဥရောပသမဂ္ဂ ကြိုဆို
📌 ၄။ ဖျာပုံမြို့အနီး ပင်လယ်ပြင်ကို ဗဟိုပြု၍ ရစ်ချ်တာစကေး ၅ အဆင့်ရှိ ငလျင်လှုပ်ခတ်
========================
၂၀၂၅ ခုနှစ် ဧပြီလ ၃ ရက် ညပိုင်းမှာတင်ပြပေးမယ့် Radio NUG စစ်ရေးနှင့် ငလျင်ဘေးဒဏ်သတင်းကောက်နုတ်ချက်များ
🚩 ၁။ ဧပြီ ၂၂ ရက်အထိ အပစ်ရပ်ထားမယ်လို့ KIO/KIA ကြေညာလိုက်ပြီး တော်လှန်ရေးအဖွဲ့တွေကို ပြောထားတဲ့အချက်တွေ စစ်တပ်ကိုယ်တိုင်လိုက်နာဖို့ သတိပေး
🚩 ၂။ ကန်ပက်လက်မြို့နယ်မှာ စစ်ကောင်စီရဲ့ လေကြောင်းတိုက်ခိုက်မှုကြောင့် ပြည်သူအချို့ထိခိုက်မှုတွေရှိခဲ့ပြီး အိမ်နဲ့ရုံးခန်းတွေ ပျက်စီး
🚩 ၃။ စစ်ကောင်စီက အပစ်ရပ်ထားမယ်လို့ ကြေညာပြီးနောက်ရက်မှာပဲ ဝိုင်းမော်ဘက်ကို စစ်ရေးလှုပ်ရှားလာတဲ့အတွက် တိုက်ပွဲဖြစ်
🚩 ၄။ စစ်ဘေးစစ်ဒဏ်နဲ့ သဘာဝဘေးဒဏ်ကြောင့် ဒုက္ခရောက်နေတဲ့ အရပ်သားပြည်သူတွေကို စစ်တပ်က လက်နက်ကြီးနဲ့ ပစ်ခတ်တာကြောင့် အမျိုးသမီးတဦးသေဆုံး
ဤသတင်းများကို ရေဒီယိုအန်ယူဂျီသတင်းတာဝန်ခံများနှင့် ခိုင်လုံသော မိတ်ဖက်သတင်းရင်းမြစ်များဆီမှ အခြေခံတင်ပြထားခြင်း ဖြစ်ပါတယ်။
========================
📌📌 ၁။ မင်းကွန်းဒေသမှာ ငလျင်ကြောင့် ထိခိုက်သေဆုံးသူ ၄၀ နီးပါးရှိနေပြီး သောက်သုံးရေ ခက်ခဲနေ
ဧပြီလ ၃ရက်
စစ်ကိုင်းတိုင်း စစ်ကိုင်းမြို့နယ် မင်းကွန်းဒေသမှာ ငလျင်ကြောင့် ထိခိုက်သေဆုံးသူ ၄၀ နီးပါးရှိပြီး သံဃာတော်တွေ ဦးဆောင်ကာ တော်လှန်ရေးတပ်တွေနဲ့ ပြည်သူလူထုက ရှင်းလင်းကူညီကယ်ဆယ်ရေးလုပ်နေရတယ်လို့ ယူနီကွန်း ပြောက်ကျားတပ်ဖွဲ့က အသိပေးလိုက်ပါတယ်။
မတ်လ ၂၈ ရက်နေ့ နေ့လည်ပိုင်းမှာ လှုပ်ခတ်ခဲ့တဲ့ အင်အားပြင်ငလျင်ကြောင့် မင်းကွန်းဒေသက ရှေးဟောင်းဘုရားတွေနဲ့ စေတီပုထိုးတွေ လူနေအိမ်တွေပြိုကျခဲ့ပြီး သေဆုံးသူ ဦးရေ ၄၀ နီးပါးစာရင်း ရရှိထားကာ မြေငလျင်ဘေးက လွတ်မြောက် လာသူတွေကို ပြည်သူ့ကာကွယ်ရေးတပ်ဖွဲ့ဝင်တွေက ဆေးရုံ ဆေးခန်းပို့ဆောင်ကာ ဆေးကုသပေးနေတယ်လို့ ဆိုပါတယ်။
လက်ရှိအချိန်ထိ ကောက်ယူရရှိထားတဲ့ စာရင်းအရ မင်းကွန်းဒေသက လူသေဆုံးစာရင်းမှာ ၃၀ ကျော် ၄၀ နီးပါးအထိရှိနေပြီး သေဆုံးသွားပြီဖြစ်ပေမယ့် စာရင်းမရသေးတာတွေလည်းရှိနေကာ ဘုန်းကြီးနဲ့ သီလရှင် ပျံလွန်တော်စာရင်း မသိရသေးဘူးလို့ ပြောပါတယ်။
