18th JUN 2022 - (Ethnic language program-CHO_DAAI) by Radio NUG ~ Newsletter by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၂ ဇွန်လ ၁၈ ရက်နေ့ နောက်ဆုံးရပြည်တွင်းသတင်းများ

📌📌 ၁။ မင်းတပ်တွင် စစ် ကောင်စီ ၏ လက်နက်ကြီး ပစ်ခတ်မှု ကြောင့် သက်ကြီးပိုင်း ၂ ဦးနှင့် သက်လတ်ပိုင်း ၁ ဦး သေဆုံး

မင်းတပ်နယ် မြေခံတပ်ရင်း (၂၇၄) တပ်မှ မြို့၏ မြောက်ဘက်ရှိရွာများကို လက်နက်ကြီးများနှင့် ဇွန်လ ၁၆ ရက် ၊ နံနက် ၉ နာရီခွဲ ဝန်းကျင်တွင် ပစ်ခတ်ခဲ့ကြောင်း သိရသည်။

ထို့ နောက် မင်းတပ်မြို့နယ် မွီတွီ (Mui Tui) ကျေးရွာအနီးဝန်းကျင်တွင် လက်နက်ကြီးကျည်များကျရောက် ပေါက်ကွဲခဲ့ပြီး ကျေးရွာအနီးတွင် တောင်ယာလုပ်ငန်း လုပ်ကိုင်နေသော အသက် ၇၀ အရွယ် အမျိုးသားတစ်ဦး ၊ အသက် ၆၀ အရွယ် အမျိုးသမီးတစ်ဉီး နှင့် အသက် ၃၀ အရွယ်အမျိုးသမီးတစ်ဦး စုစုပေါင်း အ ပြစ်မဲ့ ပြည်သူ ၃ ဉီး လက်နက်ကြီးဗုံးဆံထိမှန် သေဆုံးကြောင်း မင်းတပ်မြို့နယ် ပြည်သူ့အုပ်ချုပ် ရေး (သတင်းအဖွဲ့) က သတင်းထုတ်ပြန်ထားသည်။

အဆိုပါ မွီတွီ (Mui Tui) ကျေးရွာတွင် လက်နက်ကြီး ကျည် ၃ ကြိမ် ကျ ရောက် ပေါက်ကွဲခဲ့ပြီး ပြည်သူပိုင် နေအိမ် ၄ လုံး ပျက်စီးခဲ့ ကြောင်း ဒေသတွင်းသတင်းရင်းမြစ်များက ဆိုသည်။

မင်းတပ် နယ် မြေခံတပ်ရင်း အမှတ် (၂၇၄) မှ မင်းတပ်မြို့နယ်အတွင်းရှိ ကျေးရွာများကို ဦးတည်ချိန်ရွယ်၍ လက်နက် ကြီးများ မကြာခဏ ပစ်ခတ်လျက်ရှိပြီး က လေးသူငယ်များအပါအဝင် တိုက်ပွဲနှင့်သက်ဆိုင်ခြင်းမရှိသည့် သက်ကြီးရွယ် အိုများနှင့် ပြည်သူများ ထိခိုက် သေဆုံးလျက်ရှိသည်။

📌📌 ၂။ စစ် ကောင်စီတပ်သားများ တပ်စွဲရာ မင်းတပ်မြို့ဝင်ဂိတ်ကို CDF မင်းတပ်က သွား ရောက် ပစ်ခတ် ၊ စကစ တပ်သား ၃ ဦး သေ ၊ ၅ ဦးထက်မနည်း ဒဏ်ရာရ

စစ်ကောင်စီတပ်သားများ တပ်စွဲရာ မင်းတပ်မြို့ဝင်ဂိတ်ကို ဇွန်လ ၁၄ ရက် နံနက်အ စောပိုင်း ၇ နာရီခန့်တွင် သွား ရောက် ပစ်ခတ်ခဲ့ ကြောင်း CDF မင်းတပ်က သတင်းထုတ်ပြန်သည်။

