📌 ၂၀၂၄ ခုနှစ် ဇန်နဝါရီလ ၈ ရက် ညပိုင်းမှာတင်ပြပေးမယ့် Radio NUG စစ်ရေးသတင်းကောက်နုတ်ချက်များ

 

📌📌 ၁။ ကွတ်ခိုင် စစ်ဗျူဟာကုန်းနဲ့ သိန္နီမြို့က စကခ ၁၆ စစ်ဌာနချုပ်ကို သိမ်းပိုက်နိုင်ခဲ့တာကြောင့် ကွတ်ခိုင်နဲ့သိန္နီမြို့ ကို အပြည့်အဝ ထိန်းချုပ်နိုင်ပြီလို့ ညီနောင် ၃ ဖွဲ့ပြောကြား

ရှမ်းပြည်နယ်မြောက်ပိုင်းမှာရှိတဲ့ ကွတ်ခိုင် စစ်ဗျူဟာကုန်းနဲ့ သိန္နီမြို့က စကခ-၁၆ စစ်ဌာနချုပ်ကို TNLA က သိမ်းပိုက်နိုင်ခဲ့ပြီဖြစ်တာကြောင့် ကွတ်ခိုင်မြို့နဲ့ သိန္နိမြို့ကို အပြည့်အဝ ထိန်းချုပ်သိမ်းပိုက်နိုင်ခဲ့ပြီလို့ ညီနောင် မဟာမိတ် ၃ ဖွဲ့က ထုတ်ပြန်လိုက်ပါတယ်။ 

၁၀၂၇ စစ်ဆင်ရေး ၇၂ ရက်မြောက်နေဖြစ်တဲ့ ဇန်နဝါရီလ ၇ ရက်နေ့ မနက်ပိုင်းမှာ သိန္နီအခြေစိုက် စကခ -၁၆ နောက်တန်းဌာနချုပ်နဲ့ ည ၁၁ ခန့်အချိန်မှာ ကွတ်ခိုင်ဗျူဟာကုန်းကို တအာင်းတပ်မတော် TNLA က သိမ်းပိုက်နိုင်ခဲ့တာလို့ သိရပါတယ်။ 

သိန္နီအခြေစိုက် စကခ -၁၆ က စစ်ကောင်စီတပ်ဖွဲ့တွေ နောက်တန်းဌာနချုပ်ကနေ ဆုတ်ခွာသွားတာကြောင့် နယ်မြေရှင်းလင်းရေးလုပ်နေသလို ကွတ်ခိုင်ဗျူဟာကုန်းမှာလည်း ရှင်းလင်းရေးလုပ်ငန်းတွေ လုပ်ဆောင်နေ ပြီး သိမ်းဆည်းရရှိတဲ့ လက်နက်ခဲယမ်းများကိုလည်း စစ်စစ်နေတယ်လို့ ညီနောင် မဟာမိတ် ၃ ဖွဲ့က အသိပေးထားပါတယ်။

လက်ရှိမှာ TNLA အပါအဝင် ညီနောင်မဟာမိတ် ၃ ဖွဲ့ဟာ ရှမ်းပြည်နယ်မြောက်ပိုင်းက မြို့ပေါင်း ၁၆ မြို့ကို သိမ်းပိုက်ရရှိထားပြီဖြစ်တယ်လို့ မှတ်တမ်းတွေအရ သိရပါတယ်။

========================

📌📌 ၂။ စစ်ကောင်စီ၏ တဘက်သတ်ဆန်သော စစ်ရာဇဝတ်မှုကျူးလွန်မှုများကြောင့် အရပ်သားထိခိုက်သေဆုံးမှု ပိုများလာဟု ညီနောင်၃ဖွဲ့ထုတ်ပြန်

အကြမ်းဖက်စစ်တပ်ရဲ့ တဘက်သတ်ဆန်တဲ့ စစ်ရာဇဝတ်မှုကျူးလွန်မှုတွေကြောင့် မြန်မာနိုင်ငံဒေသအနှံ အရပ်သားပြည်သူတွေ ထိခိုက်သေဆုံးမှုအရေအတွက် ပိုမိုများပြားလာနေတယ်လို့ ညီနောင်မဟာမိတ် ၃ ဖွဲ့ က အသိပေးထုတ်ပြန်လိုက်ပါတယ်။ 

