19th MAR 2022 - (Ethnic language program-CHO_DAAI) by Radio NUG

📌(ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၂ မတ်လ ၁၉ ရက်နေ့ ရပြည်တွင်းသတင်းများ

📌📌၁။ စစ် ကောင်စီ တပ်၏ ကြားညှပ် တိုက်ခိုက်မှု ကြောင့် CDF ကန်ပက်လက် တပ်မဟာ ဌာနချုပ်ကို ယာယီစွန့်ခွာခဲ့ရ

 

၂၀၂၂ ခုနှစ် မတ်လ ၁၁ ရက်နေ့တွင်ကန်ပက်လက်မြို့မှ အင်းအား ၂၀၀ ခန့်ဖြင့် CDF-Kanpetlet တပ်မဟာဌာနချုပ်ရှိရာဖက်သို့ဦးတည်ကာစစ်ကြောင်းထိုးလာသောအကြမ်းဖက်စစ်ကောင်စီနှင့် CDF-Kanpetlet တို့အကြားထိတွေ့တိုက်ပွဲဖြစ်ပွားခဲ့ရာ အကြမ်းဖက်စစ်ကောင်စီဘက်မှ ၃ ဦးသေဆုံးခဲ့ပြီးCDF-Kanpetlet ရဲဘော်များအထိအခိုက်မရှိခဲ့ ကြောင်းသိရသည်။

 

ထို့နောက် မတ်လ ၁၃ ရက်နေ့မှ ၁၅ ရက်နေ့အထိ CDF-Kanpetlet ၊ CDF-Mindat ၊ ယောဒေသကာကွယ်ရေးတပ်ဖွဲ့ The Youth Force နှင့် Saw - PDF ပူးပေါင်းတပ်နှင့်အကြမ်းဖက်စစ်ကောင်စီတို့အကြား ဆက်တိုက် တိုက်ပွဲပြင်းထန်၍ စကစဖက်မှ ၂ ဦးသေဆုံးကာ CDF Kanpetlet ဖက်မှရဲဘော်တစ်ဦး မိမိသစ္စာပြုသော အမျိုးသားတော်လှန်ရေးအတွက် အသက်ပေးဆပ်ခဲ့ပြီး နှစ်ဦးထိခိုက်ဒဏ်ရာရကြောင်းသိရသည်။

 

ခလရ ၂၇၄ တပ်ရင်း နှင့် ကျောက်ထု အမြောက်တပ်တို့ဖက်မှလက်နက်ကြီးပစ်ကူပေးခဲ့ပြီး စမ္မသားရွာဟောင်းရှိ လူနေအိမ် ၉ လုံး လက်နက်ကြီးထိမှန် မီးလောင်ပျက်စီးခဲ့ ကြောင်းသိရသည်။

 

မိမိတို့ CDF-Kanpetlet ဖက်မှ ကျည်မလုံလောက်ခြင်း၊ လက်နက်အင်အားမမျှခြင်း၊ ကျေးရွာအတွင်းရှိပြည်သူများ ထိခိုက်ဒဏ်ရာရမည့်အရေးကိုရှေ့ရှုခြင်းနှင့် သာလွန်အင်အားဖြင့်ထိုးစစ်ဆင်ခံရသည့် အခြေနေများကြောင့် CDF-Kanpetlet တပ်မဟာဌာနချုပ်ကို ယာယီစွန့်လွှတ်လိုက်ရ ကြောင်း CDF ကန်ပက်လက်က မတ်လ ၁၆ ရက် ယ နေ့ မွန်းလွဲပိုင်းတွင် သတင်းထုတ်ပြန်ထားသည်။

 

📌📌၂။ ကန်ပက်လက် မြို့နယ်တွင် တိုက်ပွဲများ ပြင်းထန် နေပြီး လူဦး ရေ ၁၀၀၀ နီးပါး တော တောင်များတွင် ပုန်း ရှောင် နေရ

 

