4th MAR 2023 - (Ethnic language program-CHO_DAAI) by Radio NUG ~ Newsletter by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ မတ်လ ( ၄ ) ရက်နေ့ နောက်ဆုံးရပြည်တွင်းသတင်းများ

📌📌 ၁။ မင်းတပ်မှာ စစ်ကောင်စီရဲ့လက်နက်ကြီးကျည်ကြောင့် ကလေးတစ်ဦးအပါအဝင် လေးဦးအသက်ဆုံးရှုံး

မင်းတပ်မြို့နယ်၊ တိုက်နယ်အမှတ် (၄) အမ်လောင်းကျေးရွာအနီး စစ်ကောင်စီ လက်နက်ကြီးကျည်ကျပြီး ကလေးတစ်ဦး အပါအဝင် လေးဦး အသက်ဆုံးရှုံးတယ်လို့ သိရပါတယ်။ ဖေဖော်ဝါရီ ၂၅ ရက် ညပိုင်းမှာ မင်းတပ်မြို့အခြေစိုက် ခလရ (၂၇၄) တပ်ရင်းကနေ လက်နက်ကြီးနဲ့ တရစပ်ပစ်တာလို့ မြေပြင်နဲ့ နီးစပ်သူက ဆိုပါတယ်။

“လေးယောက်ထိတယ်၊ မိသားစုတစ်စုထဲက ကလေးတစ်ယောက် သူ့မိဘနှစ်ယောက်လုံး၊ နောက်ရဲဘော်တစ်ယောက်ပေါ့၊ သူက စစ်ရှောင်တွေ၊ ဆေးအဖွဲ့ကိုလည်း လိုက်ကူနေကျ” လို့ ဆိုပါတယ်။

ဖေဖော်ဝါရီ ၂၅ ရက်နေ့ည စစ်ကောင်စီရဲ့ လက်နက်ကြီးပစ်ခတ်မှုကြောင့် ရဲဘော်တစ်ဦးနဲ့ နောက်ထပ်မိသားစုဝင်သုံးဦး အသက်ဆုံးရှုံးတယ်လို့ ချင်းကာကွယ်ရေးတပ်၊ မင်းတပ်က သတင်းထုတ်ပြန်ပါတယ်။

စစ်ကောင်စီရဲ့ ခလရ (၂၇၄) တပ်ရင်းက ပစ်တဲ့လက်နက်ကြီးကြောင့် အသက်ဆုံးရှုံးရသူတွေနဲ့ ပြင်းထန်ဒဏ်ရာရပြီး ဆေးကုသနေရတဲ့သူတွေ ရှိ သေးတယ်လို့လည်း နောက်ထပ်သတင်းအရင်းမြစ်က ဆိုပါတယ်။

“ဆုံးသွားတဲ့ မိသားစုထဲက ကလေးရယ်၊ နောက်ရွာထဲကတချို့ ဒဏ်ရာပြင်းသူတွေရှိသေးတယ်။ လောလောဆယ်တော့ တတ်နိုင်သလောက် ကုပေးနေတယ်” လို့ ပြောပါတယ်။

စစ်ကောင်စီဟာ ဒီနှစ်အစောပိုင်းကတည်းက မြို့အရပ်လေးမျက်နှာမှာရှိတဲ့ ကျေးရွာတိုင်းကို လက်နက်ကြီးနဲ့ ရမ်းသမ်းပစ်ခတ် နေတာပါ။ ပြည်သူတွေနေထိုင်တဲ့ ကျေးရွာထဲ ဒီလိုပစ်ခတ်တာမျိုးကို မင်းတပ်မြို့၊ အနောက်ရပ်ကွက် စစ်ကောင်စီရဲ့ ခလရ (၂၇၄) တပ်ရင်းက ဟောင်ဝစ်ဇာအမြောက်နဲ့ အများဆုံးပြုလုပ်နေတာလည်း ဖြစ်ပါတယ်။

========================

📌📌 ၂။ တူမီးထီအစီအစဥ်ကနေ CDF မင်းတပ်အတွက် ရန်ပုံငွေ ကျပ် သုံးဆယ့်လေးသိန်းဝန်းကျင်ရရှိ

