3rd SEP 2022 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၂ စက်တင်ဘာလ ( ၃ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ တစ်လကြာ သီးမြစ်တိုက်ပွဲ စစ်ကောင်စီတပ်သား ၆၀ဦး ထက်မနည်းသေဆုံးဟု CNF ထုတ်ပြန်

ဇူလိုင် ၃၀ ရက်နေ့က စတင်ဖြစ်ပွားသော တိုက်ပွဲတွင် စစ်ကောင်စီတပ်ဖက်မှ ၆၀ ဦး ထက်မနည်းသေဆုံးခဲ့ပြီး ဒဏ်ရာရရှိသူ အများအပြားရှိကြောင်း CNF က သြဂုတ် ၃၁တွင် သတင်းထုတ်ပြန်သည်။ ဟားခါး ထန်တလန်မြို့အကြား သီးမြစ်တံတားကို ပြန်လည်တည်ဆောက်ကာ စစ်အင်အားဖြည့်တင်းရန်ကြိုးစားနေသည့် စစ်ကောင်စီတပ်ကို CNA, CDF ဟားခါး, CDF လောမ်တူ, CDF ထန်တလန်, CDF မရာ, CDF ဇိုဖိုင်နှင့် CJDC တပ်ဖွဲ့၀င်တို့က ပြန်လည် ခုခံတိုက်ခိုက်ခဲ့ကြောင်း ၎င်းထုတ်ပြန်ချက်အရ သိရသည်။ 

 

အဆိုပါ ရက်ပေါင်း ၃၀ ခန့်ကြာတိုက်ပွဲတွင် စစ်ကောင်စီတပ်သား ၆၀ ဦးခန့် သေဆုံးနိုင်ပြီး CDF ဟားခါးမှ ရဲဘော်တစ်ဦး အသက်ဆုံးရှုံးကာ အခြားကာကွယ်ရေးတပ်ဖွဲ့ဝင် ၅ဦး မစိုးရိမ်ရသည့် ဒဏ်ရာရရှိခဲ့ကြောင်းလည်း ဖော်ပြထားသည်။ လက်ရှိတွင် စစ်ကောင်စီတပ်နှင့် ဒေသခံကာကွယ်ရေးပူးပေါင်းတပ်တို့ တိုက်ပွဲဆက်လက်ပြင်းထန်နေပြီး ကလေးမြို့၊ ဖလမ်းမြို့ဘက်မှ စစ်ကောင်စီက ကုန်းကြောင်း၊ လေကြောင်းဖြင့် လူအင်အား၊ လက်နက်အင်အားဖြည့်တင်းလျက် ရှိသည်။

 

📌📌 ၂။ ကန်ပက်လက်မြို့နယ် ပြည်သူ့အုပ်ချုပ်ရေး၊ ဝန်ထမ်းရေးရာဌာနမှ CDM ဝန်ထမ်းများအား ချီးမြှင့်ငွေပေးအပ်ရန် ကံစမ်း မဲလက်မှတ်ရောင်းချ

ကန်ပက်လက်မြို့နယ် ပြည်သူ့အုပ်ချုပ်ရေး၊ ဝန်ထမ်းရေးရာဌာနက ကန်ပက်လက်မြို့နယ်အတွင်းရှိ CDMဝန်ထမ်းများအား ချီးမြှင့်ငွေပေးအပ်နိုင်ရန်ရည်ရွယ်ပြီး စက်တင်ဘာ ၁ မှ စက်တင်ဘာ ၃၀ အထိ ကံစမ်းမဲလက်မှတ် ရောင်းချမည်ဟု ဩဂုတ် ၂၉ ထုတ်ပြန်သည်။ 

 

ဆုမဲများအနေဖြင့် ပထမဆု iPhone 13 (Pink)၊ ဒုတိယဆု စိန်နှင့် ပုလဲ လော့ကပ် ၊ တတိယဆု Apple Watch အပြင်၊အထူးဆု ငါးလိပ်ကျောက်အိတ်၊ နှစ်သိမ့်ဆုကို မြန်မာပိုးဝမ်းဆက်တစ်စုံ အသီးသီးသတ်မှတ်သည်။ မဲရောင်းချမည့် ကာလကို စက်တင်ဘာ ၁ ရက်မှ စက်တင်ဘာ ၃၀ အထိ မဲစောင်ရေ ၃ဝ၀၀ အထိရည်ရွယ်ထားကာ မဲလက်မှတ် တစ်စောင် လျှင် မြန်မာကျပ်ငွေ ၁၀၀၀၀ ဖြစ်ကြောင်း သိရသည်။

