11th SEP 2022 - (Ethnic language program-CHO_Mün) by Radio NUG

📌 (ချင်း တိုင်းရင်းသား - Mün မွန်း ဘာသာစကား) ထုတ်လွှင့်မှု အစီအစဥ် ၂၀၂၂ စက်တင်ဘာလ ( ၁၁ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ လအတန်ကြာမှ တကျော့ပြန် ပြန်လည်ဖြစ်ပွားသည့် CDF မင်းတပ်နဲ့တိုက်ပွဲတွင် စစ်ကောင်စီတပ်သား ၃ဦးထပ်မံသေ

 

တိုက်ပွဲဖြစ်ပွားမှု ငြိမ်နေတဲ့ မင်းတပ်မြို့နယ်အတွင်းမှာ CDF မင်းတပ် ပြည်သူ့ကာကွယ်ရေးတပ်နဲ့ စစ်ကောင်စီတပ်တို့ စက်တင်ဘာလ ၉ ရက် မနက်ပိုင်းက စ ပြီးထိပ်တိုက်ပစ်ခတ်မှုတွေ ရှိတယ်လို့ CDF မင်းတပ်က ထုတ်ပြန်ထားပါတယ်။ မင်းတပ်မြို့နဲ့ ၁၀ မိုင်ခန့်ဝေးတဲ့ မကွေးတိုင်း - ချင်းပြည်နယ်အစပ် မယ်လယ်ကုန်းမှာ တိုက်ပွဲဖြစ်ခဲ့တာ ဖြစ်ပြီး စစ်ကောင်စီဘက် ထိခိုက်သေဆုံးမှုရှိတယ်လို့ မြေပြင်စစ် ရေးသတင်းနဲ့ နီးစပ်သူက ပြောပါတယ်။

 

“ဒီမနက်တိုက်ပွဲရှိတာ စစ်ကောင်စီက သုံးယောက်သေပြီး ဒဏ်ရတဲ့သူတွေရှိတယ်တဲ့၊ ဒီညထိတော့ စခတွေ လှော်ဝမှာအိပ်မယ်လို့ ခန့်မှန်းရတယ်” လို့ သူကပြောပါတယ်။ ဒီကနေ့တိုက်ပွဲမှာ စစ်ကောင်စီဘက် သေဆုံးသူ ၃ဦးနဲ့ ထိခိုက် ဒဏ်ရာရရှိသူများကြောင်း CDF မင်းတပ်က တရားဝင်ထုတ်ပြန်ထားသလို ပစ်ခတ်တိုက်ခိုက်မှုအတွင်းမှာ စစ်ကောင်စီရဲ့ ကျောက်ထုအမြောက်တပ်က လက်နက်ကြီးပစ်ကူတာတွေရှိတယ်လို့လည်း ဆိုပါတယ်။ 

 

📌📌 ၂။ CDF မင်းတပ်၏ ပထမဆုံး “နာနတ်သီးနှင့် ပွဲကြမ်းကြမယ်” Challenge တွင် ရန်ပုံငွေပြည့်မီရန် လိုအပ်နေ၊ တတ်နိုင်သည့်ဘက်ကပါဝင်ကြရန် ဖိတ်ခေါ်

CDF မင်းတပ် ကာကွယ်ရေးတပ်က ပထမဆုံးအကြိမ်ပြုလုပ်တဲ့ “နာနတ်သီးနှင့် ပွဲကြမ်းကြမယ်” Challenge မှာ သတ်မှတ်ထားတဲ့ ရန်ပုံငွေပြည့်မီဖို့ ထက်ဝက်ကျော်လိုအပ်နေသေးတယ်လို့ သိရပါတယ်။ ဒီလှုပ်ရှားမှုဟာ ပြည်သူလူထုအတွက် သတင်းကောင်းတွေ ယူဆောင်ပေးနိုင်ဖို့ အဓိကပစ်မှတ်ထားတာ ဖြစ်တယ်လို့လည်း CDF မင်းတပ် လက်နက်တပ်ဆင်ရေးဌာန တာဝန်ရှိသူက ပြောပါတယ်။

 