CDF မင်းတပ်အတွက် ရည်ရွယ်ထားတဲ့ တူမီးထီအပတ်စဥ် (၁၀) ကနေ ထီအစောင်ရေ (၃၁၇) စောင် ရောင်းချနိုင်ခဲ့တယ်လို့ တူမီးထီက မတ်လ ၁ ရက်နေ့မှာ ကြေညာပါတယ်။ တူမီးထီရောင်းရငွေကနေ USD 1185 ကို CDF မင်းတပ်အတွက် ရန်ပုံငွေအနေနဲ့ ရရှိထားတာလို့ ဆိုပါတယ်။

ဒါ့ပြင် CDF မင်းတပ်အတွက် တူမီးထီအစီအစဥ်ကနေတဆင့် ပါဝင်ငွေ ကျပ် ၄၀၀၀၀ဝိ/- (လေးသိန်းကျပ်တိတိ) ကို ထပ်မံလက် ခံရရှိထားတယ်လို့လည်း ဖော်ပြထားပါတယ်။

“ခုနောက်ပိုင်း ကျနော်တို့ တော်လှန်ရေးအင်အားစုတွေအပေါ် အားဖြည့်ပေးတဲ့အစဉ်ပြောင်းပြီးတော့ ပထမဆုံးအနေနဲ့ CDF မင်းတပ်အတွက်ကြိုတင်ကြေညာပြီးမှ အခက်ခဲများစွာကြားထဲကနေ ထီထိုးပြီးပါဝင်အားဖြည့်ပေးကြတဲ့တွက် ဝမ်းသာရ သလို၊ ဒီတူမီးထီဆိုတာက အလှူခံတာသက်သက် တစ်ခုတည်းမဟုတ်ဘဲ စနစ်တစ်ခုကို ပုံဖော်ရင်းလှုပ်ရှားတဲ့ဟာလည်း ဖြစ်တယ်” လို့ ချင်းရန်ပုံ‌ငွေအဖွဲ့ (CRFP) အတွင်းရေးမှူး Salai Dokhar က ပြောပါတယ်။

ခုလာမယ့် မတ်လ အပတ်စဥ် (၁၁) ကနေ ရရှိမယ့် ရန်ပုံငွေတွေကိုလည်း ထန်တလန်အတွက် အားဖြည့်ပါဝင်သွားမှာဖြစ်လို့ ဆက်လက်ပါဝင်ပေးကြဖို့ကို သူက ဖိတ်ခေါ်ပါတယ်။တူမီးထီအစီအစဥ်အနေနဲ့ တော်လှန်ရေးမှာ လှုပ်ရှားနေကြတဲ့ ချင်းတော်လှန်ရေးအင်အားစုတွေဆီ အုတ်တစ်ချပ် သဲတစ်ပွင့်အနေနဲ့ ထပ်မံပါဝင်နိုင်ဖို့ကြိုးစားနေတာကြောင့် ပါဝင်အားဖြည့်ပေးကြတဲ့ တော်လှန်ပြည်သူ၊ ထောက်ပို့ပြည်သူအားလုံး တူမီးထီမိသားစုက ကျေးဇူးတင်တဲ့အကြောင်းလည်း ဖော်ပြထားပါတယ်။

========================

📌📌 ၃။ ဆောမြို့နယ်မှာ အရပ်သား ၂၆ ဦးကျော် ဖမ်းဆီးခံရ

ဆောမြို့နယ်၊ သရက်ချဉ်ရွာက အရပ်သား ၂၆ ဦးကို စစ်ကောင်စီတပ်က ဖေဖော်ဝါရီ ၂၅ ရက်မှာ ဖမ်းဆီးခေါ်ဆောင်သွားပြီး ငါးရက်အကြာ မတ်လ ၁ ရက် ဒီကနေ့အထိ လွတ်မြောက်လာတာမရှိသေးဘူးလို့ RFA သတင်းတစ်ပုဒ်မှာ ဖော်ပြထားပါတယ်။ ဖမ်းဆီးခံရသူတွေထဲမှာ သက်ကြီးရွယ်အို၊ မသန်စွမ်း၊ အမျိုးသမီး၊ သုံးလအရွယ်နဲ့ သုံးနှစ်အရွယ်ကလေးတွေပါဝင်ပြီး သရက်ချဉ်နဲ့ သုံးမိုင်လောက်ဝေးတဲ့ အမြောက်တပ်ရှိရာ ကျောက်ထုမြို့ လေယာဉ်ကွင်းထဲကို ခေါ်ဆောင်သွားတာလို့ ဆိုပါ တယ်။