မင်းကွန်းဒေသမှာ မြေငလျင်ကြောင့် ဘုန်းကြီးကျောင်းတွေနဲ့ သောက်သုံးရေတွင်းတွေ ပျက်စီးခဲ့တာကြောင့် ဒေသနေ ပြည်သူတွေ အရေးပေါ် စားစရာ၊ ဆေးဝါး၊ သောက်သုံးရေ၊ နေစရာတွေလိုအပ်နေတာကြောင့် ပြည်တွင်း၊ ပြည်ပက မိဘ ပြည်သူများအနေနဲ့ ဝိုင်းဝန်းကူညီပေးကြဖို့ ယူနီကွန်း ပြောက်ကျားတပ်ဖွဲ့က မေတ္တာရပ်ခံထားပါတယ်။
၇ ဒသမ ၇ ပြင်းအားရှိတဲ့ မြေငလျင်ကြောင့် ဧပြီလ ၃ရက်နေ့ မြန်မာစံတော်ချိန် နံနက်၈နာရီအထိ နောက်ဆုံးရ သေဆုံးသူ ၃,၀၈၅ဦး၊ဒဏ်ရာရသူ ၄,၇၁၅ဦး၊ပျောက်ဆုံးသူ ၃၄၁ဦး ရှိတယ်လို့ သိရပါတယ်။
========================
📌📌 ၂။ စစ်ခေါင်းဆောင် မင်းအောင်လှိုင် BIMSTEC အစည်းအဝေးတက်ခွင့်ပြုတဲ့အပေါ် ထိုင်းအစိုးရ ဝေဖန်ခံရ
ဧပြီလ ၃ရက်
ဘန်ကောက်မြို့မှာကျင်းပတဲ့ ၆ ကြိမ်မြောက် ဘင်္ဂလားပင်လယ်အော် စီးပွားရေးနှင့် နည်းပညာဆိုင်ရာ ဘက်စုံပူးပေါင်း ဆောင်ရွက်ရေးအဖွဲ့ BIMSTEC အစည်းအဝေးကို မြန်မာအာဏာသိမ်းစစ်ခေါင်းဆောင် မင်းအောင်လှိုင် တက်ရောက်ခွင့် ပေးတဲ့ ထိုင်းအစိုးရဟာ ဝေဖန်မှုတွေနဲ့ ရင်ဆိုင်နေရတယ်လို့ ဒေသသတင်းတွေက ဆိုပါတယ်။
မြန်မာနိုင်ငံမှာ ပြင်းထန်တဲ့ငလျင်ကြောင့် ဆိုးရွားတဲ့ပျက်စီးမှုတွေ ကြုံတွေ့နေရချိန်ဖြစ်ပေမယ့် မင်းအောင်လှိုင်အနေနဲ့ အာဏာသိမ်းပြီးနောက်ပိုင်း အရှေ့တောင်အာရှနိုင်ငံတခုကို ရှားရှားပါးပါး လာရောက်ခွင့်ရတဲ့ ခရီးစဉ်တခုဖြစ်ပါတယ်။
မင်းအောင်လှိုင်ကို BIMSTEC အစည်းအဝေး တက်ရောက်ခွင့်မပြုဖို့ စစ်အာဏာရှင်ဆန့်ကျင်ရေး အရပ်ဖက်အဖွဲ့အစည်း ၃၀၀ ကျော်က ထိုင်းအစိုးရနဲ့ ခေါင်းဆောင်တွေကို တောင်းဆိုခဲ့ပေမယ့် ထိုင်းအစိုးရက မျက်ကွယ်ပြုခဲ့တာကြောင့်လည်း ဝေဖန်ခံနေရတာဖြစ်ပါတယ်။
ထိုင်းနိုင်ငံမှာကျင်းပမယ့် BIMSTEC ထိပ်သီးညီလာခံမှာ အာဏာသိမ်း စစ်ခေါင်းဆောင် မင်းအောင်လှိုင်ကို လူကိုယ်တိုင် တက်ရောက်ဖို့ ထိုင်းအစိုးရအနေနဲ့ ခွင့်မပြုသင့်ဘူးလို့ သာမာဆတ် တက္ကသိုလ်က လက်ထောက်ပါမောက္ခ တဦးကလည်း ထောက်ပြခဲ့တာလည်းရှိပါတယ်။
ဒါ့အပြင် ဒီအစည်းအဝေးပွဲမှာ မြန်မာစစ်ခေါင်းဆောင်ကို သံတမန်ရေးအရ ရင်းနှီးကျွမ်းဝင်တဲ့ပုံစံမလုပ်ဖို့ အရှေ့တောင်အာရှ ဒေသဆိုင်ရာ ကျွမ်းကျင်သူတဦးက ဝန်ကြီးချုပ် ပေထုန်တန်ရှင်နာဝပ်ထရာကို သတိပေးထားပါသေးတယ်။
