9th OCT 2023 - (Ethnic language program-Matupi) by The Matupi Times

📌 (ချင်း တိုင်းရင်းသား - Matupi ) ထုတ်လွှင့်မှု အစီအစဥ် ၂၀၂၃ အောက်တိုဘာလ ( ၉ ) ရက်နေ့ ရပြည်တွင်းသတင်းများ 

📌📌 1. စက်တင်ဘာလအတွင်း CDF-Mindat နဲ့ စကစတပ်တို့ ထိတွေ့တိုက်ပွဲ ၅ ကြိမ်ဖြစ်ပွား၊ စစ်ကောင်စီဘက်မှ (၄) ဦးသေဆုံးပြီး CDF-Mindat မှ(၁)ဦးကျဆုံး

 

The Matupi Times ၂ အောက်တိုဘာ၊ ၂၀၂၃

မင်းတပ်မြို့နယ်တွင် စက်တင်ဘာလအတွင်း စစ်ကောင်စီတပ်နဲ့ ချင်းကာကွယ်ရေးတပ်ဖွဲ့(မင်းတပ်)တို့ ထိတွေ့ပစ်ခတ်မှု ၅ ကြိမ် ဖြစ်ပွားခဲ့ကြောင်းသိရသည်။ 

ထိတွေ့တိုက်ပွဲ ၅ ကြိမ်တွင် စစ်ကောင်စီဘက်မှ တပ်သား(၄)ဦးသေဆုံးပြီး (၉)ဦးဒဏ်ရာရရှိခဲ့တယ်သိရပါတယ်။

ချင်းကာကွယ်ရေးတပ်ဖွဲ့(မင်းတပ်)တပ်ဖွဲ့ဝင်ရဲဘော်တစ်ဉီးသည်လည်းတိုင်းပြည်နဲ့လူမျိုးအတွက်အသက်ပေးလှူခဲ့ပြီး ရဲဘော်(၁)ဦးဒဏ်ရာရရှိခဲ့ကြောင်း CDF-Minat ကသတင်းထုတ်ပြန်ထားပါတယ်။ 

 

========================

 

📌📌 2. Matu Christian Fellowship (IMBI) Malaysia မှ မီဇိုရမ်းရှိ မတူပီစစ်ဘေးရှောင်ပြည်သူများ၏သာရေး၊နာရေးအတွက် အန္ဒိယရူပီး ၁ သိန်းကျော်ပေးပို့လှူဒါန်း

 

The Matupi Times အောက်တိုဘာ ၂/ ၂၀၂၃

အိန္ဒိယနိူင်ငံ၊မီဇိုရမ်းပြည်နယ်ဘက်သို့ နယ်မြေလုံခြုံရေးအရ စစ်ဘေးတိမ်းရှောင်လာကြသော မတူပီမြို့နယ်မှ စစ်ဘေးရှောင် ပြည်သူများ၏ လတ်တလောကြုံတွေ့နေရသော သာရေး၊နာရေးကိစ္စရပ်များကို ထိရောက်စွာဆောင်ရွက်နိူင်ရေးအတွက် မလေးရှာနိုင်ငံရှိ Matu Christian Fellowship (IMBI) Malaysia မှ အန္ဒိယရူပီး ၁သိန်းကျော်ကို ပေးပို့လှူဒါန်းခဲ့ တယ်လို့ သိရပါတယ်။

