17th JUN 2022 - (Ethnic language program-CHO_KAANG) by Radio NUG ~ Newsletter by Radio NUG

📌 (ချင်း တိုင်းရင်းသား - Kaang ကာဏ်း ဘာသာစကား) ထုတ်လွှင့်မှု အစီအစဥ် ၂၀၂၂ ဇွန်လ ၁၇ ရက်နေ့နောက်ဆုံးရပြည်တွင်းသတင်းများ

📌📌 ၁။ မင်းတပ်မြို့ဝင်ဂိတ်အား CDF-Mindat မှ သွားရောက်ပစ်ခတ်ခဲ့ရာ စကစ ၃ ယောက်သေဆုံးပြီး ၅ ယောက်ထက်မနည်း ဒဏ်ရာရရှိ

၂၀၂၂ ခုနှစ်၊ ဇွန်လ ( ၁၄ ) ရက်နေ့ မနက် ၇:၀၀ ခန့်တွင် စကစများတပ်စွဲထားရာ မင်းတပ်မြို့ဝင်ဂိတ်အား CDF-Mindat မှ သွားရောက်ပစ်ခတ်ခဲ့ရာ သေဆုံးမှုများရှိနိုင်ကာ ဒဏ်ရာရရှိသူများမည်ဟုခန့်မှန်းရသည်။

ထို့နောက် အဆိုပါဂိတ်အား စစ်ကူရန်လာကြသော စကစများအား နံနက် ၀၈ : ၄၅ နာရီ ခန့်တွင် လဝကရုံးနားမှ ကြားဖြတ်တိုက်ခိုက်ခဲ့ရာ စကစ ၃ ယောက်သေဆုံးပြီး ၅ ယောက်ထက်မနည်း ဒဏ်ရာရရှိနိုင်ကြောင်း ဗျူဟာမှူး သတင်းပေးပို့ချက်အရ သိရသည်။

၂။ စစ်ကောင်စီ၏လက်နက်ကြီးကျည် Thung Ng'King ရွာနှင့် အခြားကျေးရွာနှစ်ရွာတွင် ပေါက်ကွဲ

၂၀၂၂ ခုနှစ်၊ ဇွန်လ ( ၁၅ ) ရက်နေ့တွင် မင်းတပ်မြို့ပေါ်မှာနေရာယူထားတဲ့ စစ်ကောင်စီကနေ ရမ်းသန်းပစ်လိုက်တဲ့ လက်နက်ကြီးကျည်ဆံ ငါးလုံး Thung Ng'King ကျေးရွာနဲ့ ဘေးရွာ နှစ်ရွာမှာ ကျသွားတယ်လို့ ဒေသခံတစ်ဦးက The Mindat Post ကို ပြောပါတယ်။

"ငါးလုံးပေါက်တယ်၊ နှစ်လုံးက Thung Ng'King ရွာနောက်ထပ် သုံးလုံးက Ng'geng Ging နဲ့ K'Phyoih ရွာ အကြားမှာကျတာ၊ အဲ့လိုပေါက်တော့ ရွာထဲမှာလန့်ပြီး တောင်ယာပြေးနေရတယ်" လို့ သူကပြောပါတယ်။

ဇွန်လ ၁၄ ရက်နေ့တွင် CDF မင်းတပ်ရဲ့ မြို့တွင်းပျောက်ကြားစစ်ဆင်ရေးအတွင်းမှာ သေဆုံးမှုများတဲ့ စစ်ကောင်စီတပ်တွေက ခုလိုတွေ ရမ်းသန်းပြီး ပစ်ခတ်တာဖြစ်နိုင်တယ်လို့ ဆက်ပြီးပြောပါတယ်။

ပြီးခဲ့တဲ့ မေလကုန်ပိုင်းကလည်း ခလရ ၂၇၄ စစ်ကောင်စီတပ်ရဲ့ လက်နက်ကြီး ပစ်ခတ်မှုကြောင့် မဒပ်ကျေးရွာက ၁၀ နှစ်သားအရွယ် ကလေးငယ်တစ်ဦးနဲ့ ကလေးမိခင်တို့ အပြင်းအထန် ဒဏ်ရာရရှိခဲ့ပါတယ်။

၃။ ကန်ပက်လက်ကို စစ်ကြောင်းထိုးအပြီး ပြန်လှည့်လာသည့် စကစတပ် ကြားဖြတ်တိုက်ခိုက်ခံရပြီး ၂ ယောက်သေ ၁၀ ယောက်ခန့် ဒဏ်ရာရရှိ

