25th MAR 2023 - (Ethnic language program-CHO_DAAI) by Radio NUG ~ Newsletter by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ မတ်လ ( ၂၅ ) ရက်နေ့ နောက်ဆုံးရပြည်တွင်းသတင်းများ

📌📌 ၁။ မတူပီမှာ ၂ ရက်ဆက်တိုက် တိုက်ပွဲပြင်းထန်၊ စစ်ကောင်စီဘက် အ‌သေများ

မတူပီမြို့နယ်၊ ထယ်ဘွေးစခန်းကို အင်အားဖြည့်တင်းဖို့လာတဲ့ စစ်ကောင်စီတပ်ကို ကြားဖြတ်တိုက်၊ခိုက်ခဲ့တယ်လို့ CDF မတူပီက မတ်လ ၂၁ ရက်နေ့ သတင်းထုတ်ပြန်ပါတယ်။

ကား ၃ စီးနဲ့ အင်အား ၈၀ ဝန်းကျင်ပါ စစ်ကောင်စီစစ်ကြောင်းကို CDF မတူပီက မတ်လ ၂၀၊ မတ်လ ၂၁ ရက်နေ့တွေမှာ နေရာ ၂ နေရာခွဲ တိုက်ခိုက်ခဲ့တာလို့ သတင်းထုတ်ပြန်ထားပါတယ်။

ဒီတိုက်ခိုက်မှုမှာ စစ်ကောင်စီတပ်သား ၁၂ ယောက် ‌သေပြီး ထိခိုက်ဒဏ်ရာရသူများတယ်လို့လည်း ဆိုပါတယ်။

တိုက်ခိုက်မှုအပြီး CDF မတူပီကာကွယ်ရေးတပ်ဖွဲ့ဝင်တွေ အထိခိုက်မရှိဆုတ်ခွာနိုင်ပေမယ့် ဗျူဟာတပ်စခန်းကနေ မတူပီ မြို့နယ်၊ ဝလီပီကျေးရွာကို လက်နက်ကြီးပစ်ခတ်တာမျိုးရှိတယ်လို့ ပြောပါတယ်။

တော်လှန်ရေးအင်အားစုအတွက် လိုအပ်တဲ့ လက်နက်၊ ခဲယမ်းဝယ်ယူနိုင်ရန်ဆက်လက်ပါဝင်ပေးကြဖို့ကိုလည်း CDF မတူပီက တိုက်တွန်းထားပါတယ်။

========================

၂။ CNA နဲ့ YPDF အကြား ကာကွယ်ရေးဆိုင်ရာ နားလည်မှုစာချွန်လွှာ လက်မှတ်ထိုး

ချင်းအမျိုးသားတပ်မတော် (CNA) နဲ့ ယောဒေသ ပြည်သူ့ကာကွယ်ရေးတပ်ဖွဲ့ (YPDF) အကြား ကာကွယ်ရေးဆိုင်ရာပူးပေါင်း ဆောင်ရွက်ရေး နားလည်မှုစာချွန်လွှာ (MoU) ကို လက်မှတ်ရေးထိုးခဲ့တယ်လို့ ယောဒေသ ပြည်သူ့ကာကွယ်ရေး တပ်ဖွဲ့က သတင်းထုတ်ပြန်ပါတယ်။

မတ်လ ၂၁ ရက်နေ့မှာ ချင်းအမျိုးသားတပ်ဦးဌာနချုပ် Victoria Base မှာ သဘောတူလက်မှတ်ရေးထိုးတာလို့ ဆိုပါတယ်။

နွေဦးတော်လှန်ရေးကာလ ပြီးဆုံးတဲ့အထိ စစ်အာဏာရှင် အမြစ်ဖြတ်တိုက်ထုတ် တော်လှန်ရေး၊ ကိုယ့်ကံကြမ္မာ ကိုယ်ဖန် တီးခွင့်ရရှိရေးအတွက် နှစ်ဘက်အင်အားစု ပူးပေါင်းဆောင်ရွက်ဖို့ စတဲ့အချက်တွေကို စာချွန်လွှာမှာ ထည့်သွင်း ထားပါတယ်။

