16th APR 2022 - (Ethnic language program-CHO_DAAI) by Radio NUG

📌(ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၂ ဧပြီလ ၁၆ ရက်နေ့ နောက်ဆုံးရပြည်တွင်းသတင်းများ

📌📌၁။ CDF-MINDAT အရာရှိဗိုလ်လောင်း အမှတ်စဉ် (၁) ၏သင်တန်းဆင်းပွဲပြုလုပ်

၂၀၂၂ ဧပြီလ ၁၁ ရက်နေ့တွင် CDF-MINDAT အရာရှိဗိုလ်လောင်း အမှတ်စဉ် ( ၁ ) ၏သင်တန်းဆင်းပွဲပြုလုပ်ကျင်းပခဲ့ကြောင်းသိရသည်။

အဆိုပါ သင်တန်းဆင်းပွဲတွင် သင်တန်းကာလ ပြီးစီးအောင် သင်ယူသော ရဲဘော်များကို ဂုဏ်ပြုလွှာပေးအပ်ခြင်းနှင့် ယခုအချိန်အထိ CDF-MINDAT နှင့်အတူ မားမားမတ်မတ်ရပ်တည်ပေးခဲ့ကြတဲ့ ပြည်တွင်းပြည်ပမှ အလှူရှင်တွေကို အထူးကျေးဇူးတင်ကြောင်းဖော်ပြထားသည်။

ဆက်လက်ပြီး CDF-MINDAT အနေဖြင့် စစ်အာဏာရှင် စနစ်တော်လှန်နိုင်ရေးအတွက် ပြည်တွင်း၊ ပြည်ပမှ မိဘညီအစ်ကို မောင်နှမများပါဝင်လှူဒါန်းနိုင်ကြောင်းကို တဆက်တည်းဖော်ပြထားပါသည်။

 

📌📌၂။ CJDC တတိယ အကြိမ်မြောက်ပုံမှန် အစည်းအဝေးပြုလုပ်၊ ZRO/ZRA (Eastern Command) ကို အကြမ်းဖက်အဖွဲအစည်းအဖြစ် သတ်မှတ်

 

ချင်းအမျိုးသား တပ် ပေါင်းစု  (CJDC) ၏ တတိယ အကြိမ် မြောက်ပုံမှန် အစည်းအဝေးကို ဧပြီလ ၇ ရက် နေ့မှ ၁၂ ရက် နေ့အထိ ပြုလုပ်ခဲ့ ကြောင်း သိရသည်။

 

CJDC အဖွဲ့ဝင် ပေါင်း ၁၈ ဖွဲ့ မှ ကိုယ်စားလှယ် ၃၁ ဦး ၊  လေ့လာသူ ၃၀ ဦး နှင့် ရုံးအဖွဲ့ ၄ ဦး ၊ စုစု ပေါင်း ၆၅ ဦး တက် ရောက်ခဲ့ ကြောင်းသိရသည်။ အဖွဲ့ဝင် ဌာန အသီးသီး၏ လုပ်ငန်းများ ၊ ဘဏ္ဍာ ရေး အစီရင်ခံစာများ နှင့် စစ် ရေး အစီရင်ခံစာများ တင်ပြ ဆွေး နွေးခဲ့ကြ ကြောင်း သိရသည်။

စစ်အာဏာရှင် ဖျက်သိမ်း ရေး ၊ ချင်းပြည် ထောင်တည် ထောင် ရေး နှင့် ဖက်ဒရယ်ပြည် ထောင်စု နှင့်ချင်းလူမျိုးတို့၏ ကိုယ်ပိုင် အုပ်ချုပ်/ပြဌာန်းခွင့်ဆိုင်ရာ အဆင့်လိုက် အကောင်အထည်ဖော်ခြင်းဆိုင်ရာ မူဝါဒ ၊ လုပ်ငန်း နှင့် စီမံချက်များ ချမှတ် ဆောင်ရွက်ခဲ့ကြောင်းသိရသည်။

 

 ZRO/ZRA (Eastern Command) သည် ချင်းပြည်သူများကို နှိပ်စက်ခြင်း ၊ စစ် ကောင်စီ နှင့် ပူးပေါင်းဆောင် ရွက်နေခြင်း ၊ တီးတိန် နှင့် တွန်းဇံမြို့များကို ကိုယ်စားပြုမှု မရှိခြင်း စသည့်ခိုင်လုံသောအကြောင်း ပြချက်များ ကြောင့် အကြမ်းဖက်အဖွဲ့အစည်းအဖြစ် သတ်မှတ်လိုက်ကြောင်း CJDC ၏ ထုတ်ပြန်ချက်တွင် ပါရှိသည်။

