21st MAY 2022 - (Ethnic language program-CHO_DAAI) by Radio NUG

📌(ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၂ မေလ ၂၁ ရက်နေ့ နောက်ဆုံးရပြည်တွင်းသတင်းများ 

📌📌၁။ ဆောမြို့မရဲစခန်းမှ ရဲတပ်သားနှစ်ဦး လက်နက်ခဲယမ်းအပြည့်အစုံဖြင့် CDM ပြုလုပ်

မကွေးတိုင်း ဆောမြို့နယ်၊ ဆောမြို့မရဲစခန်းမှ ရဲတပ်သားနှစ်ဦးသည် ပြီးခဲ့သည့် မေလ ၁၁ရက်နေ့တွင် လက်နက်ခဲယမ်းအပြည့်အစုံဖြင့် CDM ပြုလုပ်လာကြောင်း ဆောမြို့နယ် ပြည်သူ့အုပ်ချုပ်ရေးအဖွဲ့၏ မေလ ၁၇ ထုတ်ပြန်ချက်အရ သိရသည်။

 

အဆိုပါ ရဲတပ်ဖွဲ့ဝင် နှစ်ဦးသည် သေနတ် ၂လက်၊ ကျည်ဆံ အတောင့်ရေ ၂၀၀ ကျော်၊ လက်ပစ်ဗုံး ၂ လုံးတို့နှင့်အတူ CDM ပြုလုပ်လာခြင်းဖြစ်သည်။

 

ဆောမြို့နယ်အတွင်းတွင် ဒေသကာကွယ်ရေးတပ်နှင့် မြို့နယ်ပြည်သူ့အုပ်ချုပ်ရေးအဖွဲ့ထံ CDM ပြုလုပ်လာသူ ရဲတပ်ဖွဲ့ဝင်များ၊ စစ်ကောင်စီတပ်များကို နွေးထွေးစွာကြိုဆိုပြီး ဆုကြေးငွေတို့နှင့်အတူ လွတ်မြောက်နယ်မြေသို့ ပို့ဆောင်ပေးလျက်ရှိသည်။ 

 

📌📌၂။ CDFကန်ပက်လက်က စစ်ကောင်စီ၏ တင်ဒါလုပ်ငန်းများလုပ်ဆောင်ခြင်းမပြုရန် ကြေညာချက်ထုတ်ပြန်

 

CDF ကန်ပက်လက်သည် စစ်ကောင်စီ၏တင်ဒါလုပ်ငန်းများ လုပ်ဆောင်ခြင်းမပြုရန် ၂၀၂၂ ခုနှစ်၊ မေလ ၁၅ ရက်နေ့တွင် ကြေညာချက်ထုတ်ပြန်ခဲ့သည်။ အဆိုပါ ထုတ်ပြန်ချက်တွင်-

ချင်းပြည်နယ်တစ်ခုလုံး၌ တင်ဒါလုပ်ငန်းလုပ်ဆောင်ခြင်း မပြုလုပ်ကြရန် (၃၀.၉.၂၀၂၁) ရက်နေ့တွင်တစ်ကြိမ်၊ (၁၂.၄.၂၀၂၂) ရက်နေ့တွင်တစ်ကြိမ် CJDC က တားမြစ်စာနှစ်ကြိမ် ထုတ်ပြန်ထားပြီးဖြစ်သည်။ ထိုနည်းတူ (၁၆.၁၂.၂၀၂၁) ရက်နေ့တွင် ကန်ပက်လက်မြို့နယ်အတွင်း မည်သည့်ကုမ္ဗဏီလုပ်ငန်းမျှ မလုပ်ဆောင်ကြရန် သတိပေးထုတ်ပြန်ခဲ့ပြီးဖြစ်သည်။

ယခုအခါ အကြမ်းဖက်စစ်ကောင်စီလက်အောက်ရှိ ကျင်ဒွေးမြို့ပေါ်တွင် စစ်ကောင်စီယန္တရားလည်ပတ်စေသည့် ယင်းလုပ်ငန်းများလုပ်ဆောင်နေကြကြောင်း ကြားသိရသဖြင့် များစွာစိတ်မကောင်းဖြစ်မိပါသည်။ ကျင်ဒွေးမြို့ပေါ်နေ ပြည်သူအများစုသည် ပြည်သူလူထုနှင့်ပူးပေါင်းခြင်းမရှိဘဲ စစ်ကောင်စီအလိုကျ အလုပ်လုပ်ကိုင်နေကြောင်း ကြားသိရသည်။

ထို့ကြောင့် ကျင်ဒွေးမြို့သို့သွားမည့် ကားနှင့်ဆိုင်ကယ်များအား ယနေ့မှစ၍ အကန့်အသတ်မရှိ ပိတ်ပင်သွားမည်ဖြစ် ကြောင်းနှင့် သက်ဆိုင်ရာ၏ခွင့်ပြုချက်မရှိဘဲ သွားလာပါက ဖြစ်ပေါ်လာသောအကျိုးဆက်များသည် မိမိတာဝန်သာဖြစ် ကြောင်း ထုတ်ပြန်ကြေညာအပ်ပါသည်ဟု ဖော်ပြပါရှိပါသည်။

