25th JUN 2022 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၂ ဇွန်လ ၂၅ ရက်နေ့ နောက်ဆုံးရပြည်တွင်းသတင်းများ 

📌📌 ၁။ ပြည်သူ့ကာကွယ်ရေးတပ်မတော်က တပ်ရင်းလိုက် ရင်ဆိုင်တိုက်ပွဲများ ဆင်နွှဲနိုင်သည့် အနေအထားသို့ ရောက်ရှိပြီ ဖြစ်ကြောင်း အမျိုးသားညီညွတ်ရေးအစိုးရ ထုတ်ပြန်

ပြည်သူ့ကာကွယ်ရေးတပ်မတော်က တပ်ရင်းလိုက် ရင်ဆိုင်တိုက်ပွဲများ ဆင်နွှဲနိုင်သည့် အနေအထားသို့ ရောက်ရှိပြီဖြစ်ကြောင်း အမျိုးသားညီညွတ်ရေးအစိုးရ ထုတ်ပြန်လိုက်ပါတယ်။ ပြည်သူ့ခုခံတွန်းလှန်စစ် စတင်ပြီး (၉) လကျော်ကာလအတွင်း ပြည်သူ့ကာကွယ်ရေးတပ်မတော် (PDF) ၏ လေ့ကျင့်မှု၊ စုဖွဲ့မှု၊ ကွပ်ကဲမှု၊ တပ်ဆင်မှု၊ ထုတ်လုပ်မှု တို့သည် ပိုမိုအားကောင်းလျက် Professional Army တစ်ရပ်အဖြစ် တဖြည်းဖြည်းပုံပေါ်လာပြီဖြစ်ပါတယ်။ ယခုကာလတွင် ပျောက်ကျားစစ်သာမက လိုအပ်လျင် တပ်ရင်းလိုက် ရင်ဆိုင်တိုက်ပွဲများ ဆင်နွှဲနိုင်သည့် အနေအထားသို့ ရောက်ရှိနေပြီဖြစ်ပါတယ်လို့ အမျိုးသားညီညွတ်ရေးအစိုးရကထုတ်ပြန်ပါတယ်။

ပြည်သူ့ကာကွယ်ရေးတပ်ဖွဲ့များကို ၂၀၂၁ ခုနှစ် မေလ ၅ ရက်နေ့က စတင်ထူထောင်ခဲ့ပါတယ်။ လက်ရှိမှာ တပ်ရင်းတပ်ဖွဲ့ပေါင်း ၂၅၇ ရင်း ဖွဲ့စည်းပြီးဖြစ်ကာ မြို့နယ်ပကဖပေါင်း ၂၅၀ ဖွဲ့စည်းပြီးဖြစ်ပါတယ်။

 

📌📌 ၂။ စစ်ရေးအရရှုံးနိမ့်နေတဲ့ ဒေသများမှာ စစ်ကောင်စီတပ်သားများက အိမ်ခြေပေါင်း တစ်သောင်းကိုးထောင်နီးပါး မီးရှို့ဖျက်ဆီးခဲ့

စစ်ရေးအရရှုံးနိမ့်နေတဲ့ ဒေသများမှာ စစ်ကောင်စီတပ်သားများက အိမ်ခြေပေါင်း တစ်သောင်းကိုးထောင်နီးပါး မီးရှို့ဖျက်ဆီးခဲ့ပါတယ်။ ဇွန်လ၂၁ ရက်နေ့ သတင်းစာရှင်းလင်းပွဲမှာ အမျိုးသားညီညွတ်ရေးအစိုးရက သတင်းထုတ်ပြန်ခဲ့ပါတယ်။

အကြမ်းဖက်စစ်ကောင်စီတပ်များဟာ စစ်ရေးအရရှုံးနိမ့်နေတဲ့ ဒေသများတွင် အရပ်သားပြည်သူများအား ပစ်မှတ်ထားတိုက်ခိုက်သတ်ဖြတ်လျက်ရှိပြီး နေအိမ်အဆောက်အအုံများအား မီးရှို့ဖျက်ဆီးလျက်ရှိရာ ယခုလက်ရှိအချိန်အထိ အိမ်ခြေပေါင်း တစ်သောင်းကိုးထောင်နီးပါး မီးရှို့ဖျက်ဆီးခံခဲ့ရပြီးဖြစ်ပါတယ်။ မီးရှို့ ဖျက်ဆီးခံရမှုများတွင် စစ်ကိုင်းတိုင်းနှင့် မကွေးတိုင်းတို့တွင် အများဆုံးဖြစ်ပြီး မေလအတွင်း မီးရှို့ဖျက်ဆီး ခံရသည့်အိမ်ခြေ ၇ ထောင်ကျော်ရှိခဲ့ပါတယ်။