ညီနောင်မဟာမိတ် ၃ ဖွဲ့ကဖော်ဆောင်နေတဲ့ ၁၀၂၇ စစ်ဆင်ရေး ၇၃ ရက်မြောက် တိုက်ပွဲသတင်းတွေကို ထုတ်ပြန်ရာမှာ ထည့်သွင်းဖော်ပြလိုက်တာဖြစ်ပါတယ်။ 

အကြမ်းဖက်စစ်ကောင်စီလက်အောက်ခံတပ်စခန်းတွေကို တိုက်ခိုက်သိမ်းပိုက်ပိုက်ရာမှာ တဝက်တပျက် ကျန်နေသေးတဲ့စခန်းတွေကို အပြီးသတ်သိမ်းပိုက်နိုင်ဖို့ လုပ်ဆောင်ခဲ့တာကြောင့် စစ်ကောင်စီတပ်တွေနဲ့ ညီနောင်မဟာမိတ်တပ်တွေကြား ဇန်နဝါရီလ ၇ ရက်နေ့မှာလည်း ထိတွေ့တိုက်ပွဲတွေရှိခဲ့ပါတယ်။

စစ်ဘောင်ကျယ်လာတာနဲ့အမျှ စစ်မျက်နှာစာတွေမှာ ပြန်လည်ထိုးစစ်ဆင်နိုင်စွမ်း အားနည်းလာတဲ့ စစ်ကောင်စီဟာ ရှုံးမဲ မဲပြီး စစ်ရေးနဲ့မဆိုင်တဲ့ အရပ်သားပြည်သူတွေကို ရည်ရွယ်ချက်ရှိရှိ ပစ်ခတ်တိုက် ခိုက်တာ၊ မတရားဖမ်းဆီးမှုတွေ ဆက်လက်လုပ်ဆောင်ခဲ့တယ်လို့ အသိပေးထားပါတယ်။

အခုလိုအကြမ်းဖက်စစ်တပ်ရဲ့ ပစ်ခတ်မှုတွေကြောင့် ရှမ်းပြည်မြောက်ပိုင်းမှာရှိတဲ့ နမ့်ဆန်မြို့နယ်မှာ ကျောင်းဆရာအပါအဝင် အရပ်သား ၅ ဦးသေဆုံးခဲ့ပြီး ၆ ဦး ဒဏ်ရာရခဲ့တဲ့အပြင် အိမ် ၇ လုံးပျက်စီးခဲ့ တယ်လို့ သိရပါတယ်။

အလားတူ တော်လှန်ရေးအင်အားစုတွေသိမ်းယူထားတဲ့ စစ်ကိုင်းတိုင်း ခမ်းပတ်မြို့က ကနန်ကျေးရွာကို စစ်တပ်က ဂျက်ဖိုက်တာနဲ့ လာရောက်ဗုံးကြဲခဲ့တာကြောင့် ကလေးငယ် ၄ ဦးအပါအဝင် ၁၅ ဦး သေဆုံးခဲ့ရပါ တယ်။

ထို့အပြင် ရခိုင်ဒေသတွင်းမှာလည်း စစ်ကောင်စီက အများပြည်သူသွားလာရာနေရာတွေမှာ ရည်ရွယ်ချက်ရှိ ရှိ မိုင်းထောင်တာတွေ လုပ်ဆောင်ခဲ့တာကြောင့် ယခုရက်ပိုင်းမှာ ထိခိုက် သေဆုံး ဒဏ်ရာရမှုဖြစ်စဉ်တွေ တရက်ထက်တရက် မြင့်တက်လာတယ်လို့ ညီနောင်မဟာမိတ် ၃ ဖွဲ့က ထုတ်ပြန်ထားပါတယ်။