ပစ်ခတ်တိုက်ခိုက် ခံရသည့် မြို့ဝင်ဂိတ်ရှိ စစ် ကောင်စီ တပ်သားများအား စစ် ကူ ပေးရန် ထွက်လာသည့် စစ် ကောင်စီ တပ်သားများကို မင်းတပ်မြို့ လူဝင်မှုကြီးကြပ် ရေး ရုံးအနီး၌ CDF မင်းတပ်က ထပ်မံ ကြားဖြတ်တိုက်ခိုက်ခဲ့သဖြင့် စစ် ကောင်စီ တပ်သား ၃ ဦး သေဆုံးပြီး ၅ ဦးထက်မနည်း ဒဏ်ရာရရှိကြောင်း ၎င်းထုတ်ပြန်ချက်အရ သိရသည်။

မင်းတပ်နယ် မြေခံ တပ်ရင်းမှထွက်လာပြီး မင်းတပ်မြို့နယ် ပူကွန်း ကျေးရွာတွင် တပ်စွဲထား သော စစ် ကောင်စီတပ်နှင့် CDF မင်းတပ်တို့ ဇွန်လ ၁၃ ရက် ညပိုင်းက စတင်တိုက်ပွဲဖြစ်ပွားခဲ့သည်။ ကန်ပက်လက်မြို့တွင်လည်း စစ်ကောင်စီနှင့် CDF ကန်ပက်လက်အကြား တိုက်ပွဲများကြောင့် စစ် ဘေး ရှောင်ပြည်သူများ တောထဲ တောင်ထဲတွင် ထွက် ပြေးတိမ်း ရှောင် နေကြပြီး အကူအညီများ လိုအပ်လျက်ရှိ သည်။

📌📌 ၃။ စစ်ကောင်စီတပ်၏ ထိုးစစ်ကြောင့် ကန်ပက်လက်မြို့နယ်ရှိ ပြည်သူများ ဘေးကင်းရာသို့ ရှောင်တိမ်းနေရ

စစ်ကောင်စီတပ်၏ ထိုးစစ်ကြောင့် ချင်းပြည်နယ်၊ ကန်ပက်လက်မြို့နယ်အတွင်းရှိ ပြည်သူများ ဘေးကင်းရာသို့ ရှောင်တိမ်းနေရပြီး အရေးပေါ် အကူအညီများလည်း လိုအပ်နေကြောင်း မြို့နယ်အုပ်ချုပ်ရေးအဖွဲ့က ဇွန်လ ၁၄ ရက်တွင် ထုတ်ပြန်သည်။ကန်ပက်လက်မြို့နယ် အမှတ်(၅)တိုက်နယ်အတွင်း စစ်ကြောင်းထိုးနေသည့် စစ်ကောင်စီတပ်က ရုတ်တရက် နောက် ကြောင်း ပြန်ဆုတ်လာ၍ အပြိုင်း၊ ငုံလောင်း၊ အမ်ပုံ၊ ကျော့တော် နှင့် ချင်းလက်မွန်ရွာ အစရှိသည့်ရွာများမှ ဒေသခံများ ကို အရေးပေါ် ပြောင်းရွှေ့ပေးနေရခြင်းဖြစ်သည်။ အဝတ်တစ်ထည် ကိုယ်တစ်ခုနှင့် လူလွတ်ရုံထွက်လာကြ ရသောကြောင့် အဝတ်အစားနှင့် စောင်၊ ခြင်ထောင်များ လိုအပ်နေကြောင်း ကန်ပက်လက်အုပ်ချုပ်ရေးအဖွဲ့ထံမှ သိရသည်။