အမျိုးသားညီညွတ်ရေး အစိုးရအနေဖြင့် တိုးပွားလာလျက်ရှိသော နေရပ်စွန့်ခွာပြေးနေရသည့် ပြည်သူလူထုထံသို့ အကူအညီများ မှန်ကန်မြန်ဆန်စွာရောက်ရှိစေရေးအတွက် တိုင်းရင်းသားမဟာမိတ်များ၊ နိုင်ငံတကာအဖွဲ့အစည်းများနှင့် ပူးပေါင်းကာ အစွမ်းကုန်ကြိုးစားဆောင်ရွက်လျက်ရှိပါတယ်။

 

📌📌 ၃။ NUGPay ဟာတစ်နိုင်ငံလုံးအား လွှမ်းခြုံနိုင်တဲ့ ဒစ်ဂျစ်တယ်ငွေကြေးဂေဟစနစ် တစ်ခုဖြစ်အောင် တိုးချဲ့သွားမယ်

NUGPay စီမံကိန်းဟာတစ်နိုင်ငံလုံးအား လွှမ်းခြုံနိုင်တဲ့ ဒစ်ဂျစ်တယ်ငွေကြေးဂေဟစနစ် တစ်ခုဖြစ်အောင် ဖြည်းဖြည်းမှန်မှန် ခြေလှမ်းများဖြင့် တိုးချဲ့သွားမယ်လို့ ဇွန်လ ၂၃ ရက်နေ့မှာ NUGPay ကနေ သတင်းထုတ်ပြန်ခဲ့ပါတယ်။ NUGPay စီမံကိန်းဟာ တော်လှန်ရေး အင်အားစုများအတွင်းသို့ လုံခြုံစွာ ငွေကြေးလှည့်ပါတ်စီးဆင်းနိုင်စေရန် နှင့် စစ်ကောင်စီရဲ့ထိန်းချုပ်မှုကင်းသော ငွေကြေးဝန်ဆောင်မှု တစ်ရပ်တည်ဆောက်နိုင်ရန်အဓိကရည်ရွယ်ချက်ဖြင့် ပေါ်ပေါက်လာခဲ့ခြင်း ဖြစ်ပါတယ်။

NUGPay ၌ ရှင်းလင်းပြတ်သားသော ဦးတည်ချက်များရှိပြီး လက်ရှိ Pilot Project မှ စတင်ကာ တစ်နိုင်ငံလုံးအား လွှမ်းခြုံနိုင်သည့် ဒစ်ဂျစ်တယ်ငွေကြေးဂေဟစနစ် တစ်ခုဖြစ်အောင် ဖြည်းဖြည်းမှန်မှန် ခြေလှမ်းများဖြင့် တိုးချဲ့သွားမှာဖြစ်ပါတယ်။ NUGPay Pilot Project အား မကြာမီ စတင်တော့မည် ဖြစ်၍ Pilot Project အား အေးဂျင့် “၁,၀၀၀” ဦး၊ NUGPay Wallet စုစုပေါင်း “၁၀,၀၀၀” ဖြင့် စတင်သွားမှာလို့ NUGPay ကဖော်ပြပါတယ်။

 

📌📌 ၄။ တော်လှန်ရေး အသုံးစရိတ်တစ်လလျှင် အမေရိကန်ဒေါ်လာ (၁၀) သန်းရရှိရန်လိုအပ်

တော်လှန်ရေး အသုံးစရိတ်တစ်လလျှင် အမေရိကန်ဒေါ်လာ (၁၀) သန်းရရှိရန်လိုအပ်တယ်လို့ အမျိုးသားညီညွတ်ရေးအစိုးရက ထုတ်ပြန်ပါတယ်။ တော်လှန်ရေး အသုံးစရိတ်အနေဖြင့် လစဉ် တစ်လလျှင် အမေရိကန်ဒေါ်လာ (၁၀) သန်းရရှိရန်လိုအပ်ပြီး ထိုပမာဏကို လစဉ်ပြည့်မှီ စေရန်အတွက် နည်းလမ်းပေါင်းစုံဖြင့် ကြိုးစားလျက်ရှိရာ လုပ်ငန်းရှင်များအနေဖြင့်လည်း အမျိုးသားညီညွတ်ရေးအစိုးရထံသို့ တော်လှန်းရေးတာဝန်တစ်ရပ် အနေဖြင့် အခွန်ဆောင်ကြရန် တိုက်တွန်းလိုတယ်လို့ အမျိုးသားညီညွတ်ရေးအစိုးရကဖော်ပြပါတယ်။

