9th DEC 2023 - (Ethnic language program-CHO_DAAI) by Radio NUG

 📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ ဒီဇင်ဘာလ ( ၉ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ ချင်းပြည် ပလက်ဝ၊ တရွန်အိုင် ဗျူဟာကုန်းကို (AA) က တစ်လနီးပါး တိုက်ခိုက်မှုအပြီး ထိန်းချုပ်နိုင်ခဲ့ 

 

ချင်းပြည် ပလက်ဝဒေသရှိ စစ်ကောင်စီအခိုင်အမာ တပ်စွဲထားသော ထရွန်အိုင် ဗျူဟာကုန်းကို ရက္ခိုင့်တပ်တော် (AA) က တစ်လနီးပါး တိုက်ခိုက်မှုအပြီးမှာ ထိန်းချုပ်နိုင်ခဲ့ပြီဖြစ်ကြောင်း ဒီဇင်ဘာလ (၅) ရက် ညနေပိုင်းမှာ သတင်းထုတ်ပြန် လာပါတယ်။ 

ထရွန်အိုင် ဗျူဟာကုန်းကို ပြီးခဲ့တဲ့ နိုဝင်ဘာလ (၁၄) ရက်နေ့ ၊ နံနက် (၆) နာရီဝန်းကျင်ကနေ စပြီး ထိုးစစ်ဆင် တိုက်ခိုက်ခဲ့ကာ စခန်းကုန်းကြီးတစ်ခုလုံးအား ၂၀၂၃ ခုနှစ်၊ ဒီဇင်ဘာလ (၄) ရက်၊ နေ့လယ် (၁) နာရီ (၀၄) မိနစ်အချိန်မှာ ထိန်းချုပ်လိုက်နိုင်တာ ဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။ 

(၂၁) ရက်ခန့်ကြာအောင် ထိုးစစ်ဆင် တိုက်ခိုက်ခဲ့တာဖြစ်ပြီး ရက္ခိုင့်တပ်တော် (AA) ဘက်မှာလည်း ထိခိုက်ကျဆုံးမှုတွေ ရှိခဲ့တယ်လို့ ဆိုပါတယ်။ တိုက်ပွဲ ကာလအတွင်းမှာ စစ်ကောင်စီဘက်က လေကြောင်း၊ လက်နက်ကြီးပစ်ကူ၊ Chemical Warfare Agents ဓာတုဓာတ်ငွေ့ပါတဲ့ ဗုံးလက်နက်တွေနဲ့ တန်ပြန်တိုက်ခိုက်ခဲ့တယ်လို့ ထုတ်ပြန်ချက်မှာဖော်ပြပါတယ်။ 

AA က ထိန်းချုပ်လိုက်တဲ့ အဆိုပါ တရွန်အိုင်ဗျူဟာကုန်းမှာ ရဟတ်ယာဥ်ကွင်း ၂ ကွင်းရှိနေပြီး စစ်ကောင်စီတပ်သား အလော၊င်းများနှင့် လက်နက်ခဲယမ်း၊ စစ်အသုံးအဆောင် ပစ္စည်းတွေကိုလည်း သိမ်းဆည်းရမိခဲ့တယ်လို့ ထုတ်ပြန်ထား တာပါ။ အလားတူပဲ ပလက်ဝမြို့နယ်ထဲက စစ်ကောင်စီအခိုင်အမာတပ်စွဲထားတဲ့ နောက်ထပ် 'နှုံးဘူးဗျူဟာ' ကိုလည်း ဆက်လက် ထိန်းချုပ်နိုင်ေရး ကြိုးပမ်းလျက်ရှိတယ်လို့ ထုတ်ပြန်ထားပါတယ်။

ပလက်ဝမြို့နယ်အတွင်း စစ်ကောင်စီစခန်းသိမ်း တို၊က်ပွဲတွေမှာ မဟာမိတ် ရက္ခိုင့်တပ်တော် (AA) နဲ့အတူ တို၊က်၊ပွဲ ဖော်ဆောင်နေ‌တယ်လို့ Maraland Defense Force – MDF က ဒီဇင်ဘာ ၂ ရက်နေ့မှာ ထုတ်ပြန်ခဲ့ပါတယ်။

ချင်းပြည်၊ ပလက်ဝ၊ တရွန်အိုင် ဗျူဟာကုန်း ဟာ စစ်ရေးအရ လွန်စွာ အရေးပါတဲ့ နေရာတစ်ခုဖြစ်ပြီး ကုလားတန် မြစ်ကမ်းနံဘေးမှာ တည်ရှိတာဖြစ်ပါတယ်။

