6th APR 2024 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၄ ဧပြီလ ( ၆ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ မင်းတပ်မြို့နယ်အတွင်း အကြမ်းဖက်စစ်ကောင်စီမှ ဆက်လက် ဗုံးကြဲတိုက်ခိုက်မှုပြုလုပ်နေ။

 

ချင်းပြည်နယ်၊ မင်းတပ်မြို့နယ်၊ တိုက်နယ်အမှတ် (၁၃)၊ ဒိုင်ရ်ဒေသ ကျေးရွာတရွာအား ဧပြီလ (၂)ရက်နေ့ နေ့ခင်း ၂:၀၀ ဝန်းကျင်တွင် အကြမ်းဖက် စစ်ကောင်စီမှ တိုက်ပွဲဖြစ်ပွါးခြင်းမရှိဘဲ ဂျက်ဖိုက်တာ ၃ စီးဖြင့် အကြောင်းမဲ့ ဗုံးကြဲ တိုက်ခိုက်ခဲ့ ကြောင်း သိရပါတယ်။

ထိုဗုံးကြဲတိုက်ခိုက်မှုတွင် ပေါင် ၅၀၀ဗုံး၊ မီးလောင်ဗုံး ၁၀ လုံးဝန်းကျင်ခန့်ဖြင့် ဗုံးကြဲတိုက်ခိုက်ခဲ့ကြောင်းသိရှိရပြီး၊ ပြည်သူနေအိမ် ၃ လုံးမီးလောင်ပျက်စီးပြီး၊ စာသင်ကျောင်းနှင့်အတူ ပြည်သူနေအိမ် ၇ လုံးခန့် ထိခိုက်ပျက်စီးသွားတယ်လို့ မြေပြင်သတင်းရင်းမြစ်မှ သိရှိရပါတယ်။

ပြည်သူ ၅ ဦးက ထိခိုက်ဒဏ်ရာများ ရရှိကြပြီး၊ တစ်ဦးမှာ ခြေတစ်ဖက် ဆုံးရှုံးလိုက်ရတယ်လို့ သိရပါတယ်။ ရွာ ၏ပတ်ပတ်လည်တွင် တောမီးများလောင်နေဆဲဟုသိရပြီး၊ လိုင်းအခက်အခဲကြောင့် ပျက်စီးဆုံးရှုံးမှု အသေးစိတ်ကိုတော့ ဆက်လက်စုံစမ်းနေဆဲ ဖြစ်ပါတယ်။

မင်းတပ်မြို့နယ်ရှိ ကျေးရွာတချို့ကို တိုက်ပွဲဖြစ်ပွါးခြင်းမရှိဘဲ အကြမ်းဖက်စစ်ကောင်စီမှ မတ်လနှင့်ဧပြီလအတွင်းမှာ မကြာခဏဆိုသလို လေကြောင်းအသုံးပြုကာ ဗုံးကြဲတိုက်ခိုက်နေတယ်လို့ သိရပါတယ်။

 

========================

 

📌📌 ၂။ စီမံချက် အခိုင်အမာချမှတ်ပြီး စစ်ရေးအရှိန်မြှင့်မယ်လို့ ချင်းကာကွယ်ရေးတပ်ဖွဲ့ (မင်းတပ်) ကြေညာ

 

ချင်းပြည်၊ ချင်းအမျိုးသားရေး ကိစ္စရပ်အားလုံးမှာ တန်းတူညီမျှမှု၊ တရားညီမျှမှုရှိပြီး ချင်းပြည်သူအားလုံးလက်ခံနိုင်တဲ့ ဖက်ဒရယ်အစိုးရပေါ်ပေါက်ရေးအတွက် “ချင်းညီနောင်” နဲ့အတူ စစ်ရေး၊ နိုင်ငံရေးတို့မှာ တစိုက်မတ်မတ် လုပ်ဆောင်သွား မယ်လို့ ချင်းကာကွယ်ရေးတပ်ဖွဲ့ (မင်းတပ်) က ကြေညာလိုက်ပါတယ်။

ကာကွယ်ရေးတပ်ဖွဲ့ရဲ့ ဒုတိယအကြိမ်အထွေထွေညီလာခံကို အခုဧပြီလဆန်းမှာ ၂ ရက်ကြာကျင်းပခဲ့ပြီးတဲ့နောက် အခုလို ကြေညာလာတာပါ။

