၂၀၂၅ ဧပြီလ ၃ ရက်နေ့ မနက်ခင်း နောက်ဆုံးရပြည်တွင်းသတင်းများ
📌 ၁။ အမျိုးသားညီညွတ်ရေးအစိုးရက ဧပြီ (၁၃) ရက်နေ့မှ (၂၀) ရက်နေ့အထိ နိုင်ငံလုံးဆိုင်ရာ ပြည်သူ့ဝမ်းနည်းကြေကွဲမှုနှင့် နှစ်သိမ့်အားပေးမှု ရက်သတ္တပတ်အဖြစ် သတ်မှတ်
📌 ၂။ စစ်မှန်တဲ့ လူထုအစိုးရနဲ့သာ ပြည်သူတို့ရဲ့ ဒုက္ခတွေကို အပြီးဆုံးတိုင် လွတ်မြောက်အောင် လုပ်ဆောင်နိုင်မှာ ဖြစ်ကြောင်းနိုင်ငံတကာအသိုင်းအဝိုင်းကို ယာယီသမ္မတ သတင်းစကားပါး
📌 ၃။ "အကြမ်းဖက်စစ်အုပ်စုဟာ ငလျင်ဘေးဒဏ်ကို စီမံခန့်ခွဲနိုင်တဲ့ အရည်အချင်းမရှိသလို ကိုင်တွယ် ဖြေရှင်းလိုတဲ့ စိတ်စေတနာလည်း လုံးဝမရှိဘူး"လို့ပြည်ထောင်စုဝန်ကြီးချုပ်ပြောကြား
📌 ၄။ ဘေးသင့်တိုင်း (၃) ခုနှင့် ပြည်နယ် (၁) ခုတို့မှ အိမ်ထောင်စု နှစ်ထောင်ကျော်အတွက် အရေးပေါ်ထောက်ပံ့ငွေနဲ့ စားနပ်ရိက္ခာတို့ကို ချိတ်ဆက်ထောက်ပံခဲ့ကြောင်း လူသားစာနာဝန်ကြီးဌာန သတင်းထုတ်ပြန်
📌 ၅။ ထိုင်းနိုင်ငံ၊ ဘန်ကောက်မြို့တွင် ငလျင်ဒဏ် ကြုံတွေ့ခံစားခဲ့ရသည့် အလုပ်သမားများအတွက် လိုအပ်သော ကူညီမှုများနှင့် ထောက်ပံ့ပေးခြင်းများကို NUG နှင့် မိတ်ဖက်များပြုလုပ်ခဲ့
📌 ၆။ ငလျင်ဒဏ်သင့်ပြည်သူများ ပြန်လည်ထူထောင်ရေးကိစ္စရပ်များအတွက် ထိထိရောက်ရောက် ဆောင်ရွက်နိုင်ရန် Earthquake Response Team For Sagaing Federal Unit ဖွဲ့စည်း
📌 ၇။ သြစတြေးလျက ငလျင်ဒဏ်သင့် မြန်မာပြည်သူများအတွက် ကနဦးပံ့ပိုးထားသော ဒေါ်လာ (၂) သန်းအပြင် ထပ်တိုး ဒေါ်လာ (၇) သန်းကို ပေးအပ်မည်
📌 ၈။ ဥရောပသမဂ္ဂ အဖွဲ့ဝင်နိုင်ငံများမှ ပေးအပ်သည့် အကူအညီများ မြန်မာမှ လိုအပ်နေသူများထံ ရောက်ရှိမှု သေချာစေရန်အတွက် ကျွမ်းကျင်ပညာရှင် (၁၂) ဦးပါ အဖွဲ့တစ်ဖွဲ့ကို ဘန်ကောက်နှင့် ကွာလာလမ်ပူတို့တွင် နေရာချထားမည်
📌 ၉။ သက်ဆိုင်ရာ JICA ဝန်ထမ်းနှင့် ဆေးဘက်ဆိုင်ရာ ပညာရှင်များအပါအဝင် အဖွဲ့ဝင် ၃၂ ဦး ပါဝင်သော ဂျပန် ကူညီကယ်ဆယ်ရေးအဖွဲ့ မြန်မာနိုင်ငံရောက်ရှိ
📌 ၁၀။ ကိုရီးယား၊ အင်ချွန်း ဘူဖြောင်းတွင် ကျင်းပမည့် တော်လှန်သင်္ကြန်ပွဲက ရရှိမည့် ရန်ပုံငွေအားလုံးကို ငလျင်ဘေးသင့်ပြည်သူများအား လှူဒါန်းသွားမည်
========================
၂၀၂၅ ခုနှစ် ဧပြီလ ၃ ရက်နေ့ မနက်ပိုင်းမှာတင်ပြပေးမယ့် Radio NUG စစ်ရေးနှင့် ငလျင်ဘေးဒဏ်သတင်းကောက်နုတ်ချက်များ
🚩 ၁။ ငလျင်ဘေးဒဏ်ခံစားနေရသော ညောင်ဦးမြို့နယ်၊ ကျောက်ပြင်ကန်ကျေးရွာအား တိုက်ပွဲဖြစ်ပွားခဲ့ခြင်း လုံးဝမရှိဘဲ စကစကစစ်ကြောင်းထိုး မီးရှို့ဖျက်ဆီး
🚩 ၂။ မင်းတပ်မြို့ကို စစ်ကောင်စီက ပေါင် (၅၀၀) ဗုံးများဖြင့် ထပ်မံ ဗုံးကြဲတိုက်ခိုက်
🚩 ၃။ ကန်ပက်လက်မြို့အား စကစလေတပ်က ဂျက်ဖိုက်တာနဲ့ အကြိမ်ကြိမ် ဗုံးကြဲတိုက်ခိုက်၍ ပြည်သူ့နေအိမ်နဲ့ အဆောက်အဦ အလုံး (၂၀) ထိခိုက်ပျက်စီး
🚩 ၄။ လေးမျက်နှာမြို့နယ်မှာ စစ်ကောင်စီက ဗုံးကြဲတိုက်ခိုက် ခဲ့တာကြောင့် အရပ်သား (၂) ဦး သေဆုံး
🚩 ၅။ နောင်ချိုတွင် စစ်ကောင်စီတပ်က ဒရုန်းဖြင့် ဗုံးကြဲတိုက်ခိုက်ခဲ့ရာ ဒေသခံ တဦး သေဆုံး
🚩 ၆။ စကစတပ်များဟာ မတ္တရာမြို့ထဲမှ (၁၂၀) မမလက်နက်ကြီးဖြင့် အရှေ့ဘက်သို့ပစ်ခတ်
🚩 ၇။ စစ်ကောင်စီက ထိုးစစ်မရပ်ပါက ကယ်ဆယ်ရေး လုပ်ငန်းများကို ချိန်ညှိပြီး စစ်ဆင်ရေး လုပ်သွားမယ်လို့ JCS ထုတ်ပြန်
🚩 ၈။ ငလျင်ဘေးအန္တရာယ်ကနေ ပြန်လည်ထူထောင်မှုတွေ ဆောင်ရွက်ချိန်မှာ တခြားနိုင်ငံတွေနှင့် ပူးပေါင်းဆောင်ရွက်ရန်နှင့် စစ်ကောင်စီက လေကြောင်းကနေ ဗုံးကြဲတိုက်ခိုက်မှုတွေကို ရပ်တန့်ဖို့ နယူးဇီလန် Labour ပါတီ ထုတ်ပြန်
🚩 ၉။ မြန်မာပြည်အလယ်ပိုင်း ငလျင်ဘေးကြုံပြည်သူတွေအတွက် ပူတာအိုခရိုင် ပြည်သူ့ကာကွယ်ရေးတပ်ဖွဲ့မှ အလှူခံရရှိငွေနှင့် PDF ရဲဘော်ရဲမယ်များရဲ့မုန့်ဖိုးများထဲမှ ကူညီမည်
🚩 ၁၀။ မကွေးတိုင်းမှာအကြမ်းဖက်စစ်အုပ်စုကြောင့် လူပေါင်း (၉၅) ဦး သေဆုံးခဲ့ပြီးအသက် (၁၈) နှစ်အောက် ကလေးငယ် (၁၂) ဦး ပါဝင်
ဤသတင်းများကို ရေဒီယိုအန်ယူဂျီသတင်းတာဝန်ခံများနှင့် ခိုင်လုံသော မိတ်ဖက်သတင်းရင်းမြစ်များဆီမှ အခြေခံတင်ပြထားခြင်း ဖြစ်ပါတယ်။
========================
