26th FEB 2022 - (Ethnic language program-CHO_DAAI) by Radio NUG

📌(ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၂ ဖေဖေါ်ဝါရီလ ၂၆ ရက်နေ့ ရပြည်တွင်းသတင်းများ

📌📌၁။ (၄) ရက်တာ တိုက်ပွဲတွင် စစ်ကောင်စီတပ်သား၂၁ ဦး ခန့်သေကြောင်း CDF ကန်ပက်လက်ထုတ်ပြန်

■ ၂၀၂၂ ခုနှစ် ဖေဖော်ဝါရီလ ၂၀ရက်နေ့တွင် မကွေးတိုင်း လောင်းရှည်မှ ကျင်ဒွေးမြို့သို့ဦးတည် စစ်ကြောင်းထိုးလာသော စစ်ကောင်စီစစ်ကြောင်းအား ဆွဲလွဲကျင် ကျေးရွာအနီး၌ နံနက် ၈:၀၀ တွင်တစ်ကြိမ် နေ့လယ် ၁၂:၀၀ တွင်တစ်ကြိမ် CDF-Kanpetlet ဘက်မှ ကြားဖြတ် တိုက်ခိုက်ခဲ့ရာ စစ်ကောင်စီဘက်မှ ၆ ဦးသေဆုံးခဲ့ ကြောင်း သိရသည်။

ထို့နောက် ၂၁ ရက်နေ့တွင် ၎င်း စစ်ကောင်စီစစ်ကြောင်း နှင့် CDF-Kanpetlet /PDF-Saw ပူးပေါင်းတပ်ဖွဲ့တို့ထပ်မံတိုက်ပွဲပြင်းထန်ခဲ့ပြီးစစ်ကောင်စီဘက်မှ ၄ ဦး ထပ်မံသေဆုံးခဲ့ကြောင်းသိရသည်။

ထို့နောက် ၂၂ ရက်နေ့တွင် ရေရှောင်လမ်းမြက်ခင်းပြင် အနီးတွင် စစ်ကောင်စီစစ်ကြောင်းနှင့် CDF-Daai/PDF-Saw/CDF-Kanpetlet ပူးပေါင်းတပ်ဖွဲ့တို့အကြား ထပ်မံတိုက်ပွဲပြင်းထန်ခဲ့ပြီး စစ်ကောင်စီဘက်မှ ၁၁ ဦးသေဆုံးခဲ့ပြီး အများအပြားဒဏ်ရာရရှိခဲ့ ကြောင်းသိရသည်။ ဖေ ဖော်ဝါရီလ ၁၉ ရက်နေ့မှ ၂၂ ရက်တွင် ထိတွေ့တိုက်ပွဲ ၄ ကြိမ်ဖြစ်ပွားခဲ့ပြီး ယင်းတိုက်ပွဲများတွင် စစ်ကောင်စီ တပ်သား ၂၁ ဦးခန့် သေဆုံးခဲ့ကြောင်း CDF ကန်ပက်လက်မှ သတင်းထုတ်ပြန်သည်။

တိုက်ပွဲတွင် အထိနာခဲ့သောစစ်ကောင်စီတပ်သားများသည် မဆာတွီ ကျေးရွာရှိပြည်သူနေအိမ်များအား ဖောက်ထွန်းဖျက်ဆီးကာ ပစ္စည်းအမြောက်များခိုးယူခဲ့ပြီး မောချောင်းရွာတွင် လူနေအိမ် ၄ လုံးကို မီးရှို့ဖျက်ဆီးခဲ့ကြောင်းသိရသည်။

📌📌၂။ မတူပီရဲစခန်းမှ နယ်ထိန်း ရဲ တစ်ဦး လက်နက်နှင့် အတူ ချင်းကာကွယ်ရေးတပ်ဖွဲ့ထံ ခိုလှုံ

■ ချင်းပြည်နယ်၊ မတူပီရဲစခန်းတွင် တာဝန်ထမ်းဆောင်နေသည့် တပ်သား အဆင့်ရှိသူ နယ်ထိန်း တစ်ဦးသည် ၎င်းကိုင်ဆောင်ထားသည့် လက်နက်နှင့်အတူ ချင်းကာကွယ်ရေးတပ်ဖွဲ့ (မတူပီ) CDF Matupi ထံသို့ ဖေဖော်ဝါရီ (၂၃) ရက်တွင် ခိုလှုံလာကြောင်း သိရသည်။

