8th OCT 2022 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၂ အောက်တိုဘာလ ( ၈ ) ရက်နေ့ နောက်ဆုံးရပြည်တွင်းသတင်းများ

📌📌 ၁။ မင်းတပ် ခလရ ၂၇၄ တပ်ရင်းဂိတ် ထပ်မံတိုက်ခိုက်ခံရ၊ အသေပျောက်များနိုင်ပြီး အတည်ပြုနေဆဲဟု CDF မင်းတပ် ပြော

မင်းတပ်မြို့ပေါ်နယ်မြေခံတပ်ရင်း ၂၇၄ ရဲ့ အနောက် သုံးမိုင်ဂိတ်ကို CDF မင်းတပ်က အနီးကပ်တိုက်ခိုက်ခဲ့တယ်လို့ သိရပါတယ်။ အောက်တိုဘာ ၅ရက် မနက်အစောပိုင်းက နှစ်ကြိမ်တိုင်တိုင် တိုက်ခိုက်ခဲ့တာဖြစ်ပြီး စစ်ကောင်စီတပ်သား အသေ ပျောက်များနိုင်တယ်လို့ CDF မင်းတပ်က တရားဝင် ထုတ်ပြန်လာပါတယ်။

 

အနီးကပ်တိုက်ခိုက်မှုအပြီး CDF မင်းတပ် ကာကွယ်ရေးတပ်ဖွဲ့ဝင်တွေ ဘေးကင်းကင်းနဲ့ တပ်ဆုတ်နိုင်ခဲ့ပေမယ့် စစ်ကောင်စီရဲ့ ရမ်းသန်းပစ်ခတ်မှုကြောင့် အနောက်ရပ်ကွက်မှာရှိတဲ့ ပြည်သူပိုင်နေအိမ်တစ်လုံး ထပ်မံထိခိုက် ပျက်စီး ရတယ်လို့လည်း အဲဒီထုတ်ပြန်ချက်မှာ ဖော်ပြထားပါတယ်။ 

 

📌📌 ၂။ ဒုတိယအကြိမ်ပြည်သူ့ညီလာခံကို သတ်မှတ်ချိန်အတိုင်း မကျင်းပနိုင်ခြင်း မှာ နွေဦးတော်လှန်ရေးအားကောင်းရန် ပြင်ဆင်နေ၍ဖြစ်ကြောင်း NUCC ထုတ်ပြန်

ဒုတိယအကြိမ် မြောက် ပြည်သူ့ညီလာခံကို သတ်မှတ်အချိန်အတိုင်း မကျင်းပနိုင်ခြင်း မှာ နွေဦးတော်လှန်ရေး အားကောင်းရန် ပြင်ဆင်နေ၍ဖြစ်ကြောင်း အမျိုးသားညီညွတ် ရေး အတိုင်ပင်ခံ ကောင်စီ NUCC က အောက်တိုဘာ ၃ ရက် နေ့ ရက်စွဲနဲ့ ထုတ်ပြန်လာပါတယ်။

 

ပြည်သူ့ညီလာခံကို ဖက်ဒရယ် ဒီမိုက ရေစီ ပဋိညာဉ်အရ ခြောက်လတစ်ကြိမ်ကျင်းပရန် သတ်မှတ်ထားခဲ့ ကြောင်း၊ ပြီးခဲ့သည့် ဇန်နဝါရီ လတွင် ပထမအကြိမ် ပြည်သူ့ ညီလာခံ ကျင်းပခဲ့ပြီး နွေဦး တော်လှန် ရေးအတွက် အ ရေးကြီးသည့် ဆုံးဖြတ်ချက်များ ချမှတ်နိုင်ခဲ့ ကြောင်း အဲဒီထုတ်ပြန်ချက်မှာဖော်ပြထားပါတယ်။

 

ဒုတိယအကြိမ် ပြည်သူ့ညီလာခံကို ၂၀၂၂ ဇူလိုင်မှာ ကျင်းပဖို့ ဖြစ် ပေမဲ့ နိုင်ငံရေးဖြစ်ထွန်းမှုဖြစ်စဉ်များအရ နွေဦးတော်လှန်ရေးအား ပိုမိုအားကောင်းလာစေရန်အတွက် သုံးသပ်ပြင်ဆင်မှုများ လုပ်ဆောင်ရန်ရှိလာ၍ ဒုတိယအကြိမ် ပြည်သူ့ညီလာခံကိုသတ်မှတ်ထားသည့်အတိုင်း ကျင်းပရန်အခက်အခဲဖြစ်ခဲ့ရကြောင်းလည်း ဆိုပါတယ်။

 