ကန်ပက်လက် မြို့နယ်၊ တိုက်နယ်အမှတ်(၅)ဘက် စမ္မသား၊စံအိမ်နူးနှင့် ကျေးရွာအနီးတဝိုက် ကျေးရွာများတွင် စစ်ကောင်စီနှင့် CDFတို့ ထိတွေ့တိုက်ပွဲများဆက်တိုက်ဖြစ်ပေါ်လျက်ရှိပြီး  သက်ကြီးရွယ်အိုများ ကလေးငယ်များနာမကျန်းနှင့် ကိုယ်ဝန်ဆောင်မိခင်များအပါဝင် လူဦးရေ (၉၀၀) ခန့်တောထဲ တောင်ထဲသို့ ထွက် ပြေး ပုန်းရှောင်နေရသည်မှာ ရက်အနည်းငယ်ကြာမြင့် နေပြီ ဖြစ် ကြောင်းသိရသည်။

 

တော တောင်ထဲတွင် အစာ ရေစာ ပြတ်လပ်မှုများနှင့် ရင်ဆိုင် နေရပြီး တိုက်ပွဲမည်မျှကြာမည်ကို ခန့်မှန်းမရနိုင် သော ကြောင့်နေရေးထိုင်ရေး စားရေးသောက်ရေးနှင့်ဆေးဝါးများ လိုအပ်လျက်ရှိ ကြောင်း ကန်ပက်လက်မြို့နယ် ကြက် ခြေနီ အသင်းက ထုတ်ပြန်ထားသည်။

 

စေတနာရှင် ပြည်သူများ အ နေဖြင့် အကူညီများပေးနိုင်ပါရန် ကန်ပက်လက်မြို့နယ် ကြက် ခြေနီ အသင်းက ၎င်းတို့၏ လူမှုကွန်ရက် စာမျက်နှာတွင် မတ်လ ၁၆ ရက် ၊ ယမန် နေ့က ဖော်ပြထားသည်။

 

ကန်ပက်လက်မြို့နယ်တွင် စစ် ကောင်စီ၏ သာလွန်အင်အား အသုံးပြုကာ ပိတ်ဆို့တိုက်ခိုက် နေခြင်းကြောင့် CDF ကန်ပက်လက် အ နေဖြင့် ၎င်းတို့၏တပ်မဟာဌာနချုပ်ကို ယာယီ စွန့်ခွာခဲ့ရ ကြောင်း ယမန် နေ့က ထုတ်ပြန်ခဲ့သည်။

 

ကန်ပက်လက် စစ် ဘေး ရှောင်ပြည်သူများကို ကူညီရန်အတွက် အောက်ပါ ဖုန်းနံပါတ်ကို ဆက်သွယ် ကူညီနိုင် ကြောင်း ကန်ပက်လက်မြို့နယ် ကြက် ခြေနီအဖွဲ့က ဖော်ပြထားသည်။ ဆက်သွယ်ရန် 09756330078

 

📌📌၃။ CDF မတူပီ ၊ CDF ပလက်ဝ ၊ CNA ပူး ပေါင်းတပ်ဖွဲ့များနှင့် စစ် ကောင်စီ တို့ တိုက်ပွဲဖြစ်၊ စစ် ကောင်စီ တပ်သား ၅ ဦး သေ ၊  ခရီးသွား ပြည်သူတစ်ဦး မိုင်းထိ၍ ဆုံးပါး

၁၂၊ ၀၃၊ ၂၀၂၂ရက်နေ့တွင် မတူပီ CDF တပ်ရင်း(၃) နယ်မြေ ခွာဟုန်းကျေးရွာ လအုပ်ချောင်းအနီးတွင် မနက် ၉-နာရီကနေ နေ့လည် ၁၂-နာရီအထိ စစ်ကောင်စီတပ်နှင့် မတူပီ CDF ၊ ပလက်၀ CDF ၊  CNA ပူးပေါင်းတပ် တို့အကြား တိုက်ပွဲပြင်းထန်ခဲ့ပြီး စစ်ကောင်စီဖက်က တစ်ဦးသေဆုံးကာ (၅)ဦးထက် မနည်းထိခိုက်ဒဏ်ရာရရှိပါသည်။