အိမ်ခြေ ၉၀ နီးပါးနဲ့ လူဦးရေ ငါးရာလောက်ရှိတဲ့ အဲဒီရွာက ဒေသခံတွေဟာ စစ်ကောင်စီတပ် ထပ်မံဝင်ရောက်စီးနင်းမှာ စိုးရိမ်တာကြောင့် ဘေးလွတ်ရာမှာ ရှောင်တိမ်းနေရဆဲလို့ ဒေသခံက ဆိုပါတယ်။

ဆောနယ်ထဲမှာ ပခုက္ကူ အခြေစိုက် တပ်မ (၁၀၁)၊ ဂန့်ဂေါ အခြေစိုက် ခလရ (၅၀)၊ ကျောက်ထု အခြေစိုက် အမတ (၃၆၈) နဲ့ မင်းတပ် အခြေစိုက် ခလရ (၂၇၄) တပ်ရင်းတွေက စစ်ကြောင်းထိုးနေတာလို့လည်း ယောဒေသ သတင်းအရင်းအမြစ်တွေက ဆိုပါတယ်။

ပြီးခဲ့တဲ့ ဖေဖော်ဝါရီ ၂၄ ရက်နေ့ကလည်း ဆောမြို့နယ် ပန်းဆန်ရွာမှာ ချင်းအမျိုးသား ၂ ဦး ဖမ်းဆီးခံရတဲ့ ဖြစ်စဥ် ဖြစ်ပွားခဲ့ တယ်လို့ အဲဒီအနီးအနားက ဒေသခံတစ်ဦးက ဆိုပါတယ်။

“ဒေးကနေ လာကြတာထင်တယ်၊ ပန်းဆန်ရွာအဝင်နား အဖမ်းခံရတာတဲ့၊ သေချာတာကတော့ တောင်ပေါ်ဘက်ကနေ ဆင်းလာတဲ့သူတွေ ဖြစ်မယ်။ ဒါပေမယ့် အတိကျတော့ မသိဘူးနော” လို့ ဆိုပါတယ်။

ဖေဖော်ဝါရီ ၂၄ ရက် ဆောမြို့နယ် ပန်းဆန်ရွာမှာ စစ်ကောင်စီက အမျိုးသား ၂ ဦးကို ဖမ်းဆီးသွားတာနဲ့ပတ်သက်ပြီး သီးခြား အတည်မပြုနိုင်သေးပါဘူး။ ဆောမြို့နယ် ကျောက်ထုမြို့နဲ့ အနီးတဝိုက်မှာလည်း ဖေဖော်ဝါရီ ၂၇ ရက်နေ့လောက်ကနေ ဒီကနေ့အချိန်ထိ ဆက်သွယ်ရေး MPT ဖုန်းလိုင်းတွေ ဖြတ်တောက်ခံထားရပါတယ်။

========================

📌📌 ၄။ အကြမ်းဖက်စစ်အုပ်စုကြောင့် နွေဦးတော်လှန်ရေးကာလအတွင်း ကျဆုံးခဲ့ရသူ စုစုပေါင်းမှာ (၃၀၆၂) ဦးအထိရှိလာ

အကြမ်းဖက်စစ်အုပ်စုကြောင့် နွေဦးတော်လှန်ရေးကာလအတွင်း ကျဆုံးခဲ့ရသူ စုစုပေါင်းမှာ (၃၀၆၂) ဦးအထိရှိလာပါတယ်။ စစ်အာဏာသိမ်းပြီးနောက် လတ်တလောဖြစ်ပေါ်လျက်ရှိသော အခြေအနေများနှင့်ပတ်သက်၍ AAPPက ဖေဖော်ဝါရီ ၂၇ ရက်မှာ အသိပေးဖော်ပြပါတယ်။

"၂၀၂၁ ခုနှစ်၊ ဖေဖော်ဝါရီ ၁ ရက်နေ့ မတရားစစ်အာဏာလုမှုဖြစ်စဉ်ကို ဆန့်ကျင်ခဲ့ကြသော ဒီမိုကရေစီရေးလှုပ်ရှားသူများနှင့် ပြည်သူများ၏ နွေဦးတော်လှန်ရေးကာလအတွင်း ကျဆုံးခဲ့ရသူ စုစုပေါင်းမှာ (၃၀၆၂) ဦးရှိခဲ့ပြီဖြစ်တယ်" လို့ ဆိုပါတယ်။