9th MAR 2024 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၄ မတ်လ ( ၉ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ CDF မတူပီကို တပ်မဟာ ၂ ခုအဖြစ် ပြောင်းလဲဖွဲ့စည်းမယ့် ညီလာခံအတည်ပြုချက် ထွက်ပေါ်လာ

 

ချင်းလဲန်းကာကွယ်ရေးတပ်ဖွဲ့ (မတူပီ) ကို တပ်မဟာ ၁၊ ၂ အဖြစ် ပြောင်းလဲဖွဲ့စည်းထားတယ်လို့ တပ်မဟာ ၁ က (မတ် ၇) ကြေညာချက်တစောင် ထုတ်ပြန်လိုက်ပါတယ်။

၂၀၂၄ ဖေဖော်ဝါရီ ၂၃ ကနေ ၂၅ အထိ ၃ ရက်ကြာပြုလုပ်ခဲ့တဲ့ ချင်းလဲန်းကာကွယ်ရေးတပ်ဖွဲ့ (မတူပီ) တတိယအကြိမ် မြောက်ညီလာခံအစည်းအဝေးဆုံးဖြတ်ချက်အရ အခုလို ပြောင်းလဲဖွဲ့စည်းတာလို့ ပြောထားပါတယ်။

တပ်မဟာ ၁ မှာ ချင်းလဲန်းကာကွယ်ရေးတပ်ဖွဲ့ (မတူပီ) လင်းယုန်တပ်ရင်းနဲ့ ဆီနိုင်းတပ်ရင်း ၂ ရင်း ပါဝင်ပြီး တပ်မဟာ ၂ မှာ ချင်းလဲန်းကာကွယ်ရေးတပ်ဖွဲ့ (မတူပီ) မှာ ကျန်ရှိနေတဲ့ တပ်ရင်းတွေ ပါဝင်တယ်လို့ ဆိုနိုင်ပါတယ်။

တပ်မဟာ ၁ အနေနဲ့ ချင်းတော်လှန်ရေးအင်အားစုအားလုံး လက်ခံနိုင်မယ့် ကာကွယ်ရေးမူဝါဒ မပေါ်ပေါက်ခင်အထိ လွတ်လပ်သောအဖွဲ့အစည်း (တပ်မဟာ) အဖြစ်ရပ်တည်မယ်လို့လည်း ထုတ်ပြန်ပါတယ်။

ရည်ရွယ်ချက်၊ လမ်းစဉ်တူညီတဲ့ ချင်းတပ်ပေါင်းစုတွေမှာ စစ်ရေးအရပါဝင်တာ၊ စစ်ကောင်စီကို တော်လှန်နေတဲ့ တိုင်းရင်းသားလက်န၊က်ကိုင်တွေနဲ့ မဟာမိတ်ဖွဲ့တာမျိုး ဆက်လက်လုပ်ဆောင်မယ်လို့ ဆိုထားပါတယ်။

အာဏာရှင် ကျရှုံးရေးနဲ့ တိုင်းရင်းသားတန်းတူညီမျှမှုကိုအခြေခံတဲ့ ဖက်ဒရယ်ဒီမိုကရေစီ ပြည်ထောင်စုပေါ်ပေါက်ရေးမှာ CRPH, NUG, NUCC တို့နဲ့ လက်တွဲပြီး ချင်းပြည်အတွင်းနဲ့ ချင်းပြည်ပြင်ပမှာ စစ်ကောင်စီတော်လှန်တို၊က်ခိုက်ရေးကို အရှိန်မြှင့်တင်သွားမယ်လို့ ချင်းလဲန်းကာကွယ်ရေးတပ်ဖွဲ့ (မတူပီ) တပ်မဟာ ၁ က အသိပေးပါတယ်။

 

========================

 

📌📌 ၂။ မင်းတပ်မြို့နယ်မှာ စစ်ကောင်စီက နှစ်ရက်ဆက်တိုက် ဗုံးကြဲတိုက်ခိုက်

 

ချင်းပြည်နယ်၊ မင်းတပ်မြို့နယ်၊ တိုက်နယ် ၁၃ ဘက်ကျေးရွာမှာ စစ်ကောင်စီက လေကြောင်းကနေ နှစ်ရက်ဆက်တိုက် ဗုံးကြဲတိုက်ခိုက်တယ်လို့ ဒေသခံတွေထံက သိရပါတယ်။

မင်းတပ်မြို့နယ်၊ လွေးသာကျေးရွာနဲ့ အောက်ချိုင်ကျေးရွာကြား တစ်နေရာမှာ စစ်ကောင်စီက မတ်လ ၁ ရက်နေ့၊ ညနေ ၇ နာရီအချိန်က တစ်ကြိမ်၊ ဒီနေ့ မတ်လ ၂ ရက်နေ့ ညနေ ၄ နာရီ တစ်ကြိမ် စုစုပေါင်း နှစ်ကြိမ် ဗုံးကြဲခဲ့တယ်လို့ ဆိုပါတယ်။