အိန္ဒိယနိုင်ငံ က ဖော်ဆောင်နေတဲ့ ကုလားတန် ပရောဂျက် ဖြတ်သန်းသွားရာ နေရာလည်းဖြစ်တဲ့အပြင် ဘင်္ဂလားဒေ့ရှ်-အိန္ဒိယ-မြန်မာ သုံးနိုင်ငံ ဆုံရပ် တြိဂံနယ်မြေထဲမှာလည်း ပါဝင်နေတာ ဖြစ်ပါတယ်။ 

 

========================

 

📌📌 ၂။ မင်းတပ်မှာ ၂၀၂၃ အတွင်း တိုက်ပွဲအကြိမ် ၃၀ ကျော်ဖြစ်ပွား၊ လေကြောင်းက ၆၇ ဗုံးကြဲ တို၊က်ခိုက်ခံရ 

 

မင်းတပ်မြို့နယ်နဲ့ အခြားဒေသတွေမှာ ၂၀၂၃ ခုနှစ်အတွင်း ကာကွယ်ရေးတပ်ဖွဲ့နဲ့ စစ်ကောင်စီတပ်အကြား ထိတွေ့တိုက်ပွဲ ၃၂ ကြိမ်ခန့်ဖြစ်ပွားခဲ့တယ်လို့ ချင်းကာကွယ်ရေးတပ်ဖွဲ့ (မင်းတပ်)က ထုတ်ပြန်ပါတယ်။

တို၊က်ပွဲအတွင်း စစ်ကောင်စီတပ်ဖွဲ့ဝင် ၇၀ ကျော်သေဆုံးပြီး ကာကွယ်ရေးတပ်ဖွဲ့ဝင် ၂ ဦး ကျဆုံးတယ်လို့ ဖော်ပြပါတယ်။

စစ်ဆင်ရေးတို၊က်ပွဲတွေကို မင်းတပ်မြို့တွင်းအပြင် ချင်း - မကွေးနယ်တွေမှာ မဟာမိတ်တွေနဲ့အတူ ဖော်ဆောင်ခဲ့တာတွေပါ ထည့်သွင်းဖော်ပြထားတာ တွေ့ရပါတယ်။ 

၁ နှစ်နီးပါးအတွင်း စစ်ကောင်စီရဲ့ လေကြောင်းတို၊က်ခိုက်မှုနဲ့ လက်နက်ကြီးပစ်ခတ်တာတွေကြောင့် အရပ်သားပြည်သူ ၉ ဦးနဲ့ ကာကွယ်ရေးတပ်ဖွဲ့ဝင် ၁ ဦး အသက်ဆုံးရှုံးခဲ့တာလည်း ရှိပါတယ်။

အသက်ဆုံးရှုံးရသူတွေဟာ မင်းတပ်မြို့နယ်၊ တိုက်နယ် ၄၊ တိုက်နယ် ၂၊ တိုက်နယ် ၁ ရှိ အမျိုးသမီး ၆ ဦးနဲ့ အမျိုးသား ၃ ဦး ဖြစ်ပါတယ်။

တို၊က်ပွဲတွေနဲ့ လေကြောင်းတိုက်ခိုက်မှုကြောင့် ထိခိုက်ဒဏ်ရာရသူ လူ ၂၇ ဦး ရှိနေတယ်လို့လည်း ချင်းကာကွယ်ရေးတပ်ဖွဲ့ (မင်းတပ်)ရဲ့ ထုတ်ပြန်ချက်မှာ ဖော်ပြပါတယ်။

လေကြောင်းတိုက်ခိုက်ခံရမှုနဲ့ လက်နက်ကြီးကျည်တွေကြောင့် အရပ်သားနေအိမ် ၁၀၀ ကျော်၊ ဘာသာရေးအဆောက်အအုံ ၉ ခု၊ စာသင်းကျောင်းဆောင် ၆ ဆောင်၊ ဆေးပေးခန်းနဲ့ မော်တော်ယာဉ်တွေပါ ထိခိုက်ပျက်စီးခဲ့ပါတယ်။

၂၀၂၃ ခုနှစ် ဧပြီလက မင်းတပ်မြို့နယ်ထဲ လေကြောင်းတို၊က်ခိုက်ခံရမှုအတွင်း စစ်ကောင်စီက Cluster ဗုံး အသုံးပြုတယ်လို့ Cluster Munition Coalition (CMC) က ၂၀၂၃ ဩဂုတ် ၃၁ ရက်နေ့ ထုတ်ပြန်တဲ့ အစီရင်ခံစာမှာ ဖော်ပြပါတယ်။