 

📌📌၃။ မြို့နယ် ၁၅ မြို့နယ်မှာ NUG ကြားကာလတရားစီရင်ရေး စတင်

စစ်ကိုင်းတိုင်းထဲက ၁၅ မြို့နယ်မှာ အမျိုးသားညီညွတ်ရေးအစိုးရ NUG က ကြားကာလတရားစီရင်ရေး စတင်ပြီလို့ မေလ ၁၉ ရက်နေ့က ယာယီသမ္မတ အမိန့်နဲ့ ကြေညာလိုက်ပါတယ်။ NUG လွှမ်းမိုးထားနိုင်တဲ့ မြို့နယ်တွေထဲက တရားစီရင်ရေးလုပ်ငန်း လည်ပတ်နိုင်တဲ့အနေအထားရှိတဲ့ မြို့နယ်တွေမှာ စတင်တာလို့ NUG ရဲ့ တရားရေးဝန်ကြီးဌာန ပြည်ထောင်စုဝန်ကြီး ဦးသိန်းဦးက ပြောပါတယ်။

“ဒီဒေသတွေကို လွတ်မြောက်နယ်မြေတွေလို့ သတ်မှတ်ထားတာပေါ့။ ဒီဒေသတွေမှာ အကြမ်းဖက်စစ်အုပ်စုရဲ့ လက်တွေ့စိုးမိုးနိုင်မှုက မရှိသလောက်ဖြစ်သွားပြီ၊ ကျွန်တော်တို့ဘက်က စိုးမိုးထားနိုင်တဲ့အနေအထားတွေ ဖြစ်သွားပြီ။ ကျွန်တော်တို့စိုးမိုးမှုအောက်မှာ ဒေသတွင်းမှာ ရှိနေတဲ့ ပြည်သူလူထုလုံခြုံရေးနဲ့ တရားမျှတမှုရရှိဖို့အတွက်ဆိုရင် တရားစီရင်ရေးလုပ်ငန်းက မလွှဲမသွေလုပ်ရမယ့် ကိစ္စဖြစ်တာပေါ့။ တပြိုင်နက်တည်းမှာလည်း ပြည်သူလူထု ကြုံတွေ့နေရတဲ့ မတရားမှုတွေကို ဒီတရားရုံးတွေကနေ ဖြေရှင်းနိုင်မယ့်အနေအထားဖြစ်သွားပါပြီ။”

NUG ကြေညာတဲ့ မြို့နယ်တွေဟာ စစ်ကိုင်းတိုင်းထဲက မြို့နယ် ၁၅ မြို့နယ် ဖြစ်ပါတယ်။

တမူး၊ ယင်းမာပင်၊ ကသာ၊ ကောလင်း၊ ကန့်ဘလူ၊ ဗန်းမောက်၊ ကျွန်းလှ၊ အင်းတော်၊ ထီးချိုင့်၊ ကနီ၊ ဝက်လက်၊ အရာတော်၊ မြင်းမူ၊ တန့်ဆည်၊ ခင်ဦး တို့ဖြစ်ပါတယ်။

ဒီ ၁၅ မြို့နယ်မှာ တရားရုံးတွေဖွင့်လှစ်ထားမှာဖြစ်ပြီး တစ်မြို့နယ်ကို တရားသူကြီး ၅ယောက်နှုန်းစီ ခန့်အပ်ထား တာဖြစ်ပါတယ်။ 

အဲဒီမြို့နယ်တွေမှာရှိတဲ့ ပြည်သူ့အုပ်ချုပ်ရေးအဖွဲ့(ပ.အ.ဖ)တွေကတဆင့်ဖြစ်စေ၊ တရားရုံးတွေကို တိုက်ရိုက်ဖြစ်စေ အမှုတွေကို တိုင်ကြားနိုင်တယ်လို့ ဝန်ကြီး ဦးသိန်းဦးက ဆိုပါတယ်။ 

စစ်ကိုင်းတိုင်းထဲက ၂၉ မြို့နယ်နဲ့ မကွေးတိုင်းက ၇ မြို့နယ်မှာ အမျိုးသားညီညွတ်ရေးအစိုးရ NUG က ပြည်သူ့အုပ်ချုပ် ရေးအဖွဲ့တွေ ဖွဲ့စည်းထားပြီလို့ ဧပြီလကုန်လောက်က ကြေညာထားပါတယ်။ 

 

📌📌၄။ အမျိုးသားညီညွတ်ရေးအစိုးရ၊ မဟာမိတ်ဆက်ဆံရေးကော်မတီ နှင့် ရက္ခိုင်ပြည်သူ့အစိုးရ၊ ရက္ခိုင်အမျိုးသား အဖွဲ့ချုပ်တို့တွေ့ဆုံ

