13th MAY 2024 - Morning Daily News by Radio NUG

📌 (ချင်း တိုင်းရင်းသား - Matupi ) ထုတ်လွှင့်မှု အစီအစဥ် ၂၀၂၄ မေလ ( ၁၃ ) ရက်နေ့ ရပြည်တွင်းသတင်းများ

📌📌 ၁။ မင်းတပ်မြို့မှစစ်ကောင်စီတပ်သားတစ်ဦး CDF-Mindat ထံလက်နက်နဲ့အတူ အလင်း၀င်

 

The Matupi Times မေ ၈၊၂၀၂၄

ချင်းပြည်နယ်၊ မင်းတပ်မြို့အခြေစိုက် ခလရ (၂၇၄)တပ်ရင်းမှ စစ်ကောင်စီတပ်ဖွဲ့ဝင်တစ်ဦးသည် CD-Mindat ထံလက်နက်နဲ့အတူမေလ ၅ ၊၂၀၂၄ ရက်နေ့တွင်အလင်း၀င်လာကြောင်း သိရပါတယ်။

အလင်း၀င်လာသူသည် ကျောက်ထုမြို့အခြေစိုက် အမတ(၃၆၈) အမြောက်တပ်ရင်းမှ တပ်ကြပ်၀င်းလေး ဆိုသူဖြစ်ပြီး မင်းတပ်မြို့စစ်တပ်တွင်တွဲဘက်အဖြင့် တာ၀န်ထမ်းနေသူဖြစ်တယ်လို့ဆိုပါတယ်။

အလင်း၀င်ရောက်လာစဥ္ လက်နက်အပြည့်အစုံ (MA3 ( ၁) လက်၊ ကျည်အိမ်(၃)ခု၊ကျည်ဆံ (၂၅၆)တောင့် ) ဖြင့် အလင်း၀င်ရောက်လာခဲ့တာကြောင့် ဆုငွေ ကျပ်သိန်း (၅၀)ကျပ် ချီးမြှင့်ခဲ့တယ်လို့ CDF-Mindat ကဖော်ပြပါတယ်။

 

========================

 

📌📌 ၂။ Malaysia Fight League တွင်ပါကစ္စတန်နိုင်ငံသားနဲ့ ထိုးသတ်မည့် ချင်းလူငယ်ဖိုက်တာ Timothy

 

The Matupi Times မေလ ၉ ၊ ၂၀၂၄

မလေးရှားနိုင်ငံတွင် ကျင်းပပြုလုပ်မည့် Malaysia Fight League boxing ပြိုင်ပွဲတွင် ချင်းလူငယ်ဖို်က်တာ MT Timothy သည် ပါကစ္စတန်နိုင်ငံသား Siyukri (၃၀)နှစ် နဲ့ယှဉ်ပြိုင်ထိုးသတ်သွားမယ်လို့ သိရပါတယ်။ အဆိုပါ Malaysia Fight League ပြိုင်ပွဲတွင် MMA, Thai, Kick-Boxing, Boxing တို့ပါဝင်ပြီး Star Avenue Mall, Malaysia မှာလာမယ့် မေလ ၁၈ ၊ ၂၀၂၄ ရက်နေ့တွင် ပြုလုပ်သွားမယ် လို့သိရပါတယ်။

ချင်းဖိုက်တာအနေနဲ့ မတ်လ ၃ ရက်နေ့နှင့် မေလ ၈ ရက်နေ့တို့တွင် ယှဉ်ပြိုင်ထိုးသတ်ဖို့ စီစဉ်ထားတဲ့့ပွဲစဉ်တွေလည်းပျက်ပြယ်ရပြီး ယခုထိုးသတ်မယ့်ပွဲစဉ် ယခင်ပွဲတွေလိုမပျက်ဖို့မျှော်လင့်နေကြောင်း Timothy က Matupi Times ကိုပြောပါတယ်။