အစည်းအဝေးကို အဖွဲ့ဝင်နိုင်ငံတွေဖြစ်တဲ့ ဘင်္ဂလားဒေ့ရှ်၊ ဘူတန်၊ အိန္ဒိယ၊ မြန်မာ၊ နီပေါနဲ့ သီရိလင်္ကာနိုင်ငံတို့က အကြီးအကဲ တွေဟာ ထိုင်းအစိုးရတာဝန်ရှိသူတွေနဲ့အတူ တက်ရောက်မှာလို့ သိရပါတယ်။
BIMSTEC အစည်းအဝေး နောက်ဆုံးနေ့ဖြစ်တဲ့ မနက်ဖြန် ဧပြီ ၄ ရက်မှာ အိမ်ရှင် ထိုင်းနိုင်ငံက အခုဖြစ်ခဲ့တဲ့ ငလျင်ဒဏ် ကြောင့် ဖြစ်ပေါ်လာတဲ့ သက်ရောက်မှုတွေပတ်သက်တဲ့ ပူးတွဲကြေညာချက်တစ်စောင် ထုတ်ပြန်ဖို့ အဆိုပြုထားတယ်လို့ လည်း သိရပါတယ်။
ထိုင်းအစိုးရဟာ မြန်မာစစ်အုပ်စုကို ဘဏ္ဍာရေးပိုင်း၊ သံတမန်ရေးရာပိုင်းနဲ့ မူဝါဒပိုင်းတွေအပါအဝင် အမျိုးမျိုးသော နည်းလမ်းတွေနဲ့ ထောက်ပံ့ပေးနေပြီး ထိုင်းဝန်ကြီးချုပ် ပေထုန်တန်ရှင်နဝတ်ရဲ့ ခေါင်းဆောင်မှုအောက်မှာ ထိုင်းနိုင်ငံ ဟာ စစ်အုပ်စုရဲ့ စစ်ရာဇ၀တ်မှုတွေနဲ့ လူသားမျိုးနွယ်အပေါ် ကျူးလွန်တဲ့ ရာဇ၀တ်မှုတွေထဲမှာ ပါ၀င်နေခဲ့တယ်လို့ သွေးစွန်းငွေအဖွဲ့က ထောက်ပြထားပါတယ်။
စစ်ခေါင်းဆောင် မင်းအောင်လှိုင်အနေနဲ့ ထိုင်းနိုင်ငံမှာကျင်းပတဲ့ BIMSTEC ဒေသတွင်းထိပ်သီးအစည်းအဝေး တက်ချိန်ဟာ အနောက်နိုင်ငံတွေရဲ့ ပိတ်ဆို့အရေးယူခံရတာတွေနဲ့ ရင်ဆိုင်နေရချိန်ဖြစ်ပြီး ဒီအစည်းအဝေးကတဆင့် တရားဝင် အသိ အမှတ်ပြုမှုရဖို့ ကြိုးပမ်းနေတယ်ဆိုတာ သိမြင်နိုင်တယ်လို့ သွေးစွန်းငွေအဖွဲ့က ဝေဖန်ထားပါတယ်။
========================
📌📌 ၃။ မြန်မာစစ်တပ်နဲ့ တော်လှန်ရေးတပ်တွေကြား ယာယီ အပစ်အခတ်ရပ်စဲရေးကြေညာချက်ကို ဥရောပသမဂ္ဂ ကြိုဆို
ဧပြီလ ၃ရက်
အာဏာသိမ်းယူထားတဲ့ မြန်မာစစ်တပ်နဲ့ တော်လှန်ရေးတပ်တွေကြား ယာယီ အပစ်အခတ်ရပ်စဲရေးကြေညာချက်တွေကို ဥရောပသမဂ္ဂ EU က ကြိုဆိုကြောင်း ဒီနေ့ ဧပြီ ၃ ရက် မနက်ပိုင်းမှာ ထုတ်ပြန်ပါတယ်။
မြန်မာစစ်တပ်နဲ့ ပဋိပက္ခမှာ ပါဝင်ပတ်သက်နေတဲ့ အခြားသောအဖွဲ့အစည်းတွေရဲ့ ယာယီ အပစ်အခတ်ရပ်စဲရေးကြေညာ ချက်ကို ကြိုဆိုတဲ့အကြောင်း ဥရောပသမဂ္ဂက အသိပေးထုတ်ပြန်လာတာဖြစ်ပါတယ်။
အပစ်အခတ်ရပ်စဲရေးဟာ မြေငလျင်ဘေးသင့် ပြည်သူတွေအတွက် လူသားချင်းစာနာထောက်ထားမှုဆိုင်ရာ အကူအညီ တွေ အလျင်မြန်ဆုံးနဲ့ ဘေးကင်းလုံခြုံပြီး အဟန့်အတားမရှိ ရရှိစေဖို့ အလွန်လိုအပ်တဲ့ ခြေလှမ်းတရပ်ဖြစ်တယ်လို့ ဆိုပါတယ်။