📌📌 ၁။ အမျိုးသားညီညွတ်ရေးအစိုးရက ဧပြီ (၁၃) ရက်နေ့မှ (၂၀) ရက်နေ့အထိ နိုင်ငံလုံးဆိုင်ရာ ပြည်သူ့ဝမ်းနည်းကြေကွဲမှုနှင့် နှစ်သိမ့်အားပေးမှု ရက်သတ္တပတ်အဖြစ် သတ်မှတ်
ငလျင်ဘေးကြောင့် ပူဆွေးနေရမှုတွေအတွက် ပြည်သူအချင်းချင်း အားပေးနှစ်သိမ့်နိုင်ဖို့ နိုင်ငံလုံးဆိုင်ရာ ပြည်သူ့ဝမ်းနည်းကြေကွဲမှုနဲ့ နှစ်သိမ့်အားပေးမှု ရက်သတ္တပတ်ကို ဧပြီလ (၁၃) မှ (၂၀) ရက်နေ့ထိ သတ်မှတ်ကြောင်း အမျိုးသားညီညွတ်ရေးအစိုးရ NUG က ကြေညာခဲ့ပါတယ်။
အဆိုပါ ရက်သတ္တပတ် အတွင်း NUG အစိုးရ၊ နိုင်ငံခြားရေးဝန်ကြီးဌာန၊ ကိုယ်စားလှယ်ရုံးတွေ၊ သံတမန်ရုံးတွေ (သို့) သတ်မှတ်ထားတဲ့ နေရာတွေမှာ စုစည်းကာ ဝမ်နည်းခြင်းမှတ်တမ်း ရေးထိုးခြင်း၊ ပန်းပေးပို့ခြင်း၊ နေထိုင်ရာ တိုင်းပြည်တွေရဲ့ ဓလေ့ထုံးစံတွေနှင့်အညီ စုဝေးဆုတောင်းမေတ္တာ ပို့သခြင်းများ ပြုလုပ်သွားမယ်လို့ ဆိုပါတယ်။
ထို့အပြင် အသက်ဆုံးပါးသွားတဲ့ ပြည်သူတွေနဲ့ ကျန်ရစ်သူ မိသားစုတွေအတွက် အောက်မေ့သတိရ ခွန်အားယူ ဆုတောင်းပွဲတွေ ပြုလုပ်ခြင်း၊ ရေစက်ချအမျှဝေခြင်း၊ သက်ဆိုင်ရာဘာသာအလိုက် ဆုတောင်းမေတ္တာ ပို့သခြင်း၊ ကုသိုလ်ကောင်းမှု ရည်စူးပြုလုပ်ခြင်း၊ ထိခိုက်ခံစားရသူတွေကို နားလည်စာနာအားပေးမှု နိုင်ငံတွင်း နိုင်ငံပြင်ပမှာ နည်းလမ်းအမျိုးမျိုးနဲ့ ပြုလုပ်ခြင်းများလည်း ပြုလုပ်သွားမယ်လို့ သိရပါတယ်။
မြန့်မာ အရေးကို စိတ်ကောင်း စေတနာကောင်းနဲ့ ကူညီနေတဲ့ နိုင်ငံတကာရှိ လူ့အဖွဲ့အစည်း၊ နိုင်ငံတကာ အစိုးရ တွေနှင့်အတူ ဝမ်းနည်းကြောင်း ပြသမှု၊ နှစ်သိမ့်မှု၊ ဆုတောင်းမှုတွေကို အတူတကွ တဦးချင်း ဖြစ်စေ၊ အဖွဲ့လိုက် ဖြစ်စေ လုပ်ဆောင်သွားဖို့ကိုလည်း တိုက်တွန်နှိုးဆော် ထားပါတယ်။
အမျိုးသားညီညွတ်ရေး အစိုးရ (NUG) အနေဖြင့် စိုးမိုးနယ်မြေတွေမှာ ငလျင်ဘေးဒဏ်သင့် ပြည်သူလူထုကို (၇၂) နာရီအတွင်း ကူညီကယ်ဆယ်မှုတွေကို အပြည့်အဝ အားစိုက်လုပ်ကိုင်နိုင်ခဲ့ပေမယ့် အကြမ်းဖက်စစ်ကောင်စီစိုးမိုးရာ ဒေသတွေမှာ ကိုယ်ထိလက်ရောက် ဝင်ရောက်မကူညီနိုင်တဲ့အတွက် များစွာ ဝမ်းနည်းရကြောင်း ငလျင်ဒဏ်သင့် ပြည်သူလူထုကို တောင်းပန်ထားပါတယ်။
========================
📌📌 ၂။ စစ်မှန်တဲ့ လူထုအစိုးရနဲ့သာ ပြည်သူတို့ရဲ့ ဒုက္ခတွေကို အပြီးဆုံးတိုင် လွတ်မြောက်အောင် လုပ်ဆောင်နိုင်မှာ ဖြစ်ကြောင်းနိုင်ငံတကာအသိုင်းအဝိုင်းကို ယာယီသမ္မတ သတင်းစကားပါး
အမျိုးသားညီညွတ်ရေးအစိုးရအဖွဲ့အစည်းအဝေးတွင် ယာယီသမ္မတ ဒူဝါလရှီးလက “အကြမ်းဖက် စစ်အုပ်စုဟာ အာဏာတည်မြဲရေးအတွက်ဆိုရင် ဘယ်အရာကိုမဆို လုပ်ရဲတယ်ဆိုတာကို ပြည်သူတစ်ရပ်လုံးက နားလည်သဘောပေါက်နေပြီး ဖြစ်ပါတယ်။ ဒါ့ကြောင့် ကျွန်တော့်အနေနဲ့ နိုင်ငံတကာအသိုင်းအဝိုင်းနဲ့ ဒေသတွင်း အိမ်နီးချင်းနိုင်ငံ တွေကို အထူး မေတ္တာရပ်ခံလိုတာကတော့ - စစ်မှန်တဲ့ လူထုအစိုးရနဲ့သာ နိုင်ငံ့အတွင်းက ပြည်သူတို့ရဲ့ ဒုက္ခတွေကို အပြီးဆုံးတိုင် လွတ်မြောက် အောင် လုပ်ဆောင်နိုင်မှာ ဖြစ်ကြောင်း သိစေချင်ပါတယ်" လို့ ဆိုပါတယ်။
ဒါ့အပြင်ပြည်သူလူထုတစ်ရပ်လုံး ခံစားနေရတဲ့ ဘေးဒုက္ခတွေဟာ လတ်တလော အနာသက်သာရုံ၊ “ဆေးမြီးတိုနည်းလောက်နဲ့” အမှန်တကယ် မပျောက်နိုင်ဘူးဆိုတာ နိုင်ငံတကာအသိုင်းအဝိုင်း တစ်ခုလုံးနဲ့ ဒေသတွင်းနိုင်ငံအားလုံးကို အလေးအနက်ထား သိစေချင်ပါတယ်။” လို့ ယာယီသမ္မတက နိုင်ငံတကာအတွက် သတင်းစကားကို ထည့်သွင်းပြောကြားခဲ့ပါတယ်။
========================
📌📌 ၃။ "အကြမ်းဖက်စစ်အုပ်စုဟာ ငလျင်ဘေးဒဏ်ကို စီမံခန့်ခွဲနိုင်တဲ့ အရည်အချင်းမရှိသလို ကိုင်တွယ် ဖြေရှင်းလိုတဲ့ စိတ်စေတနာလည်း လုံးဝမရှိဘူး"လို့ပြည်ထောင်စုဝန်ကြီးချုပ်ပြောကြား
အမျိုးသားညီညွတ်ရေးအစိုးရ အစိုးရအဖွဲ့ အစည်းအဝေး အမှတ်စဉ် ၁၀/၂၀၂၅ တွင် ဝန်ကြီးချုပ် မန်းဝင်းခိုင်သန်းက အခုလို ပြောကြားခဲ့ပါတယ်။