၎င်း၏ လုပ်ရပ်ကိုကြည့်၍ ကျန်ရစ်သည့် ရဲဘော်များအနေဖြင့် လူတစ်ဦး တစ်ယောက်၊ လူတစ်စုကိုသာ ကာကွယ်နေရန် မသင့်ဘဲ ပြည်သူ့ဘက် ရပ်တည်ကြရန်နှင့် ချင်းကာကွယ်ရေး တပ်ဖွဲ့များကလည်းနွေးနွေးထွေးထွေးကြိုဆိုကြပြီး ထိုက်တန်သည့် ဂုဏ်ပြု ချီးမြှင့်ငွေများ ပေးအပ်ကြကာ လုံခြုံစိတ်ချရတဲ့ နေထိုင်ရေးများအတွက်လည်း စီစဉ်ပေးကြကြောင်း ဆိုသည်။

ပြီးခဲ့သည့် ​ဇန်နဝါရီလ ၂၆ ရက်ကလည်း မတူပီမြို့နယ်အခြေစိုက် ခြေမြန်တပ်ရင်း ( ၅၂၁ ) မှ တပ်ကြပ်ကြီးနှင့် ဒုတပ်ကြပ် နှစ်ဦး MA 1 အမျိုးအစား သေနတ် နှစ်လက် ၊ ကျည်ဆန် ၅၅၀တောင့်၊ လက်ပစ်ဗုံး နှစ်လုံး ၊ နင်းမိုင်း တစ်လုံး နှင့်အတူ ခိုလှုံလာကြောင်း သိရသည်။ ခုလက်ရှိ ဖေဖော်ဝါရီလအထိ ချင်းကာကွယ်ရေးတပ်ဖွဲ့ (မတူပီ) ထံသို့ ခိုလှုံလာသည့် စစ်သားနှင့်ရဲ ၁၁ ဦးရှိပြီဖြစ်ကြောင်းသိရသည်။

📌📌၃ ။ ဖလမ်းမြို့သို့ ရိက္ခာပို့မည့် စစ်ကောင်စီယာဥ်တန်းကြားဖြတ်တိုက်ခိုက်ရာ စစ်ကောင်စီတပ်သား (၁၀) ယောက်ခန့်သေ

■ ချင်းပြည်နယ်၊ ဖလမ်းမြို့နယ်သို့ ရိက္ခာပို့ရန် တက်လာသောအကြမ်းဖက်စစ်ကောင်စီတပ်ကား အစီး (၃ဝ)ခန့် ယာဥ်တန်းကို ဖေဖော်ဝါရီ (၂၄) ရက် ယမန်နေ့တွင် CNDF မှကြားဖြတ်တိုက်ခိုက်ခဲ့ကြောင်းသိရသည်။

အဆိုပါ ယာဥ်တန်းနှင့် အကြမ်းဖက်စစ်ကောင်စီတပ်ဖွဲ့ဝင်များအား ဖလမ်းမြို့၊ထင်းရှူးစခန်းကျေးရွာအနီးတွင် CNDF မှ ပစ်ခတ်တိုက်ခိုက်ခဲ့တာဖြစ်ပြီး စစ်ကောင်စီတပ်သား (၁၀) ယောက်ခန့်သေကြောင်း၊ ပစ်ခတ်တိုက်ခိုက်မှုအပြီး CNDF တပ်ဖွဲ့ဝင်များ အထိခိုက်မရှိဆုတ်ခွာနိုင်ခဲ့ကြောင်း Chin National Organization (CNO)မှ ဖေဖော်ဝါရီ (၂၅) ရက်နေ့ ရက်စွဲဖြင့် ထုတ်ပြန်ထားသည်။

စစ်ကောင်စီသည် ချင်းပြည်နယ် ဖလမ်းမြို့အခြေစိုက် ခလရ (၂၆၈) တပ်တွင်းသို့ ရိက္ခာ၊ လက်နက်များ တောက်လျှောက်ပို့ဆောင်လျက်ရှိပြီး ဖလမ်း-ကလေး လမ်းပိုင်းအတွင်း ပြည်သူ့ကာကွယ်ရေးတပ်များနှင့် စစ်ကောင်စီတပ်အကြား ပစ်ခတ်တိုက်ခိုက်မှု မကြာမကြာဖြစ်လေ့ရှိသည်။

📌📌၄။ မီဇိုရမ် ပြည်နယ် အစိုးရကမြန်မာစစ်​ဘေး​ရှောင် ၄၀၀၀ ​ကျော်ကို ဒုက္ခသည်သက်​သေခံကတ်ပြား ထုတ်​ပေး