========================

📌📌 ၃။ ကောလင်းခရိုင် ဝန်းသိုမြို့နယ် ငါးမိုင်အနီးတွင်စပါးကုန်သည်များနှင့် ကားသမားအပါအဝင်အရပ်သား၁၉ဦးကို စကစတပ်များကသတ်ဖြတ်ထား

ဇန်နဝါရီ၈ရက်

ကောလင်းခရိုင် ဝန်းသိုမြို့နယ် ငါးမိုင်အနီးတွင်စပါးကုန်သည်များနှင့် ကားသမားအပါအဝင်အရပ်သား၁၉ဦးကို စကစတပ်များကသတ်ဖြတ်ထားတယ်လို့သတင်းရရှိပါတယ်။

ဇန်နဝါရီ၇ရက်ကောလင်း KR Teamကအတည်ပြုဆိုပါတယ်။

"ဇန်နဝါရီ၇ရက် ကောလင်းခရိုင် ဝန်းသိုမြို့နယ်ဒေသအခေါ် ငါး မိုင် တွင် ပြည်သူအလောင်း 19 လောင်းတွေ့ရှိရပြီးကျား 17 ဦး မ 2 ဦး အလောင်းများထဲမှသေဆုံးသူငါးဦးကိုသာအတည်ပြုနိုင်ပါတယ်။သေဆုံးသူများမှာ ရင်ဘတ်နှင့်ခေါင်းတွင် သေနတ်ဒဏ်ရာများနှင့်သေဆုံးနေကြာင်းသိရပါတယ်"လို့ဆိုပါတယ်။

ဖြစ်စဥ်မှာ ဇန်နဝါရီ၅ရက်နေ့တွင် ဝန်းသိုခမရ 120 အနီးလေဘိုရွာအနီးရှိ ဒေသအခေါ် ကျောက်စိမ်းဘုရားအနားတွင် စပါးကုန်သည်များနှင့် ကားသမားအချို့ကို စကစမှဖမ်းဆီးခေါ်ဆောင်သွားပြီးနောက်ယခုကဲ့သို့ အလောင်းများကို ပစ်ထားသည်ကိုတွေ့ရှိရတယ်လို့ ဒေသခံတွေဆီကနေသိရပါတယ်။ အလောင်းတွေ့ရှိရာအနားတွင် ကပစထုတ် 5.56 mm ကျည်ခွံများလည်းတွေ့ရှိရကာသေဆုံးသူများကိုခြေကျင်းဝတ်များနှင့်လက်ပြန်ကြိုးတုပ်လျှက်အနေအထားကိုလည်းတွေ့ရှိခဲ့ရတယ်လို့သိပါတယ်။

========================

📌📌 ၄။ မုံရွာ သာစည်ထောင်ရှိ စစ်အုပ်စုကို လက်နက်ကြီးများဖြင့် တိုက်ခိုက် 

စစ်ကိုင်းတိုင်း မုံရွာမြို့နယ် သာစည်ထောင်မှာရှိတဲ့ အကြမ်းဖက်စစ်အုပ်စုကို လက်နက်ကြီးတွေနဲ့ တိုက်ခိုက် ခဲ့တယ်လို့ ပြည်သူ့ကာကွယ်ရေးတပ်ဖွဲ့တွေက ထုတ်ပြန်ထားပါတယ်။ 

သာစည်ထောင်မှာရှိတဲ့ အကြမ်းဖက်စစ်ကောင်စီတပ်ဖွဲ့ဝင်တွေကို ဇန်နဝါရီလ ၇ ရက်နေ့ မနက်ပိုင်းက တော်လှန်ရေးပူးပေါင်းအဖွဲ့က ၆ဝ မမ ၊ ၈ဝ မမ တို့နဲ့ တိုက်ခိုက်ခဲ့တာလို့ သိရပါတယ်။