ပြိုင်ဘက် ပါကစ္စတန်နိုင်ငံသားသည် နောက်ဆုံးယှဉ်ပြိုင်ထိုးသတ်သည့် Boxing တွင် (၄)ပွဲနိုင် (၁)ပွဲရှုံးထားပြီး ချင်းလူငယ် ဖိုက်တာ Timothy သည် နောက်ဆုံးယှဉ်ပြိုင်ထိုးသတ်ခဲ့တဲ့ Boxing (၂)ပွဲလုံးကိုအနိုင်ရရှိထားပါတယ်။

 

========================

 

📌📌 ၃။ မတူပီမြို့တွင် စစ်ကောင်စီက တက္ကသိုလ်ဝင် စာမေးပွဲ ပြန်လည်ကျင်းပပေး

 

The Matupi Times မေလ ၉ ၊ ၂၀၂၄

ချင်းပြည်နယ် ၊ မတူပီမြို့နယ်တွင် စစ်ကောင်စီမှ တက္ကသိုလ်ဝင်တန်းစာမေးပွဲ ပြန်လည်ကျင်းပပေးခဲ့ပြီး ကျောင်းသူ၊ကျောင်းသားအချို့ ဝင်ရောက်ဖြေဆိုသူတွေရှိကြောင်း ဒေသခံများထံက သိရပါတယ်။

အဆိုပါ စာမေးပွဲကိုပြီးခဲ့တဲ့ ဧပြီလ ၂၉ ရက်နေ့မှ မေလ ၆ ရက်နေ့အထိ မတူပီမြို့ စန်ဘောင်ရပ်ကွက်ရှိ ၊ အထက ၂ ကျောင်းတွင်ပြန်လည်ကျင်းပပေးခဲ့တာဖြစ်ပြီး ကျောင်းသား/ကျောင်းသူဦးရေ (၄၀)ခန့် ဝင်ရောက်ဖြေဆိုခဲ့ကြသလို စာမေးပွဲအတွက်လိုအပ်တဲ့ မေးခွန်းစာရွက်စာတမ်းတွေကို စစ်ကောင်စီကလေယာဉ်ဖြင့်လာရောက်ပို့ဆောင်ပေးခဲ့တယ်လို့ Matupi Times ရဲ့ဆက်သွယ်မေးမြန်းချက်အရသိရပါတယ်။

ပြီးခဲ့တဲ့ ၂၀၂၄ ခုနှစ်၊ မတ်လ အတွင်းတွင် ကျင်းပခဲ့သည့် တက္ကသိုလ်ဝင်တန်းစာမေးပွဲကိုလုံခြုံရေးအရ စာမေးပွဲဖြေဆိုခွင့်မရရှိခဲ့သည့် ကျောင်းသူ/ကျောင်းသားများအတွက် ယခုလိုပြန်လည်ကျင်းပပေးခဲ့တာဖြစ်ပါတယ်။

ချင်းပြည်နယ်အတွင်းမှာ ၂၀၂၃ - ၂၀၂၄ ခုနှစ်၊ မတ်လထဲမှာကျင်းပခဲ့တဲ့ တက္ကသိုလ်ဝင်တန်းစာမေးပွဲကို ကျောင်းသား/ကျောင်းသူ (၄၀၀) ခန့်ဝင်ရောက်ဖြေဆိုခဲ့ကြတယ်လို့ သိရပါတယ်။

 

========================

 

📌📌 ၄။ ရခိုင်ပြည်၊ ဘူးသီးတောင် စကခ (၁၅) က ဒုတပ်မမှူးနဲ့ တပ်ဖွဲ့ဝင်တွေ AA ထံ လက်နက်ချ

 

The Matupi Times မေလ ၆၊ ၂၀၂၄

ရခိုင်ပြည်နယ် ဘူးသီးတောင်အခြေစိုက် စစ်ကောင်စီ၏ စကခ(၁၅) တပ်မဌာနချုပ်ကို အာရက္ခတပ်တော်(AA)မှ တိုက်ခိုက်သိမ်းပိုက်စဉ် ဒုတပ်မမှူးအပါအဝင် စကစ စစ်သားများ၊ မိသားစုဝင်များ လက်နက်ချအညံ့ခံခဲ့ကြောင်း ရုပ်သံမှတ်တမ်းကို ရက္ခိုင့်တပ်တော်(AA)ကထုတ်ပြန်ပါတယ္။