■ ကျန်ဖိုင် ခရိုင်အတွင်းရှိ မြန်မာ စစ်​ဘေး​ရှောင် ဦး​ရေ ၄၂၂၅ ​ကျော်ကို အိန္ဒိယနိုင်ငံ၊ မီဇိုရမ် ပြည်နယ်အစိုးရက ဒုက္ခသည် သက်​သေခံ ကတ်ပြားများ ထုတ်​ပေးလိုက်ပြီဖြစ်​ကြောင်း သိရသည်။

ခရိုင် တာဝန်ရှိသူများ၏ အဆိုအရ ယင်းခရိုင်တွင် မြန်မာစစ်​ဘေး​ရှောင်​ဦး​ရေပေါင်း တစ်​သောင်း ခန့် ရှိ​နေပြီး ယခု ​ဖေ​ဖော်ဝါရီလအတွင်း သက်​သေခံကတ်ပြား ထုတ်​ပေးခြင်းလုပ်ငန်းကို အပြီးလုပ်​ဆောင်သွားမည်ဖြစ်​ကြောင်းသိရသည်။

📌📌၅။ ရုရှားက ယူကရိန်းကို ကျူး​ကျော်တိုက်ခိုက်​နေ

■ ရုရှားနိုင်ငံသမ္မတ ဗလာဒီမာပူတင်က အိမ်နီးချင်း ယူကရိန်းနိုင်ငံတွင် အထူးစစ်ဆင်ရေးတစ်ရပ်စတင်ပြီဖြစ်ကြောင်း ဖေ​ဖော်ဝါရီလ ၂၄ ရက်​​နေ့ တွင် ကြေညာလိုက်ပြီး တပြိုင်နက် ယူကရိန်းနိုင်ငံ၏မြို့တော်များဖြစ်သည့် ကီယက်၊ ခါကစ်နှင့် ဩဒေစ္စမြို့များတွင် ကြီးမားသော ပေါက်ကွဲသံကြီးများ ပေါ်ထွက်လာသည်။

အိမ်နီးချင်း ယူကရိန်းနိုင်ငံသည် ရုရှား၏အစဉ်အလာပိုင်နက်နယ်မြေတစ်ခုဖြစ်ကြောင်း ပူတင်က ကြေညာထားပြီး၊ ယူကရိန်းနိုင်ငံသည် မြောက်အတ္တလန်တိတ်စာချုပ်ပါ အနောက်အုပ်စုဒီမိုကရေစီနိုင်ငံများစုပေါင်းဖွဲ့ထားသည့် NATO အဖွဲ့တွင် မပါဝင်ရေးနှင့် အရှေ့ဥရောပတွင် နေတိုးတပ်များချထားမှုကို ဖယ်ရှားရေးစသည့်တောင်းဆိုချက်များကို အနောက်အုပ်စုက မလိုက်လျောဟုဆိုကာ ယူကရိန်းနိုင်ငံကို ယနေ့တွင် ရုရှားက စစ်ရေးအရ စတင်တိုက်ခိုက်ခြင်းဖြစ်သည်။

📌📌၆ ။ ကျောက်ထု ရှိ စစ်ဘေးရှောင်များ အတွက် စားနပ်ရိက္ခာများ ထပ်မံ ပေးဝေခဲ့

■ ဖေဖော်ဝါရီလ ၊ ၂၃ ရက် နံနက် ၀၉:၀၀ အချိန်တွင် ကျောက်ထု မြို့မ ရပ်ကွက်နှင့် ဂုံဘိုရပ်ကွက်တွင် အိမ်ငှားနေထိုင် နေကြသော စစ်ဘေးရှောင်များအတွက် စားနပ်ရိက္ခာများ ထပ်မံ ပေးဝေခဲ့ကြောင်း ကျောက်ထု စစ်ဘေးရှောင်စီမံခန့်ခွဲရေး ကော်မတီထံမှ သိရသည်။

ယခင်ကဘော်ဒါဆောင် များ ၊ IDP Camp များနှင့် ရွာကျေးရွာနေ စစ်ဘေးရှောင်များကို ပေးဝေပြီး ဖြစ်၍ ယခု အကြိမ်တွင် အိမ်ငှားနေထိုင် သူများကို သီးသန့် ပေးဝေသွားမည် ဖြစ်ပြီး ပေးဝေသွားသည့် ရိက္ခာတွေကတော့ ဆန်၊ ဆီ၊ ဆား၊ ကုလားပဲတို့ဖြစ်သည်။

#RadioNUGLocalNews

#SpringRevolution