11th FEB 2023 - (Ethnic language program-CHO_DAAI) by Radio NUG ~ Newsletter by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ ဖေဖော်ဝါရီလ ( ၁၁ ) ရက်နေ့ နောက်ဆုံးရပြည်တွင်းသတင်းများ

📌📌 ၁။ ထန်တလန် ရဲစခန်းတစ်ခုကို CNA နှင့် CDF ပူးပေါင်းတပ်ဖွဲ့များက သိမ်းပိုက်၊ လက်နက် (၄၀) ကျော်ရရှိ၊ CNA တပ်ဖွဲ့ဝင် တစ်ဦး အသက်ဆုံးရှုံး

ချင်းပြည်နယ် ထန်တလန်မြို့နယ်ထဲက ရဲစခန်း တစ်ခုကို ချင်းအမျိုးသားတပ်ဦး CAN နှင့် CDF ပူးပေါင်း တပ်ဖွဲ့ဝင်များက ဖေဖော်ဝါရီ ၈ ရက် ညပိုင်း (၁၀း၀၀) နာရီဝန်းကျင်မှာ သွားရောက် တိုက်ခိုက်ခဲ့ပြီး ဖေဖော်ဝါရီ ၉ ရက် မနက် (၁း၀၀) ဝန်းကျင်မှာ အဆိုပါ ရဲစခန်းကို သိမ်းပိုက်နိုင်ခဲ့တယ်လို့ ချင်းဒေသတွင်းသတင်းရင်း မြစ်တွေက ဖော်ပြပါတယ်။

ဒီထန်တလန်ရဲ စခန်းကို သိမ်းပိုက်ပြီး လက်နက်ပေါင်း (၄၀) လက် သိမ်းဆည်းရမိခဲ့တယ်လို့ သိရပါတယ်။ အလားတူ စစ်အသုံး အဆောင်တွေနဲ့ ဒရုန်းပစ် လက်နက်၊ လက်ပစ်ဗုံးစတာတွေကိုလည်း သိမ်းဆည်းရမိခဲ့တယ်လို့ ဆိုပါတယ်။ စစ်ကောင်စီဘက် တိုက်လေယာဉ်တွေနဲ့ လာရောက်ပစ်ခတ်လျက်ရှိတယ်လို့ မျက်မြင်ဒေသခံ တစ်ဦးက The Mindat Post ကို ပြောပါတယ်။

“စစ်ကောင်စီဘက်က ဒီမနက် (၇း၃၀) လောက်မှာ ဂျက်ဖိုက်တာနဲ့ လာချသွားတာ၊ လုံလဲတပ်စခန်း အဟောင်းပေါ်ကျ တယ်၊ တတိယအကြိမ် ပျံလာတဲ့အချိန် ချတာ။” လို့ ပြောပါတယ်။

ပြီးခဲ့တဲ့ ဇန်နဝါရီ ၃၁ ရက်နေ့မှာလည်း CNA နဲ့ CDF ပူးပေါင်းတပ်ဖွဲ့ဝင်တွေက ထန်တလန်မြို့ CB ဘဏ်မှာ တပ်စွဲထားတဲ့ စစ်ကောင်စီ တပ်သားနဲ့ ရဲတပ်ဖွဲ့ဝင် ၆ ဦးကို လက်နက်နဲ့ အတူ ဖမ်းဆီးခဲ့ပါတယ်။ စစ်ကောင်စီကလည်း ဖေဖော်ဝါရီလ ပထမပတ်မှာ ထန်တလန်မြို့နယ်အတွင်းတိုက်လေယာဉ်ပျံသန်းပြီး ဗုံးကြဲတိုက်ခိုက် တာတွေ ဆက်တိုက်ပြုလုပ်နေတာ ဖြစ်ပါတယ်။

ပြီးခဲ့တဲ့ ဇန်နဝါရီလ ၁၀ ၊ ၁၁ ရက်နေ့တွေမှာ စစ်ကောင်စီက ချင်းအမျိုးသားတပ်ဦး ဌာနချုပ် တည်ရှိရာ ဝိတိုရိယစခန်းကို ဗုံးကြဲတိုက်ခိုက်ခဲ့ပြီးတဲ့နောက် ထန်တလန်မြို့နယ်တွင်းမှာ အခုလို တိုက်ပွဲတွေ ပြင်းထန်လာတာ ဆက်စပ်မှု ရှိတယ်လို့ ချင်းနိုင်ငံရေး သုံးသပ်သူတစ်ဦးက ပြောပါတယ်။

========================

📌📌 ၂။ ဇိုတုန်နယ်မှာ စစ်ကောင်စီနှင့် CDF-ဇိုတုန်တို့ တိုက်ပွဲပြင်းထန်၊ စစ်ကောင်စီရဲ့ လက်နက် ၂ လက်သိမ်းဆည်းရမိတယ်လို့ CDF-ဇိုတုန် ထုတ်ပြန်

