21st MAY 2022 - Evening Daily News by Radio NUG

📌၂၀၂၂ မေလ ၂၁ ရက်နေ့  ညနေခင်း နောက်ဆုံးရပြည်တွင်းသတင်းများ

သတင်းခေါင်းစဉ်များ -

📌နွေဦးတော်လှန်ရေးကို အမှုမဲ့အမှတ်မဲ့နဲ့ဝတ်ကြေ တန်းကြေဆောင်ရွက်နေတာမဟုတ်ဘူးလို့ ပြည်ထောင်စုဝန်ကြီး ဦးတင်ထွန်းနိုင်ဆို

📌တောင်သာမြို့ ရသစ်ကျေးရွာရှိ အမျိုးသားဒီမိုကရေစီအဖွဲ့ချုပ် ရပ်ကျေးရုံးခန်းအား ချိတ်ပိတ်သွား

📌ခင်ဦးမြို့နယ် အင်တိုင်းလေးကျေးရွာသို့ စကစတပ်များဝင်ရောက်ကာ မီးရှို့ဖျက်ဆီးခဲ့ပြီး အရပ်သားလေးဦးကိုသတ်ဖြတ်ခဲ့

📌ဧရာနဂါးညီနောင် အဖွဲ့မှ ဓနုဖြူမြို့ အမှတ် ၁၀၈ တပ်ရင်းအား ဖျက်အားပြင်း မိုင်းခြောက်လုံးဖြင့် ဖောက်ခွဲတိုက်ခိုက်ရာ စကစတပ်များထိခိုက်သေဆုံးရှိနိုင်

📌အမေရိကန် San Francisco ရှိတရုတ်ကောင်စစ်ဝန်ရုံးကို မြန်မာနိုင်ငံသားများ ဆန္ဒပြ

📌ရေဦးမြို့နယ်၊ သရက်တောကျေးရွာမှာ စစ်သားအလောင်းလို့ယူဆရတဲ့ ရုပ်အလောင်း ၂၀ ကျော်တွေ့ရတယ်လို့ ဒေသခံ PDF ရဲဘော်တွေကပြောပါတယ်။

📌မိုးတွေရွာနေတဲ့ကြားက စစ်ကြောင်းဆက်တိုက်ထိုးပြီး အကြမ်းဖက်နေတာကြောင့် စစ်ကိုင်းတိုင်းနဲ့မကွေးတိုင်းထဲကပြည်သူတွေဟာ မေလထဲမှာ ဆိုးရွားတဲ့အခြေအနေတွေနဲ့ရင်ဆိုင်နေရပါတယ်။

ဤသတင်းများကို ရေဒီယိုအန်ယူဂျီသတင်းတာဝန်ခံများနှင့် ခိုင်လုံသော မိတ်ဖက်သတင်းရင်းမြစ်များဆီမှ အခြေခံတင်ပြထားခြင်း ဖြစ်ပါတယ်

========================

📌📌နွေဦးတော်လှန်ရေးကို အမှုမဲ့အမှတ်မဲ့နဲ့ဝတ်ကြေ တန်းကြေဆောင်ရွက်နေတာမဟုတ်ဘူးလို့ ပြည်ထောင်စုဝန်ကြီး ဦးတင်ထွန်းနိုင်ဆို

မေလအတွင်ကျင်းပတဲ့သတင်းစာရှင်းလင်းပွဲမှာ စီမံကိန်း၊ဏ္ဍာရေးနဲ့ရင်းနှီးမြုပ်နှံမှုဝန်ကြီးဌာန ပြည်ထောင်စုဝန်ကြီး ဦးတင်ထွန်းနိုင်က အခုလိုပြောကြားခဲ့ပါတယ်။