AA က ထုတ်ပြန်တဲ့ ဗီဒီယိုဖိုင်မှာ ရာနဲ့ချီတဲ့ စစ်ကောင်စီတပ်သားတွေ၊ တပ်မိသားစုဝင်တွေ၊ ဒဏ်ရာရသူတွေနဲ့ စစ်ကောင်စီတပ်က သင်တန်းပေးထားတဲ့ ရိုဟင်ဂျာတွေလည်း ပါဝင်တာကို တွေ့ရပါတယ်။ အရေအတွက် အတိအကျကိုတော့ AA က ထုတ်ပြန်ထားတာမျိုးမရှိပါဘူး။

ဘူးသီးတောင်မြို့အခြေစိုက် အမှတ် ၁၅ စစ်ဆင်မှုကွပ်ကဲရေးဌာနချုပ်(စကခ ၁၅) နဲ့ လက်အောက်ခံ တပ်တချို့ကို ၁၂ ရက်ကြာ ထိုးစစ်ဆင်တိုက်ခိုက်ပြီးနောက် မေလ ၂ ရက်နေ့မှာ ရက္ခိုင့်တပ်တော် (AA) က သိမ်းပိုက်ခဲ့တာပါ။

အဲဒီတပ်မဌာနချုပ်ကို ကာလအတန်ကြာ ပိတ်ဆို့ဖြတ်တောက်ပြီး ထိုးစစ်ဆင် တိုက်ခိုက်ခဲ့အချိန်မှာ လုံးဝမလွတ်မြောက်နိုင်တော့တဲ့အတွက် စစ်ကောင်စီတပ်သားတွေက လက်နက်ချခဲ့တာလို့ဆိုပါတယ်။

 

========================

 

📌📌 ၅။ ဆောမြို့နယ်အတွင်း စစ်ကောင်စီ၏လေကြောင်းတိုက်ခိုက်မှုကြောင့် လူဦးရေ ၂၀ခန့်သေဆုံးပြီး ၃၀ကျော်ခန့် ထိခိုက်ဒဏ်ရာရ

 

The Matupi Times မေလ ၉၊ ၂၀၂၄

မကွေးတိုင်း ဆောမြို့နယ်၊ကျောက်ထုတိုက်နယ်၊ အကြည်ပန်းမလွန်းကျေးရွာ ဘုန်းကြီးကျောင်းအား မေလ ၉ရက်နေ့ မနက် ၁၁နာရီ ဝန်ကျင်ခန့်တွင် တိုက်ပွဲဖြစ်ပွားခြင်းမရှိဘဲ လေကြောင်းတိုက်ခိုက်ခံရမှုကြောင့် ခန့်မှန်းလူ‌ဦးရေ ဘုန်းကြီးတစ်ပါးအပါအဝင် အရပ်သားပြည်သူ (၂၀) ဦးခန့်သေဆုံးကာ လူဦးရေ (၃၀)ကျော်ထိခိုက်ဒဏ်ရာရခဲ့ကြောင်းသိရပါတယ်။

 

ယင်းဖြစ်စဉ်နဲ့ပတ်သက်၍ ဒေသခံပြည်သူတစ်ဦးကတော့ ""ဒီနေ့မနက် ၁၁ နာရီလောက် ဘုန်းကြီးဆွမ်းစားနေချိန်မှာ ဂျက်ဖိုက်တာတစ်စီးနဲ့ ဘုန်းကြီးကျောင်းပေါ်တည့်တည့်ကို ပေါင် ၅၀၀ ဗုံးနဲ့ချခံလိုက်ရတော့ ဘုန်းကြီးကျောင်းကြီးက တစ်ခါထဲ မီးလောင်ပြီး ပြိုကျသွားတယ်။ ကျောင်းအောက်မှာ ယာဉ်လိုင်းအတွက် အစည်းဝေးလုပ်နေသူ အများအပြား သေဆုံးပြီးတော့ လူဦးရေ ၃၀ ကျော်လောက် ဒဏ်ရာရခဲ့တယ်။ ခုချိန်ထိ ဆွဲထုတ်လို့ရသလောက် အလောင်း ၁၄လောင်းရှိပြီ။ အားလုံးမီးလောင်ထားတဲ့အတွက်ဘယ်သူဘယ်ဝါဆိုတာမသိရတော့။ မီးထဲပါသွားဝာာရော၊ ရှာလို့မရတော့တာတွေရော အကုန်ဆိုရင် ခန့်မှန်းခြေ ၂၀လောက်တော့ သေနိုင်တယ်လို့ "ဒေသခံသတင်း ယောအလင်းတန်း ကိုပြောပါတယ်။