“လွန်ခဲ့တဲ့ဇူလိုင်လတုန်းကတော့ မတူပီစစ်ဘေးရှောင်စခန်းအသီးသီးကသက်ကြီးရွယ်အိုတွေက်ိုထောက်ပံ့ပေးတယ်။ မတူပီစစ်ဘေးရှောင်စခန်းများကိုကွင်းဆင်း လုပ်ငန်းဆောင်ရွက် ဖို့ရှိတယ်။ လောလောဆယ်အထိတော့ ပြည်တွင်းပြည်ပအလှူရှင်များနဲ့ အဖွဲ့အစည်းတွေက ကူညီထောက်ပံ့တာတွေမရှိတဲ့အတွက် ကြောင့်ကျွန်တော်တို့MCRC အနေနဲ့အခက်ခဲကြုံနေရတယ်။အခုလတ်တလောကြုံတွေ့နေရတဲ့ သာရေး၊နာရေးကိစ္စရပ်တွေကိုထိရောက်စွာဆောင်ရွက်နိူင်ရေးနှင့် ပတ်သက်ပြီး ကားဝယ်ယူနိူင်ဖို့အတွက် မလေးရှားရှိမတူလူမျိုးအသင်းတော်အဖွဲ့အစည်းဖြစ်တဲ့ (IMBI)က အိန္ဒိယရူပီး - ၁၇၆,၀၈၂ (INR) ပေးပို့လှူဒါန်း ပေးတာပါ။ သာရေး၊နာရေးတွေမှာအသုံးပြုဖို့လိုအပ်တဲ့ ကားဝယ်ဖို့ကိစ္စနဲ့ပတ်သက်ပြီးတော့လည်း မီဇိုရမ်ပြည် နယ်ကတာဝန်ရှိသူတွေနဲ တွေ့ဆုံဆွေးနွေးနေပါတယ်။ ပြီးတော့အခုလိုကူညီထောက်ပံ့ပေးတဲ့ မလေးရှားရောက်မတူလူမျိုးများကိုလည်းကျေးဇူးတင်ပါတယ်။ ခုနောက်ပိုင်း ကျွန်တော်တို့ MCRC အနေနဲ့လည်း ရံပုံငွေအလုံ အ လောက်မရှိတာကြောင့်စစ်ဘေး ရှောင်ပြည်သူတွေ ကို ထိထိရောက်ရောက်ထောက်ပံ့ပေးနိုင်ဖို့ ခက်ခဲနေတယ်။ ”လို့ MCRC မှတာဝန်ရှိသူ တစ်ဦးကပြောပါတယ်။

Matupi Chin Refugee Committee သည်မီဇိုးရမ်ရှိမတူပီမြို့နယ်မှစစ်ဘေးတိမ််းရှောင်လာကြသည့် စစ်ဘေးရှောင်ပြည်သူများအားကူညီထောက်ပံ့ပေးနိုင်ရေးအတွက် ဖဲြ့စည်းထားသောကော်မတီတစ်ခုဖြစ်သည်။ ယခုလက်ရှိချိန်ထိမီဇိုးရမ်တွင် မတူပီစစ်ဘေးရှောင်စခန်း (၄၈) ခုရှိပြီး မတူပီမြို့နယ်အသီးသီးမှ စစ်ဘေး‌ရှောင်အဖြစ် နေထိုင်သူဦးရေ ၈၀၀၀ ကျော်ရှိကြောင်းသိရသည်။

 

========================

 

📌📌 3. ချင်းကာကွယ်ရေးတပ်ဖွဲ့-မင်းတပ်အတွက် AK-47သေနတ်(၄၀) နှင့်ကျည်ဆံများကို (IMCO)၊ Heal the world၊ CEA(Norway) အဖွဲ့ (၃)ဖွဲ့ မှဝယ်ယူပေးပို့

 

The Matupi Times အောက်တိုဘာ ၃/၂၀၂၃

International Mindat K'Cho Organization (IMCO)၊ ဒေါက်တာအငြိမ်းဦးဆောင်သော Heal the world အဖွဲ့နှင့် CEA(Norway) အဖွဲ့ (၃) တို့ဖွဲ့မှပူးပေါင်း၍ ချင်းကာကွယ်ရေးတပ်ဖွဲ့-မင်းတပ်အတွက် AK-47 သေနတ် ၄၀ လက်၊ကျည် ၁၂၀၀၀ တောင့်၊ကျည်အိမ် ၁၂၀ ခုတို့အား ဝယ်ယူကာ စက်တင်ဘာ ၂၈- ၂၀၂၃ ရက်နေ့တွင်ချင်းကာကွယ်ရေးတပ်ဖွဲ့-မင်းတပ်ထံ ပေးပို့အပ်နှံခဲ့ကြောင်းသိရသည်။

International Mindat K'Cho Organization (IMCO) အဖွဲ့အနေဖြင့် ချင်းကာကွယ်ရေးတပ်ဖွဲ့-မင်းတပ်အတွက် AK-47 သေနတ် ၅၀လက်ဝယ်ယူတပ်ဆင်ပေးမည့်ပရောဂျက်ကို ၂၀၂၂ ခုနှစ်၊ဇွန်လတွင်စတင်ခဲ့တယ်လို့သိရပါတယ်။ 

