17th FEB 2024 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၄ ဖေဖေါ်ဝါရီလ ( ၁၇ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ မင်းတပ်ဒေသခံ ၂ ဦးအပါအဝင် ချင်းလူမျိုး ၄ ဦး ထောင်တသက်နဲ့ နှစ်ရှည်ထောင်ဒဏ် ချမှတ်ခံရ

 

မင်းတပ်မြို့နယ်ဒေသခံ နှစ်ဦးကို ထောင်ဒဏ်တသက်ကျခံစေဖို့နဲ့ နောက်ထပ်ဟားခါးမြို့နယ်ဒေသခံ နှစ်ဦးကို နှစ်ရှည်ထောင်ဒဏ် ၇ နှစ်ကျခံစေဖို့ စစ်ကောင်စီက ဖေဖော်ဝါရီ ၁၄ ရက်နေ့မှာ အမိန့်ချလိုက်ပါတယ်။

မင်းတပ်မြို့နယ်က လိန်းခေါဂေဆိုသူနဲ့ အွမ်လိန်းဂေ (ခ) ပီတာတို့ဟာတော်လှန်ရေးတပ်ဖွဲ့ကို ဆန်၊ ဆီ၊ ဆား စသည့်ရိက္ခာထောက်ပံ့တာ၊ စစ်ကောင်စီကို သတင်းပို့ဖို့ပျက်ကွက်တာ၊ အစိုးရဝန်ထမ်းတွေ ပြစ်မှုကျူးလွန်အောင် အားပေးတာစတဲ့ စွပ်စွဲချက်တွေနဲ့ ထောင်ဒဏ်တစ်သက်ကျခံစေဖို့ ချမှတ်လိုက်တာပါ။

ထောင်ဒဏ်တစ်သက်ချမှတ်ခံထားရတဲ့ မင်းတပ်မြို့နယ် ဒေသခံနှစ်ဦးနဲ့ ပတ်သက်ပြီး  ဆက်လက်စုံစမ်းနေဆဲဖြစ်ပါတယ်။

နောက်ပြီး ချင်းပြည်၊ ဟားခါးမြို့နယ်က ငွန်လျှန်ထန်း (ခ) ရောဘတ်နဲ့ ဗန်ချိန်ကျဲအိုတို့ကိုလည်း ဒေသတွင်း တော်လှန်ရေးအင်အားစုတွေနဲ့ ပတ်သက်နေတယ်ဆိုတဲ့ စွပ်စွဲချက်နဲ့ ထောင် ၇ နှစ်ကျခံစေဖို့ အမိန့်ချထားပါတယ်။

အာဏာသိမ်းကာလ ၃ နှစ်အတွင်း မင်းတပ်မြို့နယ်အတွင်းမှာ မတရားစွပ်စွဲဖမ်းဆီးခံထားရတဲ့ ဒေသခံ ၆၀ နီးပါးအထိ ရှိနေပါတယ်လို့ The Mindat Postက ဆိုပါတယ်။

 

========================

 

📌📌 ၂။ စစ်မှုထမ်းဥပဒေကို မကြာမီ လက်တွေ့အကောင်ထည်ဖော်မယ်လို့ တရားဝင်ပြော

 

စစ်ခေါင်းဆောင် မင်းအောင်လှိုင်က လက်မှတ်ထိုးပြီး အသက်ဝင်ပြီလို့ပြောတဲ့ ပြည်သူ့စစ်မှုထမ်းဥပဒေကို လာမယ့် ဧပြီလမှာ စတင်အကောင်အထည်ဖော်မယ်လို့ စစ်ကောင်စီဘက်က ထုတ်ပြန်ပြောဆိုလာတယ်လို့ ဘီဘီစီမြန်မာပိုင်းရဲ့ သတင်းတပုဒ်မှာ ဖော်ပြပါတယ်။ 

လာမယ့်ဧပြီလ မြန်မာနှစ်သစ်ကူးရုံးပိတ်နောက်ပိုင်းမှာ လက်တွေ့အကောင်အထည်ဖော်ဖို့ ဆက်ပြီး ဆောင်ရွက်နေ တယ်လို့ စစ်ကောင်စီပြောခွင့်ရ ဇော်မင်းထွန်းက ပြောတယ်လို့ ဆိုပါတယ်။ အပတ်စဉ် ၁ ခုကို လူ ၅၀၀၀ နှုန်း ခေါ်မှာဖြစ်ပြီး ရှေ့တန်းလွှတ်ဖို့လည်း ပါဝင်ပါတယ်။

ဒီဥပဒေအရ အသက် ၁၈ နှစ် ကနေ ၃၅ နှစ်အကြား အမျိုးသားတိုင်းနဲ့ အသက် ၁၈ နှစ်ကနေ အသက် ၂၇ နှစ် အကြားအမျိုးသမီးတိုင်း စစ်မှုထမ်းရမှာပါ။ စစ်မှုထမ်းကာလဟာ သာမန်လူတွေအတွက် ၂ နှစ်ဖြစ်ပြီး၊ ပညာသည်တွေ အတွက်ကတော့ ၃ နှစ် ဖြစ်ပါတယ်။ 

