18th FEB 2023 - (Ethnic language program-CHO_DAAI) by Radio NUG ~ Newsletter by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ ဖေဖော်ဝါရီလ ( ၁၈ ) ရက်နေ့ နောက်ဆုံးရပြည်တွင်းသတင်းများ

📌📌 ၁။ စစ်ကောင်စီတပ်သားတစ်ဦး CDF ကန်ပက်လက်ထံ လက်နက်နဲ့ အလင်းဝင်

ချင်းပြည်နယ်၊ ကန်ပက်လက်မြို့မှာ တာဝန်ထမ်းဆောင်နေတဲ့ စစ်ကောင်စီတပ်ရင်း ခမရ - ၃၀၄ လက်အောက်ခံတပ်သား လင်းထက်အောင်၊ ကိုယ်ပိုင်အမှတ် - တသ ၁၂၇၈၆၈ ဟာ ပြီးခဲ့တဲ့ ဇန်နဝါရီ ၃၀ ရက်နေ့က လက်နက်နဲ့ အတူ အလင်းဝင်ရောက်လာတယ်လို့ CDF-Kanpetlet က ဖေဖော်ဝါရီလ ၁၂ ရက် နေ့စွဲနဲ့ သတင်းထုတ်ပြန်လာပါတယ်။

စစ်ကောင်စီတပ်သားဟောင်း လင်းထက်အောင် ယူဆောင်လာတဲ့ လက်နက်နဲ့ ဆက်စပ် ပစ္စည်းတွေကတော့- MA 1 - ၁လက်၊ MAကျည် - ၃၃၆တောင့်၊ နင်းမိုင်း - ၁လုံး၊ လက်ပစ်မိုင်း - ၁လုံး၊ အီနာဂါ - ၂လုံး၊ စကားပြောစက် - ၁လုံး၊ ကျည်ကာအင်္ကျီ - ၁ထည် စုစုပေါင်း (၇) မျိုးပါရှိတယ်လို့ သတင်းထုတ်ပြန်ချက်မှာ ပါရှိပါတယ်။

ပြည်သူနှင့် ပူးပေါင်းလိုသော မည်သည့်ရဲနှင့် တပ်မတော်သားများကိုမဆို CDF-Kanpetletက နွေးထွေးစွာ ဖိတ်ခေါ်လျက် ရှိကြောင်းလည်း ဆိုပါတယ်။

ခမရ - ၃၀၄ ဟာ မတူပီမြို့အခြေစိုက် ခြေမြန်တပ်ရင်းဖြစ်ပြီး တပ်ရင်းတွင်းမှာရှိတဲ့ တပ်သားတွေဟာ ဒေသခံကာ ကွယ်ရေးတပ်ဖွဲ့တွေဖြစ်တဲ့ CDF-Matupi, CDF-Mindat နဲ့ CDF-Kanpetlet တပ်ဖွဲ့တွေဆီမှာ လက်နက်နဲ့ အတူ မကြာခဏ အလင်းဝင်ရောက်မှုတွေရှိနေတာ ဖြစ်ပါတယ်။

========================

📌📌 ၂။ မင်းတပ်မြို့ရှိ အမျိုးသမီးများကို စစ်ကောင်စီတပ်ဖွဲ့ဝင်များက လိင်ပိုင်းဆိုင်ရာ အမြတ်ထုတ်မှုများရှိနေ၊ အတင်းအဓမ္မ ကိုယ်ဝန်ဖျက်ချစေခြင်းနှင့် အလိုမရှိဘဲမွေးဖွားလာသည့် ကလေးငယ်များကို အရှင်လတ်လတ် မြေမြှုပ် သင်္ဂြိုဟ်မှုများပါ ရှိနေ

မင်းတပ်မြို့တွင်းမှာရှိနေတဲ့ အမျိုးသမီးတွေကို စစ်ကောင်စီတပ်ဖွဲ့ဝင်တွေက လိင်ပိုင်းဆိုင်ရာ အမြတ်ထုတ်မှုများရှိနေပြီး၊ အတင်းအဓမ္မ ကိုယ်ဝန်ဖျက်ချစေခြင်းနှင့်အလိုမရှိဘဲ မွေးဖွားလာတဲ့ ကလေးငယ်များကို အရှင်လတ်လတ် မြေမြှုပ် သင်္ဂြိုဟ်နေမှုတွေပါရှိနေတယ်လို့ ချင်းကာကွယ်ရေးတပ်ဖွဲ့ CDF မင်းတပ်က ဖေဖော်ဝါရီလ ၁၁ ရက်နေ့ ညဦးပိုင်းမှာ သတင်းထုတ်ပြန်လာပါတယ်။