“ပရောဂျက်အတွက်အမေရိကန်ဒေါ်လာ ၁၈၅၀၀၀ (တသိန်းရှစ်သောင်းငါးထောင်)ကုန်ကျမည်ဖြစ်ပြီးလက်နက် ၅၀လက်၊ ကျည် ၁၅၀၀၀ တောင့်၊ကျည်အိမ် ၁၅၀ ရရှိပါမည်။ ပရောဂျက်အတွက် ဒေါက်တာအငြိမ်းဦးဆောင်သော Heal the world အဖွဲ့နှင့် CEA(Norway) တို့မှဒေါ်လာ ၃၅၀၀၀ ခန့်ပူးပေါင်းအား ဖြည့်ခဲ့ကြပြီးပရောဂျက်အတွက်လိုအပ်သည့်ရန်ပုံငွေအ များစုကို IMCO အဖွဲ့ဝင်များထံမှကောက်ခံသည့် လစဥ်ကြေးများ ဖြင့် ဖြည့်ဆည်းခဲ့ရပါကြောင်း

” IMCO ကရေးသားဖော်ပြထားပါတယ်။

International Mindat K'Cho Organization(IMCO) အဖွဲ့အစည်း သည်အာဏာရှင်စနစ်အဆုံးတိုင်ချုပ်ငြိမ်းရေး၊ အမျိုးသားတန်းတူညီမျှမှုရှိသောဖက်ဒရယ်ပြည်ထောင်စုပေါ်ပေါက်လာရေးတို့အတွက်တိုက်ပွဲဝင်နေတဲ့တော်လှန်ရေးအင်အားစုတွေကိုတတ်စွမ်းသ၍ပံ့ပိုးကူညီနိုင်ရန်အတွက် ၂၀၂၁ နိုဝင်ဘာလ ၂ ရက်နေ့မှာ စတင်ဖွဲ့စည်းခဲ့တာဖြစ်ပါတယ်။ 

 

========================

 

📌📌 4. All In Combat 4 ခါးပတ်လုပွဲ ယှဉ်ပြိုင်ထိုးသတ်မည့် ချင်းဖိုက်တာ Tial Thang

 

The Matupi Times အောက်တိုဘာ ၃/ ၂၀၂၃

ချင်းဖိုက်တာ MMA ကစားသမား Tial Thang(The Dragon Leg)သည် လာမည့် နိုဝင်ဘာလ ၁၁ / ၂၀၂၃ ရက်နေ့တွင် အမေရိကန်နိင်၌ကျင်းပမည့် All In Combat 4 ပွဲစဥ်တွင် အမေရိကန်နိုင်ငံသား Christ Ocon နှင့် ခါးပတ်လုပွဲ ယှဥ်ပြိုင်ထိုးသတ်သွားမယ်လို့သိရပါတယ်။

Tial Thang နှင့် ယှဥ်ပြိုင်ထိုးသတ်မည့် အသက် ၂၇ နှစ်အရွယ် အမေရိကန်နိင်ငံသား Christ Ocon သည် Pro MMA Record အရ ၁၀ ပွဲ ယှဥ်ပြိုင်ထိုးသတ်ပြီး ၇ ပွဲအနိုင်ရရှိထားသည်။ 

ချင်းဖိုက်တာ Tial Thang မှာ နောက်ဆုံးပွဲအဖြစ် ပြီးခဲ့သည့်ဩဂုတ်လ ၁၉ /၂၀၂၃ ရက်နေ့က All In Combat 3 ပြိုင်ပွဲတွင် Darrius Jonhson ကို ဒိုင် ဆုံးဖြတ်ချက်အမှတ်နဲ့အနိုင်ရရှိထားပါတယ်။

အဆိုပါပွဲကို MMA Fighter အောင်လအန်ဆန်းရဲ့ Youtube Page မှာတိုက်ရိုက် Live လွှင့်ပြသခဲ့ပါတယ်။

 

========================

 

📌📌 5. မတူပီမြို့နယ်ကုန်ဈေးနှုန်းများမြှင့်တက်ပြီး ၊ နွားနောက်နှင့်ဝက်များတွင် ရောဂါဖြစ်ပွားနေ

 

The Matupi Times အောက်တိုဘာ ၄ / ၂၀၂၃

ယခုရက်ပိုင်းအတွင်းမတူပီမြို့ပါ်တွင်ကုန်ဈေးနှုန်းများမြှင့်တက်နေပြီး မြို့နယ်အတွင်းရှိ နွားနောက်တွေ အရေပြား အကျိတ်နာရောဂါဖြစ်ပွားနေတယ်လို့ သိရပါတယ်။