ချင်းကာကွယ်ရေးတပ်ဖွဲ့ (မင်းတပ်) ထိန်းချုပ်နယ်မြေအတွင်းမှာ မင်းတပ်ပြည်သူလူထုရဲ့ စည်းလုံးမှုပျက်ပြားစေဖို့ လုပ်ဆောင်သူ ဘယ်အဖွဲ့အစည်း၊ ဘယ်ပုဂ္ဂိုလ်ကိုမဆို ပြ၊တ်ပြ၊တ်သားသားအရေးယူပြီး ချင်းအမျိုးသားကောင်စီ (မင်းတပ်) CNC - Mindat ကို ပိုမိုကျစ်လစ်ခိုင်မာအောင် တည်ဆောက်သွားမယ်လို့လည်း ပြောပါတယ်။

ချင်းကာကွယ်ရေးတပ်ဖွဲ့ (မင်းတပ်) အင်အား ခိုင်မာတောင့်တင်းလာအောင် ယနေ့အချိန်ထိ တစိုက်မတ်မတ်ပူးပေါင်း ပံ့ပိုးပေးသူတွေကို ကျေးဇူးတင်ရှိတယ်လို့ ဆိုပါတယ်။

၂၀၂၄ ခုနှစ်အတွင်း ကာကွယ်ရေးစစ်ရေးစီမံချက် အခိုင်အမာချမှတ်ပြီး စစ်အာဏာရှင် ချေမှုန်းရေးကို အရှိန်အဟုန်မြှင့်တင်သွားမယ်လို့လည်း ချင်းကာကွယ်ရေးတပ်ဖွဲ့ (မင်းတပ်) က ကြေညာထားပါတယ်။

 

========================

 

📌📌 ၃။ စစ်ကောင်စီဌာနချုပ် နေပြည်တော် လေတပ်စခန်းနဲ့ စစ်ချုပ်ရုံးကို ဝေဟင်က တို၊က်ခိုက်ခဲ့ကြောင်း MoD အတည်ပြု

 

နေပြည်တော် စစ်ရုံးချုပ်အပါအဝင် အေလာ လေတပ်နေရာတွေကို ဧပြီလ ၄ရက်နေ့ အစောပိုင်းက Drone တွေနဲ့ တိုက်ခိုက်ခဲ့တယ်လို့ MoD NUG က အတည်ပြုထုတ်ပြန်လာပါတယ်။

ပြည်သူ့ကာကွယ်ရေးတပ်မတော် (PDF) အထူးတပ်ဖွဲ့နဲ့ ရှာထူးဝေါ် နည်းပညာတပ်ဖွဲ့ Kloud Drone တပ်ခွဲက စစ်ချုပ်ရုံးကို တို၊က်ခိုက်ခဲ့ပြီး ပြည်သူ့ကာကွယ်ရေးတပ်မတော် (PDF) အထူးတပ်ဖွဲ့နဲ့ ရှာထူးဝေါ် နည်းပညာတပ်ဖွဲ့ Leather Weapon တပ်ခွဲတို့က အေလာလေတပ်ကို တပြိုင်နက်တည်း တို၊က်ခိုက်ခဲ့တာလို့ ဆိုပါတယ်။

ပြည်တွင်းသတင်းဌာန တခုဖြစ်တဲ့ PDF Insight က စစ်ကောင်စီဌာနချုပ် နေပြည်တော် စစ်ချုပ်ရုံးနဲ့ အေလာလေတပ်ကို ဒရုန်းအစင်း ၃၀ နီးပါးနဲ့ တိုက်ခိုက်ခဲ့တာလို့ ဖော်ပြပါတယ်။

နေပြည်တော်ရှိ စစ်ရေးပစ်မှတ်တွေကို တော်လှန်ရေးအင်အားစုတွေက ရှော့တိုက်ဒုံးတွေနဲ့ တို၊က်ခိုက်တာမျိုးရှိခဲ့ဖူးပေမယ့် ဒရုန်းအသုံးပြု တိုက်ခို၊က်တာကတော့ အခုပထမဆုံးအကြိမ်လို့ ဆိုရမှာပါ။

စစ်ကောင်စီက နေပြည်တော်မှာ သင်္ကြန်ပွဲတော် အကြီးအကျယ်ကျင်းပဖို့ ပြင်ဆင်နေချိန် အခုလိုတိုက်ခိုက်ခံရတာလည်း ဖြစ်ပါတယ်။

#RadioNUGLocalNews

#SpringRevolution