လက်ရှိ ချင်းပြည်အနှံ့ စစ်ကောင်စီအထိုင်စခန်းနဲ့ မြို့သိမ်းတိုက်ပွဲဖြစ်ပွားမှုနှုန်း အရှိန်မြင့်နေသလို မင်းတပ်မှာတော့ စစ်ကောင်စီက ပြည်သူတွေကို အကာအကွယ်ယူပြီး မြို့တွင်းသွားလာခွင့် ပိတ်လိုက်ပါတယ်။ 

ဒီဇင်ဘာ လဆန်းပိုင်းကစလို့ နေအိမ်အပြင်ထွက်သူတွေကို ပစ်မိန့်ပါ တခါတည်းပေးထားတာလို့ မြို့တွင်းနေထိုင်သူတွေက ပြောပါတယ်။

ဒီလိုအခြေအနေမှာ ချင်းကာကွယ်ရေးတပ်ဖွဲ့ (မင်းတပ်)စစ်ဒေသမှူးကတော့ မြို့တွင်းတို၊က်ပွဲ ပြန်ပြင်းထန်လာ နိုင်တဲ့အကြောင်း အသိပေးထားပါတယ်။

 

========================

 

📌📌 ၃။ ချင်းပြည်  ဖွဲ့စည်းပုံအခြေခံဥပဒေနှင့် ချင်းပြည်ကောင်စီကို အတည်ပြုဖွဲ့စည်း။

 

ချင်းပြည်ကောင်စီနှင့် ချင်းပြည်ဖွဲ့စည်းပုံအခြေခံဥပဒေကို Victoria Base၊ Chinlandမှာ ပထမအကြိမ် ချင်းပြည်ကောင်စီ ညီလာခံက ဒီဇင်ဘာလ (၆) ရက်နေ့မှာ အတည်ပြုဖွဲ့စည်းခဲ့တယ်လို့ သိရပါတယ်။

ပထမအကြိမ် ချင်းပြည်ကောင်စီညီလာခံကို ဒီဇင်ဘာလ (၄)ရက်မှ (၇)ရက်နေ့အထိ အောင်မြင်စွာ ကျင်းပခဲ့ကြပြီး၊ ချင်းအမျိုးသားတပ်ဦးမှ ကိုယ်စားလှယ်များ၊ ချင်းလွှတ်တော်ကိုယ်စားလှယ်အစုအဖွဲ့မှ ကိုယ်စားလှယ်များ၊ မြို့နယ်နှင့်ဒေသအစုအဖွဲ့မှ ကိုယ်စားလှယ်များ၊ ပြည်တွင်းပြည်ပဧည့်သည်တော်များ စုစုပေါင်း (၂၃၅)ဦး တက်ရောက်ခဲ့ကြတယ်လို့  ဒီဇင်ဘာလ (၇)ရက်နေ့က ချင်းပြည်ကောင်စီညီလာခံက ထုတ်ပြန်ထားပါတယ်။

ယင်းညီလာခံမှာ ချင်းပြည်ဖွဲ့စည်းပုံအခြေခံဥပဒေကို ဒီဇင်ဘာလ (၆)ရက် နံနက်ပိုင်း ၁၁:၃၃ မိနစ်မှာ အတည်ပြုပြီး ချင်းပြည်ကောင်စီကိုလည်း မွန်းလွဲပိုင်း ၁:၂၇ မိနစ်မှာ အတည်ပြုဖွဲ့စည်းပေးခဲ့တယ်လို့ ချင်းပြည်ကောင်စီ ညီလာခံက ဆိုပါတယ်။

အသစ်ဖွဲ့စည်းလိုက်တဲ့ ချင်းပြည်ကောင်စီအနေဖြင့် ချင်းပြည်လွှတ်တော်၊ ချင်းပြည်အစိုးရအဖွဲ့နှင့် ချင်းပြည်တရား လွှတ်တော်ချုပ်တို့ကို ရက်ပေါင်း(၆၀)အတွင်း ဖွဲ့စည်းသွားမယ်လို့ သိရပါတယ်။

ချင်းပြည်ကောင်စီ၏ ရည်မှန်းချက်ပန်းတိုင်မှာ အမျိုးသားကိုယ်ပိုင်ပြဌာန်းခွင့်၊ အာမခံချက်ရှိသော ချင်းပြည်တည်ဆောက်ရန်၊ နိုင်ငံရေးနှင့်အမျိုးသားတန်းတူ အာမခံချက်ရှိသော ဖက်ဒရယ်ပြည်ထောင်စု တည်ဆောက်ရန်နှင့် ဒီမိုကရေစီစနစ် တည်ဆောက်ရန်တို့ ဖြစ်တယ်လို့ သိရပါတယ်။

#RadioNUGLocalNews

#SpringRevolution