မတူပီမြို့ပေါ်တွင် မတူပီ-ရေဇွာ ကားလမ်းများမြေပြိုပျက်စီးပြီးနောက် မြို့တွင်းသို့ကုန်တင်ကားဝင်ရောက်နိုင်ရန်ခက်ခဲနေတဲ့အတွက် ကုန်ဈေးနှုန်းတွေထပ်တက်နေတယ်လို့ သိရပါတယ်။

“မြို့ထဲမှာကုန်ဈေးနှုန်းတွေတက်နေတယ် စားသုံးဆီတွေလည်းပြတ်နေပြီ ။ ချဉ်ပေါင်ဟင်းတစ်စည်းကို ၅၀၀ ကနေ ၁၀၀၀ ကျပ်၊ လဖ္ဘရည်တစ်ခွက် ၁၀၀၀ ကနေ ၁၅၀၀ ကျပ်ထိဈေးတက်လာတယ်။ အချို့ဆိုင်တွေဆို ဆီမရှိလို့ လဖ္ဘရည်ဆိုင်ပိတ်လိုက်တာတွေရှိတယ်။ ပြည်မဘက်မှာဆီဈေးတွေတက်နေတယ်ဆိုတဲ့သတင်းတွေကြောင့်လားလားတော့မသိဘူး တစ်ချို့ကဆီရှိလျက်နဲ့မရောင်းတော့တာလည်းဖြစ်နိုင်တယ်။ လျှပ်စစ်မီးကတော့ပျက်သွားတာ လနဲ့ချီကြာနေပြီ လုံးဝမလာတော့ဘူး။ “ လို့ဒေသခံတစ်ဦးက Matupi Times ကိုပြောပါတယ်။ 

မတူပီမြို့နယ်အတွင်းတွင် နွားနောက်နှင့် အိမ်မွေးတရိစ္ဆာန်ဖြစ်သည့်ဝက်တို့တွင် အနာရောဂါများဖြစ်ပွားနေကြောင်း သိရသည်။

“အဓိက နွားနောက်တွေ(ခွာနာ၊ရှာနာ)ဖြစ်နေတယ်။ ခြေထောက်တွေပုပ်ပြီး နာနေတဲ့အတွက်ကြောင့်အစာသေချာ မစားနိုင်ကြဘူး။ ဒီအနာရောဂါကြောင့်သေသွားတဲ့နွားနောက်တွေလည်းရှိလာတယ်။ နွားနောက်နာနေတဲ့သတင်းတွေသိကြပြီးတဲ့နောက် ဈေးထဲမှာရောင်းကြတဲ့ အသားတွေလည်းသိပ်မဝယ်ကြတော့ဘူး။ 

အာဏာသိမ်းပြီးနောက်ပိုင်းနွားနောက်ကျောင်းတဲ့သူဆိုပြီး နွားတွေကိုထိန်းကျောင်းမယ့်သူတွေလည်း သီးသန့်မရှိတော့ဘူး ။ ပြီးတော့စစ်တပ်ကကန့်တပ်ထားတဲ့နေရာတွေဘဲသွားလာလို့ရတော့ ခုဖြစ်ပေါ်နေတဲ့နွားနောက်ရောဂါကြောင့် တောထဲမှာသေနေတဲ့နွားနောက်တွေလည်းရှိနေနိုင်တယ်။ 

အိမ်တွေမှာမွေးထားတဲ့ ဝက်တွေလည်း အနာရောဂါတွေရှိနေတယ်။ ဝက်တွေကို ရောဂါကာကွယ်ဆေးထိုးပေးဖို့ခေါ်ပေမယ့်လည်း ဆေးတွေကုန်နေတယ်လို့ ဆေးထိုးပေးတဲ့သူကပြောတယ်။ “ လို့ဒေသခံတစ်ဦးကပြောပါတယ်။ 

မကွေးတိုင်း၊ ဂန့်ဂေါမြို့နယ်ဘက်မှာလည်း ကျွဲ၊ နွားတိရိစ္ဆာန်များ ရောဂါဖြစ်ပွားမှုများနေတယ်လို့သိရပါတယ်။ 

#RadioNUGLocalNews

#SpringRevolution