လက်ရှိမှာငွေတိုက်စာချုပ်ရောင်းချရမှုမှ အမေရိကန်ဒေါ်လာ ၃၈ သန်း၊ အကြမ်းဖက်စစ်ခေါင်းဆောင်မင်းအောင်လှိုင် မတရားသိမ်းပိုက်ထားသည့် ပိုင်ဆိုင်မှုကိုရောင်းချမှုမှ အမေရိကန်ဒေါ်လာ ၇ သန်းကျော် စုစုပေါင်း အမေရိကန်ဒေါ်လာ ၄၅ သန်းရရှိပြီးဖြစ်ပါတယ်။ အဆိုပါ ငွေကြေး၏ ၉၅ ရာခိုင်နှုန်းကို ကာကွယ်ရေးအသုံးစရိတ်အဖြစ် အသုံးပြုထားပါတယ်လို့ အမျိုးသားညီညွတ်ရေးအစိုးရကဆိုပါတယ်။

 

📌📌 ၅။ စစ်ကောင်စီလှည့်ဖြားမှုကို သတိပြုဖို့ လူ့အခွင့်အရေးအထူးကိုယ်စားလှယ် သတိပေး

စစ်ကောင်စီက လွတ်လပ်ပြီး တရားမျှတတဲ့ ရွေးကောက်ပွဲကျင်းပပေးမယ်ဆိုတဲ့ ပြောဆိုချက်ဟာ ရယ်စရာ ပြောဆိုချက်ဖြစ်ပြီး သူတို့တရား၀င်ဖြစ်အောင် ကြော်ငြာထိုးနေတာကို အပြည်ပြည်ဆိုင်ရာအနေနဲ့ မယုံမိကြဖို့ မြန်မာနိုင်ငံဆိုင်ရာ လူ့အခွင့်အရေးအထူးကိုယ်စားလှယ် Tom Andrews က သတိပေးလိုက်တယ်လို့ AP သတင်းတစ်ရပ်မှာ ဖော်ပြထားပါတယ်။

မလေးရှားနိုင်ငံ ကွာလာလမ်ပူမြို့မှာ ရောက်ရှိနေတဲ့ Tom Andrews က စစ်ကောင်စီဟာ အာဏာသိမ်းပြီးကတည်းက သူတို့တရား၀င်ဖြစ်အောင် ပုံဖော်ကြိုးစားနေတာဖြစ်ပြီး သူတို့ပြောနေတဲ့ ၂၀၂၃ မှာ ကျင်းပပေးမယ်ဆိုတဲ့ ရွေးကောက်ပွဲဆိုတာဟာ အတိုက်အခံကို ချုပ်ထားပြီး၊ အတိုက်အခံတွေကို သေဒဏ်ပေးပြီး လွတ်လပ်တရားမျှတတဲ့ ရွေးကောက်ပွဲပါလို့ပြောနေတာဟာ ယုတ္တိမတန်တဲ့ ရမ်းကားမှုဖြစ်တယ်လို့ ပြောပါတယ်။

လူ့အခွင့်အရေးအထူးကိုယ်စားလှယ်က စစ်ကောင်စီဟာ သူတို့တရား၀င်မှုအတွက် အပတ်တကုတ် ကြိုးစားနေပြီး အပြည်ပြည်ဆိုင်ရာအနေနဲ့ သူတို့ထောင်ချောက်ထဲ မသက်ဆင်းအောင် သတိပြုရမှာဖြစ်ပြီး အာဆီယံအနေနဲ့လည်း ဘုံသဘောတူညီချက် ငါးချက်ကို စာရွက်ပေါ်က အချက်တွေအဖြစ်ကနေ လက်တွေ့အကောင်အထည်ဖော်နိုင်တဲ့ အခြေအနေရောက်အောင် စစ်ကောင်စီကို ဖိအားပေးဖို့ လိုတယ်လို့ တိုက်တွန်းထားပါတယ်။

တစ်ဆက်တည်း အာဏာသိမ်းခံရပြီး ပါလီမန်ကို ၀င်ခွင့်အပိတ်ခံထားရတဲ့ ရွေးကောက်ခံကိုယ်စားလှယ်တွေနဲ့ ဖွဲ့စည်းထားတဲ့ အမျိုးသားညီညွတ်ရေးအစိုးရ (NUG) နဲ့ ထိတွေ့မှုရှိတဲ့ မလေးရှားနိုင်ငံကို ချီးကျူးလိုက်ပြီး တခြားနိုင်ငံတွေလည်း မလေးရှားနိုင်ငံလို ဆောင်ရွက်ကြဖို့ တိုက်တွန်းပါတယ်။ Tom Andrews က စစ်ကောင်စီကို လူသားချင်းစာနာထောက်ထားမှု အကူအညီတွေပေးအပ်ပြီး လက်နက်သဖွယ် အသုံးချမှာကို ရှောင်ရှားနိုင်ဖို့၊ အမျိုးသားညီညွတ်ရေးအစိုးရကိုလည်း အထောက်အပံ့တွေကို ဖြန့်ခွင့်ပေးဖို့ တိုက်တွန်းထားပါတယ်။

#RadioNUGLocalNews

#SpringRevolution