16th JUL 2022 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၂ ဇူလိုင်လ ( ၁၆ ) ရက်နေ့ နောက်ဆုံးရပြည်တွင်းသတင်းများ

📌📌 ၁။ သရုပ် ဆောင် ဒေါင်းက CDF မင်းတပ် မှ ကျဆုံး ရဲ ဘော် ဆလိုင်း အောင်ထန်းဟုန်း အား ငွေတိုက်စာချုပ် ၀ယ်ယူဂုဏ်ပြု

သရုပ်ဆောင် မင်းသား ဒေါင်းက CDF မင်းတပ် မှ ကျဆုံးရဲ ဘော် ဆလိုင်း အောင်ထန်းဟုန်းအတွက် ငွေတိုက်စာချုပ် ၀ယ်ယူဂုဏ်ပြုလိုက် ကြောင်း OUR SPRING HEROES Facebook page တွင် ဖော်ပြထားသည်။

သရုပ်ဆောင် ဒေါင်းက ဆလိုင်း အောင်ထန်းဟုန်း အတွက် ၀ယ်ယူ ဂုဏ်ပြုထားသည့် Bond အမှတ်စဉ် မှာ - R0091510 ဖြစ် ကြောင်းသိရသည်။

ချင်းပြည်နယ် မင်းတပ်မြို့ တွင် ၂၀၂၁ ခုနှစ် မေလ ၁၄ ရက်နေ့ ၌ CDF မင်းတပ်နှင့် စစ်ကောင်စီတပ် တို့ဖြစ် ပွားခဲ့သော တိုက်ပွဲတွင် ရဲဘော် ဆလိုင်းအောင်ထန်းဟုန်းသည် မြင့်မြတ်စွာ အသက်ပေးလှူခဲ့ ခြင်းဖြစ်သည်။

ယခုကဲ့သို့ တော်လှန် ရေး တိုက်ပွဲဝင်ရင်း အသက်ပေးလှူသွား‌ခဲ့သည့် သူရဲကောင်း ရဲဘော်ဆလိုင်းအောင်ထန်းဟုန်း၏ ကျန်ရစ်သူမိသားစုကို ကူညီစောင့်ရှောက်သည့်အ နေဖြင့် အလှူရှင် သရုပ် ဆောင် ဒေါင်း မှ "ဒို့ … နွေဦးသူရဲကောင်းအတွက် ငွေတိုက်စာချုပ်” အား ပေးအပ်ဂုဏ်ပြုလိုက်ခြင်း ဖြစ် ကြောင်း သိရသည်။

ပြည်သူများအနေဖြင့် နွေဦးသူရဲကောင်းများအား ရည်စူးပြီး ကျန်ရစ်သူမိသားစုအတွက် "ဒို့ … နွေဦးသူရဲကောင်းအတွက် ငွေတိုက်စာချုပ်” များကို ဆက်သွယ်ဝယ်ယူလှူဒါန်းပေးနိုင်ကြောင်း သိရသည်။ 

📌📌 ၂။ CDF ကန်ပက်လက်က မြို့တွင်းပြောက်ကျားစစ်ဆင်ရေးပြုလုပ်၊ စစ်ကောင်စီဘက် ထိခိုက်သေဆုံးမှုရှိ

CDF-ကန်ပက်လက်က လွန်ခဲ့သောရက်ပိုင်းများတွင် မြို့တွင်းပြောက်ကျားစစ်ဆင်ရေးပြုလုပ်ခဲ့ ပြီး စစ်ကောင်စီဘက်က ထိခိုက်သေဆုံးမှုရှိကြောင်း ဇူလိုင်လ ၁၂ ရက်  ညပိုင်းတွင် သတင်းထုတ်ပြန်သည်။

ကန်ပက်လက်မြို့၊ အထွေထွေအုပ်ချုပ်ရေးဦးစီးဌာနရုံးတွင်တပ်စွဲထားသော အကြမ်းဖက် စစ်ကောင်စီတပ်ဖွဲ့နှင့် CDF-Kanpetlet တို့အကြား ၁၁-၇-၂၀၂၂ ရက်နေ့၊ နေ့လယ် ၁၂ နာရီအချိန်ခန့်မှစ၍ ညနေ ၃ နာရီအချိန်အထိ တိုက်ပွဲဖြစ်ပွားခဲ့ရာ CDF ကန်ပက်လက်ဘက်မှ အထိအခိုက်မရှိဘဲ ပြန်လည်ဆုတ်ခွာနိုင်ခဲ့ကြောင်းသိရသည်။