"အကြမ်းဖက်စစ်အုပ်စုဟာ ပြည်သူလူထုတရပ်လုံး ဆင်းရဲဒုက္ခတွေများစွာ ကြုံတွေ့ခံစားရစေတဲ့ ဒီငလျင်ဘေးဒဏ်ကို စီမံခန့်ခွဲနိုင်တဲ့ အရည်အချင်းမရှိသလို ကိုင်တွယ်ဖြေရှင်းလိုတဲ့ စိတ်စေတနာလည်း လုံးဝမရှိပါဘူး။ သူတို့ဟာ ပြည်သူတွေရဲ့ ဒုက္ခကို ကူညီဖေးမဖို့ထက် သူတို့ရဲ့ အာဏာကို ဆက်လက်ထိန်းသိမ်းနိုင်ရေးကိုပဲ ဆောင်ရွက်နေ တယ်ဆိုတာ အားလုံးလည်း မြင်တွေ့ပြီး ဖြစ်ပါတယ်။ အထူးသဖြင့် ကျွန်တော်တို့ အမျိုးသားညီညွတ်ရေးအစိုးရအနေနဲ့ ထိုးစစ်အားလုံးကို ၂ ပတ်ကြာ ရပ်တန့်ထားပေမယ့် သူတို့ဟာ ဒီငလျင်ဘေးအန္တရာယ်ကာလအတွင်းမှာတောင် လေယာဉ်နဲ့ ဗုံးကြဲခြင်းတွေကို ဆက်တိုက် လုပ်ဆောင်နေပါတယ်။ ဒါဟာ သူတို့ရဲ့ရက်စက်ယုတ်မာမှုကို ပိုပြီး ထင်ရှားစေတဲ့ အပြင် နိုင်ငံတကာအသိုင်းအဝိုင်းမှာလည်း စက်ဆုပ်ရွံရှာစရာကောင်းတဲ့လုပ်ရပ်အဖြစ် ပေါ်လွင်စေပါတယ်။ ဒါတွေကို နိုင်ငံတကာက သိသာမြင်သာရှိအောင် ကျွန်တော်တို့ မီးမောင်းဖိုးပြဖို့လိုမှာ ဖြစ်ပါတယ်" လို့ ဝန်ကြီးချုပ်က ဆိုပါတယ်။
ဒါ့အပြင် ဒီငလျင်ဘေးအန္တရာယ်နဲ့ နောက်ဆက်တွဲ အခက်အခဲတွေကို ကျော်လွှားနိုင်ဖို့ တော်လှန်ရေးအင်အားစုတွေအားလုံး ပူးပေါင်းဆောင်ရွက်ဖို့ လိုအပ်မှာ ဖြစ်ပြီးတော့ အမျိုးသားညီညွတ်ရေးအစိုးရအနေနဲ့တော့ တော်လှန်ရေး အင်အားစုတွေ၊ မဟာမိတ်အဖွဲ့အစည်းတွေ၊ အရပ်ဖက်အဖွဲ့အစည်းတွေနဲ့အတူ လက်တွဲပြီး ကူညီကယ်ဆယ်ရေးလုပ်ငန်းတွေကို အစွမ်းကုန် ပူးပေါင်းဆောင်ရွက်သွားဖို့ အသင့်ရှိနေကြောင်းလည်း ဝန်ကြီးချုပ်ကသတင်းစကားပါးခဲ့ပါတယ်။
========================
📌📌 ၄။ ဘေးသင့်တိုင်း (၃) ခုနှင့် ပြည်နယ် (၁) ခုတို့မှ အိမ်ထောင်စု နှစ်ထောင်ကျော်အတွက် အရေးပေါ်ထောက်ပံ့ငွေနဲ့ စားနပ်ရိက္ခာတို့ကို ချိတ်ဆက်ထောက်ပံခဲ့ကြောင်း လူသားစာနာဝန်ကြီးဌာန သတင်းထုတ်ပြန်
ဘေးသင့်တိုင်း (၃) ခုနှင့် ပြည်နယ် (၁) ခုတို့မှ အိမ်ထောင်စု (၂,၂၃၉) စုတို့အတွက် အရေးပေါ်ထောက်ပံ့ငွေနဲ့ စားနပ်ရိက္ခာတို့ကို ချိတ်ဆက်ထောက်ပံခဲ့ကြောင်း လူသားချင်းစာနာထောက်ထားရေးနှင့် ဘေးအန္တရာယ်ဆိုင်ရာ ဝန်ကြီးဌာနက ငလျင်ဘေးကြောင့် ထိခိုက်ဆုံးရှုံးမှု အခြေအနေအစီရင်ခံစာ (အမှတ်စဉ်-၄) တွင် ထုတ်ပြန်ဖော်ပြပါတယ်။
အင်အား (၇.၇) ပမာဏရှိ စစ်ကိုင်းငလျင် လှုပ်ခတ်ခြင်းကြောင့် ထိခိုက်ဆုံးရှုံးမှုများ ကြုံတွေ့ခဲ့ရသည့် မြို့နယ်ပေါင်း (၄၇) မြို့နယ်ရှိကြောင်း၊ ၄င်းတို့အနက် မန္တလေးတိုင်းအတွင်းရှိ မြို့နယ်များ၊ အမရပူရ၊ နေပြည်တော်၊ စစ်ကိုင်းနဲ့ တံတားဦးမြို့နယ် ရှမ်းပြည်နယ်ညောင်ရွှေမြို့နယ်တို့တွင် လူသေဆုံးမှုနဲ့ ထိခိုက်ဆုံးရှုံးမှု အဆိုးရွားဆုံး ကြုံတွေ့ခဲ့ရတယ်လို့ ဖော်ပြပါတယ်။
ငလျင်ဘေးအတွက် အမျိုးသားညီညွတ်ရေးအစိုးရ လူသားချင်းစာနာထောက်ထားရေးနှင့် ဘေးအန္တရာယ်ဆိုင်ရာဝန်ကြီးဌာနသို့ ပြည်တွင်း၊ ပြည်ပအလှူရှင်များက လှူဒါန်းငွေများမှာ ဧပြီလ (၂) ရက်နေ့အထိ ငွေကျပ် ၁,၇၀၀,၀၀၀,၀၀၀ ရရှိထားပြီး ဘေးသင့်တိုင်း (၃) ခုနှင့် ပြည်နယ် (၁) ခုတို့မှ အိမ်ထောင်စု (၂,၂၃၉) စုတို့အတွက် အရေးပေါ်ထောက်ပံ့ငွေ ကျပ် ၆၇၉,၂၀၀,၀၀၀ နှင့် စားနပ်ရိက္ခာထောက်ပံငွေ ကျပ် ၁၂၀,၀၀၀,၀၀၀၊ စုစုပေါင်း ၇၉၉,၂၀၀,၀၀၀ ကျပ်တို့ကို ချိတ်ဆက်ထောက်ပံ့မှုများ ဆောင်ရွက်နေပြီး ကျန်ဒေသများကိုလည်း ဆက်လက်ပံ့ပိုးသွားမယ်လို့ ဖော်ပြထားပါတယ်။
========================
📌📌 ၅။ ထိုင်းနိုင်ငံ၊ ဘန်ကောက်မြို့တွင် ငလျင်ဒဏ် ကြုံတွေ့ခံစားခဲ့ရသည့် အလုပ်သမားများအတွက် လိုအပ်သော ကူညီမှုများနှင့် ထောက်ပံ့ပေးခြင်းများကို NUG နှင့် မိတ်ဖက်များပြုလုပ်ခဲ့
မတ်လ (၂၈) ရက်နေ့တွင် ဖြစ်ပွားခဲ့သော ငလျင်ဒဏ်ကြောင့် ထိုင်းနိုင်ငံ၊ ဘန်ကောက်မြို့၊ Chatuchak စျေးအနီး ဆောက်လုပ်နေဆဲ အစိုးရငွေစာရင်းစစ်ရုံး အဆောက်အဦ ပြိုကျခဲ့ပြီး ထိခိုက်ဒဏ်ရရှိမှု၊ သေဆုံးမှုနှင့် ပျောက်ဆုံးနေသော မြန်မာရွှေ့ပြောင်းအလုပ်သမားများနှင့် ပတ်သက်၍ လိုအပ်သည်များ ကူညီပံ့ပိုးပေးနိုင်ရန်အတွက် မတ်လ (၂၉) ရက်နေ့မှစ၍ အမျိုးသားညီညွတ်ရေးအစိုးရ၊ အလုပ်သမားဝန်ကြီးဌာနသည် မိတ်ဖက်အဖွဲ့အစည်းများနှင့်အတူ ပြိုကျခဲ့သည့်နေရာသို့ နေ့စဉ်ရက်ဆက်သွားရောက်ခဲ့တယ်လို့ သတင်းထုတ်ပြန်ပါတယ်။