အင်အားပြင်း ငလျင်ကြောင့် ထိခိုက်ခံစားနေရသူတွေကို ကယ်ဆယ်နိုင်ဖို့နဲ့ လူသားချင်း စာနာထောက်ထားမှုအကူအညီ ပေးရေး လုပ်ငန်းတွေအတွက် ငလျင်ဒဏ်သင့်ဒေသတွေနဲ့ ဆက်စပ်ဒေသတွေမှာ ခုခံကာကွယ်စစ်ကလွဲလို့ ထိုးစစ်အားလုံး မတ် ၃၀ ရက်ကနေ ဧပြီ ၁၂ ရက်ထိရပ်ဆိုင်းထားမယ်လို့ အမျိုးသားညီညွတ်ရေးအစိုးရက မတ်လ ၂၉ ရက်မှာကြေညာခဲ့ ပါတယ်။
ငလျင်နောက်ဆက်တွဲ ကယ်ဆယ်ရေးလုပ်ငန်းတွေ အမြန်ဆုံး ထိရောက်စွာ ဆောင်ရွက်နိုင်ဖို့အတွက် တိုက်ပွဲဖြစ်နေတဲ့ နေရာတွေမှာ ထိုးစစ်ဆင်တာတွေ လုပ်မှာမဟုတ်ဘဲ တလတာ အပစ်ရပ်ထားမယ်လို့ မြောက်ပိုင်းမဟာမိတ်ညီနောင်သုံးဖွဲ့က ဧပြီလ ၁ ရက်မှာ ထုတ်ပြန်ခဲ့ပါတယ်။
စစ်ကောင်စီနဲ့ ကချင်လွတ်မြောက်ရေးတပ်မတော် KIO/KIA တို့ကလည်း ဧပြီ ၂ ရက်ညမှာပဲ ယာယီအပစ်ရပ်ထားမယ်လို့ အသီးသီး ထုတ်ပြန်ကြေညာခဲ့ပါတယ်။
========================
📌📌 ၄။ ဖျာပုံမြို့အနီး ပင်လယ်ပြင်ကို ဗဟိုပြု၍ ရစ်ချ်တာစကေး ၅ အဆင့်ရှိ ငလျင်လှုပ်ခတ်
ဧပြီလ ၃ရက်
ဖျာပုံမြို့တောင်ဘက် ၈၆ ကီလိုမီတာအကွာ ပင်လယ်ပြင်ကို ဗဟိုပြု၍ အင်အား ရစ်ချ်တာစကေး ၅ အဆင့်ရှိတဲ့ ငလျင် လှုပ်ခတ်သွားတယ်လို့ အမေရိကန်ဘူမိဗေဒ-ငလျင်စောင့်ကြည့်ရေးအဖွဲ့-USGS နဲ့ အမျိုးသားညီညွတ်ရေးအစိုးရ လူသားချင်းစာနာထောက်ထားရေးနှင့်ဘေးအန္တရာယ်ဆိုင်ရာစီမံခန့်ခွဲရေးဝန်ကြီးဌာန MOHADM က ထုတ်ပြန်ထားပါတယ်။
ဧပြီလ ၂ ရက်နေ့ ည ၁၀ နာရီ ၅၇ မိနစ်အချိန်မှာ ဖျာပုံမြို့တောင်ဘက် ၈၆ ကီလိုမီတာအကွာ ပင်လယ်ပြင်ကို ဗဟိုပြုပြီး လှုပ်ခတ်သွားတာလို့ အသိပေးထားပါတယ်။
ဒီငလျင်ဟာ မြေအောက်အနက် ၁ဝ ကီလိုမီတာကို ဗဟိုပြုလှုပ်ခတ်မှုခဲ့တာကြောင့် ပုသိမ် ဖျာပုံနဲ့ မအူပင်က ဒေသနေ ပြည်သူတွေ သိရှိခံစားရတယ်လို့ ဆိုပါတယ်။
စစ်ကိုင်းငလျင်ကြီးရဲ့ နောက်ဆက်တွဲ ငလျင်ငယ်တွေ ဆက်လက်လှုပ်ခတ်နိုင်တဲ့အတွက် ငလျင်ဘေးဆောင်ရန်၊ရှောင်ရန်၊ သတိပြုရန်များနဲ့အညီ နေထိုင်ကြပါဖို့ အမျိုးသားညီညွတ်ရေးအစိုးရ လူသားချင်းစာနာထောက်ထားရေးနှင့်ဘေးအန္တရာယ် ဆိုင်ရာ စီမံခန့်ခွဲရေးဝန်ကြီးဌာန MOHADMက သတိပေးထားပါတယ်။
အခု တင်ပြခဲ့တဲ့ သတင်းအတွေကို Radio NUG သတင်းထောက် ကိုခန့်မှ ပေးပို့ထားတာ ဖြစ်ပါတယ်။
========================