ဒါပေမယ့် အရေးပေါ်အခြေအနေတွေမှာတော့ ဘယ်သူ့ကိုမဆို စစ်မှုထမ်းကာလ ၅ နှစ်အထိ တာ၀န်ထမ်းဆောင်ဖို့ သက်တမ်းတိုးမြှင့်နိုင်တယ်လို့ ပြဋ္ဌာန်းပါတယ်။ စစ်မှုထမ်းဖို့ ငြင်းဆန်သူတွေ၊ စစ်မှုထမ်းခြင်းမှ ရှောင်လွဲဖို့ ကြိုးစားသူတွေ ကိုလည်း ထောင်ဒဏ်ကျခံစေမယ်လို့ စစ်ကောင်စီက ခြိမ်းခြောက်ထားပါတယ်။

အမျိုးသားညီညွတ်ရေးအစိုးရကလည်း အကြမ်းဖက်စစ်အုပ်စုသည် တရားမဝင်အကြမ်းဖက်အုပ်စုဖြစ်ပြီး ဥပဒေပြဌာန်းခွင့် အာဏာမရှိကြောင်း၊ ပြည်သူလူထုအနေဖြင့် လုံးဝလိုက်နာရန် မလိုအပ်ကြောင်း ထုတ်ပြန်ထားပါတယ်။

 

========================

 

📌📌 ၃။ ပလက်ဝမြို့နယ်နဲ့ ရခိုင်ပြည်နယ် တိုက်ပွဲမှာ စစ်ကောင်စီ တပ်မမှူးနဲ့ ဗျူဟာမှူး ၂ ဦးသေဆုံးပြီး ၂ ဦးအရှင် ဖမ်းဆီးရမိ 

 

ချင်းပြည်နယ်၊ ပလက်ဝမြို့နယ်နဲ့ ရခိုင်ပြည်နယ် တိုက်ပွဲတွင်း စစ်ကောင်စီ တပ်မမှူးနဲ့ ဗျူဟာမှူး ၂ ဦး သေဆုံးပြီး ၂ ဦး အရှင် ဖမ်းဆီးရမိကာ ၁ ဦးမှာ ပျောက်ဆုံးနေတယ်လို့ မြောက်ပိုင်းညီနောင်သုံးဖွဲ့က ဖေဖော်ဝါရီ ၁၄ ရက်နေ့မှာ သတင်းထုတ်ပြန်ထားပါတယ်။ 

ပလက်ဝမြို့နယ်၊ နှုံးဘူး ဗျူဟာကုန်း တိုက်ပွဲတွင်း စစ်ကောင်စီ နှုံးဘူးဗျူဟာမှူး ဒု-ဗိုလ်မှူးကြီး ဗညားပိုင်စိုးကို သေနတ်ဒဏ်ရာဖြင့် အသေဖမ်းဆီးရမိပြီး ပလက်ဝမြို့ အခြေစိုက် စကစ ၁၉ ၊ ရှေ့တန်းဌာနချုပ် တပ်မမှူး ဗိုလ်မှူးချုပ် ဇင်မျိုးဆွေဟာ တိုက်ပွဲတွင်း ပျောက်ဆုံးလွတ်မြောက်ခဲ့တယ်လို့ ဆိုပါတယ်။

ဒါ့အပြင် ဇန်နဝါရီ ၁၆ ရက်နေ့ တိုက်ပွဲက စစ်ကောင်စီ စကခ ၉ လက်အောက်ခံ နည်းဗျူဟာ (၃) မှ ဗျူဟာမှူး ဒု-ဗိုလ်မှူးကြီး ညီညီဝင်းကို ဦးခေါင်း၊ ရင်ဘက် ဒဏ်ရာဖြင့် ဖမ်းဆီးရမိပြီး ၎င်းကို ကောင်းမွန်စွာ ပြုစုစောင့်ရှောက်ထားကာ ပြန်လည်သက်သာနေပြီလို့ သိရပါတယ်။

အလားတူ ဖေဖော်ဝါရီလ ၇ ရက်နေ့ မြောက်ဦးမြို့ အခြေစိုက် စစ်ကောင်စီ ခမရ ၃၇၇ တပ်ရင်းကို AA မှ တိုက်ခိုက်သိမ်းပိုက်စဥ် တပ်မ ၁၁ တပ်မမှူး ဗိုလ်မှူးကြီး မင်းမင်းထွန်းကို အသေဖမ်းဆီးရမိခဲ့ပါတယ်။

ကျောက်တော်မြို့ အခြေစိုက် စစ်ကောင်စီ စကခ ၉ တပ်မမှူး ဗိုလ်မှူးချုပ် ဇော်မင်းထွန်းကို ဖေဖော်ဝါရီလ ၇ ရက်၊ ၈ ရက်နေ့က အပေါက်ဝရွာအနီး ရေကြောင်းတိုက်ပွဲတွင်း အသက်လု ထွက်ပြေးလာခဲ့စဉ် ၎င်းတို့တပ်ဖွဲ့ဝင်အချို့နဲ့အတူ အရှင်ဖမ်းဆီးခဲ့ပါတယ်။

သုံးလကျော်ကာလ အတွင်း ချင်းပြည်နယ် ပလက်ဝမြို့နယ်အပါဝင် ရခိုင်ပြည်နယ် ပေါက်တော၊ ကျောက်တော်၊ မင်းပြား နဲ့ မြောက်ဦးမြို့ရှိ စစ်ကောင်စီ တပ်ရင်း၊ တပ်စခန်း၊ ရဲစခန်းအားလုံးစုံကို AA မှ တစ်ခုမကျန် ထိုးစစ်ဆင်တိုက်ခိုက် သိမ်းပိုက်ရရှိထာားပါတယ်။

#RadioNUGLocalNews

#SpringRevolution