တော်လှန်ရေးပိုမိုအားကောင်းလာစေဖို့ သုံးသပ်ပြင်ဆင်မှုများ အမြန်ဆုံး လုပ်ဆောင်ပြီးစီးသည်နဲ့တစ်ပြိုင်နက် NUCC ရဲ့ ဒုတိယအကြိမ် ပြည်သူ့ညီလာခံအား ကျင်းပသွားရန် တိုင်းရင်းသား ပြည်သူတစ်ရပ်လုံးအား လေးစားစွာအသိပေးအပ်ပါ ကြောင်း NUCC ရဲ့ ထုတ်ပြန်ချက်မှာ ဖော်ပြထားပါတယ်။ 

 

📌📌 ၃။ ကျောက်ထုအမြောက်တပ်က လက်နက်ကြီးပစ်ခတ်မှုကြောင့် ပန်းဆန်ဒေသခံ ပြည်သူခြောက်ဦး ပြင်းထန်ဒဏ်ရာရ

 

မကွေးတိုင်း ကျောက်ထုအမြောက်တပ်က အောက်တိုဘာ ၂ရက် ညပိုင်းတွင် လက်နက်ကြီးဖြင့် ပစ်ခတ်မှုကြောင့် ပန်းဆန်ဒေသခံ ပြည်သူခြောက်ဦး လက်နက်ကြီးထိမှန်ဒဏ်ရာရရှိခဲ့သည်ဟု သိရသည်။

ကျောက်ထုမြို့အနီးရှိ ပန်းဆန်ရွာ၌ ဟောပြောပွဲပြုလုပ်နေစဉ် ပစ်ခတ်ခံရခြင်းဖြစ်သည်ဟု ဒေသခံများက ဆိုသည်။ ဒဏ်ရာရသူများအနက် အမျိုးသမီး သုံးဦးပါဝင်ကာ စိုးရိမ်ရဒဏ်ရာရရှိသူ တချို့ရှိသည်ဟူ၍လည်း သိရသည်။ 

စစ်ကောင်စီတပ်များသည် ထိုနေ့တွင်လည်း ဆောမြို့နယ်အတွင်း စစ်ကြောင်းထိုး လှုပ်ရှားမှုများရှိနေကြောင်း ယောအလင်းတန်းက သတင်းထုတ်ပြန်ထားသည်။

 

စစ်ကောင်စီတပ်များ နှော်၊ လယ်ဆော၊ ကြီးကျေးရွာ၊ ပန်းဆန်၊ သရက်ချဉ်ကျေးရွာဘက်လည်း စစ်ကြောင်းထိုး လာနိုင် သည့်တွက် အနီးအနား ကျေးရွာရှိ မိဘပြည်သူများ လုံခြုံရေး၊ ဘေးအန္တရာယ်ကင်းရှင်းရေးတို့ကို အထူးဂရုစိုက်ကြရန်၊ ကျောက်ထု - ထီးလင်း ကားလမ်းတစ်လျှောက် ဖြတ်သန်းသွားလာခြင်းမပြုရန် ယောအလင်းတန်းက အသိပေး ထားသည်။

 

📌📌 ၄။ မင်းတပ်မြို့နယ် ပြည်သူ့အုပ်ချုပ်ရေးအဖွဲ့၊ မြို့နယ်ပညာရေးဘုတ်အဖွဲ့၏ ကမ္ဘာ့ဆရာများနေ့ (World Teacher's Day) အခမ်းအနားကျင်းပ

မင်းတပ်မြို့နယ် ပြည်သူ့အုပ်ချုပ်ရေးအဖွဲ့၊ မြို့နယ်ပညာရေးဘုတ်အဖွဲ့၏ ဦးဆောင်မှုဖြင့်ဖွင့်လှစ်သော အထက်တန်း ကျောင်းတစ်ကျောင်းတွင် ကမ္ဘာ့ဆရာများနေ့ (World Teacher's Day) အခမ်းအနားကို အောက်တိုဘာ ၅ ရက်‌နေ့တွင် ကျင်းပခဲ့သည်ဟု မင်းတပ်မြို့နယ် ပြည်သူ့အုပ်ချုပ်ရေးအဖွဲ့က ထုတ်ပြန်သည်။

 

အခမ်းအနားတွင် မင်းတပ်မြို့နယ်ပြည်သူ့အုပ်ချုပ်ရေးအဖွဲ့၏ အတွင်းရေးမှူး ၁၊ မြို့နယ်ပညာရေးဌာန တာဝန်ခံ အကြီး အကဲ၊ တပ်မဟာမှူး - ချင်းကာကွယ်ရေးတပ်ဖွဲ့ (CDF-MINDAT)၊ တိုက်နယ် ၁ တိုက်နယ်ပြည်သူ့အုပ်ချုပ်ရေးမှူးတို့မှ အသီးသီးမိန့်ခွန်းပြောကြားခဲ့ပြီး ကျောင်းသူ/သားများနှင့် ဆရာ/မများက ချင်းရိုးရာအကဖြင့် ဖျော်ဖြေတင်ဆက်ခဲ့ကြ သည်။ 