========================
🚩🚩 ၁။ ဧပြီ ၂၂ ရက်အထိ အပစ်ရပ်ထားမယ်လို့ KIO/KIA ကြေညာလိုက်ပြီး တော်လှန်ရေးအဖွဲ့တွေကို ပြောထားတဲ့အချက်တွေ စစ်တပ်ကိုယ်တိုင်လိုက်နာဖို့ သတိပေး
ဧပြီလ ၃ရက်
ဧပြီ ၂၂ ရက်အထိ အပစ်ရပ်ထားမယ်လို့ KIO/KIA ကြေညာလိုက်ပြီး တော်လှန်ရေးအဖွဲ့တွေကို ပြောထားတဲ့အချက်တွေ စစ်တပ်ကိုယ်တိုင် လိုက်နာဖို့လိုတယ်လို့ KIO/KIA ဘက်က သတိပေးပြောကြားလိုက်ပါတယ်။
ဧပြီ ၂ ရက်ကနေ ၂၂ ရက်အထိ ယာယီအပစ်ရပ်ထားမယ်လို့ စစ်ကောင်စီဘက်က သတင်းထုတ်ပြန်ပြီးနောက် KIO/KIA ဘက်က သတင်းထုတ်ပြန်ရာမှာ အခုလို သတိပေးပြောကြားလိုက်တာဖြစ်ပါတယ်။
KIO/KIA အနေနဲ့ ဒီကာလအတွင်း ခုခံကာကွယ်တာကလွဲလို့ ထိုးစစ်ဆင်တိုက်ခိုက်တာတွေ ရပ်ဆိုင်းထားမယ်လို့ အသိပေး ထားပါတယ်။
စစ်ကောင်စီဘက်က ယာယီအပစ်ရပ်ထားမယ်ဆိုတဲ့ ထုတ်ပြန်ချက်ဟာ မတ်လ ၂၈ ရက်နေ့က လှုပ်ခတ်ခဲ့တဲ့ အင်အားပြင်း မြေငလျင်ဘေးဒဏ်ကြောင့် ကူညီကယ်ဆယ်ရေးလုပ်ငန်းတွေ ဆောင်ရွက်နိုင်ဖို့ ထုတ်ပြန်လိုက်တာလို့ နားလည်ရတဲ့ အကြောင်း KIO/KIA ထုတ်ပြန်ချက်မှာ ဖော်ပြထားပါတယ်။
စစ်ကောင်စီဘက်က ထုတ်ပြန်တဲ့ ထုတ်ပြန်ချက် အပိုဒ် ၄ ပါ အကြောင်းအရာနဲ့ အချက်အလက်တွေကို တိုင်းရင်းသား တော်လှန်ရေးအဖွဲ့တွေနဲ့ တော်လှန်ရေးတပ်ဖွဲ့တွေသာမက စစ်တပ်ဘက်ကလည်း လိုက်နာဖို့လိုအပ်တယ်လို့ ဆိုပါတယ်။
စစ်ကောင်စီရဲ့ ထုတ်ပြန်ချက် အပိုဒ် - ၄ မှာ ယာယီအပစ်ရပ်ကြေညာထားတဲ့ကာလအတွင်း တိုင်းရင်း သားလက်နက်ကိုင် အဖွဲ့တွေနဲ့ အခြားလက်နက်ကိုင်အဖွဲ့များအနေနဲ့ စစ်ကောင်စီတပ်စခန်းတွေကို တိုက်ခိုက်ခြင်း၊ တပ်ဌာနချုပ်တွေကို နှောင့်ယှက်တိုက်ခိုက်ခြင်းများ၊ အင်အားစုဆောင်းခြင်း၊ ပြင်ဆင်စုဖွဲ့ခြင်း၊ နယ်မြေချဲ့ထွင်ခြင်း စတာတွေ မလုပ်ဖို့ ကန့်သတ် ထားပြီး လုပ်ခဲ့မယ်ဆိုရင် တုန့်ပြန်သွားမယ်လို့ ဖော်ပြထားပါတယ်။
ဒီ ထုတ်ပြန်ချက် အပိုက် ၄ နဲ့ ပတ်သက်လို့ KIO ခေါင်းဆောင်တဦးဖြစ်တဲ့ ဒုတိယဗိုလ်ချုပ်ကြီးဂွမ်မော်က သဘာဝဘေး ပြန်လည်ထူထောင်ရေးလုပ်ငန်းဟာ ရေရှည်လုပ်ရမှာဖြစ်တဲ့အတွက် အပစ်ရပ်ကြေညာချက်တွေကို SAC အပါအဝင် တိုက်ပွဲဆင်နွှဲနေသူတွေအားလုံး လိုက်နာဖို့ လိုတယ်လို့ မှတ်ချက်ပြုထားပါတယ်။