 

၁၃၊ ၃၊ ၂၀၂၂ ရက်နေ့ မနက်ပိုင်း ၅-နာရီကနေ သုံးနေရာမှာ တိုက်ပွဲဆက်လက်ဖြစ်ပွားခဲ့ရာ စစ်ကောင်စီဖက်က (၁၀)ဦးထက်မနည်းသေဆုံးခဲ့ရပြီး အများအပြားဒဏ်ရာရရှိသည်။ CNA ရဲဘော်နှစ်ဦး တိုင်းပြည်နဲ့လူမျိုးအတွက် အသက်ပေးလှုသွားသည်။

 

မတ်လ (၁၅) ရက်နေ့တွင် မတူပီမြို့နယ် ပန်တွီရွာမှ ဆလိုင်း ရိုပွီထန် အသက် (၁၈) နှင့် ဆလိုင်း တိုတိုအောင် တို့နှစ်ယောက် India နိုင်ငံ Mizoram သို့ ဆိုင်ကယ်နဲ့ ထွက်ခွာလာခဲ့ရာ ထန်တလန်မြို့နယ် တလိုင်ရွာ (က) တစ်နေရာတွင် (CDF-ထန်တလန်လှုပ်ရှားနယ်မြေ)  မိုင်း ထိမိပြီး ဆလိုင်း ရိုပွီထန်မှာ နေရာမှာပင် ပွဲချင်းပြီး သေဆုံးသွားခဲ့ကြောင်း သိရသည်။

ကျန်တစ်ဦးမှာ ဒဏ်ရာပြင်းထန် (အူဖြတ်ထားရ) သတိမေ့မြောနေဆဲဖြစ်ပြီး CDF-ထန်တလန်မှ တာဝန်ယူကြည့်ရှု့ပေးထားကြောင်း သိရသည်။

 

📌📌၄။ အကြမ်းဖက်စစ်ကောင်စီယာဥ်တန်းမိုင်းဆွဲတိုက်ခိုက်ရာ စစ်ကောင်စီဖက်မှ အသေပျောက်ရှိကြောင်း    ကျောက်ထု PDF ထုတ်ပြန်

၂၀၂၂၊ မတ်လ (၁၇) ရက်နေ့တွင် ပခုက္ကူဖက်မှ ချင်းပြည်နယ်ဖက်သို့ဦးတည်လာသော စစ်ကောင်စီယာဥ်တန်းကားအ စီးရေ (၁၀၀) ခန့်၏ ရှေ့ပြေးယာဥ်ကိုကျောက်ထုဒေသခံကာကွယ်ရေးတပ်မှ မိုင်းဆွဲတိုက်ခိုက်ခဲ့ရာ စစ်ကောင်စီတပ်သား (၈) ယောက်သေပြီး ထိခိုက်ဒါဏ်ရာရရှိသူများကြောင်း ဒေသခံကာကွယ်ရေးတပ်မှ ထုတ်ပြန်ထားသည်။

ပြီးခဲ့သည့်ရက်ပိုင်းက အကြမ်းဖက်စစ်ကောင်စီကို ခုခံတော်လှန်ရင်း အသက်ပေးလှူသွားကြသော တော်လှန်ရေး ရဲဘော်ညီအစ်ကိုတို့၏ အသက်သွေးကြွေးပြန်ယူလိုက်ခြင်းဖြစ်သည်ဟု Kyaukhtu PDF မှ တစ်ပါတည်းထုတ်ပြန်ထား သည်။

