28 Jun 2025 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၅ ဇွန်လ ( ၂၈ ) ရက်နေ့နောက်ဆုံးရပြည်တွင်းသတင်းများ

📌📌 ၁။ ဆလိုင်းတင်မောင်ဦးစိတ်ဓာတ်ဖြင့်ဆက်လက်တိုက်ပွဲဝင်သွားမယ်လို့ အရှိုချင်းကာကွယ်ရေးတပ် (ACDF) ကထုတ်ပြန်။

ဆလိုင်းတင်မောင်ဦးဟာ ကျောင်းသားသူရဲကောင်းဖြစ်ရုံသာမက အရှိုချင်းအမျိုးသားတွေရဲ့ အမျိုးသားသူရဲကောင်းဖြစ်ပြီး စစ်အာဏာရှင် တွန်းလှန်ရာမှာ သူ့ရဲ့ခံယူချက်ပြင်းပြတဲ့ စိတ်ဓာတ်တို့သည်လည်း စံပြဖွယ်လည်းဖြစ်ကြောင်း၊စစ်အာဏာရှင်ကို တွန်းလှန်ရာမှာ အနိုင်မခံအရှုံးမပေးတဲ့ စိတ်ဓာတ်၊ ရဲရင့်တဲ့စိတ်ဓာတ်နှင့် စစ်ဖိနပ်အောက် ဒူးမထောက်တဲ့ စိတ်ဓာတ်တွေဖြင့် ဆက်လက်တိုက်ပွဲဝင်သွားမယ်လို့ (၄၉) နှစ်မြောက် ဆလိုင်းတင်မောင်ဦးနေ့ ဇွန်လ ၂၆ ရက်နေ့မှာ မကွေးတိုင်းနဲ့ရခိုင်ပြည်နယ်စပ်မှာ စစ်ရေးလှုပ်ရှားနေတဲ့ အရှိုချင်းကာကွယ်ရေးတပ် (ACDF)က ထုတ်ပြန်ပါတယ်။

ဆလိုင်းတင်မောင်ဦးဟာ ၁၉၆၉ ခုနှစ် (၅) ကြိမ်မြောက် အရှေ့တောင်အာရှကျွန်းဆွယ် အားကစားပွဲကျောင်းသားလှုပ်ရှားမှု၊ ၁၉၇၂ ခုနှစ်ဖြစ်ပွားတဲ့ ကျောင်းသားလှုပ်ရှားမှု၊ ၁၉၇၄ ခုနှစ်တွင် ဖြစ်ပွားတဲ့ ထင်ရှားသော ဦးသန့်အရေးအခင်းတို့မှာ ဦးဆောင်ပါဝင်ခဲ့သူဖြစ်ပါတယ်။

ဒါ့ပြင် ဆလိုင်းတင်မောင်ဦးဟာ ၁၉၇၄ ခုနှစ် ရန်ကုန်တက္ကသိုလ်ချင်းစာပေနှင့် ယဉ်ကျေးမှုကော်မတီ အထွေထွေ အတွင်းရေးမှူးတာဝန် ထမ်းဆောင်စဉ်ကာလက ချင်းအမျိုးသားတွေရဲ့ နာမည်ရှေ့မှာ ဆလိုင်း (ဝါ) ရဲစွမ်းသတ္တိပြည်စုံသူ နှင့် အမျိုးသမီးတွေရဲ့ နာမည်ရှေ့တွင် မိုင် (ဝါ) သားကောင်း၊ သမီးကောင်းမွေးဖွားပေးသူလို့ အဓိပ္ပာယ်ရတဲ့စာလုံးထည့်သွင်းရန် ဦးဆောင်တင်သွင်း အတည်ပြုခဲ့သူဖြစ်တယ်လို့လည်း ACDF ကထုတ်ပြန်ပါတယ်။

ဆလိုင်းတင်မောင်ဦးကို သခင်ကိုယ်တော်မှိုင်း၏ ရာပြည့်အရေးအခင်းဖြစ်မြောက်ရန် ကြိုးပမ်းစဉ်အတွင်း ၁၉၇၆ ခုနှစ် ၊ မတ်လ ၁၉ ရက်နေ့မှာ စစ်အာဏာရှင်ရဲ့ ဖမ်းဆီးမှုခံခဲ့ရပြီး ဇွန်လ ၂၆ ရက်နေ့ ၊ မနက်ပိုင်း ၄ နာရီချိန်မှာ မိဘဆွေမျိုးတွေကို အသိပေးအကြောင်းကြားခြင်းမရှိဘဲ အင်းစိန်ထောင်တွင် တိတ်တဆိတ် ကြိုးပေးကွပ်မျက်ခံခဲ့ရတဲ့ ကျောင်းသားသူရဲကောင်း ဆလိုင်းတင်မောင်ဦး ကျဆုံးခဲ့တာ ၄၉ နှစ်ပြည့်ခဲ့ပြီဖြစ်ပါတယ်။