 

 ချင်းပြည်တစ်ဝန်းလုံးတွင် တင်ဒါလုပ်ငန်းများ ဆောင်ရွက်ခြင်း ကို CJDC က ပိတ်ပင်တားမြစ်ထားသည်။ CJDC သည် ချင်းအမျိုးသား တည် ဆောက် ရေး လမ်းစဉ်ဖြင့် ချင်းပြည် ထောင်တည် ဆောက် ရေးကို ကြိုးပမ်း ဆောင်ရွက် နေပြီး ချင်းပြည် ထောင်တည် ဆောက် ရေး ကို အ နှောက်အယှက် အဟန့်အတား ပြု နေ သည့် မည်သည့်အဖွဲအစည်းကို မဆို အ ရေးယူ  ဆောင်ရွက်သွားမည်ဖြစ် ကြောင်း ထုတ်ပြန်ထားသည်။

 

📌📌၃။ ချင်းရန်ပုံငွေအဖွဲ့ (CRFP) က တော်လှန်ရေးအတွက် လိုအပ်သည့် ဘဏ္ဍာငွေရှာဖွေနိုင်ရေး တူမီးထီ​ဖြင့်စတင်မိတ်ဆက်

ချင်းအမျိုးသား တော်လှန်ရေးအတွက်လိုအပ်တဲ့ ဘဏ္ဍာငွေရှာဖွေ​ရေးကဏ္ဍမှာ ချင်းရန်ပုံငွေအဖွဲ့ Chin Relief Funding Program (CRFP) က တူမီးထီ (Chin Digital Lottery) ကို စတင်မိတ်ဆက်လိုက်ကြောင်း ဧပြီ ( ၁၁ ) ရက်နေ့ ပြုလုပ်တဲ့ သတင်းစာရှင်းလင်းပွဲ ​​ဖြေကြားချက်များအရ သိရပါတယ်။

ယခုလို ရန်ပုံငွေရှာဖွေရာကနေ ရရှိလာတဲ့ ဘဏ္ဍာငွေတွေထဲက (၇၀) ရာခိုင်နှုန်းကို နွေဦးတော်လှန်ရေး၏ အဓိက အခန်းကဏ္ဍမှာပါဝင်နေကြတဲ့ လက်နက်ကိုင် ချင်းတော်လှန်ရေးအဖွဲ့အစည်းများ၊ CDM ဝန်ထမ်းများနှင့် တော်လှန်ရေးကာလအတွင်း စစ်ဘေးရှောင်ပြည်သူများထံ ထောက်ပံ့ပေးသွားမှာဖြစ်ကြောင်းသိရပါတယ်။

တူမီးထီ (Chin Digital Lottery) ကို ဧပြီလ ၁၁ ရက်နေ့မှာ စတင်ဖွင့်လှစ်ရောင်းချနေပြီဖြစ်ပြီး ၎င်းထီရဲ့ အမြင့်ဆုံး ဆုကြေး​ငွေဟာ အမေရိကန်ဒေါ်လာ ၇၅၀ ဖြစ်​ကြောင်း သိရပါတယ်။ နောက်ထပ်ဆု​ကြေး​ငွေ ပမာဏ ပေါင်းများစွာလည်း ရှိ​နေ​သေး​ကြောင်းသိရပါတယ်။

Chin Relief Funding Program (CRFP) ချင်းရန်ပုံငွေအဖွဲ့သည် ချင်းအမျိုးသားတော်လှန်ရေးအတွက် လိုအပ်သည့် ရန်ပုံငွေရှာဖွေရေးနှင့် တော်လှန်ရေးကာလအလွန် ပြန်လည်ထူထောင်ရေးကဏ္ဍများကိုဦးတည်လျက် ၂၀၂၁၊ ဒီဇင်ဘာလ (၁၉) ရက်နေ့တွင် စတင်ဖွဲ့စည်းခဲ့တာဖြစ်ကြောင်းသိရပါတယ်။

 