ယခုရက်ပိုင်းအတွင်း အကြမ်းဖက်စစ်ကောင်စီသည် မကွေးတိုင်းနှင့် ချင်းပြည်နယ်အတွင်း သာလွန်အင်အားဖြင့် စစ်ကြောင်းထိုးရန် ပြင်ဆင်နေသောကြောင့် မိဘပြည်သူများအနေဖြင့် ခရီးအသွားလာသတိပြုရန်နှင့် ဒေသခံကာကွယ်ရေးတပ်များ၏ ထုတ်ပြန်ချက်များကို အစဥ်တစိုက် နားဆင်ပေးကြရန် လိုအပ်ပါသည်။

 

📌📌၅။ CDF-MINDATနှင့် CDF-SENTHANG တို့ မဟာမိတ်ဖွဲ့စည်းကြောင်းထုတ်ပြန်

 

CDF-MINDAT နှင့် CDF-SENTHANG သည် အကြမ်းဖက်စစ် ကောင်စီ၏ မတရားအာဏာသိမ်းချိန်မှစတင်၍ ရရာလက်နက်ဖြင့်တော်လှန်သည့်နည်းတူ ယနေ့အချိန်မှစ၍ စစ်အာဏာရှင်စနစ်အမြစ်ပြတ်သွားသည်အထိ သစ္စာမပြတ်ပူးပေါင်းတိုက်ပွဲဝင်သွားမည်ဟု ယ နေ့၊ မတ်လ (၁၈) ရက်နေ့ ရက်စွဲဖြင့် ထုတ်ပြန်ထားသည်။

ထို့နောက် CDF-MINDAT နှင့် CDF-SENTHANG အနေဖြင့် ချင်းတစ်မျိုးသားတစ်ရပ်လုံး၏ အသက်စည်းစိမ်အိုးအိမ်ကို အသက်နှင့်ရင်း၍ ရင်း ပြည်သူလူထုထံမှပေါက်ပွားလာသော ကိုယ်ပိုင်အုပ်ချုပ်ခွင့်၊ ကိုယ်ပိုင်ပြဠာန်းခွင့်နှင့် ကိုယ်ပိုင်တရားစီရင်ခွင့်တို့အပြည့်အဝရှိသည့်တည်ဆောက်ပြီးသည်အထိမဟာမိတ်ညီနောင်အဖြစ်အတူတကွရပ်တည်သွားမည်ဟု ထုတ်ပြန်ချက်ထဲတွင်ပါရှိသည်။

CDF-SENTHANG ကို ၂၀၂၁ ခုနှစ် စက်တင်ဘာ ၂၃ ရက် နေ့တွင် စတင်တည် ထောင်ခဲ့ပြီး CNF/CNA ( ချင်းအမျိုးသားတပ်ဦး / ချင်းမျိုးသားတပ်မ တော် ) ၏ ကြီးကြပ်ကွပ်ကဲမှုနှင့် အတူ ဆက်လက် တိုက်ပွဲဝင်သွားမည်ဖြစ် ကြောင်း ကြေညာခဲ့ဖူးသည်။

CDF SENTHANG သည် CDF မင်းတပ်နှင့် မဟာမိတ်အဖြစ် ဖွဲ့စည်း ကြောင်း တရားဝင် သတင်းထုတ်ပြန်သည့် ၆ ဖွဲ့ မြောက် ချင်း တော်လှန် ရေး လက်နက်ကိုင်အဖွဲ့အစည်း ဖြစ်သည်။

 

📌📌၆။ မြန်မာစစ်တပ်ကို ချက်ချင်းအရေးယူဖို့ ကုလမဟာမင်းကြီးတောင်းဆို

 

မြန်မာစစ်တပ်အပေါ် ပြတ်ပြတ်သားသား အရေးယူမှုတွေ ချက်ချင်းချမှတ်ဖို့ နိုင်ငံတကာ အသိုင်းအဝိုင်းကို ကုလသမဂ္ဂလူ့အခွင့်အရေးဆိုင်ရာ မဟာမင်းကြီး Michelle Bachelet က မတ်လ ၁၅ ရက် နေ့က တိုက်တွန်းလိုက်ပါတယ်။

 