 

ကမ္ဘာ့ဆရာများနေ့ အထိမ်းအမှတ် စာစီစာကုံးပြိုင်ပွဲ၊ အားကစားပြိုင်ပွဲများကို ကျင်းပခဲ့ကာ အနိုင်ရရှိသူ ထူးချွန်သူများ၊ အားကစားအသင်းများကိုလည်း ဂုဏ်ပြုဆုများပေးအပ်ခဲ့ကြသည်ဟု ထုတ်ပြန်ကြေညာချက်တွင်ပါရှိသည်။

 

📌📌 ၅။ မတူပီမြို့ အဝင်အထွက် ပိတ်ဆို့စစ်ဆေးမှုကြောင့် ဒေသခံတွေ အခက်တွေ့

 

ချင်းပြည်နယ်တောင်ပိုင်း မတူပီမြို့မှာ ပြီးခဲ့တဲ့ စက်တင်ဘာ ၁၉ ရက်နေ့ကစလို့ စစ်ကောင်စီတပ်က မြို့အဝင်အထွက်ကို ပိတ်ထားတာကြောင့် မတူပီမြို့ကို စားသောက်ကုန်စည် မရောက်တာ သုံးပတ်နီးပါးရှိနေပြီး စားသောက်ကုန်တွေ ပြတ်လပ်မှာကို စိုးရိမ်နေရတယ်လို့ ဒေသခံတွေက ပြောပါတယ်။

 

စက်တင်ဘာလကုန်ပိုင်းက မတူပီမြို့အနီးမှာ စစ်ကောင်စီတပ်နဲ့ မတူပီဒေသကာကွယ်ရေးတပ်ဖွဲ့တို့ တိုက်ပွဲ ဖြစ်ပွားခဲ့ ပြီးနောက် စစ်ကောင်စီတပ်က အခုလို မြို့အဝင်အထွက်ပိတ်ထားတာဖြစ်ပြီး ခရီးသွားလာခွင့်နဲ့ ကုန်ပစ္စည်းသယ်ယူခွင့်ပါ ကန့်သတ်ခံထားရတယ်လို့ ဒေသခံတွေက ပြောပါတယ်။

 

လက်ရှိ မတူပီမြို့ပေါ်က ဈေးဆိုင်တချို့မှာ စက်သုံးဆီ ပြတ်လပ်နေပြီး စားသောက်ကုန်ဈေးတွေလည်း တက်နေတယ်လို့ မြို့ခံတစ်ဦးက ပြောပါတယ်။ 

 

"ဒီဇယ်၊ ဓာတ်ဆီတွေက ၀ယ်ချင်တိုင်း၀ယ်မရဘူး။ တချို့ဆိုင်တွေမှာ ပြတ်နေပြီ။ ဆန်၊ ဆီ၊ ဆားတွေလည်း ဈေးနည်းနည်း တက်တယ်။ ဒီတိုင်းဆက်ပိတ်ထားရင်တော့ စားသောက်ကုန်က ပြတ်တော့မှာ" မတူပီမြို့အဝင် မတူပီ - ပလက်ဝလမ်း၊ မတူပီ - ဟားခါးလမ်း၊ မတူပီ - မင်းတပ်လမ်း စတဲ့ လမ်း သုံးလမ်းပြီး အဲဒီလမ်းတွေအားလုံးမှာ စစ်ကောင်စီတပ်က ဂိတ်ချပြီး အသွားအလာတွေကို ပိတ်ဆို့စစ်ဆေးနေတာလို့ ဒေသခံတွေက ပြောပါတယ်။

 

မတူပီမြို့ ပတ်လည်မှာလည်း စစ်ကောင်စီတပ်က အလံနီ ထောင်ထားတာရှိပြီး နေ့တိုင်းလိုလို လက်နက်ကြီးနဲ့ သေနတ်ပစ်သံတွေ ကြားနေရတယ်လို့ ဒေသခံတွေက ပြောပါတယ်။

 

ပြီးခဲ့တဲ့ စက်တင်ဘာ၁၉ ရက်နေ့ကနေ ၂၉ ရက်နေ့အတွင်း မတူပီဒေသကာကွယ်ရေးတပ်ဖွဲ့နဲ့ စစ်ကောင်စီတပ်တို့ လေးကြိမ် တိုက်ပွဲဖြစ်ခဲ့ပြီး စစ်ကောင်စီတပ်သား ၁၉ ဦးသေဆုံးပြီး မတူပီ ဒေသကာကွယ်ရေးတပ်ဖွဲ့က တစ်ဦး သေဆုံး တယ်လို့ မတူပီဒေသကာကွယ်ရေးတပ်ဖွဲ့က ပြောပါတယ်။ 

#RadioNUGLocalNews

#SpringRevolution