📌📌၄။ ကျောက်ထုအမြောက်တပ်မှ မင်းတပ်မြို့နယ်ဖက်သို့ ဦးတည်၍ လက်နက်ကြီးဖြင့် ပစ်ခတ်နေ

 

မကွေးတိုင်း၊ ကျောက်ထုအခြေစိုက် အမြောက်တပ်ကနေ မင်းတပ်မြို့နယ် မယ်လယ်ကုန်းနှင့်လှော်၀ကျေးရွာ  အနီးတစ်ဝိုက် မှာ လက်နက်ကြီးဖြင့် မြန်မာစံတော်ချိန် (၉:၃၀)နာရီအထိ (၁၄) ကြိမ်ထက်မနည်း ပစ်ခတ်နေ ကြောင်းသိရှိရပါသည်။

 

လက်ရှိ အခြေနေကြောင့် မင်းတပ်မြိုနယ်အတွင်းရှိပြည်သူများ ခရီးသွားလာခြင်းမပြုကြပါရန် CDF - Mindat သတင်းနှင့်ပြန်ကြားရေးဌာန ကထုတ်ပြန်ထားသည်။ မင်းတပ်မြိုနဲ့ မကွေးတိုင်းကျောက်ထုမြို့သည် မိုင် အားဖြင့် (၁၈)မိုင် ကျော်သာရှိပြီး မင်းတပ်မြိုနယ်အတွင်း စစ်ကောင်စီ၏ စစ်ကြောင်းထိုးတိုက်ပွဲအတွင်း ကျောက်ထုအမြောက်တပ်ဖက်က လက်နက်ကြီးများဖြင့် ပစ်ကူလေ့ရှိသည်။

 

📌📌၅။ မြန်မာနိုင်ငံမှာ အကြမ်းဖက်မှုရပ်ဆိုင်းရေး အမေရိကန်နဲ့အိန္ဒိယ တိုက်တွန်း

၂၀၂၂ ခုနှစ်၊ ဧပြီလ ( ၇ ) ရက်တနင်္လာနေ့တွင် အမေရိကန်ပြည်ထောင်စု ဝါရှင်တန်ဒီစီမှာ ကျင်းပတဲ့ နှစ်နိုင်ငံဝန်ကြီးများ အစည်းအဝေးအပြီးမှာမြန်မာနိုင်ငံမှာ အကြမ်းဖက်မှုတွေ၊ ထင်သလိုစိုင်း ဖမ်းဆီးနေတာတွေ၊ ဒီမိုကရေစီလမ်းကြောင်းနဲ့ အားလုံးပါဝင်တဲ့ အုပ်ချုပ်မှုကနေ သွေဖည်ပြီး နောက်ကြောင်းပြန်မယ့် အရိပ်လက္ခဏာတွေ ရပ်ဆိုင်းဖို့၊ အမေရိကန်နဲ့ အိန္ဒိယက တိုက်တွန်းလိုက်ပါတယ်။

ဒီအစည်းအဝေးကို အမေရိကန်နိုင်ငံခြားရေးဝန်ကြီး အန်တိုနီဘလင်ကင် ဦးဆောင်တက်ရောက်ပြီး အိန္ဒိယဘက်က ကာကွယ်ရေးဝန်ကြီး Rajnath Singh ဦးဆောင်တက်ရောက်ပါတယ်။

ဖေဖော်ဝါရီ ၁ ရက်နေ့၊ စစ်တပ်အာဏာသိမ်းခဲ့ချိန်ကစလို ပြည်သူ သုံးသောင်း‌လေးထောင်ဝန်းကျင် ထိန်းသိမ်းခံခဲ့ရပြီး မြန်မာအနေနဲ့ အာဆီယံရဲ့အချက် ငါးချက်ပါ သဘောတူညီချက်ကို အကောင်အထည် ဖော်ဖို့လည်း တိုက်တွန်းလိုက်ပါတယ်။ 

အဲဒီသဘောတူညီချက်မှာ နိုင်ငံအတွင်းအကြမ်းဖက်မှုတွေ အမြန်ရပ်ဖို့၊ အဖွဲ့တွေကြား ထိန်းထိန်းသိမ်းသိမ်းနဲ့ ငြိမ်းငြိမ်းချမ်းချမ်း အပြုသဘောဆောင်ဖြေရှင်းဆောင်ရွက်ကြဖို့ အချက်တွေပါဝင်ပါတယ်။

#RadioNUGLocalNews

#SpringRevolution