စစ်ကောင်စီတပ်နဲ့ ဇိုတုန်ဒေသကာကွယ်ရေးတပ်ဖွဲ့၊ ပူးပေါင်းတပ်ဖွဲ့တွေကြား ဖေဖော်ဝါရီ ၈ ရက် နေ့လယ် ၁၂း၀၀ နာရီကနေ မွန်းလွဲ ၂း၀၀ ဝန်းကျင်အထိ တိုက်ပွဲဖြစ်ပွားခဲ့တယ်လို့ သိရပါတယ်။

ဒီတိုက်ပွဲမှာ စစ်ကောင်စီတပ်ဘက်က အကျအဆုံးများပြီး CDF-ဇိုတုန် တပ်ဖွဲ့ဝင်တွေက စစ်ကောင်စီရဲ့ လက်နက်ငယ် ၂ လက် သိမ်းဆည်းရမိခဲ့တယ်လို့ CDF-ဇိုတုန်က ထုတ်ပြန်ချက် အမှတ် (၅/၂၀၂၃) နဲ့ သတင်းထုတ်ပြန်ထားပါတယ်။ CDF- ဇိုတုန်နဲ့ ပူးပေါင်းတပ်ဖွဲ့ဝင်တွေဘက်မှာ ထိခိုက် ဒဏ်ရာရရှိမှု တစ်စုံတရာမရှိဘူးလို့ ထုတ်ပြန်ချက်မှာ ဖော်ပြထား ပါတယ်။

စစ်ကောင်စီတပ်ဖွဲ့ဝင်တွေဟာ ရေဇွာမြို့ကနေ မိုင် ၂၀ ခန့်အကွာအဝေးရှိတဲ့ ဇိုတုန်ရွာတစ်ရွာမှာ တပ်စွဲပြီး ညအိပ်ရပ် နားနေကြပြီး ဇိုတုန်ဒေသတွင်းမှာ တိုက်ပွဲတွေဆက်လက် ပြင်းထန်လာနိုင်တာကြောင့် ပြည်သူလူထုအနေနဲ့ ရေဇွာ-မတူပီ ကြား ခရီးသွားလာခြင်း မပြုလုပ်ကြဖို့ CDF-ဇိုတုန်က အသိပေးထုတ်ပြန်ထားပါတယ်။

မကြာသေးခင် ရက်ပိုင်းအတွင်းမှာပဲ တပ်ရင်းမှူး တစ်ဦး တိုက်ပွဲမှာကျဆုံးခဲ့တယ်လို့ CDF-ဇိုတုန် က ထုတ်ပြန်ထားတာပါ။ CDF-ဇိုတုန်ကို ၂၀၂၁ ဧပြီ ၅ ရက်နေ့မှာ စတင်ဖွဲ့စည်းခဲ့ပြီး (Zotung, Zophei, Lautu, Mara နဲ့ Senthang) စတဲ့ ချင်းမျိုးနွယ်စု ကာကွယ်ရေးတပ်ဖွဲ့ ဖွဲ့ ပူးပေါင်း ဖွဲ့စည်းထားတဲ့ ZZLMS အဖွဲ့ဝင်လည်း ဖြစ်ပါတယ်။

========================

📌📌 ၃။ မင်းတပ်မြို့အဝင် စစ်ကောင်စီဂိတ် တိုက်ခိုက်ခံရပြီးတဲ့နောက် အသက်မပြည့်သေးတဲ့ကလေးအပါအဝင် ၄ ဦးဖမ်းဆီး ခံရ

မင်းတပ်မြို့ အရှေ့ပြင်ရပ်ကွက်က စစ်ကောင်စီရဲ့ ဂိတ်တစ်ခု ပစ်ခတ်တိုက်ခိုက်ခံရပြီးတဲ့နောက် စစ်ကောင်စီက ပြည်သူ ၄ ဦး ဖမ်းဆီးထားတယ်လို့ သိရပါတယ်။ ဖေဖော်ဝါရီ ၈ ရက် မနက်စောစော မြို့အဝင်ဂိတ် ပစ်ခတ်ခံရတာလို့ အရှေ့ပြင်ရပ်ကွက်တွင်း နေထိုင်သူ တစ်ဦးက The Mindat Post ကို ပြောပါတယ်။

“မနက်စောစောပဲ၊ အသံဆက်တိုက် ကြားရတာ၊ သူတို့ဘက်က တစ်ယောက် ထိတယ်လို့တော့ ကြားထားတယ်၊ အတိကျတော့မပြောတတ်ဘူး။ ခုမြို့တွင်းမှာ အစစ်ဆေးကြပ်နေတယ်” ဆိုပြီး သူက ပြောပါတယ်။

စစ်ကောင်စီရဲ့ မြို့အဝင်ဂိတ်တိုက်ခိုက်ခံရအပြီးမှာ ဂိတ်စောင့်တွေရဲ့ ရမ်းသမ်းပစ်ခတ်တာကြောင့် အသက် ၁၀ နှစ်ဝန်း ကျင်ကလေးတစ်ဦး ကျည်ဆံထိမှန်ဒဏ်ရာရတယ်လို့ နောက်ဆက်တွဲ စုံစမ်းသိရပါတယ်။ ဒီဖြစ်စဥ် ဖြစ်ပွားပြီးတဲ့နောက် အရှေ့ပြင်၊ နမ့်ထားရပ်ကွက်အနီးအနားက အသက်မပြည့်သေးတဲ့ ကလေးတစ်ဦးအပါအဝင် ပြည်သူ ၄ ဦးကို စစ်ကောင်စီက မတရားဖမ်းဆီးထားတယ်လို့လည်း ကနဦးသိရပါတယ်။