မြန်မာစစ်တပ်ဟာ စစ်ရာဇဝတ်မှု ဒါမှမဟုတ် လူသားမျိုးနွယ်စုတွေ အပေါ်ကျူးလွန်တဲ့ ရာဇဝတ်မှုလို့ ခေါ်ဆိုနိုင်တဲ့ လူ့အခွင့်အရေးချိုးဖောက်မှုတွေနဲ့ အကြမ်းဖက်မှုတွေကို စနစ်တကျ ကျယ်ကျယ်ပြန့်ပြန့် တိုးလုပ်လာနေတာကြောင့် ဒါတွေကို နိုင်ငံတကာအသိုင်းအဝိုင်းက ရပ်တန့်သွားအောင် လုပ်ဖို့လိုတယ်လို့ သူက ဆိုပါတယ်။ 

 

ပြီးခဲ့တဲ့ ၂၀၂၁ ခုနှစ် တစ်နှစ်ပတ်လုံးမှာ အကြမ်းဖက်နှိပ်စက်ခံခဲ့ရပေမယ့် မြန်မာပြည်သူတွေဟာ လက်မလျှော့ဘဲ သူတို့မျှော်မှန်းတဲ့ ဒီမိုကရေစီပန်းတိုင်ရောက်ရေးကို ဆက်လက်စွဲကိုင် ကြိုးစားနေကြဆဲဖြစ်တယ်လို့လည်း ချီးကျူးထားပါတယ်။

 

စစ်ကောင်စီတပ်ဖွဲ့ဝင်တွေကြောင့် အနည်းဆုံး လူပေါင်း ၁၆၀၀ လောက်သေဆုံးခဲ့ရပြီး လူပေါင်း ၁၂၅၀၀ ကျော် ဖမ်းဆီးခံခဲ့ရတယ်လို့ ကုလသမဂ္ဂအစီရင်ခံစာမှာ ဖော်ပြထားပါတယ်။

 

ဒါ့အပြင် တိုက်ပွဲတွေကြောင့် အနည်းဆုံး လူပေါင်း ၄၄၀၀၀၀ လောက် နေရပ်စွန့်ခွာ ထွက်ပြေးကြရပြီး၊ လူပေါင်း ၁၄ သန်းလောက်ဟာလည်း လူသားချင်းစာနာမှု အကူအညီတွေ လိုနေပေမယ့် စစ်ကောင်စီက အကူအညီအထောက်အပံ့မပေးနိုင်အောင် လမ်းကြောင်းပိတ်ဆို့တာတွေလည်း ရှိနေတယ်လို့ ဆိုပါတယ်။

📌📌၇။ မြန်မာကိုကူညီဖို့ ဒေါ်လာ ၁၃၆ သန်း ကန်လွှတ်တော် အတည်ပြု

 

ပြီးခဲ့တဲ့သောကြာနေ့က လွှတ်တော်မှာ အတည်ပြုလိုက်တဲ့ အမေရိကန်နိုင်ငံရဲ့ ဘတ်ဂျက်မှာ မြန်မာနိုင်ငံကို ကူညီဖို့အတွက် ဒေါ်လာ ၁၃၆ သန်းကျော် ချမှတ်လိုက်ပါတယ်။

အမေရိကန်အစိုးရရဲ့ ၂၀၂၂ ဘဏ္ဍာရေးဘတ်ဂျက်အတွက် မြန်မာကို ကူညီမယ့် ဒေါ်လာ ၁၃၆ သန်းမှာ NUG၊ NUCC ၊ CRPH၊ CDM နဲ့ EAO တွေကို သီးခြား ခေါင်းစဉ်တွေအောက်မှာ ကူညီထောက်ပံ့ဖို့ရှိကြောင်း အတိအကျ ဖေါ်ပြထားတာဟာ ထူးခြားပြီး အားတက်ဖွယ်ရာဖြစ်တယ်လို့ USACM မြန်မာ့အရေး ထောက်ခံအားပေးတဲ့ အမေရိကန်မဟာမိတ်အဖွဲ့က ပြောပါတယ်။