"ဒီတော်လှန်ရေးကို ဆောင်ရွက်တာမှာ အမှုမဲ့အမှတ်မဲ့ ဝတ်ကြေတန်းကြေဆောင်ရွက်တာမဟုတ်ဘူးဆိုတာ အားလုံးလည်းသိပြီးသားဖြစ်ပါလိမ့်မယ်။သက်သေလည်းပြဖို့ကြိုးစားနေပါတယ်။ဒီတော်လှန်ရေးဟာ အောင်ကို အောင်မြင်မှာပါ။ မအောင်မြင်စရာ အကြောင်းမရှိပါဘူး။ကျနော်တို့လည်း ဒီအတိုင်း ယုံကြည်သလို ပြည်သူလူထုကလည်း ယုံကြည်ပြီးသားပဲဖြစ်တယ်ဆိုတာ အစုရှယ်ယာတွေကို ယုံကြည်စွာဝယ်ယူတာကသက်သေဖြစ်ပါတယ်"လို့ဝန်ကြီးကဆိုပါတယ်။

လက်ရှိတွင် မင်းအောင်လှိုင်ရဲ့၁၄/အင်းလျားလမ်းနေအိမ်ကို အမေရိကန်ဒေါ်လာ ၁၀သန်းနဲ့ တစ်စုလျှင် အမေရိကန်ဒေါ်လာ၁၀၀ဖြင့်ရောင်းချနေပြီးနောက်ထပ်နေအိမ်၄လုံးကိုလည်း စီစစ်ရောင်းချဖို့ရှိကြောင်းသိရပါတယ်။

========================

📌📌တောင်သာမြို့ ရသစ်ကျေးရွာရှိ အမျိုးသားဒီမိုကရေစီအဖွဲ့ချုပ် ရပ်ကျေးရုံးခန်းအား ချိတ်ပိတ်သွား

မေလ၂၁ ရက် နံနက် ၈ နာရီခန့်က တောင်သာမြို့ရသစ်ကျေးရွာ အမျိုးသားဒီမိုကရေစီအဖွဲ့ချုပ် ရပ်ကျေးရုံးကို စကစတပ်ဖွဲ့ဝင် လေးဦးကလာရောက်ချိတ်ပိတ်သွားတယ်လို့လူထုလှုပ်ရှားမှု့ကော်မတီ၊ တောင်သာကဆိုပါတယ်။

ထို့အပြင် ရသစ်ရပ်ကျေး NLD အမှု့ဆောင်အဖွဲ့အမည်စာရင်းပါ ပါဝင်သွားကြောင်း သိရသည့်အတွက် ထိုပုဂ္ဂိုလ်များ အမြန်ဆုံးတိမ်းရှောင်ရန်လူထုလှုပ်ရှားမှု့ကော်မတီ၊ တောင်သာကထုတ်ပြန်ပါတယ်။

========================

📌📌ခင်ဦးမြို့နယ် အင်တိုင်းလေးကျေးရွာသို့ စကစတပ်များဝင်ရောက်ကာ မီးရှို့ဖျက်ဆီးခဲ့ပြီး အရပ်သားလေးဦးကိုသတ်ဖြတ်ခဲ့ 

"မေလ ၂၀ ရက်နေ့ ကစစ်ကိုင်းတိုင်းခင်ဦးမြို့နယ် အင်တိုင်းလေးကျေးရွာသို့စကစတပ်များဝင်ရောက်ဖျက်စီးခဲ့ရာခင်ဦးမြို့နယ် အင်တိုင်းလေးတောင်ရွာအိမ်ခြေ ၇၀ မီးထဲပါပြီးပြည်သူ ၄ ဦးအသတ်ခံရပါတယ်။ ၁ တစ်ဦးမှာမီးထဲပါပြီးရုပ်အလောင်းပင်မပီတော့ပါဘူး"လို့ခင်ဦးARFတပ်ဖွဲ့ကဆိုပါတယ်။ဆိုပါတယ်။