တောင်ပေါ်မှနေ၍ ချောင်းများအတိုင်း ခြေကျင်ခရီးဖြင့်ဆင်းလာရ၍ နေမကောင်းဖြစ်ကြသူ အနည်းငယ် ရှိနေ ကြောင်းလည်း ဆိုသည်။ အလားတူ တောင်ပေါ်တွင် ပိတ်မိနေသေးသော စစ်ဘေးရှောင်များမှာ ချောင်းများနှင့် တော၊ တောင်များထဲတွင် နေထိုင်ရသည့်အတွက် နေထိုင်၊ စားသောက်ရေးအတွက် များစွာခက်ခဲနေရကြောင်း လည်း သိရသည်။ နေအိမ်များကို စွန့်ခွာ ရှောင်တိမ်းနေရသူ ဒေသခံပြည်သူ ဦးရေ ၂,၀၀၀ ဝန်းကျင်ရှိပြီးဆန်၊ စောင်၊ တာလပတ်(မိုးကာစ) များ လိုအပ်နေကြောင်း သိရှိရသည်။

ပြည်သူ့အုပ်ချုပ်ရေးအဖွဲ့မှ စစ်ဘေးရှောင်ပြည်သူများအတွက် ကနဦး အရေးပေါ် အကူအညီများ ပေးအပ်ခဲ့သော်လည်း မလုံလောက်သေးသောကြောင့် ပြည်တွင်း၊ ပြည်ပအလှူရှင်များအနေဖြင့် ပံ့ပိုးကူညီနိုင်ရန် မေတ္တာရပ်ခံကြောင်း ထုတ်ပြန်ချက်တွင်ဖော်ပြထားသည်။

📌📌 ၄။ ကန်ပက်လက်ကို စစ်ကြောင်းထိုးပြီး လှည့်လာသည့် စစ်ကောင်စီတပ်အား ကြားဖြတ်တိုက်ခိုက်ရာ ၂ ယောက်သေပြီး ၁၀ ယောက်ခန့် ဒဏ်ရာရနိုင်သည်ဟု ဆောမြို့နယ် ပြည်သူ့ကာကွယ်ရေးတပ်က ထုတ်ပြန်

ကန်ပက်လက်မြို့နယ်အတွင်း ၄ ရက်တာ စစ်ကြောင်းထိုးပြီး အထိနာသောစစ်ကောင်စီ အင်အား ၁၅၀ ခန့်ကို ပြည်သူ့ကာကွယ်ရေးတပ် ဆော တပ်ရင်း ၂ နှင့် The Youth Force (ဆော၊ ကျောက်ထု) တို့က ဆော-ကျောက်ထုလမ်းပိုင်း ပိန်းချောင်းတံတားအနီးတွင် တိုက်ခိုက်ခဲ့ရာ ၂ ယောက် သေဆုံးပြီး ၁၀ ယောက်ခန့် ဒဏ်ရာပြင်းထန်နိုင်သည်ဟု ဆောမြို့နယ် ပြည်သူ့ကာကွယ်ရေးတပ်က ဇွန် ၁၄ ညပိုင်းတွင် သတင်းထုတ်ပြန်သည်။

ယင်းတိုက်ပွဲတွင် ပြည်သူ့ကာကွယ်ရေးတပ် ဆော တပ်ရင်း ၂ ၏ လက်နက်ကြီးပြောင်း ပျက်စီးမှုရှိခဲ့သော်လည်း ပြည်သူ့ရဲဘော်များ အထိခိုက်မရှိပဲ အောင်မြင်စွာပြန်လည်ဆုတ်ခွာနိုင်ခဲ့သည်ဟု ဆိုသည်။

ပြည်သူ့ကာကွယ်ရေးတပ်များနှင့် စစ်ကောင်စီတပ်အကြားတိုက်ပွဲများ ပြန်လည်ပြင်းထန်လာသည့် ချင်းပြည်နယ်နှင့် မကွေးတိုင်းသို့ စစ်ကောင်စီမှသာလွန်အင်အားဖြင့် စစ်ကြောင်းထိုးလေ့ရှိပြီး မန္တလေးတိုင်းဖက်မှ စစ်ကောင်စီ တပ်အများအပြားပါဝင်သည့်ယာဥ်တန်းသည် မကွေးတိုင်းနှင့် ချင်းပြည်နယ်သို့ ဦးတည်ကာထွက်ခွာနေသည်ဟု ဇွန် ၁၄ ညနေပိုင်းတွင် သက်ဆိုင်ရာပြည်သူ့ကာကွယ်ရေးတပ်များက သတင်းထုတ်ပြန်သည်။