မတ်လ ၂၈ ရက်က အင်အားပြင်းငလျင်လှုပ်ခတ်ခဲ့ပြီးနောက် အမျိုးသားညီညွတ်ရေးအစိုးရက လူသားချင်း စာနာထောက် ထားမှုအကူအညီပေးရေးလုပ်ငန်းတွေလုပ်ဆောင်နိုင်ဖို့ ငလျင်ဒဏ်သင့်ဒေသတွေနဲ့ ဆက်စပ်နေတဲ့ဒေသတွေမှာ ခုခံကာကွယ်စစ်လွဲပြီး ထိုးစစ်အားလုံး မတ် ၃၀ ကနေ ဧပြီ ၁၂ ရက်ထိရပ်ဆိုင်းထားမလို့ မတ်လ ၂၉ ရက်မှာ အစောဆုံး ကြေညာခဲ့ပါတယ်။
ငလျင်နောက်ဆက်တွဲ ကယ်ဆယ်ရေးလုပ်ငန်းတွေ အမြန်ဆုံးထိရောက်စွာဆောင်ရွက်နိုင်ဖို့ တိုက်ပွဲဖြစ်နေတဲ့ နေရာတွေမှာ ထိုးစစ်တွေ လုပ်မှာမဟုတ်ဘဲ တလတာ အပစ်ရပ်မယ်လို့ မြောက်ပိုင်းမဟာမိတ်ညီနောင်သုံးဖွဲ့ကလည်း ဧပြီလ ၁ ရက်နေ့မှာ ထုတ်ပြန်ခဲ့ပါတယ်။
========================
🚩🚩 ၂။ ကန်ပက်လက်မြို့နယ်မှာ စစ်ကောင်စီရဲ့ လေကြောင်းတိုက်ခိုက်မှုကြောင့် ပြည်သူအချို့ထိခိုက်မှုတွေရှိခဲ့ပြီး အိမ်နဲ့ရုံးခန်းတွေ ပျက်စီး
ဧပြီလ ၃ရက်
ချင်းပြည်နယ် ကန်ပက်လက်မြို့နယ်ကို စစ်ကောင်စီက လေကြောင်းကနေ ဗုံးကြဲတိုက်ခိုက်ခဲ့တာကြောင့်အရပ်သား ပြည်သူ အချို့ ထိခိုက်မှုတွေရှိခဲ့ပြီး နေအိမ်နဲ့ ရုံးအဆောက်အအုံတွေ ပျက်စီးခဲ့တယ်လို့ မြို့နယ်ပြည်သူ့အုပ်ချုပ်ရေးအဖွဲ့က အသိပေး ထုတ်ပြန်ပါတယ်။
စစ်ကောင်စီဟာ ဧပြီလ ၂ရက် နေ့လည် ၁ နာရီ ၁၅ မိနစ်ခန့်အချိန်မှာ တိုက်လောယဉ်နဲ့ အကြိမ်ကြိမ်ဗုံးကြဲခဲ့တာကြောင့် ပြည်သူပိုင်အိမ်တွေနဲ့ အစိုးရ အဆောက်အအုံတွေ ထိခိုက်ပျက်စီးခဲ့ရတာလို့ ဆိုပါတယ်။
စစ်ကောင်စီရဲ့ လေကြောင်းတိုက်ခိုက်မှုကြောင့် ပြည်သူပိုင်အိမ် ၅လုံး၊ ထွေအုပ်ရုံး၊ ကျေးလက်ဦးစီးမှူးရုံး၊ ရွေးကောက်ပွဲ ကော်မရှင်ရုံး၊ မြို့နယ် စသုံးလုံးရုံး၊ မြို့နယ်စီမံကိန်းရုံး စတဲ့ ရုံးတွေအပါအဝင် ခေါ်နူးစုမ်ရိပ်သာက အဆောက်အအုံ စုစုပေါင်း အဆောက်အအုံ အလုံး ၂၀ ပျက်စီးခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
ဒါကြောင့် ကန်ပက်လက်မြို့နယ်အတွင်းကကျေးရွာတွေနဲ့ မြို့ပေါ် ရပ်ကွက်နေ ပြည်သူတွေအနေနဲ့ လေကြောင်းရန်ကို အထူးပြုဂရုပြုနေထိုင်ကြဖို့ မြို့နယ် ပအဖက နှိုးဆော်ထားပါတယ်။
စစ်ကောင်စီဟာ အခုရက်ပိုင်းအတွင်း ချင်းပြည်နယ်ထဲက ကန်ပက်လက်နဲ့မင်းတပ်မြို့တွေမှာ တိုက်ပွဲမရှိဘဲ လေကြောင်း တိုက်ခိုက်ခဲ့တာလို့ ဒေသတွင်းသတင်းရင်းမြစ်တွေက ပြောပါတယ်။
