03 May 2025 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၅ မေလ ( ၃ ) ရက်နေ့နောက်ဆုံးရပြည်တွင်းသတင်းများ

📌📌 ၁။ မင်းတပ်မြို့နယ်အတွင်း အမဲလိုက်တာ၊ ငှက်ပစ်တာ ၂ လတိတိ တားမြစ်။

 

ကျေးငှက် တိရစ္ဆာန်တွေ သားပေါက်ချိန်ဖြစ်လို့ မင်းတပ်မြို့နယ်အတွင်း အမဲလိုက်တာ၊ ငှက်ပစ်တာ ၂ လတိတိတားမြစ်တယ်လို့ မင်းတပ်မြို့နယ် ပြည်သူ့အုပ်ချုပ်ရေးအဖွဲ့က မေ ၁ရက် ထုတ်ပြန်ပါတယ်။

မေလ ၁ ရက်ကနေ ဇွန်လ ၃၀ ရက်နေ့အထိ ၂ လ တားမြစ်ထားတာဖြစ်ပြီး လိုက်နာမှုမရှိသူတွေကို အရေးယူသွားဖို့ရှိတယ်လို့ ဆိုပါတယ်။ 

မင်းတပ်မြို့နယ်အတွင်းက ကျေးငှက်တွေဟာ ရှားပါးမျိုးစိတ်တွေဖြစ်တဲ့အပြင် အနာဂတ်မှာ ခရီးသွားလာမှုကနေ ဒေသခံတွေ ဝင်ငွေရရှိနိုင်မှာဖြစ်လို့ တားမြစ်ချက်တွေ အလေးအနက်ထား လိုက်နာပေးကြဖို့လည်း ပြောထားပါတယ်။

 

========================

 

📌📌 ၂။ ဆောမြို့နယ်လေကြောင်းဗုံးကြဲခံရ၊ ကလေးငယ်အပါအဝင် အမျိုးသမီး ၄ ဦး သေဆုံး၊ ထိခိုက်ပျက်စီးမှုများ။

 

မကွေးတိုင်း၊ ဆောမြို့နယ်ရှိ ကျေးရွာတစ်ရွာ လေကြောင်းဗုံးကြဲခံရလို့ ကလေးငယ်အပါအဝင် အမျိုးသမီး ၄ ဦး သေဆုံးပြီး၊ ထိခိုက်ဒဏ်ရာရသူ ကလေး ၂ ဦးရှိနေသလိုအဆောက်အအုံတွေ ပျက်စီးသွားပါတယ်။

“ဒီနေ့ မနက် ၁၀ နာရီ မိနစ် ၅၀ လောက်မှာ လေကြောင်းကနေ ဗုံးကြဲတာ၊ သေတဲ့သူတွေက အသက်ကြီးပိုင်း အမျိုးသမီး ၃ ဦး၊ ၇ နှစ်အရွယ်ကလေးလည်း သေတယ်။” လို့ အခင်းနေရာ သွားရောက်ခဲ့သူက ပြောပါတယ်။

နောက်ထပ် အသက် ၁၅ နှစ်ဝန်းကျင် ယောက်ျားလေး ၂ ဦးပါ  ပြင်းထန် ဒဏ်ရာရထားပြီး နေအိမ်၊ ကျောင်း ၉ လုံးခန့် ပျက်စီးတယ်လို့ ဆိုပါတယ်။

ယောဒေသသတင်းတွေ ဆက်တိုက်ဖော်ပြနေတဲ့ ယောအလင်းတန်းကတော့ ဒီနေ့ ဆောမြို့နယ် လေကြောင်းတို၊က်ခိုက်ခံရမှုအတွင်း ပြင်းထန် ဒဏ်ရာရတဲ့ မခွန်းဆက်ချို အသက် ၈ နှစ်အရွယ်ဟာ နီးစပ်ရာဆေးခန်း ပို့ဆောင်စဉ် လမ်းမှာ သေဆုံးခဲ့ရတယ်လို့ ဖော်ပြပါတယ်။

 

========================

 

📌📌 ၃။ CNO/CNDF က ထောက်လှမ်းရေးသင်တန်းအတွက် လူသစ်ခေါ်ယူ။

 

Chin National Organization/CNDF က ကြီးမှူးသင်ကြားပေးမယ့် အပတ်စဉ် ၁ ထောက်လှမ်းရေးသင်တန်းအတွက် စိတ်ဝင်စားတဲ့ လူငယ်တွေ ခေါ်ယူနေပြီလို့ ဧပြီ ၂၉ရက်က ကြေညာပါတယ်။

ဒီထောက်လှမ်းရေးသင်တန်းကို ၂၀၂၅ မေလ ၁၀ ရက်ကနေ မေလ ၂၅ ရက်နေ့အထိ ၁၅ ရက်ကြာ ပြုလုပ်သွားမယ်လို့ ပြောထားပါတယ်။

သင်တန်းတက်ရောက်လိုသူတွေအနေနဲ့ မေလ ၁ ရက်ကနေ ၁၀ ရက်နေ့အထိ စာရင်းပေးသွင်းဖို့လည်း ဖိတ်ခေါ်ထားပါတယ်။

ဖလမ်းအခြေစိုက် Chin National Defense Force ဟာ ချင်းညီနောင်အဖွဲ့ဝင်ဖြစ်ပြီး ၂၀၂၅ ဧပြီလဆန်းမှာ ‘ချင်းညီနောင်’ စစ်ဆင်ရေးအဖြစ် ဖလမ်းမြို့ကို ပြန်လည် သိမ်းယူနိုင်ခဲ့ပါတယ်။

#RadioNUGLocalNews

#SpringRevolution