ထို့နောက် အသက်မသေပဲ လွတ်မြောက်လာသည့် အလုပ်သမားများ၊ မိသားစုဝင်များနှင့်တွေ့ဆုံကာ နှစ်သိမ့်အားပေးစကားပြောကြားခြင်း၊ လိုအပ် သည်များ ကူညီပံ့ပိုးပေးခြင်းနှင့် ပြင်းထန်ဒဏ်ရာရသူများကို သွားရောက်တွေ့ဆုံ၍ မိသားစုများနှင့် ဆက်သွယ်ပေးခြင်းများ ဆောင်ရွက်ပေးခဲ့ပြီးဧပြီလ (၂) ရက်နေ့ မနက် (၆) နာရီအထိ ပျောက်ဆုံးနေသော အလုပ်သမား (၇၂) ဦး ကျန်ရှိနေသေးကြောင်း၊ ဒဏ်ရာရရှိပြီး ဆေးကုသဆဲ အလုပ်သမား (၉) ဦးအနက် မြန်မာရွှေ့ပြောင်းအလုပ်သမား (၈) ဦိး၊ သေဆုံးသူ အလုပ်သမား (၁၅) ဦးအနက် မြန်မာရွှေ့ပြောင်းအလုပ်သမား (၃) ဦိး အား အတည်ပြုထားနိုင်ပြီး အဆိုပါ အလုပ်သမားများ၏ နစ်နာမှုများအတွက် ဥပဒေနှင့်အညီ ဆက်လက် ကူညီဆောင်ရွက်ပေးသွားမယ်လို့ သိရပါတယ်။
========================
📌📌 ၆။ ငလျင်ဒဏ်သင့်ပြည်သူများ ပြန်လည်ထူထောင်ရေးကိစ္စရပ်များအတွက် ထိထိရောက်ရောက် ဆောင်ရွက်နိုင်ရန် Earthquake Response Team For Sagaing Federal Unit ဖွဲ့စည်း
စစ်ကိုင်းမြို့ဗဟိုပြု ငလျင်ကြီးလှုပ်ခတ်ပြီးနောက် နိုင်ငံနဲ့အဝန်း ပြည်သူလူထု အသက်သေဆုံးရမှုများနှင့် ထိခိုက်ဒဏ်ရာရမှုများ၊ အိုးအိမ်အဆောက်အဦများ ပြိုကျပျက်စီးခြင်း၊ လမ်း၊ တံတား၊ ဆည်/တာတမံများ ပျက်စီးခြင်း၊ စေတီပုထိုးများနှင့် ဘာသာရေး အဆောက်အဦများ ပျက်စီးခြင်းနှင့် အခြားအခြေခံ အဆောက်အဦး မြောက်များစွာ ပျက်စီးဆုံးရှုံးရမှုများ ကြုံတွေ့ခံစားခဲ့ရသည့်အပြင် နောက်ဆက်တွဲ သက်ရောက်မှုများလည်း ဆက်လက်ခံစားနေရဆဲ ဖြစ်ပါတယ်။
ဤအခြေအနေအရပ်ရပ်ကို အမြန်ဆုံး ကူညီနိုင်ရေးနှင့် ငလျင်ဒဏ်သင့်ပြည်သူများ ပြန်လည်ထူထောင်ရေး ကိစ္စရပ်များအတွက် ထိထိရောက်ရောက် ဆောင်ရွက်နိုင်ရန် စစ်ကိုင်းဖက်ဒရယ် ယူနစ်လွှတ်တော်မှ တာဝန်ပေးအပ်ထားသည့် ကော်မတီနှင့် စစ်ကိုင်းဖိုရမ် ဖက်ဒရေးရှင်း၏ လုပ်ငန်းတဖွဲ့ဖြစ်သော ''စစ်ကိုင်းပြည်သူ ဖေးမကူကွန်ရက်'' တို့ ပူးပေါင်းပြီး Earthquake Response Team For Sagaing Federal Unit ကို ဖွဲ့စည်းလိုက်တယ်လို့ထုတ်ပြန်ပါတယ်။
ပြည်တွင်းပြည်ပ လူထုအကျိုးသယ်ပိုးလိုသူများအပြင် နိုင်ငံတကာ အဖွဲ့အစည်းများအနေဖြင့် ငလျင်ဘေးဒဏ်သင့် ပြည်သူများအတွက် ထိထိရောက်ရောက် ကူညီနိုင်ရန် အတွက် ယင်းအဖွဲ့အား ချိတ်ဆက်ကူညီနိုင်တယ်လို့ သတင်းရရှိပါတယ်။
========================
📌📌 ၇။ သြစတြေးလျက ငလျင်ဒဏ်သင့် မြန်မာပြည်သူများအတွက် ကနဦးပံ့ပိုးထားသော ဒေါ်လာ (၂) သန်းအပြင် ထပ်တိုး ဒေါ်လာ (၇) သန်းကို ပေးအပ်မည်
သြစတြေးလျအနေဖြင့် ငလျင်ဒဏ်သင့် မြန်မာပြည်သူများအတွက် International Committee of the Red Cross မှတစ်ဆင့် ကနဦးပံ့ပိုးထားသော ဒေါ်လာ (၂) သန်းအပြင် ထပ်တိုး ဒေါ်လာ (၇) သန်းကို ပေးအပ်မည်ဖြစ်ကြောင်း သိရပါတယ်။
သြစတြေးလျ၏ ထပ်တိုးကူညီမှုတွင် သြစတြေးလျအန်ဂျီအိုများနှင့် ၄င်းတို့၏ ဒေသခံမိတ်ဖက်များမှ တစ်ဆင့် အစားအစာ၊ ရေနှင့်ပတ်ဝန်းကျင်သန့်ရှင်းရေး၊ အရေးပေါ်ကျန်းမာရေးနှင့် ပညာရေးတို့အတွက် ဒေါ်လာ (၃.၅) သန်းပေးအပ်ခြင်း၊ Emergency Action Alliance မှတစ်ဆင့် ဒေါ်လာ (၅) သိန်းအထိ ပေးအပ်ခြင်းတို့ ပါဝင်မှာ ဖြစ်ပါတယ်။
ဒါ့အပြင် အရေးပေါ်ကယ်ဆယ်ရေးပစ္စည်းများနှင့် ASEAN Coordination Centre for Humanitarian Assistance on Disaster Management ၏ လုပ်ငန်းများကို ပံ့ပိုးရန် ဒေါ်လာ (၃) သန်း ပေးအပ်ခြင်းတို့ ပါဝင်တယ်လို့ သြစတြေးလျသံရုံး - ရန်ကုန်က ဖော်ပြပါတယ်။
စစ်အာဏာရှင်အဖွဲ့အစည်းသည် ငလျင်ဒဏ်သင့်ဒေသများတွင် လေကြောင်းတိုက်ခိုက်မှုများဆက်လက်ပြုလုပ်မှုအားရှုံ့ချပြီး စစ်ရေးဆောင်ရွက်ချက်များကို ချက်ချင်းရပ်တန့်ရန်နှင့် ငလျင်ဒဏ်သင့်ဒေသများသို့ လူသားချင်းစာနာမှုအကူအညီများ အပြည့်အဝပေးပို့နိုင်ရန် စစ်အာဏာရှင်အဖွဲ့အစည်းကို တောင်းဆိုအပ်တယ်လို့ ဆိုထားပါတယ်။
မြန်မာနိုင်ငံအတွက် ပေးအပ်သည့် သြစတြေးလျ၏ လူသားချင်းစာနာမှုဆိုင်ရာအကူအညီများအား စနစ်တကျ စစ်ဆေးအကဲဖြတ်ထားသည့် နိုင်ငံတစ်ဝန်းရှိ လူသားချင်းစာနာမှုဆိုင်ရာ အဖွဲ့အစည်းများမှတစ်ဆင့် လူသားချင်းစာနာမှုဆိုင်ရာ စည်းမျဥ်းများနှင့်အညီ ပေးအပ်ခြင်းဖြစ်တယ်လို့ ဆိုပါတယ်။
========================
📌📌 ၈။ ဥရောပသမဂ္ဂ အဖွဲ့ဝင်နိုင်ငံများမှ ပေးအပ်သည့် အကူအညီများ မြန်မာမှ လိုအပ်နေသူများထံ ရောက်ရှိမှု သေချာစေရန်အတွက် ကျွမ်းကျင်ပညာရှင် (၁၂) ဦးပါ အဖွဲ့တစ်ဖွဲ့ကို ဘန်ကောက်နှင့် ကွာလာလမ်ပူတို့တွင် နေရာချထားမည်