ယခုကဲ့သို့ ဗုံးကြဲချမှုမပြုခင် အကြည်ပန်းမလွန်းရွာဖက်သို့ ဖုန်းလိုင်းများဖြတ်တောက်ထားပြီး ကျောက်ထုအမြှောက်တပ်မှလဲ ဒရုန်းဖြင့် ကင်းထောက်မှုတွေပြုလုပ်ခဲ့တယ်လို့ဒေသခံသတင်းထံကသိရပါတယ်။

 

========================

 

📌📌 ၆။ ကန်ပက်လက်မြို့နယ္အတွင်းရှိ Non-CDM ဝန်ထမ်းများ ရက်ပေါင်း(၆၀)အတွင်းအလင်းဝင်ရန်သတိပေး

 

The Matupi Times မေလ ၁၀ ၊ ၂၀၂၄

ကန်ပက်လက်မြို့နယ်အတွင်းရှိ စစ်ကောင်စီလက်အောက်တွင် ဆက်လက်တာဝန်ထမ်းဆောင်နေသော ဌာနဆိုင်ရာဝန်ထမ်းများအနေဖြင့် ကန်ပက်လက်မြို့နယ်ပြည်သူ့အုပ်ချုပ်ရေးအဖွဲ့ထံ ရက်ပေါင်း(၆၀)အတွင်း အမြန်ဆုံးအလင်းဝင်ကြဖို့အတွက် သတိထုတ်ပြန်တယ်။

 

၁။ ချင်းပြည်နယ်၊ ကန်ပက်လက်မြို့နယ်အတွင်းရှိ အကြမ်းဖက်စစ်ကောင်စီလက်အောက်ခံ Non-CDM ဝန်ထမ်းများအနေဖြင့် လက်ရှိ ဆောင်ရွက်နေသည့် ရုံးလုပ်ငန်းများကို ရပ်တန့်၍ ကန်ပက်လက်မြို့နယ်ပြည်သူ့အုပ်ချုပ်ရေးအဖွဲ့ထံသို့ ၂၀၂၄ ခုနှစ်၊ မေလ ၉ ရက်နေ့မှစ၍ ရက်ပေါင်း (၆၀) အတွင်း အလင်းဝင်ရောက်ကြရန် သတိပေးလိုက်သည်။

 

၂။ အလင်းဝင်ရောက်မည့် Non-CDM ဝန်ထမ်းများသည် ရုံးဌာနများအတွင်း အသုံးပြုနေ သည့် သို့မဟုတ် သိုလှောင်ထားသည့် သိုလှောင်ပစ္စည်း၊ ပစ္စည်းကိရိယာ၊ စာရွက်စာတမ်းနှင့် အခြားပစ္စည်းများကို မြို့နယ်ပြည်သူ့အုပ်ချုပ်ရေးအဖွဲ့ထံ စနစ်တကျ အပ်နှံရန် ကြိုတင်ပြင် ဆင်မှုများ ဆောင်ရွက်ထားရမည်။

 

၃။ သို့ဖြစ်ပါ၍ ၂၀၂၄ ခုနှစ်၊ ဇူလိုင်လ ၇ ရက်နေ့အထိ အလင်းဝင်ရောက်ခြင်းမရှိသည့် Non-CDM ဝန်ထမ်းများကို တည်ဆဲဥပဒေနှင့်အညီ အရေးယူ ဆောင်ရွက်သွားမည်ဖြစ်ကြောင်း အသိပေးထုတ်ပြန်ကြေညာလိုက်သည်။

#RadioNUGLocalNews

#SpringRevolution