စစ်ကောင်စီရဲ့ ဒီနေ့ မတ်လ ၂ ရက်နေ့ကလေကြောင်း ဗုံးကြဲတိုက်ခိုက်မှုကြောင့် လူနေအိမ်အချို့ ထိခိုက်ပျက်စီးမှုရှိပြီး မပေါက်ကွဲသေးတဲ့ ဗုံးသီးတွေလည်း ရှိနေတယ်လို့ သိရပါတယ်။

ပလက်ဝမြို့နယ်လည်း စစ်ကောင်စီက မနေ့ မတ်လ ၁ ရက်နေ့က လေကြောင်းကနေ ဗုံးကြဲတိုက်ခိုက်တာကြောင့် ပြည်သူပိုင် စက်လှေအချို့ ထိခိုက်ပျက်စီးကြောင်း ဒေသခံတွေက ဆိုကြပါတယ်။

 

========================

 

📌📌 ၃။ စစ်မှုထမ်းဥပဒေ အတည်ပြုပြီး ရန်ကုန်မှာ ချင်းလူငယ် တစ်ဦး တပ်သားသစ်စုဆောင်းခံရပြီး တစ်ဦး ဖမ်းဆီးထိန်းသိမ်း ခံရ

 

နိုင်ငံသားတိုင်း စစ်မှုထမ်းရမယ့် ဥပဒေ အတည်ပြုပြဌာန်းပြီး ရန်ကုန်မှာ ရခိုင်ပြည်နယ်က ချင်းလူငယ် တစ်ဦး တပ်သားသစ် စုဆောင်းခံရပြီး တစ်ဦးဟာ ဖမ်းဆီးထိန်းသိမ်းခံရတယ်လို့ သတင်းရရှိပါတယ်။

ဖမ်းဆီး၊ တပ်သားသစ် စုဆောင်းခံရတဲ့ ချင်းလူငယ် နှစ်ဦးဟာ အသက် ၂၀ နှစ် နဲ့ အသက် ၂၄ နှစ်အရွယ်တွေဖြစ်ပြီး ၎င်းတို့ဟာ ရခိုင်ပြည်နယ် မြေပုံမြို့နယ်နဲ့ အမ်းမြို့နယ်က ချင်းလူငယ်တွေ ဖြစ်ပါတယ်။

တပ်သားသစ် စုဆောင်းခံရတဲ့ ချင်းလူငယ် တစ်ဦးဟာ ပြီးခဲ့တဲ့ ဖေဖော်ဝါရီ ၁၈ ရက်နေ့က ၎င်းနေတဲ့ အဆောင်မှ စျေးဝယ်ဖို့ အပြင်ထွက်ရာမှ စစ်ကောင်စီ တပ်သားတွေက မှတ်ပုံတင်နဲ့ ဖုန်း စစ်ဆေးပြီး ဖမ်းဆီးခေါ်သွားတာ ဖြစ်တယ်လို့ သိရပါတယ်။

"ပျောက်သွားကတည်းက ၅ ရက်၊ ၆ ရက်လောက်က ဖုန်းဆက်သွယ်လို့မရဘူး။ ဖုန်းဆက်လည်း စက်ပိတ်ထားတယ်။ သူ့ အဖေနဲ့ အမေက အရမ်းစိတ်ပူလို့ နေ့တိုင်း ငိုယိုနေတယ်။ အခုအဆက်သွယ်တော့ ရပြီ။ စစ်သားတွေက ဖမ်းပြီး သူ့တို့ဆီမှာရှိတယ်လို့ပြောတယ်"လို့ ၎င်းတို့နဲ့နီးစပ်တဲ့ အမည်မဖော်လိုသူ တစ်ဦးက ပြောပါတယ်။

ဒါ့အပြင် ရန်ကုန်လေဆိပ်ကနေ ပြန်လာတဲ့ ချင်းလူငယ် တစ်ဦးဟာလည်း ပြီးခဲ့တဲ့ ဖေဖော်ဝါရီ တတိယအပတ်က အမ်းလေဆိပ်မှာ စစ်ကောင်စီရဲ့ ဖမ်းဆီးထိန်းသိမ်းခံရပြီး ဒီနေ့ထိ ပြန်လွတ်ပေးခဲ့ခြင်း မရှိသေးဘူးလို့ သိရပါတယ်။

"ရန်ကုန်ကနေ လေယာဥ်နဲ့ ပြန်လာတာ။ အမ်းလေဆိပ်မှာ စစ်သားတွေက ကားနဲ့ချက်ချင်း ဖမ်းခေါ်သွားတယ်။ ဘာဖြစ်လို့ ဖမ်းတာလဲဆိုတာလဲ မသိရဘူး။ အခုထိ ပြန်မလွတ်ပေးသေးဘူး။ သူက နိုင်ငံရေးနဲ့ ပတ်သက်တာလည်း ဘာမှ မရှိဘူး။"လို့ ၎င်းနဲ့နီးစပ်သူတစ်ဦးက ဆိုပါတယ်။

#RadioNUGLocalNews

#SpringRevolution