လေကြောင်းတိုက်ခိုက်မှုကြောင့် မင်းတပ်မြို့နယ်မှာလည်း အဆောက်အအုံတွေ ထိခိုက်ပျက်စီးမှုတွေရှိတယ်လို့ သိရပါတယ်။
စစ်ကောင်စီဟာ မြန်မာပြည်သူတွေ ငလျင်ဘေးကြုံနေရချိန်မှာပဲ လေကြောင်းကနေ ဗုံးကြဲတိုက်ခိုက်တာတွေ ဆက်တိုက် လုပ်နေတယ်လို့ ပြစ်တင်ရှုပ်ချဝေဖန်ခံနေရတာကြောင့် ဧပြီ ၂၂ရက်နေ့အထိ ယာယီ အပစ်ရပ်ထားမယ်လို့ မနေ့ ဧပြီ ၂ ရက် ညပိုင်းမှာ ကြေညာခဲ့ပါတယ်။
========================
🚩🚩 ၃။ စစ်ကောင်စီက အပစ်ရပ်ထားမယ်လို့ ကြေညာပြီးနောက်ရက်မှာပဲ ဝိုင်းမော်ဘက်ကို စစ်ရေးလှုပ်ရှားလာတဲ့အတွက် တိုက်ပွဲဖြစ်
ဧပြီလ ၃ရက်
အကြမ်းဖက်စစ်ကောင်စီက ငလျင်ဘေးကယ်ဆယ်ရေးအတွက် ရက်ပေါင်း ၂၀ ကြာ အပစ်ရပ်ထားမယ်လို့ မနေ့ညက ကြေညာခဲ့ပေမယ့် ဒီနေ့မနက်ပိုင်းမှာ ကချင်ပြည်နယ် ၀ိုင်းမော်မြို့နယ်ကို လက်နက်ကြီးတွေနဲ့ ပစ်ခတ်ပြီး စစ်ရေး လှုပ်ရှားလာတဲ့အတွက် တိုက်ပွဲဖြစ်နေတယ်လို့ ဒေသသတင်းရင်းမြစ်တွေက ပြောပါတယ်။
အကြမ်းဖက်စစ်ကောင်စီက ဧပြီလ ၂ ရက်ကနေ ၂၂ ရက်နေ့အထိ ယာယီအပစ်ရပ်ကာလအဖြစ်သတ်မှတ်ပြီး ငလျင်ဒဏ် သင့် ပြည်သူတွေကို ကူညီကယ်ဆယ်ရေးနဲ့ ပြန်လည်ထူထောင်ရေးလုပ်ငန်းတွေ အရှိန်အဟုန်နဲ့ဆောင်ရွက်နိုင်စေဖို့ အပစ်ရပ်ထားမယ်လို့ ကြေညာခဲ့တာဖြစ်ပါတယ်။
အခုလို ကြေညာထားပေမယ့် ဒီနေ့ မတ်လ ၃ ရက် မနက်ပိုင်းမှာ ၀ိုင်းမော်မြို့နယ်မှာရှိတဲ့ ခလရ ၅၈ တပ်ရင်းက လက်နက် ကြီးတွေ အဆက်မပြတ်ပစ်ခတ်ခဲ့တဲ့အပြင် စစ်ရေးလှုပ်ရှားမှုတွေပါ လုပ်ဆောင်လာတာကြောင့် KIA တပ်တွေနဲ့ ထိတွေ့ တိုက်ပွဲဖြစ်လာတာလို့ ဒေသသတင်းရင်းမြစ်တွေက ဆိုပါတယ်။
မနက် ၈ နာရီ ၁၅ မိနစ်လောက်ကစပြီး မိုင်းတားဘက်ကတက်လာပြီး လမြန်ကွန်ကရစ်တံတားကနေ KIA တပ်တွေရှိတဲ့ နေရာကို စစ်ကောင်စီဘက်က ပစ်ခတ်တိုက်ခိုက်လာတာလို့ ဒေသတွင်းသတင်းရင်းမြစ်တွေရဲ့အဆိုကိုကိုးကားပြီး ဒေသတွင်းသတင်းဌာနအချို့က ဖော်ပြပါတယ်။
လမြန်ရွာအထက်ပိုင်းကို KIA နဲ့ပူးပေါင်းတပ်တွေတပ်ထိန်းချုပ်ထားတာတဲ့အတွက် စစ်ကောင်စီဘက်က ထိုးစစ်ဆင် တိုက်ခိုက်လာတာလို့လည်း အသိပေးထားပါတယ်။
ထို့အတူ ဒီမနက် ၆ နာရီလောက်ကစပြီး မိတ္တီလာ ရှမ်းတဲလေတပ်က Y 12 လေယာဉ်က စစ်ကိုင်းတိုင်း အင်းတော်မြို့ ကို ဗုံး ၃၁ လုံးကြဲချခဲ့တယ်လို့ လေကြောင်းကင်းထောက်အဖွဲ့ ဖြစ်သော NAS-နပ်စ် လေကြောင်းရန်ကင်းထောက်အဖွဲ့က သတင်းထုတ်ပြန်ထားပါတယ်။