 

စစ်အာဏာရှင်ကို တော်လှန်ပြီး ယနေ့အထိ အခက်အခဲများစွာ တွန်းလှန်တိုက်ပွဲဝင်နေသည့် ကန်ပက်လက်မြို့နယ်မှ CDM ဝန်ထမ်းများအား ဂုဏ်ပြုချီးမြှင့်ငွေ ပေးအပ်နိုင်ရန်အတွက် ပြည်တွင်း၊ ပြည်ပမှ မိဘပြည်သူများအနေဖြင့် ယခုရန်ပုံငွေ အစီအစဉ်တွင် ပါဝင် ကြရန် ကန်ပက်လက်မြို့နယ်ပြည်သူ့အုပ်ချုပ်ရေးအဖွဲ့က ထုတ်ပြန်ထားသည်။

 

📌📌 ၃။ လက်နက်အပြည့်အစုံဖြင့် CDM ဝင်သော ရဲတပ်သားကို The Youth Force က ကျပ်သိန်း ၇၀ ချီးမြှင့်

ဆောမြို့ ရဲစခန်းမှ ရဲတပ်သားတစ်ဦး ယမန်နေ့က လက်နက်အပြည့်အစုံဖြင့် ယောဒေသအခြေစိုက် The Youth Force (Saw& Kyaukhtu) အဖွဲ့ထံ CDM ပြုလုပ်လာပြီး ကာကွယ်ရေးအဖွဲ့မှ ငွေ ကျပ်သိန်း ၇၀ ဖြင့် ဂုဏ်ပြုချီးမြှင့်ခဲ့ကြောင်း သိရသည်။

 

ဆောမြို့ ရဲစခန်းမှ ရဲတပ်သား ဉာဏ်မင်းသည် ၂၀၁၇ ခုနှစ်မှစတင်ကာ ရဲတပ်သားတာဝန်ကို ထမ်းဆောင်ခဲ့သူဖြစ်ပြီး ၂၀၂၂ ခုနှစ် သြဂုတ် ၃၁ တွင် CDM ပြုလုပ်ခဲ့ခြင်းဖြစ်သည်။ ၎င်းနှင့်အတူ ဗုံးသီး ၄ လုံး၊ ကျည် ၃၀၀ တောင့်၊ G3 တစ်လက်နှင့် ကျည်ဘောက် ၂ ခုဖြင့် CDM ဝင်ရောက်လာခြင်း ဖြစ်သည်ဟုလည်း The Youth Force (Saw& Kyaukhtu) ၏ ထုတ်ပြန်ချက်တွင်ဖော်ပြသည်။

 

📌📌 ၄။ သန်လျင်တပ်တွင်း ပစ်ခတ်မှု ဗိုလ်ကြီးအဆင့်ရှိသူ အပါအဝင် ၉ ဦး သေဆုံး၊ ပစ်ခတ်သူကို ပိုက်စိတ်တိုက်ရှာဖွေနေ

 

ရန်ကုန်မြို့၊ သန်လျင်မြို့နယ်၊ စစ်ပင်ကွင်းကျေးရွာတွင် သြဂုတ် ၃၁ ညပိုင်းက တာဝန်ကျ စစ်သားချင်း ပစ်ခတ်မှုဖြစ်ပွား၍ ဗိုလ်ကြီး အပါအဝင် ၉ ဦး သေဆုံးသွားသည်ဟု Myanmar Now သတင်းဌာနက ရေးသားသည်။ ယမန်နေ့ည ၁၀ နာရီ ခွဲကျော်အချိန်က ခိုက်ရန်ပွဲဖြစ်ပြီးနောက် စစ်သား ၂ ဦးက အခြားစစ်သည်များနှင့် မိသားစုဝင်များကို ပစ်ခတ်ခဲ့ခြင်းဖြစ် သည်ဟု ဆိုသည်။ 