စစ်ကောင်စီရဲ့ မင်းတပ်မြို့အဝင်ဂိတ်တိုက်ခိုက်ခံရတာကြောင့် မင်းတပ် - ကျောက်ထု ကားလမ်းပိုင်းမှာ အစစ်အဆေး ကြပ်နေပြီး၊ ခရီးစဥ်တချို့ပါ ဖျက်သိမ်းထားရတဲ့ အခြေအနေရှိနေပါတယ်။

“မနက်က ကိစ္စကြောင့် အောက်ပြည်ဆင်းမယ့် လိုင်းကားတွေ မသွားဖြစ်တော့ဘူး၊ ဘယ်တတ်နိုင်မလဲ” လို့ ခရီးသွားပြည်သူတစ်ဦးက The Mindat Post ကို ပြောပါတယ်။

ဖေဖော်ဝါရီ ၈ ရက်နေ့ မနက် စစ်ကောင်စီဂိတ် တိုက်ခိုက်ခံရတဲ့ ဖြစ်စဥ်နဲ့ပတ်သက်ပြီး CDF မင်းတပ်က တစုံတရာ တရားဝင်ထုတ်ပြန်ထားတာမျိုး မရှိသေးပါဘူး။ နောက်ပြီး ဒီစစ်ဆင်ရေးကို ဘယ်ဒေသခံကာကွယ်ရေးတပ်ဖွဲ့က ပြုလုပ်ခဲ့လဲဆိုတာကိုလည်း ဆက်သွယ်ရေး တယ်လီဖုန်းလိုင်း အခက်အခဲတွေကြောင့် The Mindat Post အနေနဲ့ သီးခြားအတည်မပြုနိုင်သေးပါဘူး။

ပြီးခဲ့တဲ့ ၂၀၂၂ စက်တင်ဘာလကုန်ပိုင်းက မြို့တွင်း ဝါဒဖြန့် ဈေးရောင်းပွဲပြုလုပ်တဲ့ စစ်ကောင်စီရဲ့ မြို့အဝင်ဂိတ်တစ်ခုကို CDF မင်းတပ်က ပစ်ခတ်မှုတချို့နဲ့ သတိပေးခဲ့ဖူးပါတယ်။

========================

📌📌 ၄။ NUG နိုင်ငံခြားရေးဝန်ကြီး ဒေါ်ဇင်မာအောင်နဲ့ ယူကေနိုင်ငံခြားရေးဝန်ကြီးတို့ တွေ့ဆုံ

နိုင်ငံခြားရေးဝန်ကြီး ဒေါ်ဇင်မာအောင်နဲ့ ယူကေနိုင်ငံခြားရေးဝန်ကြီး James Cleverly တို့ ယူကေနိုင်ငံခြားရေးဝန်ကြီးရုံးမှာ ဖေဖော်ဝါရီ ၆ ရက်နေ့ ယူကေစံတော်ချိန် ညနေ ၃ နာရီခွဲက တွေ့ဆုံဆွေးနွေးပွဲ ပြုလုပ်ခဲ့တယ်လို့ NUG နိုင်ငံခြားရေး ဝန်ကြီးဌာနက သတင်းထုတ်ပြန်ပါတယ်။

ဒီတွေ့ဆုံဆွေးနွေးပွဲမှာ မြန်မာပြည်အရေးနဲ့ ပတ်သက်ပြီး နှစ်နိုင်ငံပူးပေါင်းဆောင်ရွက်ရေး၊ စစ်အုပ်စုရဲ့ အကြမ်းဖက်မှု ရပ်တန့်ဖို့ ဆောင်ရွက်နိုင်ရေး၊ လူနည်းစု လူမျိုးများအရေးနဲ့ တခြားသော အကြောင်းအရာတွေ ဆွေးနွေးခဲ့ကြတယ်လို့ ဆိုပါတယ်။

နိုင်ငံခြားရေးဝန်ကြီးဌာန ပြည်ထောင်စုဝန်ကြီး ဒေါ်ဇင်မာအောာင်ရဲ့ ယူကေခရီးစဉ်အတွင်း တခြားသက်ဆိုင်ရာ တာဝန်ရှိ သူတွေနဲ့ မြန်မာ့အရေး ပူးပေါင်းဆောင်ရွက်နိုင်ဖို့အတွက် တွေ့ဆုံဆွေးနွေးမှုတွေ ဆက်လက်ပြုလုပ်သွားမှာ ဖြစ်တယ်လို့ လည်း NUG နိုင်ငံခြားရေးဝန်ကြီးဌာနက သတင်းထုတ်ပြန်ထားပါတယ်။