========================

📌📌 ၂။ မင်းတပ်မြို့နယ် သစ်တောမူဝါဒ (မူကြမ်း) ထုတ်ပြန်။

မင်းတပ်မြို့နယ်အတွင်း သစ်တောထိန်းသိမ်းရေးဆိုင်ရာ မူဝါဒနဲ့ ပတ်သက်တဲ့ ထုတ်ပြန်ကြေညာချက်ကို တာဝန်ရှိသူတွေ ဝိုင်းဝန်းဆွေးနွေးပြီးတဲ့နောက် သစ်တောမူဝါဒ(မူကြမ်း) အတည်ပြုခဲ့တယ်လို့ မင်းတပ်မြို့နယ်ပြည်သူ့အုပ်ချုပ်ရေးအဖွဲ့က ဇွန်လ ၂၆ရက်က ကြေညာချက် ထုတ်ပြန်ပါတယ်။

အစည်းအဝေးမှာ အတည်ပြုတဲ့ သစ်တောမူဝါဒ (မူကြမ်း)ကို မင်းတပ်မြို့နယ် သစ်တောဌာနအနေနဲ့ မြို့/တိုက်နယ်အဆင့်ထိ အဆင့်ဆင့် နယ်ဆင်းဟောပြော ချပြဆွေးနွေးသွားမှာဖြစ်သလို ပြည်သူလူထုရဲ့ အကြံပြုချက်ရယူမှတ်သားပြီးနောက် မြို့နယ်ပြည်သူ့အုပ်ချုပ်ရေးအစည်းအဝေးမှာ အချောသတ် အတည်ပြုကြရန် ဆုံးဖြတ်ကြတယ်လို့ ဆိုပါတယ်။

အခုထုတ်ပြန်တဲ့ မူကြမ်းဖတ်ရှုပြီး မည်သူမဆို မင်းတပ်မြိို့နယ်ပြည်သူ့အုပ်ချုပ်ရေးရုံး ဒါမှမဟုတ် ပ.အ.ဖ ဖေ့စ်ဘုတ်စာမျက်နှာ message boxကနေ ဆွေးနွေးအကြံပြုချက် ပေးပို့နိုင်တယ်လို့လည်း အသိပေးထားပါတယ်။

========================

📌📌 ၃။ အီရန် နိုင်ငံခြားရေးဝန်ကြီးက Putin ကို သွားတွေ့၊ အီရန်အပေါ် တိုက်ခိုက်တာဟာ အခြေအမြစ်မရှိဘူးလို့ Putinပြော။

အမေရိကန်က အီရန်ကို တိုက်ခိုက်လိုက်တဲ့ နောက်တနေ့မှာ အီရန် နိုင်ငံခြားရေးဝန်ကြီး Abbas Araqchi ဟာ ရုရှားကိုသွားပြီး သမ္မတ Putin ကို သွားရောက် တွေ့ဆုံခဲ့ပါတယ်။

အီရန်အပေါ် တိုက်ခိုက်တာဟာ အခြေအမြစ်မရှိဘဲ အီရန်ပြည်သူတွေကို အကူအညီပေးဖို့ အသင့်ရှိတယ်လို့ Putin က အဲဒီတွေ့ဆုံပွဲမှာ ပြောပါတယ်။

ဇွန်လ ၂၂ မနက်အစောပိုင်းမှာ အမေရိကန်က “Midnight Hammer” စစ်ဆင်ရေးနာမည်နဲ့ အီရန်ရဲ့ နျူကလီးယားထုတ်လုပ်နေရာ ၃ ခုကို တိုက်ခိုက်ခဲ့တာပါ။ ပစ်မှတ်တိတိကျကျ ချိန်ရွယ်တဲ့ လက်နက် ၇၅ ခုကို အသုံးပြုခဲ့ပြီး အဲဒီထဲမှာ ဘန်ကာဖျက်စက်လို့ခေါ်တဲ့ MOP မော့ ဗုံး ၁၀ လုံးကျော် ပါဝင်တယ်လို့ အမေရိကန်၊ ပင်တဂွန် စစ်ဌာနချုပ်က ဆိုပါတယ်။

အီရန်ဘက်ကတော့ တိုက်ခိုက်မခံရမီ နျူကလီးယားထုတ်လုပ်တဲ့နေရာက ယူရေနီယံတွေကို ရွှေ့ပြောင်းထားပြီးဖြစ်လို့ ကြီးကြီးမားမား ပျက်စီးဆုံးရှုံးမှုမရှိဘူးလို့ ပြောထားပါတယ်။

#RadioNUGLocalNews

#SpringRevolution