အဆိုပါတိုက်ခိုက်မှုနဲ့ပတ်သက်ပြီး အာဏာသိမ်းအကြမ်းဖက်စစ်အုပ်စုဘက်က ထိခိုက်သေဆုံးအခြေအနေ ကို ဆက်လက်စုံစမ်းနေတယ်လို့ ယင်းမာပင်ခရိုင် တပ်ရင်း ၃၅ People's Defence Army က အသိပေး ထားပါတယ်။ 

ဒီတိုက်ခိုက်မှုကို ယင်းမာပင်ခရိုင် တပ်ရင်း ၃၅ PDA Yinmarbin နဲ့ မုံရွာခရိုင် တပ်ရင်း ၂၇ တို့ ပူးပေါင်း လုပ်ဆောင်ခဲ့တာဖြစ်ပါတယ်။

========================

📌📌 ၅။ အုတ်ဖိုမြို့နယ်တွင် စစ်တပ်လုံခြုံရေးဖြင့် လောင်းကစားပြုလုပ်နေသူများ တိုက်ခိုက်မှု ၅ ဦးသေဆုံး

ပဲခူးတိုင်း သာယာဝတီခရိုင် အုတ်ဖိုမြို့နယ် မြောင်ကျေးရွာမှာ စစ်ကောင်စီတပ်ဖွဲ့ဝင်တွေ လုံခြုံရေး ယူပေးထားတဲ့ လောင်းကစားဝိုင်းကို ပြည်သူ့ကာကွယ်ရေးတပ်ဖွဲ့က စီးနင်းတိုက်ခိုက်ခဲ့ရာ စစ်သားတဦး အပါအဝင် ၅ ဦး သေဆုံးသွားတယ်လို့ သာယာဝတီခရိုင် တပ်ရင်း ၃၈၀၂ က ထုတ်ပြန်ပါတယ်။

ဇန်နဝါရီလ ၇ ရက်နေ့ မွန်းလွဲ ၂ နာရီခန့်အချိန်က စစ်ကောင်စီတပ်ဖွဲ့ကလုံခြုံရေးယူပေးထားပြီး ပျူခေါင်း ဆောင်ဖြစ်တဲ့ ကျေးရွာအုပ်ချုပ်ရေးမှူး ဦးဆောင်ကာ ပျူစောထီးတွေ ဖဲရိုက်နေချိန်မှာ သာယာဝတီခရိုင် တပ်ရင်း ၃၈၀၂ တပ်ခွဲ ၄ မြေအောက်ပြောက်ကျားတပ်ဖွဲ့- အုတ်ဖိုက ရဲဘော်တွေ စီးနင်းတိုက်ခိုက်ခဲ့တာလို့ သိရပါတယ်။ 

စီးနင်းတိုက်ခိုက်မှုကြောင့် စစ်ကောင်စီအဖွဲ့၊ပျူစောထီးများနှင့် ပြည်သူ့ကာကွယ်ရေးရဲဘော်များကြား ၁ဝ မိနစ်ခန့် အပြန်အလှန်ပစ်ခတ်မှုတွေဖြစ်ခဲ့ရာမှာ မြောင်ကျေးရွာအုပ်စု အုပ်ချုပ်ရေးမှူး ပျူခေါင်းဆောင် ကျော်ကိုကို၊ ပျူစောထီး ၃ ဦးနဲ့ စစ်သားတဦး ပေါင်း ၅ ဦး သေဆုံးခဲ့တယ်လို့လည်း အသိပေးထားပါတယ်။

အဆိုပါလောင်းကစားဝိုင်းကနေ လက်လုပ်သေနတ် ၂ လက်၊ လက်ပစ်ဗုံး ၂ လုံး၊ လက်ကောက်နှင့်ဆွဲကြိုး ထည့်ထားတဲ့ ကော်ဗူးတခု၊ ဖုန်း ၃ လုံးနဲ့ ငွေသား ကျပ် ၇သောင်း၈ထောင်၊ စစ်ယူနီဖောင်း ၈စုံ၊ မှတ်ပုံတင် တခုနဲ့ စာရွက်စာတမ်းအချို့ သိမ်းဆည်းရရှိခဲ့တယ် သာယာဝတီခရိုင် တပ်ရင်း ၃၈၀၂ က ထုတ်ပြန်ထားပါတယ်။