ထုတ်ပြန်ချက်သတင်းမှာ CDF မင်းတပ်က မင်းတပ်မြို့အရှေ့ပြင်ရပ်ကွက်နေ အမျိုးသမီး ၂ ဦးကို စစ်ဆေးမေးမြန်းခဲ့တယ် လို့ ဆိုပါတယ်။ စစ်ဆေးမေးမြန်းမှုတွေအရ စစ်ကောင်စီ/ရဲတပ် ဖွဲ့ဝင်တွဟာ မင်းတပ်မြို့မှာရှိတဲ့ အမျိုးသမီးတွေကို လိင်ပိုင်းဆိုင်ရာ အမြတ်ထုတ်မှုတွေ ပြုလုပ်ပြီး အမျိုးသမီးတွေကို အတင်းအဓမ္မ ကိုယ်ဝန် ဖျက်ချစေခြင်း၊ အလိုမရှိဘဲ မွေးဖွားလာတဲ့ ကလေးငယ်တွေကို အရှင်လတ်လတ် မြေမြှုပ် သင်္ဂြိုဟ်တာမျိုးတွေ ကျူးလွန်နေကြောင်း သိရှိရတယ်လို့ CDF မင်းတပ်က ဆိုပါတယ်။

CDF မင်းတပ်အနေနဲ့ စစ်ကောင်စီ/ရဲတပ်ဖွဲ့ဝင်တွေရဲ့ ပြစ်မှုကျူးလွန်မှုတွေ၊ ကျူးလွန်သူတွေကို အရေးယူနိုင်ဖို့ သက်သေ အထောက်အထားများ စုဆောင်းခြင်းနှင့် စစ်ဆေးမေးမြန်းမှုကို ဆက်လက် ဆောင်ရွက်လျက်နေတယ်လို့လည်း သိရပါတယ်။ ပြီးခဲ့တဲ့ ဇန်နဝါရီ ၉ ရက်နေ့မှာ မင်းတပ် နယ်မြေခံ တပ်ရင်း ခလရ (၂၇၄) တပ်ဖွဲ့ဝင်တွေက မင်းတပ်မြို့နယ် တိုက်နယ် အမှတ် (၃) လီလောင်းကျေးရွာက အသက် ၁၇ နှစ်အရွယ် အမျိုးသမီးငယ်လေးကို သတ်ဖြတ်ခဲ့ပြီး ဖေဖော်ဝါရီ ၈ ရက်နေ့မှာလည်း စစ်ကောင်စီတပ်သားတွေရဲ့ ပစ်ခတ်မှုကြောင့် ၁၀ နှစ်အရွယ် ကလေးငယ်တစ်ဦး အသက်ဆုံးရှုံးခဲ့ ရပါတယ်။

========================

📌📌 ၃။ ဟားခါး အ ခြေစိုက် ခလရ (၂၆၆) မှ စစ် ကောင်စီ တပ်ဖွဲ့ဝင် နှစ်ဦး လ-က်နက် နှင့်အတူ CDF-Senthang ထံအလင်းဝင်

ဟားခါးမြို့ အ ခြေစိုက် ခလရ (၂၆၆) မှ စစ် ကောင်စီ တပ်ဖွဲ့ဝင် နှစ်ဦး လ-က်နက် နှင့်အတူ ဖေ ဖော်ဝါရီလ ၁၆ ရက် နေ့က အလင်းဝင် ရောက် လာကြ တယ်လို့ CDF-Senthang က ဖေ ဖော်ဝါရီလ ၁၆ ရက်ရက်စွဲနဲ့ သတင်းထုတ်ပြန်လာပါတယ်။

MA2 သေနတ် (စစ်တပ်အ ခေါ် - စက်က လေး) တစ်လက်၊ ကျည်အိမ် ၅ ခု ၊ ကျည် ထောင့် တချို့ ၊ လက်ပစ်ဗုံး ၄လုံး၊ ထောင်မိုင်း ၊ နင်းမိုင်းများ ယူ ဆောင်လာကြတယ်လို့ သိရပါတယ်။

အခုလို အလင်းဝင် ရောက်လာတဲ့ စစ် ကောင်စီ တပ်ဖွဲ့ဝင် ၂ ဦး ကိုထိုက်တန်တဲ့ဆု ငွေ ချီးမြှင့်ပြီး လုံခြုံတဲ့နေရာကို ပို့ ဆောင်ခဲ့ပြီး ဖြစ်တယ်လို့ CDF- Senthang သတင်းနှင့်ပြန်ကြား ရေးဌာန ရဲ့ ထုတ်ပြန်ချက်မှာ ဖော်ပြထားပါတယ်။