📌📌 ၅။ မြန်မာစစ်တပ်ကို လက်နက်ပစ္စည်းထောက်ပံ့တဲ့ ကုမ္ပဏီခြောက်ခုကို ဗြိတိန် ပိတ်ဆို့အရေးယူ

မြန်မာစစ်တပ်ကို စစ်လက်နက်ပစ္စည်းပေးပို့နေတဲ့ ရုရှားကုမ္ပဏီ သုံးခုနဲ့ မြန်မာကုမ္ပဏီ သုံးခုကို ဗြိတိန်အစိုးရက ဇွန်လ (၁၆)နေ့က ဒဏ်ခတ်အရေးယူလိုက်ပါတယ်။

မြန်မာလက်နက်ပွဲစားကုမ္ပဏီတွေ ဖြစ်တဲ့ Synpex Shwe၊ Myanmar New Era Trading နဲ့ Sky Aviator နဲ့ ရုရှား Ural Avia၊ Sins Avia Trading House နဲ့ JSC Gorizont ကုမ္ပဏီတွေကို စီးပွားရေးအရ အရေးယူပိတ်ဆို့လိုက်တာပါ။၂ဝ၂၁ ခုနှစ် စစ်တပ်က အာဏာသိမ်းပြီးနောက်ပိုင်း မြန်မာပြည်မှာ အိုးအိမ်စွန့်ခွာထွက်ပြေးရသူ ခုနှစ်သိန်းနီးပါး ရှိလာပြီဖြစ်ကြောင်း ကုလသမဂ္ဂက အစီရင်ခံစာထုတ်ပြန်ပြီးနောက် ရက်ပိုင်းအတွင်းမှာ ပိတ်ဆို့အရေးယူမှုအသစ် ထွက်ပေါ်လာတာပါ။

တိုင်းရင်းသားပြည်နယ်တွေက အိုးမဲ့အိမ်မဲ့ဖြစ်ရသူ အများစုဟာ လေကြောင်းတိုက်ခိုက်မှု ဒါမှမဟုတ် လေကြောင်း တိုက်ခိုက်မှု ခြိမ်းခြောက်မှုတွေကြောင့် ဖြစ်ရတာလို့ ဆိုပါတယ်။ Myanmar New Era Trading ဟာ ရုရှားလုပ် Mi-17 စစ်ရဟတ်ယာဉ် အပိုပစ္စည်းတွေဝယ်ယူပေးတဲ့ ကုမ္ပဏီဖြစ်ပြီး Sky Aviator က စစ်အာဏာသိမ်းပြီးချိန်ကစလို့ ရုရှားနဲ့ယူကရိန်းက စစ်လက်နက်ပစ္စည်းတွေအတွက် ပွဲစားလုပ်ပေးတဲ့ ကုမ္ပဏီ ဖြစ်ပါတယ်။

Synpex Shwe ကုမ္ပဏီဟာ စစ်အာဏာသိမ်းပြီးချိန်ကစလို့ ရုရှား Sins Avia Trading House ကနေ မြန်မာစစ်တပ်အတွက် ရဟတ်ယာဉ်အပိုပစ္စည်းတွေ တင်သွင်းပေးပြီး စင်ကာပူမှာလည်း ရုံးခန်းရှိပါတယ်။ ဗြိတိန်အစိုးရက ဒီလိုအရေး ယူလိုက်တာကို Burma Campaign UK နဲ့ မြန်မာစစ်တပ်နဲ့ စီးပွားရေးဆက်စပ်လုပ်ကိုင် နေသူတွေကို ဖော်ထုတ်နေတဲ့ Justice for Myanmar တို့က ကြိုဆိုလိုက်ပြီး ပိတ်ဆို့အရေးယူမှုကို အရှိန်မြှင့်ဖို့လည်း တိုက်တွန်းလိုက်ပါတယ်။