 

📌📌၈။ ကန် သမ္မတ နှင့် တရုတ်သမ္မတ တို့ နှစ်နိုင်ငံ ဆက်ဆံ ရေးနှင့် ယူကရိန်းအရေး ကိစ္စများဆွေးနွေးမည်

 

ယူကရိန်းအပေါ် ရုရှားကျုးကျော် တိုက်ခိုက်မှုနဲ့ ၂ နိုင်ငံကြား စီးပွားရေး ပြိုင်ဆိုင်မှုတွေနဲ့ ပတ်သက်လို့ တရုတ်သမ္မတ Xi Jinping နဲ့ အမေရိကန်သမ္မတ Joe Biden သောကြာနေ့မှာ ဆွေးနွေးမယ့်အကြောင်း အိမ်ဖြူတော်က ထုတ်ပြန်ပါတယ်။

အမေရိကန်နဲ့ တရုတ်နိုင်ငံကြား ဆက်သွယ်ရေး လမ်းကြောင်းတွေကို ဆက်လက်ထိန်းသိမ်းထားတဲ့ အနေနဲ့ ဆွေးနွေးမှာဖြစ်ကြောင်း အိမ်ဖြူတော် ပြောခွင့်ရ Jen Psaki က ကြာသပတေးနေ့မှာ ကြေညာချက် ထုတ်ပြန်ပြောဆိုလိုက်တာပါ။

အမေရိကန်နဲ့ တရုတ်သမ္မတ တို့ နှစ်ဦး တယ်လီဖုန်းကနေ ဆွေးနွေးမယ့် အစီအစဉ် မတိုင်ခင် တနင်္လာနေ့မှာတုန်းကလည်း အိမ်ဖြူတော် အမျိုးသားလုံခြုံရေး အကြံပေး Jake Sullivan ဟာ တရုတ်နိုင်ငံခြားရေး အကြံပေး အကြီးတန်းအရာရှိ Yang Jiechi နဲ့ ရောမမြို့တော်မှာ တွေ့ဆုံပြီး ၇ နာရီကြာ ဆွေးနွေးခဲ့ကြ ကြောင်းသိရပါတယ်။

တရုတ်နိုင်ငံဟာ အမေရိကန်အတွက် အဓိက စစ်ရေး၊ စီးပွားရေး ပြိုင်ဖက်အဖြစ် သဘောထားပြီး အာရှဒေသမှာ သြဇာချိန်ခွင်လျှာညှိမယ့် နိုင်ငံခြားရေးရာ မူဝါဒကို အကောင်အထည်ဖော်ဖို့ ရှိနေချိန်မှာပဲ တရုတ်သမ္မတနဲ့ ဆွေးနွေးမယ့် အစီအစဉ် ပေါ်ပေါက်လာတာပါ။

ရုရှားနိုင်ငံက ယူကရိန်းနိုင်ငံကို ကျုးကျော်တဲ့ လုပ်ရပ်အပေါ်မှာ တရုတ်နိုင်ငံက ပြစ်တင်ရှုတ်ချဖို့ ငြင်းဆန်ထားပါတယ်။

အိမ်ဖြူတော် အမျိုးသားလုံခြုံရေးအကြံပေး Sullivan ကတော့ ရုရှားအပေါ် တရုတ်ရဲ့ ရပ်တည်ချက်နဲ့ ပတ်သက်လို့ ပွင့်ပွင့်လင်းလင်း ရှိဖို့နဲ့ အနောက်နိုင်ငံတွေရဲ့ ဒဏ်ခတ်မှုတွေကို ရှောင်ရှားဖို့ ရုရှားရဲ့ ကြိုးပမ်းမှုတွေကို ကူညီမယ်ဆိုရင် တရုတ်အစိုးရကိုယ်တိုင် ပေးဆပ်ရလိမ့်မယ်လို့လည်း သတိပေးထား ကြောင်း သိရပါတယ်။

#RadioNUGLocalNews

#SpringRevolution