စကစတပ်များ မေလ ၁၉ ရက်နေ့ကစလို့ စစ်ကိုင်းတိုင်းတွင်းရှိ ဒီပဲယင်းမြို့နယ်၊ရေဦးမြို့နယ်၊တန့်ဆည်မြို့နယ်၊ မြောင်မြို့နယ်၊ခင်ဦးမြို့နယ်တို့ကို စစ်ကြောင်းထိုးမွှေနှောက်လျက်ရှိပါတယ်။

========================

📌📌ဧရာနဂါးညီနောင် အဖွဲ့မှ ဓနုဖြူမြို့ အမှတ် ၁၀၈ တပ်ရင်းအား ဖျက်အားပြင်း မိုင်းခြောက်လုံးဖြင့် ဖောက်ခွဲတိုက်ခိုက်ရာ စကစတပ်များထိခိုက်သေဆုံးရှိနိုင်

"မေလ၂၀ ရက် ည၇နာရီအချိန်မှာ ဓနုဖြူမြို့ အမှတ် ၁၀၈ တပ်ရင်းအား တပ်ရှေ့စစ်ဆေးရေးဂိတ်တွင် အစစ်ဆေးကြပ်တည်းသည့်ကြားမှ မိုင်းနှစ်လုံးတပ်ဝင်းရှေ့ စကစတပ်များထွက်လာမည့်လမ်းတွင် မိုင်းနှစ်လုံးတွဲ နှစ်နေရာဆင်၍ mission စတင်ခဲ့ပါတယ်။တပ်ရှေ့ စစ်ဆေးရေးဂိတ်အား စတင်ဖောက်ခွဲခဲ့ပြီးစစ်ဆေးရေးဂိတ် ပေါက်ကွဲပြီးနောက်တပ်ဝင်းထဲမှ စကစတပ်များပြေးထွက်လာချိန် တပ်ဝင်းရှေ့ဆင်ခဲ့သော မိုင်းနှစ်လုံးတွဲနှစ်တွဲအားဖောက်ခွဲခဲ့ပါတယ်"လို့ဧရာနဂါးညီနောင်ပြည်သူကာကွယ်ရေးပြောက်ကျားတပ်ကဆိုပါတယ်။

လတ်တလောတွင် ထိခိုက်သေဆုံးမှု အသေးစိတ်ကို စီစစ်နေဆဲဖြစ်တယ်လို့သိရပါတယ်။ မိုးများသည်းထန်စွာရွာ၍ ညအမှောင်ကြားအစစ်ဆေးကြပ်တဲ့ကြားမှဓနုဖြူမြို့ တပ်ရင်း (108) အားဧရာနဂါးညီနောင်ပျောက်ကြားအဖွဲ့မှ စွန့်စွန့်စားစားတိုက်ခိုက်ခဲ့ကြပါတယ်။

========================

📌📌အမေရိကန် San Francisco ရှိတရုတ်ကောင်စစ်ဝန်ရုံးကို မြန်မာနိုင်ငံသားများ ဆန္ဒပြ

မေလ၂၀ ရက်နေ့မှာ အမေရိကန်နိုင်ငံ San Francisco ရှိတရုတ်ကောင်စစ်ဝန်ရုံးကိုမြန်မာနိုင်ငံသားများက မြန်မာအရေးနဲ့ပတ်သက်လို့ ဆန္ဒပြခဲ့ကြပါတယ်

"တရုတ်အစိုးရရဲ့ပေါ်လစီတွေဟာ မြန်မာပြည်သူပြည်သားတွေကိုထိခိုက်စေပါတယ်။ မြန်မာပြည်သူပြည်သားတွေကိုရက်ရက်စက်စက် သတ်ဖြတ်ထားတဲ့အကြမ်းဖက် စစ်တပ်ကို တရုတ်အစိုးရက ကူညီပံပိုးနေပါတယ်"လို့ ဆန္ဒထုတ်ဖော်တဲ့ မြန်မာအမျိုးသမီးတစ်ဦးကဆိုခဲ့ပါတယ်။