၂၀၂၂ ခုနှစ်၊ ဇွန်လ ( ၁၄ ) ရက်နေ့တွင် ကန်ပက်လက်မြို့နယ်အတွင်း ၄ ရက်တာ စစ်ကြောင်းထိုးပြီး အထိနာသောစစ်ကောင်စီ အင်အား ၁၅၀ ခန့်ကို ပြည်သူ့ကာကွယ်ရေးတပ် ဆော တပ်ရင်း၂ နှင့် The Youth Force (ဆော၊ ကျောက်ထု) တို့က ဆော-ကျောက်ထုလမ်းပိုင်း ပိန်းချောင်းတံတားအနီးတွင် တိုက်ခိုက်ခဲ့ရာ ၂ ယောက် သေဆုံးပြီး ၁၀ ယောက်ခန့် ဒဏ်ရာပြင်းထန်နိုင်သည်ဟု ဆောမြို့နယ် ပြည်သူ့ကာကွယ်ရေးတပ်က ဇွန် ၁၄ ညပိုင်းတွင် သတင်းထုတ်ပြန်သည်။

ယင်းတိုက်ပွဲတွင် ပြည်သူ့ကာကွယ်ရေးတပ် ဆော တပ်ရင်း ၂ ၏ လက်နက်ကြီးပြောင်း ပျက်စီးမှုရှိခဲ့သော်လည်း ပြည်သူ့ရဲဘော်များ အထိခိုက်မရှိပဲ အောင်မြင်စွာပြန်လည်ဆုတ်ခွာနိုင်ခဲ့သည်ဟု ဆိုသည်။

ပြည်သူ့ကာကွယ်ရေးတပ်များနှင့် စစ်ကောင်စီတပ်အကြားတိုက်ပွဲများ ပြန်လည်ပြင်းထန်လာသည့် ချင်းပြည်နယ်နှင့် မကွေးတိုင်းသို့ စစ်ကောင်စီမှသာလွန်အင်အားဖြင့် စစ်ကြောင်းထိုးလေ့ရှိပြီး မန္တလေးတိုင်းဖက်မှ စစ်ကောင်စီတပ်အများအပြားပါဝင်သည့်ယာဥ်တန်းသည် မကွေးတိုင်းနှင့် ချင်းပြည်နယ်သို့ ဦးတည်ကာထွက်ခွာနေသည်ဟု ဇွန် ၁၄ ညနေပိုင်းတွင် သက်ဆိုင်ရာပြည်သူ့ကာကွယ်ရေးတပ်များက သတင်းထုတ်ပြန်သည်။

၄။ ဒီချိန်ဟာ လူငယ်များ နိင်ငံခြားထွက်ဖို့ အချိန်မဟုတ်ဘဲ ကိုယ့်နိင်ငံ၊ ကိုယ့်မြေ၊ ကိုယ့်လူမျိုးကို ကာကွယ်ရမဲ့အချိန်ဖြစ်တယ်

*Col Solomon မိန့်ခွန်းမှ ကောက်နုတ်ချက်

CNA သော်လည်းကောင်း၊ CDF ၊ CNDF ၊ PDF သော်လည်းကောင်း အကြမ်းဖက်စစ်ကောင်စီကိုတော်လှန်နေတဲ့ ပြည်သူ့ကာကွယ်ရေးရဲဘော်များ၊ အဆုံးထိ ခင်ဗျားတို့ရဲ့ သတ္တိနှင့် ရဲရင့်မှုကို ပြသလိုက်ပါ။ ယခု ခင်ဗျားတို့ရဲ့ လုပ်ဆောင်ချက်ဟာ သမိုင်းမှာ မေ့မရသောဖြစ်ရပ်မှန် ပုံပြင်အဖြစ်ကမ္ဗည်းထိုးပြီး ရာဇဝင်မှာတွင်ကျန်မဲ့တရားသောလုပ်ရပ်ဖြစ်ပါတတယ်။

CDM ဝန်ထမ်းများအားလုံးသည် ကိုယ့်အသက်မွေးလမ်းကြောင်းကိုစွန့်လွှတ်ပြီးအကြမ်းဖက်စစ်ကောင်စီကိုတော်လှန်နေတဲ့သူရဲကောင်းများဖြစ်ကြပါတယ်။ ခင်ဗျားတို့ရဲ့ပေးဆပ်မှုဟာ အကြမ်းဖက်စစ်ကောင်စီရဲ့ အုပ်ချုပ်ရန်ကြိုးပမ်းမှုကို ဖြိုချရန်အတွက် အရေးပါလှသောသော့ချက်တစ်ခုဖြစ်သည်။ အဆုံးထိတိုက်ပွဲဝင်ပေးကြပါ။