========================

📌📌 ၄။ ကန်အစိုးရက မြန်မာပြည် သူများအတွက် ဒေါ်လာသန်း ၅၀ ထပ်မံ ထောက်ပံ့သွားမည်

အမေရိကန်ပြည်ထောင်စုက မြန်မာပြည်သူတွေအတွက် လူသားချင်းစာနာထောက်ထားမှုဆိုင်ရာ အကူအညီတွေအတွက် အမေရိကန်ဒေါ်လာ သန်း (၅၀) အသစ်ထပ်မံ ထောက်ပံ့ဖို့ ရှိကြောင်း ဖေဖော်ဝါရီလ ၁၅ ရက်နေ့ ရက်စွဲနဲ့ သတင်းထုတ် ပြန်လိုက်ပါတယ်။

မြန်မာနိုင်ငံနိုင်ငံမှာ လက်ရှိဖြစ်ပျက်နေတဲ့ နေရပ်စွန့်ခွာရမှုများ၊ လက်နက်ကိုင် ပဋိပက္ခများနှင့် စားနပ်ရိက္ခာ ပိုမိုရှားပါး လာမှုတွေကြောင့် ပိုမိုခက်ခဲ ကျပ်တည်းလာတဲ့ဒေသတွေအတွက် လူသားချင်းဆိုင်ရာ အကူအညီအဖြစ် အရေးပေါ် စားနပ်ရိက္ခာနှင့် အာဟာရ အထောက်အပံ့များအတွက် အမေရိကန် နိုင်ငံတကာဖွံ့ဖြိုးရေးအေဂျင်စီ (USAID)ကတဆင့် ဒေါ်လာ သန်း ၅၀ ကို အသစ်ထပ်မံထောက်ပံ့သွားမှာ ဖြစ်တယ်လို့ ဆိုပါတယ်။

ကမ္ဘာ့ကုလသမဂ္ဂက ထုတ်ပြန်ခဲ့တဲ့ လူသားချင်းစာနာမှုဆိုင်ရာ လိုအပ်ချက်များအပေါ် ခြုံငုံသုံးသပ်ချက်အရ မြန်မာနိုင်ငံ လူဦးရေ ၁၇ သန်းကျော်ဟာ လူသားချင်းစာနာမှုဆိုင်ရာ အထောက်အပံ့များကိုလိုအပ်လျက်ရှိတယ်လို့ ဆိုပါတယ်။

မြန်မာနိုင်ငံသား လူသုံးဦးမှာ တစ်ဦးဟာ ယခု ၂၀၂၃ ခုနှစ်တွင်းမှာ လူသားချင်းစာနာမှုဆိုင်ရာ အထောက်အပံ့များကို လိုအပ်လျက်ရှိနေတာ ဖြစ်ပါတယ်။ ၂၀၂၀ ခုနှစ်အတွင်းမှာတော့ ယခုကဲ့လို အကူညီလိုအပ်သူ လူဦးရေ တစ်သန်း တောင်မရှိခဲ့ဘူးလို့ ထုတ်ပြန်ချက်မှာ ဖော်ပြထားပါတယ်။

ယခုလို ထောက်ပံ့မှုဟာ USAID နှင့် ကုလသမဂ္ဂ ကမ္ဘာ့စားနပ်ရိက္ခာ အစီအစဉ်နှင့်အတူ ပဋိပက္ခ ဖြစ်ပွားလျက်ရှိတဲ့ ပြည်နယ်တွေက လူပေါင်း ၇၅၀,၀၀၀ကျော်ကို အာဟာရချို့တဲ့မှု ကုစားဖို့နှင့် ကာကွယ်ဖို့အတွက် ကူညီနိုင်မှာ ဖြစ်တယ်လို့ သိရပါတယ်။

ဒီအကူအညီမှာ လစဉ်စားနပ်ရိက္ခာ ခွဲတမ်းများပေးအပ်ခြင်း နှင့် အသက်ငါးနှစ်အောက် ကလေးငယ်များ၊ ကိုယ်ဝန်ဆောင် မိခင်များနှင့် နို့တိုက်မိခင်များအတွက် အာဟာရဖြစ်စားသုံးကုန်များပေးအပ်ခြင်း စတာတွေ ပါဝင်မှာဖြစ်တယ်လို့ သိရပါတယ်။