“ဒီ Challenge စခေါ်တာ တစ်လနီးပါးရှိပြီ၊ မျှော်မှန်းထားတာရဲ့ ၃၇ ရာခိုင်နှုန်းလောက်ပဲ ရသေးတယ်။ ကျွန်တော်တို့ မီဒီယာနဲ့လည်း အလှမ်းဝေးတော့ လုပ်ငန်းထိရောက်မှု နည်းတယ်လို့မြင်တယ်၊ ပြည်သူတွေ ဒီ Campaign မှာ ပါဝင်ပေးကြဖို့ မေတ္တာရပ်ခံပါတယ်” လို့ သူကပြောပါတယ်။ 

 

ရန်ပုံငွေ ထည့်ဝင်နိုင်တဲ့ကာလကိုတော့ သြဂုတ်လ ၁၃ ရက်ကနေ စတင်ခဲ့တာဖြစ်ပြီး လာမယ့် စက်တင်ဘာလကုန်အထိ စုစုပေါင်း ၄၅ ရက် သတ်မှတ်ထားပါတယ်။ “နာနတ်သီးနှင့် ပွဲကြမ်းကြမယ်” Challenge ကို ပြည်တွင်းက ပြည်သူအားလုံးပါဝင်နိုင်သလို အမေရိကန်၊ ဂျပန်၊ ထိုင်းနဲ့ စင်္ကါပူစတဲ့ ပြည်ပနိုင်ငံတွေနဲ့လည်း ချိတ်ဆက်ထားတယ်လို့ ဆိုပါတယ်။

 

လက်လုပ်မိုင်း၊ ပဒေသာမိုင်းတွေနဲ့ တိုက်ခိုက်ရတာဟာ ကာကွယ်ရေးရဲဘော်တွေအတွက် အန္တရာယ် အများဆုံးဖြစ်ပေမယ့် စစ်ကောင်စီတပ်တွေ အထိအနာရဆုံး စစ်ဆင်ရေးတစ်ခုဖြစ်နေတာကြောင့်လည်း ပြည်သူအားလုံး တတ်နိုင်တဲ့ဘက်က ပါဝင်ကြဖို့ CDF မင်းတပ်က တိုက်တွန်းထားပါတယ်။

 

📌📌 ၃။ မင်းတပ်မြို့နယ်ဒေသခံ အမျိုးသမီးတစ်ဦး နိုင်ငံကူးလက်မှတ် အတုကိုင်ဆောင်သည်ဟုဆိုကာ ထိုင်းလေဆိပ်တွင်ထိန်းသိမ်းခံရ

ရန်ကုန်မှ ဘန်ကောက်ကို ဩဂုတ်လ ၃၁ ရက်က ထွက်ခွာလာသည့် အမျိုးသမီး ၆ဦးပါအဖွဲ့တွင် အသက် ၂၀ အရွယ် မြန်မာအမျိုးသမီးတစ်ဦး၏ ပတ်စပို့စာအုပ်ကို အတုဟုဆိုပြီးထိုင်းလေဆိပ်ရဲက ဖမ်းဆီး လိုက်ကြောင်း အမှုလိုက်ပါဆောင်ရွက်ပေးနေသူတစ်ဦးက ပြောသည်။ အဆိုပါအမျိုးသမီး၏ နိုင်ငံကူး လက်မှတ်သည် လေဆိပ်တွင် စကင်ဖတ်၍ မရဟုဆိုကာ ထိုင်းလေဆိပ် (လဝက) က ဖမ်းဆီးလိုက်ခြင်း ဖြစ်သည်။

 

၎င်းအမျိုးသမီးသည် ရန်ကုန်လေဆိပ်မှ တရားဝင်ထွက်ခွာလာခြင်းဖြစ်ပြီး နိုင်ငံကူးလက်မှတ်ကိုလည်း တရားဝင်ကိုယ်တိုင်လုပ်ကိုင်ခဲ့ခြင်းဖြစ်ကြောင်း အမှုလိုက်ပါဆောင်ရွက်ပေးနေသူက ဆက်ပြောသည်။ နိုင်ငံကူးလက်မှတ် စကင်ဖတ်မရပါကလည်း ထိုင်းလဝက အနေဖြင့် မြန်မာသံရုံးတာဝန်ရှိသူများထံတွင် မေးမြန်းသင့်ကြောင်း၊ ယခုကဲ့သို့ ထောင်ထဲတန်းပို့ဆောင်ခြင်းသည် တာဝန်မဲ့ရာရောက်သည်ဟု ဆိုသည်။ 

 