========================

📌📌 ၆။ ပဲခူးမြို့ အမှတ် ၂ ရဲစခန်းကို ဒရုန်းဖြင့် ဗုံးကြဲတိုက်ခိုက်

ပဲခူးမြို့ပေါ်မှာရှိတဲ့ အမှတ် ၂ နယ်မြေရဲစခန်းကို ဒရုန်းအသုံးပြုပြီး ဗုံးသီးချ တိုက်ခိုက်ခဲ့တယ်လို့  မြို့ပြအထူး စစ်ဆင်ရေး Urban Special Operation - USO ကအသိပေးထုတ်ပြန်ပါတယ်။ 

ဇန်နဝါရီလ ၈ ရက် ဒီနေ့မနက် ၃ နာရီခွဲခန့်အချိန်က ပဲခူးမြို့ ကလျာဏီရပ်ကွက် ရွှေသာလျောင်းဘုရား လမ်းမကြီးပေါ်မှာရှိတဲ့ အမှတ် ၂ နယ်မြေရဲစခန်းကို မြို့ပြအထူးစစ်ဆင်ရေး USO အဖြစ် ဒရုန်းနဲ့ ဗုံးသီး ၂ လုံး ကြဲချတိုက်ခိုက်ခဲ့တာလို့ သိရပါတယ်။ 

အဆိုပါရဲစခန်းဟာ အကြမ်းဖက်စစ်တပ်က အာဏာသိမ်းထားတဲ့ကာလတလျောက် ပြည်သူလူထုကို မတရား ဖိနှိပ်မှုနဲ့ ဖမ်းဆီးသတ်ဖြတ်မှုတွေကို လက်ရှိအချိန်အထိ ပြုလုပ်နေတယ်လို့ ပြည်သူ့ဘက်တော်သား တွေက သတင်းပေးမှုကြောင့် တိုက်ခိုက်ခဲ့တာဖြစ်တယ်လို့ USO အဖွဲ့က ဆိုပါတယ်။

လက်ရှိမှာ ထိခိုက်ပျက်စီးမှုအခြေအနေကိုမသိရသေးဘဲ စုံစမ်းနေဆဲဖြစ်တယ်လို့လည်း ပြေားထားပါတယ်။ 

ထို့အပြင် ပြည်သူလူထုအပေါ် မတရားမှုများပြုလုပ်ဖို့ကြံဆောင်နေတဲ့ စစ်အုပ်စုရဲ့ စီးပွားရေးထောက်တိုင်တွေအပါအဝင် ၎င်းတို့နဲ့ဆက်နွယ်နေသူတွေကို စစ်ရေးပစ်မှတ်အဖြစ် သတ်မှတ်ပြီး ဆက်လက် တိုက်ခိုက်သွားမှာဖြစ်တယ်လို့လည်း အသိပေးထားပါတယ်။ 

 

ထိုသို့ ဗုံးကြဲတိုက်ခိုက်ခံရမှုကြောင့် ဇန်နဝါရီလ ၈ ရက် မနက်ပိုင်းကစပြီး ဥဿာမြို့သစ်မှာရှိတဲ့ လမ်းစုံလမ်းခွများ၊ ရွှေသာလျောင်းဘုရားလမ်းမကြီးနဲ့ မြို့အဝင်တိုးလ်ဂိတ်မှာ စစ်ကောင်စီတပ်ဖွဲ့ဝင်တွေက စစ်ဆေးမှုတွေ တင်းကြပ်စွာလုပ်ဆောင်ခဲ့တယ်လို့ ဒေသခံတွေကပြောပါတယ်။

အခု တင်ပြခဲ့တဲ့ စစ်ရေးသတင်းကောက်နုတ်ချက်တွေကိုတော့ Radio NUG သတင်းထောက် မင်းသီဟန်နဲ့ ကိုခန့်တို့က ပေးပို့ထားတာ ဖြစ်ပါတယ်။

#RadioNUGLocalNews

#SpringRevolution