၁၂-၇-၂၀၂၂ ရက်နေ့တွင်လည်း ကန်ပက်လက်မြို့၊ မြို့နယ်ပညာရေးမှူးရုံးနှင့် အခြေခံပညာအထက်တန်းကျောင်းတို့တွင် တပ်စွဲထားသော အကြမ်းဖက်စစ် ကောင်စီတပ်ဖွဲ့များနှင့် CDF-Kanpetlet တို့အကြား နံနက် ၁၁ နာရီခန့်မှ စ၍ နေ့လယ် ၂ နာရီအချိန်အထိ (၂)နေရာ တိုက်ပွဲဖြစ်ပွားခဲ့ရာ စစ်ကောင်စီဘက်မှ (၂)ဦး သေဆုံး၍ CDF ကန်ပက်လက်ဘက်မှ အထိအခိုက်မရှိဘဲ ပြန်လည်ဆုတ်ခွာခဲ့ ကြောင်း သတင်းထုတ်ပြန်ချက်တွင်ပါရှိသည်။

 

📌📌 ၃။ စစ်ကောင်စီ တပ်သားတစ်ဦး လက်နက်အပြည့်အစုံဖြင့် CDF မင်းတပ်ထံဝင်ရောက်ခိုလှုံ၊ ကျပ်ငွေ သိန်း (၅၀) ချီးမြှင့်ခံရ

ပြီးခဲ့သည့် ဇူလိုင်လ ၁၀ ရက်နေ့တွင် စစ်ကောင်စီတပ်သားတစ်ဦး လက်နက်အပြည့်အစုံဖြင့် CDF-မင်းတပ်ထံ ဝင်ရောက်ခိုလှုံလာသဖြင့် ကျပ်သိန်း (၅၀) ချီးမြှင့်ဂုဏ်ပြုလိုက်ကြကြောင်း CDF မင်းတပ်က ဇူလိုင်လ ၁၃ ရက်တွင် သတင်းထုတ်ပြန်သည်။

ပြည်သူနှင့် ပူးပေါင်းလာသည့် အဆိုပါ စစ်ကောင်စီတပ်သားတစ်ဦးသည် အရှေ့ပိုင်းတိုင်း စစ်ဌာနချုပ် တပ်မ (၅၅) လက်အောက်ခံ ၊ တီကျစ်(ပင်လောင်း မြို့နယ်) အခြေစိုက် ခမရ (၅၁၂)၊ တပ်ခွဲ (၄) မှဖြစ်ပြီး မကွေးတိုင်း ယောဒေသ ရှေ့တန်းတစ်နေရာမှ ထွက်ပြေးလွတ်မြောက် လာခြင်းဖြစ်ကြောင်း သိရသည်။

ယင်းစစ်ကောင်စီတပ်သားသည် မင်းတ် မြို့နယ်၊ ဝမ္မသူးကျေးရွာသို့ စစ်ကြောင်းထိုး သည့် အတွေ့ အကြုံ ရှိခဲ့ ဖူးကြောင်း သိရသည်။

၎င်းယူဆောင်လာသော လက်နက်နှင့် ဆက်စပ် ပစ္စည်းများမှာ -

(၁) MA-1/(23078) တစ်လက် 

(၂) ကျည်အိမ် - ၃ ခု ၊ 

(၄) ကျည်တောင့် - ၁၂၃ တောင့် 

(၅) အီနာဂါ ဗုံးသီး - ၂ လုံး 

(၆) အီကွန်းမဲင်း - ၁ ထည် တို့ ဖြစ်သည်။

 

📌📌 ၄။ ဖလမ်းနှင့်ဟားခါးကြား လမ်းပိုင်းတွင် ချင်းကာကွယ်ရေးတပ်ဖွဲ့များနှင့် စစ်ကောင်စီတပ်တို့ တိုက်ပွဲဖြစ်ပွား၊ ပြည်သူပိုင် နေအိမ် ၃၀ ကျော်ကို စစ်ကောင်စီ တပ်က မီးရှို့ဖျက်ဆီးခဲ့ 

ဖလမ်းနှင့်ဟားခါးကြား လမ်းပိုင်းတွင် ချင်းကာကွယ်ရေးတပ်ဖွဲ့များနှင့် စစ်ကောင်စီတပ်တို့ တိုက်ပွဲဖြစ်ပွားခဲ့ပြီး၊ ပြည်သူပိုင် နေအိမ် ၃၀ ကျော်ကို စစ်ကောင်စီတပ်က မီးရှို့ဖျက်ဆီးခဲ့ကြောင်းသိရသည်။

ချင်းပြည်နယ် ၊ ဖလမ်းမြို့မှ ဟားခါးမြို့သို့ထွက်ခွာလာသော အင်အား (၂၀၀)ကျော်ရှိ အကြမ်းဖက်စစ်တပ်အား CNDF, CNA, CDF နှင့် CJDC ပြည်သူ့ကာကွယ်ရေးပူးပေါင်းတပ်ဖွဲ့မှ လမ်းတစ်လျှောက် ခုခံတိုက်ခိုက်လျက်ရှိကြောင်း ချင်းအမျိုးသားအဖွဲ့ချုပ်(CNO)က သတင်းထုတ်ပြန်သည်။