ရန်ကုန်လေဆိပ်က သေချာစစ်ဆေးပြီးမှ ထွက်ခွာလာခြင်းဖြစ်သည့်အတွက် ရန်ကုန်လေဆိပ်မှ တာဝန်ကျ အဖွဲ့များ အနေဖြင့်လည်းတာဝန်ရှိကြောင်း ၎င်းကပြောသည်။ လတ်တလော ဆမူပကန်ထောင်တွင် ရောက်ရှိနေပြီး ကွာရန်တင်း ၂၁ရက် ဝင်နေသည့်အတွက် တွေ့ခွင့်မရသေးဘဲ ကွာရန်တင်းပြီးမှ အမှုကိစ္စ ဆက်လက်ဆောင်ရွက်ရမည်ဖြစ်ကြောင်း သိရသည်။ 

 

အဆိုပါ အသက် ၂၀ ရွယ်ရှိအမျိုးသမီးမှာ မင်းတပ်မြို့နယ်မှ ချင်းအမျိုးသမီးဖြစ်ပြီး တိုက်ပွဲများကြောင့် မိဘနှစ်ပါးလုံး ဆုံးရှုံးထားရသူလည်းဖြစ်သည်။ မင်းတပ်မြို့မှ ရန်ကုန်သို့တက်လာပြီး အရှေ့အလယ်ပိုင်း နိုင်ငံတစ်ခုတွင် အလုပ်သွားလုပ်ရန် ရန်ကုန်မှ ဘန်ကောက်မြို့သို့ ထွက်ခွာလာစဉ် ယင်းကဲ့သို့ ဖမ်းဆီး ထိန်းသိမ်း ခံရခြင်းဖြစ်သည်။

 

📌📌 ၄။ ငွေလွှဲငွေထုတ် လုပ်မယ့်သူတွေ မှတ်ပုံတင်မဖြစ်မနေယူဆောင်လာဖို့ Wave Money ထုတ်ပြန်

မိုဘိုင်းငွေရေးကြေးရေး ၀န်ဆောင်မှုလုပ်ငန်း စည်းမျဥ်းစည်းကမ်းတွေအရ ငွေလွှဲ၊ ငွေထုတ်လုပ်ငန်းစဥ်တွေ ပိုမိုလုံခြုံ စိတ်ချရစေဖို့ လုံခြုံရေးအဆင်မြှင့်တင် ဆောင်ရွက်ပေးနေပြီး ဒီလို အဆင်မြှင့်တင် လုပ်ဆောင်ချက်တွေအရ Wave ဆိုင်တွေမှာ ငွေလွှဲ၊ ငွေထုတ်ဝန်ဆောင်မှုပြုလုပ်မယ်ဆိုရင် မှတ်ပုံတင် မဖြစ်မနေယူလာပြီး အချက်အလက်အပြည့်အစုံကို ဖြည့်စွက်ဖို့လိုအပ်ကြောင်း Wave Money က စက်တင်ဘာ ၈ ရက်မှာ ထုတ်ပြန်လာပါတယ်။ အဲဒီလိုပြုလုပ်မှသာ ငွေလွှဲ၊ ငွေထုတ်လုပ်ငန်းစဥ်တွေ ဆောင်ရွက်နိုင်မှာဖြစ်ပြီး Wave Money ငွေလွှဲခြင်း၊ ငွေထုတ်ခြင်းလုပ်ငန်းတွေအားလုံးအတွက် မှတ်ပုံတင်ယူဆောင်လာဖို့ လုံးဝမမေ့လျော့ဖို့ဆိုပြီး ဆက်လက် ပါရှိပါတယ်။

 

ဗဟိုဘဏ်က ပြီးခဲ့တဲ့လအတွင်း မိုဘိုင်းလ်ငွေလွှဲငွေထုတ်ဝန်ဆောင်မှုလုပ်ငန်းဆောင်ရွက်တဲ့ ဆိုင်တွေမှာ စီစီတီဗီကင်မရာတွေ တပ်ဆင်ထားဖို့နဲ့ ငွေလွှဲ၊ ငွေထုတ် ဝန်ဆောင်မှုလာရောက်ပြုလုပ်သူတွေကိုလည်း လျှို့ဝှက်ကင်မရာနဲ့ ဓာတ်ပုံမှတ်တမ်းရယူထားဖို့ဆိုတဲ့ညွှန်ကြားချက်မျိုး ရှိထားပါတယ်။ 

 

#RadioNUGLocalNews

#SpringRevolution