မြန်မာနိုင်ငံတွင် မြေငလျင်လှုပ်ခတ်ပြီးနောက် ဥရောပသမဂ္ဂမှ Humanitarian Air Bridge လူသားချင်း စာနာထောက်ထားမှုဆိုင်ရာ စီမံကိန်းကို စတင်လိုက်ပြီး နောက်ထပ်အကူအညီများ ပံ့ပိုးပေးခဲ့တယ်လို့ ဥရောသမဂ္ဂရုံး - ရန်ကုန်က ဧပြီ (၂) ရက်မှာ ထုတ်ပြန်ပါတယ်။
ရွက်ဖျင်တဲများ၊ ကလေးသူငယ်များအတွက် အကာအကွယ်ပစ္စည်းများ၊ ကျန်းမာရေးနှင့် ရေနှင့် သန့်ရှင်းရေးသုံးပစ္စည်းများ အပါအဝင် တန်ချိန် (၈၀) ရှိသည့် ဥရောပသမဂ္ဂမှ ထောက်ပံ့ရေးပစ္စည်းများကို ယူနီဆက်ဖ်ထံ ပေးပို့သွားမှာဖြစ်တယ်လို့ ဆိုပါတယ်။
ထောက်ပံ့ပစ္စည်းများကို ဥရောပသမဂ္ဂ၏ မိတ်ဖက်အဖွဲ့အစည်းများမှ စုဆောင်းလက်ခံရရှိရေးနှင့် ဖြန့်ဝေရန်အတွက် မန္တလေးသို့ ပို့ဆောင်မှာဖြစ်တယ်လို့ သိရပါတယ်။
ထို့အပြင် ကုလသမဂ္ဂ လူသားချင်းစာနာထောက်ထားမှုရေးရာ ညှိနှိုင်းရေးရုံးမှ ဥရောပသမဂ္ဂ အရပ်ဘက်ကာကွယ်ရေးယန္တရားကို စတင်လိုက်ပြီးနောက် ဥရောပသမဂ္ဂအဖွဲ့ဝင်နိုင်ငံများမှ ပေးအပ်သည့် အကူအညီများသည် လိုအပ်နေသူထံသို့ ရောက်ရှိမှု သေချာစေရန်အတွက် ဆွီဒင်၊ ဖင်လန်၊ နယ်သာလန်၊ စလိုဗေးနီးယား၊ လူဇင်ဘတ်နှင့် နော်ဝေးနိုင်ငံ တို့မှ ကျွမ်းကျင်ပညာရှင် (၁၂) ဦးပါ အဖွဲ့တစ်ဖွဲ့ကို ဘန်ကောက်နှင့် ကွာလာလမ်ပူတို့တွင် နေရာချထားမှာ ဖြစ်တယ်လို့ သိရပါတယ်။
ဘေးအန္တရာယ်ကျရောက်ပြီး အရေးအကြီးဆုံးအချိန် နာရီပိုင်းအတွင်း ကူညီပံ့ပိုးမှုသေချာစေရန် ဥရောပသမဂ္ဂသည် သက်ရောက်မှုအကဲဖြတ်မှုကို အဆင်ပြေချောမွေ့စေရန် Copernicus ဂြိုဟ်တုဝန်ဆောင်မှုကို စတင်ခဲ့ပြီး လူသားချင်း စာနာမှုအကူအညီ ယူရို (၂.၅) သန်းကို ထုတ်ပြန်ခဲ့ပါသည်။ ယနေ့တွင် ဥရောပသမဂ္ဂသည် အပြည်ပြည်ဆိုင်ရာ ကြက်ခြေနီနှင့် လခြမ်းနီအသင်းများ ဖက်ဒရေးရှင်း (IFRC) တို့ရဲ့ အရေးပေါ် တောင်းဆိုချက်အတွက် နောက်ထပ် ယူရို (၅၀,၀၀၀) ကိုလည်း ပံ့ပိုးကူညီပေးခဲ့တယ်လို့ သတင်းရရှိပါတယ်။
========================
📌📌 ၉။ သက်ဆိုင်ရာ JICA ဝန်ထမ်းနှင့် ဆေးဘက်ဆိုင်ရာ ပညာရှင်များအပါအဝင် အဖွဲ့ဝင် ၃၂ ဦး ပါဝင်သော ဂျပန် ကူညီကယ်ဆယ်ရေးအဖွဲ့ မြန်မာနိုင်ငံရောက်ရှိ
ဂျပန်နိုင်ငံ သဘာဝဘေးအန္တရာယ် ကူညီကယ်ဆယ်ရေး ဆေးဘက်ဆိုင်ရာ နည်းပညာအဖွဲ့သည် ဧပြီလ (၂) ရက်နေ့တွင် မြန်မာနိုင်ငံသို့ ရောက်ရှိလာခဲ့ပြီလို့ သတင်းရရှိပါတယ်။
သက်ဆိုင်ရာ JICA ဝန်ထမ်းနှင့် ဆေးဘက်ဆိုင်ရာ ပညာရှင်များအပါအဝင် အဖွဲ့ဝင် (၃၂) ဦး ပါဝင်သော အဆိုပါအဖွဲ့သည် မြေပြင်အခြေအနေအရ လိုအပ်သော ဆေးဘက်ဆိုင်ရာ လှုပ်ရှားမှုများကို ဆောင်ရွက်သွားမယ်လို့ သိရှိရပါတယ်။
========================
📌📌 ၁၀။ ကိုရီးယား၊ အင်ချွန်း ဘူဖြောင်းတွင် ကျင်းပမည့် တော်လှန်သင်္ကြန်ပွဲက ရရှိမည့် ရန်ပုံငွေအားလုံးကို ငလျင်ဘေးသင့်ပြည်သူများအား လှူဒါန်းသွားမည်
"ငလျင်ဘေးကူ တော်လှန်သင်္ကြန်အလှူ" နွေဦးနှစ်သစ် ဘာသာစုံ ဆုတောင်းပွဲနှင့် ငလျင်ဘေးသင့်ပြည်သူများအတွက် ရန်ပုံငွေပွဲကို ကိုရီးယားနိုင်ငံ အင်ချွန်း ဘူဖြောင်းတွင် ဧပြီလ (၁၃) ရက်နေ့မှာ ကျင်းပသွားမယ်လို့ သတင်းရရှိပါတယ်။
အဆိုပါ တော်လှန်သင်္ကြန်ပွဲက ရရှိမည့် ရန်ပုံငွေအားလုံးကို ငလျင်ဘေးသင့်ပြည်သူများအား လှူဒါန်းသွားမှာ ဖြစ်ပြီးတော့ အဆို၊ အက ဖျော်ဖြေရေးအစီအစဥ်အား ထည့်သွင်းခြင်းမပြုပဲ ငလျင်ဘေးသင့်ပြည်သူများအပါအဝင် မြန်မာပြည်သူများအတွက် ဘာသာစုံဆုတောင်းခြင်း အစီအစဥ်အား ပြုလုပ်သွားမှာဖြစ်တယ်လို့ သိရှိရပါတယ်။
အခုတင်ပြခဲ့တဲ့သတင်းတွေကို Radio NUG သတင်းထောက် မင်းသီဟန်နဲ့ မင်းစစ်သွေးတို့က ပေးပို့ထားတာ ဖြစ်ပါတယ်။
========================
========================
🚩🚩 ၁။ ငလျင်ဘေးဒဏ်ခံစားနေရသော ညောင်ဦးမြို့နယ်၊ ကျောက်ပြင်ကန်ကျေးရွာအား တိုက်ပွဲဖြစ်ပွားခဲ့ခြင်း လုံးဝမရှိဘဲ စကစကစစ်ကြောင်းထိုး မီးရှို့ဖျက်ဆီး
အကြမ်းဖက်စစ်ကောင်စီသည် ငလျင်ဒဏ်သင့် ဒေသများအား ကူညီကယ်ဆယ်ရေးလုပ်ငန်းများကို ဦးစားပေးလုပ်ကိုင်ခြင်းမရှိဘဲ ငလျင်ဘေးဒဏ်ခံစားနေရသော မန္တလေးတိုင်း၊ ညောင်ဦးမြို့နယ်ရှိ ကျောက်ပြင်ကန်ကျေးရွာအား တိုက်ပွဲဖြစ်ပွားခဲ့ခြင်း လုံးဝမရှိဘဲ စစ်ကြောင်းထိုး မီးရှို့ဖျက်ဆီးလျက်ရှိတယ်လို့ ပြည်သူ့ဒီမိုကရက်တစ်တပ်တော်က အတည်ပြုထားပါတယ်။