၂၀၂၁ ခုနှစ် ဖေဖော်ဝါရီ ၁ ရက်နေ့ စစ်အာဏာသိမ်းပြီးနောက်ပိုင်း အရပ်သား နှစ်ထောင်ကျော်ကို စကစတပ်များကသတ်ဖြတ်ခဲ့ပြီး တစ်သောင်းကျော်ကို ဖမ်းဆီးချုပ်နှောင်ထားပါတယ်။ အခုတင်ဆက်ပေးခဲ့တဲ့သတင်းတွေကိုတော့ Radio NUG သတင်းထောက် မင်းမင်းက ပေးပို့ထားတာဖြစ်ပါတယ်။

========================

အခု ဆက်လက်ပြီးသတင်းနှင့်အတူ လူထုစကားသံ အစီအစဉ်ကဏ္ဍကို တင်ဆက်ပေးသွားပါ့မယ်။

📌📌ရေဦးမြို့နယ်၊ သရက်တောကျေးရွာမှာ စစ်သားအလောင်းလို့ယူဆရတဲ့ ရုပ်အလောင်း ၂၀ ကျော်တွေ့ရတယ်လို့ ဒေသခံ PDF ရဲဘော်တွေကပြောပါတယ်။

စစ်ကိုင်းတိုင်း၊ ရေဦးမြို့နယ်၊ သရက်တောကျေးရွာကို မေလ ၁၉ရက်နေ့က စစ်ကောင်စီက ဝင်ရောက်မီးရှို့ခဲ့တာကြောင့် အိမ်ခြေ ၂၂လုံး ပျက်စီးဆုံးရှုံးခဲ့ပါတယ်။ စစ်ကောင်စီက ပြည်သူတွေရဲ့အိမ်တွေနဲ့အတူ သူတို့ရဲ့တိုက်ပွဲကျစစ်သားအလောင်းတွေကို ရော နှော မီးရှို့ဖျက်ဆီးခဲ့ပြီး ရုပ်အလောင်း ၂၀ ကျော်တွေ့ရှိထားတယ်လို့ ဒေသခံ PDF ရဲဘော်တွေကအခုလိုပြောပါတယ်။

ရေဦး PDF အဖွဲ့ဝင်တစ်ဦး 

စစ်ကောင်စီက သူတို့ရဲ့ကျဆုံးရဲဘော်စာရင်းကို PDF တွေကိုမသိစေချင်တဲ့အတွက် ကျေးရွာတွေကိုမီးဝင်ရှို့ရင်း ရုပ်အလောင်းတွေကို ဖြောက်ဖျက်လေ့ရှိတယ်လို့ စစ်ကိုင်းဒေသခံတွေကပြောပါတယ်။ သရက်တောကျေးရွာကိုမီးဝင်ရှို့ရင်း အနီးနားကမောက်ဿာရွာကို စစ်သားတွေက လက်နက်ကြီးနဲ့ပစ်ခတ်တာကြောင့် ပြည်သူ ၁၁ယောက်ထိမှန်ခဲ့ပြီး အဲ့ဒီအထဲက ၄ယောက် ပွဲချင်းပြီးသေဆုံးခဲ့‌ကြောင်းကို ဒီပဲယင်း PDF အဖွဲ့ဝင်တစ်ဦးကအခုလို‌ ပြောပြထားပါတယ်။

ဒီပဲယင်း PDF အဖွဲ့ဝင်တစ်ဦး

ရေဦးမြို့နယ်မှာ စစ်တပ်က စစ်ကြောင်းသုံးခုခွဲပြီး ထိုးစစ်ဆင်နေတာပါ။ မေလ ၁၇ရက်နေ့တုန်းက ရေဦးမြို့နယ်ကို စစ်ခရိုင်အဖြစ်သတ်မှတ်ပြီး စစ်တပ်က နယ်မြေစိုးမိုးမှုရဖို့ကြိုးစားနေတာဖြစ်ပါတယ်။ ရေဦးမြို့နယ်မှာ စစ်အင်အားတွေကိုအထိုင်ချပြီး အနီးနားက ခင်ဦး၊ ဒီပဲယင်း မြို့နယ်တွေကို အကြမ်းဖက်နိုင်ဖို့ စစ်တပ်က ကြိုးစားနေတာလည်းဖြစ်ပါတယ်။ဒီသတင်းကိုတော့ နွေဦးK မှပေးပို့ထားတာဖြစ်ပါတယ်။