 

ယင်းပစ်ခတ်မှုအတွင်း ဗိုလ်ကြီးအဆင့်ရှိသူ ၁ ဦး၊ စစ်သား ၆ ဦးနှင့် မိသားစုဝင်အမျိုးသမီး ၂ ဦးသေဆုံး၊ တပ်သား တစ်ဦးနှင့် ၁၀ နှစ်သားအရွယ်သားဖြစ်သူတို့ စိုးရိမ်ရ ဒဏ်ရာရသည်ဟုလည်း ဖော်ပြထားသည်။ ပစ်ခတ်ခဲ့သူတစ်ဦးမှာ တပ်သား အဆင့်ရှိသူဖြစ်ပြီး လက်ရှိတွင် လက်နက်၊ ခဲယမ်းများနှင့်အတူ ထွက်ပြေးလွတ်မြောက်နေကြောင်း သိရသည်။ 

 

📌📌 ၅။ မလေးရှားနိုင်ငံမှအပ အာဆီယံနိုင်ငံအားလုံးကို ပြည်ဝင်ခွင့်ဗီဇာ ကင်းလွတ်ခွင့်ပြုသွားလို့ စစ်ကောင်စီ နိုင်ငံခြားရေး ဝန်ကြီးဌာနထုတ်ပြန်

မလေးရှားနိုင်ငံကလွဲ၍ ကျန်တဲ့အာဆီယံနိုင်ငံအားလုံးကို စက်တင်ဘာ ၁ ရက်နေ့စပြီး ပြည်ဝင်ခွင့် ဗီဇာကင်းလွတ်ခွင့် ပြုသွားမယ်လို့ စစ်ကောင်စီ နိုင်ငံခြားရေးဝန်ကြီးဌာနက သြဂုတ် ၃၁ ရက်နေ့ ထုတ်ပြန်လိုက်ပါတယ်။ ပြည်ဝင်ခွင့်ဆိုင်ရာ ကန့်သတ်မှုများကို အာဆီယံအဖွဲ့ဝင်နိုင်ငံများအနက် ဖိလစ်ပိုင်နိုင်ငံ၊ ကမ္ဘောဒီးယားနိုင်ငံ၊ ထိုင်းနိုင်ငံ၊ စင်ကာပူနိုင်ငံ၊ အင်ဒိုနီးရှားနိုင်ငံ၊ လာအိုနိုင်ငံ၊ ဗီယက်နမ်နိုင်ငံနှင့် ဘရူနိုင်းဒါရူဆလမ်နိုင်ငံတို့မှ မြန်မာနိုင်ငံနှင့် နှစ်နိုင်ငံအကြား သံတမန်/ အထူးနှင့် သာမန်နိုင်ငံကူးလက်မှတ် ကိုင်ဆောင်ထားသူများအတွက် နှစ်နိုင်ငံ ပြည်ဝင်ဗီဇာ ကင်းလွတ်ခွင့်စာချုပ်ပါ စည်းမျဉ်းစည်းကမ်းများနှင့်အညီ ပြည်ဝင်ဗီဇာကင်းလွတ်ခွင့်ကို လာမယ့် စက်တင်ဘာ ၁ ရက်နေ့ကစပြီးတော့ ပြန်လည် ခွင့်ပြုပေးသွားမယ်လို့ဆိုပါတယ်။ 

 

စစ်ကောင်စီရဲ့ အာဏာသိမ်းမှုကို ကန့်ကွက်ရှုံ့ချပြီး အမျိုးသားညီညွတ်ရေး အစိုးရ NUG နဲ့ တရားဝင်ဆက်ဆံနေတဲ့ မလေးရှားနိုင်ငံကိုတော့ ပြည်ဝင်ခွင့်ဗီဇာကင်းလွတ်ခွင့်ကို စစ်ကောင်စီဘက်က ခွင့်ပြုထားခြင်းမရှိပါဘူး။ 

#RadioNUGLocalNews

#SpringRevolution