ထို့အပြင် ကျောက်ပြင်ကန်ကျေးရွာမှ စစ်ဘေးရှောင်ပြည်သူများကိုလည်း (၆၀) မမ လက်နက်ကြီးဖြင့် ပစ်ခတ်ခြင်း၊ လက်နက်ငယ်များဖြင့် ရမ်းသန်းပစ်ခတ်ခြင်းများ၊ စစ်ဘေးရှောင်ပြည်သူများနေထိုင်လျက်ရှိသော တောတဲများကို မီးရှို့ခြင်းများအား ပြုလုပ်ခဲ့တယ်လို့ သိရပါတယ်။
ပထမအကြိမ် စစ်ကြောင်းထိုးစဉ်ကလည်း ကျေးရွာရှိ နေအိမ် (၁၂) လုံးအား မီးရှို့ဖျက်ဆီးခဲ့ပြီး ကျေးရွာအတွင်းမှ သိန်း (၅၀၀၀) နီးပါးတန်ဖိုးရှိ ပြည်သူပိုင်ပစ္စည်းများကို ပျူစောထီးများနှင့် အကြမ်းဖက် စစ်ကောင်စီစစ်သားများမှ ခိုးယူဖောက်ထွင်းသယ်ဆောင်သွားခဲ့ကြသေးတယ်လို့ သတင်းရရှိပါတယ်။
========================
🚩🚩 ၂။ မင်းတပ်မြို့ကို စစ်ကောင်စီက ပေါင် (၅၀၀) ဗုံးများဖြင့် ထပ်မံ ဗုံးကြဲတိုက်ခိုက်
ချင်းပြည်နယ်၊ မင်းတပ်မြို့ကို စစ်ကောင်စီက နှစ်ရက်ဆက် ဗုံးကြဲတိုက်ခိုက်ခဲ့တယ်လို့ ဒေသတွင်းသတင်းဌာန တခု ဖြစ်တဲ့ Zalen သတင်းဌာနက ဖော်ပြထားပါတယ်။
ဧပြီလ (၂) ရက်နေ့ နေ့လည် (၁) နာရီခွဲခန့်မှာ စစ်ကောင်စီက ပေါင် (၅၀၀) ဗုံးသီး (၄) လုံးဖြင့် နှစ်ကြိမ် ဗုံးကြဲတိုက်ခိုက်ခဲ့တာလို့ သိရပါတယ်။
အဆိုပါ ဗုံးကြဲတိုက်ခိုက်မှုအတွင်း ထိခိုက်ပျက်စီးမှု အသေးစိတ်ကိုတော့ မသိရသေးဘူးလို့ ဆိုပါတယ်။
ထို့အပြင် ဧပြီလ (၁) ရက်နေ့ (မနေ့က) (၁၀) နာရီခွဲ ဝန်းကျင်ကလည်း မင်းတပ်မြို့၊ အရှေ့ပြင်ရပ်ကွက်ရှိ ဝကောက် တည်းခိုခန်း အနီးကို လေကြောင်းတိုက်ခိုက်မှု ပြုလုပ်ခဲ့ပြီး လူနေအိမ်တွေ ပျက်ဆီးမှုရှိခဲ့တယ်လို့ သိရပါတယ်။
မင်းတပ်မြို့ကို ချင်းညီနောင် တပ်ဖွဲ့က သိမ်းပိုက်ထိန်းချုပ်ပြီးနောက်မှာ စစ်ကောင်စီက လေကြောင်းတိုက်ခိုက်မှု (၃) ကြိမ်အထိ ပြုလုပ်ထားခဲ့တာ ဖြစ်ပါတယ်။
မြန်မာနိုင်ငံမှာ ကြုံတွေ့နေရတဲ့ ငလျင်ဒဏ်ကြောင့် စစ်ကောင်စီက နိုင်ငံတော်အဆင့် ဝမ်းနည်းမှု အထိမ်းအမှတ် (၁) ပတ်တာ သတ်မှတ်ထားပေမယ့် နိုင်ငံအနှံ့မှာ လေကြောင်း တိုက်ခိုက်မှုတွေကို ဆက်တိုက်ဆိုသလို ဆက်လက် ကျူးလွန်နေတာပဲ ဖြစ်ပါတယ်။
========================
🚩🚩 ၃။ ကန်ပက်လက်မြို့အား စကစလေတပ်က ဂျက်ဖိုက်တာနဲ့ အကြိမ်ကြိမ် ဗုံးကြဲတိုက်ခိုက်၍ ပြည်သူ့နေအိမ်နဲ့ အဆောက်အဦ အလုံး (၂၀) ထိခိုက်ပျက်စီး
ဧပြီ (၂) ရက် မွန်းလွဲ (၁း၁၅) နာရီအချိန်တွင် ချင်းပြည်နယ် ကန်ပက်လက်မြို့အား စကစလေတပ်က ဂျက်ဖိုက်တာနဲ့ အကြိမ်ကြိမ် ဗုံးကြဲတိုက်ခိုက်၍ ပြည်သူ့နေအိမ်နဲ့ အဆောက်အဦအလုံး (၂၀) ထိခိုက်ပျက်စီးခဲ့တယ်လို့ ကန်ပက်လက် ပအဖက အတည်ပြုထားပါတယ်။
ထိုသို့ တိုက်ခိုက်၍ အစိုးရအဆောက်အဦးနဲ့ ပြည်သူ့နေအိမ်များ ပျက်စီးဆုံးရှုံးခဲ့တယ်လို့ ကန်ပက်လက် ပအဖက ဖော်ပြပါတယ်။
လတ်တလော ကန်ပက်လက် မြို့ပေါ်ရပ်ကွက်နေပြည်သူများအနေနဲ့ လေကြောင်းရန် အထူးဂရုပြုကြဖို့ တိုက်တွန်းနှိုးဆော်ထားပါတယ်။
========================
🚩🚩 ၄။ လေးမျက်နှာမြို့နယ်မှာ စစ်ကောင်စီက ဗုံးကြဲတိုက်ခိုက် ခဲ့တာကြောင့် အရပ်သား (၂) ဦး သေဆုံး
ဧရာဝတီတိုင်း၊ လေးမျက်နှာမြို့နယ်မှာ စစ်ကောင်စီက စက်တပ်လေထီး (Paramotor) ဖြင့် ဗုံးကြဲတိုက်ခိုက်ခဲ့တာကြောင့် အရပ်သား ပြည်သူ (၂) ဦး ထိခိုက်သေဆုံးခဲ့ရတယ်လို့ DVB သတင်းဌာနက ဖော်ပြထားပါတယ်။
မတ်လ (၃၁) ရက်နေ့မှာ လေးမျက်နှာမြို့နယ်နဲ့ အင်္ဂပူအစပ်က ဝါးတောကွင်းကျေးရွာကို စစ်ကောင်စီက စက်တပ်လေထီးဖြင့် ဗုံးကြဲတိုက်ခိုက်ခဲ့တာပါ။
ဗုံးကြဲခံရတာကြောင့် ဝါးတောကွင်းကျေးရွာက အရပ်သား (၂) ဦး သေဆုံးခဲ့ကာ (၁) ဦး ဒဏ်ရာရခဲ့ပြီး နေအိမ် (၈) လုံး မီးလောင်ပျက်စီးခဲ့ရတယ်လို့ ဒေသခံတွေက ဆိုပါတယ်။
ကျုံပျော် အခြေစိုက် စစ်ကောင်စီရဲ့ ခလရ (၆၃) တပ်ရင်းဟာ စက်တပ်လေထီးတွေနဲ့ ရခိုင်နဲ့ ဧရာဝတီ အစပ်ရှိ လေးမျက်နှာ၊ ရေကြည် စတဲ့ ကျေးရွာတွေကို မတ်လ ဒုတိယအပတ်ထဲက လေကြောင်းမှ ဗုံးချတိုက်ခိုက်မှုများ လုပ်ဆောင်နေတာ ဖြစ်ပါတယ်။
တနိုင်ငံလုံး ငလျင်ဒဏ်ကြောင့် ပူဆွေးသောက ရောက်နေချိန်မှာ စစ်ကောင်စီက လေယာဉ်၊ စက်တပ်လေထီး နဲ့ ဒရုန်းတွေ အသုံးပြုကာ လေကြောင်း တိုက်ခိုက်မှု (၄၈) ကြိမ်ထိ ပြုလုပ်ထားပြီး သေဆုံးသူ (၅၈) ဦးထိ ရှိခဲ့တယ်လို့ သိရပါတယ်။