ဒီချိန်မှာ လူငယ်များသည် နိင်ငံခြားသို့ထွက်သွားဖို့အချိန်မဟုတ်ဘဲ ကိုယ့်နိင်ငံ၊ ကိုယ့်မြေ၊ကိုယ့်လူမျိုးကို ကာကွယ်ရမဲ့အချိန်ဖြစ်ပါတယ်။ မိဘပြည်သူများသည်လည်း အကြမ်းဖက်စစ်ကောင်စီရဲ့အုပ်ချုပ်မှုယန္တရား မလည်ပတ်နိင်အောင် အဖက်ဖက်ကနေ ဆက်လက်ပူးပေါင်းဆောင်ရွက်ပေးကြပါ။ စစ်အာဏာရှင်လက်အောက်မှာ ကောင်းတဲ့အရာတစ်ခုမှထွက်မလာဘူးဆိုတာ နှစ်၇၀ ကျော် မျက်မြင်ကိုယ်တွေ့ဖြစ်ပါတယ်။စစ်မှန်တဲ့ဖယ်ဒရယ်ပြည်ထောင်စုကြီးတည်ဆောက်ဖို့ရာ အာဏာရှင်မှန်သမျှတိုက်ထုတ်ကြပါစို့။

#တရားသောစစ် မုချ နိင်ရမည်# Col Solomon

၅။ တော်လှန်တိုက်ခိုက်နေသူများကို မြန်မာစစ်ကောင်စီတပ်က အနိုင်မရနိုင်ဟု အမေရိကန်အရာရှိပြော

မြန်မာစစ်ကောင်စီတပ်ဟာ သူ့ကို တော်လှန်တိုက်ခိုက်နေသူတွေအပေါ် အနိုင်ရနိုင်မှာ မဟုတ်တာကြောင့် မနှစ်ကလုယူထားခဲ့တဲ့ အာဏာကိုစွန့်လွှတ်ပြီး ဒီမိုကရေစီလမ်းကြောင်းကို ပြန်သွားသင့်တယ်လို့ အမေရိကန်နိုင်ငံခြားရေးဌာန အတိုင်ပင်ခံပုဂ္ဂိုလ် ဒဲရက်ချောလက်က ပြောတဲ့ အကြောင်း ဘန်ကောက်ပို့စ်သတင်းစာမှာ ဖော်ပြပါတယ်။

“သူတို့နိုင်လိမ့်မယ်လို့ ဘယ်လိုအတွေးအခေါ်မျိုးနဲ့ လက်ခံယုံကြည်နေလဲဆိုတာ မသိနိုင်ဘူး။ သူတို့ နယ်မြေဆုံးရှုံးမှုတွေကြုံနေရတယ်။ သူတို့ရဲ့ စစ်တပ်မှာ ကြီးမားတဲ့ဆုံးရှုံးမှုတွေလည်း ခံစားနေရတယ်။”လို့ ဒဲရက်ချောလက်က ပြောပါတယ်။

မြန်မာစစ်တပ်ဟာ ဒေါ်အောင်ဆန်းစုကြည်ခေါင်းဆောင်တဲ့ ရွေးကောက်ခံအရပ်သားအစိုး ရထံကနေ နိုင်ငံတော်အာဏာကို ၂၀၂၁ ခုနှစ်မှာ ဖေဖော်ဝါရီ ၁ ရက်မှာ တရားမဝင် သိမ်းယူခဲ့ပြီးနောက် ငြိမ်းချမ်းစွာ ဆန္ဒပြပွဲတွေကို အကြမ်းဖက် ပစ်ခတ်နှိမ်နင်း ဖမ်းဆီးသတ်ဖြတ်မှုတွေ အမြောက်အမြား ဆောင်ရွက်ခဲ့ပါတယ်။ အဲဒီနောက်မှာ ပြည်သူလူထုက မခံမရပ်နိုင်တဲ့အဆုံး ခုခံတွန်းလှန်စစ်အဖြစ် လက်နက်ကိုင်စွဲကိုင်တော်လှန်ခဲ့တာ ဖြစ်ပါတယ်။

မြန်မာနိုင်ငံအပေါ် စီးပွားရေးပိတ်ဆို့မှုတွေသာမကဘဲ၊ မြန်မာ့အရေးအတွက် အာဆီယံအပြင် စင်ကာပူ၊ အင်ဒိုနီးရှားနဲ့ မလေးရှားတို့လို တစ်နိုင်ငံချင်းစီနဲ့ပါ ပူးပေါင်းဆောင်ရွက်မှုတွေရှိတယ်လို့ အမေရိကန်အရာရှိက ပြောပါတယ်။