အမျိုးသားညီညွတ်ရေးအစိုးရ နိုင်ငံခြားရေးဝန်ကြီးဌာန ဒေါ်ဇင်မာအောင်၊ ဦးမင်းကိုနိုင်တို့ဦးဆောင်သော အမျိုးသားညီညွတ်ရေးအစိုးရ၊ မဟာမိတ်ဆက်ဆံရေးကော်မတီနှင့် ရက္ခိုင်အမျိုးသားအဖွဲ့ချုပ်၊ ဥက္ကဋ္ဌ ဗိုလ်ချုပ်ထွန်းမြတ်နိုင်၊ အထွေထွေအတွင်းရေးမှူး ဒေါက်တာ ညိုထွန်းအောင်တို့ ဦးဆောင်သည့် ရက္ခိုင်ပြည်သူ့အစိုးရတို့ ၂၀၂၂ မေလ ( ၁၆ ) ရက်နေ့ နံနက်ပိုင်းတွင် ၂ နာရီကြာ အွန်လိုင်းမှတဆင့် တွေ့ဆုံဆွေးနွေးခဲ့ကြသည်ဟု အမျိုးသားညီညွတ်ရေးအစိုးရ NUG ၏ ထုတ်ပြန်ချက်အရ သိရသည်။

အဆိုပါထုတ်ပြန်ချက်တွင် မြန်မာနိုင်ငံ၏ လက်ရှိဖြစ်ပျက်နေသော နိုင်ငံရေး အခြေအနေများ၊ တိုင်းပြည်၏ အခြေအနေများကို ရင်းနှီးပွင့်လင်းစွာ နှစ်ဖက် အပြန်အလှန်ဆွေးနွေးခဲ့ကြပြီး နှစ်ဖက်အကြား အမြင်ချင်း ဖလှယ်ဆွေးနွေးခဲ့ကြကြောင်း ထို့အပြင် အမျိုးသားညီညွတ်ရေးအစိုးရဖက်က လက်ရှိလုပ်ဆောင်လျက်ရှိသော အခြေအနေများ၊ အခင်းအကျင်းများကို သက်ဆိုင်ရာ ဝန်ကြီးဌာနအလိုက် ဆွေးနွေးခဲ့ကြကြောင်း ဖော်ပြထားသည်။ 

 

ပြည်ပသတင်း

📌📌၅။ မြန်မာ့အရေး ဆထက်တိုးဆောင်ရွက်ရန် ကန်-အာဆီယံ ပူးတွဲထုတ်ပြန်

မြန်မာ့အရေး ငြိမ်းချမ်းစွာ အဖြေရှာရေး ဆထက်တိုး ပူးပေါင်းဆောင်ရွက်ကြရန် ဝါရှင်တန်တွင် ပထမဆုံးအကြိမ် ကျင်းပသော အမေရိကန်-အာဆီယံထိပ်သီးဆွေးနွေးပွဲမှ ပူးတွဲကြေညာချက် ထုတ်ပြန်ခဲ့သည်။ ခေါင်းဆောင်များသည် ဒေသတွင်း တည်ငြိမ်ငြိမ်းချမ်းရေးအပေါ် စိတ်ဆုံးဖြတ်ထားမှုကို ထပ်မံပြသခဲ့ကြပြီး မြန်မာနိုင်ငံတွင်း အကြမ်းဖက်မှုများ ချက်ချင်းရပ်တန့်ရန်နှင့် နိုင်ငံခြားသားများအပါ ဖမ်းဆီးထားသော နိုင်ငံရေးအကျဉ်းသားများ အားလုံး လွှတ်ပေးရန် တောင်းဆိုသည်။ 

ထုတ်ပြန်ကြေညာချက်တွင် မြန်မာပြည်သူများ၏ အကျိုးစီးပွားအတွက် ငြိမ်းချမ်းသော အဖြေတခုကို ရှာဖွေရန် အာဆီယံအသင်း ဥက္ကဋ္ဌ မြန်မာနိုင်ငံဆိုင်ရာ အထူးကိုယ်စားလှယ်၏ လုပ်ငန်းများမှတဆင့် အထူးသဖြင့် သက်ဆိုင်သူအားလုံးနှင့် အပြည့်အဝ ထိတွေ့ဆောင်ရွက်နိုင်ခြင်းဖြင့် ကိုယ့်ကိုယ်ကိုယ်ယုံကြည်မှုနှင့် အပြန်အလှန်ယုံကြည်မှုများအား တည်ဆောက်ရေး၊ ခွဲခြားကန့်သတ်မှု မရှိဘဲ အလိုအပ်ဆုံး မြန်မာပြည်သူများထံ လူသားချင်းစာနာမှု အထောက်အပံ့ပေးရေး အာဆီယံ၏ ကြိုးပမ်းချက်များကို အမေရိကန်က ဆက်လက်ထောက်ခံမည်ဟု ရေးသားထားသည်။ပြီးခဲ့သည့်နှစ် ဧပြီလ ဂျကာတာတွင် ရယူထားသည့် ဘုံသဘောတူညီချက် ၅ ချက်အား အမြန်ဆုံး အကောင်အထည်ဖော်ရန်လည်း ပူးတွဲတိုက်တွန်းထားသည်။

#RadioNUGLocalNews

#SpringRevolution