========================
🚩🚩 ၅။ နောင်ချိုတွင် စစ်ကောင်စီတပ်က ဒရုန်းဖြင့် ဗုံးကြဲတိုက်ခိုက်ခဲ့ရာ ဒေသခံ တဦး သေဆုံး
စစ်ကောင်စီက နိုင်ငံတော်အဆင့် ဝမ်းနည်းကြောင်း ကြေညာထားပေမယ့် နောင်ချိုမြို့နယ်၊ ဆမ္မဆယ်ကျေးရွာကို ဒရုန်းနဲ့ ဗုံးကြဲတိုက်ခိုက်ခဲ့တာကြောင့် ဒေသခံ တဦး သေဆုံးခဲ့တယ်လို့ PSLF/TNLA က ထုတ်ပြန်ထားပါတယ်။
ဧပြီလ (၂) ရက် ညနေ (၄း၂၀) နာရီဝန်းကျင်မှာ တအောင်းတပ် TNLA ထိန်းချုပ်ရာ၊ ရှမ်းပြည်နယ်မြောက်ပိုင်း၊ နောင်ချိုမြို့နယ်၊ ဆမ္မဆယ်ရွာကို စစ်ကောင်စီက သဲခေါ်ကျေးရွာမှနေပြီး ဒရုန်းဖြင့် ဗုံးကြဲတိုက်ခိုက်ခဲ့တာပါ။
ဗုံးသီးကျရောက် ပေါက်ကွဲမှုကြောင့် ဒေသခံ တဦး သေဆုံးသွားခဲ့ရပြီး နေအိမ်တလုံးလဲ ထိမှန်ပျက်စီးခဲ့တယ်လို့ ဆိုပါတယ်။
ပြီးခဲ့တဲ့ မတ်လ (၃၁) ရက်နေ့ကလည်း နောင်ချိုမြို့နယ်၊ ကျောက်ကြမ်းကျေးရွာကို စစ်ကောင်စီတပ်က (၁၂၀) မမ ဗုံးသီး သယ်ဆောင်လာတဲ့ ဒရုန်းဖြင့် ဗုံးကြဲတိုက်ခိုက်ခဲ့ပါသေးတယ်။
TNLA အပါအဝင် မြောက်ပိုင်းညီနောင် မဟာမိတ် (၃) ဖွဲ့က ငလျင်နောက်ဆက်တွဲ ကယ်ဆယ်ရေးလုပ်ငန်းများ ထိရောက်စွာ အမြန်ဆုံးဆောင်ရွက်နိုင်ဖို့ ဆိုပြီး ထိုးစစ်များကို တလတာ တဖက်သတ် အပစ်ရပ်ကြောင်း ဧပြီလ (၁) ရက်နေ့က ထုတ်ပြန်ကြေညာထားပါတယ်။
ထို့အပြင် ငလျင်ဒဏ် သင့်နေချိန်မှာ လူသားချင်းစာနာသောအားဖြင့် ပလောင်ပြည်နယ် လွတ်မြောက်ရေးတပ်ဦး PSLF/TNLA အုပ်ချုပ်နေတဲ့ ခရိုင် (၅) ခု အတွင်းက မြို့နယ်များမှာ ပျော်ပွဲရွှင်ပွဲနဲ့ သင်္ကြန်ပွဲတော်များ မကျင်းပဖို့ ဗဟိုအုပ်ချုပ်ရေးဌာနက ညွန်ကြားချက် ထုတ်ပြန်ထားပါတယ်။
========================
🚩🚩 ၆။ စကစတပ်များဟာ မတ္တရာမြို့ထဲမှ (၁၂၀) မမလက်နက်ကြီးဖြင့် အရှေ့ဘက်သို့ပစ်ခတ်
စကစတပ်များဟာ မတ္တရာမြို့ထဲမှ (၁၂၀) မမလက်နက်ကြီးဖြင့် အရှေ့ဘက်သို့ ပစ်ခတ်ခဲ့တယ်လို့ Wetlet Informational Network က ဧပြီလ (၂) ရက်နေ့ညနေပိုင်းက အတည်ပြုဆိုထားပါတယ်။
"မတ္တရာမြို့ထဲမှ 120mm လက်နက်ကြီးဖြင့် အရှေ့ဘက်သို့ လက်နက်ကြီးများ အဆက်မပြတ်ရမ်းသန်း ပစ်ခတ်နေကြောင်း သတင်းရရှိထားတယ်" လို့ဖော်ပြထားပါတယ်။
========================
🚩🚩 ၇။ စစ်ကောင်စီက ထိုးစစ်မရပ်ပါက ကယ်ဆယ်ရေး လုပ်ငန်းများကို ချိန်ညှိပြီး စစ်ဆင်ရေး လုပ်သွားမယ်လို့ JCS ထုတ်ပြန်
ကရင်နီ ပြည်နယ်အတွင်းမှာ စစ်ကောင်စီက ထိုးစစ်ဆင်တိုက်ခိုက်မှု ပြုလုပ်လာတဲ့အပေါ် မူတည်ပြီး စစ်ဆင်ရေးတွေကို လုပ်ဆောင်သွားမယ်လို့ ကရင်နီပြည် တပ်ပေါင်းစုံ စစ်ဦးစီးအဖွဲ့ (JCS) က ထုတ်ပြန်လာပါတယ်။
မတ်လ (၂၈) ရက်နေ့က ဖြစ်ပွားခဲ့တဲ့ ငလျင်ကြောင့် စစ်ကိုင်း၊ မန္တလေး၊ နေပြည်တော်နဲ့ ရှမ်းပြည်နယ် တောင်ပိုင်းက ပြည်သူများရဲ့ အသက်အိုးအိမ် ပျက်စီးဆုံးရှုံးရတဲ့အပေါ် JCS အနေနဲ့ ထပ်ထူ ဝမ်းနည်းရပါကြောင်း ထုတ်ပြန်ချက်မှာ ဖော်ပြထားပါတယ်။
သို့ပေမယ့် စစ်ကောင်စီက တိုက်ခိုက်မှုမျိုးမျိုးအား ရပ်တန့်ခြင်းမရှိဘဲ ဆက်လက်လုပ်ဆောင်နေတာကြောင့် ကရင်နီတပ်ဖွဲ့များအနေဖြင့် ကယ်ဆယ်ရေး လုပ်ငန်းများအပေါ် ချိန်ညှိပြီး ကာကွယ်ထိန်းချုပ်ထားတဲ့ ဒေသနဲ့ ပြည်သူတွေကို အကြမ်းဖက် တိုက်ခိုက်မှုအပေါ် မူတည်ပြီး စစ်ဆင်ရေး လုပ်ဆောင်သွားမယ်လို့ ဆိုပါတယ်။
ကရင်နီပြည် တပ်ပေါင်းစု (JCS) ကို စစ်ကောင်စီလက်အောက်က လွတ်မြောက်နိုင်ရေး ရည်မှန်းချက်နဲ့ စတင်ဖွဲ့စည်းခဲ့ပြီး (၂၀၂၅) ခုနှစ်မှစလို့ ခံစစ်နဲ့ ထိုးစစ်တွေကို ကွပ်ကဲခဲ့တာလို့ သိရပါတယ်။
ဇန်နဝါရီလကတည်းက လွိုင်ကော်နဲ့ မိုးဗြဲကို ဆက်သွယ်ထားတဲ့ လမ်းမကြီးကို ပြန်လည်ထိန်းချုပ်ဖို့ ကြိုးစားလာခဲ့တဲ့ စစ်ကောင်စီတပ်ကို ခုခံခဲ့ရာ စစ်ကောင်စီ တပ်ဖွဲ့ဝင် (၆၀) ကျော်ကို ချေမှုန်းနိုင်ခဲ့ပြီး လက်နက်ကြီးငယ်အစုံ (၁၆) လက်ကို သိမ်းဆည်းရရှိခဲ့တယ်လို့ ဖော်ပြထားပါတယ်။
မိုးဗြဲဒေသမှာလည်း စစ်ကောင်စီ ထိုးစစ်တွေကို ကန့်သတ်ဖို့ ဘောလခဲနဲ့ ဖားဆောင်းတို့က စစ်ကောင်စီ တပ်တွေကို မတ်လ (၄) ရက်နေ့မှာ စတင်တိုက်ခိုက်ခဲ့ပြီး တလအတွင်း ဗျူဟာတပ် အခြေစိုက် ကင်း (၇) ခု ထက်မနည်းကို တိုက်ခိုက် ကန့်သတ်နိုင်ခဲ့တယ်လို့ သိရပါတယ်။