ဒီနားလည်မှုစာချွန်လွှာကို ချင်းအမျိုးသားတပ်မတော် (CNA) စစ်ဦးစီးချုပ်၊ ကာကွယ်ရေးဌာန တာဝန်ရှိသူတွေနဲ့ ယောဒေသ ပြည်သူ့ကာကွယ်ရေးတပ်ဖွဲ့ (YPDF) ဗဟိုဦးဆောင်ကော်မတီ ဥက္ကဌ ရဲဘော်ယောလေး၊ တပ်ဖွဲ့တာဝန်ရှိ သူတွေက တက်ရောက်လက်မှတ်ရေးထိုးခဲ့တယ်လို့လည်း သိရပါတယ်။

ယောဒေသ ပြည်သူ့ကာကွယ်ရေးတပ်ဖွဲ့ (YPDF) ဟာ ယောဒေသ၊ ယောလူမျိုးအကျိုးကို အမှန်တကယ်ရရှိရေး၊ စစ်အာဏာရှင်အမြစ်၊ဖြတ်ရေးလိုလားသူတွေနဲ့ စုဖွဲ့ထားတဲ့ ယောဒေသအခြေစိုက် တော်လှန်ရေးအင်အားစုဖြစ် ပါတယ်။

========================

၃။ တော်လှန်ရေးအရှိန်မြှင့်တင်သွားမှာဖြစ်ပြီး စစ်အုပ်စုနဲ့ ပူးပေါင်းတာ၊ အခွင့်အရေးတောင်းဆိုတာမျိုး အထူးရှောင်ရှားဖို့ CNF တိုက်တွန်း

ချင်းအမျိုးသားတွေ ဆုံးရှုံးနစ်နာခဲ့ရတဲ့ အခွင့်အရေးအတွက် နိုင်ငံရေး၊ စစ်ရေး၊ သံတမန်ရေးလှုပ်ရှားမှု အရှိန်တိုးမြှင့် တိုက်ပွဲဝင် သွားရမှာဖြစ်ပြီး ပြည်သူတွေအနေနဲ့ တော်လှန်ရေးမှာ ကျွမ်းကျင်မှုအလိုက် လက်တွဲတိုက်၊ပွဲဝင်ဖို့ ချင်းအမျိုး သားတပ်ဦး/ တပ်မတော်က အသိပေးတိုက်တွန်းပါတယ်။

မတ်လ ၂၀ ရက်နေ့မှာ ကျရောက်တဲ့ (၃၅) နှစ်မြောက် ချင်းတော်လှန်ရေးနေ့မှာ အခုလိုထုတ်ပြန်ကြေညာလိုက်တာပါ။

ဒီအချိန်မှာ စစ်ကောင်စီနဲ့ ပူးပေါင်းလုပ်ဆောင်တာ၊ အခွင့်အရေးတောင်းဆိုတာတွေကို အထူးရှောင်ရှားရန်ကြဖို့ကိုလည်း ချင်း အမျိုးသားတပ်ဦး/တပ်မတော်က အလေးအနက်တိုက်တွန်းထားပါတယ်။

စစ်အုပ်စုရဲ့ အာဏာသိမ်းအကြမ်းဖက်တာတွေကြောင့် ပြည်သူတွေ ဆုံးရှုံးရတဲ့ လူမှုဘ၀ပြန်လည်ထူထောင်ရေးအတွက် နိုင်ငံရေးဦးတည်ချက်၊ ယုံကြည်ချက်၊ ခံယူချက်တူညီတဲ့ အဖွဲ့အစည်း လူပုဂ္ဂိုလ်တွေပါဝင်စေပြီး ချင်းပြည်အတွင်း အုပ်ချုပ် ရေး၊ လုံခြုံရေးနဲ့ တရားဥပဒေစိုးမိုးရေးကို တဆင့်ချင်းစီ အကောင်အထည်ဖော်သွားမယ်လို့ ဆိုပါတယ်။