အကြမ်းဖက်စစ်ကောင်စီရဲ့ ယာယီအပစ်ရပ်ကြေညာချက်အပေါ် တုံ့ပြန်တဲ့အနေနဲ့ KIO ဘက်ကလည်း ရက် ၂၀ ကြာ အပစ်ရပ်မယ်လို့ ထုတ်ပြန်ကာ စစ်တပ်အနေနဲ့ ကြေညာချက်အတိုင်း လိုက်နာဖို့ သတိပေးထားပါတယ်။
========================
🚩🚩 ၄။ စစ်ဘေးစစ်ဒဏ်နဲ့ သဘာဝဘေးဒဏ်ကြောင့် ဒုက္ခရောက်နေတဲ့ အရပ်သားပြည်သူတွေကို စစ်တပ်က လက်နက်ကြီးနဲ့ ပစ်ခတ်တာကြောင့် အမျိုးသမီးတဦးသေဆုံး
ဧပြီလ ၃ရက်
စစ်ဘေးစစ်ဒဏ်နဲ့ သဘာဝဘေးဒဏ်ကြောင့် ဒုက္ခရောက်နေတဲ့ အရပ်သားပြည်သူတွေကို ငှဲ့ညှာထောက်ထားတာမရှိဘဲ ပြည်သူလူထုနေထိုင်ရာ ကျေးရွာအတွင်းကို လက်နက်ကြီးတွေနဲ့ ပစ်ခတ်ခဲ့တာကြောင့် အမျိုးသမီးတဦး သေဆုံးခဲ့ရတယ်လို့ KNU ဗဟိုက ဒီနေ့ ဧပြီ ၃ ရက်မှာ ထုတ်ပြန်ပါတယ်။
ကရင်အမျိုးသားအစည်းအရုံး ကော်သူးလေအုပ်ချုပ်နယ်မြေ ဒူးပလာယာခရိုင် ကျုံဒိုးမြို့နယ်မှာ တိုက်ပွဲဖြစ်တာမရှိဘဲ အကြမ်းဖက်စစ်တပ်က ဧပြီလ ၁ ရက်နေ့ ညနေ ၅ နာရီခွဲမှာ လက်နက်ကြီးတွေနဲ့ ပစ်ခတ်ခဲ့တာကြောင့် သေဆုံးရတာလို့ ဆိုပါတယ်။
ကျုံဒိုးမြို့နယ် မြောက်ကြာအင်းအုပ်စု ဝိဇ္ဇာကုန်းကျေးရွာပတ်ဝန်းကျင်မှာ တိုက်ပွဲဖြစ်တာမရှိဘဲ အကြမ်းဖက် စစ်ကောင်စီ တပ် စကခ−၁၂ လက်အောက်ခံ တပ်သစ်အမြှောက်ကုန်းကနေ ၁၂၀ မမ လက်နက်ကြီး ၅ လုံး ပစ်ခတ်ခဲ့ရာ လက်နက်ကြီး ကျည် ကျရောက်ပေါက်ကွဲမှုကြောင့် ဝိဇ္ဇာကုန်းကျေးရွာက အသက် ၅၇ နှစ်အရွယ် အမျိုးသမီးတဦး နှလုံးဖောက်ပြီး နောက်ပြန်လဲကျရာက အုပ်ခုံနဲ့ရိုက်မိပြီး သေဆုံးသွားခဲ့တာလို့ အသိပေးပါတယ်။
တနိုင်ငံလုံးမှာရှိတဲ့ ပြည်သူလူထု စစ်ဘေးစစ်ဒဏ်နဲ့ သဘာဝဘေးဒဏ်တွေကြောင့် အသက်အိုးအိမ်စည်းစိမ်တွေ ဆုံးရှုံးခဲ့ ရပြီး ဒုက္ခရောက်နေချိန်မှာ အာဏာသိမ်းထားတဲ့ အကြမ်းဖက်စစ်ကောင်စီဟာ သူသားခြင်း စာနာထောက်ထားမှုမရှိဘဲ စစ်ရေးပစ်မှတ်မဟုတ်တဲ့ ဘာသာရေးအဆောက်အအု့တွေ ပြည်သူ့ဆေးရုံ ဆေးခန်းတွေ စာသင်ကျောင်းတွေနဲ့ အပြစ်မဲ့ အရပ်သားပြည်သူတွေ နေထိုင်တဲ့နေရာတွေကို ပစ်မှတ်ထားပြီး ရည်ရွယ်ချက်ရှိရှိနဲ့ ပစ်ခတ်တိုက်ခိုက်နေတာလို့ KNU ဗဟိုက ထုတ်ပြန်ထားပါတယ်။
အခုတင်ပြခဲ့တဲ့ သတင်းကိုတော့ Radio NUGသတင်းထောက် ကိုခန့်မှ ပေးပို့ထားတာဖြစ်ပါတယ်
No comments:
Post a Comment