အဆိုပါ ကာကင်းစခန်းသိမ်း တိုက်ပွဲများမှာ စစ်ကောင်စီ တပ်ဖွဲ့ဝင် (၆၀) ကျော် သေဆုံးခဲ့ပြီး လက်နက်မျိုးစုံ အလက်(၄၀) နဲ့ အရှင်ဖမ်းဆီးရမိသူ တချို့လည်း ရှိခဲ့တယ်လို့ ဖော်ပြထားပါတယ်။
လက်ရှိမှာတော့ စစ်ကောင်စီဟာ ၎င်းရဲ့တပ်များက တရုတ်နိုင်ငံကြက်ခြေနီအသင်းရဲ့ ထောက်ပံ့ရေးယာဥ်တန်းကို ပစ်ခတ်ပြီးနောက်မှ ငလျင်ဘေးကယ်ဆယ်ရေးနဲ့ ပြန်လည်ထူထောင်ရေးအတွက်ဟုဆိုကာ ၂၀၂၅ ခုနှစ် ဧပြီ (၂) ရက်မှ (၂၂) ရက်အထိကာလကို ယာယီပစ်ခတ်တိုက်ခိုက်မှု ရပ်စဲရေးကာလအဖြစ် ထုတ်ပြန်တယ်လို့ ကြေညာထားပါတယ်။
========================
🚩🚩 ၈။ ငလျင်ဘေးအန္တရာယ်ကနေ ပြန်လည်ထူထောင်မှုတွေ ဆောင်ရွက်ချိန်မှာ တခြားနိုင်ငံတွေနှင့် ပူးပေါင်းဆောင်ရွက်ရန်နှင့် စစ်ကောင်စီက လေကြောင်းကနေ ဗုံးကြဲတိုက်ခိုက်မှုတွေကို ရပ်တန့်ဖို့ နယူးဇီလန် Labour ပါတီ ထုတ်ပြန်
ငလျင်ဘေးအန္တရာယ်ကနေ ပြန်လည်ထူထောင်မှုတွေ ဆောင်ရွက်ချိန်မှာ တခြားနိုင်ငံတွေနဲ့ ပူးပေါင်းဆောင်ရွက်ရန်နှင့် စစ်ကောင်စီက လေကြောင်းကနေ ဗုံးကြဲတိုက်ခိုက်မှုတွေကို ရပ်တန့်ဖို့နယူးဇီလန် Labour ပါတီက ထုတ်ပြန်ပါတယ်။
ငလျင်ဘေးကယ်ဆယ်ရေးအတွက် နယူးဆီလန်အစိုးရက အမေရိကန်ဒေါ်လာ (၂) သန်း လှူဒါန်းမှုကို ကြိုဆိုတယ်လို့ Labour ပါတီက ဆိုသလို စစ်ကောင်စီရဲ့ စစ်ရေးလှုပ်ရှားမှုတွေကို ရပ်တန့်ဖို့ နိုင်ငံတကာက ဖိအားပေးဖို့ အရေးကြီးတယ်လို့လည်း ထောက်ပြထားပါတယ်။
ဒါ့အပြင် စကစရဲ့ တိုင်းပြည်အတွင်း ဟန့်တားမှုတွေဟာ လူသားချင်းစာနာမှုဆိုင်ရာ အကူအညီပေးရေးလုပ်ငန်းတွေကို အဟန့်အတားဖြစ်စေကြောင်းဖော်ပြပါတယ်။
========================
🚩🚩 ၉။ မြန်မာပြည်အလယ်ပိုင်း ငလျင်ဘေးကြုံပြည်သူတွေအတွက် ပူတာအိုခရိုင် ပြည်သူ့ကာကွယ်ရေးတပ်ဖွဲ့မှ အလှူခံရရှိငွေနှင့် PDF ရဲဘော်ရဲမယ်များရဲ့မုန့်ဖိုးများထဲမှ ကူညီမည်
တော်လှန်နယ်မြေ တောင်ပေါ်မြို့မှာ မြန်မာပြည်အလယ်ပိုင်း ငလျင်ဘေးကြုံပြည်သူတွေအတွက် ပူတာအိုခရိုင် ပြည်သူ့ကာကွယ်ရေးတပ်ဖွဲ့ (PutaO PDF) မှ အလှူခံရရှိငွေနှင့်PDF ရဲဘော်ရဲမယ် များရဲ့မုန့်ဖိုးလေးမှ အနည်းငယ်ကို ကယ်ဆယ်ရေး အဖွဲ့တွေဆီ လှူဒါန်းသွားမှာဖြစ်ပါတယ်လို့ သတင်းရရှိပါတယ်။
"အနည်းအများအဓိက မဟုတ်ဘူး။ ကိုယ်ချင်းစာတရားဆိုတဲ့ လူသားဆန်မှုကို ဒီဘက်ခေတ်ကလေးတွေမှာ ပိုတွေ့လာရလို့ မျက်ရည်ပါကျမိတယ်'' လို့ PDF ခေါင်းဆောင်တစ်ဦးက ဆိုထားပါတယ်။
========================
🚩🚩 ၁၀။ မကွေးတိုင်းမှာအကြမ်းဖက်စစ်အုပ်စုကြောင့် လူပေါင်း (၉၅) ဦး သေဆုံးခဲ့ပြီးအသက် (၁၈) နှစ်အောက် ကလေးငယ် (၁၂) ဦး ပါဝင်
မကွေးတိုင်းမှာအကြမ်းဖက်စစ်အုပ်စုကြောင့် အမျိုးသမီး (၂၉) ဦးနှင့် အမျိုးသား (၆၆) ဦး စုစုပေါင်း (၉၅) ဦး သေဆုံးခဲ့ပြီးအသက် (၁၈) နှစ်အောက် ကလေးငယ် (၁၂) ဦး ပါဝင်တယ်လို့ သိရပါတယ်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်းမှ ကောက်ယူထားသော သတင်းအချက်အလက်များအရ (၂၀၂၅) ခုနှစ်၊ ဇန်နဝါရီလ (၁) ရက်နေ့မှ မတ်လ (၃၁) ရက်နေ့အထိ မကွေးတိုင်း၌ အကြမ်းဖက်စစ်အုပ်စုကြောင့် အမျိုးသမီး (၂၉) ဦးနှင့် အမျိုးသား (၆၆) ဦး စုစုပေါင်း (၉၅) ဦး သေဆုံးခဲ့သည်ကို အမည်နှင့်တကွ အတည်ပြုနိုင်ခဲ့ပြီး ထိုအရေအတွက်တွင် အသက် (၁၈) နှစ်အောက် ကလေးငယ် (၁၂) ဦး ပါဝင်တယ်လို့ဖော်ပြပါတယ်။
၎င်းသေဆုံးသူများအနက် (၅၃) ဦးမှာ စစ်အုပ်စု၏ လေကြောင်းဖြင့် တိုက်ခိုက်မှုကြောင့် အများဆုံးသေဆုံးခဲ့ကြပြီး လက်နက်ကြီးဖြင့် ပစ်ခတ်မှုကြောင့် (၁၀) ဦး သေဆုံးခဲ့ပါတယ်။
မတ်လ (၃၁) ရက်နေ့၊ နေ့လယ် (၂း၄၀) နာရီအချိန်တွင် မကွေးတိုင်း၊ ပေါက်မြို့နယ်၊ ပလောင်းကျေးရွာကို ပေါက်မြို့နယ်၌ အခြေစိုက်သည့် အမှတ် (၂၄) ကာကွယ်ရေးပစ္စည်းစက်ရုံမှ အကြမ်းဖက်စစ်အုပ်စုက လက်နက်ကြီးများဖြင့် ပစ်ခတ်တိုက်ခိုက်မှုကြောင့် ကျေးရွာအတွင်းသို့ ကျရောက်ပေါက်ကွဲခဲ့သဖြင့် မဧကရီ၏ ဝမ်းဗိုက်ကို ကျည်စထိမှန်၍ သေဆုံးခဲ့ရတယ်လို့ သိရှိရပါတယ်။
အခုတင်ပြခဲ့တဲ့သတင်းတွေကို Radio NUG သတင်းထောက် မင်းသီဟန်နဲ့ မင်းစစ်သွေးတို့က ပေးပို့ထားတာ ဖြစ်ပါတယ်။
No comments:
Post a Comment