ဒါ့အပြင် ချင်းအမျိုးသားတပ်ဦး/တပ်မတော်အနေနဲ့ ပြည်သူ့တော်လှန်ရေးလမ်းစဉ်ကို အခိုင်အမာကိုင်စွဲထားပြီး စစ်အာဏာ ရှင်စနစ် အမြစ်ပြတ်ချေမှုန်းရေးနဲ့ ဖက်ဒရယ်ဒီမိုကရေစီစနစ် တည်ဆောက်ရေးအတွက် နိုင်ငံရေးရပ်တည်ချက် တူညီတဲ့ အဖွဲ့အစည်း၊ လူမျိုးပုဂ္ဂိုလ်အားလုံးနဲ့ လက်တွဲတိုက်ပွဲဝင်သွားမယ်လို့ အခိုင်အမာဖော်ပြထားပါတယ်။

တော်လှန်ရေးကာလအတွင်း အသက်ပေးလှူတဲ့ အာဇာနည် ရဲဘော် ရဲမေ၊ ချင်းအမျိုးသားပြည်သူအားလုံးကို ဦးညွှတ်ဂါရ၀ပြု ကြောင်းနဲ့ စစ်အာဏာရှင်အုပ်စု အာဏာသိမ်းမှုကြောင့် လူမှုဒုက္ခပေါင်းစုံနဲ့ ရင်ဆိုင်နေရတဲ့ ချင်းပြည်သူအပါအဝင် တနိုင်ငံလုံးက ပြည်သူလူထုအားလုံးကို စာနာနားလည်ကြောင်းလည်း ချင်းအမျိုးသားတပ်ဦး/တပ်မတော်ရဲ့ (၃၅) နှစ်မြောက် ချင်းတော်လှန်ရေးနေ့ ထုတ်ပြန်ကြေညာချက်မှာ ဖော်ပြထားပါတယ်။

========================

၄။ NCCD က မင်းတပ်မြို့နယ်၊ ကျေးရွာ ၁၈ ရွာကို စားနပ်ရိက္ခာဖြန့်ဝေ

Network for Chin Community Development (NCCD) က ၂၀၂၃ ဖေဖော်ဝါရီလအတွင်း မင်းတပ်မြို့နယ်၊ ကျေးရွာ ၁၈ ရွာက စစ်ဘေးရှောင်ပြည်သူတွေအတွက် စားနပ်ရိက္ခာဖြန့်ဝေပေးခဲ့တယ်လို့ သိရပါတယ်။

Network for Chin Community Development (NCCD) အနေနဲ့ စစ်ဘေးရှောင်ပြည်သူတွေအတွက် ချင်းပြည်နယ်မှာ ပထမဆုံးအကြိမ် ရိက္ခာဖြန့်ဝေပေးတာဖြစ်ပြီး မင်းတပ်မြို့နယ်၊ မတူပီမြို့နယ်၊ ကလေးမြို့နယ်နဲ့ မီဇိုရမ်ပြည်နယ်က စစ်ဘေး ရှောင်ပြည်သူတွေကို ထောက်ပံ့ပေးတာလို့ (NCCD) တာဝန်ရှိသူတစ်ဦးက ပြောပါတယ်။

“ကျနော်တို့ မင်းတပ်နယ်၊ မတူပီနယ်နဲ့ ကလေးဘက်ရယ် မီဇိုရမ်ထဲက စစ်ရှောင်တွေကို ကူညီနိုင်ခဲ့တယ်။ နောက်လည်း တခြား မြို့နယ်တွေအတွက် ကြိုးစားသွားဖို့ ရှိပါတယ်။” လို့ ပြောပါတယ်။

၂၀၂၃ ဖေဖော်ဝါရီလထဲမှာ Network for Chin Community Development (NCCD) က မင်းတပ်မြို့နယ် ကျေးရွာ ၁၈ ရွာ၊ မတူပီမြို့နယ် ကျေးရွာ ၅ ရွာ၊ ကလေးမြို့နယ် စစ်ရှောင်စခန်း ၄ ခုနဲ့ မီဇိုရမ်ပြည်နယ် စစ်ရှောင်စခန်း ၄ ခုက ပြည်သူတွေကို စားနပ်ရိက္ခာဖြန့်ဝေပေးခဲ့တာလည်း ဖြစ်ပါတယ်။