အထိနာနေသော စစ်ကောင်စီတပ်ဖွဲ့များ၏ပစ်ခတ်မှုကြောင့် တလန်ရောန် ကျေးရွာရှိ ခရစ်ယာန်ဘုရားကျောင်းနှင့် သူနာပြုဆရာမ၏နေအိမ်တစ်လုံး လက်နက်ကြီး ထိမှန်ပျက်စီးခဲ့ကြောင်း သတင်းထုတ်ပြန်ချက်တွင် ပါရှိသည်။

ပြီးခဲ့သည့် ဇူလိုင်လ(၉)ရက်နေ့တွင်လည်း ဖလမ်းမြို့နယ်၊ တားလ်(Taal) ကျေးရွာရှိ နေအိမ်(၂၉)လုံးကို စစ်ကောင်စီ တပ်သားများက အကြောင်းမဲ့ ထပ်မံမီးရှို့ဖျက်စီးခဲ့ပြီးနောက် ကျန်ရှိသည့် နေအိမ် (၅)လုံးကိုလည်း ဖောက်ထွင်းဖျက်စီးခဲ့ ကြောင်းသိရသည်။

တားလ်ကျေးရွာသည် ဖလမ်း-ဟားခါး လမ်းမပေါ်တွင်တည်ရှိပြီး အိမ်ခြေ (၃၆) အိမ်ရှိသည်။ ပြီးခဲ့သည့် ၂၀၂၁ ခုနှစ်တွင်လည်း စစ်ကောင်စီတပ်၏ မီးရှို့ဖျက်ဆီးခြင်းခံခဲ့ရဖူးသည်။

ဇူလိုင်လ (၁၀)ရက်နေ့ မွန်းလွဲပိုင်းတွင် တလန်ဇာရ်ကျေးရွာရှိနေအိမ်များကို အကြမ်းဖက်စစ်ကောင်စီတပ်က အကြောင်းမဲ့ ထပ်မံမီးရှို့ဖျက်စီးခဲ့ကြရာ ညနေ(၅:၃၀) နာရီအချိန်ထိ နေအိမ်(၆)လုံး မီးလောင်ဆုံးရှုံးခဲ့ကြောင်း ချင်းအမျိုးသားအဖွဲ့ချုပ်၊ သတင်းပြန်ကြားရေးနှင့် ပြည်သူ့ဆက်ဆံရေးဌာနက သတင်းထုတ်ပြန်ထားသည်။

 

📌📌 ၅။ မြန်မာနိုင်ငံဆိုင်ရာ ဗြိတိန်သံရုံးအကြီးအကဲ တာဝန် ရုတ်တရက်ရပ်ဆိုင်း

မြန်မာနိုင်ငံဆိုင်ရာ ဗြိတိန်သံရုံးယာယီတာဝန်ခံ Pete Vowels က မြန်မာပြည်က သူ့ရဲ့လုပ်ငန်းတာဝန်တွေကို ရုတ်တရက် ဒီနေ့ရပ်ဆိုင်းလိုက်ရတယ်လို့ သူ့ရဲ့ တွစ်တာစာမျက်နှာမှာ ရေးသားလိုက်ပါတယ်။ 

သူ့ကို စစ်ကောင်စီက မြန်မာပြည်က ထွက်ခွာဖို့ ဖိအားပေး ညွှန်ကြားခဲ့မှုအတွက် စိတ်မကောင်းဖြစ်ရကြောင်း၊ ဒါပေမဲ့ သူတို့ရဲ့ ရက်စက်တဲ့ အာဏာသိမ်းမှုကို တရားဝင်အသိအမှတ်ပြုဖို့ ဖိအားပေးခံခဲ့ရတာကို မိမိတို့ ငြင်းဆန်နိုင်ခဲ့တဲ့အတွက် ဝမ်းသာမိပါတယ်လို့ Mr Vowels က တွစ်တာက ပြောကြားလိုက်ပါတယ်။

သူအခုလို ထွက်ခွာခဲ့ရပေမယ့် မြန်မာပြည်မှာ ကျန်ခဲ့တဲ့ သူ့အဖွဲ့သားတွေက တရားမျှတမှု၊ လွတ်လပ်မှုနဲ့ ငြိမ်းချမ်းမှုကလွဲလို့ တခြားဘာကိုမှ လိုလားခြင်းမရှိတဲ့ မြန်မာပြည်သူတွေအတွက် တတ်နိုင်သမျှ ဆက်လက်ဆောင်ရွက်သွားမယ်လို့ ဆိုပါတယ်။ 

Pete Vowels ဟာ ၂ဝ၂၁ ခုနှစ် သြဂုတ်လက စတင်ပြီး မြန်မာနိုင်ငံမှာ တာဝန်ထမ်းဆောင်ခဲ့တာ ဖြစ်ပါတယ်။

#RadioNUGLocalNews

#SpringRevolution