========================

📌📌မိုးတွေရွာနေတဲ့ကြားက စစ်ကြောင်းဆက်တိုက်ထိုးပြီး အကြမ်းဖက်နေတာကြောင့် စစ်ကိုင်းတိုင်းနဲ့မကွေးတိုင်းထဲကပြည်သူတွေဟာ မေလထဲမှာ ဆိုးရွားတဲ့အခြေအနေတွေနဲ့ရင်ဆိုင်နေရပါတယ်။

မေလ ၂၀ ရက်နေ့က စစ်ကိုင်းတိုင်း၊ တန့်ဆည်မြို့နယ်ထဲက ချောင်းရိုးကျေးရွာကို စစ်ကောင်စီက အကြမ်းဖက်မီးရှို့တာကြောင့် အိမ်ခြေ ၄၀၀ ကျော်ရှိတဲ့အထဲက အိမ် ၃၈လုံးပဲကျန်တော့တယ်လို့ ဒေသခံတွေကပြောပါတယ်။ မေလ ၂၁ ရက်နေ့အထိ ချောင်းရိုးကျေးရွာဘက်ကို လက်နက်ကြီးတွေနဲ့ လှမ်းပစ်နေတုန်းပဲလို့ ဒေသခံတွေကပြောပါတယ်။

တန့်ဆည်မြို့နယ်၊ ချောင်းရိုးရွာသားတစ်ဦး

မကွေးတိုင်းမြိုင်မြို့နယ်မှာလည်း စစ်ဘေးသင့်ပြည်သူ ၃ သောင်းဝန်းကျင်အထိရှိလာပြီး မကွေးတိုင်းတစ်ခုလုံးမှာ စစ်ဘေးသင့်ပြည်သူ သိန်းနဲ့ချီရှိလာပြီး မိုးရာသီဝင်လာပြီဖြစ်တဲ့အတွက် အမိုးအကာ၊ ရိက္ခာနဲ့ ဆေးဝါးတွေ အရေးပေါ်လိုအပ်နေတယ်လို့ မြိုင်ဒေသခံတစ်ဦးကအခုလိုပြောပါတယ်။

မြိုင်မြို့နယ်ဒေသခံတစ်ဦး

ကုလသမဂ္ဂ၊ အာဆီယံနဲ့ နိုင်ငံတကာက မြန်မာစစ်ဘေးသင့်ပြည်သူတွေကို အကူအညီပေးဖို့ ကြိုးစားနေပေမယ့် စစ်ကောင်စီက လုံခြုံရေးအကြောင်းပြချက်နဲ့ကန့်သတ်တာတွေဆက်တိုက်ပြုလုပ်နေပါတယ်။ ပြည်သူတွေကို စစ်ကောင်စီကိုယ်တိုင်က ဖြတ် ၄ဖြတ်စနစ်နဲ့ အကြမ်းဖက်နေတာဖြစ်ပြီး နိုင်ငံတကာအကူအညီတွေဝင်ရောက်လာမှာကို သူတို့ကိုယ်တိုင်က မလိုလားတာဖြစ်တယ်လို့ ပရဟိတသမားတွေက ပြောဆိုကြပါတယ်။ဒီသတင်းကိုတော့ နွေဦး K မှ ပေးပို့ထားတာဖြစ်ပါတယ်။

#RadioNUGLocalNews

#SpringRevolution